SEKSYON 106

Kapahayagan na ipinagtao sa paagi ki Joseph Smith an Propeta, sa Kirtland, Ohio, Nobyembre 25, 1834. HS 2:170-171. Ining Kapahayagan iyo an pinanungod ki Warren A. Cowdery, an matuang tugang na lalake ni Oliver Cowdery.
*******
1-3, Si Warren A. Cowdery pinag-apudan bilang sarong lokal na tagapagpamahalang opisyal; 4-5, An Ikaduwang Pag-abot dae makakapagpangenot sa mga kaarakian nin liwanag na siring sa sarong parahabon; 6-8, Dakulaon na mga bendisyon masunod sa matapat na pagserbisyo sa laog kan simbahan.
*******
Ini an sakuyang kagustuhan na an sakuyang surugoon na si Warren A. Cowdery dapat na ipagtalaga asin pag-ordinahan na sarong tagapagpamahalang Halangkaw na padi kan sakuyang simbahan, sa kadagaan nin Freedom asin sa mga rehiyon sa palibot;
2 Asin dapat na magbalangibog kan sakuyang daeng katapusan na ebanghelyo, asin ipaglangkaw an saiyang boses asin magpatanid sa mga katawohan, bako sana sa saiyang sadireng lugar, kundi sa mga katarain na mga baryo;
3 Asin ipagtutok niya an saiyang bilog na panahon kaining Halangkaw asin banal na kapangapudan, na Ako ngonyan an matao sa saiya, maghahanap nin maigot sa kahadean nin langit asin katanosan kaini, asin an gabos na kinakaipuhanan ipagdadagdag na sana; nin huli ta an trabahador maninigo para sa saiyang kapangapudan.
4 Asin giraray, katotohanan Ako nagsasabi sa saindo, an pag-abot nin Kagurangnan naghaharani nang gayo, asin ini mapangibabaw sa kinaban na siring sa sarong parahabon sa pagkabanggi---
5 Kun kaya, bugkosi an saindong mga habayan, na tanganing kamo magigin mga kaarakian nin liwanag, asin an aldaw na iyan dae makapagpangibabaw sa saindo na siring sa sarong parahabon.
6 Asin giraray, katotohanan Ako nagsasabi sa saindo, nagkaigwa nin kaogmahan sa kalangitan kunsoarin an sakuyang surugoon na si Warren nagduko sa sakuyang setro, asin pinagseparado an saiyang sadire gikan sa mga katusuhan nin mga tawo;
7 Kun kaya, paladin an sakuyang surugoon na si Warren, nin huli ta Ako magkakaigwa nin pagkaherak sa saiya; asin, maski na ngani sa kapalaluan kan saiyang puso, Ako an magpapalangkaw saiya habang siya nagpapakumbaba kan saiyang sadire sa atubangan ko.
8 Asin Ako an magtatao saiya nin grasya asin kaseguruhan na kun saen siya magtitindog; asin kun siya magpapadagos na magin sarong matapat na testigo asin sarong liwanag sa simbahan Ako nakapag-andam na nin sarong korona para saiya sa mga mansiyon kan sakuyang Ama. Arog kaini. Amen.

SEKSYON 105

Kapahayagan na ipinagtao sa paagi ki Joseph Smith an Propeta, sa Fishing River, Missouri, Hunyo 22, 1834. HS 2:108-111. An karahasan kan mga mandurumog laban sa mga banal sa Missouri nagdagdag pa, asin an mga organisadong grupo gikan sa nagkapirang lugar nagdeklara kan saindang intensiyon na pagdestrosohon an mga katawohan. An Propeta nag-abot gikan sa Kirtland na nangenot sa sarong partido na pinag-apod na Kampo nin Sion, na may darang mga bado asin pagkakan. Habang ining partido nakapagkampo sa Fishing River, an Propeta nagresibe kaining Kapahayagan.
*******
1-5, An Sion ipagtutugdok na kumporme sa selestiyal na mga batas; 6-13, Pagtubos kan Sion pinag-uktaba sa dikit na panahon; 14-19, An Kagurangnan makikipaglaban sa mga giyera nin Sion; 20-26, An mga banal dapat na magin madunong asin dae ipaghambog an darakulang nagkaginibohan habang sinda nagtitiripon; 27-30, Mga kadagaan sa Jackson asin kataraid na mga baryo dapat na pagbabarakalon; 31-34, An mga elders magreresibe nin balaog sa Harong nin Kagurangnan sa Kirtland; 35-37, An mga banal na parehong pinag-apudan asin pinagpili pagpapakabanalon; 38-41, An mga Banal magpapaitaas nin sarong ensigniya nin katuninongan sa kinaban.
*******
KATOTOHANAN Ako nagsasabi sa saindo na nag-asembliya kan saindong mga sadire na magkatiripon na tanganing saindong manud-an an sakuyang kagustuhan mapanungod sa pagtubos kan sakuyang nagkasarakitan na mga katawohan---
2 Hilnga, Ako nagsasabi sa saindo, kun bako sana ini sa mga kalapasan kan sakuyang mga katawohan, na nagtataram mapanungod sa simbahan asin bakong sa indibidwal, sinda kuta na pinagtubos na maski ngonyan.
3 Pero hilnga, sinda dae nakanuod na magin masinunod-sunod sa mga bagay na Ako an naghahagad sa saindang mga kamot, kundi nagin pano kan manera nin karaotan, asin habong maghiras kan saindang rugaring, bilang nagin mga banal, para sa mga pobre asin nagkasarakitan sa pag-iriba ninda;
4 Asin bakong nagkasararo na uyon sa pagkakasararo na pinaghahagad sa paagi kan batas nin selestiyal na kahadean;
5 Asin an Sion dae maitutugdok kun bako ini sa paagi nin mga prinsipyo kan batas nin selestiyal na kahadean; ta kun laen Ako dae magresibe saiya para sa sakuyang sadire.
6 Asin an sakuyang mga katawohan kaipuhanan na pagpapakulon sagkod na sinda makanuod nin pagsunod, kun ini kaipuhanan na mangyari, sa paagi kan mga bagay na saindang pinagsasapo.
7 Ako dae magtataram mapanungod sainda na Ako an nagtalaga na magpamayo kan sakuyang mga katawohan, na iyo an mga enot na mga elders kan sakuyang simbahan, nin huli ta bako sinda gabos yaon sa irarom kaining kondenasyon.
8 Kundi Ako nagtataram mapanungod sa sakuyang mga simbahan sa harayo--- magkakaigwa nin kadakul na magsasabi: Hean an saindang Diyos? Hilnga, siya an magliligtas sainda sa panahon nin kahurasaan, ta kun laen kita dae makakapagpaduman pasiring sa Sion, asin magtatago kan satuyang mga kuwarta.
9 Kun kaya, bilang konsekuwensiya kan mga kalapasan nin sakuyang mga katawohan, ini kapakinabangan sakuya na an sakuyang mga elders dapat na maghalat nin kadikit pang panahon para sa pagtubos kan Sion---
10 Na tanganing an saindang mga sadire mapuwedeng makapag-andam, asin tanganing an sakuyang mga katawohan puwedeng matukdoan sa perpektong paagi, asin magkaigwa nin eksperiyensiya, asin makaaram sa mga perpektong paagi mapanungod sa saindang katungkulan, asin kan mga bagay na Ako an naghagad sa saindang mga kamot.
11 Asin ini dae mangyayaring madara na maglipas sagkod na an sakuyang mga elders pinaghunsay na nin kapangyarihan na gikan sa kaitaasan.
12 Nin huli ta hilnga, Ako nakapag-andam na nin sarong dakulaon na balaog asin bendisyon na ipagpapabulos sa sainda, habang na sinda matapat pa asin padagos-dagos na yaon sa kapakumbabaan sa atubangan ko.
13 Kun kaya ini kapakinabangan sa sakuya na an sakuyang mga elders dapat na maghalat pa sa kadikit na panahon, para sa pagtutubos kan Sion.
14 Nin huli ta hilnga, Ako dae naghahagad kan saindang mga kamot na makipaglaban sa mga giyera nin Sion; nin huli ta, siring na Ako an nagsabi sa dating kasugoan, arog kaini Ako mag-uutob--- Ako an makikipaglaban kan saindong mga giyera.
15 Hilnga, an paradestroso na Ako an nagpadara tanganing destrosohon asin bayaan na marunot an sakuyang mga kaiwal; asin sa bakong kadakul na mga taon poon ngonyan sinda dae na pagpabayadan na pagriringgawan an sakuyang pamana, asin pagbasangon an sakuyang pangaran sa mga kadagaan na Ako an nagkonsagrar para sa pagtitiripon-tipon na magkakasararo an sakuyang mga banal.
16 Hilnga, Ako nagsugo sa sakuyang surugoon na si Joseph Smith, Jun., na magsabi sa kusog kan sakuyang harong, na iyo an sakuyang mga paralaban, an sakuyang mga hoben na tawo, asin nasa tahaw na an edad, na magtiripon na magkasararo para sa pagtubos kan sakuyang mga katawohan, asin pabagsakon an mga torre kan sakuyang mga kaiwal, asin pagwarakon an saindang mga parabantay;
17 Pero an kusog kan sakuyang harong dae naghihinanyog kan sakuyang mga tataramon.
18 Kundi habang igwa pa sainda na naghihinanyog kan sakuyang mga tataramon, Ako nag-aandam na nin sarong bendisyon asin balaog para sainda, kun sinda padagos na magin matapat.
19 Ako nakadangog kan saindang mga pangadyeon, asin magtatanggap kan saindong mga dulot; asin ini kapakinabangan sa sakuya na sinda dapat na pagdadarahon sa arog kaini para sa sarong pagsubok kan saindang pagtubod.
20 Asin ngonyan, katotohanan Ako nagsasabi sa saindo, sarong kasugoan Ako matao sa saindo, na habang kadakul an nag-abot digde, na puwedeng makapag-estar sa rehiyon sa palibot, tugutan sindang mag-erok;
21 Asin sinda na dae makakapag-estar, na may mga pamilya sa sirangan, tugutan sinda na magpawalat sa dikit na panahon, habang an sakuyang surugoon na si Joseph an magtatalaga sa sainda;
22 Nin huli ta Ako an maghuhulit saiya mapanungod kaining bagay, asin sa gabos na mga bagay sa anuman na saiyang ipagtatalaga sa sainda, magkaka-urutob.
23 Asin tugutan an gabos na sakuyang mga katawohan na nag-eerok sa mga rehiyon sa palibot na magin pano nin katapatan, pano nin pangadyeon, asin mapagpakumbaba sa atubangan ko, asin dae ipagpahayag an mga bagay na Ako an nagpahayag sa sainda, hanggan sa ini kadunungan sakuya na sinda dapat na ipagpahayag na.
24 Dae mag-orolay kan mga paghuhukom, ni ipaghambog an pagtubod ni an darakulang mga nagkaginibohan, kundi maingat na magtiripon na magkasararo, habang puwede yaon lang sa sarong rehiyon, na minauyon sa mga pagmate kan mga katawohan;
25 Asin hilnga, Ako magtatao sa saindo nin pabor asin grasya sa saindong mga mata, na tanganing kamo makapaghingalo sa katuninongan asin ligtas, habang kamo nagsasabi sa mga katawohan: Gibohon an paghuhukom asin hustisya para samuya na uyon sa batas, asin patawadon kami kan samuyang mga kamalian.
26 Ngonyan, hilnga, Ako nagsasabi sa saindo, sakuyang mga amigo, sa arog kaining paagi kamo makakanagbo nin pabor sa mga mata nin mga katawohan, hanggan sa an armada kan Israel magin dakulaong gayo.
27 Asin Ako an magpapalumoy sa mga puso nin mga katawohan, siring na Ako naggibo sa puso ni Paraon, sa pana-panahon, sagkod na an sakuyang surugoon na si Joseph Smith, Jun., asin an sakuyang mga elders, na Ako an nagtalaga, magkakaigwa nin panahon na pagtiriponon an kusog kan sakuyang harong.
28 Asin nakapagpadara nin madudunong na mg tawo, tanganing utubon idto na Ako an nagsugo mapanungod sa pagbabarakal kan gabos na mga kadagaan sa Jackson County na puwedeng pagbakalon, asin sa kataraid na mga baryo sa palibot.
29 Nin huli ta iyo ini an sakuyang kagustuhan na an mga kadagaan na ini dapat na pagbarakalon; asin pagkatapos na sinda pagbarakalon na tanganing an sakuyang mga banal dapat na iyo an magsadire sainda uyon sa mga batas nin konsagrasyon na Ako an nagtao.
30 Asin pagkatapos na ining mga kadagaan magkabarakal na, Ako an magkakapot kan mga armada nin Israel na mayong kakundian na pagsadirehon an saindang sadireng mga kadagaan, na saindong dati nang pinagbarakal kan saindong sadireng mga kuwarta, asin ka pagturumba nin mga torre kan sakuyang mga kaiwal na naka-amba sa sainda, asin pinagwaratak-watak an saindang mga parabantay, asin pinagbabalos Ako sa sakuyang mga kaiwal magpoon pa sa ikatulo asin ikaapat na henerasyon ninda na naoongis sakuya.
31 Pero enot tugutan na an sakuyang armada magin dakulaon na gayo, asin tugutan ini na mangyaring pinagpabanal sa atubangan kon, na tanganing ini puwedeng magin madahomon siring sa saldang, asin maliwanagon siring sa bulan, asin na an saiyang mga bandera puwede magin terrible sa bilog na mga nasyon.
32 Na an mga kahadean kaining kinaban puwedeng matakot na makapagmangno na an kahadean nin Sion iyo man nanggad na gayo an kahadean kan satuyang Diyos asin kan saiyang Cristo; kun kaya, tugutan na magpasakot kita sa saiyang mga batas.
33 Katotohanan Ako nagsasabi sa saindo, ini kapakinabangan sa sakuya na an mga enot na mga elders kan sakuyang simbahan dapat na magresibe kan saindang mga balaog na gikan sa kaitaasan sa sakuyang harong, na Ako an nagsugo na mangyaring ipagtugdok sa sakuyang pangaran sa kadagaan nin Kirtland.
34 Asint ugutan idtong mga kasugoan na Ako an nagtao mapanungod sa Sion asin an saiyang batas mangyaring gibohon asin magka-urutob, pagkatapos kaining pagtubuson.
35 Nagkaigwa na nin aldaw nin pagpangapod, alagad an panahon nag-abot na para sa aldaw nin pagpipili; asin tugutan sindang mga pinili na magin maninigo.
36 Asin ini ipagmamanipesto sa sakuyang surugoon, na sa paagi kan boses nin Espiritu, idtong mga pili; asin sinda pagpapakabanalon.
37 Asin habang sinda nagsusunod sa paghulit na saindang naresibe, sinda magkakaigwa nin kapangyarihan sa kadakul na mga aldaw na makapaggibo kan gabos na mga bagay na mapapanungod sa Sion.
38 Asin giraray Ako nagsasabi sa saindo, maghagad para sa katuninongan, bako sana sa mga katawohan na nagpakasakit saindo, kundi man sa bilog na mga katawohan.
39 Asin magpaitaas nin ensigniya para sa katuninongan, asin gumibo nin sarong proklamasyon nin katuninongan sa mga katapusan kan kinaban.
40 Asin gumibo nin mga sunhi para sa katuninogan sa sainda na nagpasakit saindo, na uyon sa boses kan Espiritu na yaon saindo, asin an gabos na mga bagay matrabahong bilog para sa saindong karahayan.
41 Kun kaya, magin matapat; asin hilnga, asin uya, Ako kaiba nindo magin sagkod sa katapusan. Arog kaini. Amen.

SEKSYON 104

Kapahayagan na ipinagtao ki Joseph Smith an Propeta, Abril 23, 1834, mapanungod sa Pinagkasararong Orden, o an orden kan Simbahan para sa benepisyo nin mga pobre. HS 2:54-60. An okasyon iyo idtong miting kan konseho nin Enot na Panguluhan asin ibang mga halangkaw na pade, na kun saen an grabeng pangangaipo sa temporal nin mga katawohan an pinagtaw-anan nin konsiderasyon. An Pinagkasararong Orden sa Kirtland iyo an temporaryong pinag-untok asin pinag-organisang otro, asin an mga propriyedad bilang mga tagapagpamahala pagbabaranga-bangaon sa pag-iriba kan mga miyembro nin Orden.
*******
1-10, An mga banal na nakapaglapas kontra sa Pinagkasararong Orden susumpaon;11-16, An Kagurangnan nagtatao sa saiyang mga banal sa saiyang sadireng paagi; 17-18, An batas kan ebanghelyo iyo an nagpamahala kan pagpapangalaga nin mga pobre; 19-46, An mga pagpapangalaga asin mga bendisyon sa kadaklang mga katugangan pinagtalaga; 47-53, An Pinagkasararong Orden sa Kirtland asin an orden sa Sion gigibohong mangyayarina separado; 54-66, An sagradong tesoro nin Kagurangnan pinagtugdas para sa pag-imprinta kan mga kasuratan; 67-77, An tesoro heneral kan Pinagkasararong Orden gigibohong mangyayari na nakabase sa pinagkasararong pag-uyon; 78-86, Sinda na yaon sa Pinagkasararong Orden dapat na magbabayad kan gabos nindang mga kautangan, asin an Kagurangnan an maghahaw-as sainda gikan sa pinansiyal na kauripnan.
*******
KATOTOHANAN Ako nagsasabi sa saindo, sakuyang mga amigo, Ako matao sa saindo nin paghuhulit, asin sarong kasugoan, mapanungod sa gabos na mga propriyedad na pagsasadire kan orden na Ako an nagsugo na pag-organisaron asin pag-establisaron, na magin iyo an pinagkasararong orden, asin an daeng katapusan na orden para sa benepisyo kan sakuyang simbahan, asin para sa kaligtasan nin mga tawo sagkod na Ako mag-abot---
2 May promise na daeng pagbabag-o asin dae mababag-o, na habang sinda na Ako an nagsugo nagin matapat sinda pagbebendisyunan nin kadakulon na mga biyaya;
3 Pero habang sinda bakong matapat sinda nagrarani sa kasumpaan.
4 Kun kaya, habang an iba kan sakuyang mga surugoon dae nagsunod sa kasugoan, kundi pinagbalga an tipan sa paagi nin kasakiman, asin may pagsagin-sagin na mga tataramon, Ako an nagsumpa sainda na may matindi asin magabaton na sumpa.
5 Nin huli ta Ako, an Kagurangnan, nagdekrito sa sakuyang puso, na habang an siisay na tawo na kabala sa Orden na mananagboan na sarong paralapas, o sa ibang mga tataramon, nagbalga sa tipan na kun saen kamo binugkos, siya pagsusumpaon sa saiyang buhay, asin pagtitimak-timakan kan iba na Ako an may kagustuhan;
6 Nin huli ta Ako, an Kagurangnan, bako sanang pagparabasangon kaining mga bagay---
7 Asin gabos sinda na inosente sa pag-iriba ninda dae pagkokondenaron kan mga bakong husto; asin sinda may sala sa pag-iriba nindo dae makaka-eskapo; nin huli ta Ako, an Kagurangnan, nakapagpromisa sa saindo nin sarong korona nin kamurawayan sa sakuyang toong kamot.
8 Kun kaya, habang kamo nanagboan na mga paralapas, kamo dae makaka-eskapo kan sakuyang kaanggutan sa saindong mga buhay.
9 Habang kamo pinagpabayaan nin huli kan paglapas, kamo dae makaka-eskapo sa mga pagpapasakit ni Satanas sagkod sa aldaw nin pagtutubos.
10 Asin Ako ngonyan matao sa saindo nin kapangyarihan magpoon sa oras na ining gayo, na kun siisay na tawo sa pag-iriba nindo, sa laog nin Orden, nanagboan na sarong paralapas asin dae nagsosolsol kan maraot, na tanganing saindong pabayaan siya sa mga pagpapasakit ni Satanas; asin siya dae magkakaigwa nin kapangyarihan na magdara nin raot sa saindo.
11 Ini kadunungan sakuya; kun kaya, sarong kasugoan Ako matao sa saindo, na kamo mag-oorganisa kan saindong mga sadire asin magtalaga nin lambang tawo kan saiyang pagpapangalaga.
12 Na tanganing an lambang tawo puwedeng magtao nin panagutan sa sakuya kan pagpapangalaga na ipinagtalaga sa saiya,
13 Nin huli ta ini sarong kapakinabangan na Ako, an Kagurangnan, maghihimo na an lambang tawo may pananagutan, bilang sarong tagapagpangalaga sa pangkinaban na mga bendisyon, na Ako an naghimo asin nag-andam para sa sakuyang mga nilalang.
14 Ako, an Kagurangnan, pinagpahiwas an mga kalangitan, asin an naglalang kan kinaban, an sakuyang pinakagibo sa kamot; asin an gabos na mga bagay na yaon diyan sakuya.
15 Asin ini an sakuyang katuyuhan tanganing ipaglaan para sa sakuyang mga banal, nin huli ta an gabos na mga bagay sakuya.
16 Pero ini kaipuhanan na paggigibohon sa sakuyang sadireng paagi; asin hilnga ini iyo an paagi na Ako, an Kagurangnan, nagdekrito tanganing maglaan para sa sakuyang mga banal, na tanganing an mga pobre maipagpaitaas, na an mga mayayaman mahimong maipagbababa.
17 Nin huli ta an kinaban pano, asin igwa nin kasaganaan asin sobra; iyo, ako an nag-andam kan gabos na mga bagay, asin nakapagtao sa mga kaarakian nin mga tawo na magin mga ahente sa saindang mga sadire.
18 Kun kaya, kun an siisay na tawo an mag-ako nin kasaganaan na Ako an naghimo, asin habo na maghiras kan saiyang porsiyon, na uyon sa batas kan sakuyang ebanghelyo, sa mga pobre asin may pangangaipo, siya, kaiba an mararaot, pinagpapaitaas an saiyang mga mata sa impiyerno, na yaon sa kasakitan.
19 Asin ngonyan, katotohanan Ako nagsasabi sa saindo, mapanungod sa mga propriyedad kan orden---
20 Tugutan an sakuyang surugoon na si Sidney Rigdon na ipagtalaga sa saiya an lugar kun saen siya ngonyan naka-estar, asin an lote kan delatahan para sa saiyang pagpapangalaga, para sa saiyang suporta habang siya nagtatrabaho sa sakuyang ubasan, siring na Ako an may kagustuhan, kunsoarin Ako an magsusugo saiya.
21 Asin tugutan an gabos na mga bagay paggibohon na uyon sa hulit kan orden, asin pinagkasararong pag-uyon o boses kan orden, na nag-eerok sa kadagaan nin Kirtland.
22 Asin sa arog kaining pagpapangalaga asin bendisyon, Ako, an Kagurangnan, nagpuputong sa sakuyang surugoon na si Sidney Rigdon para sa sarong bendisyon sa saiya, asin sa saiyang banhi pagkatapos niya;
23 Asin Ako an magpapadakol nin mga bendisyon sa saiya, habang siya nagpapakumbaba sa atubangan ko.
24 Asin giraray, tugutan na an sakuyang surugoon na si Martin Harris na ipagtalaga saiya, para sa saiyang pagpapangalaga, an lote nin kadagaan na an sakuyang surugoon na si John Johnson an nakakua bilang karibay para sa saiyang dating kamanahan, para saiya asin sa saiyang banhi pagkatapos niya;
25 Asin habang siya sarong matapat, Ako magpapadakul nin mga bendisyon sa saiya asin sa saiyang banhi pagkatapos niya.
26 Asin tugutan na an sakuyang surugoon na si Martin Harris ipagtutok an saiyang mga kuwarta para sa pagproklama kan sakuyang mga tataramon, na uyon sa direksiyon kan sakuyang surugoon na si Joseph Smith, Jun.
27 Asin giraray, tugutan na an sakuyang surugoon na si Frederick G. Williams mapasaiya an lugar kun saen siya ngonyan naka-estar.
28 Asin tugutan an sakuyang surugoon na si Oliver Cowdery na mapasaiya an lote na kataid kan harong, na iyo kuta na an para sa opisina kan imprintahan, na iyo an lote numero uno, asin man an lote kun saen dapat na an saiyang ama naka-estar.
29 Asin tugutan an sakuyang mga surugoon na sinda Frederick G. Williams asin Oliver Cowdery na mapasainda an opisina kan imprintahan asin an gabos na mga bagay na mapanungod kaini.
30 Asin iyo ini an magigin saindang pangangalagaan na ipagtatalaga sa sainda.
31 Asin habang sinda matapat, hilnga Ako mabendisyon, asin magpapadakol nin mga bendisyon sa sainda.
32 Asin iyo ini an kapinunan kan pagpapangalaga na Ako an nagtalaga sainda, para sainda asin sa saindang mga banhi pagkatapos ninda.
33 Asin, habang sinda matapat, Ako an magpapadakol nin mga bendisyon sa sainda asin sa saindang mga banhi pagkatapos ninda, na siring sa kadakulan nin mga bendisyon.
34 Asin giraray, tugutan an sakuyang surugoon na si John Johnson na mapasaiya an harong kun saen siya naka-estar, asin an kamanahan, gabos laen lang an daga na ipinagreserba para sa pagtutugdok kan sakuyang mga harong, na ipinanungod kaining kamanahan, asin idtong mga lote na ipinagngaran na para sa sakuyang surugoon na si Oliver Cowdery.
35 Asin habang siya matapat, Ako an magpapadakol nin mga bendisyon sa saiya.
36 Asin iyo ini an sakuyang kagustuhan na saiyang ipagpabakal an mga lote na ipinaghaya para sa pagtutugdok kan siyudad nin sakuyang mga banal, habang ini pinaghihimong maipagpaaram saiya sa paagi kan boses nin Espiritu, asin uyon sa hulit kan orden, asin sa paagi kan boses nin orden.
37 Asin iyo ini an kapinunan kan pagpapangalaga na Ako an nagtalaga sa saiya, para sarong bendisyon sa saiya asin kan saiyang banhi pagkatapos niya.
38 Asin habang siya matapat, Ako an magpapadakol nin sarong kadaklan nin mga bendisyon sa saiya.
39 Asin giraray, tugutan an sakuyang surugoon na si Newel K. Whitney na ipagtalaga sa saiya an mga harong asin lote kun saen siya ngonyan naka-estar, asin an lote asin pagharongon kun saen an establisamento kan tindahan nakatindog, asin man an lote na yaon sa gilid timog kan establisamento kan tindahan, asin man an lote kun saen an padapugan nakapamugtak.
40 Asin gabos ini Ako an nagtalaga sa sakuyang surugoon na si Newel K. Whitney para sa saiyang pagpapangalaga, para sarong bendisyon sa saiya asin sa saiyang banhi pagkatapos niya, para sa benepisyo kan establisamento kan tindahan nin sakuyang orden na Ako an nag-establisa para sa sakuyang istaka sa kadagaan nin Kirtland.
41 Iyo, katotohanan, iyo ini an pagpapangalaga na Ako an nagtalaga sa sakuyang surugoon na si N. K. Whitney, kaiba ining bilog na establisamento kan tindahan, saiya asin sa saiyang ahente, asin sa saiyang banhi pagkatapos niya.
42 Asin habang siya matapat sa pagsunod kan sakuyang mga kasugoan, na Ako an nagtao sa saiya, Ako an magpapadakol nin mga bendisyon sa saiya asin sa saiyang banhi pagkatapos niya, siring sa sarong kadaklan nin mga bendisyon.
43 Asin giraray, tugutan na an sakuyang surugoon na si Joseph Smith, Jun., ipagtalaga sa saiya an lote na ipinaghaya para pagtugdukan kan sakuyang harong, na may kuwarentang baras an laba asin dose an lakbang, asin man an kamanahan na kun saen an saiyang ama naka-estar;
44 Asin iyo ini an kapinunan kan pagpapangalaga na Ako an nagtalaga sa saiya, para sa sarong bendisyon sa saiya, asin sa saiyang ama.
45 Nin huli ta hilnga, Ako nagreserba nin sarong kamanahan para sa saiyang ama, para sa saiyang suporta; kun kaya siya pagbibistuhon na yaon sa harong kan sakuyang surugoon na si Joseph Smith, Jun.
46 Asin Ako an magpapadakol nin mga bendisyon sa harong kan sakuyang surugoon na si Joseph Smith, Jun., habang siya matapat, siring sa kadaklan nin mga bendisyon.
47 Asin ngonyan, sarong kasugoan Ako matao sa saindo mapanungod sa Sion, na kamo dae na nagkaburugkos bilang sarong pinagkasararong orden sa saindong mga katugangan sa Sion, sa arog kaining bagay sana---
48 Pagkatapos na kamo pag-organisaron, kamo pag-aapudon na Pinagkasararong Orden kan Istaka nin Sion, an Siyudad sa Kirtland. Asin an saindong mga katugangan, pagkatapos na sinda pag-organisaron, pag-aapudon na Pinagkasararong Orden kan Siyudad nin Sion.
49 Asin sinda pag-oorganisaron sa saindang sadireng mga pangaran, asin sa laog kan saindang sadireng pangaran; asin sinda maggigibo kan saindang mga gibohon sa saindang sadireng pangaran, asin sa laog kan saindang sadireng mga pangaran.
50 Asin kamo maggigibo kan saindong mga gibohon sa saindong sadireng mga pangaran, asin sa laog kan saindong sadireng pangaran.
51 Asin ini Ako nagsugo na paggigibohon para sa saindong kaligtasan, asin man para sa saindang kaligtasan, bilang konsekuwensiya kan saindang pagkapahale paluwas asin idtong mga bagay pang maarabot.
52 An mga tipan na pinagbabalga sa paagi nin paglapas, sa paagi nin kasakiman asin sa mapagsagin-sagin na mga tataramon---
53 kun kaya, kamo pinaglansag na bilang pinagkasararong orden sa kaiba nin saindong mga katugangan, na kamo bako lang nakabugkos sagkod sa oras na ini sa sainda, kundi sa arog kaining paagi lang, siring na Ako nagsabi, sa paagi nin pag-utang siring sa napagkasurundoan sa paagi kaining orden sa konseho, siring sa saindong mga sirkumstansiya na pinag-aako asin sa boses nin pagsugo kan konseho.
54 Asin giraray, sarong kasugoan Ako nagtao sa saindo mapanungod sa saindong pagpapangalaga na Ako an nagtalaga sa saindo.
55 Hilnga, gabos na ining mga propriyedades sakuya, o kun laen an saindong pagtubod mayong kamugtakan, asin kamo nanagboan na mga hepokrito, asin an mga tipan na saindong pinaghimo nabalga;
56 Asin kun an mga propriyedades sakuya, kaya kamo mga tagapagpangalaga; ta kun laen kamo bakong mga tagapagpangalaga.
57 Pero, katotohanan Ako nagsasabi sa saindo, ako an nagtalaga sa saindo na magin tagapagpangalaga sa sakuyang harong, siring na mga tagapagpangalaga nanggad.
58 Asin ta nin huli sa katuyuhang ini Ako nagsusugo saindo na organisaron an saindong mga sadire, magin sa imprinta kan sakuyang mga tataramon, an kabilugan kan sakuyang mga kasuratan, an mga kapahayagan na Ako an nagtao sa saindo, asin ta Ako, magpoon ngonyan, sa pana-panahon magtatao sa saindo---
59 Para sa katuyuhan na pagtutugdukon an sakuyang simbahan asin kahadean sa kinaban, asin pag-aandamon an sakuyang mga katawohan para sa panahon kunsoarin Ako mag-eerok na kaiba ninda, na haranihon nang gayo.
60 Asin kamo mag-aandam para sa saindong mga sadire nin sarong lugar para sa sarong tesoro, asin konsagraron ini sa sakuyang pangaran.
61 Asin kamo magtatalaga nin saro sa pag-iriba nindo tanganing bantayan an tesoro, asin siya pag-ordinahan kaining bendisyon.
62 Asin magkakaigwa nin sarong selyo an tesoro, asin gabos na sagradong bagay ipagkakaag sa laog nin tesoro; asin mayong tawo sa pag-iriba nindo na pag-aapudon ining sadire niya, o arin man na parte kaini, nin huli ta ini pagsadirehon nindo gabos na may pagkasararong pag-uyon.
63 Asin Ako matao kaini sa saindo magpoon sa oras na gayong ini; asin ngonyan hilngon ini, na kamo magpaduman asin himoong gamiton an pagpapangalaga na Ako an nagtalaga sa saindo, na bakong kaiba an mga sagradong bagay, para sa katuyuhan na imprintahon ining mga sagradong bagay siring na Ako an nagsabi.
64 Asin an mga pagpapakinabang kan mga sagradong bagay mapapaduman sa tesoro, asin sarong selyo an nasa ibabaw kaini; asin ini dae paggagamiton o ipagluluwas sa tesoro sa paagi nin kiisay na tawo, ni an selyo paghahaleon sa ibabaw kaini, sa paagi sana kan boses nin orden, o sa paagi nin kasugoan.
65 Asin kaya saindong ipagpreserba an pakinabang kan mga sagradong bagay na yaon sa tesoro, para sa sagrado asin banal na mga katuyuhan.
66 Asin ini pag-aapudon na sagradong tesoro nin Kagurangnan; asin an selyo ipagtatatak sa ibabaw kaini na tanganing ini magigin banal asin konsagrado para sa Kagurangnan.
67 Asin giraray, magkakaigwa pa nin ibang tesoro na pag-aandamon, asin sarong tesorero na pinagtalaga tanganing pangatamanan an tesoro, asin sarong selyo an ipagtatatak sa ibabaw kaini;
68 Asin an gabos na kuwarta na saindong maresibe sa saindong mga pagpapangalaga, sa paagi nin pagpapakarhay kan mga propriyedades na Ako an nagtalaga sa saindo, mga harong, o mga kadagaan, o mga bakahan, o sa gabos na mga bagay laen lang kun ini banal asin sagradong mga kasuratan, na Ako an nagreserba para sa sadire ko para sa banal asin sagradong mga katuyuhan, ipaglalaog pasiring sa tesoro tulos-tulos siring na kamo magresibe nin mga kuwarta, na sa gatos-gatos, o maningkuwenta, o mga beynte, o sa manampulo, o sa piglima.
69 O sa ibang tataramon, kun siisay man sa pag-iriba nindo na makakua nin limang dolyares tugutan siyang ipaglaog ini pasiring sa tesoro; o kun nakakua nin sampulo, o beynte, o singkuwenta, o sanggatos, tugutan siyang gibohon an arog kaini;
70 Asin dae pagtugutan an siisay sa pag-iriba nindo na magsabi na ini pagsadire niya; nin huli ta ini dae pag-aapudon na saiya, ni an arin parte kaini.
71 Asin mayong arin man na parte kaini na paggagamiton, o kukuahon paluwas gikan sa tesoro, kundi sa paagi sana kan boses asin pinagkasararong pag-uyon kan orden.
72 Asin iyo ini an magigin boses asin pinagkasararong pag-uyon kan orden--- na an siisay na tawo sa pag-iriba nindo magsasabi sa tesorero: Ako nagkaipo kaini tanganing matabangan ako sa sakuyang pagpapangalaga---
73 Kun ini limang dolyar, o kun ini sampulong dolyar, o beynte, o singkuwenta, o sanggatos, an tesorero magtatao saiya kan halaga na saiyang pinaghahagad tanganing makatabang saiya sa saiyang pagpapangalaga---
74 Hanggan sa siya managboan na paralapas, asin ini malinaw na maipagmanipesto sa atubangan kan orden na siya bako nang matapat asin bako nang madunong na tagapagpangalaga.
75 Pero habang siya yaon pa sa bilog na pakipag-ibahan, asin matapat asin madunong sa saiyang pagpapangalaga, iyo ini an magigin tanda sa tesorero na tanganing an tesorero dae makakapagsayuma.
76 Pero engkaso may kalapasan, an tesorero maatubang sa konseho asin boses kan orden.
77 Asin engkaso an tesorero iyo an nanagboan na bako nang matapat asin bako nang madunong na tagapagpangalaga, siya maatubang sa konseho asin boses kan orden, asin pagpapahaleon paluwas sa saiyang lugar, asin may iba na ipagtatalaga na kasangli niya.
78 Asin giraray, katotohanan Ako nagsasabi sa saindo, mapanungod sa saindong mga kautangan--- ini sakuyang kagustuhan na kamo magbabayad kan gabos nindong mga kautangan.
79 Asin ini sakuyang kagustuhan na kamo magpapakumbaba kan saindong mga sadire sa atubangan ko, asin makapagkamit kaining bendisyon sa paagi kan saindong pagmaigot asin kapakumbabaan asin pangadyeon na may pagtubod.
80 Asin habang kamo maigot asin mapagpakumbaba, asin pinag-ehersisyo an pangadyeon na may pagtubod, hilnga, Ako an magpapalumoy kan mga puso ninda kun kiisay kamo nagkakautang, sagkod na Ako magpapadara nin mga katabangan sa saindo para sa saindong kahinggianan.
81 Kun kaya magsurat nin hidali sa New York asin magsurat na uyon sa pinagdidikta kan sakuyang Espiritu; asin Ako an magpapalumoy kan mga puso ninda kun kiisay kamo nagkakautang, na tangani ini paghahaleon paluwas sa saindang mga isip na magdadara nin kasakitan sa saindo.
82 Asin habang kamo mapagpakumbaba asin matapat asin mag-aapod sa sakuyang pangaran, hilnga, Ako an magtatao saindo nin kapangganahan.
83 Ako matao sa saindo nin sarong promise, na kamo ipagliligtas ngonyan sana paluwas sa saindong kauripnan.
84 Habang kamo nagkakamit nin sarong tsansa na makapag-utang nin kuwarta na mananggatos, o rinibo, magin sagkod na kamo makakapag-utang pa nin awad-awad tanganing iligtas an saindong mga sadire gikan sa kauripnan, ini an saindong pribilihiyo.
85 Asin ipagpangako an mga propriyedades na Ako an nagpamugtak sa saindong mga kamot, ngonyan sana, sa paagi nin pagtao kan saindong mga pangaran sa paagi nin pinagkasararong pag-uyon o iba man, siring na ini ikakarahay sa saindo.
86 Ako matao sa saindo kaining pribilihiyo, ngonyan sana; asin hilnga, kun kamo magpapadagos na gibohon an mga bagay na Ako an naghaya sa atubangan nindo, uyon sa sakuyang mga kasugoan, an gabos na ining bagay pagsadire ko, asin kamo an sakuyang mga tagapagpangalaga, asin an amo dae magtutugot na an saiyang harong paggagabaon. Arog kaini. Amen.