SEKSYON 100

Kapahayagan na ipinagtao ki Joseph Smith an Propeta asin Sidney Rigdon, sa Perrysburg, New York, Oktubre 12, 1833. HS 1:416-421. An duwang katugangan, na mayo sa saindang mga pamilya sa laog nin nagkapirang mga aldaw, nakamati nin kahandalan manungod sainda.
*******
1-4, Si Joseph asin Sidney magbabalangibog nin ebanghelyo para sa kaligtasan nin mga kalag; 5-8, Ini ipagtatao sainda sa oras na iyan kun ano an saindang sasabihon; 9-12, Si Sidney iyo an tagapagtaram asin si Joseph an magin tagapagpahayag asin makusog sa testimonya; 13-17, An Kagurangnan magpapangataman nin sarong dalisay na mga katawohan, asin an mga masinunod-sunod maliligtas.
*******
KATOTOHANAN, kaya nagsabi an Kagurangnan na saindo, sakuyang mga amigo na si Sidney asin Joseph, na an saindong mga pamilya marahay sa kamugtakan; Sinda yaon sa sakuyang mga kamot, asin Ako magigibo sa sainda na sa paghuhuna kong marahay; nin huli ta sakuya igwa kan gabos na kapangyarihan.
2 Kun kaya, magsunod sakuya, asin magdangog sa hulit na Ako magtatao sa saindo.
3 Hilnga, asin uya, Ako igwa nin kadakulon na mga katawohan sa lugar na ini, sa mga rehiyon sa palibot; asin sarong mapusog na pintuan an pagbubuksan sa mga rehiyon sa palibot kaining kadagaan sa may sirangan.
4 Kun kaya, Ako, an Kagurangnan, nagtugot saindo na magdigde sa lugar na ini; nin huli ta kaya ini kapakinabangan sakuya para sa kaligtasan nin mga kalag.
5 Kun kaya, katotohanan Ako nagsasabi sa saindo, ipaglangkaw an saindong mga boses para sa mga katawohang ini; magtaram nin mga kaisipan na Ako an magbubugtak sa saindong mga puso, asin kamo dae pagriribongan sa atubangan nin mga tawo;
6 Nin huli ta ini ipagtatao sa saindo sa tamang oras mismo, iyo, sa mismong pagkakataon, na kun ano an saindong mga sasabihon.
7 Pero sarong kasugoan Ako magtatao sa saindo, na kamo magdedeklara nin anuman na mga bagay na saindong ipagdeklara sa pangaran ko, sa solemnidad nin puso, sa espiritu nin kahuyoan, sa gabos na mga bagay.
8 Asin Ako matao sa saindo kaining promise, na habang kamo magigibo kaini an Banal na Espiritu magbabanaag sa pagpapatotoo sa gabos na mga bagay na kun ano baya an saindong sasabihon.
9 Asin ini kapakinabangan sakuya na ika, sakuyang surugoon na si Sidney, na dapat na magin tagapagtaram sa mga katawohang ini; iyo, katotohanan, Ako an mag-oordina saimo sa pangapudang ini, siring man magin sarong tagapagtaram kan sakuyang surugoon na si Joseph.
10 Asin Ako an magtatao sa saiya nin kapangyarihan na magin makusog sa testimonya.
11 Asin Ako an magtatao sa saimo nin kapangyarihan na magin makusog sa pagpapaliwanag kan gabos na mga kasuratan, na ika puwede magin sarong tagapagtaram sa saiya, asin siya magigin sarong tagapagpahayag sa saimo, na tangani baya ika mapuwedeng makaaram na may kaseguruhan kan gabos na mga bagay mapanungod sa mga bagay kan sakuyang kahadean sa ibabaw nin kinaban.
12 Kun kaya, ipagpadagos an saindong paglalakbay asin tugutan an saindong mga puso na magrukyaw; nin huli ta hilnga, asin uya, Ako kaiba nindo sagkod sa katapusan.
13 Asin ngonyan Ako matao sa saindo nin sarong tataramon manunungod sa Sion. An Sion pagtutubuson, maski na siya pinagpakulan sa kadikit na panahon.
14 An saindong katugangan, an sakuyang mga surugoon na sinda Orson Hyde asin John Gould, yaon sa sakuyang mga kamot; asin habang sinda nagsusunod kan sakuyang mga kasugoan sinda maliligtas.
15 Kun kaya, tugutan na an saindong mga puso malinga; nin huli ta an gabos na mga bagay mangyayari para sa karahayan sa sainda na naglalakaw sa katanosan, asin para sa sanktipikasyon kan simbahan.
16 Nin huli ta Ako mangangataman para sa sadire ko nin sarong dalisay na mga katawohan, na magsisirbe sakuya sa pagkamatanos;
17 Asin an gabos na nag-aapod sa pangaran nin Kagurangnan asin magsusunod kan saiyang mga kasugoan, maliligtas. Arog kaini. Amen.

SEKSYON 99

Kapahayagan na ipinagtao sa paagi ki Joseph Smith an Propeta para ki John Murdock, Agosto 1832, sa Hiram, Ohio. Maski na an mga edisyon kan Doktrina asin mga Tipan magpoon kaidtong 1876 pinaglista ining Kapahayagan sas Kirtland, Agosto 1833, an mga naenot na mga edisyon asin ibang historikong mga record nagpapatunay na tama an impormasyon.
*******
1-8, Si John Murdock pinag-apudan na magproklama nin ebanghelyo, asin an siisay na magresibe saiya nagresibe sa Kagurangnan asin makakaguno nin pagkaherak.
*******
HILNGA, kaya nagsabi an Kagurangnan sa sakuyang surugoon na si John Murdock--- Ika pinag-apudan na magpaduman sas sirangan na mga nasyon na magharong-harong, magbaryo-baryo, asin magsiyudad-siyudad, tanganiang iproklama an sakuyang daeng katapusan na ebanghelyo sa mga para-erok diyan, na yaon sa katahawan nin persekusyon asin karigsokan.
2 Asin an siisay na magresibe saimo nagresibe sakuya; asin ika magkakaigwa nin kapangyarihan na magdeklara kan sakuyang tataramon sa paagi nin demonstrasyon kan sakuyang Banal na Espiritu.
3 Asin siisay na nagreresibe saimo siring sa sarong sadit na ake, nagresibe kan sakuyang kahadean; asin paladin sinda, nin huli ta sinda makakaguno nin pagkaherak.
4 Asin an siisay na nagsikwal saimo pagsisikwalon kan sakuyang Ama asin kan saiyang harong; asin saimong paghuhugasan an saimong mga bitis sa sikretong mga lugar sa may dalan bilang sarong testimonya laban sainda.
5 Asin hilnga, asin uya, Ako minaabot tulos sa paghukom, tanganing kumbinsihon an gabos kan saindang bakong makadiyos na mga gibo na saindang naginibohan laban sakuya, siring na ini sinurat ko sa bolyum kan libro.
6 Asin ngonyan, katotohanan Ako nagsasabi sa saimo, na ini bakong kapakinabangan na ika dapat na maghale sagkod na an saimong kaarakian mataw-anan kan saindang mga pangangaipo, asin magpaduman sa bishop nin Sion.
7 Asin pagkatapos nin kadikit na mga taon, kun ika nagmamawot pang gayo sakuya, ika puwedeng magpaduman man sa marahay-rahayon na kadagaan, tanganing pangatamanan an saimong kamanahan;
8 O sa ibang paagi ika magpapadagos sa pagproklama kan sakuyang ebanghelyo sagkod na ika pagkuahon. Amen.

SEKSYON 98

Kapahayagan na ipinagtao sa paagi ki Joseph Smith an Propeta, sa Kirtland, Ohio, Agosto 6, 1833. HS 1:403-406. Ining kapahayagan nagluwas kasunod kan persekusyon sa mga banal sa Missouri. Ini natural na an mga banal sa Missouri, na nagsasapo nin kulog sa hawak asin man nagkawararaan nin pagsadire, nakakamati nin sarong inklinasyon na bumawi asin magbalos. Kun kaya an Kagurangnan nagtao kaining kapahayagan. Minsa an ibang mga bareta kan mga problema sa Missouri mayong dudang nakaabot na sa Propeta na yaon sa Kirtland (900 milya an rayo), an kaseryosohan kan sitwasyon na puwedeng naaaraman na niya sa petsang ini sa paagi sana nin kapahayagan.
*******
1-3, An mga kasakitan kan mga banal magigin para sa saindang karahayan; 4-8, An mga banal dapat na makiuyon sa konstitusyunal na batas nin kadagaan; 9-10, Honesto, madunong, asin marahayon na mga tawo dapat na pagsuportaran para sa secular na mga opisina; 11-15, Sinda na nagpatimasan kan saindang mga buhay nin huli sa kausa nin Kagurangnan magkakamit nin eternal na buhay; 16-18, Ipagsikwal an giyera asin iproklama an katuninongan; 19-22, An mga banal sa Kirtland pinag-anggutan asin pinagsugo na magsolsol; 23-32, An Kagurangnan nagpahayag kan saiyang mga batas manunungod sa mga persekusyon asin mga kasakitan na pinagpamati sa saiyang mga katawohan; 33-38, An giyera maninigo sana kunsoarin an Kagurangnan iyo an nagsusugo kaini; 39-48, An mga banal dapat na magpatawad sa saindang mga kaiwal, an kun sinda magsosolsol, makaka-eskapo man sa kapung-utan nin Kagurangnan.
*******
KATOTOHANAN Ako nagsasabi sa saindo na sakuyang mga amigo, dae matakot, tugutan na an saindong mga puso malinga; iyo, magrukyaw sagkod pa man, asin sa gabos na mga bagay magtao nin pasasalamat;
2 Naghahalat nin matuninong sa Kagurangnan, nin huli ta an saindong mga pangadyeon nadangog na kan mga talenga nin Kagurangnan nin Sabaoth, asin pinagrekord na igwa kaining selyo asin testamento--- an Kagurangnan nanumpa asin nagdekrito na an mga ini ipagtatao.
3 Kun kaya, siya nagtatao kaining promise sa saindo, na may dae nagbabag-ong tipan na sinda mauutob; asin an gabos na mga bagay na kun saen kamo nagsakit magigibong maipagkasararo para sa saindong karahayan, asin sa kamurawayan kan sakuyang pangaran, nagsabi an Kagurangnan.
4 Asin ngonyan, katotohanan Ako nagsasabi sa saindo mapanungod sa mga batas nin kadagaan, ini an sakuyang kagustuhan na an sakuyang mga katawohan dapat na mag-obserbang gibohon an gabos na mga bagay kan anuman na Ako an nagsusugo sainda.
5 Asin an batas nin kadagaan na konstitusyunal, na nagsusuporta kaiyang prinsipyo nin kalayaan sa pagmamantiner kan mga karapatan asin mga pribilihiyo, na pagsasadire kan bilog na nilalang, asin ini maninigo sa atubangan ko.
6 Kun kaya, Ako, an Kagurangnan, pinagkakanigo kamo, asin an saindong mga katugangan sa sakuyang simbahan, sa pakikipag-uyunan kaining batas na iyo an konstitusyunal na batas nin kadagaan;
7 Asin siring na mapanungod sa batas nin tawo, an anuman sobra o kulang kesa kaini, naggigikan sa maraot.
8 Ako, an Kagurangnang Diyos, pinaghimo kamong malaya, kun kaya kamo Malaya nanggad; asin an batas naghihimo man sa saindo na malaya.
9 Daeng pagkukulang, kunsoarin na an mga marigsok an nagpapamahala an mga katawohan nagmomondo.
10 Kumbaya, an honestong mga tawo asin madudunong na mga tawo dapat na iyo an maigot na paghahanapon, asin an mga marahayon na mga tawo asin madudunong na mga tawo saindo dapat na obserbarang pagtarabangan; ta kun bako an anuman na kulang kesa sa mga ini naggigikan sa maraot.
11 Asin Ako nagtatao sa saindo nin sarong kasugoan, na saindo dapat na bayaanan an gabos na mararaot asin magdukot kamo sa gabos na marahayon, na tanganing kamo mamumuhay sa lambang tataramon na minaluwas gikan sa nguso nin Diyos.
12 Nin huli ta siya magtatao sa mga matapat nin linya sa linya, tugon sa tugon; asin Ako an magsusubok saindo asin probaran kamo magpoon ngonyan.
13 Asin an siisay man na naghaya kan saiyang buhay sa sakuyang kausa, nin huli sa kapakanan kan sakuyang pangaran, makakanagbo kaini giraray, na iyo ngani an eternal na buhay.
14 Kun kaya, dae kama matakot sa saindong mga kaiwal, nin huli ta Ako nagdekrito sa sakuyang puso, nagsabi an Kagurangnan, na Ako an magprobar saindo sa gabos na mga bagay, kun baya kamo masunod sa sakuyang tipan, maski sa kagadanan, na tangani baya kamo managboan na maninigo.
15 Nin huli ta kun kamo dae masunod sa sakuyang tipan kamo bakong maninigo sakuya.
16 Kun kaya, ipagsikwal an giyera asin ipagproklama an katuninongan, asin maghanap nin maigot tanganing ipagbalik an mga puso kan mga kaarakian pasiring sa saindang mga ama, asin an mga puso nin mga ama pasiring sa mga kaarakian;
17 Asin giraray, an mga puso kan mga Hudiyo pasiring sa mga propeta, asin an mga propeta pasiring sa mga Hudiyo; na baka baya Ako maabot asin paghahampakon an bilog na kinaban nin sarong sumpa, asin an bilog na laman mapapara sa atubangan ko.
18 Tugutan na an saindong mga puso dae marinsal; nin huli ta sa harong kan sakuyang Ama may kadakul na mga mansiyon, asin Ako nag-andam nin lugar para saindo; asin kun saen an sakuyang Ama asin Ako, dyan kamo magigin yaon man.
19 Hilnga, Ako, an Kagurangnan, daeng gayo nag-oogma sa kadakulon na yaon sa laog kan simbahan sa Kirtland;
20 Nin huli ta sinda dae nagbabaya sa saindang mga kasalan, asin sa saindang maririgsok na mga gibo, an kapaabaw-abawan kan saindang mga puso, asin sa saindang pagkamaaraon, asin sa gabos nindang daeng kamanungdanan na mga bagay, asin magsunod sa mga tataramon nin kadunungan asin an eternal na buhay na ako an nagtao sa sainda.
21 Katotohanan Ako nagsasabi sa saindo, na Ako an Kagurangnan, mamamakol sainda asin gigibohon an anuman na Ako an naglista, kun sinda dae magsosolsol asin obserbaran an gabos na mga bagay na anuman na Ako an nagsabi sa sainda.
22 Asin giraray Ako nagsasabi sa saindo, kun kamo magsunod na gibohon an anuman na Ako an nagsugo saindo, Ako, an Kagurangnan, ipagrarayo ko an gabos na kaanggutan asin indignasyon gikan sa saindo, asin an mga pintuan nin impiyerno dae makakatagal laban saindo.
23 Ngonyan, Ako nagtataram sa saindo mapanungod sa saindong mga pamilya--- kun an mga tawo maghampak saindo, o sa saindong mga pamilya, minsan lang, asin kamo pinagdara ining mahinunod asin dae nag-anggot laban sainda, ni naghangad na bumalos, kamo pagbibiyayaan;
24 Pero kun kamo dae ini pinagdarang mahinunod, ini ipagbibilang sa saindo na siring baya na ini pinagkanigo bilang sarong hustong sukol para saindo.
25 Asin giraray, kun an saindong kaiwal maghahampak saindo sa ikaduwang pagkakataon, asin kamo dae nag-anggot laban sa saindong kaiwal, asin pinagdara ining mahinunod, an saindong biyaya magigin sanggatos na doble.
26 Asin giraray, kun siya maghahampak saindo sa ikatulong pagkakataon, asin saindong pinagdara ining mahinunod, an saindong biyaya magigin doble para saimo sa apat kadoble;
27 Asin ining tulong mga testimonya magtitindog laban sa saindong kaiwal kun siya dae magsosolsol, asin dae mapapara.
28 Asin ngonyan, katotohanan Ako nagsasabi sa sainod, kun an kaiwal nay an makaka-eskapo lang sa sakuyang paghihiganti, na tangani baya siya dae pagdadarahon pasiring sa paghuhukom sa atubangan ko, kaya saimong hihilingon ini na saimong pinatanidan siya sa pangaran ko, na siya dae na nanggad mag-otro saimo, ni sa saimong pamilya, maski sa kapag-arakian nin saimong kaarakian sagkod sa ikatulo asin ikaapat na henerasyon.
29 Asin pagkasunod, kun siya mangungulog saimo o sa saimong kaarakian, o sa kapag-arakian nin saimong kaarakian, sagkod sa ikatulo asin ikaapat na henerasyon, Ako na an nagtao sa saimong kaiwal pasiring sa saimong mga kamot;
30 Asin pagkasunod, kun saimong paliligtason siya, ika pagbibiyayaan nin huli sa saimong pagkamatanos; asin man an saimong kaarakian asin an kapag-arakian nin saimong kaarakian sagkod sa ikatulo asin ikaapat na henerasyon.
31 Daeng pagkukulang, an saimong kaiwal yaon na sa saimong mga kamot; asin kun saimong pagbibiyayaan siya uyon sa saiyang mga gibo ika makatarungan; kun siya nagmawot kan saimong buhay, asin an saimong buhay magin delikado sa paagi niya, an saimong kaiwal yaon sa saimong mga kamot asin ika makatarungan.
32 Hilnga, iyo ini an batas na Ako an nagtao sa sakuyang mga surugoon na si Nephi, asin sa saimong mga ama, Joseph, asin Jacob, asin Isaac, asin Abraham, asin sa gabos kong suanoy na mga propeta asin apostoles.
33 Asin giraray, iyo ini an batas na Ako an nagtao sa sakuyang mga suanoy, na sinda dae dapat na makigiyera laban sa arinman na nasyon, lahi, dila, o katawohan, laen lang na Ako, an Kagurangnan, iyo an nagsugo sainda.
34 Asin kun an arinman na nasyon, dila, o katawohan nagproklama nin giyera laban sa sainda, sinda dapat na magpaitaas enot kan sarong bandila nin katuninongan sa panungod na katawohan, nasyon, o dila nay an;
35 Asin kun an katawohang yan habong tanggapon an pagdudulot nin katuninongan, ni sa ikaduwa ni sa ikatulong pagkakataon, sinda dapat na magdara kaining mga testimonya sa atubangan nin Kagurangnan;
36 Pagkasunod Ako, an Kagurangnan, magtatao sa saindo nin sarong kasugoan, asin manindugan sainda na makigiyera laban sa nasyon, dila, o katawohan.
37 Asin Ako, an Kagurangnan, makikilaban sa saindang mga pakikigiyera, asin sa pakigiyera kan saindang mga kaarakian, asin kan saindang kapag-arakian nin saindong kaarakian, sagkod na sinda nakapaghiganti na sa saindong mga sadire sa gabos nindang mga kaiwal, sagkod sa ikatulo asin ikaapat na henerasyon.
38 Hilnga, iyo ini an sarong ehemplo para sa gabos na mga katawohan, nagsabi an Kagurangnan na saindong Diyos, para sa katarungan sa atubangan ko.
39 Asin giraray, katotohanan Ako nagsasabi sa saindo, kun pagkatapos na an saimong kaiwal nagdulok sa saimo sa enot na pagkakataon, siya nagsosolsol asin nagdudulok sa saimo na naghahagad nin saimong kapatawaran, saimong patatawadon siya, asin dae na ini pangangaputan maski noarin bilang sarong testimonya laban sa saimong kaiwal---
40 Asin sagkod pa sa ikaduwa asin ikatulong pagkakataon; asin sa pirmeng pagkakataon na an saimong kaiwal nagsosolsol sa kalapasan na kun saen siya nakapaglapas laban saimo, saimong patatawadon siya, sagkod sa ikapitong pulo na pitong beses.
41 Asin kun siya nakapaglapas laban saimo asin dae nagsosolsol sa enot na pagkakataon, daeng pagkukulang saimong patatawadon siya.
42 Asin kun siya nakapaglapas laban saimo sa ikaduwang pagkakataon, asin dae magsolsol, daeng pagkukulang saimong patatawadon siya.
43 Asin kun siya nakapaglapas laban saimo sa ikatulong pagkakataon, asin dae nagsosolsol, saimong patatawadon man sinda.
44 Kundi kun siya nakapaglapas laban saimo sa ikaapat na pagkakataon dae mo na patatawadon siya, pero dadarahon ining mga testimonya sa atubangan nin Kagurangnan; asin saindang kalapasan dae pagpaparon sagkod na isya magsosolsol asin magtao nin biyaya saimo nin apat na doble sa gabos na mga bagay na kun saen siya nakapaglapas laban saimo.
45 Asin kun saiyang gibohon ini, saimong patatawadon siya sa bilog mong puso, asin kun siya dae maggibo ini, Ako, an Kagurangnan, an maghihiganti saimo laban sa saimong kaiwal nin sanggatos na beses;
46 Asin sa saiyang kaarakian, asin sa kapag-arakian nin kaarakian kan gabos ninda na anggot sakuya, sagkod sa ikatulo asin ikaapat na henerasyon.
47 Pero kun an kaarakian magsosolsol, o an kapag-arakian nin mga kaarakian, asin magbalik pasiring sa Kagurangnan na saindang Diyos, sa bilog nindang mga puso asin sa bilog nindang kakayanan, isip, asin kusog, asin ipapanumbalik nin apat kadoble an bilog nindang mga kalapasan na kun saen sinda nakapaglapas, o kun saen an saindong mga ama nakapaglapas, o an mga ama kan saindang mga ama, kaya an saimong indignasyon pagpaparaon.
48 Asin an paghihiganti dae na mangyayari sa sainda, nagsabi an Kagurangnan saindong Diyos, asin an saindang mga kalapasan dae na pagdadarahon maski noarin bilang sarong testimonya sa atubangan nin Kagurangnan laban sa sainda. Amen.

SEKSYON 97

Kapahayagan na ipinagtao sa paagi ki Joseph Smith an Propeta, sa Kirtland, Ohio, Agosto 2, 1833. HS 1:400-402. Ining kapahayagan minapanungod na gayo sa mga bagay kan mga banal sa Sion, Jackson County, Missouri, bilang kasimbagan sa kahaputan kan Propeta sa Kagurangnan para sa impormasyon. Mga miyembro kan Simbahan sa Missouri sa panahon na ini yaon sa makuring persekusyon, asin kan Hulyo 23, 1833, sinda pinagpuwersa na magpirma sa sarong kasunduan na magharale sa Jackson County.
*******
1-2, Kadakul na mga banal sa Sion (Jackson County, Missouri) pinagbendisyunan nin huli kan saindang katapatan; 3-5, Parley P. Pratt pinag-omaw nin huli kan saiyang mga trabaho sa eskuwelahan nin Sion; 6-9, Sinda na nag-obserba kan saindang mga tipan pinagtanggap nin Kagurangnan; 10-17, Sarong harong an ipagtutugdok sa Sion na kun saen an dalisay an puso makakahiling sa Diyos; 18-21, an Sion iyo an dalisay na puso; 22-28, an Sion makaka-eskapo sa pamakol nin Kagurangnan kun siya matapat.
******
KATOTOHANAN Ako nagsasabi sa saindo na sakuyang mga amigo, Ako mataram sa saindo nin sakuyang boses, na iyo ngani an boses kan sakuyang espiritu, na tanganing Ako an puwedeng magpahiling sa saindo an sakuyang kagustuhan mapanungod sa saindong mga katugangan na yaon sa kadagaan nin Sion, kadakul sainda an tunay na mapagpakumbaba asin maigot na naghahanap tanganing makanuod nin kadunungan asin managboan an katotoohan.
2 Katotohanan, katotohanan Ako nagsasabi sa saindo, paladin sinda, nin huli ta sinda magkakamit; nin huli ta Ako, an Kagurangnan, nagpapahiling nin pagkaherak sa gabos na mahuhuyo an boot, asin sa gabos ninda na Ako an may kagustuhan, na tangani baya Ako magin masuripot kunsoarin Ako an magdadara sainda pasiring sa paghuhukom.
3 Hilnga Ako nagsasabi sa saindo, mapanungod sa eskuwelahan nin Sion, Ako, an Kagurangnan, nag-oogmang gayo na nagkaigwa nin sarong eskuwelahan sa Sion, asin man sa sakuyang surugoon na si Parley P. Pratt, nin huli ta siya nagsusunod sa sakuya.
4 Asin habang siya nagsusunod sa sakuya siya magpapadagos sa pagpapamahala kan eskuwelahan sa kadagaan nin Sion sagkod na Ako magtatao sa saiya nin ibang mga kasugoan.
5 Asin Ako an magbebendisyon saiya nin sarong kadaklan gayong mga bendisyon, sa pagpapaliwanag kan gabos na mga kasuratan asin mga misteryo tanganing pakusugon an eskuwelahan, asin an simbahan sa Sion.
6 Asin sa katadaan kan eskuwelahan, Ako, an Kagurangnan, nagmamawot na gayong maipahiling an pagkaherak; daeng pagkukulang, igwa sa sainda na kaipuhang pagpapakulon, asin an saindang mga gibo mahimong maipagpabantog.
7 An patok nakatutok na sa gamut kan mga kahoy; asin an lambang kahoy na dae nagbubunga nin marahay na prutas pagtutumbahon asin ipagtapsok pasiring sa kalayo. Ako, an Kagurangnan, an nagtaram kaini.
8 Katotohanan Ako an nagsasabi sa saindo, gabos sa pag-iriba ninda na nakakaaram na an saindong mga puso honesto, asin mamondoon, asin an saindong mga espiritu nagsosolsol, asin bulanos na nag-oobserba kan saindong mga tipan sa paagi nin sakripisyo---iyo, an lambang sakripisyo na Ako, an Kagurangnan, magsusugo--- sinda matatanggap ko.
9 Nin huli ta Ako, an Kagurangnan, magkakausa sainda na magdadarang maipahayag bilang sarong mabinungahon na gayong kahoy na pinagtanom sa sarong marahayon na kadagaan, sa may dalisay na sapa, na nagbubunga nin grabe kapresyosong prutas.
10 Katotohanan Ako nagsasabi sa saindo, na ini an sakuyang kagustuhan na sarong harong an dapat na ipagtutugdok sa sakuya sa kadagaan nin Sion, na siring sa desinyo na Ako an nagtao saindo.
11 Iyo, tugutan ining pagtutugdukon nin hidali, sa paagi nin pagbabayad kan ikapu nin sakuyang mga katawohan.
12 Hilnga, ini baya an ikapu asin an sakripisyo na Ako, an Kagurangnan, hagadon sa saindang mga kamot, na puwedeng magkakaigwa nin sarong harong na ipagtutugdok sakuya para sa kaligtasan nin Sion---
13 Para sa sarong lugar pasasalamat kan gabos na mga banal, asin para sa sarong lugar nin instruksiyon para sa gabos ninda na pinagpangapudan na magtrabaho sa ministeryo sa gabos nindang nagkapirang kapangapudan asin mga opisina;
14 Na tangani sinda mapuwedeng magin perpekto sa pagkasabot kan saindang ministeryo, sa teoriya, sa prinsipyo, asin sa doktrina, sa gabos na mga bagay manunungod sa kahadean nin Diyos sa kinaban, na an mga susi kaining kahadean pinagtiwala sa saimo.
15 Asin habang an sakuyang mga katawohan magtugdok nin sarong harong sa sakuya sa pangaran nin Kagurangnan, asin dae minatugot nin anuman na maating bagay na maglaog digde, na tanganing ini dae maatian, an sakuyang kamurawayan mag-eerok sa laog kaini;
16 Iyo, asin an sakuyang presensiya yaon digde, nin huli ta Ako maabot sa laog kaini; asin gabos na dalisay an puso na maabot sa laog kaini makakahiling sa Diyos.
17 Pero kun ini maatian Ako dae maabot sa paglaog dyan, asin an sakuyang kamurawayan mayo dyan; nin huli ta Ako dae minalaog sa bakong banal sa mga templo.
18 Asin, ngonyan, hilnga, kun an Sion gumibo kaining mga bagay siya mag-aasenso, asin magkakalat kan sadire niya asin magin mamurawayong gayo, grabe kadakula, asin grabe katerible.
19 Asin an mga nasyon kan kinaban magtataong honra saiya, asin magsasabi: Segurado na an Sion iyo an siyudad kan satuyang Diyos, asin segurado na an Sion dae magtutumba, ni paghahaleon paluwas sa saiyang kinamugtakan, nin huli ta an Diyos yaon diyan, asin an kamot nin Kagurangnan yaon dyan;
20 Asin siya nagpangako sa paagi nin kapangyarihan kan saiyang kusog na magin iyo an saiyang kaligtasan asin an saiyang halangkaw na torre.
21 Kun kaya, katotohanan, kaya nagsabi an Kagurangnan, tugutan na an Sion magrukyaw, nin huli ta iyo ini an Sion--- AN DALISAY SA PUSO; kun kaya, tugutan an Sion magrukyaw, habang an gabos na maririgsok magmumundo.
22 Nin huli ta hilnga, asin uya, an pagganti minaabot nin hidali sa mga mayong diyos na siring sa ipo-ipo; asin siisay baya an makaka-eskapo kaini?
23 An pamakol nin Kagurangnan minaagi sa banggi asin aldaw, asin an bareta kaini makakapagpa-anggot sa bilog na mga katawohan; iyo, ini dae mag-uuntok sagkod na an Kagurangnan mag-abot;
24 Nin huli ta an kapung-utan nin Kagurangnan nagsindi laban sa saindang mga abominasyon asin sa gabos nindang maririgsok na mga gibo.
25 Daeng pagkukulang, an Sion makaka-eskapo kun siya mag-oobserba na gumibo kan gabos na anumang mga bagay na Ako an nagsusugo saiya.
26 Pero kun siya dae nag-oobserba na gibohon an anuman na Ako an nagsusugo saiya, Ako magbibisita saiya na uyon sa gabos niyang mga gibo, na may makuring kasakitan, na may kapestehan, na may sumpa, na may espada, na may pagbabalos, na may nag-aagabaab na kalayo.
27 Daeng pagkukulang, tugutan na ini pagbasahon minsan sa saiyang mga talenga, na Ako, an Kagurangnan, nagtanggap kan saiyang dulot; asin kun siya dae na nagkasala mayo sa mga bagay na ini an maabot sa saiya;
28 Asin Ako an magbebendisyon saiya nin mga biyaya, asin pagdadagdagan nin sarong kadagdagan nin mga biyaya sa saiya, asin sa saiyang mga henerasyon hanggan sa daeng kasagkoran, nagsabi an Kagurangnan na saindong Diyos. Amen.

SEKSYON 96

Kapahayagan na ipinagtao ki Joseph Smith an Propeta, na nagpapahiling sa husay kan Siyudad o Istaka nin Sion sa Kirtland, Ohio, Hunyo 4, 1833. Ipinagtao bilang sarong ehemplo sa mga banal sa Kirtland. HS 1:352-353. An okasyon iyo an sarong kumperensiya kan mga halangkaw na mga padi, asin an pangenot na tema nin konsiderasyon iyo an pagpapabakal nin nagkapirang mga kadagaan, bantog bilang umahan nin Pransiya, na pagsadire kan Simbahan harani sa Kirtland. Baya an kumperensiya dae nagkasurundo kun siisay an mangangataman kan umahan, gabos nagkasurundo na maghapot sa Kagurangnan mapanungod kaining bagay.
*******
1, An Istake nin Sion sa Kirtland iyo an himoon na pagpapakusugon; 2-5, An bishop iyo an magbabaranga kan mga kamanahan para sa mga banal; 6-9, Si John Johnson gigibohon bilang sarong miyembro kan Pinagkasararong Orden.
*******
HILNGA, Ako nagsasabi sa asindo, uya an kadunungan, kun saen kamo mapuwedeng makaaram kun paano gigibohon an mapanungod kaining bagay, nin huli ta ini kapakinabangan sakuya na ining Istaka na Ako an nagtugdas para sa kusog nin Sion dapat na himoong makusog.
2 Kun kaya, tugutan na an sakuyang surugoon na si Newel K. Whitney an magpamahala kan lugar na saindong pinagnombrahan sa pag-iriba nindo, na kun saen Ako an madesinyo na ipagtugdok na sakuyang banal na harong.
3 Asin giraray, tugutan na ini pagbabaranga-on na magin lote-lote, uyon sa kadunungan, para sa benepisyo ninda na naghahagad nin mga kamanahan, siring na ini pagdeterminaron sa konseho kan pag-iriba nindo.
4 Kun kaya, maghinanyog na kamo makahiling kaining bagay, asin idtong porsiyon na kinakaipuhan tanganing mabenepisyuhan an sakuyang orden, para sa katuyuhan na pagdadarahon paluwas an sakuyang tataramon sa mga kaarakian nin mga tawo.
5 Nin huli ta hilnga, katotohanan Ako nagsasabi sa saindo, iyo ini an pinakamakinabang sa sakuya, na an sakuyang tataramon mapapaduman sa mga kaarakian nin mga tawo, para sa katuyuhan na ipagbababa an mga puso kan mga kaarakian nin mga tawo para sa saindong karahayan. Arog kaini. Amen.
6 Asin giraray, katotohanan Ako nagsasabi sa saindo, ini kadunungan asin kapakinabangan sakuya, na an sakuyang surugoon na si John Johnson na an dulot Ako an nagtanggap, na an mga pangadyeon Ako an makadangog, na sa saiya Ako nagtao nin sarong promise nin eternal na buhay habang siya nagsusunod kan sakuyang mga kasugoan magpoon ngonyan---
7 Nin huli ta siya sarong kamakoapoan ni Joseph asin sarong kaparte kan mga bendisyon nin promisa na pinaghimo sa saiyang mga ama---
8 Katotohanan Ako nagsasabi sa saindo, ini kapakinabangan sa sakuya na siya dapat na magin miyembro sa Orden, na tanganing siya puwedeng makatabang sa pagdadara kan sakuyang tataramon pasiring sa mga kaarakian nin mga tawo.
9 Kun kaya saindo pag-oordinahan siya sa bendisyong ini, asin siya an maghahanap nin maigot na paghaleon an mga babayadan sa harong na ipinagngaran sa pag-iriba nindo, na siya puwedeng mag-estar dyan. Arog kaini. Amen.

SEKSYON 95

Kapahayagan na ipinagtao sa paagi ki Joseph Smith an Propeta, sa Kirtland, Ohio, Hunyo 1, 1833. HS 1:350-352. Ini an kapahayagan na iyo an sarong kapadagusan kan banal na direksiyon sa pagtugdok nin mga harong para sa pagsamba asin instruksiyon, lalo na an Harong nin Kagurangnan. Hilingon sa Seksyon 88:119-136 asin Seksyon 94.
*******
1-6, An mga banal pinagpakulan nin huli sa dae ninda pagtugdok kan Harong nin Kagurangnan; 7-10, An Kagurangnan nagmamawot na gamiton an saiyang harong sa paghunsay kan saiyang mga katawohan nin kapangyarihan na gikan sa kaitaasan; 11-17, An harong ipagdudulot bilang sarong lugar nin pagsamba asin para sa eskuwelahan kan mga apostoles.
*******
KATOTOHANAN, kaya nagsabi an Kagurangnan sa saindo na Ako namomoot, asin an siisay na Ako namomoot Ako man nagpapakol na tangani an saindong mga kasalan puwedeng patawadon, nin huli ta sa pamamakol Ako nagpreparar nin sarong dalan para sa saindong kaligtasan sa gabos na mga bagay paluwas sa tentasyon, asin Ako nagmomoot saindo---
2 Kumbaya, kamo kinakaipuhanan na pagpakulon asin magtindog na pinag-aanggutan sa atubangan nin sakuyang lalawgon;
3 Nin huli ta kamo nagkasala laban sakuya nin sasrong makuring kasalan, sa mga ini kamo dae nagkonsidera sa dakulang kasugoan nin gabos na mga bagay, na Ako nagtao sa saindo manunungod sa pagtutugdok kan sakuyang harong;
4 Para sa preparasyon na kun saen Ako an nagdesinyo tanganing andamon an sakuyang mga apostoles sa paghawan kan sakuyang ubasan para sa huring panahon, na tanganing Ako puwedeng madara na maglipas an sakuyang makangalas na gibo, na tanganing Ako puwedeng magpabulos paluwas kan sakuyang Espiritu sa gabos na laman---
5 Pero hilnga, katotohanan Ako nagsasabi sa saindo, na igwang kadakul na pinag-ordinahan sa pag-iriba nindo, na Ako an nag-apod alagad kadikiton sainda an mga pinili.
6 Sinda na bakong mga pinili nagkasala nin sarong grabe kakuring kasalan, na kaiyan sinda naglalakaw sa kadikloman sa pagka-udto.
7 Asin nin huli sa kausang ini Ako nagtao saindo nin sarong kasugoan na ika mag-apod kan saindong solemning asembliya, na tangani baya an saindong mga pang-ayuno asin an saindong mga pagtatangis mapuwedeng makaabot sa talenga nin Kagurangnan kan Sabaoth, na iyo baya sa paagi nin interpretasyon, iyo an Kaglalang kan enot na aldaw, an kapinunan asin an huri.
8 Iyo, katotohanan Ako nagsasabi sa saindo, Ako nagtao sa saindo nin sarong kasugoan na kamo dapat na magtugdok nin sarong harong, na an harong Ako an nagdesinyo sa paghunsay sainda na Ako an nagpili na may kapangyarihan gikan sa itaas;
9 Nin huli ta iyo ini an promise kan Ama sa saindo; kun kaya Ako nagsusugo sa saindo na magtagal, na siring sa sakuyang mga apostoles sa Jerusalem.
10 Daeng pagkukulang, an sakuyang mga surugoon nagkasala nin sarong grabe kakuring kasalan; asin an mga pag-iiriwal-iwal iyo an bunga sa laog kan eskuwelahan nin mga propeta; na iyo an grabe kakuri sa sakuya, nagsabi an saindong Kagurangnan; kun kaya Ako an nagpadara sainda tanganing pagpapakulon.
11 Katotohanan Ako nagsasabi sa saindo, ini an sakuyang kagustuhan na kamo dapat na magtugdok nin sarong harong. Kun kamo magsusunod kan sakuyang mga kasugoan kamo magkakaigwa nin kapangyarihan na ipagtugdok ini.
12 Kun kamo dae magsusunod kan sakuyang mga kasugoan, an pagkamoot kan Ama dae magdadanay sa kaiba nindo, kun kaya kamo maglalakaw sa kadikloman.
13 Ngonyan uya baya an kadunungan, asin an kaisipan nin Kagurangnan--- tugutan an harong na ipagtugdok, bako arog sa manera nin kinaban, nin huli ta Ako dae nagtao saindo na tangani baya kamo mamumuhay na siring sa manera kan kinaban;
14 Kun kaya, tugutan ini na ipagtugdok na siring sa manera na Ako an magpapahiling sa tulo saindo, na kamo an magnombra asin mag-ordina para sa kapangyarihang ini.
15 Asin an kadakulaan kaini magigin singkuwenta asin limang piye an lakbang, asin tugutan ini na magigin saisenta asin limang piye an laba, sa panlaog sa bulwagan kaini.
16 Asin tugutan na an pan-ibabang parte kan panlaog na bulwagan ipagdulot sa sakuya para sa saindong sakramentong pagdudulot, asin para sa saindong pagbabalangibog, asin sa saindong pag-ayuno, asin sa saindong pagpapangadye, asin sa pagdudulot kan saindong pinakabanal na mga pagmamawot para sakuya, nagsabi an saindong Kagurangnan.
17 Asin tugutan na an panhalangkaw nap arte kan panlaog na bulwagan ipagdulot sa sakuya para sa eskuwelahan kan sakuyang mga apostoles, nagsabi an Ake ni Ahman; o baya, sa ibang mga tataramon, si Alphus; o baya, sa ibang mga tataramon, si Omegus; na iyo ngani si JesuCristo an saindong Kagurangnan. Amen.

SEKSYON 94

Kapahayagan na ipinagtao sa paagi ki Joseph Smith an Propeta, sa Kirtland, Ohio, Mayo 6, 1833. HS 1:346-347. Si Hyrum Smith, Reynolds Cahoon, asin Jared Carter pinagnombraran bilang sarong Komite kan Pagtutugdok nin Simbahan.
*******
1-9, Sarong kasugoan manungod sa pagpapatindog nin sarong haraong para sa trabaho kan Panguluhan; 10-12, Sarong harong imprintahan ipapatugdok; 13-17, Mga kamanahan pinagdesignaran.
*******
Asin giraray, katotohanan Ako nagsasabi sa saindo, sakuyang mga amigo, sarong kasugoan Ako nagtatao sa saindo, na kamo magpoon sa paglatag asin prepararon an poon asin pundasyon nin siyudad kan istaka nin Sion, digde sa kadagaan nin Kirtland, na mapoon sa sakuyang harong.
2 Asin hilnga, ini kinakaipuhan na gibohon na uyon sa desinyo na Ako an nagtao sa saindo.
3Asin tugutan na an enot na lote na yaon sa timog pagkonsagraron sa sakuya para sa pagtutugdok kan sarong harong para sa panguluhan, para sa trabaho kan panguluhan, sa pagguguno nin mga kapahayagan; asin para sa trabaho kan ministeryo nin panguluhan, sa gabos na mga bagay mapanungod sa simbahan asin kahadean.
4 Katotohanan Ako nagsasabi sa saindo, na ini ipagtutugdok na singkuwenta asin lima por saisenta asin limang piye an lakbang kaini asin sa laba kaini, sa panlaog na bulwagan.
5 Asin magkakaigwa nin hababang bulwagan asin halangkaw na bulwagan na uyon sa desinyo na ipagtatao sa saindo poon ngonyan.
6 Asin ini ipagdudulot para sa Kagurangnan gikan sa pundasyon kaini, uyon sa orden kan pagkasaserdote, na uyon sa desinyo na ipagtatao sa saindo poon ngonyan.
7 Asin ini bilog na ipagdudulot sa Kagurangnan para sa trabaho kan panguluhan.
8 Asin kamo dae magtutugot nin anuman na maaating bagay na maglaog kaini; asin an sakuyang kamurawayan magin yaon dyan, asin an sakuyang presensiya magigin yaon dyan.
9 Pero kun may makakalaog kaini na mga maaating bagay, an sakuyang kamurawayan magigin mayo dyan; asin an sakuyang presensiya dae makakalaog kaini.
10 Asin giraray, katotohanan Ako nagsasabi sa saindo, an ikaduwang lote na yaon sa timog ipagdudulot sa sakuya para sa pagpapatugdok nin sarong harong para sakuya, para sa trabaho nin pag-imprinta kan pinagsalin na sakuyang mga kasuratan, asin kan gabos na mga bagay na anuman na Ako an nagsusugo saindo.
11 Asin ini magigin singkuwenta asin lima por saisenta asin limang piye an lakbang kaini asin an laba kaini, sa panlaog na bulwagan; asin magkakaigwa nin hababang bulwagan asin halangkaw na bulwagan.
12 Asin ining harong magigin bilog na ipagdudulot para sa Kagurangnan gikan sa pundasyon kaini, para sa trabaho nin imprinta, kan gabos na mga bagay na anuman na Ako an nagsusugo saindo, na magigin banal, mayong kaatian, uyon sa desinyo sa gabos na mga bagay na ini ipagtatao sa saindo.
13 Asin sa ikatulong lote iyo an para sa sakuyang surugoon na si Hyrum Smith an magresibe na iyo an saiyang kamanahan.
14 Asin sa enot asin ikaduwang lote sa may hiraga iyo an para sa sakuyang mga surugoon na sinda Reynolds Cahoon asin Jared Carter an maresibe na iyo na an saindang kamanahan.
15 Na tanganing saindang magigibo an trabaho na Ako an nagnombra sa sainda, na magigin sarong Komite sa pagtutugdok kan sakuyang mga harong, uyon sa kasugoan, na Ako, an Kagurangnang Diyos, an nagtatao sa saindo.
16 Ining duwang mga haroang dae nguna ipagtutugdok sagkod na Ako an matao saindo nin kasugoan mapanungod sainda.
17 Asin ngonyan Ako mayo na ngunang ipagtatao sa panahon na ini. Amen.