SEKSYON 67

Kapahayagan na ipinagtao sa paagi ki Joseph Smith an Propeta sa Hiram, Ohio, Nobyembre 1831. HS 1:224-225. An okasyon iyo an sarong espesyal na kumperensiya, asin an publikasyon kan mga kapahayagan na nagkareresibe na gikan sa Kagurangnan sa paagi kan Propeta io an pinagkonsidera asin pinag-aksyunan. Hilngon an pamayuhan kan Seksyon 1. Ini pinagdesisyunan na si Oliver Cowdery asin John Whitmer iyo an magdadara kan mga manuskrito kan mga kapahayagan pasiring sa Independence, na kun saen si W. W. Phelps an magpublikar kan mga ini bilang iyo an “Libro Nin Mga Kasugoan.” Kadakul sa mga katugangan an nagkaigwa nin maimbod na patotoo na an mga kapahayagan na pinagtiripon para sa publikasyon iyo an sa katotohanan totoo, siring na ini pinagpatotohanan kan Banal na Espiritu na iyo an nagpalindong sa sainda. An Propeta nagrekord na pagkatapos na an kapahayagan ipinagpabantog bilang Seksyon 1 pinagresibe na, an ibang negatibong pag-oorolay-olay nangyari mapapanungod sa lenguwahe na pinaggamit sa mga kapahayagan. An presenteng kapahayagan an suminunod.
*******
1-3, An Kagurangnan nadangog an mga pangadyeon asin nagbabantay sa saiyang mga elders; 4-9, Saiyang pinaghuhunot sa pinakamadunong na persona na duplikaron an pinakamaluya kan saiyang mga kapahayagan; 10-14, An mga matapat na elders pagpapakusugon kan Espiritu asin makakahiling sa lalawgon nin Diyos.
*******
HILNGA asin hinanyuga, O kamong mga elders kan sakuyang simbahan, na pinagtiripon an saindong mga sadire na magkasararo, na an saindong mga pangadyeon sakuyang nagkadarangog, asin an saindong mga puso Ako an nakakabisto, asin an saindong mga pagmamawot nakaabot na sa atubangan ko.
2 Hilnga asin uya, an sakuyang mga mata yaon sa saindo, asin an mga kalangitan asin an kinaban yaon sa sakuyang mga kamot, asin an mga kayamanan nin eternidad pagsadire kong ipagtatao.
3 Kamo naghingohang magtubod na kamo makakaresibe nin biyaya na ipinaghaya sa saindo; pero hilnga, katotohanan Ako nagsasabi sa saindo na nagkaigwang mga pagkatakot sa saindong mga puso, asin sa katotohanan iyo ini an rason na kamo dae nakaresibe.
4 Asin ngonyan Ako, an Kagurangnan, nagtatao sa saindo nin sarong testimonya nin katotoohan kaining mga kasugoan na nakahayag na sa atubangan nindo.
5 An saindong mga mata yaon sa sakuyang surugoon na si Joseph Smith, Jun., asin an saiyang lengguwahe saindong naaaraman na, asin an saiyang mga kakulangan saindong naaaraman na; asin nagmamawot sa saindong mga puso nin kaaraman na tanganing kamo puwedeng makakapagpahayag nin labaw pa sa saiyang lengguwahe; ini man saindong naaaraman na.
6 Ngonyan, hanapon nindo sa Libro Nin Mga Kasugoan, idtong pinakamaluya na yaon sa pag-iriba ninda, asin magngaran saiya na iyo an pinakamadunong sa pag-iriba nindo;
7 O, kun igwa nin siisay man sa pag-iriba nindo na makakapaghimo nin saro na kaarog kaini, saka pa kamo may kahustuhan na makapagsabi na kamo dae nakakaaram na an mga ini katotoohan;
8 Pero kun kamo dae makakapaghimo nin sarong kapareho kaini, kamo yaon sa irarom nin kondenasyon kun kamo habong magpatotoo na an mga ini katotoohan.
9 Nin huli ta kamo nakakaaram na mayo man nin bakong katanusan sa mga ini, asin ta ining katanusan nagbababa gikan sa kaitaasan, gikan sa Ama nin mga liwanag.
10 Asin giraray, katotohanan Ako nagsasabi sa saindo na iyo ini an saindong pribilihiyo, asin sarong promisa Ako matao sa saindo na pinag-ordinahan sa ministeryong ini, na habang kamo naghuhuba kan saindong mga sadire gikan sa mga pagseselos asin mga pagkatakot, asin magpakumbaba kan saindong mga sadire sa atubangan ko, nin huli ta kamo bako pang mapagpakumbabang gayo, an kurtina magigisi asin kamo makakahiling sakuya asin makakaaram na Ako ini--- bako sa karnal ni sa natural na kaisipan, kundi sa espirituwal.
11 Nin huli ta mayong tawo an nakahiling sa Diyos sa arinman na panahon na yaon sa laman, laen lang sa pinagpakusog sa paagi kan Espiritu nin Diyos.
12 Ni an siisay man na natural na tawo makakapagtagal sa presensiya nin Diyos, ni pagkatapos sa karnal na kaisipan.
13 Kamo dae pa kayang makakapagtagal sa presensiya nin Diyos sa ngonyan, ni sa pagmiministeryo kan mga anghel; kumbagay, magpadagos sa pagpasensiya sagkod na kamo mapeperpekto.
14 Dae pagtugutan na an saindong mga kaisipan magtatalikod pabalikwas; asin kunsoaring kamo maninigo, sa sakuyang tinakdang panahon, kamo makakahiling asin makakaaram kaidtong bagay na ipinagputong sa saindo sa paagi kan mga kamot nin sakuyang surugoon na si Joseph Smith, Jun. Amen.

SEKSYON 66

Kapahayagan na ipinagtao sa paagi ki Joseph Smith an Propeta, sa Orange, Ohio, Oktubre 25, 1831. Hs 1:219-221. Iyo ini an enot na aldaw kan importanteng kumperensiya. Sa pangenot kaining kapahayagan, an Propeta nagsurat: “Sa kahagadan ni William E. McLellin, ako naghapot sa Kagurangnan, asin nagresibe kan mga minasunod.”
*******
1-4, An daeng kasagkoran na tipan iyo an kabilugan kan ebanghelyo; 5-8, An mga elders an magbabalangibog, magpapatotoo, asin makikipagrason sa mga katawohan; 9-13, an matapat na ministeryong serbisyo nagpapaseguro nin sarong kamanahan na iyo an eternal na buhay.
*******
HILNGA, kaya nagsabi an Kagurangnan sa sakuyang surugoon na si William E. McLellin--- Paladan ka, hab ang baya ika nagrarayo gikan sa saimong mga kadaendatahan, asin nagresibe kan sakuyang mga katotoohan, nagsabi an Kagurangnan an saimong Paratubos, an Paraligtas kan kinaban, magin siring kadakul an naniniwala sa sakuyang pangaran.
2 Katotohanan Ako nagsasabi sa saimo, paladan ka nin huli kan pagreresibe nin sakuyang daeng kasagkoran na tipan, magin iyo ngani an kabilugan kan sakuyang ebanghelyo, na ipinagpadara pasiring sa mga kaarakian nin mga tawo, na tanganing sinda magkaigwa nin buhay asin mahimong magin kaparte kan mga kamurawayan na ipagpapahayag sa mga huring aldaw, siring na ini nasusurat kan mga propeta asin mga apostoles sa mga aldaw nin suanoy.
3 Katotohanan Ako nagsasabi sa saimo, sakuyang surugoon na si William, na ika malinigon, pero bakong gabos; magsolsol ka, baya, kaidtong mga bagay na bakong marahay sa sakuyang paghiling, nagsabi an Kagurangnan, nin huli ta an Kagurangnan ipagpapahiling sinda sa saimo.
4 Asin ngonyan, katotohanan, Ako, an Kagurangnan ipagpapahiling sa saimo kun an ano baya an gusto ko mapanunungod sa saimo, o ano baya an sakuyang kagustuhan mapanunungod saimo.
5 Hilnga, katotohanan Ako nagsasabi sa saimo, na iyo ini an sakuyang kagustuhan na ika dapat na magpoproklama kan sakuyang ebanghelyo gikan sa sarong kadagaan hanggan sa sarong kadagaan, asin gikan sa sarong siyudad hanggan sa sarong siyudad, iyo, duman sa mga rehiyon na nakapalibot na kun saen ini dae pa ipinagproklama.
6 Dae magpawalat nin kadakul na mga aldaw sa lugar na ini; dae ka nguna magpaduman sa kadagaan nin Sion; kundi habang ika puwede lang magpadara, padaraha; laen pa, dae mo pagparaisipon an saimong propriyedad.
7 Magpaduman ka sa may sirangang parte nin mga kadagaan, magpatotoo ka sa lambang lugar, sa lambang mga katawohan asin sa saindang mga sinagoga, na nagrarason kaiba nin mga katawohan.
8 Tugutan an sakuyang surugoon na si Samuel H. Smith na mag-iba saimo, asin dae mo siya ipagsisikwal, asin itao saiya an saimong mga instruksiyon; asin siya na nagin matapat hihimoong makusog sa lambang lugar; asin Ako, an Kagurangnan, an magpapaduman sa kaiba nindo.
9 Ipagpatong nindo an saindong mga kamot sa mga may helang, asin sinda maoomayan. Dae kamo magbalik sagkod na Ako, an kagurangnan, an magpapadara saindo. Magin mapagpasensiya kun yaon kamo sa kasakitan. Maghagad, asin kamo makakaresibe; magtuktok, asin ini pagbubuksan sa saindo.
10 Maghanap na dae kamo maatraso. Ipagsikwal an gabos na bakong katanusan. Dae kamo magkomiter nin adulteryo--- an sarong tentasyon na kun saen kamo naguguluhan.
11 Sunudon ining mga kasabihan, asin huli ta sinda totoo asin matapat; asin saindong maipagtulakan nindo an kadakul na mga katawohan pasiring sa Sion na may mga korte nin daeng kasagkoran na kaogmahan sa ibabaw kan saindong mga payo.
12 Ipagpadagos ining mga bagay magin sagkod sa katapusan, asin kamo magkakaigwa nin sarong korona nin eternal na buhay sa toong kamot kan sakuyang Ama, na pano nin grasya asin katotoohan.
13 Katotohanan, kaya nagsabi an Kagurangnan an saindong Diyos, an saindong Paratubos, na iyo ngani si JesuCristo. Amen.

SEKSYON 65

Kapahayagan na ipinagtao sa paagi ki Joseph Smith an Propeta, sa Hiram, Ohio, Oktubre 1831. HS 1:218. An Propeta nagngaran kaining kapahayagan bilang sarong pangadyeon.
*******
1-2, An mga susi ka kahadean nin Diyos pinagkomiter na sa tawo nin kinaban, asin an kausa kan ebanghelyo magtatrayumpo; 3-6, An milenyong kahadean nin langit mag-aabot asin ipagdudugtong sa kahadean nin Diyos sa kinaban.
*******
MAGHINANYOG, asin uya, sarong boses na siring sa sarong ipinagpadara pababa gikan sa kaitaasan, na iyo an makusog asin makapangyarihan, na an saiyang pagpapadumanan iyo an mga katapusan nin kinaban, iyo, na an boses mapapasa mga tawo--- Andamon nindo an dalan nin Kagurangnan, gibohon na an saiyang mga agihan matatanos.
2 An mga susi kan kahadean nin Diyos pinagkomiter na sa tawo kan kinaban, asin maggigikan digde an ebanghelyo magliligid pasiring sa mga katapusan kan kinaban, bilang sarong gapo na pinagkalot paluwas sa bukid na bakong pinaggamit an kamot na magliligid, sagkod na ini makapagpano kan bilog na kinaban.
3 Iyo, sarong boses na nagkukurahaw---Andamon nindo an dalan nin Kagurangnan, andamon an pamanggihan kan Kordero, himoong andam an kaglalakeng kasalon.
4 Magpangadye sa Kagurangnan, mag-apod sa saiyang banal na pangaran, himoong maipagpabantog an saiyang makangangalas na mga gibo sa pag-iriba nin mga katawohan.
5 Mag-apod sa Kagurangnan, na an saiyang kahadean magkukunop sa ibabaw nin kinaban, na an mga nag-eerok digde magreresibe kaini, na an mga nag-eerok digde magreresibe kaini, asin magin preparado para sa mga aldaw na maabot, na kun saen an Ake nin Tawo magbaba sa langit, na nababadoan nin kaliwanagan kan saiyang kamurawayan, tanganing makipaghilingan sa kahadean nin Diyos na pinagtugdok sa kinaban.
6 Kumbaya, lugod an kahadean nin Diyos magpapadagos, na tanganing an kahadean nin Langit mag-abot, na tanganing Ika, O Diyos, pagpapamurawayon sa langit pasiring sa kinaban, na tanganing an saimong mga kaiwal puwedeng magkadaraog; nin huli ta saimo an honra, kapangyarihan asin kamurawayan, sagkod pa man. Amen.

SEKSYON 64

Kapahayagan na ipinagtao sa paagi ki Joseph Smith an Propeta para sa mga elders kan Simbahan, sa Kirtland, Ohio, Septiyembre 11, 1831. HS 1:211-214. An Propeta nag-aandam na maglipat pasiring sa Hiram, Ohio, tanganing magpanibag-o kan saiyang trabaho nin pagsasalin kan Bibliya; na saiya ngunang pinagpaliban habang siya yaon sa Missouri. Sarong kumpanya nin mga katugangan na pinagsusugong magbiyahe pasiring sa Sion (Missouri) na maigot na pinagpaggibong maghimo nin mga preparasyon nin paghale sa Oktubre. Sa panahon na ining kasibutan, an kapahayagan naresibe.
*******
1-11, An mga banal pinagsusugo na magpatinawad-tawadan sa lambang saro, na baka baya igwang katadaan sa sainda nin mas halangkaw na kasalan; 12-22, An dae nagsosolsol kaipuhan pagprobaran sa mga korte kan simbahan; 23-25, Siya na nagbabayad nin ikapu dae pagsusuloon sa pag-abot nin Kagurangnan; 26-32, An mga banal pinagpapatanidan kontra sa pagpapangutang; 33-36, An mga masumbikal pagpapahaleon paluwas sa Sion; 37-40, An Simbahan iyo an maghuhusga kan mga nasyon; 41-43, An Sion mamumukadkad.
*******
HILNGA, kaya nagsasabi an Kagurangnan saindong Diyos para sa saindo, O kamong mga elders kan sakuyang simbahan, maghinanyog kamo asin magdangog, asin resibihon an sakuyang kagustuhan mapapanungod saindo.
2 Nin huli ta katotohanan Ako nagsasabi sa saindo, Ako naggugusto na saindong madaog an mundo; kumbaya Ako magkakaigwa nin luwag nin boot sa saindo.
3 Igwa sa pag-iriba nindo na nagkasala; pero katotohanan Ako nagsasabi, minsan pa, para sa sakuyang sadireng kamurawayan, asin para sa kaligtasan nin mga kalag, Ako nagpatawad na kan saindong mga kasalan.
4 Ako magigin maheherakon sa saindo, nin huli ta sakuyaang ipinagtao sa saindo an kahadean.
5 Asin an mga susi kan mga misteryo nin kahadean dae na nanggad pa pagkukuahon gikan sa sakuyang surugoon na si Joseph Smith, Jun., sa paagi kan mga bagay na Ako an nagtao, habang siya nabubuhay, habang siya nagsusunod pang gayo kan sakuyang mga ordinansa.
6 Igwa sa saindo na naghahanap nin okasyon laban saiya na mayong kausa.
7 Daeng pagkukulang, siya nagkasala; pero katotohanan Ako nagsasabi sa saindo, Ako, an Kagurangnan, nagpapatawad nin mga kasalan sa sainda na nagkukumpisal kan saindang mga kasalan sa atubangan ko asin naghahagad nin kapatawadan, siya dae na nagkasala sagkod sa kagadanan.
8 An sakuyang mga desipulos, sa mga aldaw nin suanoy, naghahanap nin okasyon laban sa lambang saro asin dae nagpatinawad-tawadan sa lambang saro sa saindang mga puso; asin nin huli kaining karaotan sinda pinagpasakitan asin grabe na gayong pinagkastigo.
9 Kumbaya, Ako nagsasabi sa saindo, na kamo dapat na magpatinawad-tawadan sa lambang saro; nin huli ta siya na dae nagpapatawad sa saiyang tugang kan saiyang mga kalapasan nagtitindog na kondenado sa atubangan nin Kagurangnan; nin huli ta yaon pa saiya an mas halangkaw na kasalan.
10 Ako an Kagurangnan, magpapatawad saiya na gusto kong patatawadon, pero sa saindo ini pinaghuhurot na magpapatawad sa gabos na mga tawo.
11 Asin kamo dapat na magsasabi sa saindong mga puso--- tugutan na an Diyos iyo an maghusga sa tahaw ko asin saimo, asin pabuyaan ka na uyon sa saimong nagkaginibohan.
12 Asin sa saiya na dae nagsosolsol kan saiyang mga kasalan, asin dae nagkukumpisal kan mga ini, saindong pagdadarahon sa atubangan kan simbahan, asin gibohon sa saiya siring na an kasuratan nagsasabi sa saindo, maski sa paagi nin kasugoan o sa paagi nin kapahayagan.
13 Asin ini gigibohon nindo na tanganing an Diyos maipagpamuraway--- bako na nin huli ta kamo dae nagpatawad, na mayong luwag nin boot, kundi na kamo puwedeng makapagpanindugan sa mga mata kan ley, na tanganing kamo dae mapasala saiya na iyo an saindong tagapagtao nin ley---
14 Katotohanan Ako nagsasabi, nin huli kaining kausa kamo maggigibo kaining mga bagay.
15 Hilnga, Ako, an Kagurangnan, naanggot saiya na iyo an sakuyang surugoon na si Ezra Booth, asin man sa sakuyang surugoon na si Isaac Morley, nin huli ta sinda dae nagsusunod sa ley ni sa kasugoan;
16 Sinda naghahangad nin karaotan sa saindang mga puso, asin Ako, an Kagurangnan, an nagbawi kan sakuyang Espiritu. Sinda nagkokondena nin karaotan sa bagay na bako man ngani maraot; daeng pagkukulang Ako nagpatawad sa sakuyang surugoon na si Isaac Morley.
17 Asin man an sakuyang surugoon na si Edward Partridge, hilnga, siya nagkasala, asin si satanas naghangad na destrosohon an saiyang kalag; pero kun an mga bagay na ini ipagpapaaram sa sainda, asin sinda nagsosolsol kan maraot, sinda pagpapatawadon.
18 Asin ngonyan, katotohanan Ako nagsasabi na ini kapakinabangan sako na an sakuyang surugoon na si Sidney Gilbert, pagkatapos kan nagkapirang semana, magbabalik sa saiyang negosyo, asin sa saiyang ahensiya sa kadagaan nin Sion;
19 Asin idtong saiyang nahiling asin nadangog puwedeng himoon na maipagpabantog sa sakuyang mga desipulos, na tanganing sinda dae magkaparara. Asin nin huli kaining kausa Ako nakapagtaram kaining mga bagay.
20 Asin giraray, Ako nagsasabi sa saindo, na an sakuyang surugoon na si Isaac Morley mapupuwedeng dae matetentaran nin mas sobra pa sa saiyang kakayanan asin magpapayo nin karaotan pasiring sa saindong kakulugan; Ako nagtao nin kasugoan na an saiyang kaomahan dae dapat na ipagpabakal.
21 Ako dae minagusto na an sakuyang surugoon na si Frederick G. Williams dapat na magpabakal kan saiyang kaomahan, nin huli ta Ako, an Kagurangnan, naggusto na magtada nin sarong makusugon na lugar sa kadagaan nin Kirtland, para sa espasyong limang taon, na kun noarin Ako dae mangingibabaw sa mga mararaot, tangani baya Ako mapupuwedeng makapagligtas pa kan iba.
22 Asin pagkatapos kan aldaw na iyan, Ako, an Kagurangnan, dae na mangangaputan sa arinman na nagkasala na magpapaduman na igwang bukas na puso pasiring sa kadagaan nin Sion; nin huli ta Ako, an Kagurangnan, pinagpangaipo an mga puso kan mga kaarakian nin mga tawo.
23 Hilnga, ngonyan ini ipinagpapangapudan sa presente sagkod sa pag-abot kan Ake nin Tawo, asin sa katotohanan ini iyo an aldaw kan sakripisyo, asin an aldaw para sa pagbabayad nin ikapu kan sakuyang mga katawohan; nin huli ta siya na nagbabayad nin ikapu dae pagsusuloon sa saiyang pag-abot.
24 Nin huli ta sa pagkatapos ngonyan maabot an pagsusulo--- ini piangtataram sa manera nin Kagurangnan--- nin huli ta katotohanan Ako nagsasabi, sa aga an gabos na mapang-abaw-abaw asin sinda na naggigibo nin mga karaotan magigin siring sa panggatong; asin Ako an magsusulo sa sainda, nin huli ta Ako an Kagurangnan nin mga hukbo; asin Ako dae magpapalaen sa iba na yaon pa sa Babilonya.
25 Kumbaya, kun kamo nagtutubod sakuya, kamo magtatrabaho habang ini pinagpapangapudan pa sa ngonyan.
26 Asin ini bakong angay na an sakuyang mga surugoon na sinda Newel K. Whitney asin Sidney Gilbert, na ipagpabakal an saindang mga tindahan asin an saindang mga pagsadire digde; nin huli ta ini bakong kadunungan para sa katadaan kan simbahan, na mawawalat sa lugar na ini, na magpapaduman pasiring sa kadagaan nin Sion.
27 Hilnga, ini pinagsasabi sa sakuyang mga leyes, O pinagbabawal, na magkautang sa saindong mga kaiwal.
28 Kundi hilnga, ini dae pinagsasabi sa arinman na panahon na an Kagurangnan dae dapat na magdadara kunsoarin na siya minagusto, asin magbabayad sa paghuna niyang marhay.
29 Kumbaya, siring na kamo mga ahente, kamo yaon sa mga gibohon nin Kagurangnan; asin kun anuman an saindong gigibohon na uyon sa kagustuhan nin Kagurangnan iyo an mas magigin mga katuyuhan nin Kagurangnan.
30 Asin kamo pinagtalaga na magtatao para sa saiyang mga banal kaining mga huring aldaw, na tanganing kamo makapagkamit nin kamanahan sa kadagaan nin Sion.
31 Asin hilnga, Ako, an Kagurangnan, nadedeklara sa saindo, asin an sakuyang mga tataramon segurado asin dae nanggad magpapalya, na saindong makakamtan ini.
32 Pero an gabos na mga bagay na kaipuhan na maglipas sa saindang panahon.
33 Kumbaya, dae kamo nanggad magpagal sa marahay na gibo, nin huli ta kamo naglalatag sana kan pundasyon kan sarong dakulaon na trabaho. Asin sa mga saradit na bagay minagikan idtong darakula.
34 Hilnga, an Kagurangnan pinagkakaipong gayo an puso asin sarong mahinunod sa isip; asin an mga mahinunod asin masinunod-sunod magkakakan nin marhay sa kadagaan nin Sion kaining mga huring aldaw.
35 Asin an mga masumbikal pagpuputulon paluwas sa kadagaan nin Sion, asin ipagpapadara paharayo, asin dae magmamana nin kadagaan.
36 Nin huli ta, katotohanan Ako nagsasabi na an mga masumbikal bakong kadugo ni Ephraim, kumbaya sinda pagbubutungon paluwas.
37 Hilnga, Ako, an Kagurangnan, naghimo kan sakuyang simbahan kaining mga huring aldaw na siring sa sarong huwes na nagtutukaw sa sarong buro-bukid, o sa sarong halangkaw na lugar, tanganing paghuhusgaran an mga nasyon.
38 Nin huli ta ini mangyayaring maglilipas na an mga nag-eerok sa Sion maghuhusga sa gabos na mga bagay manunungod sa Sion.
39 Asin an mga putikon asin mga hipokrito pagpoprobaran ninda, asin sinda na bakong mga apostoles asin mga propeta maipagbabantog.
40 Asin maski an obispo, na iyo an huwes, asin an saiyang mga tagapagpayo, kun sinda bakong matapat sa saindang pagpapangalaga pagkokondenaron, asin an iba ipagtatanom na saindang karibay.
41 Nin huli ta, hilnga, Ako nagsasabi sa saindo na an Sion mamumukadkad, asin an kamurawayan nin Kagurangnan mapapasaiya;
42 Asin siya an magigin sarong ensigniya sa mga katawohan, asin igwang mag-aabot pasiring sa saiya gikan sa lambang nasy0on sa irarom nin langit.
43 Asin an aldaw mag-aabot kunsoaring na an mga nasyon nin kinaban mangungubog-kubog nin huli saiya, asin magkakatarakot nin huli kan saiyang mga teribleng kaibahan. An Kagurangnan an nagtaram kaini. Amen.

SEKSYON 63

Kapahayagan na ipinagtao sa paagi ki Joseph Smith an Propeta, sa Kirtland, Ohio, hinapos kan Agosto 1831. HS 1:206-211. An Propeta, Sidney Rigdon, asin Oliver Cowdery nag-abot na sa Kirtland kan Agosto 7, gikan sa saindang pagbisita sa Missouri. Bilang pangenot kan saiyang rekord kan kapahayagan na ini an Propeta nagsurat: Sa umboy pang mga aldaw kan simbahan na ini, nagkaigwa nin sarong dakulaon na kahandalan sa pagguno kan tataramon nin Kagurangnan sa lambang tema na sa anumang dalan nagpapanungod kan satuyang kaligtasan; asin habang an kadagaan nin Sion iyo ngonyan an mas pinaka-importanteng temporal na bagay na nahihiling, Ako naghapot sa Kagurangnan para sa iba pang impormasyon mapanungod sa pagkakatiripon kan mga Banal, asin sa pagbabakal nin kadagaan, asin iba pang mga bagay.”
*******
1-6, Sarong aldaw nin kaanggutan mag-aabot sa mga mararaot; 7-12, An mga senyales minaarabot sa paagi nin pagtubod; 13-19, An adulterosong puso magsisikwal kan pagtubod asin ipagtatapok pasiring sa lawa nin kalayo; 20, An pano nin pagtubod makakaresibe nin sarong kamanahan sa ibabaw kan pinagbag-ong kinaban; 21, An bilog na estorya kan mga pangyayari sa Bukid nin Pagbabag-o dae pa ipinagpahayag; 22-23, An masinunod-sunod makakaresibe nin mga misteryo kan kahadean; 24-31, An mga kamanahan kaipuhan na pagbarakalon; 32-35, An Kagurangnan nagdekrito nin mga giyera, asin an mga mararaot manggagaradan nin mga mararaot; 36-48, An mga banal kaipuhan na magtiripon sa Sion asin magtatara-o nin mga kuwarta tanganing ipagtindog ini; 49-54, Mga bendisyon pinagpapaseguro sa mga pano nin pagtubod sa Ikaduwang Pag-abot, sa pagkabuhay-liwat, asin sa panahon nin Milenyo; 55-58, Iyo ini an aldaw nin pagpapatanid; 59-66, An pangaran nin Kagurangnan pinagdadara sa daeng kamanungdanan kan mga tawo na naggagamit kaini na mayong autoridad.
*******
MAGHINANYOG, O kamong mga katawohan, asin bukasi an saindong mga puso asin magtao nin talenga gikan sa harayo; asin magdangog, kamo na pinag-aapod an mga sadire na mga katawohan nin Kagurangnan, asin dangoga an tataramon nin Kagurangnan, asin an saiyang kagustuhan mapanungod sa saindo.
2 Iyo, katotohanan, Ako nagsasabi, dangoga an tataramon niya na an kaanggutan pinagsindihan laban sa mga mararaot asin mga masumbikal;
3 Na pinagmamawot na pagkuahon maski sinda na saiyang pinagdadara, asin preserbaron an buhay ninda na saiyang pinagpepreserba;
4 Na nagpapatindog na yaon sa saiyang sadireng kagustuhan asin ikinakaogma; asin magdedestroso sa panahon na saiyang ginugusto, asin kayang ipagtapok an kalag pababa pasiring sa impiyerno.
5 Hilnga, Ako, an Kagurangnan, pinagbubuyagyag an sakuyang boses, asin ini pagsusunudon.
6 Kumbaya, katotohanan Ako nagsasabi, tugutan na an mga mararaot makapagdangog, asin tugutan na an mga masumbikal matakot asin mangubog-kubog; asin tugutan na an mga mayong paniniwala makapagpugol kan saindang mga ngabil, nin huli ta an aldaw nin kaanggutan mag-aabot sa sainda na siring sa ipu-ipo, asin an gabos na laman makakaaram na Ako an Diyos.
7 Asin sinda na naghahanap nin mga senyales makakahiling nin mga senyales, pero bakong pasiring sa kaligtasan.
8 Katotohanan, Ako nagsasabi sa saindo, igwa sa pag-iriba nindo na naghahanap nin mga senyales, asin yaon sinda maski poon pa sa kapinunan;
9 Pero, hilnga, an pagtubod minaabot bakong sa paagi nin mga senyales, kundi an mga senyales minasunod sainda na naniniwala.
10 Iyo, an mga senyales minaabot sa paagi nin pagtubod, bakong sa kagustuhan nin mga tawo, ni siring sa saindang ikinakaogma, kundi sa paagi nin kagustuhan kan Diyos.
11 Iyo, an mga senyales minaabot sa paagi nin pagtubod, pasiring sa darakulang mga trabaho, nin huli ta kun mayong pagtubod mayong tawo na makakapagpaogma sa Diyos; asin sa saiya na an Diyos may anggot, siya dae ikinakaogmang gayo; kumbaya, siring sa sainda siya mayong ipinapahiling na mga senyales, kundi kaanggutan sana pasiring sa saindang kondenasyon.
12 Kumbaya, Ako, an Kagurangnan, dae nag-oogma sa sainda na pag-iriba nindo na naghahanap nin mga senyales asin makangangalas para magtubod, asin bako para sa karahayan kan mga tawo pasiring sa sakuyang kamurawayan.
13 Daeng pagkukulang, Ako nagtatao nin mga kasugoan, asin kadakul an nagtaralikod kan sakuyang mga kasugoan asin dae nagsusunod kan mga ini.
14 Igwang gayo sa pag-iriba nindo na mga parasaluib na mga lalake asin babae; na an iba sa sainda nagtaralikod na saimo, asin an iba man yaon kaiba mo na poon ngonyan ipagpapahayag.
15 Tugutan sindang makapagmangno asin magsolsol nin hidali, ta baka baya an paghuhukom maabot sa sainda bilang sarong patibong, asin an saindang mga kalokohan mahihimong maipagbubuyagyag, asin an saindang mga naginibohan magsusunod sa sainda na mahihiling kan mga mata nin mga katawohan.
16 Asin katotohanan Ako nagsasabi sa saindo, siring na nakapagsabi na Ako kaidto, siya na naghihiling sa sarong babae na igwang pagmawot nin pagdurog sa saiya, o sa iba man nakakapagkomiter na nin adulteryo sa saindang mga puso, sinda dae magkakaigwa nin Espiritu, kundi nagsisikwal sa pagtubod asin matatakot.
17 Kumbaya, Ako, an Kagurangnan, nagsasabi na an pano nin pagkatakot, asin an mayong paniniwala, asin an gabos na mga putikon, asin an siisay man na nagmomoot asin naghihimo nin sarong kaputikan, asin an bugaw, asin an huklob, magkakaigwa kan saindang parte sa lawa nin naglalaad na kalayo asin asupre, na iyo ngani an ikaduwang kagadanon.
18 Katotohanan Ako nagsasabi, na sinda dae magkakaigwa nin parte sa enot na pagkabuhay-liwat.
19 Asin ngonyan hilnga, Ako, an Kagurangnan, nagsasabi sa saindo na kamo bako pang malinigon, nin huli ta ining mga bagay yaon sa pag-iriba pa nindo.
20 Daeng pakukulang, siya na nagpakatatag sa pagtubod asin naggigibo kan sakuyang kagustuhan, iyo man sana an makakatagal, asin makakaresibe nin sarong kamanahan sa ibabaw nin kinaban kunsoarin an aldaw nin pagbabag-o mag-abot.
21 Kunsoarin na an kinaban magbabag-o, na magin uyon sa desinyo na ipinagpahiling sa sakuyang mga apostoles sa ibabaw nin bukid; na an kabilugang estorya dae pa nindo nareresibe.
22 Asin ngonyan, katotohanan Ako nagsasabi sa saindo, na siring na Ako an nagsabi na Ako nagmamawot na maipaaram an sakuyang kagustuhan sa saindo, bakong sa paagi nin kasugoan, nin huli ta igwang kadakul na dae pinag-obserbahang sunudon an sakuyang mga kasugoan.
23 Pero sa saiya na nagsusunod sa sakuyang mga kasugoan Ako magtatao kan mga misteryo nin sakuyang kahadean, asin iyo man sana an mapapasaiya bilang sarong burabod in buhay na tubig, na nagbubulos pasiring sa daeng katapusan na buhay.
24 Asin ngonyan, hilnga, iyo ini an kagustuhan nin Kagurangnan an saindong Diyos mapanungod kan saiyang mga banal, na sinda dapat na mag-asembliya kan saindang mga sadire na magkatiripon-tipon pasiring sa kadagaan nin Sion, bakong sa paghihidali, na baka magkakaigwa nin kariribongan, na iyo an magdadara nin kapestehan.
25 Hilnga, an kadagaan nin Sion--- Ako, an Kagurangnan, pinagkakaputan ini kan sakuyang sadireng mga kamot;
26 Daeng pagkukulang, Ako, an Kagurangnan, nagtatao ki Cezar kan mga bagay na ki Cezar.
27 Kumbaya, Ako an Kagurangnan naggusto na kamo dapat na magbarakal nin mga kadagaan, na tanganing kamo magkaigwa nin bentahe sa mundo, na tanganing kamo puwedeng magkakaigwa nin kakusugan kan mundo, na tanganing sinda dae madagka pasiring sa kaanggutan.
28 Nin huli ta si satanas ipinagbugtak ini sa saindang mga puso tanganing magka-aranggot laban saindo, asin sa pagpapabulos nin dugo.
29 Kumbaya, an kadagaan nin Sion dae nanggad makakamtan kundi sa paagi nin pagbabakal o sa paagi nin dugo, ta kun sa ibang paagi mayong kamanahan para sa saindo.
30 Asin kun sa paagi nin pagbabakal, hilnga kamo pinagbebendisyunan;
31 Asin kun sa paagi nin dugo, siring na kamo pinagbabawalan na magpabulos nin dugo, uya, an saindong mga kaiwal mapasiring sa saindo, asin kamo pagpapakulon poon sa sarong siyudad hanggan sa sarong siyudad, asin poon sa sarong sinagoga hanggan sa sarong sinagoga, asin kakadikiton sana an makakatindog tanganing resibihon an sarong kamanahan.
32 Ako, an Kagurangnan, anggot na gayo sa mga mararaot: Ako an namumugol kan sakuyang Espiritu gikan sa mga nag-eerok kan kinaban.
33 Ako nakapagsumpa sa sakuyang kaanggutan, asin nagdekrito nin mga giyera sa lalawgon kan kinaban, asin an mga mararaot manggagadan nin mga mararaot, asin an pagkatakot maabot sa lambang tawo;
34 Asin an mga banal man masasakitan na gayong makakapag-eskapo; daeng pagkukulang, Ako, an Kagurangnan, kaiba ninda, asin magbababa sa langit gikan sa presensiya kan sakuyang Ama asin konsumuhon an mga mararaot kan dae napaparong na kalayo.
35 Asin hilnga, bako lang ini ngonyan, kundi mahaloy-haloy pa.
36 Kumbaya, nahihiling na Ako, an Kagurangnan, nagdekrito kan gabos na mga bagay sa ibabaw kan lalawgon nin kinaban, Ako an may kagustuhan na an sakuyang mga banal dapat na mag-asembliya sa kadagaan nin Sion;
37 Asin ta an lambang tawo dapat na magdara nin pagkamatanos sa saiyang mga kamot asin katapatan sa saiyang habayan, asin magpapataas nin sarong mapagpatanid na boses sa mga nag-eerok nin kinaban; asin ideklarang pareho sa paagi nin tataramon asin sa paagi nin payangyang na an kapung-awan maabot sa mga mararaot.
38 Kumbaya, tugutan an sakuyang mga desipulos na yaon sa Kirtland na pakarhayon an saindang mga temporal na mga kaipuhanan, na naka-estar sa kaomahanan na ini.
39 Tugutan an sakuyang surugoon na si Titus Billings, na iyo an nagbabantay duman, na ipagpabakal an kadagaan, na tanganing siya makapag-andam sa paabuton na pamuk-ad na himoon an saiyang pagbiyahe pasiring sa kadagaan nin Sion, kaiba sinda na nag-eerok duman, laen lang sainda na Ako an nagreserba para sa sakuyang sadire, na dae mag-iba sagkod na Ako dae pa nagsugo sainda.
40 Asin tugutan na an gabos na kuwarta na matitipon, ini bakong importanteng gayo kun kadikiton o kadakulon, basta maipagpadara pasiring sa kadagaan nin Sion, sa sainda na Ako an nagngaran na magreresibe.
41 Hilnga, Ako, an Kagurangnan, magtatao sa sakuyang surugoon na si Joseph Smith, Jun., nin kapangyarihan na tanganing siya puwedeng makapagmasid sa paagi nin Espiritu sainda na magpapasiring sa kadagaan nin Sion, asin sa iba kan sakuyang mga desipulos na mawawalat.
42 Tugutan an sakuyang surugoon na si Newel K. Whitney ipagtada an saiyang tindahan, o sa ibang mga tataramon, an tindahan, sa kadikit pang gayong panahon.
43 Daeng pagkukulang, tugutan siyang makapagtao nin gabos na kuwarta na saiyang maitao, tanganing ipagpadara pasiring sa kadagaan nin Sion.
44 Hilnga, an mga bagay na ini yaon sa saiyang mga sadireng kamot, tugutan siyang makapaggibo uyon sa kadunungan.
45 Katotohanan Ako nagsasabi, tugutan siya na maordinahan bilang sarong ahente kan mga desipulos na mawawalat, asin tugutan siyang maordinahan sa kapangyarihang ini;
46 Asin ngonyan maghidaling bisitahon an mga simbahan, ipagpaliwanag na gayo ining mga bagay sa sainda, kaiba an sakuyang surugoon na si Oliver Cowdery. Hilnga, iyo ini an sakuyang kagustuhan, na makapag-ipon nin kuwarta na siring sa sakuyang pinagdireksiyon.
47 Siya na pano nin pagtubod asin matatag iyo an makapagdaog kan mundo.
48 Siya na nagpadara nin mga kayamanan pasiring sa kadagaan nin Sion makakapagresibe nin sarong kamanahan sa mundong ini, asin an saiyang mga naginibohan magsusunod saiya, asin man sarong pabuya sa kinaban na maabot.
49 Iyo, asin paladan an mga gadan na nagkagaradan sa Kagurangnan, magpoon ngonyan, kunsoarin na an Kagurangnan maabot, asin an mga lumang bagay maglilipas, asin an gabos na mga bagay magigin bag-o, sinda magbabangon gikan sa gadan asin dae na magagadan pagkatapos, asin magreresibe nin sarong kamanahan sa atubangan nin Kagurangnan, sa banal na siyudad.
50 Asin siya na buhay kunsoarin an Kagurangnan mag-abot, asin nagin matatag sa pagtubod, paladan siya; daeng pagkukulang, ini pinagngaran sa saiya na magagadan sa edad nin tawo.
51 Kumbaya, an kaarakian magdadarakula sagkod na sinda magin gurang; an mga gurang na mga tawo magagadan; pero sinda dae magtuturog sa alpog, kundi sinda pagbabag-uhon sa sarong kisap nin mata.
52 Kumbaya, nin huli kaining kausa nagbalangibog an mga apostoles sa mundo nin pagkabuhay-liwat nin mga gadan.
53 Ining mga bagay iyo an mga bagay na kaipuhan nindong paghanapon; asin magtataram na siring sa manera nin Kagurangnan, sinda ngonyan haranihon nang gayo, asin sa sarong panahon maabot, magin sa aldaw kan pag-abot kan Ake nin Tawo.
54 Asin sagkod sa oras na idto magkakaigwa nin mangmang na mga birhen sa pag-iriba nin mga madudunong; asin sa oras na iyan maabot an bilog na paglalaen kan mga matatanos asin kan mga mararaot; asin sa aldaw na iyan Ako magpapadara kan sakuyang mga anghel tanganing pagpuruton paluwas an mga mararaot asin ipagtapok sinda pasiring sa daeng kagadanan na kalayo.
55 Asin ngonyan hilnga, katotohanan Ako nagsasabi sa saindo, Ako, an Kagurangnan, dae naoogma sa sakuyang surugoon na si Sidney Rigdon; siya nagpapalangkaw kan saiyang sadire sa saiyang puso, asin habong magdangog nin pagpapayo, kundi nakapagpamundo sa Espiritu;
56 Kumbaya an saiyang mga sinurat bakong akseptable para sa Kagurangnan, asin siya maggigibo nin iba man; asin kun an Kagurangnan habong magresibe kaini, hilnga siya dae na magtitindog sa opisina na kun saen Ako an nagngaran saiya.
57 Asin giraray, katotohanan Ako nagsasabi sa saindo, sinda na nagmamawot sa saindang mga puso, sa kahuyoan, tanganing pagpatanidan an mga makasalanon na magsosolsol, tugutan sinda na pag-ordinahan sa kapangyarihan na ini.
58 Nin huli ta iyo ini an aldaw nin pagpapatanid, asin bakong sarong aldaw nin kadakul na mga tataramon. Nin huli ta Ako, an Kagurangnan, dae mapagbasang-basang sa mga huring aldaw.
59 Hilnga, Ako naggikan sa itaas, asin an sakuyang kapangyarihan nakalatag sa irarom. Ako an gabos gabos, asin yaon sa gabos, asin sa paagi kan gabos, asin naghahanap kan gabos na mga bagay, asin an aldaw maabot na tanganing an gabos na mga bagay pangangaputan ko.
60 Hilnga, Ako an Alpha asin Omega, na iyo ngani si JesuCristo.
61 Kumbaya, tugutan an gabos na mga tawo na magmaan kun paano ninda pinagdadara an sakuyang pangaran sas saindang mga ngabil---
62 Nin huli ta hilnga, katotohanan Ako nagsasabi, na kadakul duman na yaon sa irarom kaining kondenasyon, asin ginamit ini sa mayong kamanungdanan, na mayong autoridad.
63 Kumbaya, tugutan kan simbahan na makapagsolsol kan saindang mga kasalan, asin Ako, an Kagurangnan, an magsasadire sainda; ta kun laen man sinda paghahaleon.
64 Giromdoma baya na idtong naggigikan sa itaas sagrado, asin pagtataramon na may pag-iingat, asin sa paagi kan patanid kan Espiritu; asin sa arog kaini mayong kondenasyon, asin kamo magreresibe nin Espiritu sa paagi nin pangadyeon; kumbaya, kun mayo kaini yaon pa man an kondenasyon.
65 Tugutan na an sakuyang surugoon na si Joseph Smith, Jun., asin Sidney Rigdon, na hanapan sinda nin sarong pag-eestaran, habang sinda pinagtutukdoan sa paagi kan pangadyeon sa paagi kan Espiritu.
66 Ining mga bagay matatada tanganing malampasan sa paagi nin pagpasensiya, na tangani baya na sa arog sainda mapupuwedeng makapagresibe nin mga kadakul pa asin eternal na gabat nin kamurawayan, o kun bako man, sarong dakulaon na kondenasyon. Amen.

SEKSYON 62

Kapahayagan na ipinagtao sa paagi ki Joseph Smith an Propeta, sa may gilid kan Missouri River sa Chariton, Missouri, Agosto 13, 1831. HS 1:205-206. Sa aldaw na ini an Propeta asin an saiyang grupo, na yaon sa dalan gikan sa Independence pasiring sa Kirtland, nakipaghilingan sa nagkapirang mga elders na yaon na sa dalan pasiring sa kadagaan nin Sion, asin, pagkatapos kan maogmahon na mga pagbati, nagresibe kaining kapahayagan.
*******
1-3, An mga patotoo pinagtatala sa langit; 4-9, An mga elders dapat na mabiyahe asin magbalangibog uyon sa kahukuman asin mga direksiyon kan Espiritu.
*******
HILNGA, asin maghinanyog, O kamong mga elders kan sakuyang simbahan, nagsasabi an Kagurangnan saindong Diyos, na si JesuCristo, an saindong tagapagpatahaw, na nakakaaram nin kaluyahan kan tawo asin kun paano makakapagtabang sainda na pinagtetentaran.
2 Asin katotohanan an sakuyang mga mata yaon sainda na dae pa nakakaabot sa kadagaan nin Sion; kumbaya an saindong misyon dae pa lamang pano.
3 Daeng pagkukulang, kamo bendisyunado, nin huli ta an testimonya na igwa kamo pinagrerekord sa langit para sa mga anghel na iyo an nagbabantay; asin sinda nag-oogma sa saindo, asin an saindong mga kasalan pinagpapatawad na saindo.
4 Asin ngonyan padagusa an saindong paglalakbay. Mag-asembliya kan saindong mga sadire sa kadagaan nin Sion; asin maggibo nin sarong miting asin magkasararong mag-orogma, asin magdulot nin sarong sakramento para sa Pinakahalangkaw.
5 Asin pagkasunod kamo mapupuwedeng magbaralik sa pagpapatotoo, iyo, maski kamo gabos, o sa manduwa-duwa, na sa paghuhuna nindong maray, bako ining importante para sako; kaya lang magin kamong ano nin pagtubod, asin ideklara an magayunon na mga bareta sa mga nag-eerok kan kinaban, o sa pag-iriba kan mga kongregasyon nin mga mararaot.
6 Hilnga, Ako, an Kagurangnan, an nagdara saindo na magkasararo na tanganing an promisa mapupuwedeng magka-urutob, na an pano nin pagtubod sa saindo dapat na maipreserba asin mag-oogmang magkairibahan sa kadagaan nin Missouri. Ako, an Kagurangnan, nangangako sa pano nin pagtubod asin dae nakakaputik.
7 Ako, an Kagurangnan, nakahanda, na kun siisay man sa pag-iriba nindo na nagmamawot na makasakay sa ibabaw nin mga kabayo, o sa ibabaw kan mga asno, o sa laog nin karwahe, siya makakaresibe kan biyayang ini, kun siya makaresibe kaini gikan sa mga kamot nin Kagurangnan, na may sarong mapagpasalamat na puso sa gabos na mga bagay.
8 Ining mga bagay yaon sa saindo tanganing makapaggibo uyon sa kahukuman asin mga direksiyon kan Espiritu.
9 Hilnga, an kahadean pagsadire nindo. Asin hilnga, asin uya, Ako kaiba kan mga pano nin pagtubod pirme. Arog kaini. Amen.

SEKSYON 61

Kapahayagan na ipinagtao sa paagi ki Joseph Smith an Propeta, sa may gilid kan Missouri River, Mcllwaine's Bend, Agosto 12, 1831. HS 1:202-205. Sa saindang pabalik na biyahe pasiring sa Kirtland an Propeta asin sampulong elders nagbiyahe pababa sa Missouri River sakay nin mga bangka. Sa ikatulong aldaw kan biyahe kadakul na kadelikaduhan an pinag-agihan. Si Elder William W. Phelps, sa luntukon na aldaw na bisyon, nahiling an paradestroso na nakasakay na may kapangyarihan sa ibabaw kan lalawgon nin mga katubigan.
*******
1-12, An Kagurangnan nagdekrito nin kadakul na mga kapahamakan sa ibabaw nin mga katubigan; 13-22, An mga katubigan pinagsumpa ni John, asin an paradestroso nakasakay sa kaibabawan nin saindang lalawgon; 23-29, An iba igwa nin kapangyarihan na sugoon an mga katubigan; 30-35, An mga elders kaipuhan na magbiyahe sa manduwa-duwa asin ipagbalangibog ang ebanghelyo; 36-39, Sinda kaipuhan na mag-andam para sa pag-abot kan Ake nin Tawo.
*******
HILNGA, asin maghinanyog sa boses niya na igwang bilog na kapangyarihan, na gikan pa sa daeng katapusan sagkod sa daeng katapusan, na iyo an Alpha asin Omega, an kapinunan asin an katapusan.
2 Hilnga, katotohanan kaya nagsabi an Kagurangnan sa saindo, O kamong mga elders kan sakuyang simbahahn, na pinag-asembliya sa lugar na ini, na an mga kasalan ngonyan pinagpatawad na saindo, nin huli ta Ako, an Kagurangnan, nagpapatawad nin mga kasalan, asin Ako pano nin pagkaherak sa sainda na nagkukumpisal kan saindang mga kasalan na igwang kapakumbabaan nin mga puso;
3 Pero katotohanan Ako nagsasabi sa saindo, na ini bakong kinakaipuhan na gayo para kaining bilog na kumpanya kan sakuyang mga elders na maghihirong hidali sa ibabaw nin mga katubigan, habang an mga naka-erok sa arinman na ibong na lado yaon sa pagkapara nin kakulangan sa pagtubod.
4 Daeng pagkukulang, Ako nagtutugo kaini na tanganing kamo mapupuwedeng makapagpapatotoo; hilnga, igwa nin kadakulon na kadelikaduhan sa ibabaw nin mga katubigan, asin mass lalo nang gayo magpoon ngonyan;
5 Nin huli ta Ako, an Kagurangnan, nagdekrito sa sakuyang anggot nin kadakulon na mga kapahamakan sa ibabaw nin mga katubigan; iyo, asin mas lalo na sa ibabaw kaining mga katubigan;
6 Daeng pagkukulang, an gabos na laman yaon sa sakuyang kamot, asin siya na panoon nin pagtubod sa pag-iriba nindo dae mapapara sa paagi nin mga katubigan.
7 Kumbaya, ini kapakinabangan na an sakuyang surugoon na si Sidney Gilbert asin an sakuyang surugoon na si William W. Phelps dapat magmadali kan saindang mga kasisibutan asin misyon.
8 Daeng pagkukulang, Ako dae matugot na kamo dapat na mapagbanga sagkod na kamo ipinagpakulan na kan gabos nindong mga kasalan, na tanganing kamo baya magigin saro, na tanganing kamo mapupuwedeng dae mapapara sa karaotan;
9 Pero ngonyan, katotohanan Ako nagsasabi, ini kamawotan sako na kamo dapat na mapagbanga. Kumbaya tugutan na an sakuyang mga surugoon na sinda Sidney Gilbert asin William W. Phelps na magduman sa dati nindang kumpanya, asin tugutan sinda kan saindang pagbiyahe na may paghidali na tangani na sinda makapaggibo kan saindang misyon, asin sa paagi kan pagtubod sinda mangingibabaw.
10 Asin habang sinda pano nin pagtubod sinda pagpepreserbaron, asin Ako, an Kagurangnan, magigin kaiba ninda.
11 Asin tugutan an katadaan na magkua kan bagay na kinakaipuhan para sa pagbabado.
12 Tugutan an sakuyang surugoon na si Sidney Gilbert na magdara kaidtong mga bagay na bako man gayong kinakaipuhan sa saiya, siring na kamo mag-uyon.
13 Asin ngonyan, hilnga, para sa saindong karahayan. Ako nagtatao sa saindo nin sarong kasugoan mapanungod kaining mga bagay; asin Ako, an Kagurangnan, makikipagrason na kaiba nindo na arog sa kaidtong mga tawo sa mga aldaw kan suanoy.
14 Hilnga, Ako, an Kagurangnan, sa kapinunan nagbendisyon sa mga katubigan; pero sa huring mga aldaw, sa paagi kan nguso nin sakuyang surugoon na si John, Ako an nagsumpa kan mga katubigan.
15 Kumbaya, an mga aldaw maarabot na mayong laman an magigin ligtas sa ibabaw kan mga katubigan.
16 Asin ini pinagsasabi sa mga aldaw na maarabot na mayong makakapagduman sa kadagaan nin Sion sa ibabaw nin mga katubigan, kundi siya na matanos sa puso.
17 Asin, habang Ako, an Kagurangnan, sa kapinunan pinagsumpa an kadagaan, magin ngani sa huring mga aldaw na Ako an nagbendisyon kaini, sa kapanahunan kaini, para sa paggagamit kan sakuyang mga banal, na tanganing sinda puwedeng makikipagbahagi sa katabaan kaini.
18 Asin ngonyan Ako magtatao sa saindo nin sarong kasugoan na kun ano an sakuyang pinagsasabi sa saro, Ako nagsasabi na sa gabos, na tanganing kamo makakapagpatanid na kan saindong mga katugangan mapanungod kaining katubigan, na tanganing sinda dae mag-abot na nagbibiyahe sa ibabaw ninda, na baka baya an saindong pagtubod mahuhulog asin sinda magkakadarakop sa laog nin patibong;
19 Ako, an Kagurangnan, nagdekrito, asin an paradestroso nakisakay sa ibabaw kan lalawgon kaini, asin Ako dae na pinagbabawi an dekrito.
20 Ako, an Kagurangnan, anggot saimo kasuodma, pero ngonyan an sakuyang anggot nawara na.
21 Kumbaya, tugutan idtong mapanungod sainda na Ako an nakapagtaram, na dapat na gumibo kan saindang pagbibiyahe nin hadali---giraray Ako nagsasabi sa saindo, tugutan sinda na gumibo kan saindang pagbibiyahe nin hidali.
22 Asin ini bakong mahalaga sa sakuya, pagkatapos nin kadikit, kun ini mangyari pa na sinda makapaggibo kan saindang misyon, maski sa arin man na sinda nagbiyahe sa paagi nin tubig o sa paagi nin daga; tugutan ini na mangyari siring na ini hinimong maipagpaaram sa sainda na uyon sa saindang mga paghuhukom magpoon ngonyan.
23 Asin ngonyan, mapapanungod sa sakuyang mga surugoon, na sinda Sidney Rigdon, Joseph Smith Jun., asin Oliver Cowdery, tugutan sinda na dae na otro mag-agi sa mga katubigan, laen lang kun inin yaon sa kanal, habang nagbibiyahe pasiring sa saindang mga pagharongon; o sa ibang tataramon sinda dae dapat na mag-agi sa mga katubigan sa pagbibiyahe, laen lang kun ini yaon sa kanal.
24 Hilnga, Ako, an Kagurangnan, nakapagngaran na kan sarong paagi para sa pagbibiyahe kan sakuyang mga banal; asin hilnga, iyo ini an paagi---na pagkatapos na sinda maghale sa kanal sinda magbibiyahe sa paagi na nin daga, habang sinda pinagsusugo na magbibiyahe asin magpapasiring sa kadagaan nin Sion;
25 Asin sinda maggigibo na arog kan mga kaarakian nin Israel, na pinagtutugdok an saindang mga tolda habang yaon sa may dalan.
26 Asin, hilnga, ining kasugoan saimong ipagtatao sa gabos mong mga katugangan.
27 Daeng pagkukulang, sa sainda na pinagtaw-anan nin kapangyarihan na magsugo nin mga katubigan, sa saiya ini pinagtatao sa paagi kan Espiritu na nakakaaram kan gabos na saiyang mga paagi;
28 Kumbaya, tugutan siyang gumibo habang an Espiritu kan buhay na Diyos iyo an nagsusugo saiya, maski na sa arin man kun sa ibabaw nin daga o kun sa ibabaw nin mga katubigan, habang ini nagpapadagos na yaon sakuya na maggigibo magpoon ngonyan.
29 Asin sa saimo ipinagtatao an kurso para sa mga banal kan kampo nin Kagurangnan, na magbiyahe.
30 Asin giraray, katotohanan Ako nagsasabi sa saindo, na an sakuyang mga surugoon, na sinda Sidney Rigdon, Joseph Smith Jun., asin Oliver Cowdery, dae magbubuka kan saindang mga nguso sa mga kongregasyon nin mga mararaot sagkod na sinda makaabot na sa Cincinnati;
31Asin sa lugar na iyan saindang ipagpapalangkaw an saindang mga boses para sa Diyos laban kaining mga katawohan, iyo, sa saiya na an kaanggutan nasasaray laban sa saindang mga karaotan, sarong katawohan na hinog nang gayo para sa kapahamakan.
32 Asin magpoon diyan tugutan sinda na maglalakbay para sa mga kongregasyon kan saindang mga katugangan, para sa saindang mga pagtatrabaho na maski ngonyan iyo an pinagkakaipong gayo sa pag-iriba ninda kesa sa pag-iriba nin mga kongregasyon kan mga mararaot.
33 Asin ngonyan, mapanungod sa katadaan, tugutan sindang maglalakbay asin ideklara an tataramon sa pag-iriba nin mga kongregasyon kan mga mararaot, habang ini ipinagtatao pa;
34 Asin habang sinda naggigibo kaini sinda naglilinig na kan saindang mga bado, asin sinda magigin malinigon na sa atubangan ko.
35 Asin tugutan sinda na makapaglakbay na magkaibahan, o sa manduwa-duwa, na sa paghuna ninda marahay, kaya lang tugutan na an sakuyang surugoon na si Reynolds Cahoon, asin an sakuyang surugoon na si Samuel H. Smith, na sainda ako naoogmang gayo, na dae magin separado sagkod na sinda makabalik na sa saindang mga pagharongon, asin ini para sa madunong na katuyuhan na yaon sakuya.
36 Asin ngonyan, katotohanan Ako nagsasabi sa saindo, asin kun ano an pinagsasabi ko sa saro Ako nagsasabi na man sa gabos, magin kamong maogmahong gayo, saradit na kaarakian; nin huli ta Ako yaon sa katahawan nindo, asin Ako dae nagpapabaya saindo;
37 Asin habang kamo nagpapakumbaba kan saindong mga sadire sa atubangan ko, an bendisyon kan kahadean mapapasaindo.
38 Bugkusa an saindong mga habayan asin magbantay asin magin mahinahon, bantayan an pag-abot kan Ake nin Tawo, nin huli ta siya maabot sa oras na dae nindo naiisipan.
39 Magpangadye pirme na kamo dae makakalaog sa tentasyon, na tanganing kamo mapupuwedeng makapag-antabay kan aldaw nin saiyang pag-abot, maski arin man sa buhay o sa kagadanon. Arog kaini. Amen.