Monday, April 13, 2009

SEKSYON 114

Kapahayagan na ipinagtao sa paagi ki Joseph Smith an Propeta, sa Far West, Missouri, Abril 17, 1838. HS 3:23.
*******
1-2, An pansimbahang mga posisyon na kapot ninda na bakong matapat ipagtatao sa iba.
*******
KATOTOHANAN kaya nagsabi an Kagurangnan: Ini kadunungan para sa sakuyang surugoon na si David W. Patten, na saiya dapat na areglaron an gabos niyang bisnis sa madalion na possible niyang maggibo, asin himoon an disposisyon kan saiyang mga paninda, na tanganing siya puwedeng makapaggibo nin sarong misyon para sakuya sa masunod na tagsibol, na kaiba an iba pa, na iyo an dose kaiba siya, tanganing magpapatotoo sa sakuyang pangaran asin magdara nin maogmahong bareta pasiring sa bilog na mundo.
2 Nin huli ta katotohanan kaya nagsasabi an Kagurangnan, na habang igwa sainda na mga pag-iriba nindo na masikwal kan sakuyang pangaran, may iba na ipagtatanom karibay ninda asin resibihon an saindang bishopric. Amen.

SEKSYON 113

Mga kasimbagan sa mga kahaputan sa mga isinurat ni Isaias, ipinagtao sa paagi ki Joseph Smith an Propeta, Marso 1838. HS 3:9-10.
*******
1-6, An sanga ni Jesse, an supnay na maggigikan kaiyan, asin an ugat ni Jesse pinagbisto; 7-10, An nagkaralat na mga katadaan nin Sion igwa nin karapatan sa pagkasaserdote asin pinagpapangapudan na magbaralik sa Kagurangnan.
*******
Siisay an Sanga ni Jesse na pinagsasabi sa enot, ikaduwa, ikatulo, ikaapat, asin ikalimang bersikulo kan ika-onseng tsapter kan Isaias?
2 Katotohanan kaya nagsabi an Kagurangnan: Ini iyo si Cristo.
3 ano an supnay na pinagsasabi sa enot na bersikulo kan ika-onseng tsapter kan Isaias, na dapat na maggigikan sa Sanga ni Jesse?
4 Hilnga, kaya nagsabi an Kagurangnan: Ini iyo an sarong surugoon sa mga kamot ni Cristo, na iyo an kaparte bilang kapag-arakian ni Jesse asin siring man ni Ephraim, o sa harong ni Joseph, na sa saiya nakaatang an dakilang kapangyarihan.
5 Ano an ugat ni Jesse na pinagsasabi sa ikasampulong bersikulo kan ika-onseng tsapter?
6 Hilnga, kaya nagsabi an Kagurangnan, ini iyo an sarong kapag-arakian ni Jesse, asin siring man ni Joseph, na sa saiya tanos na pinagsasadire an pagkasaserdote, asin an mga susi nin kahadean, o an ensigniya, asin para sa pagkatiripon-tipon kan sakuyang mga katawohan sa huring mga aldaw.
7 Mga kahaputan ni Elias Higbee: Ano baya an kahulugan sa sugo sa Isaias, ikasingkuwenta asin duwang tsapter, enot na bersikulo, na nagsasabi: Sul-ota an saimong kusog, O Sion---asin siisay na mga katawohan an pinanunungdan kaini?
8 Pinanunungdan niya sinda na an Diyos iyo an mapangapudan sa huring mga aldaw, na iyo dapat an mangaputan sa kapangyarihan nin pagkasaserdote tanganing darahon giraray an Sion, asin an pagtubos kan Israel; asin an pagsul-ot kan saiyang kusog iyo an pagsul-ot kan awtoridad nin pagkasaserdote, na siya, an Sion, igwa nin karapatan sa paagi nin kaggikanan; asin man sa pagbalik sa kapangyarihan na saiyang nawara.
9 Ano baya an samuyang dapat na maintindihan sa an Sion pinagbubuhian an saiyang sadire gikan sa mga gapos sa saiyang liog; ikaduwang bersikulo?
10 Satuya dapat na maintindihan na an mga nagkawaratak-watak na mga katadaan pinaghuhurot na magbaralik sa Kagurangnan gikan sa lugar kun saen sinda nagkahurulog; na kun saindang gigibohon an promise nin Kagurangnan iyo na siya makikipag-olay sa sainda, o magtatao sainda nin kapahayagan. Hilngon sa ika-anom, ikapito, asin ikawalong bersikulo. An mga gapos sa saiyang liog iyo an mga sumpa nin Diyos sa saiya, o an mga katadaan nin Israel sa saindang pagkawaratak-watak na kamugtakan sa pag-iriba nin mga Hentil.

SEKSYON 112

Kapahayagan na ipinagtao sa paagi ki Joseph Smith an Propeta para ki Thomas B. Marsh, sa Kirtland, Ohio, Hulyo 23, 1837. HS 2:499-501. An tataramon nin Kagurangnan para ki Thomas B. Marsh, mapanungod sa Doseng Apostoles kan Kordero. An Propeta nagrekord na ining kapahayagan naresibe kan aldaw na an ebanghelyo enot na pinagbalangibog sa Inglatera. Si Thomas B. Marsh kan panahon na ini iyo an presidente kan Korum nin Doseng Apostoles.
*******
1-10, An Dose iyo an magpadara kan ebanghelyo asin maipagpalangkaw an boses nin patanid sa gabos na mga nasyon asin katawohan; 11-15, Sinda nagkarga kan saindang sadireng krus, magsunod ki Jesus, asin magpakakan kan saiyang mga karnero; 16-20, Sinda na nagresibe kan Enot na Panguluhan nagresibe sa Kagurangnan; 21-29, An kadikloman iyo an nagkakanap sa kinaban, asin sinda sana na naniniwala asin nagpabunyag an maliligtas; 30-34, An Enot na Panguluhan asin an Dose an nagkakapot nin mga susi kan dispensasyon sa kabilugan nin mga panahon.
*******
KATOTOHANAN kaya nagsabi an Kagurangnan saimo sakuyang surugoon, Thomas: Ako nakadangog kan saimong mga pangadyeon; asin an saimong mga limos nakaabot na bilang sarong tagapagpagiromdom sa atubangan ko, sa ngaran ninda, saimong mga katugangan, na pinagpili tanganing darahon an testimonya kan sakuyang pangaran asin ipagpadara ini paluwas sa gabos na mga nasyon, mga lahi, mga dila, asin mga katawoahn, asin pinag-ordinahan sa paagi kan paggamit kan sakuyang mga surugoon,
2 Katotohanan Ako nagsasabi sa saimo, nagkaigwa pa nin ibang dikit na mga bagay sa saimong puso asin saimo na Ako, an Kagurangnan, daeng gayo ko ikinakaogma.
3 Daeng pagkukulang, siring na habang saimong ipinagbababa an saimong sadire ika ipagpapalangkaw; kun kaya, an gabos mong mga kasalan ipinagpatawad na sa saimo.
4 Tuguti na an saimong puso magin magayagaya sa atubangan nin sakuyang lalawgon; asin saimong ipagpapatotoo an sakuyang pangaran, bako sana sa mga Hentil, kundi siring man sa mga Hudiyo; asin saimong ipagpapadara paluwas an sakuyang tataramon pasiring sa mga katapusan nin kinaban.
5 Makilaban ka, kaya, sa kada pagkaaga; asin sa kada aldaw tuguti na an saimong boses nin patanid magluwas; asin kunsoarin na an banggi mag-abot dae baya pagtuguti na an mga nag-eerok kaining kinaban mangaturog, nin huli kan saimong tataramon.
6 Tuguti na an saimong pinag-eestaran maaraman na yaon sa Sion, asin dae paghaelon an saimong harong; nin huli ta Ako, an Kagurangnan, igwa nin sarong dakulaon na trabaho na ipagpapagibo sa saimo, sa pagbabalangibog nin sakuyang pangaran sa pag-iriba kan mga kaarakian nin mga tawo.
7 Kun kaya, bugkusi an saimong habayan para sa trabaho. Tuguti na an saimong mga bitis masapatusan man, nin huli ta ika pinili, asin an saimong dalan nakalatag na sa pag-iriba nin mga kabukidan, asin sa pag-iriba nin mga nasyon.
8 Asin sa paagi nin saimong tataramon kadakul sa mga haralangkaw na mga tawo na pagdadarahon pababa, asin sa paagi nin saimong tataramon kadakul na nasa hababa na mga tawo an ipagpapaitaas.
9 An saimong boses iyo an magin sarong hampak sa paralapas; asin sa saimong paghampak tuguti na an dila nin parapakaraot mag-untok kaining kalipustaan.
10 Magin kang mapagpakumbaba; asin an Kagurangnan saimong Diyos mag-aakay saimo sa paagi nin kamot, asin magtatao saimo nin mga kasimbagan sa saimong mga pangadyeon.
11 Ako nakakaaram kan saimong puso, asin nakakadangog sa saimong mga pangadyeon Manunungod sa saimong mga katugangan. Dae ka magin madinuda sa sainda sa pagkamoot labaw pa sa kadakul na iba, kundi tuguti na an saimong pagkamoot mapasainda siring na mapasaimo man; asin tuguti na an saimong pagkamoot magdakula para sa gabos na mga tawo, asin sa gabos na namomoot sa sakuyang pangaran.
12 Asin magpangadye ka para sa saimong mga katugangan na Dose. Pagpagiromdoman sindang gayo nin huli sa sakuyang pangaran, asin tuguti na sinda mapagiromduman kan gabos nindang mga kasalan, asin magin kang matapat sa atubangan ko sa sakuyang pangaran.
13 Asin pagkatapos kan saindang mga tentasyon, asin grabeng tribulasyon, hilnga, Ako an Kagurangnan, magmamati para sainda, asin kun sinda dae magpapatagas kan saindang mga puso, asin dae magpatiso kan saindang mga liog laban sakuya, sinda magbabag-o, asin Ako an magpapaomay sainda.
14 Ngonyan, Ako magsasabi sa saimo, asin kun ano Ako magsasabi sa saimo, Ako magsasabi man sa gabos na Dose: Tumindog kamo asin bugkusi an saindong mga habayan, daraha an saindong krus, magsunod sakuya, asin pagpakakana an sakuyang mga karnero.
15 Dae mo ipagpalangkaw an saimong sadire; dae ka magrebelde kontra sa sakuyang surugoon na si Joseph; nin huli ta katotohanan Ako nagsasabi sa saimo, ako kaiba niya, asin an sakuyang kamot maglilindong sa saiya; asin an mga susi na Ako an nagtao sa saiya, asin mapapasaimo man, dae pagkukuahon gikan saiya sagkod na Ako mag-abot.
16 Katotohanan Ako nagsasabi sa saimo, sakuyang surugoon na Thomas, ika an tawo na Ako an nagpili tanganing magkapot kan mga susi nin sakuyang kahadean, na mapapanungod sa Dose, sa luwas sa pag-iriba nin gabos na mga nasyon---
17 Na tanganing ika iyo an magigin sakuyang surugoon tanganing bukasan an pintuan nin kahadean sa gabos na mga lugar kun saen an sakuyang surugoon na si Joseph, asin an sakuyang surugoon na si Sidney, asin an sakuyang surugoon na si Hyrum, dae makakaabot;
18 Nin huli ta sa sainda Ako nagpamugtak an kaatangan kan gabos na mga Simbahan para sa kadikiton na panahon.
19 Kumbaya, kun saen ka ninda ipagpapadara, magduman ka, asin Ako kaiba mo; asin sa arinman na lugar na ika magpoproklama nin sakuyang pangaran sarong makabuluhan na pinto an magbubukas sa saimo, na saindang pagreresibihon an sakuyang pangaran.
20 An siisay baya na magreresibe nin sakuyang tataramon magreresibe sakuya, asin an siisay na magreresibe sakuya, magreresibe sainda, an Enot na Panguluhan, na iyo Ako an nagpadara, na Ako an naghimong mga tagapagpayo sa sakuyang pangaran para sa saimo.
21 Asin giraray Ako nagsasabi sa saimo, na an siisay na saimong ipagpapadara sa sakuyang pangaran, sa paagi nin boses kan saimong mga katugangan, an Dose, pinagrekomenda asin awtorisado sa paagi mo, magkakaigwa nin kapangyarihan na magbubukas kan pintuan nin sakuyang kahadean para sa arinman na nasyon kun saen mo ipagpapadara sinda---
22 Siring na habang sinda magpapakumbaba kan saindang mga sadire sa atubangan ko, asin magsusunod sa sakuyang tataramon, asin maghihinanyog sa boses kan sakuyang Espiritu.
23 Katotohanan, katotohanan, Ako nagsasabi sa saimo, kadikloman an nagtatahob sa kinaban, asin grabeng kadikloman an mga nasa isip nin mga katawohan, asin an gabos na laman nagin koraptu sa atubangan nin sakuyang lalawgon.
24 Hilnga, kabalusan an hidaling nagdudulok sa mga para-erok nin kinaban, sarong aldaw na kaanggutan, sarong aldaw na pagkakasulo, sarong aldaw nin kalipungawan, nin pagtatangis, nin pagmumundo, asin nin pag-aagrangay; asin siring sa sarong ipo-ipo ini maaabot sa bilog na lalawgon nin kinaban, nagsabi an Kagurangnan.
25 Asin baya sa sakuyang harong ini magpopoon, asin gikan sa sakuyang harong ini maglalakop, nagsabi an Kagurangnan;
26 Enot sa sainda na pag-iriba nindo, nagsabi an Kagurangnan, na nagpaparabalangibog na nakakaaram sa sakuyang pangaran, dae ngani nakakabisto sakuya, asin nangungutya laban sakuya sa katahawan nin sakuyang harong, nagsabi an Kagurangnan.
27 Kun kaya, masdan mo ini na dae ka magpagal na kan saimong sadire Manunungod sa mga gibohon kan sakuyang Simbahan sa lugar na ini, nagsabi an Kagurangnan.
28 Kundi linigi an saindong mga puso sa atubangan ko; asin pagkatapos magpaduman ka pasiring sa bilog na mundo, asin magbalangibog kan sakuyang ebanghelyo pasiring sa lambang nilalang na dae nagresibe pa kaini;
29 Asin siya na nagtutubod asin pinagbunyagan maliligtas, asin siya na dae nagtutubod, asin dae pinagbunyagan, pagkokondenaron.
30 Nin huli ta sa saindo, an Dose, asin sa sainda, an Enot na Panguluhan, na pinagngaranan kaiba mo na magin saimong mga tagapayo asin saimong mga lideres, iyo an kapangyarihan kaining pagkasaserdote pinagtao, para sa mga huring aldaw asin para sa huring panahon, na iyo ngani an dispensasyon kan kabilugan nin mga panahon.
31 Na an kapangyarihan saimong nakakaputan, na nakasumpay sa gabos ninda na nakaresibe nin sarong dispensasyon sa anuman na panahon magpoon pa sa kapinunan kan paglalang;
32 Nin huli ta katotohanan Ako nagsasabi sa saimo, an mga susi kan mga dispensasyon, na saimong naresibe, naggikan pa sa mga ama, asin huri sa gabos, ipinagpadara pababa gikan sa langit pasiring sa saimo.
33 katotohanan Ako nagsasabi sa saimo, hilnga gurano baya kadakula an saimong kapangapudan. Hugasi an saindong mga puso asin an saindong mga kabadoan, na baka baya an dugo kaining henerasyong paghagadon sa saindong mga kamot.
34 Magin matapat sagkod na Ako mag-abot, nin huli ta Ako maaabot nin hidali; asin an sakuyang balos yaon sakuya tanganing pagbulusan an lambang tawo uyon sa saiyang nagkaginibohan. Ako an Alpha asin an Omega. Amen.

SEKSYON 111

Kapahayagan na pinagtao sa paagi ki Joseph Smith an Propeta, sa Salem, Massachusettes, Agosto 6, 1836. HS 2: 465-466. Sa panahon na ini an mga lider kan Simbahan yaon sa magabat na pagkakautang huli sa saindang mga trabaho sa ministeryo. Nadangog na may dakilang kantidad nin kuwarta an mapasainda sa Salem, an Propeta, Sidney Rigdon, Hyrum Smith, asin Oliver Cowdery nagbiyahe pasiring duman hale sa Kirtland, Ohio, tanganing mag-imbestiga kaining nasambit, kasabay an pagbabalangibog kan ebanghelyo. An mga katugangan pinagtransaksiyon an nagkapirang mga bagay kan bisnis nin Simbahan asin naggibo nin nagkapirang pagbalangibog. Kan ini nagin malinaw na mayo man talagang kuwarta na maaabot, sinda nagbalik sa Kirtland. An nagkapirang mga bagay na prominenteng yaon sa likod pinagpasabot sa mga tataramon kaining kapahayagan.
*******
1-5, An Kagurangnan pinaghihiling an temporal na mga pangangaipo kan saiyang mga surugoon; 6-11, Siya magpapamahala na may purong pagkaherak sa Sion asin ayuson an gabos na mga bagay para sa karahayan kan saiyang mga surugoon.
*******
AKO, an Kagurangnan na saindong Diyos, dae nasusuya sa saindong pagpaduman sa biyaheng ini, maski pa sa saindong kinalokohan.
2 Ako igwang kadakul na kayamanan sa siyudad na ini para saindo, para sa benepisyo kan Sion, asin sa kadakul na mga katawohan kaining siyudad, na iyo Ako an magtitiripon-tipon sa tinakdang panahon para sa benepisyo kan Sion, sa paagi nindo bilang mga instrumento.
3 Kun kaya, ini sarong kapakinabangan na kamo dapat na makipaghalobilo sa mga tawo kaining siyudad, siring na kamo pagpapangenotan, asin siring na ini ipagtatao sa saindo.
4 Asin ini mangyayaring malipas sa tinakdang panahon na Ako magtatao sa siyudad na ini sa saindong mga kamot, na tanganing kamo magkakaigwa nin kapangyarihan na mangingibabaw kaini, habang sinda dae makakadiskubre kan saindong sikretong mga parte, asin an kayamanan mapanungod sa bulawan asin pilak mapapasaindo.
5 Dae kamo magparahadit mapanungod sa saindong mga kautangan, nin huli ta Ako magtatao nin kapangyarihan sa pagbayad sainda.
6 Dae kamo magparahadit mapanungod sa Sion, nin huli ta Ako an magpamahala na pano nin pagkaherak sa saiya.
7 Mag-estar sa lugar na ini, asin sa mga rehiyon sa palibot;
8 Asin sa lugar kun saen ini an sakuyang kagustuhan na kamo dapat na mag-estar, pansamantala, ipagpapasabot sa saindo sa katuninongan asin kapangyarihan kan sakuyang espiritu, na magbubulos sa saindo.
9 Ining lugar saindong makukua sa paagi nin arkila. Asin maigot na manhaputan mapanungod sa mas suanoy na mga para-erok asin mga pundador kaining siyudad;
10 Nin huli ta may mas kadakul na mga kayamanan kesa sa saro para saindo sa siyudad na ini.
11 Kun kaya, magin kamong mga madudunong siring sa mga halas asin alagad mayo nin kasalan; asin Ako an magpapamugtak kan gabos na mga bagaya para sa saindong karahayan, siring sa madalion na kamo may kayang maresibe sinda. Amen.

Friday, April 03, 2009

SEKSYON 110

Mga bisyon na ipinagpahiling ki Joseph Smith an Propeta asin Oliver Cowdery sa templo nin Kirtland, Ohio, Abril 3, 1836. An okasyon kaidto iyo an sarong aldaw nin Sabbath na pagtitiripon. An Propeta pangenot na naghayag kan saiyang rekord kan mga ipinagpahiling sa mga tataramon na ini: “Sa pagkahapon, ako nagtabang sa ibang mga Presidente sa pagpanao kan Pamanggihan nin Kagurangnan sa Simbahan, pinagresibe an mga ini gikan sa Dose, an an saindang pribilihiyo iyo an magpamahala sa sagradong toka sa aldaw na ini. Pagkatapos na maggibo ang serbisyong ini sa sakuyang katugangan, ako nagpasiring sa pulpito, an mga belo pinaghawi, asin nagluhod ako, kaiba si Oliver Cowdery, sa solemni asin hilom na pangadyeon. Pagkatapos na magtindog gikan sa pagpangadye, an minasunod na bisyon pinagbukas sa samuya.”
*******
1-10, An Kagurangnan Jehovah nagpahiling sa kamurawayan asin pinag-aksepta an templo kan Kirtland bilang saiyang harong; 11-12, Si Moises asin Elias lambang saro nagpahiling asin pinagkomiter an saindang mga susi asin mga dispensasyon; 13-16, Si Elijah nagbalik asin nagkomiter kan mga susi kan saiyang dispensayong; 13-16, Si Elijah nagbalik asin nagkomiter kan mga susi kan saiyang dispensasyon siring sa pinagpromisa ni Malakias.
*******
An belo pinaghale sa samuyang mga isip, asin an mga mata kan samuyang pagka-intende pinagbukasan.
2 Samuyang nahiling an Kagurangnan na nakatindog sa may ibabaw kan pasamano nin pulpito, sa atubangan nyamo, asin sa irarom kan saiyang mga bitis sarong tungtungan na gibo sa purong bulawan, na an kulay siring sa amber.
3 An saiyang mga mata siring sa sarong laad nin kalayo; an buhok kan saiyang payo mapution siring sa purong niyebe; an saiyang hitsura nagsirang labaw sa kaliwanagan kan saldang; asin an saiyang boses siring sa tungo kan nagraragasa na makapangyarihang mga tubig, na iyo ngani an boses ni Jehovah, na nagsasabi:
4 Ako iyo an enot asin an huri; ako iyo siya na nabubuhay, Ako iyo siya na ginadan; Ako an saindong tagapagpatahaw ki Ama.
5 Hilnga, an saindong mga kasalan pinagpatawad na sa saindo; kamo malinigon na sa atubangan ko; kun kaya, ipag-itaas an saindong mga payo asin magka-orogma.
6 Tuguti na an mga puso kan saindang mga katugangan magka-orogma, asin tuguti na an mga puso kan bilog kong mga katawohan magka-orogma, na nagkaigwa, na may kusog, na pinagtugdok ining harong para sa sakuyang pangaran;
7 Nin huli ta hilnga, Ako nag-aksepta kaining harong, asin an sakuyang pangarawn ipagbugtak digde; asin Ako magpapahiling kan sakuyang sadire sa sakuyang mga katawohan sa pagkaherak sa harong na ini.
8 Iyo, Ako magpapahiing sa sakuyang mga surugoon, asin magtataram sa sainda sa sakuyang sadireng boses, kun an sakuyang mga katawohan magsusunod sa sakuyang mga kasugoan, asin dae paggibohon na pag-atian ining banal na harong.
9 Iyo an mga puso kan rinibo asin manampulong rinibo mag-oorogmang gayo sa konsekuwensiya kan mga bendisyon na ipagpapabulos, asin an katalagahan na kun saen an sakuyang mga surugoon pinagtalaga sa harong na ini.
10 Asin an kabantugan kaining harong magwawarak pasiring sa ibang mga kadagaan; asin iyo ini an kapinunan kan bendisyon na ipagpapabulos sa mga payo kan sakuyang mga katawohan. Arog kaini. Amen.
11 Pagkatapos kaining bisyon nagsara, an mga kalangitan giraray nagbukas sa samuya; asin si Moises nagpahiling sa atubangan nyamo, asin pinagkomiter sa samuya ang mga susi kan pagtitiripon-tipon kan Israel gikan sa apat na surok kan kinaban, asin an pagpapangenot kan sampulong mga tribu na gikan sa mga kadagaan kan hiraga.
12 Pagkatapos kaini, si Elias nagpahiling, asin pinagkomiter an dispensasyon kan ebanghelyo ni Abraham, nagsasabi na sa samuya asin sa samuyang mga banhi na an gabos na mga henerasyong pagkatapos samuya pagbebendisyunan.
13 Pagkatapos kaining bisyon nagsara, saro pang dakulaon asin mamurawayon na bisyon an nagpahiling samuya; hin huli ta si Elijah an propeta, na pinagduman sa langit na dae nagnamit nin kagadanan, nagtindog sa atubangan nyamo, asin nagsabi:
14 Hilnga, an panahon bilog na nag-abot, na pinagsasabi kan nguso ni Malakias--- nagpapatotoo na siya (Elijah) dapat na ipagpadara, bago pa man an dakulaon asin mangirhat na aldaw nin Kagurangnan mag-abot---
15 Tanganing pabalikon an mga puso kan mga ama sa mga kaarakian, asin an mga kaarakian sa mga ama, ta baka baya an bilog na kinaban paghahampakon nin sarong sumpa---
16 Kun kaya, an mga susi kaining dispensasyon pinagkomiter sa saimong mga kamot; asin sa paaging ini kamo makakaaram na an dakulaon asin makangirhat na aldaw nin Kagurangnan haranihon na, gayud baka baya yaon na sa mga pintuan.

SEKSYON 109

Pangadyeon na pinagdulot sa dedikasyon kan templo sa Kirtland, Ohio, Marso 27, 1836. HS 2:420-426. Uyon sa tataramon na pinagsurat kan Propeta, ining pangadyeon pinagtao saiya sa paagi nin kapahayagan.
*******
1-5, Ang templo sa Kirtland pinagtugdok bilang sarong lugar para sa pagbisita kan Ake nin Tawo; 6-21, Ini iyo an sarong harong nin pagpapangadye, pag-aayuno, pagtubod, pagkanuod, kamurawayan, asin kahusayan, asin sarong harong nin Diyos; 22-33, Lugod an mayong pagsosolsol na tawo na nagkokontra sa mga katawohan nin Kagurangnan magkakariribong; 34-42, Lugod an mga banal magpapadagos na may kapangyarihan tanganing tiponon an matatanos pasiring sa Sion; 43-53, Lugod an mga banal ipagliligtas gikan sa teribleng mga bagay na ipagpapabulos sa mga mararaot sa mga huring aldaw; 54-58, Lugod an mga nasyon asin mga katawohan asin mga Simbahan magin preparado para sa ebanghelyo; 59-67, Lugod an mga Hudiyo, an mga Lamanita, asin an bilog na Israel matubos; 68-80, Lugod an mga banal pagkokoronahan nin kamurawayan asin honra asin makaguno nin eternal na kaligtasan.
*******
KAPASALAMATAN mapasaimong pangaran, O Kagurangnan Diyos nin Ïsrael, na iyo an nag-uutob sa tipan asin nagpapahiling nin pagkaherak sa saimong mga surugoon na naglalakaw sa pagkamatanos sa atubangan mo, sa bilog nindang mga puso---
2 Ika na iyo an nagsugo sa saimong mga surugoon na magtugdok nin sarong harong sa saimong pangaran sa lugar na ini (Kirtland).
3 Asin ngonyan saimong nahihiling, O Kagurangnan, na an saimong mga surugoon nakapaggibo uyon sa saimong kasugoan.
4 Asin ngonyan kami naghahagad saimo, Banal na Ama, sa pangaran ni JesuCristo, an Ake nin saimong daghan, na sa saiyang pangaran sana an kaligtasan magin mapagpamahalaan para sa mga kaarakian nin mga tawo, kami naghahagad saimo, O Kagurangnan, na akseptaron mo an harong na ini, an dulot-kaggibohan kan mga kamot nyamo, an saimong mga surugoon, na ika baya an nagsugo samuya na ipagtugdok.
5 Nin huli ta ika nakakaaram na gayo na samuyang ginibo ining trabaho sa tahaw nin dakilang tribulasyon; asin gikan sa samuyang katiosan samuyang ipinagtao an samuyang rugaring sa pagtugdok nin sarong harong para sa saimong pangaran, na tangani baya na an Ake nin Tawo magkaigwa nin sarong lugar tanganing makapagmanipesto kan saiyang sadire sa saiyang mga katawohan.
6 Asin sirng na ika nagsabi sa sarong kapahayagan, na ipinagtao mo samuya, pinag-aapod mo kaming mga amigo, na nagsasabi--- Apuda an saindong banal na asembliya, siring na Ako an nagsugo saindo;
7 Asin siring na an gabos mayong pagtubod, maghanap kamo nin maigot asin magtinurukdoan sa lambang saro sa mga tataramon nin kadunungan; iyo, maghanap kamo sa mga marahayon na mga libro mga tataramon nin kadunungan, maghanap kamo nin pagkanuod magin sa paagi nin pag-aadal asin man sa paagi nin pagtubod;
8 Organisaron an saindong mga sadire; pag-andamon an lambang kinakaipuhanan na bagay, asin establisaron an sarong harong, na iyo an sarong harong nin pagpapangadye, sarong harong nin pag-aayuno, sarong harong nin pagtubod, sarong harong nin pagkamoot, sarong harong nin kamurawayan, sarong harong nin kahusayan, sarong harong nin Diyos;
9 Na an saindong mga pag-abot mapaniring sa pangaran nin Kagurangnan, na an saindong mga paghale mapaniring sa pangaran nin Kagurangnan, na tanganing an gabos nindong mga pagbati mapaniring sa pangaran nin Kagurangnan, na igwang pinagpaitaas na mga kamot na ipinapanungod sa Pinakahalangkaw---
10 Asin ngonyan, Banal na Ama, kami minahagad saimo na tabangan kami, an saimong mga katawohan, kan saimong grasya, sa pag-apod kan samuyang banal na asembliya, na tanganing ini mangyayari para sa saimong honra asin sa saimong banal na pag-ako;
11 Asin sa sarong manera na kami puwedeng managboan na maninigo, sa saimong paghiling, tanganing magpapangalaga sa sarong kautuban kan mga promise na saimong pinaghimo para samuya, an saimong mga katawohan, sa mga kapahayagan na itinao mo sa samuya;
12 Na an saimong kamurawayan puwedeng makamit kan saimong mga katawohan, asin kaining saimong harong, na samuya ngonyan na pinagdudulot sa saimo, na ini pagpakabanalon asin consagrado na magin banal, asin an saimong banal na presensiya magpapadagos na yaon sa harong na ini;
13 Asin na an bilog na katawohan na makapaglaog sa may pintuan kan harong nin Kagurangnan makapagmati kan saimong kapangyarihan, asin makapagmateng ma-obliga na makapag-aram na ika an nagpakabanal kaini, asin na ini saimong harong, sarong lugar kan saimong kabanalan.
14 Asin gibohon na saimong ipagtao, Banal na Ama, na an gabos saindang magsasamba sa laog kaining harong puwedeng matukdoan nin mga tataramon nin kadunungan gikan sa mga marahayon na mga libro, asin na sinda puwedeng makapaghanap nin pagkanuod magin sa paagi nin pag-aadal, asin man sa paagi nin pagtubod, siring sa saimong pinagsabi;
15 Asin na sinda puwedeng magtalubo sa saimo, asin magresibe nin sarong kabilugan kan Banal na Espiritu, asin magin organisado uyon sa saimong mga batas, asin magin preparado na makapagguno nin lambang kinakaipuhanan na bagay;
16 Asin na ining harong puwedeng magin sarong harong nin pagpapangadye, sarong harong nin pag-aayuno, sarong harong nin pagtubod, sarong harong nin kamurawayan asin nin Diyos, na iyo ngani an saimong harong;
17 Na an gabos na mga pag-abot kan saimong mga katawohan, pasiring sa laog kaining harong, puwedeng mapaniring sa pangaran nin Kagurangnan;
18 Na an gabos na saindang paghale gikan sa harong na ini puwedeng mapaniring sa pangaran nin Kagurangnan;
19 Asin na an gabos nindang mga pagbati puwedeng mapaniring sa pangaran nin Kagurangnan, na igwang banal na mga kamot, na ipinagpaitaas para sa Pinakahalangkaw;
20 Asin na mayong maation na bagay na pagtutugutan na makalaog sa saimong harong tanganing atian ini;
21 Asin kunsoarin na an saimong mga katawohan makapaglapas, siisay man sainda, sinda puwedeng hidalion na makapagsosolsol asin makapagbalik sa saimo, asin makanagbo nin pabor sa saimong paghiling, asin maibalik giraray an mga bendisyon na saimong pinag-ordina na pagpapabuluson sa sainda na magpapakabanal saimo sa laog kan saimong harong.
22 Asin kami naghahagad saimo, Banal na Ama, na an saimong mga surugoon puwedeng magpaduman gikan sa harong na ini na armado kan saimong kapangyarihan, asin na an saimong pangaran mapasainda, asin an saimong kamurawayan magin yaon sa palibot ninda, asin an saimong mga anghel nakabantay sa sainda.
23 Asin gikan sa lugar na ini saindang madara an dakulaong gayo asin mamurawayong mga bareta, sa katotoohan, sa mga katapusan nin kinaban, na tanganing saindang maaraman na iyo ini an saimong gibo, asin na saimong pinagbukas an saimong mga kamot, tanganing utubon idtong saimong pinagsabi sa paagi kan mga nguso nin mga propeta, mapanungod sa mga huring aldaw.
24 Kami naghahagad saimo, Banal na Ama, na establisaron an mga katawohan na magsasamba, asin honorableng nagkakapot nin sarong pangaran asin magtitindog digde sa saimong harong, para sa gabos na mga henerasyong asin sa eternidad;
25 Na mayong armas na pinaghimo kontra sainda an magpapangibabaw; na siya na nagkakalot nin sarong lubungan para sainda iyo lugod an mahuhulog sa kalot niya;
26 Na mayong kumbinasyon nin mga mararaot an magkakaigwa nin kapangyarihan na mangingibabaw asin magdadanay laban sa saimong mga katawohan na kung saen an saimong pangaran ipamumugtak sa harong na ini.
27 Asin kun an siisay na tawo an mag-alsa laban kaining mga katawohan, lugod an saimong kaanggutan iyo an magdanay kontra sainda;
28 Asin kun saindang paghahampakon ining mga katawohan saimong paghahampakon man sinda; ika an makikilaban para sa saimong mga katawohan siring kan saimong pinaggibo sa aldaw nin giyera, na sinda puwedeng mailigtas gikan sa mga kamot kan gabos nindang mga kaiwal.
29 Kami naghahagad saimo, Banal na Ama, na palibongon, asin pagpangalason, asin darahon sa kasupganan asin kahurasaan, gabos sinda na nagpapalakop nin mga kaotikang bareta sa ibang lugar, sa mundo, laban sa saimong surugoon o mga surugoon, kun sinda dae magsosolsol, kunsoarin na an daeng katapusan na ebanghelyo ipagpoproklama sa saindang mga talenga;
30 Asin na an gabos nindang mga gibo mapuwedeng darahon sa kadaehan, asin ipaglupad paharayo sa paagi nin uran, asin sa paagi nin mga paghuhukom na saimong ipagpapadara sa sainda sa saimong kaanggutan, na tanganing magkakaigwa nin katapusan sa mga kaotikan asin mga pagpapakaraot laban sa saimong mga katawohan.
31 Nin huli ta ika nakakaaram, O Kagurangnan, na an saimong mga surugoon nagin mga inosente sa atubangan mo sa pagpapatotoo sa saimong pangaran, na kun saen sinda nagsakit kaining mga bagay.
32 Kun kaya kami nagngangayo-ngayo sa atubangan mo para sa sarong bilog asin kumpletong kaligtasan gikan sa irarom kaining pagabat;
33 Baria ini, O Kagurangnan; baria ini gikan sa mga liog kan saimong mga surugoon, sa paagi kan saimong kapangyarihan, na tanganing kami makapagbuhat sa katahawan kaining henerasyong asin gibohon an saimong trabaho.
34 O Jehovah, kaheraki ining mga katawohan, asin siring na an mga tawo nagkakasala, patawada an mga kalapasan kan saimong mga katawohan, asin tugutan an mga ini na mapara sagkod sa kasagkoran.
35 Tuguti na an kalahiran kan saimong mga ministro ipagselyo sa sainda na may kapangyarihan gikan sa kahalangkawan.
36 Tuguti na ini magka-urutob sa sainda, siring kaidto sainda kan aldaw nin Pentekostes; tuguti na an regalo nin mga tataramon ipagbubulos sa saimong mga katawohan, magin mga dila na siring sa kalayon, asin an interpretasyon kaini.
37 Asin tuguti na an saimong harong mapano, na siring sa sarong agusoos nin makusog na paros, kan saimong kamurawayan.
38 Ipagmugtak sa saimong mga surugoon an testimonya kan tipan, na kunsoarin na sinda magruluwas asin ipagproklama an saimong tataramon na saindang maipagselyo an batas, asin ipag-andam an mga puso kan saimong mga banal para sa gabos na mga paghuhukom na saimong ipagpapadara, sa saimong kaanggutan, sa mga nag-eerok sa kinaban, nin huli kan saindang mga kalapasan, na tanganing an saimong mga katawohan dae panluluyahan sa aldaw nin kahurasaan.
39 Asin sa arinman na siyudad na an saimong mga surugoon maglalaog, asin an mga katawohan kan siyudad na iyan magresibe kan saindang testimonya, tugutan an saimong katuninongan asin saimong kaligtasan mapasa-siyudad na iyan; na tanganing saindang magkatiripon paluwas sa siyudad na iyan an matatanos, na tanganing sinda makaduman pasiring sa Sion, o sa saiyang mga istaka, an mga lugar kan saimong pinagngaranan, na igwang mga kanta nin daeng katapusang kaogmahan;
40 Asin sagkod na ini mautob, tuguti na an saimong mga paghuhukom dae maghuhulog sa siyudad na iyan.
41 Asin sa arinman na siyudad na an saimong mga surugoon maglalaog, asin an mga katawohan kan siyudad na iyan habong magresibe sa testimonya kan saimong mga surugoon, asin an saimong mga surugoon nagpatanid sainda tanganing iligtas an saindang mga sadire gikan sa maraot na henerasyong ini, tuguti na ini mangyari sa siyudad na ini an uyon sa kaidto na saimong pinagtaram sa paagi kan mga nguso kan saimong mga propeta.
42 Kundi ipagligtas mo, O Jehovah, kami nagsusumamo saimo, an saimong mga surugoon gikan sa saindang mga kamot, asin hugasan sinda gikan sa saindang dugo.
43 O Kagurangnan, kami dae nag-oogma sa kapahamakan kan samuyang kapuwa tawo; an saindang mga kalag presyoso sa atubangan mo;
44 Pero an saimong mga tataramon dapat na mautob. Tabangi an saimong mga surugoon na magtaram, na igwa nin saimong grasya na matabangan sinda: An saimong kagustuhan iyo an mangyari, O Kagurangnan, asin bako an samuya.
45 Kami nakakaaram na ika nakapagtaram sa paagi kan nguso nin saimong mga propeta nin mga teribleng bagay mapanungod sa mga mararaot, sa mga huring aldaw--- na ika magpapaluwas kan saimong mga paghuhukom, nin mayong kasukulan;
46 Kun kaya, O Kagurangnan, iligtas mo an saimong mga katawohan gikan sa kalamidad nin mga mararaot; ipagpagibo mo sa saimong mga surugoon na ipagselyo an batas, asin bugkusan an testimonya, na tanganing sinda magin andam kontra sa aldaw ning pagsusulo.
47 Kami naghahagad saimo, Banal na Ama, na giromdomon sinda na pinagpahale kan mga nag-eerok na yaon sa Jackson County, Missouri, gikan sa kadagaan kan saindang kamanahan, asin baria, O Kagurangnan, ining kagabatan nin kasakitan na ipinagbugtak sa sainda.
48 Ika nakakaaram na gayo, O Kagurangnan, na sinda grabeng pinagdaog-daog asin pinagpasakitan kan mga mararaot na mga tawo; asin an samuyang mga puso nagbubulos nin kamondoan nin huli kan saindang makuniot na mga pinagdadara.
49 O Kagurangnan, gurano baya kahalawig na saimong pagtutugutan ining mga katawohan na magdadara kaining kasakitan, asin an mga kinurahaw kan saindang mga inosenteng mga kaibahan makapagpa-itaas pasiring sa saimong mga talenga, asin an saindang dugo makaabot sa pagtestimonya sa atubangan mo, asin bako an himoon na ipagpahiling an saimong patotoo para sa saindang sadire?
50 Kaheraki, O Kagurangnan, an mga mararaot na mandarambong, na iyo an nagpaharale sa saimong mga katawohan, na tangani baya saindang mauntok na an mangulimbat, na tangani baya saindang pagsusolsolan an saindang mga kasalan kun an pagsosolsol iyo an managboan;
51 Pero kun sinda habo, himoong malantad lugod an saimong takyag, O Kagurangnan, asin tubusa baya idtong saimong pinagngaranan na sarong Sion para sa saimong mga katawohan.
52 Asin kun ini dae mangyayari, na an kausa kan saimong mga katawohan mapuwedeng magpalya sa atubangan mo lugod an saimong kaanggutan masindihan, asin an saimong indignasyon maghuhulog sa sainda, na tanganing sinda mapuwedeng ipagbasura, kaiba an ugat asin sanga, gikan sa irarom nin langit;
53 Pero Habang sinda nagsosolsol, lugod ika magin masuyo asin maherakon, asin ipagrarayo an saimong kaanggutan kunsoarin saimong pinaghihiling an lalawgon kan saimong Pinaglahidan lana.
54 Kaheraki, O Kagurangnan, an gabos na mga nasyon kan kinaban; kaheraki an mga namumuno kan samuyang kadagaan; lugod idtong mga prinsipyo, na honorable asin nobleng pinaglaban, an sinambit na, iyo an konstitusyon kan samuyang kadagaan, sa paagi kan samuyang mga ama, pag-establisaron sagkod pa man.
55 Giromdoma an mga hade, an mga prinsipe, an mga noble, asin an mga darakulang tawo kan kinaban, asin an bilog na mga katawohan, asin an mga Simbahan, an gabos na mga pobre, an mga nangangaipo, asin mga pinagpapasakitan na tawo kan kinaban;
56 Na an saindang mga puso lugod mapalumos kunsoarin an saimong mga surugoon magluluwas gikan sa saimong harong, O Jehovah, tanganing magpapatotoo sa saimong pangaran; na an saindang mga kakundian puwedeng makapagtao nin dalan sa atubangan nin katotoohan, asin an saimong mga katawohan makapagguno nin pabor sa paghilingon kan gabos;
57 Na an gabos na katapusan kan kinaban puwedeng makaaram na kami, an saimong mga surugoon, nakapagdangog kan saimong boses, asin na ika an nagpadara samuya;
58 Na gikan sa pag-iriba kan gabos na ini, an saimong mga surugoon, an mga akeng lalaki ni Jacob, mapuwedeng pagtiriponon an mga matatanos tanganing magtugdok nin sarong banal na siyudad sa saimong pangaran, siring na ika an nagsugo sainda.
59 Kami naghahagad saimo na ipagngaran sa Sion an ibang mga istaka laen pa kaining saro na saimo nang pinagngaranan, na tanganing an pagtitiripon kan saimong mga katawohan magliligid sa dakilang kapangyarihan asin kamahalan, na tanganing an saimong gibo mapuwedeng maipaghidali sa katanosan.
60 Ngonyan ining mga tataramon, O Kagurangnan, samuyang pinagtaram sa atubangan mo, mapanungod sa mga kapahayagan asin mga kasugoan na saimong pinagtao sa samuya, na nabibistong kaiba nin mga Hentil.
61 Pero ika nakakaaram na gayo na ika igwa nin dakulaon na pagkamoot para sa mga kaarakian nin Jacob, na pinagkaralat sa mga kabukidan sa haloy na panahon, sa sarong malumlom asin madiklom na aldaw.
62 Kami baya naghahagad saimo na maherak sa mga kaarakian ni Jacob, na an Jerusalem, magpoon ngonyan na oras, puwedeng magpoon nang pagtutubuson;
63 Asin an kagabatan nin kauripnan mapuwedeng magpoon nang pagbabarion gikan sa harong nin David;
64 Asin an mga kaarakian ni Judah mapuwedeng magpoon nang magbaralik pasiring sa mga kadagaan na saimong ipinagtao ki Abraham, an saindang ama.
65 Asin ipagkausa na an katadaan nin Jacob, na pinagsumpa asin pinaghampak nin huli kan saindang kalapasan, mangyaring pagbag-uhon gikan sa saindang mabangis asin mabagsik na kamugtakan pasiring sa kabilugan kan daeng katapusan na ebanghelyo;
66 Na tanganing saindang maibaba an saindang mga armas nin pagpapabulos nin dugo, asin pag-untukon an saindang mga pagrerebelde.
67 Asin lugod gabos na nagkawaratak-watak na katadaan nin Israel, na pinagpaharale pasiring sa mga katapusan nin kinaban, makamangnong makaaram nin katotoohan, magtubod sa Mesiyas, asin matubos gikan sa kauripnan, asin maogma sa atubangan mo.
68 O Kagurangnan, giromdoma an saimong surugoon, Joseph Smith, Jun., asin an gabos niyang mga kasakitan asin persekusyon--- kun paano siya nakipagtipan ki Jehovah, asin magduko saimo, O Makapangyarihang Diyos ni Jacob--- asin an mga kasugoan na saimong pinagtao sa saiya, asin na siya udok na naghingoha na gibohon an saimong kabut-an.
69 Kaheraki, O Kagurangnan, an saiyang agom asin kaarakian, na sinda maipagbunyi sa saimong presensiya, asin ipreserba sa paagi kan saimong mapagpangalagang kamot.
70 Kaheraki an gabos nindang haraning mga katood, na an saindang mga hinuha lugod mabari asin ipag-anod kaiba nin baha; na sinda puwedeng mabag-o asin matubos kaiba nin Israel, asin makaaram na ika Diyos.
71 Giromdoma, O Kagurangnan, an mga presidente, magin an gabos na mga presidente kan saimong Simbahan, na an saimong toong kamot iyo an magbunyi sainda, kaiba an gabos nindang mga pamilya, asin an saindang haraning mga katood, na tanganing an saindang mga pangaran maipagpabantog asin maipagpadagos sa daeng katapusan na paggigiromdomon gikan sa henerasyong hanggan sa henerasyon.
72 Giromdoma an bilog mong Simbahan, O Kagurangnan, kaiba an bilog nindang pamilya, asin an bilog nindang kamag-anakan, kaiba an bilog nindang may helang asin nagkakasarakitan, kaiba an bilog na kapobrehan asin mahuhuyo kan kinaban; na tangani baya an kahadean, na saimong pinagtugdok na mayong mga kamot, magigin sarong dakulaon na bukid asin minapano sa bilog na kinaban;
73 Na tangani baya na an saimong Simbahan puwedeng magluwas sa kaparangan nin kadikloman, asin magsirang na magaya-gaya siring sa bulan, maliwanag na siring sa saldang, asin terrible siring nin sarong armada na may mga bandera.
74 Asin pag-adornohan siring sa sarong agomon na babae para sa aldaw na iyan kunsoarin saimong paghahawion an belo nin mga langit, asin magkausa sa mga bukid na magluluhod sa saimong atubangan, asin an mga buro-bukid maipaghayag, an mga malubak na lugar mahimong mapinohon; na tanganing an saimong kamurawayan an magpapano kan kinaban;
75 Na tangani na kunsoarin an trumpeta magtatanog para sa mga gadan, kami ipag-aangat sa panginoron tanganing makipaghilingan saimo, an tanganing kami danay na makaibahan an Kagurangnan;
76 Na tangani na an samuyang mga kabadoan magibong puro, na kami mapuwedeng mababadoan nin mga roba nin katanosan, na igwang mga palma sa samuyang mga kamot, asin mga korona nin kamurawayan sa samuyang mga payo, asin mag-ani nin eternal na kaogmahan para sa bilog nyamong mga kasakitan.
77 O Kagurangnang Diyos na Makapangyarihan, dangoga kami sa samuyang mga kahagadan, asin simbaga kami gikan sa langit, an saimong banal na pinag-eerokan, kun saen ika nagtutukaw sa trono, na igwang kamurawayan, honra, kapangyarihan, katalingkasan, kusog, kapamahalaan, katotoohan, hustisya, paghukom, pagkaherak, asin sarong daeng kasagkoran na kapanoan, gikan sa daeng katapusan hanggan sa mayong katapusan.
78 O dangoga, O dangoga, O dangoga kami, O Kagurangnan! Asin simbaga ining mga pinaghahagad, asin akseptaron an pagdudulot kaining harong sa saimo, an gibo kan samuyang mga kamot, na samuyang pinagtugdok para sa saimong pangaran;
79 Asin man ining Simbahan, na ipagbugtak sa ibabaw kaini an saimong pangaran. Asin tabangi kami sa paagi nin kapangyarihan kan saimong Espiritu, na tanganing samuyang maihalo an samuyang mga boses kaiba idtong maliwanagon, naglalaad na mga serapin na nakapalibot sa saimong trono, na nagkukurahaw nin pag-oomaw, nagkakaranta nin Hosanna sa Diyos asin sa Kordero!
80 Asin tuguti an mga ini, an saimong pinaglahiran nin lana na mga tawo, na mapagbadoan nin kaligtasan, an an saimong mga banal magkukurahaw nin makusog para sa kaogmahan. Amen, asin Amen.