SEKSYON 29

Kapahayagan na ipinagtao sa paagi ni Joseph Smith an Propeta, sa atubangan nin anom na mga elders, sa Fayette, New York, Septiyembre 1830. HS 1:111-115. Ining kapahayagan na ipinagtao nagkapirang aldaw bago pa an kumperensiya na magpopoon sa Septiyembre 26, 1830.

*******

1-8, Si Cristo magtitiripon kan saiyang mga pinili; 9-11, An Saiyang pag-abot iyo an maggagabay sa Milenyo; 12-13, An Dose iyo an maghuhukom kan bilog na Israel; 14-21, Mga senyales, mga salot, asin mga kalipungawan iyo an mangengenot sa Ikaduwang Pag-aabot; 22-28, An huring pagkabuhay-liwat asin an pinakahuring paghuhukom iyo an magsusunod sa Milenyo; 29-35, an gabos na mga bagay espirituwa para sa Kagurangnan; 36-39, An diyablo asin an saiyang mga pangon pinaghulog gikan sa langit tanganing magtentar sa tawo; 40-45, an Pagkahulog asin pagbayad-sala iyo an magdadara nin kaligtasan; 46-50, an saradit na mga kaarakian pinagturubos sa paagi nin pagbayad-sala.

*******

MAGHINANYOG sa boses ni JesuCristo, an saindong Paratubos, an Banal na Ako Baya, na an takyag nin pagkaherak iyo an nabayad para sa saindong mga kasalan;

2 Na iyo an magtitiripon kan saiyang mga katawohan na siring sa sarong guna na pinagtitiripon an saiyang mga siwo sa irarom kan saiyang mga pakpak, siring sa kadakol na magdadangog sa sakuyang boses asin magpakumbaba kan saindang mga sadire sa atubangan ko, asin mag-apud sa sakuya na igwang marig-on na pangadyeon.

3 Hilnga, katotohanan, katotohanan, Ako nagsasabi sa saindo, na sa oras na ini an saindong mga kasalan pinagpatawad na sa saindo, kun kaya kamo nagresibe kan mga bagay na ini; pero giromdoma baya na dae na kamo dapat na magkasala pa, na baka baya an mga katibaadan mag-aabot sa saindo.

4 Katotohanan, Ako nagsasabi sa saindo na kamo pinagpili na pinalaen sa kinaban tanganing magdedeklara kan sakuyang ebanghelyo na may tunog nin pagka-ogma, siring sa boses nin sarong tambuli.

5 Ipag-itaas an saindong mga puso asin magin maogma, nin huli ta Ako yaon sa saindong katahawan, asin Ako an saindong Tagapagtahaw sa Ama asin ini yaon sa saiyang marahayon na kagustuhan na ipagtatao sa saindo an kahadean.

6 Asin, siring na ini nakasurat--- An anuman na saindong hahagadon na may pagtubod, bilang nagkasararo sa pangadyeon uyon sa sakuyang kasugoan, kamo makakaresibe.

7 Asin kamo pinapangapudan na darahong mangyari an pagtitiripon-tipon kan sakuyang mga pinili; nin huli ta an sakuyang mga pinili nagdadangog kan sakuyang boses asin dae pinapatagas an saindang mga puso;

8 Kun saen an dekrito nag-abot na gikan sa Ama na sinda pagtitiriponon sa sarong lugar sa lalawgon kaining kadagaan, tanganing pag-andamon an saindang mga puso asin magin handa sa gabos na mga bagay laban sa aldaw kun soarin an pagsasakit asin kalipungawan ipagpapadara pasiring sa mga mararaot.

9 Nin huli ta an oras haranihon na asin an aldaw sa dae mahaloy maabot na kun soarin an kinaban hinog na; asin an gabos na mapang-abaw-abaw asin sinda na naggigibo nin mararaot magigin siring sa panggatong; asin Ako an magsusulo sa sainda, nagsabi an Kagurangnan nin mga Hukbo, na tanganing an karaotan dae nanggad managboan sa ibabaw nin kinaban;

10 Nin huli ta an oras haranihon na, asin idtong mga pinagsasabi kan sakuyang mga apostoles kaipuhan na magka-urutob; nin huli ta habang sinda nagtataram iyo lugod ini an maabot na mangyayari;

11 Nin huli ta Ako magpapahayag kan sakuyang sadire gikan sa langit na igwang kapangyarihan asin dakulang kamurawayan, na pag-iriba an gabos na mga hukbo kaini, asin mag-eerok sa pagkamatanos kairiba an mga tawo sa kinaban nin sanribong mga taon, asin an mga mararaot dae makakatagal.

12 Asin giraray, katotohanan, katotohanan, Ako nagsasabi sa saindo, asin ini nagluwas na sarong pusog na dekrito, sa paagi nin kagustuhan kan Ama, na an sakuyang mga apostoles, an Dose na kairiba ko sa sakuyang ministeryo sa Jerusalem, iyo an magtitindog sa sakuyang toong kamot sa aldaw kan sakuyang pag-abot sa sarong harigi nin kalayo, bilang nababadoan nin mga roba nin pagkamatanos, na may mga korona sa ibabaw kan saindang mga payo, sa kamurawayan na siring sa sakuya, tanganing maghuhukom sa bilog na harong nin Israel, maging siring sa kadakol na nagmomoot sakuya asin nagsunod sa sakuyang mga kasugoan, asin mayong iba.

13 Nin huli ta sarong tambuli an magtutunog nin halawig asin makusugon, magin siring sa ibabaw nin Bukid Sinai, asin an bilog na kinaban magyuyogyog, asin sinda mag-aarabot--- iyo, maski an mga gandan na nagkagaradan na nin huli sako, tanganing magresibe nin sarong korona nin pagkamatanos, asin pagbabadoan kaini, na siring sa sakuya man, tanganing magin kaiba ko, na kami magin saro.

14 Pero, hilnga, Ako nagsasabi sa saindo na bago pa man ining dakulang aldaw mag-aabot an saldang magdidiklom, asin an bulan magigin kulay dugo, asin an mga bitoon magkakahurulog gikan sa langit, asin magkakaigwa nin kadakul na senyales sa ibabaw nin langit asin sa kinaban sa ibaba;

15 Asin magkakaigwa nin pagtatangis asin pag-uurungulan sa pag-irib kan mga hukbo nin mga tawo;

16 Asin magkakaigwa nin sarong dakulaon na ipo-ipo na ipinadara tanganing destrosohon an mga pananom kan kinaban.

17 Asin ini mangyayaring maglilipas, nin huli sa karaotan nin kinaban, na Ako magbabalos laban sa mga mararaot, nin huli ta sinda habong magsolsol; nin huli ta an kopa nin sakuyang kaanggutan pano na; nin huli ta hilnga, an sakuyang dugo dae makakapaglinig sainda kun sinda dae magdadangog sakuya.

18 Kumbaya, Ako an Kagurangnang Diyos magpapadara nin mga langaw sa ibabaw kan lalawgon nin kinaban, na iyo an mamumugol sa mga nag-eerok kaini, asin iyo an magkakakan kan saindang mga laman, asin magkakausa na an mga ulod magkakaramang paluwas sainda;

19 Asin an saindang mga dila magtataragas na sinda dae makakapagtaram laban sakuya; asin an saindang mga laman magkakaharaklas gikan sa saindang mga tulang, asin an saindang mga mata magkakahurulwa gikan sa saindang kinamumugtakan;

20 Asin ini mangyayaring maglilipas na an mga hayop sa kakahuyan asin an mga gamgam nin kalangitan iyo an magkakakan sainda.

21 Asin an dakula asin makangorongirhat na simbahan, na iyo an patotot kan bilog na kinaban, iyo an pagrurumpagon sa paagi nin nag-aagabaab na kalayo, na uyon sa pinagtaram kan nguso ni Ezekiel an propeta, na iyo an nagtaram kaining mga bagay, na dae pa nakaaging maglipas pero seguradong mangyayari, habang Ako nabubuhay, nin huli ta an kangirhatan dae maghahade.

22 Asin giraray, katotohanan, katotohanan, Ako nagsasabi sa saindo na kun soarin an sanribong taon magtapos na, asin an mga tawo nagpopoon na naman na isikwal an saindang Diyos, nanggad sakuyang paliligtason an kinaban pero sa kadikit sanang panahon;

23 Asin an katapusan mag-aabot, asin an langit asin an kinaban matutunaw asin mapapara, asin magkakaigwa nin sarong bagong langit asin sarong bagong kinaban.

24 Nin huli ta an gabos na lumang mga bagay malipas na, asin an gabos na mga bagay magigin bag-o, magin an langit asin daga, asin an gabos na kabilugan kaini, pareho sa mga tawo asin mga hayop, an mga gamgam sa kalangitan, asin an mga isda nin dagat.

25 Asin mayo ni sarong buhok, ni katiting, an mawawara, nin huli ta iyo ini an kagibohan kan sakuyang kamot.

26 Pero, hilnga, katotohanan Ako nagsasabi sa saindo, bago pa man an kinaban maglilipas, si Miguel, an sakuyang arkanghel, magpapatunog kan saiyang tambuli, asin pagkatapos an gabos na mga gadan magigimata, nin huli ta an saindang mga lubungan magkakaburuksan, asin sinda magruruluwas--- iyo, magin an gabos.

27 Asin an mga matatanos pagtitiriponon sa sakuyang toong kamot pasiring sa daeng kasagkorang buhay; asin an mga mararaot sa sakuyang walang kamot na Ako masusupog na akoon sa atubangan nin Ama;

28 Kumbaya Ako magsasabi sa sainda--- Maghale kamo sa atubangan ko, kamong pinagsumpa, pasiring sa daeng katapusan na kalayo, na pinaghanda para sa diyablo asin sa saiyang mga anghel.

29 Asin ngonyan, hilnga, Ako nagsasabi sa saindo, na mayo sa anuman na panahon na Ako nagdeklara sa sakuyang sadireng nguso na sinda dapat na makabalik, nin huli ta kun saen Ako sinda dae makakadulok, nin huli ta sinda mayong kapangyarihan.

30 Pero giromdoma na an bilog kong mga paghuhukom dae ipinagtatao sa mga tawo; asin habang an mga tataramon nagluluwas sa sakuyang nguso magin idto baga magkaka-urutob, na an enot magigin huri, asin an huri magigin enot sa gabos na mga bagay sa arin man na sakuyang piglalang sa tataramon kan sakuyang kapangyarihan, na iyo an kapangyarihan kan sakuyang Espiritu.

31 Nin huli ta sa kapangyarihan kan sakuyang Espiritu pinaglalang ko sinda; iyo, an gabos na mga bagay pareho sa espirituwal asin temporal---

32 Enot sa espirituwal, ikaduwa sa temporal, na iyo an kapinunan kan sakuyang gibo; asin giraray, enot sa temporal, asin ikaduwa sa espirituwal, na iyo an huri kan sakuyang gibo---

33 Nagtataram sa saindo na tanganing kamo natural na makakasabot; pero para sa sakuya an sakuyang mga gibo mayo nin katapusan, ni kapinunan; pero ini ipinagtatao sa saindo na tanganing kamo makakasabot, nin huli ta kamo naghagad kaini sakuya asin Ako nagtugot.

34 Kumbaya, katotohanan Ako nagsasabi sa saindo na gabos na bagay para sakuya espirituwal, asin bakong sa arin na panahon na Ako nagtao saindo nin sarong ley na temporal; ni siisay na tawo, ni kaarakian nin mga tawo; ni si Adan, an saindong ama, na sakuyang pinaglalang.

35 Hilnga, Ako nagtao sa saiya na siya magin sarong ahente sa saiyang sadire; asin Ako nagtao sa saiya nin kasugoan, pero mayong temporal na kasugoan na sakuyang ipinagtao sa saiya, nin huli ta an sakuyang mga kasugoan anas espirituwal; sinda bakong natural o temporal, ni karnal o sensuwal.

36 Asin ini nangyaring naglipas na si Adan, na pinagtentaran kan diyablo--- nin huli ta, hilnga, an diyablo naki-atubang ki Adan, nin huli ta siya nagrebelde laban sakuya, na nagsasabi, Itao mo sakuya an saimong honra, na iyo an sakuyang kapangyarihan; asin man an ikatulong parte kan mga hukbo nin langit nag-iriba saiya na paharayo gikan sakuya nin huli kan saindang libreng pagpili;

37 Asin sinda pinaghulog pababa, asin kaya nagkaigwa nin diyablo asin an saiyng mga anghel;

38 Asin, hilnga, igwa nin sarong lugar na piang-andam para sainda magpoon pa sa kapinunan, na an lugar na ini iyo an impiyerno.

39 Asin ini kaipuhang gayo na mangyari na an diyablo iyo dapat na magtentar sa mga kaarakian nin mga tawo, o sinda magin bakong mga ahente sa saindang mga sadire; nin huli ta kun sinda dae magkaigwa nin kapaitan sinda dae man magkakaigwa nin kahamisan---

40 Kumbaya, ini nangyaring naglipas na an diyablo nagtentar ki Adan, asin siya nagkakan sa pinagpangalad na prutas asin nagkasala sa kasugoan, na kun saen siya nagin yaon sa irarom nin kagustuhan kan diyablo, nin huli ta siya nagsuko sa tentasyon.

41 Kumbaya, Ako, an Kagurangnang Diyos, nagkausa na siya dapat pagpahaleon sa Hardin nin Eden, gikan sa sakuyang atubangan, nin huli kan saiyang pagkasala, na kun saen siya nagin gadan sa espirituwal, na iyo an enot na kagadanan, magin arog sa kagadanan na iyo an huring kagadanan, na iyo ngani an espirituwal, na ipagpapaabot sa mga mararaot kun soarin Ako magsasabi: Magharale, kamo na pinagsumpa.

42 Pero, hilnga, Ako nagsasabi sa saindo na Ako, an Kagurangnang Diyos, nagtao ki Adan asin sa saiyang pisog, na sinda dae magkakagaradan na arog sa temporal na kagadanan, sagkod na Ako, an Kagurangnang Diyos, magpapadara nin mga anghel tanganing ideklara sa sainda nin pagsosolsol asin an pagtutubos, sa paagi nin pagtubod sa pangaran kan sakuyang Bugtong na Pinagpiling Akeng Lalake.

43 Asin kaya naggibo Ako, an Kagurangnang Diyos, nagtao sa tawo kan mga aldaw kan saiyang probasyon--- na sa paagi kan saiyang natural na kagadanan siya puwedeng pagbubuhayon sa immortalidad pasiring sa daeng kasagkorang buhay, magin siring sa kadakol na puwedeng magtutubod;

44 Asin sinda na dae magtutubod mapasiring sa daeng kasagkoran na kondenasyon; nin huli ta sinda dae matutubos gikan sa saindang espirituwal na pagkahulog, nin huli ta sinda dae nagsosolsol;

45 Nin huli ta sinda nagmomoot sa kadikloman kesa sa liwanag, asin an saindang mga gibo mararaot, asin sinda nagresibe kan saindang mga suweldo sa saiya na sinda naglista na magsusunod.

46 Pero hilnga, Ako nagsasabi sa saindo, na an saradit na mga kaarakian pinagtubos na gikan pa sa pundasyon kan kinaban sa paagi kan sakuyang Bugtong na Pinagpili;

47 Kumbaya, sinda dae makakasala, nin huli ta an kapangyarihan dae ipinagtao ki Satanas para tentaran an mga saradit na kaarakian, sagkod na sinda magpoon na magkaigwa nin panimbagan sa atubangan ko;

48 Nin huli ta ini ipinagtao sa sainda na magin siring na Ako nagugusto, na uyon sa sakuyang sadireng kaogmahan, na an darakulang mga bagay mapupuwedeng paghahagadon sa mga kamot kan saindang mga ama.

49 Asin, giraray, Ako nagsasabi sa saindo, na an siisay man na igwang kaaraman, bako daw na sakuyang pinagsugo na magsosolsol?

50 Asin siya na mayong pagkasabot, ini magpapasakuya na gibohon uyon sa nasusurat. Asin ngonyan Ako mayong maideklara pa sa saindo sa panahon na ini. Amen.

SEKSYON 28

Kapahayagan na ipinagtao sa paagi ni Joseph Smith an Propeta pare ki Oliver Cowdery, sa Fayette, New York, Septyembre 1830. HS 1:109-111. Si Hiram Page, sarong miyembro kan Simbahan nakakua nin sarong gapo, asin nagpabantog na nakakaresibe nin mga kapahayagan sa paagi kan tabang kaini mapanungod sa pagtutugdok kan Sion asin mga katugunan para sa Simbahan. Nagkapirang mga miyembro na an nagkadaraya sa paagi kaining mga pagdagka, asin magin si Oliver Cowdery napasala nin huli sa impluwensiya kaini. Bago pa man an nakatalaan na kumperensiya mapanungod sa bagay na ini, asin an kapahayagan na ini iyo an nagsunod.

*******

1-7, Si Joseph Smith iyo an nagkakapot kan mga susi nin mga misteryo, asin siya sana an nakakaresibe nin mga kapahayagan para sa Simbahan; 8-10, Si Oliver Cowdery iyo an magbabalangibog para sa mga Lamanita; 11-16, Si Satanas an nagdaya ki Hiram Page asin an nagtao saiya nin mga palsong kapahayagan.

*******

Hilnga, Ako nagsasabi sa saimo, Oliver Cowdery, na ini pinagtatao sa saimo na ika dapat na magdangog sa simbahan sa gabos na mga bagay nin anuman na saimong ipagtutukdo sainda sa paagi kan Tagapaglinga, mapanungod sa mga kapahayagan asin mga kasugoan na Ako an nagtao.

2 Pero, hilnga, katotohanan, katotohanan, Ako nagsasabi sa saimo, mayong ibang pinagngaranan na magreresibe nin mga kasugoan asin mga kapahayagan para sa simbahan na ini kundi an sakuyang surugoon sanang si Joseph Smith, Jun., nin huli ta siya nagresibe kan mga ini na arog ki Moises.

3 Asin ika magigin masinunod-sunod sa mga bagay na Ako an nagtatao sa saiya, na arog ki Aaron, na magdedeklara sa bilog nin pagtubod kan mga kasugoan asin mga kapahayagan, na igwang kapangyarihan asin autoridad para sa simbahan.

4 Asin kun ika pinapangenotan sa anuman na panahon sa paagi nin Tagapaglinga tanganing magtaram o magtukdo, o sa gabos na panahon sa paagi nin kasugoan para sa simbahan, ika kaipuhan na gibohon ini.

5 Pero ika dae nanggad magsusurat sa paagi nin kasugoan, kundi sa kadunungan;

6 Asin ika dae magsusugo saiya na iyo an yaon sa saimong pamayo, asin iyo an pamayo kan simbahan;

7 Nin huli ta Ako an nagtao saiya nin mga susi kan mga misteryo, asin kan mga kapahayagan na pinagselyuhan, sagkod na Ako an magngangaran sa sainda nin iba bilang iyo an saiyang karibay.

8 Asin ngonyan, hilnga, Ako nagsasabi sa saimo na ika magpaduman sa mga Lamanita asin magbabalangibog kan sakuyang ebanghelyo sa sainda; asin habang sinda nakakaresibe kan saimong mga katukdoan ika magkakausa na an sakuyang simbahan maitugdok sa pag-iriba ninda; asin ika magkakaigwa nin mga kapahayagan, pero dae sinda ipagsusurat sa paagi nin kasugoan.

9 Asin ngonyan, hilnga, Ako nagsasabi sa saimo na ini dae pa ipinagpahayag, asin mayo pang tawo an nakakaaram kun saen an siyudad nin Sion ipagtutugdok, pero ini itatao sa masurunod na panahon. Hilnga, Ako nagsasabi sa saimo na ini ipapamugtak sa mga kasagkoran nin mga Lamanita.

10 Dae ka dapat na maghale sa lugar na ini sagkod na dae pa tapos an kumperensiya; asin an sakuyang surugoon na si Joseph iyo an pinagngaranan na magpamahala sa kumperensiya sa paagi kan boses kaini, asin kun ano an saiyang pinagsasabi sa saimo ika an magbubuyagyag.

11 Asin giraray, ika an magdara sa saimong tugang na lalake, si Hiram Page, sa tahaw niya asin saimo sana, asin sabihon mo saiya na idtong mga bagay na saiyang pinagsurat na gikan sa gapo bakong gikan sa sako asin si Satanas iyo an nakadaya saiya;

12 Nin huli ta, hilnga, ining mga bagay dae man pinagtugot sa saiya, ni an anuman na mga bagay ipagtutugot sa kiisay man sa simbahang ini na kontraryo sa mga tipan nin simbahan.

13 Nin huli ta an gabos na mga bagay kaipuhan na gibohon sa tamang kamumugtakan, asin sa paagi nin pangkagabsan na pagtugot sa simbahan, sa paagi nin pangadyeon nin pagtubod.

14 Asin ika magtatabang tanganing husayon an gabos na ining mga bagay, uyon sa mga tipan kan simbahan, bago ka maglakbay pasiring sa pag-iriba nin mga Lamanita.

15 Asin ini ipinagtao sa saimo, magpoon sa panahon na ika magpapaduman na hanggan sa panahon na ika magbalik, kun ano an saimong paggigibohon.

16 Asin ika magbubuka kan saimong nguso sa gabos na panahon, na magdedeklara kan sakuyang ebanghelyo na may tunog nin kaogmahan. Amen.

SEKSYON 27

Kapahayagan na ipinagtao ki Joseph Smith an Propeta, sa Harmony, Pennsylvania, Agosto 1830. HS 1:106-108. Sarong preparasyon para sa relihiyosong serbisyo na kun saen an sakramento kan tinapay asin arak pag-administraron, si Joseph mabakal nin arak para sa okasyon. Siya pinagsabat nin sarong langitnong mensahero asin nagresibe kaining kapahayagan, sarong parte kaini pinagsurat sa oras man sanang idto, asin an katadaan sa bulan nin Septyembreng nagsunod. Tubig iyo na ngonyan an pinaggagamit karibay kan arak sa pansakramentong serbisyo nin Simbahan.

*******

1-4, An mga simbolo na gagamiton sa pakipagpartehan kan sakramento pinagtugdas; 5-14, Si Cristo asin an saiyang mga surugoon gikan sa gabos na mga dispensasyon kaipuhan na makipagpartehan nin sakramento; 15-18, Sul-uton an bilog na baluti nin Diyos.

*******

MAGDANGOG ka sa boses ni JesuCristo, an saimong Kagurangnan, an saimong Diyos, asin an saimong Paratubos, na an tataramon marig-on asin makapangyarihan.

2 Nin huli ta, hilnga, Ako nagsasabi sa saimo, na dae mo pag-isipon kun ano an saimong kakakanon o kun ano an saimong iinomon sa panahon na ika makikipagpartehan kan sakramento, na kun ini saimong gigibohon na may solong katuyuhan para sa sakuyang kamurawayan--- maggigiromdom sa Ama na an sakuyang hawak na pinaghaya para saindo, asin an sakuyang dugo na pinagpabulos para sa kapatawaran kan saindong mga kasalan.

3 Kumbaya, sarong kasugoan Ako magtatao sa saindo, na dae ka na magbabakal nin arak ni maisog na inomon kan saimong mga kaiwal;

4 Kumbaya, ika dae na makipagpartehan kaiyan laen lang na kun ini bag-ong pinaghimo nindo; iyo, ini para sa kahadean kan sakuyang Ama na ipagtutugdok sa kinaban.

5 Hilnga, ini iyo an kadunungan sakuya; kumbaya, dae ka magngalas, nin huli ta an oras maabot na Ako mainom kan prutas nin ubas na kaiba ka sa kinaban, asin kaiba si Moroni, na sakuyang ipinadara sa saimo tanganing ipahayag an Libro ni Mormon, na naglalaman kan kabilugan kan sakuyang daeng katapusan na ebanghelyo, na saiya Ako nagkatiwala nin mga susi kan rekord kan sanga ni Ephraim;

6 Asin man ki Elias, na saiya Ako nagkatiwala nin mga susi na darahon na mangyari an restorasyon kan gabos na mga bagay na pinagsasabi sa paagi kan mga nguso kan gabos na mga banal na propeta magpoon pa sa kapinunan nin kinaban, mapanungod kan mga huring aldaw;

7 Asin man si John na akeng lalake ni Zacharias, na an Zacharias na ini iyo an saiyang (Elias) pinagbisita asin nagtao nin promisa na siya magkakaigwa nin sarong akeng lalake, asin an saiyang papangaranan na John, asin siya mapapano nin espiritu ni Elias;

8 Na an John na ini iyo an sakuyang ipinadara sa saindo, sakuyang mga surugoon, Joseph Smith, Jun., asin Oliver Cowdery, tanganing ordinahan kamo sa enot na pagkasaserdote na saindo na nganing naresibe, na tanganing kamo pinag-apudan asin pinag-ordinahan na arog ki Aaron;

9 Asin man si Elijah na saiya Ako nagkatiwala nin mga susi nin kapangyarihan na balikon an mga puso kan mga ama pasiring sa mga kaarakian, asin an mga puso kan mga kaarakian pasiring sa mga ama, na tanganing an bilog na kinaban dae mapuwedeng pakulon nin sarong sumpa;

10 Asin man kaiba si Joseph asin Jacob, asin Isaac, asin Abraham, asin an saindong mga ama, na sa paagi ninda an promisa pirmeng magdadanay; ..

11 Asin man kaiba si Michael, o si Adan, an ama kan gabos, an prinsipe kan gabos, an suanoy kan mga aldaw;

12 Asin man kaiba si Peter, asin James, asin John, na sakuyang ipinadara sa saindo, na sa paagi ninda Ako nag-ordina saindo asin nagkumpirma saindo na magin mga apostoles, asin espesyal na mga testigo kan sakuyang pangaran, asin pangangaputan an mga susi kan sakuyang ministeryo asin kan mga kaparehong bagay na sakuya nang ipinagpahayag sa saindo;

13 Na sa saindo Ako nagkatiwala nin mga susi kan sakuyang kahadean, asin nin sarong dispensasyon kan ebanghelyo para sa huring mga panahon; asin para sa kabilugan nin mga panahon, na kun sane Ako magtitiripon na magkasararo bilang saro an gabos na mga bagay, kapareho idtong yaon sa langit, asin idtong yaon sa kinaban;

14 Asin kaiba man sainda an gabos na an sakuyang Ama iyo ang ipinagkatiwala sakuya idtong yaon sa luwas kan kinaban.

15 Kumbaya, ipag-itaas an saindong mga puso asin mag-ogma, asin andamon an saindong mga sipi, asin darahon nindo an sakuyang bilog na armor, na tanganing kamo makatagal sa aldaw na maraot, na makapaggibo kan gabos, na tanganing kamo mapupuwedeng makapagtindog.

16 Magtirindog kamo, kumbaya, habang an saindong mga sipi nakapag-andam para sa katotoohan, habang nakabado kamo nin baluti nin katanosan, asin an saindong mga bitis napapatusan nin preparasyon kan ebanghelyo nin katuninongan, na kun saen Ako nagpadara nin sakuyang mga anghel na tanganing magkatiwala sa saindo;

17 Habang dara nindo an panangga nin pagtubod na kun saen kamo mapupuwedeng makakapagsarig laban sa gabos na matatarom na pana kan mararaot;

18 Asin magsul-ot nin helmet nin kaligtasan, asin an espada kan sakuyang Espiritu, na sakuyang pagpapabuluson sa saindo, asin an sakuyang tataramon na Ako mismo an nagpahayag sa saindo, asin nakipagkasunduan nagnunungod sa gabos na mga bagay na kaipuhanan na saindong paghahagadon sakuya, asin magin kamo pano nin pagtubod sagkod na Ako mag-abot, asin kamo dadarahon paitaas, na kun saen Ako, kamo duman man. Amen.

SEKSYON 26

Kapahayagan na ipinagtao ki Joseph Smith an Propeta, Oliver Cowdery, asin John Whitmer, sa Harmony, Pennsylvania, Hulyo 1830. Hilingon sa HS 1:104; hilingon man an pamayuhan kan Seksyon 24.

*******

1, Sinda pinagsabihan na mag-adal nin mga kasuratan asin magbalangibog; 2, an ley nin pagkasararong pagtugot pinakusog.

*******

Hilnga, Ako nagsasabi sa saindo na kamo magtugot na an saindong mga panahon nakatutok sa pag-aadal kan mga kasuratan, asin sa pagbabalangibog, asin sa pagkukumpirma kan simbahan sa Colesville, asin sa paggigibo kan saindong mga gibohon sa kadagaan, sa arog kaini an pinaghahagad, hanggan sa makatapos kamo mapasiring sa may sulnupan tanganing gibohon an masunod na kumperensiya; asin masunod na ini himoon na maipabantog na kun ano an saimong maggigibo.

2 Asin an gabos na mga bagay gigibohon sa paagi nin pagkasararong pagtugot sa laog nin simbahan, sa paagi nin maigot na pagpapangadye asin pagtubod, nin huli ta an gabos na mga bagay saindong mareresibe sa paagi nin pagtubod. Amen.

SEKSYON 25

Kapahayagan na ipinagtao sa paagi ni Joseph Smith an Propeta, sa Harmony, Pennsylvania, Hulyo 1830. Hilingon sa HS 1:103-104; hilingon man an pamayuhan kan Seksyon 24. Ining kapahayagan nagmamanipesto kan kagustuhan nin Kagurangnan ki Emma Smith, an agom kan Propeta.

*******

1-6, si Emma Smith, an pina-urog na babae, pinag-apud na magtabang asin maglinga kan saiyang agom na lalake; 7-11, Siya man pinangapudan na magsurat, magpaliwanag nin mga kasuratan, asin an magpili nin mga himno; 12-14, An kanta nin matatanos sarong pangadyeon para sa Kagurangnan; 15-16, Mga prinsipyo nin pagsunod sa kapahayagan na ini ipinagpasunod para sa gabos.

*******

Magdangog sa boses nin Kagurangnan an saimong Diyos, habang Ako nagtataram sa saimo, Emma Smith, sakuyang akeng babae; nin huli ta katotohanan Ako nagsasabi sa saimo, gabos sinda na nagresibe kan sakuyang ebanghelyo iyo an sakuyang mga akeng lalake asin babae sa sakuyang kahadean.

2 Sarong kapahayagan na Ako iyo an nagtatao sa saimo manungod sa sakuyang kagustuhan; asin kun ika pano nin pagtubod asin maglalakaw sa mga dalan nin karahayan sa atubangan ko, Ako an mangangataman kan saimong buhay, asin ika makakaresibe nin kamanahan sa Sion.

3 Hilnga, an saimong mga kasalan pinagpatawad na saimo, asin ika sarong pina-urog na babae, na sakuyang pinag-apudan.

4 Dae ka maggugumod-gumod nin huli ta sa mga bagay na dae mo pa nahihiling, nin huli ta an mga ini pinagtago sa saimo asin sa kinaban, na sarong kadunungan sa sakuya para sa panahon na mag-aabot.

5 Asin an opisina kan saimong pangapudan iyo an magin sarong paralinga sa sakuyang surugoon, si Joseph Smith, Jun., an saimong agom na lalake, sa saiyang mga kasakitan, na may pagdumamay na mga tataramon, na yaon sa espiritu nin kahuyoan.

6 Asin ika maglalakaw kaiba niya sa oras kan saiyang paglalakbay, asin magin para sa saiya sarong parasurat, habang mayo pang iba na magin sarong parasurat para saiya, na tanganing sakuyang mapuwedeng maipadara an sakuyang surugoon, si Oliver Cowdery, sa arin man na lugar na Ako magusto.

7 Asin ika pag-oordinahan sa irarom kan saiyang kamot na makapagpaliwanag nin mga kasuratan, asin magpagiromdom sa simbahan, uyon sa ipagtatao ko sa paagi kan sakuyang Espiritu.

8 Nin huli ta siya magpapatong kan saiyang mga kamot sa saimo, asin ika makakaresibe nin Banal na Espiritu, asin an saimong panahon ipagtatao sa pagsusurat, asin sa pag-aadal nin kadakul.

9 Asin ika dae nanggad matatakot, nin huli ta an saimong agom na lalake magsusuporta saimo sa simbahan; nin huli ta sa sainda iyo an saiyang kapangapudan, na tanganing an gabos na mga bagay mapupuwedeng maipagpahayag sa sainda, an anuman na sakuyang gugustuhon, na uyon sa saindang pagtubod.

10 Asin sa katotoohan Ako nagsasabi sa saindo na saimong ipagpapalaen an mga bagay kaining kinaban, asin paghahanapon an mga bagay para sa sarong karahayan.

11 Asin ini ipagtatao sa saimo, saka, maghihimo nin sarong pagpipili nin mga sagradong mga himno, habang ini ipagtatao saimo, na makaogma sa sakuya, na tanganing magkaigwa an sakuyang simbahan.

12 Nin huli ta an sakuyang kalag naoogma sa kanta nin puso; iyo, an kanta nin mga matatanos iyo an sarong pangadyeon sa sakuya, asin ini pagsisimbagon na igwang bendisyon sa ibabaw kan saindang mga payo.

13 Kumbaya, ipag-itaas mo an saimong puso asin mag-ogma, asin magsunod sa tipan na saimong pinaghimo.

14 Ipagpadagos an espiritu nin kahuyoan, asin maglikaw sa kapaabaw-abawan. Tugutan mo na an saimong kalag nag-oogma sa saimong agom na lalake, asin an kamurawayan na mag-aabot sa saiya.

15 Magsunod ka pirme sa sakuyang mga kasugoan, asin sarong korona nin katanosan an saimong pagreresibihon. Asin laen lang na saimong gigibohon, na kun saen Ako, ika dae makakadulok.

16 Asin katotohanan, katotohanan, Ako nagsasabi sa saimo, na iyo ini an sakuyang boses para sa gabos. Amen.

SEKSYON 24

Kapahayagan na ipinagtao ki Joseph Smith an Propeta asin Oliver Cowdery, sa Harmony, Pennsylvania, Hulyo 1830. HS 1:101-103. Maski na kulang sa apat na bulan na an nakaagi magpoon na an Simbahan pinag-organisa, an persekusyon nagin tendido, asin an mga lider kaipuhan na maghanap nin pansamantalang taguan. An minasunod na tulong kapahayagan ipinagtao sa panahon na ini tanganing pakusugon, hikayaton, asin pagtukdoan sinda.

*******

1-9, si Joseph Smith pinag-apud tanganing magsalin, magbalangibog, asin magpaliwanag nin mga kasuratan; 10-12, si Oliver Cowdery pinag-apud tanganing magbalangibog nin ebanghelyo; 13-19, an ley ipinagpahayag mapanungod sa mga milagro, mga sumpa, pamamagpag nin alpog kan bitis, asin an paglakaw na mayong pitaka o supot nin pagkakan.

*******

Hilnga, ika pinag-apudan asin pinagpili na magsurat kan Libro ni Mormon, asin sa sakuyang ministeryo; asin Ako an nagpaitaas sa saimo paluwas kan saindong mga kasakitan, asin pinagpayuhan ka, na ika pinagligtas gikan sa gabos mong mga kaiwal, asin ika pinagligtas gikan sa mga kapangyarihan ni Satanas asin gikan sa kadikloman!

2 Daeng pagkukulang, ika bakong pinagpalaen sa saimong mga paglapas; daeng pagkukulang, maglakaw ka sa saimong dalan asin dae na magkasala.

3 Gibohon an saimong katungdan; asin pagkatapos na ika makapagsabwag na sa saimong tanuman asin pinagpaseguro na ini, magduman kang hidali duman sa simbahan na yaon sa Colesville, Fayette, asin Manchester, asin sinda magsusuporta saimo; asin Ako magbebendisyon sainda pareho sa espirituwal asin temporal;

4 Pero kun sinda habong magresibe saimo, Ako magpapadara sa sainda nin sarong sumpa embes na sarong bendiyson.

5 Asin ika magpapadagos na mag-aapud sa Diyos sa sakuyang pangaran, asin magsusurat kan mga bagay na ipagtatao sa saimo kan Tagapaglinga, asin magpapaliwanag kan gabos na mga kasuratan sa simbahan.

6 Asin ini ipagtatao sa saimo sa pinakamomento na kun ano an saimong tataramon asin susuraton, asin sinda magdadangog kaini, o Ako magpapadara sa sainda nin sarong sumpa embes na sarong bendisyon.

7 Nin huli ta ika magmamaigot sa bilog na pagseserbisyo sa Sion; asin sa arog kaini ika magkakaigwa nin kusog.

8 Magin matinios ka sa mga kasakitan, nin huli ta ika magkakaigwa nin kadakul; pero partiosan mo sinda, nin huli ta, uya, Ako kaiba mo, magin sa katapusan kan saimong mga aldaw.

9 Asin sa temporal na mga trabaho ika dae magkaigwa nin kakusugan, nin huli ta ini bako mong kapangapudan. Atendiran mo an saimong kapangapudan asin saimong paggigibohon magpoon ngonyan an saimong opisina, asin an magpaliwanag kan gabos na mga kasuratan, asin magpadagos sa pagpapatong nin mga kamot asin magkukumpirma sa mga simbahan.

10 Asin an saimong tugang na si Oliver magpapadagos na pagdadarahon an sakuyang pangaran sa atubangan nin kinaban, asin man sa simbahan. Asin siya dae nanggad maghuhuna-huna na siya tama nang makapagtaram sa sakuyang kausa; asin uya, Ako kaiba niya sagkod sa katapusan.

11 Sa kaibahan ko siya magkakaigwa nin kamurawayan, asin bakong sa saiya sana, maski sa kaluyahan o sa kakusugan, maski sa mga nagkasarakupan o libre;

12 Asin sa gabos na mga panahon, asin sa gabos na mga lugar, siya magbubukas kan saiyang nguso asin magdedeklara kan sakuyang ebanghelyo na siring sa sarong trumpeta, pareho sa aldaw asin sa banggi. Asin Ako magtatao sa saiya nin kusog na siring sa dae pa nababantog sa pag-iriba nin mga tawo.

13 Dae magpapahiling nin mga milagro, laen lang sa Ako iyo an nagsusugo saimo, laen lang kun magpapahale nin mga diyablo, magpapa-omay nin may helang, asin laban sa mga makamandag na halas, asin laban sa mga matindihong hilo;

14 Asin an mga bagay na ini ika dae maggigibo, laen lang kun ini pinaghahagad saimo ninda na nagmamawot kaini, na tangani baya an mga kasuratan magka-urutob; nin huli ta ika maggigibo uyon sa mga bagay na nasusurat na.

15 Asin sa arinman na lugar na ika makakalaog, asin sinda nagreresibe saimo na bako sa sakuyang pangaran, ika magwawalat nin sarong sumpa embes na sarong bendisyon, sa paagi nin pagpapagpag nin alpog kan saimong mga bitis laban sainda bilang sarong testimonya, asin sa paghuhugas kan saimong mga bitis sa may dalan.

16 Asin ini mangyayaring maglipas na an siisay man na magdudotdot kan saindang mga kamot sa saindo sa paagi nin biolensiya, ika makakapagsugo tanganing padusahan sa sakuyang pangaran; asin, hilnga, Ako an magpapadusa sa sainda uyon sa saimong mga tataramon, sa pinagtakda kong panahon.

17 Asin an siisay man na magpapaduman sa ley na kaiba ka pagsusumpaon sa paagi nin ley.

18 Asin ika dae magdadara nin pitaka o supot nin pagkakan, ni sugkod, ni duwang tunika, nin huli ta an simbahan magtatao sa saimo sa pinaka-oras na kun ano an pinakakaipo para sa pagkakan asin para sa pagbado, asin para sa mga sapatos asin para sa kuwarta, asin para sa pitaka.

19 Nin huli ta ika pinapangapudan na tanganing pungusan an sakuyang ubasan na igwang kapangyarihan na magpupungos, iyo, magin para sa huring panahon; iyo, asin man an gabos sinda na saimong pinag-ordinahan, asin sinda maggigibo magin siring sa paaging ini. Amen.

SEKSYON 23

Kapahayagan na pinagtao ki Joseph Smith an Propeta, sa Manchester, New York, Abril 1830, para ki Oliver Cowdery, Hyrum Smith, Samuel H. Smith, Joseph Smith, Sen., asin Joseph Knight, Sen. HS 1:80. Bilang resulta sa maigot na kamawotan sa parte kan limang personang pinagngaranan na makaaram kan saindang mga katungdan, an Propeta naghapot sa Kagurangnan, asin nagresibe kaining kapahayagan.

*******

1-7, Ining mga naenot na mga desipulos pinag-apud tanganing magbalangibog, magpagiromdom, asin pakusugon an Simbahan.

*******

Hilnga, Ako nagtataram sa saimo, Oliver, sarong kadikiton na mga tataramon. Hilnga, ika paladan, asin dae sa irarom nin kondenasyon. Pero mag-ingat sa kapaabaw-abawan, na baka baya ika makakalaog pasiring sa tentasyon.

2 Gibohang maaraman an saimong kapangapudan sa laog nin simbahan, asin man sa atubangan nin kinaban, asin an saimong puso pagbubuksan na tanganing magbalangibog nin katotoohan magpoon ngonyan asin sagkod pa man. Amen.

3 Hilnga, Ako nagtataram sa saimo, Hyrum, sarong kadikiton na mga tataramon; nin huli ta ika man dae sa irarom nin kondenasyon, asin an saimong puso pinagbuksan na, asin an saimong dila pinagbuhian na; asin an saimong kapangapudan iyo an magpapagiromdom, asin an magpapakusog pirme kan simbahan. Kumbaya an saimong katungdan iyo an para sa simbahan sagkod pa man, asin ini nin huli sa saimong pamilya. Amen.

4 Hilnga, Ako nagtataram nin kadikiton na mga tataramon sa saimo, Samuel; nin huli ta ika man dae sa irarom nin kondenasyon, asin an saimong kapangapudan iyo an magpapagiromdom, asin an magpapakusog kan simbahan; asin ika dae pa ngona pinapangapudan na magbalangibog sa atubangan nin kinaban. Amen.

5 Hilnga, Ako nagtataram nin kadikiton na mga tataramon sa saimo, Joseph; nin huli ta ika man dae sa irarom nin kondenasyon, asin an saimong kapangapudan man iyo an magpapagiromdom, asin magpapakusog kan simbahan; asin iyo ini an saimong katungdan magpoon ngonyan asin sagkod pa man. Amen.

6 Hilnga, Ako nagmamanipesto sa saimo, Joseph Knight, sa paagi kaining mga tataramon, na ika magdara kan saimong krus, na kun saen ika kaipuhan na may boses na magpapangadye sa atubangan nin kinaban asin man sa sikreto, asin sa saimong pamilya, asin sa pag-iriba kan saimong mga amigo, asin sa gabos na mga lugar.

7 Asin, hilnga, ini iyo an saimong katungdan na makisumaro sa totoong simbahan, asin ipagtao sa saimong lengguwahe sa padagos na pagpapagiromdom, na tanganing saimong maresibe an regalo kan trabahador. Amen.

SEKSYON 22

Kapahayagan na pinagtao sa paagi ni Joseph Smith an Propeta, sa Manchester, New York, Abril 1830. HS 1:79-80. Ining kapahayagan ipinagtao sa Simbahan sa konsekwensiya kan iba na dati nang pinagbunyagan na nagmamawot na makisaro sa Simbahan na dae na otro pagbubunyagan.

*******

1, An pagbubunyag iyo an sarong bago asin daeng katapusan na tipan; 2-4, an may autoridad na pagbubunyag sarong kaipuhanan.

*******

Hilnga, Ako nagsasabi sa saindo na an gabos na lumang mga tipan sakuya nang pinagbalewala nin huli sa bagay na ini; asin ini iyo an sarong bago asin daeng katapusan na tipan, magin idtong mga naggigikan pa sa kapinunan.

2 Kunbaya, maski na an sarong tawo dapat na pagbubunyagan nin sanggatos na beses ini mayong kamumugtakan saiya, nin huli ta kamo dae makakalaog sa hayakpit na pintuan sa paagi kan ley ni Moises, ni sa paagi kan saindong mga gadan na mga gibo.

3 Para sa ini nin huli sa saindong mga gadan na gibo na Ako nagkausa kaining huring tipan asin ining simbahan na ipagtugdok para sa sakuya, na magin arog sa mga aldaw na suanoy.

4 Kumbaga, kamo maglaog sa may pintuan, bilang Ako an nagsugo, asin dae pagmawoton na matukdoan nindo an saindong Diyos. Amen.

SEKSYON 21

Kapahayagan na pinagtao ki Joseph Smith an Propeta, sa Fayette, New York, Abril 6, 1830. HS 1:74-79. Ining kapahayagan pinagtao sa panahon na pinag-organisa an Simbahan, sa petsang nakatala, sa harong ni Peter Whitmer Sr. Anom na mga tawo, na dati nang pinagbunyagan, iyo an nagpartisipar. Sa paagi nin pinagkasararong boto an mga tawong ini nagpahayag kan saindang pagmawot asin determinasyon na mag-organisa, uyon sa kasugoan nin Diyos; hilingon sa Seksyon 20. Sinda man nagboroto na akseptaron asin pagsusteneran si Joseph Smith, Jun., asin si Oliver Cowdery bilang mga pangenot na mga opisyales kan Simbahan. Sa paagi kan pagpatong nin mga kamot, si Joseph pinag-ordinahan si Oliver na sarong elder kan simbahan; asin si Oliver sa kaparehong paagi pinag-ordinahan si Joseph. Pagkatapos kan administrasyon kan sakramento, si Joseph asin Oliver pinagpatong an mga kamot sa lambang sarong partisipante, para sa pagtao kan Banal na Espiritu asin para sa kumpirmasyon kan lambang saro bilang sarong miyembro kan Simbahan.

*******

1-3, si Joseph Smith iyo an pinag-apod na sarong Tagakita, translador, propeta, apostol, asin elder; 4-8, an saiyang tataramon iyo an maggigiya sa kausa nin Sion; 9-12, an mga santos magtutubod sa saiyang mga tataramon habang nagtataram sa paagi kan Tagapaglinga.

*******

Hilnga, dapat magkakaigwa nin sarong rekord na ipagtatago sa pag-iriba nindo; asin sa laog kaiyan ika pag-aapudon na sarong Tagakita, sarong Translador, sarong Propeta, sarong Apostol ni JesuCristo, sarong Elder kan simbahan sa paagi nin kagustuhan kan Diyos an Ama, asin sa grasya kan saimong Kagurangnang JesuCristo.

2 Bilang inspirado kan Banal na Espiritu na tanganing ipaglatag ang pundasyon kaini, asin ipagtugdok ini para sa pinakabanal na pagtubod.

3 Na kun saen an simbahan pinag-organisa asin pinag-establisa sa taon kan saimong Kagurangnan mil otso siyentos asin treynta, sa ikaapat na bulan, asin sa ikaanom na aldaw kan bulan na pinag-apud na Abril.

4 Kunbaya, an boot sabihon na sa simbahan, kamo maghihinanyog sa gabos na saiyang mga tataramon asin mga kasugoan na saiyang ipagtatao sa saindo habang saiyang pinagreresibe an mga ini, naglalakaw sa bilog na kabanalan sa atubangan ko;

5 Nin huli ta an saiyang tataramon saimong pagreresibihon, bilang ini naggigikan sa sakuyang sadireng nguso, sa bilog na pagpapasensiya asin pagtubod.

6 Nin huli sa paggigibo kaining mga bagay an mga pintuan nin impiyerno dae makakatagal laban saimo; iyo, asin an Kagurangnang Diyos ipagpupurak an mga kapangyarihan nin kadikloman gikan sa atubangan mo, asin ipagkausa na an mga kalangitan magyuyogyog para sa saimong karahayan, asin sa kamurawayan kan saiyang pangaran.

7 Nin huli ta nagsabi an Kagurangnang Diyos: Siya na sakuyang inspirado tanganing padanayon an kausa nin Sion sa kakusugan nin kapangyarihan para sa karahayan, asin an saiyang kaigotan Ako nakaaram, asin an saiyang mga pangadyeon Ako nakadangog.

8 Iyo, an saiyang pagbakho para sa Sion sakuyang nahiling, asin Ako magkakausa na siya dae na nanggad magmumundo para sa saiya; nin huli ta an saiyang mga aldaw nin kaogmahan nag-abot na pasiring sa kapatawadan kan saiyang mga kasalan, asin an manipestasyon kan saiyang mga bendisyon kan saiyang mga pinaggigibo.

9 Nin huli ta, hilnga, Ako magbebendisyon sa gabos saindo na nagtatrabaho sa sakuyang ubasan nin sarong dakulaon na bendisyon, asin sinda magtutubod sa saiyang mga tataramon, na ipagtatao saiya sa paagi ko kan Tagapaglinga, na an manipestasyon na si Jesus pinagpako sa krus kan mga makasalanon na mga tawo para sa mga kasalan nin kinaban, iyo, para sa kapatawaran kan mga kasalan nin mga mahuhuyong puso.

10 Kumbaya ini kagustuhan ko na siya dapat na ordinahan mo, Oliver Cowdery na sakuyang Apostol;

11 Ini bilang sarong ordinansa sa saimo, na ika sarong elder sa irarom kan saiyang kamot, siya bilang enot sa saimo, na tanganing ika puwede magin sarong elder kaining simbahan ni Cristo, na nagdadara kan sakuyang pangaran---

12 Asin iyo an enot na tagapagbalangibog sa simbahang ini sa simbahan, asin sa atubangan nin kinaban, iyo, sa atubangan kan mga hentil; iyo, asin kaya pinagsabi nin Kagurangnang Diyos, uya, uya! sa mga Hudiyo man. Amen.

SEKSYON 20

Kapahayagan para sa Organisasyon asin Pamamahala kan Simbahan, ipinagtao sa paagi ni Joseph Smith an Propeta, Abril 1830. HS 1:64-70. Sa mga nakaagi nang rekord niya bago pa man ining kapahayagan an Propeta nagsurat: “Samuyang nakamit gikan saiya (JesuCristo) an mga minasunod, sa paagi nin espiritu kan propesiya asin kapahayagan; na bako sanang nagtao satuya nin grabeng impormasyon, kundi man pinagtukdo sa satuya an eksaktong aldaw na kun saen, uyon sa saiyang kagustuhan asin kasugoan, satuya dapat na ipagpadagos an pag-organisa kan saiyang simbahan giraray digde sa ibabaw nin kinaban.”

*******

1-16, an Libro ni Mormon nagpapatotoo sa kabanalan kan panhuring aldaw na gibo; 17-28, an mga doktrina nin paglalang, pagkahulog, pagbabayad-sala, asin pagbubunyag pinagpakusog na gayo; 29-37, mga leyes sa pagpapamahala nin pagsosolsol, pagpapatunay, kasagraduhan, asin pagbubunyag pinagtugdas; 38-67, mga gigibohon kan mga elders, mga pdi, mga paratukdo, mga diyakono halipot na pinaliwanag; 68-74, mga gigibohon kan mga miyembro, pagbebendisyon kan mga kaarakian, asin an paagi kan pagbubunyag ipinapahayag; 75-84, pansakramentong mga pangadyeon asin mga regulasyon sa pagpapamahala kan pagkamiyembro ipinagtao.

*******

An pagsirang kan Simbahan ni Cristo sa mga aldaw na ini, na mil otso siyentos asin treyntang taon magpoon pa kan pag-abot kan satuyang Kagurangnan asin Paratubos na si JesuCristo na yaon sa laman, ini bilang regular na pinag-organisa asin pinag-establisa na may bilog na kauyunan sa mga leyes kan satuyang nasyon, sa paagi nin kagustuhan asin mga kasugoan nin Diyos, sa ikaapat na bulan, asin sa ika-anom na aldaw nin bulan na pinag-apud na Abril---

2 Na an mga kasugoan ipinagtao ki Joseph Smith, Jun., na iyo an pinag-apod nin Diyos, asin pinag-ordinahan bilang sarong apostol ni JesuCristo, na magin iyo an enot na elder kaining simbahan;

3 Asin para ki Oliver Cowdery, na pinag-apudan man nin Diyos, sarong apostol ni JesuCristo, na iyo an maging ikaduwang elder kaining simbahan, asin pinag-ordinahan sa irarom kan kamot;

4 Asin ini uyon sa grasya kan satuyang Kagurangnan asin Paratubos na si JesuCristo, na para saiya iyo an bilog na kamurawayan, pareho ngonyan asin sagkod pa man. Amen.

5 Pagkatapos na ini tunay na pinagmanipesto sa enot na elder na siya nakaresibe nin kapatawaran kan saiyang mga kasalan, siya nagkapuruputan giraray nin mga kagarbuhan nin kinaban;

6 Pero pagkatapos na magsolsol, asin ipagpakumbaba an saiyang sadire na may pagkasinsero, sa paagi nin pagtubod, an Diyos nagministeryo sa saiya sa paagi nin sarong banal na anghel, na an hitsurahon siring sa kilat, asin an pambadoon puro asin mapution na labaw pa kan iba mang kaputian;

7 Asin nagtao sa saiya nin mga kasugoan na nagtao nin inspirasyon saiya;

8 Asin pinagtaw-anan siya nin kapangyarihan na naggigikan sa itaas, sa paagi na kaidto pa pinag-andam na, na magsalin kan Libro ni Mormon;

9 Na naglalaman nin sarong rekord kan mga nagkaparahamak na mga katawohan, asin an kabilugan kan ebanghelyo ni JesuCristo para sa mga Hentil asin para man sa mga Hudiyo;

10 Na pinagtao sa paagi nin inspirasyon asin pinagkumpirma sa atubangan nin iba kan mga nagmiministeryong mga anghel, asin pinagdeklara sa kinaban sa paagi ninda.

11 Pinapatunayan sa mundo na an mga banal na kasuratan totoo, asin ta an Diyos naghimong magtao nin inspirasyon sa mga tawo bilang pangapudan sainda para sa saiyang banal na trabaho sa panahong ini asin henerasyon, na siring man sa henerasyon kan luma;

12 Na kun saen ipinapahiling na siya iyo an parehong Diyos, kaidto, ngonyan asin sagkod pa man. Amen.

13 Kun kaya, an magkaigwa nin dakulaon na gayong mga patotoo, na sa paagi ninda an kinaban paghuhukuman, magin habang kadakul na magkaigwa an makanuod na makaaram sa trabahong ini.

14 Asin sinda na makatanggap kaini na may pagtubod, asin gumibo sa pagkamatanos, iyo an makakaresibe nin sarong korona kan eternal na buhay.

15 Alagad sinda na nagpatagas kan saindang mga puso sa daeng pagtubod, asin magsikwal kaini, ini magbabalik sa sainda man sanang kapahamakan---

16 Nin huli ta an Kagurangnang Diyos an nagtaram kaini; asin kita, an mga elders kan simbahan, na nakapagdangog asin nagkaigwa nin patotoo sa mga tataramon kan mamurawayon na kamahalan na yaon sa kaitaas-taasan, na mapasaiya man lugod an daeng kasagkoran na kamurawayan sagkod pa man. Amen.

17 Sa paagi kan mga bagay na ini kita nakakaaram na igwa talagang sarong Diyos sa langit, na mayong katapusan asin daeng kasagkoran, magpoon sa daeng kapinunan hanggan sa mayong katapusan na iyo an dae nagbabagong Diyos, an Kaggibo kan langit asin daga, asin kan gabos na mga bagay na yaon sa sainda;

18 Asin ta saiyang nilalang an tawo, lalake asin babae, na siring kan saiyang sadireng imahe asin kan saiyang sadireng ladawan, nilalang niya sinda;

19 Asin nagtao sa sainda nin mga kasugoan na sinda dapat na mamoot asin magsirbe saiya, an solong nabubuhay asin tunay na Diyos, asin ta siya sana dapat an solong nilalang na saindang dapat na pagsasambahon.

20 Alagad sa paagi nin paglapas kaining mga banal na leyes an tawo nagin makamundo asin makadiyablo, asin nagin nagkahurulog na mga tawo.

21 Kun baya, an Pinakamakapangyarihang Diyos pinagtao an saiyang Solong Namumutan na Ake, siring na ini nasusurat sa mga kasuratan na pinagtao niya.

22 Siya nagsapo nin mga tentasyon alagad dae nagdangog sa mga ini.

23 Siya pinagpako sa krus, nagadan, asin nagbagong liwat sa ikatulong aldaw;

24 Asin nagsakat pasiring sa langit, na tanganing magtukaw sa toong kamot kan Ama, na tanganing maghade na may pinakamakusog na kapangyarihan na uyon sa kagustuhan nin Ama;

25 Na habang kadakul an puwedeng maniniwala asin mabunyagan sa saiyang banal na pangaran, asin magpakatatag sa pagtubod hanggan sa katapusan, dapat na iyo an maliligtas---

26 Bako sana sinda na naniwala pagkatapos na siya nag-abot sa katahawan nin panahon, na yaon sa laman, kundi an gabos sindang naggikan sa kapinunan, magin siring kadakul kaidto bago pa siya nag-abot, na naniwala sa mga tataramon kan mga banal na mga propeta, na nagtaram habang sinda inspirado sa paagi kan regalo nin Banal na Espiritu, na iyo an tunay na nagpapatotoo saiya sa gabos na mga bagay, dapat na magkaigwa nin eternal na buhay,

27 Siring man sainda na dapat na iyo an magsunod pagkatapos, na iyo dapat na magtubod sa mga regalo asin pangangapudan nin Diyos sa paagi kan Banal na Espiritu, na iyo an may kapot kan rekord kan Ama asin kan Ake;

28 Na an Ama, Ake, asin Banal na Espiritu iyo an Sarong Diyos, na daeng kapinunan asin eternal, mayong katapusan. Amen.

29 Asin satuyang naaaraman na an gabos na mga tawo kaipuhan na magsosolsol asin maniwala sa pangaran ni JesuCristo, asin magsamba sa Ama sa paagi kan saiyang pangaran, asin magpakatatag sa pagtubod sa saiyang pangaran hanggan sa katapusan, o sinda dae nanggad maliligtas sa kahadean nin Diyos.

30 Asin satuyang naaaraman pagpapatunay sa paagi nin grasya kan satuyang Kagurangnan asin Paratubos na si JesuCristo husto asin totoo;

31 Asin satuyang naaaraman man, na an pagpakabanal sa paagi nin grasya kan satuyang Kagurangnan asin Paratubos na si JesuCristo husto asin totoo, para sa gabos ninda na nagmomoot asin nagsisirbe sa Diyos sa bilog nindang mga kakayahan, isip, asin kusog.

32 Alagad igwa nin posibilidad na an tawo mapupuwedeng mahulog gikan sa grasya asin magrayo gikan sa nabubuhay na Diyos;

33 Kun kaya tugutan na an simbahan magdangog asin magpangadye pirme, na baka sinda mahulog pasiring sa tentasyon;

34 Iyo, asin tugutan man sinda na pinabanal na magtao nin pagdangog.

35 Asin satuyang naaaraman na ining mga bagay totoo asin uyon sa mga kapahayagan ni John, na dae pinagdadagdagan, ni pinagbabawasan na naggikan sa propesiya kan siyang libro, an banal na mga kasuratan, o an mga kapahayagan nin Diyos na masurunod na mag-aarabot sa paagi kan regalo asin kapangyarihan nin Banal na Espiritu, an boses nin Diyos, o an nagmiministeryong mga anghel.

36 Asin an Kagurangnang Diyos iyo an nagtaram kaini; asin an karangalan, kapangyarihan asin kamurawayan lugod iyo an maitao sa saiyang banal na pangaran, pareho ngonyan asin sagkod pa man. Amen.

37 Asin giraray, sa paagi nin kasugoan para sa simbahan mapanungod sa manera nin pagbubunyag--- Gabos sinda na nagpapakumbaba sa atubangan nin Diyos, asin nagmamawot na mabunyagan, asin magdudulok na may kahuyoan nin boot asin nagsosolsol na espiritu, asin magpatotoo sa atubangan nin simbahan na saindang totoong pinagsosolsolan an gabos nindang mga kasalan, asin bulanos na pagdadarahon an pangaran ni JesuCristo, na igwa nin determinasyon na magsirbe saiya sagkod sa katapusan, asin tunay na maipahiling sa paagi kan saindang mga gibo na saindang naresibe an Espiritu ni Cristo pasiring sa kapatawaran kan saindang mga kasalan, pagtatanggapon sa paagi nin pagbubunyag pasiring sa saiyang simbahan.

38 An gibohon kan mga elders, mga padi, mga paratukdo, mga diyakono, asin mga miyembro kan simbahan ni Cristo--- An apostol sarong elder, asin ini iyo an saiyang pangapudan na magbunyag;

39 Asin an mag-ordina nin ibang mga elders, mga padi, mga paratukdo, asin diyakono;

40 Asin an paghimo sa tinapay asin arak--- an mga simbolo kan laman asin dugo ni Cristo---

41 Asin kumpirmahon sinda na nagkaburunyagan sa simbahan, sa paagi nin pagpatong nin mga kamot para sa pagbunyag nin kalayo asin Banal na Espiritu, uyon sa mga kasuratan;

42 Asin magtukdo, magpaliwanag, magpagiromdom, magbunyag, asin magbantay kan simbahan;

43 Asin magkumpirma sa simbahan sa paagi nin pagpatong nin mga kamot, asin sa pagtatao kan Banal na Espiritu;

44 Asin mangengenotan sa gabos na mga miting.

45 An mga elders iyo an magmamaneho kan mga miting habang sinda pinaggagabayan kan Banal na Espiritu, na uyon sa mga kasugoan asin kapahayagan nin Diyos.

46 An gibohon kan padi iyo na magbalangibog, magtukdo, magpaliwanag, magpagiromdom, asin magbunyag, asin mag-administrar nin sakramento,

47 Asin magbisita sa harong kan lambang miyembro, asibn magpagiromdom sainda na magpangadye sa boses asin sa sikreto asin mag-atendir sa gabos na mga gibohon para sa pamilya.

48 Asin siya puwede man mag-ordina nin ibang mga padi, mga paratukdo, asin mga diyakono.

49 Asin siya puwede man mangengenotan sa gabos na mga miting sa panahon na mayong presenteng elder;

50 Pero sa panahon na igwang presenteng elder, siya sana an magbalangibog, magtukdo, magpaliwanag, magpagiromdom, asin magbunyag,

51 Asin magbisita sa harong kan lambang miyembro, magpagiromdom sainda na magpangadye sa boses asin sa sikreto ain mag-atendir sa gabos na mga gibohon para sa pamilya.

52 Sa gabos na ining mga gibohon an padi iyo an magtatabang sa elder kun an okasyon nangangaipo.

53 An gibohon kan paratukdo iyo na magbantay pirme kan simbahan, asin maki-ayon asin magpakusog sainda;

54 Asin hilingon na mayong kadaendatahan sa laog kan simbahan, ni magpataragasan sa lambang saro, ni magputik, magparinaot-raotan, ni magtaram nin maraot;

55 Asin hilingon na an simbahan nagkakatiripon-tipon na magkasararo pirme, asin man hilingon na an gabos na miyembro ginigibo an saindang gibohon.

56 Asin siya an mangengenotan sa mga miting kun mayong elder o padi---

57 Asin iyo an magtatabang pirme, sa gabos na saiyang mga gibohon sa simbahan, sa paagi kan mga diyakono, kun an okasyon nangangaipo.

58 Pero kun mayo an mga paratukdo ni an mga diyakono nin autoridad na magbunyag, mag-administrar kan sakramento, o magpatong nin mga kamot;

59 Sinda, baya, an magpapatanid, magpapaliwanag, magpapagiromdom, asin magtutukdo, asin mag-iimbitar kan gabos na magdulok ki Cristo.

60 Lambang elder, padi, paratukdo, o diyakono iyo an pag-oordinahan uyon sa mga regalo asin mga pangapudan kan Diyos sa saiya; asin siya pag-oordinahan sa paagi nin kapangyarihan kan Banal na Espiritu, na yaon mismo sa tawong nag-oordina saiya.

61 An nagkapirang mga elders na iyo an nagkukumponer kaining simbahan ni Cristo, iyo an maghihirilingan sa kumperensiya sarong beses sa kada tulong bulan, o sa oras-oras habang an nasambit na mga kumperensiya iyo an magtatao nin direksiyon o pagtatalaan;

62 Asin an nasambit na mga kumperensiya iyo an paggibo nin anuman na mga gibohon sa simbahan na kinakaipuhang gibohon sa panahon na iyan.

63 An mga elders iyo an magtatanggap kan saindang mga lisensiya gikan sa ibang mga elders, sa paagi nin pagboto kan simbahan na kun saen sinda nabibilang, o gikan sa mga kumperensiya.

64 Lambang pad, paratukdo, o diyakono, na pinag-ordinahan sa paagi nin sarong padi man, puwedeng magkua nin sarong sertipiko gikan saiya sa panahong yan, na an sertipikong ini, kun saiyang ipahiling sa sarong elder, iyo an magtatao saiya nin sarong lisensiya, na iyo an magtatao nin autoridad saiya na gumibo kan mga gibohon kan saiyang pangapudan, o siya puwedeng makaresibe kaini gikan sa sarong kumperensiya.

65 Mayong persona na pag-oordinahan sa arin man na opisina kaining simbahan, kun saen igwa nin sarong regular na organisadong sangay, na dae pinagbotohan kaining simbahan;

66 Pero an namamayo na elder, nagbibiyaheng mga obispo, mga halangkaw na konsehal, mga halangkaw na padi, asin mga elders, puwedeng magkaigwa nin pribilihiyo na mag-oordina, kun saen mayong sangay kan simbahan na an boto puwedeng mapagkuahan.

67 Lamban presidente kan halangkaw na pagkasaserdote (o namamayong elder), obispo, halangkaw na konsehal, asin halangkaw na padi, iyo an pag-oordinahan sa paagi kan direksiyon kan sarong halangkaw na konseho o heneral na kumperensiya.

68 An katungdan kan mga miyembro pagkatapos na sinda pinagresibe sa paagi kan bautismo.--- An mga elders o mga padi dapat na magkaigwa nin awad-awad na panahon sa pagpapaliwanag kan gabos na mga bagay mapanungod sa simbahan ni Cristo para sa saindang pagkaka-intende, bago pa man sinda makibahagi kan sakramento asin magin kumpirmado sa paagi nin pagpapatong kan mga kamot nin mga elders, na tangani baya na an gabos na mga bagay puwedeng gibohon sa kahusayan.

69 Asin an mga miyembro magmamanipesto sa atubangan nin simbahan, asin man sa atubangan nin mga elders, sa paagi nin sarong maka-Diyos na paglalakaw asin pakikipag-olay, na sinda maninigo kaini, na tanganing magkakaigwa nin mga pagtrabaho asin pagtubod na tugma sa banal na mga kasuratan--- naglalakaw sa kabanalan sa atubangan nin Kagurangnan.

70 Lambang miyembro kan simbahan ni Cristo na igwang mga kaarakian iyo an magdadara sainda sa mga elders sa atubangan nin simbahan, na iyo an magpapatong kan saindang mga kamot sa sainda sa pangaran ni JesuCristo, asin pagbebendisyunan sinda sa saiyang pangaran.

71 Mayong tao na pagreresibihon sa laog kan simbahan ni Cristo laen lang siya nag-abot na sa mga taon nin kamangnuhan sa atubangan nin Diyos, asin na kapable na magsosolsol.

72 An bautismo pag-administraron sa arog kaining manera sa gabos ninda na nakapagsolsol na---

73 An tawo na pinag-apudan nin Diyos asin igwang autoridad gikan ki JesuCristo para magbunyag, magpapaduman sa tubig kaiba an tawo na nagpresentar kan saiyang sadire para bunyagan, asin magsasabi, pag-aapudon sa paagi kan saiyang pangaran: Bilang naatasan ni JesuCristo, ako magbubunyag saimo sa pangaran nin Ama, asin nin Ake, asin nin Banal na Espiritu. Amen.

74 Pagkatapos saiyang ilulubong siya sa tubig, asin paghahawason giraray paluwas kan tubig.

75 Ini kapakinabangan na an simbahan magkahirilingan na magkatiripon-tipon pirme tanganing makibahagi sa tinapay asin arak sa paggiromdom sa Kagurangnang Jesus;

76 Asin an elder o padi iyo an mag-administrar kaini; asin sa arog kaining manera na saiyang administraron ini--- siya magluluhod sa simbahan asin mangapudan sa Ama sa solemneng pangadyeon, na magsasabi:

77 O Diyos, an Eternal na Ama, kami naghahagad saimo sa pangaran kan saimong Ake na si JesuCristo, na bendisyunan asin pakabanalon ining tinapay para sa mga kalag kan gabos ninda na magkakakan kaini, na tanganing sinda magkakan sa paggiromdom kan hawak kan saimong Ake, asin magpapatotoo sa saimo, O Diyos, an Eternal na Ama, na saindang bulanos na pag-aakoon sa saindang mga sadire an pangaran kan saimong Ake, asin pirmeng giromdomon siya asin magsusunod kan saiyang mga kasugoan na saiyang pinagtao sainda; na tanganing sinda pirmeng igwa kan saiyang Espiritu na makakaibahan ninda. Amen.

78 An manera kan pag-administrar kan arak.--- Saiya man pagkakaputan an kopa, asin magsasabi:

79 O Diyos, an Eternal na Ama, kami naghahagad saimo sa pangaran kan saimong Ake na si JesuCristo, na bendisyunan asin pakabanalon ining arak para sa mga kalag kan gabos ninda na mag-iinom kaini, na tanganing sinda makagibo kaini sa paggiromdom sa dugo kan saimong Ake, na pinagpabulos para sainda; na tanganing sinda makapagpatotoo sa saimo, O Diyos, an Eternal na Ama, na saindang maggibo pirme na maggiromdoman siya,na tanganing sinda pirmeng igwa kan saiyang Espiritu na makakaibahan ninda. Amen.

80 An siisay man na miyembro kan simbahan ni Cristo na naglalapas, o nadaog nin sarong kamalian, dapat na paki-ibahan na uyon sa pinapasunod kan mga kasuratan.

81 Ini iyo an katungdan kan nagkapirang mga simbahan, na bumibilog kan simbahan ni Cristo, tanganing magpadara nin saro o nagkapira kan saindang mga paratukdo tanganing mag-atendir kan nagkapirang mga kumperensiya na pinaghihimo sa paagi kan mga elders kan simbahan,

82 Na igwa nin sarong listahan kan mga pangaran kan nagkapirang mga miyembro na pinagkakasararo an saindang mga sadire sa simbahan magpoon pa kan nakaaging kumperensiya; o pinadara sa paagi kan kamot nin ibang padi; na tangani na may sarong regular na listahan kan gabos na mga pangaran kan bilog na simbahan puwedeng maitago sa sarong libro sa paagi nin saro kan mga elders, na iyo an ibang elders an nagsusugo sa pana-panahon;

83 Asin man, kun igwang tawo na pinaghale gikan sa simbahan, na tangani baya an saindang mga pangaran mapupuwedeng pinagpara na sa heneral na rekord nin mga pangaran kan simbahan.

84 Gabos na mga miyembro na naghale gikan sa simbahan kun saen sinda nag-eerok, kun magpaduman sa sarong simbahan kun saen sinda bako man bistado, puwedeng magdara nin sarong surat na magpapatotoo na sinda regular na mga miyembro asin marhay an paninindugan, na an sertipikong ini pinagpirmahan kan siisay na elder o padi kun an miyembro na nagresibe kan surat personal na bistado kan elder o padi, o ini puwedeng pirmahan kan mga paratukdo o diyakono kan simbahan.