Thursday, August 21, 2008

SEKSYON 87

Kapahayagan asin propesiya kan giyera, ipinagtao sa paagi ki Joseph Smith an Propeta, Disyembre 25, 1832. HS 1:301-302. Ining seksyon naresibe kan panahon na an mga katugangan naghohorophorop asin nag-aatid-atid kan Aprikanong kauripnan sa kontinente nin Amerika asin an kauripnan kan mga kaarakian nin mga tawo sa bilog na kinaban.

*******

1-4, Giyera pinaghula sa tahaw kan mga Estados sa Hiraga asin kan mga Estados sa Timog; 5-8, Dakulang mga kalamidad an maghuhulog sa gabos na mga nag-eerok kan kinaban.

*******

KATOTOHANAN, kaya nagsasabi an Kagurangnan mapanungod sa mga giyera na haranihon nang gayong mangyayari, magpoon sa rebelyon kan South Carolina, na mangyayaring magdumog nin kagadanan asin kasakitan sa kadakul na mga kalag;

2 Asin an panahon maabot na an giyera ipagpapabulos sa gabos na mga nasyon, magpoon sa lugar na ini.

3 Nin huli ta hilnga, an mga Estados sa Timog magkakabaranga kontra sa mga Estados sa Hiraga, asin an mga Estados sa Timog mangangapudan sa ibang mga nasyon, ngani an nasyon kan Bantog na Britanya, na siring kaini an apod, asin sinda man mangangapudan sa ibang mga nasyon, na tanganing ipagdepensa an saindang mga sadire kontra sa ibang mga nasyon; asin dangan an giyera ipagpapabulos sa gabos na mga nasyon.

4 Asin ini mangyayaring maglipas, pagkatapos nin kadakul na mga aldaw, an mga uripon mag-aalsa laban sa saindang mga among, na pagtitiriponon asin pagdidisiplinahon para sa giyera.

5 Asin ini mangyayaring maglipas man na an mga katadaan na nabayaan sa kadagaan magtitiripon kan saindang mga sadire, asin magigin angguton na gayo, asin iyo an magpapa-anggot kan mga Hentil nin sarong makuring anggot.

6 Asin kaya, sa paagi nin espada asin sa pagpapabulos nin dugo an mga nag-eerok kan kinaban magtatangis; asin may taggutom, asin sumpa, asin linog, asin daguldol kan langit, asin may mataromon asin mangirhaton na kidlat man, na an mga nag-eerok kan kinaban mahihimong mamatean an anggot, asin an indignasyon, asin nagpapakol na kamot nin Makapangyarihang Diyos, sagkod na an tapos magdekrito na humimo nin sarong bilog na katapusan kan gabos na mga nasyon;

7 Na kinurahaw kan mga banal, asin dugo nin mga banal, magpupundo nang makaabot sa mga talenga nin Kagurangnan kan Sabbath, gikan sa kinaban, tanganing ipagbalos sa saindong mga kaiwal.

8 Kumbaya, magtindog kamo sa banal na mga lugar, asin dae maghimo, sagkod na an aldaw nin Kagurangnan mag-abot; nin huli ta hilnga, ini minaabot nin hidale, nagsabi an Kagurangnan. Amen.

SEKSYON 86

Kapahayagan na ipinagtao sa paagi ki Joseph Smith an Propeta, sa Kirtland, Ohio, Disyembre 6, 1832. HS 1:300. Ining Kapahayagan naresibe habang an Propeta nagrerepaso asin nagrerebisa nin manuskrito kan salin nin Bibliya.

*******

1-7, An Kagurangnan pinagtao an kahulugan kan parabola nin trigo asin mga maroyparoy; 8-11, Mga bendisyon kan Pagkasaserdote para sainda na mga maninigong tagapagmana na uyon sa laman.

*******

KATOTOHANAN, kaya nagsasabi an Kagurangnan sa saindo na sakuyang mga surugoon, mapanungod sa parabola kan trigo asin kan maroyparoy;

2 Hilnga, katotohanan Ako nagsasabi, an umahan iyo an kinaban, asin an mga apostoles iyo an mga parasabwag kan banhi;

3 Asin pagkatapos na sinda nahulog sa pagkaturog an dakulang persigidor kan simbahan, an apostado, an patutot, ngani an Babilonya, na naghimo sa gabos na mga nasyon na uminom sa saiyang kopa, na yaon sa mga puso kan kaiwal, ngani si Satanas, nagtutukaw tanganing maghade--- hilnga siya an nagsabwag kan mga maroyparoy; kumbaya, an maroyparoy iyo an nagpiot kan tribo asin nagtulak kan simbahan pasiring sa kaparangan.

4 Pero hilnga, sa mga huring aldaw, ngani ngonyan habang an Kagurangnan nagpopoon na pagdarahon paluwas an tataramon, asin ugbos na minatalubo pa sana asin ini malumbod pa---

5 Hilnga, katotohanan Ako nagsasabi sa saindo, an mga anghel nagtatangis sa Kagurangnan aldaw asin banggi, na naka-andam asin naghahalat na ipagpadara na tanganing mag-ani sa umahan;

6 Pero an Kagurangnan nagsabi sa sainda, dae paggarabuton an mga maroyparoy habang an ugbos malumbudon pa (nin huli ta sa katotohanan an saindong pagtubod maluya pa), ta baka baya madestroso man nindo an trigo.

7 Kun kaya, tugutan na an trigo asin an mga maroyparoy magtalubong magkairibahan sagkod na an tag-ani bilog na maghinog na; dangan saindong enoton pagtitiroponon an trigo na laen sa mga maroyparoy, asin pagkatapos na magtipon an mga trigo, hilnga asin uya, an mga maroyparoy buburugkuson na magkabarandol, asin an umahan ipagtada na pagsusuloon.

8 Kun kaya, uya nagsabi an Kagurangnan sa saindo, na saindo na an pagkasaserdote ipinagpadagos sa paagi kan linya nin kapag-arakian kan saindong mga ama---

9 Nin huli ta kamo mga maninigong mga tagapagmana, na uyon sa laman, asin ipinagtago gikan sa kinaban kaiba ni Cristo para sa Diyos---

10 Kun kaya an saindong buhay asin an pagkasaserdote ipinagtada, asin kaipuhang gayo na ipagtada sa paagi nindo asin kan saindong linya nin kapag-arakian sagkod sa restorasyon kan gabos na mga banal na propeta magpoon pa sa kapinunan nin kinaban.

11 Kun kaya, paladin kamo kun kamo nagpapadagos sa sakuyang karahayan, sarong liwanag sa mga Hentil, asin sa paagi kaining pagkasaserdote, sarong tagapagligtas kan sakuyang mga katawohang Israel. An Kagurangnan an nagsabi kaini. Amen.

SEKSYON 85

Kapahayagan na ipinagtao sa paagi ni Joseph Smith an Propeta, sa Kirtland, Ohio, Nobyembre 27, 1823. HS 1:298-299. An seksyon na ini pinaghango gikan sa sarong surat kan Propeta para ki W. W. Phelps, na nag-eerok sa Independence, Missouri. Ini ipinagtao bilang kasimbagan sa mga kahaputan mapanungod kaidtong mga banal na naglipat pasiring sa Sion, pero sinda dae pa nakaresibe kan saindang kamanahan uyon sa pinag-establisang kamugtakan nin Simbahan.

*******

1-5, Mga kamanahan sa Sion pagreresibihon sa paagi nin konsagrasyon; 6-12, Sarong makapangyarihan asin makusog an magtatao sa mga banal kan saindang kamanahan sa Sion.

*******

Ini sarong gibohon kan klerk nin Kagurangnan, na saiyang pinagngaranan, na magtago nin sarong historya, asin sarong heneral na record nin simbahan kan gabos na mga bagay na nangyari sa Sion, asin kan gabos ninda na nagkonsagrar nin mga propriyedades, asin nagresibe nin mga kamanahan sa paging legal gikan sa bishop;

2 Asin man kan saindang manera nin pagkabuhay, kan saindang pagtubod, asin mga gibo; asin man kan mga apostados na nagrayo sa katotoohan pagkatapos naresibe an saindang mga kamanahan.

3 Ini kontraryo sa kagustuhan asin kasugoan nin Diyos na sinda na dae nagresibe kan saindang kamanahan sa paagi nin konsagrasyon, na kauyon kan saiyang ley, na saiyang pinagtao, na tanganing saiyang pagpabayadan nin ikapu an saiyang mga katawohan, tanganing prepararon sinda laban sa aldaw nin pagbalos asin kasuloan, dapat na an saindang mga pangaran nakatala kaiba an mga katawohan nin Diyos.

4 Bako na an saindang tala-angkanan pagtatagoon, o paghanapon kun saen ini puwedeng managboan sa mga record o historya kan simbahan.

5 An saindang mga pangaran dae dapat masusumpungan, ni an mga pangaran kan mga ama, ni an mga pangaran kan mga kaarakian, na naisurat sa libro kan ley nin Diyos, nagsabi an Kagurangnan nin mga Hukbo.

6 Iyo, kaya nagsasabi an tuninong na sadit na boses, na naghihinghing nin lagbasan asin minataros sa gabos na mga bagay, asin kun minsan ini naghihimo sa sakuyang mga tul-ang na mangubogkubog habang ini naghihimong magmanipesto, na nagsasabi:

7 Asin ini mangyayaring maglipas na Ako, an Kagurangnan Diyos, magpapadara nin sarong makapangyarihan asin makusog, na nagkakapot kan baston nin kapangyarihan sa saiyang kamot, na nagugubingan nin liwanag bilang sarong pantahob, an saiyang nguso magsasabi nin mga tataramon, eternal na mga tataramon; habang an saiyang laog sa daghan magigin sarong burabod nin katotoohan, tanganing ipamugtak na tultol an harong nin Diyos, asin tanganing pangatamanan sa paagi ni lote an mga kamanahan kan mga banal na mga pangaran na nanagboan, asin an pangaran kan saindang mga ama, asin kan saindang mga kaarakian, na nakatala sa libro kan ley nin Diyos;

8 Habang tawo yan, na pinagpangapudan nin Diyos asin pinagngaranan, na ipinagkaag an saiyang kamot tanganing maipa-untok an arko nin Diyos, mahuhulog sa paagi kan tuhog nin kagadanan, na siring sa sarong kahoy na pinagtamaan kan mataromon na tuhog nin kidlat.

9 Asin an gabos sainda na dae nanagboan na naisurat sa libro nin pagkagiromdom dae makakanagbo nin kamanahan sa aldaw na iyan, kundi sinda pagpupurutulon na magkawaratak-watak, asin an saindang mga porsiyon ipagngangaran sa sainda na pag-iriba kan mga daeng pagtubod, kun saen yaon an pagtangis asin pagrag-ot nin mga ngipon.

10 Ining mga bagay Ako nagsasabi na bakong sa sadire ko; kun kaya, siring na an Kagurangnan nakapagsabi, siya man an mag-uutob.

11 Asin sinda na yaon sa Halangkaw na Pagkasaserdote, na an mga pangaran dae mananagboan na nakasurat sa libro kan ley, o managboan na nag-apostasiya, o pinaghale na sa simbahan, asin man an hababang pagkasaserdote, o an mga miyembro, sa aldaw na iyan dae makakanagbo nin kamanahan sa pag-iriba kan mga banal kan Pinakahalangkaw;

12 Kun kaya, ini paggigibohon sa sainda na siring sa mga kaarakian kan padi, siring na mananagboan na nakatala sa ikaduwang tsapter asin saisyenta asin uno asin ikaduwang bersikulo kan Ezra.

Thursday, August 07, 2008

SEKSYON 84

Kapahayagan na ipinagtao sa paagi ki Joseph Smith an Propeta, sa Kirtland, Ohio, Septiyembre 22 asin 23, 1832. HS 1:286-295. Durante sa bulan nin Septiyembre, an mga elders nagpoon nang magbaralik gikan sa saindang mga misyon sa sirangan na mga estados asin maghihimo kan mga report kan saindang mga trabaho. Arog kaini habang sinda nagkatiripon sa panahon na ining kaogmahan na an minasunod na komunikasyon naresibe. An propeta nagngaran kaini bilang sarong kapahayagan nin pagkasaserdote.
********
1-5, An Bag-ong Jerusalem asin an templo ipagtutugdok sa Missouri; 6-17, Linya nin pagkasaserdote ipinagtao gikan ki Moises asin Adan; 18-25, An halangkaw na pagkasaserdote iyo an ma-administrar kan mga pan-ebanghelyong ordinansa; 26-32, An hababang pagkasaserdote ma-administrar kan pan-preparasyong ebanghelyo; 33-44, An mga tawo makakaguno nin eternal na buhay sa paagi kan pangako asin tipan nin pagkasaserdote; 45-53, an Espiritu ni Cristo nagpapaliwanag sa mga tawo, asin an mundo nakahaya sa kasalan; 54-61, An mga banal kaipuhan na magpatotoo kaidtong mga bagay na saindang naresibe; 62-76, Sinda magbabalangibog kan ebanghelyo, asin an mga senyales magsusurunod; 77-91, An mga elders magralakbay na mayong pitaka o balunan, asin an Kagurangnan iyo an mangangandili para sa saindang mga pangangaipo; 92-97, Mga salot asin sumpa an naghahalat sainda na magsisikwal sa ebanghelyo; 98-102, An bag-ong tawo na magtindog sa saiyang sadireng opisina asin magtrabaho sa saiyang sadireng kapangapudan; 111-120, An mga surugoon nin Kagurangnan magpoproklama nin makangirhaton na kalipungawan kan mga huring aldaw.
*******
Sarong KAPAHAYAGAN ni JesuCristo para sa saiyang surugoon na si Joseph Smith, Jun., asin anom na elders, habang saindang pinagkasararo an saindang mga puso asin pinagpaitaas an saindang mga boses sa kaitaasan.
2 Iyo, an tataramon nin Kagurangnan mapanungod sa saiyang simbahan, pinag-establisa sa huring mga aldaw para sa restorasyon kan saiyang mga katawohan, siring na saiyang pinagtaram sa paagi nin nguso kan saiyang mga propeta, asin para sa pagtitiripon kan saiyang mga banal na magtitindog sa Bukid nin Sion, na magigin siyudad kan Bag-ong Jerusalem.
3 Na an siyudad ipagtutugdok, magpoon sa lote kan templo, na pinagtukdo sa paagi kan muro nin Kagurangnan, sa may sulnupang mga kasagkoran kan Estado nin Missouri, asin pinagdudulot sa paagi kan kamot ni Joseph Smith, Jun., asin iba pa na an Kagurangnan naoogmang gayo.
4 Katotohanan iyo ini an tataramon nin Kagurangnan, na an siyudad na Bag-ong Jerusalem ipagtutugdok sa paagi nin pagtitiripon kan mga banal, magpopoon sa lugar na ini, pareho man sa lugar kan templo, na an templong ini ipagtutugdok sa henerasyong ini.
5 Nin huli ta katotohanan ining henerasyon dae gabos maglilipas sagkod na sarong harong an ipagtutugdok para sa Kagurangnan, asin sarong panginuron an magtutugdon sa ibabaw kaini, na an panginuron na ini iyo ngani an kamurawayan nin Kagurangnan, na iyo an magpapano sa harong.
6 Asin an mga akeng lalake ni Moises, uyon sa Banal na Pagkasaserdote na saiyang naresibe sa kamot kan saiyang biyenang lalake, si Jethro;
7 Asin si Jethro naresibe ini sa kamot ni Caleb;
8 Asin si Caleb naresibe ini sa kamot ni Elihu;
9 Asin si Elihu sa kamot ni Jeremy;
10 Asin si Jeremy sa kamot ni Gad;
11 Asin si Gad sa kamot ni Esaias;
12 Asin si Esaias naresibe ini sa kamot nin Diyos.
13 Si Esaias namuhay man sa mga aldaw ni Abraham, asin siya pinagbendisyunan niya---
14 Na si Abraham pinagresibe an pagkasaserdote gikan ki Melchizedek, na saiyang naresibe ini sa paagi kan angakan kan saiyang mga ama, ngani gikan pa ki Noah;
15 Asin gikan ki Noah sagkod ki Enoch, sa paagi kan angkan nin saindang mga ama;
16 Asin gikan ki Enoch pasiring ki Abel, na iyo ngani an pinaggadan sa paagi nin pakipagsabwatan kan saiyang tugang na lalake, na nagresibe nin pagkasaserdote sa paagi nin mga kasugoan kan Diyos, sa paagi kan kamot nin saiyang ama na si Adan, na iyo ngani an enot na tawo---
17 Na an pagkasaserdote nagpadagos sa simbahan nin Diyos sa gabos na mga henerasyon, asin mayong kapinunan nin mga aldaw o katapusan nin mga taon.
18 Asin an Kagurangnan pinagkumpirma an sarong pagkasaserdote man na yaon ki Aaron asin sa saiyang banhi, sa bilog nindang mga henerasyon, na an pagkasaserdote mang ini magpapadagos asin magdadanay sagkod pa man na kaiba an pagkasaserdote na siring sa pinakabanal na orden nin Diyos.
19 Asin ining halangkaw na pagkasaserdote pinag-administrar an ebanghelyo asin nagkakapot nin susi kan mga misteryo nin kahadean, magin an susi nin kaaraman sa Diyos.
20 Kun kaya, sa mga ordinansang ini, an kapangyarihan nin pagkadiyos iyo an minamanipesto.
21Asin kun mayo kaining mga ordinansa, asin an awtoridad kan pagkasaserdote, an kapangyarihan nin pagkadiyos dae minamanipesto sa mga tawo na yaon sa laman;
22 Nin huli ta kun mayo kaini mayong tawo an makakahiling sa Diyos, magin sa Ama, asin mabuhay.
23 Ngonyan ining Moises sayon na nagtukdo sa mga kaarakian nin Israel sa kaparangan, asin nagmawot nin maigot tanganing pakabanalon an saiyang mga katawohan na tangani na saindang puwedeng mahiling an lalawgon nin Diyos.
24 Pero sinda nagpatagas kan saindang mga puso asin dae makapagtagal kan saiyang presensiya; kun kaya, an Kagurangnan sa saiyang kaanggutan, nin huli ta an saiyang kapung-utan pinagsindihan laban sa sainda, nagsumpa na sinda dae dapat makalaog sa saiyang kapahingaloan habang yaon sa kaparangan, na an kapahingaloan na ini iyo an kabilugan kan saiyang kamurawayan.
25 Kun kaya, saiyang pinagkua si Moises paluwas sa saindang katahawan, asin an Banal na Pagkasaserdote man;
26 Asin an hababang pagkasaserdote iyo an nagpadagos, na an pagkasaserdoteng ini nagkakapot kan susi nin pagmiministeryo nin mga anghel asin an ebanghelyo nin pag-andam;
27 Na an ebanghelyong ini iyo an ebanghelyo nin pagsosolsol asin kan pagbubunyag, asin an kapatawaran nin mga kasalan, asin an ley nin karnal na mga kasugoan, na an Kagurangnan sa saiyang kaanggutan nagkausang maipagpadagos sa harong ni Aaron sa pag-iriba nin mga kaarakian nin Israel hanggan ki John, na an Diyos iyo an nagpadakula, bilang pano kan Banal na Espiritu gikan sa obaryo kan saiyang ina.
28 Nin huli ta siya pinagbunyagan habang siya yaon sa sa saiyang pagka-ake, asin pinag-ordinaha kan anghel nin Diyos sa panahon na siya walong aldaw an edad sa kapangyarihang ini, tanganing agawon an kahadean nin mga Hudiyo, asin tanganing himoong matanos an dalan nin Kagurangnan sa atubangan kan lalawgon nin saiyang mga katawohan, tanganing prepararon sinda para sa pag-abot nin Kagurangnan, na sa saiyang kamot ipinagtao an gabos na kapangyarihan.
29 Asin giraray, an mga opisina kan elder asin bishop iyo an kaipong mga kadagdagan na kabilang sa halangkaw na pagsaserdote.
30 Asin giraray, an mga opisina kan paratukdo asin deyakono iyo an kaipong mga kadagdagan na kabilang sa hababang pagkasaserdote, na an pagkasaserdoteng ini pinagkumpirma ki Aaron asin sa saiyang mga akeng lalake.
31 Kun kaya, siring na Ako an nagsabi mapanungod sa mga akeng lalake ni Moises--- nin huli ta an mga akeng lalake ni Moises asin man an mga akeng lalake ni Aaron magdudulot nin sarong nauuyunan na dulot asin sakripisyo sa harong nin Kagurangnan, na an harong na ini pagtutugdukon para sa Kagurangnan sa henerasyong ini, duman sa konsagradong lugar na Ako an nagpili---
32 Asin an mga akeng lalake ni Moises asin ni Aaron mapapano kan kamurawayan nin Kagurangnan, sa ibabaw kan Bukid Sion sa harong nin Kagurangnan, na an mga ake iyo kamo; asin man kadakul na Ako iyo an nag-apud asin ipinagpadara tanganing patindugon an sakuyang simbahan.
33 Nin huli ta an siisay man na matapat sa pangaputan kaining duwang pagkasaserdote na Ako an nagtaram, asin sa pagtrabaho kan saindang kapangapudan, pinapagpabanal sa paagi kan Espiritu pasiring sa kabag-uhan kan saindang mga hawak.
34 Sinda nagigin mga akeng lalake ni Moises asin ni Aaron asin banhi ni Abrahan, asin nin Simbahan asin kahadean, asin an mga pinili nin Diyos.
35 Asin man gabos sinda na nagresibe kaining pagkasaserdote nagresibe sakuya, nagsabi an Kagurangnan;
36 Nin huli ta siya na nagresibe kan sakuyang mga surugoon nagresibe sakuya;
37 Asin siya na nagresibe sakuya nagresibe sa sakuyang Ama;
38 Asin siya na nagresibe sa sakuyang Ama nagresibe kan kahadean nin sakuyang Ama; kun kaya an gabos na an sakuyang Ama igwa ipagtatao sa saiya.
39 Asin ini uyon sa panunumpa asin tipan na kabilang sa pagkasaserdote.
40 Kun kaya, gabos sinda na nagresibe nin pagkasaserdote, nagresibe kaining panunumpa asin tipan kan sakuyang Ama, na dae niya mababari, ni ini mahahali pa.
41 Pero an siisay man na nagbari kaining tipan pagkatapos na saiyang naresibe ini, asin sa kagabsan nagtalikod gikan kaini, dae magkakaigwa nin kapatawaran kan saiyang mga kasalan sa kinaban na ini ni sa kinaban na maabot.
42 Asin herak man sa gabos ninda na dae nagpahalaga kaining pagkasaserdote na saindang naresibe, na Ako ngonyan makumpirma sa saindo na presente ngonyan na aldaw, sa paagi kan sakuyang sadireng boses na gikan sa mga kalangitan; asin magin Ako ipinagtatao an langitnon na mga hukbo asin an sakuyang mga anghel magbabantay mapanungod saindo.
43 Asin Ako ngonyan matao sa saindo nin sarong kasugoan na magin mapagmato mapanungod sa saindong mga sadire, na matao nin maigot na paghinanyog sa mga tataramon nin eternal na buhay.
44 Nin huli ta kamo mamumuhay sa lambang tataramon na minaluwas gikan sa nguso nin Diyos.
45 Nin huli ta an tataramon nin Kagurangnan iyo an katotoohan, asin an arinman na katotoohan iyo an liwanag asin an arinman na liwanag iyo an Espiritu, na iyo ngani an Espiritu ni JesuCristo.
46 Asin an Espiritu nagtataong liwanag sa lambang tawo na minapasiring sa kinaban; asin an Espiritu minapaliwanag sa lambang tawo sa paagi nin kinaban, na nagdadangog sa boses kan Espiritu.
47 Asin an lambang saro na naghihinanyog sa boses kan Espiritu naggigikan sa Diyos, magin sa Ama.
48 Asin an Ama nagtutukdo saiya kan tipan na saiyang pinagbag-uhan asin pinagkumpirma sa saindo, na ini pinagkumpirma sa saindo nin huli sa saindong mga kapakanan, asin bako para sa saindong kapakanan sana, kundi para sa kapakanan kan bilog na kinaban.
49 Asin an bilog na kinaban nakahaya sa kasalan, asin nag-aagrangay sa irarom nin kadikloman asin sa irarom kan gapos nin kasalan.
50 Asin sa paaging ini kamo puwedeng makakaaram na sinda yaon sa gapos nin kasalan, nin huli ta sinda dae nagdudulok sa sakuya.
51 Nin huli ta an siisay na dae nagdudulok sa sakuya yaon sa irarom kan gapos nin kasalan.
52 Asin an siisay na dae nagreresibe kan sakuyang boses dae nakakabisto kan sakuyang boses, asin bakong sakuya.
53 Asin sa paaging ini kamo puwedeng makakaaram nin matanos gikan sa makasalanon, asin ta an bilog na kinaban nag-aagrangay sa irarom nin kasalan asin kadikloman maski sa ngonyan.
54 Asin an saindong mga isip sa mga nakalipas na mga panahon pinagdikloman nin huli sa daeng paniniwala, asin nin huli ta pinagtratong magi-anon an mga bagay na saindong pinagresibe---
55 Na an banidad asin daeng paniniwala nagdara sa bilog na simbahan sa irarom nin kondenasyon.
56 Asin ining kondenasyon nakapatong sa kaarakian nin Sion, magin sa gabos.
57 Asin sinda mapapasa-irarom kaining kondenasyon sagkod na sinda magsosolsol asin makagiromdom sa bag-ong tipan, na iyo ngani an Libro ni Mormon asin an dating mga kasugoan na Ako an nagtao sainda, bako lang sa pagsasabi, kundi an paggibo uyon sa mga bagay na Ako an nagsurat---
58 Na tanganing sinda puwedeng makapagdara nin bunga dulot para sa kahadean kan saindang Ama; ta kun bako yaon pa man an sarong pamakol asin paghukom na ipagpapabulos paluway sa kaarakian nin Sion.
59 Nin huli ta an mga kaarakian daw kan kahadean an mag-aati kan sakuyang banal na kadagaan? Katotohanan, Ako nagsasabi sa saindo, Bako.
60 Katotoohan, katotohanan, Ako nagsasabi sa saindo na iyo ngonyan nagdadangog sa sakuyang mga tataramon, na iyo an sakuyang boses, paladan kamo habang kamo nagreresibe kaining mga bagay;
61 Nin huli ta Ako magpapatawad saindo kan saindong mga kasalan sa paagi kaining kasugoan--- na kamo magpadagos na manindugan sa saindong mga isip sa solemnidad asin sa espiritu nin pangadyeon, sa paghihiras nin testimonya sa bilog na kinaban kaidtong mga bagay na pinagpaaram na sa saindo.
62 Kun kaya, magpaduman kamo pasiring sa bilog na kinaban; asin pasiring duman sa arinman na mga lugar na kamo dae makakaduman kamo magpapadara, na tanganing an testimonya magpaduman gikan saindo pasiring sa bilog na kinaban pasiring sa lambang nilalang.
63 Asin siring na Ako nagsasabi sa saindo, nin huli ta kamo an sakuyang mga apostoles, siring sa halangkaw na mga pade nin Diyos; kamo iyo sinda na an sakuyang Ama iyo an nagtao sakuya; kamo an sakuyang mga amigo;
64 Kun kaya, siring na Ako an nagsabi sa sakuyang mga apostoles Ako nagsasabi sa saindo giraray, na an lambang kalag na nagtutubod sa saindong mga tataramon, asin pinagbunyagan sa paagi nin tubig para sa kapatawaran nin mga kasalan, magreresibe nin Banal na Espiritu.
65 Asin ining mga senyales magsusunod sainda na nagtutubod---
66 Sa sakuyang pangaran sinda makakapaggibo nin kadakul na makangangalas na mga gibo;
67 Sa sakuyang pangaran sinda makakapagpahale nin mga diyablo;
68 Sa sakuyang pangaran sinda makakapagpaomay nin kahelangan;
69 Sa sakuyang pangaran sinda makakapagbukas nin mga mata kan buta, asin makakapagbuskag nin mga talenga kan bungog;
70 Asin an dila kan pula makakapagtaram;
71 Asin kun siisay man na tawo an maghihilo sa sainda ini dae makakapagtalab sainda;
72 Asin an hilo kan sarong halas dae magkakaigwa nin kapangyarihan tanganing hamakon sinda.
73 Pero sarong kasugoan Ako matao sa sainda, na sinda dae maghinambog sa saindang mga sadire kaining mga bagay, ni ipagbuyagyag an mga ini sa atubangan nin kinaban; nin huli ta ining mga bagay ipinagtao sa saindo para sa saindong kapakinabangan asin para sa kaligtasan.
74 Katotohanan, katotohanan, Ako nagsasabi sa saindo, sinda na dae matubod sa saindong mga tataramon, asin dae pinagbunyagan sa tubig sa sakuyang pangaran, para sa kapatawaran kan saindang mga kasalan, na tanganing saindang mareresibe an Banal na Espiritu, pagkokondenaron, asin dae makakaduman pasiring sa kahadean nin sakuyang Ama na kun saen an sakuyang Ama asin Ako yaon.
75 Asin ining Kapahayagan sa saindo, asin kasugoan, yaon an puwersa magpoon sa oras na ini sa bilog na kinaban, asin en ebanghelyo mapapasagabos sainda na dae pa nakapagresibe kaini.
76 Pero, katotohanan Ako nagsasabi sa gabos ninda na an kahadean ipinagtao--- gikan saindo ini dapat na ipagbalangibog sa sainda, na tanganing sinda makakapagsolsol kan saindang dating mararaot na mga gibo; nin huli ta sinda dapat na pagbasulon para sa saindang mararaot na mga puso nin mayong paniniwala, asin sa saindong mga katugangan sa Sion para sa saindang rebelyon laban sa saindo sa panahon na Ako an nagpadara saindo.
77 Asin giraray Ako nagsasabi sa saindo, sakuyang mga amigo, nin huli ta magpoon ngonyan Ako mag-aapud saindo na mga amigo, ini kapakinabangan na Ako matao sa saindo kaining kasugoan, na kamo magin kapantay siring sa sakuyang mga amigo sa mga aldaw kunsoarin na Ako kaibahan ninda, naglalakbay tanganing magbalangibog nin ebanghelyo sa sakuyang kapangyarihan;
78 Nin huli ta Ako dae nagtugot sainda na magdara nin pitaka o kaaganan, ni duwang yamit-pantahob.
79 Hilnga, Ako an nagpadara saindo paluwas tanganing probaran an kinaban, asin an trabahador maninigo kan saiyang kapangapudan.
80 Asin an siisay na tawo na magpaduman asin magbalangibog kaining ebanghelyo nin kahadean, asin dae nagpalya sa pagpadagos na pano nin pagtubod sa gabos na mga bagay, dae mapapagal sa isip, ni pagdikloman, ni sa hawak, tabay, kasu-kasuan; asin sarong buhok kan saiyang payo dae mahuhulog sa daga na dae mamangnuhan. Asin sinda dae malakas na gutom, ni napapaha.
81 Kun kaya, dae kamo mag-isip nin para sa aga, na kun ano an saindong kakanon, o ano an saindong iinumon, o kun baya ano an saindong pagbabadoon.
82 Nin huli ta, paghoropan nindo an mga liryo sa kaparangan, pan-o sinda natalubo, sinda dae nagpapagal, ni naggibo nindang magluwaliw; asin an mga kahadean kan kinaban, sa bilog nindang kamurawayan, dae napusturahan nin siring sa saro sainda.
83 Nin huli ta an saindong Ama, na yaon sa langit, nakakaaram na kamo nangangaipong gayo kan gabos na ining bagay.
84 Kun kaya, tugutan na an sa aga mag-isip para sa mga bagay na pansadire niya.
85 Ni kamo mag-isip nin pangenot kun ano an saindong sasabihon; kundi pagyamanon sa saindong mga kaisipan an padagos-dagos an mga tataramon nin buhay, asin ini ipagtatao saindo sa takdang oras an parte na magigin maninigo para sa lambang tawo.
86 Kun kaya, dae pagtugutan an tawo sa pag-iriba nindo, nin huli ta ining kasugoan ipinanungod sa gabos na matapat na pinagpangapudan nin Diyos sa simbahan na magministeryo, magpoon sa oras na ini magdara nin pitaka o kaaganan, sinda na magpaduman sa paproklama kaining ebanghelyo nin kahadean.
87 Hilnga, Ako an nagpadara sa saindo paluwas tanganing pagsabihan an kinaban kan gabos nindang mararaot na kaggibohan, asin sa pagtukdo sainda nin sarong paghuhukom na maabot.
88 Asin an siisay man na magreresibe saindo, dyan Ako yaon man, nin huli ta Ako mapaduman sa pangenotan ninda, Ako magigin yaon sa saindong toong parte asin sa saindong wala, asin an sakuyang Espiritu magigin yaon sa saindong mga puso, asin an sakuyang mga anghel nakapalibot sa saindo, tanganing pagkargahon kamo paitaas.
89 An siisay man na nagreresibe saindo nagreresibe man sakuya; asin sinda magpapakakan saindo, asin magbabado saindo, asin magtatao nin kuwarta.
90 Asin siya na nagpakakan saindo, dae mawawaraan sa anuman na paagi kan saiyang pabuya.
91 Asin siya na dae naggigibo kaining mga bagay bako kong desipulo; sa paaging ini kamo puwedeng makaaram kan sakuyang mga desipulos.
92 Siya na dae nagreresibe saindo, maghale kamo gikan saiya nin solo kan saindong mga sadire, asin hugasan an saindong mga bitis nin tubig, purong tubig, maski sa mainit o sa malipot, asin pagdarahon an testimonya kaini sa saindong Ama na yaon sa langit, asin dae na kamo magbalik sa tawong idto.
93 Asin sa arinman na baryo o siyudad kamo malaog, gibohon an siring.
94 Daeng pagkukulang, maghanap nin maigot asin dae magpalaen; asin Herak man sa harong na idto, o sa baryo o siyudad na nagsisikwal saindo, o kan saindong mga tataramon, o kan saindong testimonya mapanungod sakuya.
95 Herak man, Ako nagsasabi giraray, sa harong na iyan, o sa baryo o siyudad na nagsisikwal saindo, o kan saindong mga tataramon, o kan saindong testimonya sa sakuya.
96 Nin huli ta Ako, an Pinakamakapangyarihan, naghaya kan sakuyang mga kamot sa mga nasyon, tanganing pakulan sinda kan saindang kasumbikalan.
97 Asin an mga sumpa magpapadagos, asin sinda dae paghahaleon gikan sa kinaban sagkod na Ako nakapagkumpleto na kan sakuyang gibo, na pagpapahaliputon para sa katanosan---
98 Sagkod na an gabos makakamidbid sakuya, na iyo man giraray, magin poon sa pinakasadit sagkod sa pinakadakula, asin pagpapanoon kan kaaraman nin Kagurangnan, asin makakapaghiling nin mata sa mata, asin makakapaglangkaw kan saindang boses, asin sa Pinagkasararong boses magkaranta kaining bag-ong kanta, na nagsasabi:
99 An Kagurangnan pinagdara giraray an Sion;
An Kagurangnan pinagtubos an saiyang mga katawohan,
An Israel, uyon sa pagpili nin grasya,
Na pinagdarang mangyari sa paagi nin pagtubod
Asin tipan kan saindang mga ama.
100 An Kagurangnan an nagtubos kan saiyang mga katawohan;
Asin si Satanas pinaggapos asin an panahon bako nang halawigon.
An Kagurangnan an nagtiripon kan gabos na mga bagay na sararo.
An Kagurangnan an nagdara pababa kan Sion gikan sa itaas.
An Kagurangnan an nagdara paitaas kan Sion gikan sa ibaba.
101 An kinaban an nagsakit asin pinagluwas an saiyang kusog;
Asin an katotoohan pinag-establisa sa saiyang daghan;
Asin an mga kalangitan naghuyom sa saiya;
Asin siya pinagbadoan nin kamurawayan kan saiyang Diyos;
Nin huli sa saiya nagtitindog sa katahawan kan saiyang mga katawohan.
102 Kamurawayan, asin honra, asin kapangyarihan, asin kakusugan,
Lugod maidulot sa satuyang Diyos; nin huli ta siya pano nin pagkaherak,
Hustisya, grasya asin katotoohan, asin katuninongan,
Sagkod sa daeng kasagkoran, Amen.
103 Asin giraray, katotohanan, katotohanan, Ako nagsasabi sa saindo, ini kapakinabangan na an lambang tawo maglakbay na tanganing iproklama an sakuyang daeng katapusan na ebanghelyo, na habang sinda igwa nin mga pamilya, asin nagreresibe nin kuwarta sa paagi nin regalo, na saindang dapat na ipagpadara sa sainda o gamiton ini para sa saindang benepisyo, siring na an Kagurangnan iyo an nagtaong direksiyon sainda, nin huli ta ini pinaghuhuna kong ikararahay.
104 Asin tugutan an gabos sainda na mayong mga pamilya, na nagresibe nin kuwarta, ipagpadara ini pasiring sa bishop kan Sion, o pasiring sa bishop kan Ohio, na tanganing ini puwedeng pagkonsagraron para sa pagpapaluwas kan mga Kapahayagan asin sa imprinta kaini, asin para sa pag-establisa nin Sion.
105 Asin kun an siisay na tawo an magtatao sa kiisay saindo nin sarong talukbong, o sarong bado, kuaha an luma asin ipagtao ini sa kapobrehan, asin maglakbay kamo sa saindong padudumanan na magma-ogmahon.
106 Asin kun an siisay na tawo sa pag-iriba nindo na nagin makusog sa Espiritu, tugutan siyang pag-ibahon niya siya na sarong maluyahon, na tanganing siya mapuwedeng mapakusog sa bilog na kahuyoan, na tanganing siya mapupuwedeng magin makusugon man.
107 Kun kaya, ibahon nindo sinda na pinag-ordinahan sa hababang pagkasaserdote, asin ipagpadara saindang pangenot tanganing humimo nin mga tipanan, asin tanganing ipag-andam an dalan, asin sa paghipno nin mga tipanan na kamo sa saindong mga sadire dae nakayanan na paghipnoan.
108 Hilnga, iyo ini an dalan na an sakuyang mga apostoles, kan suanoy na mga aldaw, pinagtugdok an sakuyang simbahan para sa sakuya.
109 Kun kaya, tugutan an lambang tawo na magtindog sa saiyang sadireng opisina, asin magtrabaho sa saiyang sadireng kapangapudan; aisn dae pagtugutan na an payo magsabi sa mga bitis na ini daeng kaipuhan kan bitis; nin huli ta kun bakong sa bitis paano daw an hawak makakapagtindog?
110 Saka an hawak nagkakaipo nin lambang miyembro, na tanganing an gabos mapupuwedeng mapagtibay na pag-iribahan, na tanganing an sistema mapupuwedeng magin perpekto.
111 Asin hilnga, an mga haralangkaw na mga padi dapat na maglakbay, asin man an mga elders, asin man an mga harababang mga padi; pero an mga diyakuno asin mga paratukdo dapat na pagngaranan na tagapagbantay kan simbahan, na magin tagapagpanindugan na mga ministro kan simbahan.
112 Asin an Bishop, Newel K. Whitney, dapat man na maglakbay sa palibot asin sa pag-iriba nin gabos na mga simbahan, na naghahanap kan mga pobre na tanganing tabangan an saindang mga pangangaipo sa paagi nin pagpapakumbaba nin mga mayayaman asin mga mapang-abaw-abaw.
113 Siya dapat man na mag-empleyo nin sarong ahente na tanganing magpamahala asin gumibo kan saiyang secular na bisnis habang saiyang pinagdireksyunan.
114 Daeng pagkukulang, tugutan an Bishop na magpaduman sa siyudad nin New York, saka sa siyudad nin Albany, asin man sa siyudad nin Boston, asin patanidan an mga katawohan kaining mga siyudad nin tingog kan ebanghelyo, na igwang halangkawon na boses, manungod sa kalipungawan asin mangirhat na pagpara na naghahalat sainda kun saindang pagsikwalon an mga bagay na ini.
115 Nin huli ta kun saindang gibohon na ipagsikwal an mga bagay na ini an oras kan saindong kahukuman madali na, asin an saindang harong ipagwawalat nindang malipungawon.
116 Tugutan sindang magtiwala sakuya asin siya dae magin maribongon; asin an sarong buhok kan saiyang payo dae maghuhulog sa daga na dae mamangnuhan.
117 Asin katotohanan Ako nagsasabi sa saindo, an tada kan sakuyang mga surugoon, magpaduman kamo siring na an saindong mga sirkumstansiya magtutugot, saindong nagkapirang mga kapangapudan, pasiring sa mga darakula asin notableng mga siyudad asin mga baryo, pagsabihan an mundo sa katanosan kan gabos nindang karaotan asin sa bakong sa diyos na mga gibo, ipagpahayag nin maliwanag asin maintindihang gayo an kalipungawan kan abominasyon sa mga huring aldaw.
118 Nin huli ta, sa paagi nindo, nagsabi an Kagurangnan na Makapangyarihan, Ako an magrurunot kan saindang mga kahadean; bako lang na yuyugyugon ko an kinaban, kundi pati an mga mabitoon na mga kalangitan mangungubogkubog.
119 Nin huli ta Ako, an Kagurangnan, pinagbingat an sakuyang kamot tanganing gamiton an mga kapangyarihan kan langit; kamo dae makakahiling kaiyan sa ngonyan, kundi sa kadikit pang panahon asin kamo makakahiling kaini, asin makaaram na Ako ini, asin ta Ako maabot asin maghahade kaiba an sakuyang mga katawohan.
120 Ako an Alpha asin Omega, an kapinunan asin an katapusan. Amen.

Tuesday, August 05, 2008

SEKSYON 83

Kapahayagan na ipinagtao sa paagi ki Joseph Smith an Propeta, sa Independence, Missouri, Abril 30, 1832. HS 1:269-270. Ining Kapahayagan pinagresibe habang Propeta nakatukaw sa konseho kaiba an saiyang mga katugangan.
*******
1-4, An mga babae asin mga kaarakian makakahagad sa saindang mga agom na lalake asin mga ama para sa saindang suporta; 5-6, Mga balo asin mga ilo makakahagad sa simbahan para sa saindang suporta.
*******
KATOTOHANAN, kaya nagsabi an Kagurangnan, bilang kadagdagan sa mga leyes kan simbahan mapanungod sa mga babae asin mga kaarakian, sinda na kabilang sa simbahan, na nawaraan kan saindang mga agom na lalake o mga ama:
2 An mga babae makakahagad sa saindang mga agom na lalake para sa saindang pangangaipo sagkod na an saindang mga agom na lalake pagkuhaon; asin kun sinda dae mananagboan na mga paralapas sinda magkakaigwa nin pakikipagsalamuhaan sa simbahan.
3 Asin kun sinda bakong matapat sinda dae magkakaigwa nin pakikipagsalamuhaan sa simbahan; pero sinda mapupuwedeng yaon sa saindong kamanahan uyon sa mga leyes nin kadagaan.
4 Gabos na mga kaarakian makakahagad sa saindang mga magurang para sa saindang pangangaipo sagkod na sinda yaon pa sa edad.
5 Asin pagkatapos kaiyan, sinda makakahagad sa simbahan, o sa ibang mga tataramon sa kamalig nin Kagurangnan, kun an saindang mga magurang mayong ikakatao sainda nin kamanahan.
6 Asin an kamalig pangangatamanan sa paagi nin konsagrasyon kan simbahan; asin an mga balo asin mga kaarakian pagtataw-anan, siring man an mga pobre. Amen.