Kapahayagan sa pagkasaserdote, na ipinagtao sa paagi ki Joseph Smith an Propeta, sa Kirtland, Ohio, petsado Marso 28, 1835. HS 2:209-217. Sa petsang pinagsambit an Dose naghirilingan sa konseho, nagkurumpisal kan saindang indibidwal na mga kaluyahan asin mga pagkukulang, nagpahayag nin pagsosolsol, asin naghagad nin dagdag giya sa Kagurangnan. Sinda separadong magpapaduman na sa mga misyon sa mga distritong pinagtalagahan. Maski an mga porsiyon kaining seksyon naresibe sa nasambit na petsa, an historikong mga record minapatotoo na an iba pang mga parte pinagresibe sa iba-ibang pagkakataon, an iba kan amay nin Nobyembre 1831.
*******
1-6, Igwa nin duwang mga pagkasaserdote: an Melchizedek asin an Aaroniko; 7-12 , Sinda na nagkakapot nin Pagkasaserdoteng Melchizedek igwa nin kapangyarihan na magpamahala sa gabos na mga opisina sa laog nin Simbahan; 13-17, An bishopric an magpapamahala sa Aaronikong Pagkasaserdote, na minapangasiwa sa panluwas na mga ordinansa; 18-20, An Pagkasaserdoteng Melchizedek na nagkakapot nin mga susi kan bilog na espirituwal na mga bendisyon; an Aaronikong Pagkasaserdote nagkakapot kan mga susi nin pagministeryo nin mga anghel; 21-38, An Enot na Panguluhan, an Dose, asin an Sitenta minabilog kan mga tagapagpamahalang korum, na an mga desisyon paggigibohon sa pagkakasararo asin katanosan; 39-52, an Patriarkang Orden pinag-establisa gikan pa ki Adan hanggan ki Noe; 53-57, An suanoy na mga banal mag-aasembliya sa Adam-Ondi-Ahman, asin an Kagurangnan magpapahiling sa sainda; 58-67, An Dose iyo an magtatalaga kan mga opisyales nin Simbahan sa tama; 68-76, An mga Obispo magsisirbe bilang korum na huwes sa Israel; 77-84, An Enot na Panguluhan asin an Dose minabilog sa pinakahalangkaw na korte sa laog nin Simbahan; 85-100, An mga presidente kan pagkasaserdote iyo an mapamahala sa saindang respektibong mga korum.*******
Igwa sa laog kan simbahan, duwang pagkasaserdote, na iyo an Melchizedek asin Aaroniko, na kaayon an Lebitikong pagkasaserdote.
2 Tadaw ta an enot pinag-apod na Melchizedek na Pagkasaserdote ini nin huli ta si Melchizedek sarong grabe kabantog na Halangkaw na pade.
3 Kaidtong saiyang mga aldaw ini pinag-apod na Banal na Pagkasaserdote, na kauyon sa Orden kan Ake nin Diyos.
4 Pero gikan sa pagrespeto o paggalang sa pangaran kan Supremong Nilalang, sa paglikaw sa pirmeng pag-oro-otro kan saiyang pangaran, sinda, an simbahan, kan suanoy na mga aldaw, pinag-apod ining pagkasaserdote na Melchizedek, o Pagkasaserdoteng Melchizedek.
5 An gabos na ibang awtoridad o mga opisina sa laog nin simbahan iyo an mga kadugangan kaining pagkasaserdote.
6 Pero igwa nin duwang kabangaan o dakulang kapamayuhan--- an saro iyo an Pagkasaserdoteng Melchizedek, asin an saro iyo an Aaroniko o Lebitikong Pagkasaserdote.
7 An opisina nin elder yaon sa irarom kan pagkasaserdoteng Melchizedek.
8An Pagkasaserdoteng Melchizedek nagkakapot nin karapatan sa panguluhan, asin igwang kapangyarihan asin awtoridad sa gabos na mga opisina sa laog kan simbahan sa bilog na kapanahunan kan kinaban, na magpamahala nin mga espirituwal na bagay.
9 An Panguluhan kan Halangkaw na Pagkasaserdote, na yaon sa orden kan Melchizedek, igwa nin karapatan na mag-opisina sa gabos na mga opisina sa laog nin simbahan.
10 An mga Halangkaw na Pade na yaon sa orden nin Pagkasaserdoteng Melchizedek igwa nin karapatan na mag-opisina sa saindang sadireng panindugan, na yaon sa direksiyon kan panguluhan, sa pagpapamahala kan espirituwal na mga bagay, asin man sa opisina kan elder, kan pade (kan lebitikong orden), paratukdo, diyakuno, asin miyembro.
11 An elder igwa nin karapatan na mag-opisina na saiyang karibay sa panahon na an Halangkaw na pade mayo sa presente.
12 An Halangkaw na pade asin elder iyo an magpamahala sa espirituwal na mga bagay, na kauyon sa mga tipan asin kasugoan kan simbahan; asin sinda igwa nin karapatan na mag-opisina sa gabos na ining mga opisina kan simbahan sa panahon na mayong haro-halangkaw na mga awtoridad na presente.
13 An ikaduwang pagkasaserdote iyo an pinag-aapod na an Pagkasaserdoteng Aaroniko, nin huli ta ini ipinag-atang ki Aaron asin sa saiyang mga banhi, sa kagabusan nin bilog nindang mga henerasyon.
14 Kun tadaw ta ini pinag-apod na hababaon na pagkasaserdote nin huli ta ini iyo an kadagdagan sa haro-halangkaw, o an Melchizedek na Pagkasaserdote, asin igwang kapangyarihan na magpamahala sa panluwas na mga ordinansa.
15 An bishopric iyo an panguluhan kaining pagkasaserdote, asin nagkakapot sa mga susi o awtoridad kaini man sana.
16 Mayong tawo na igwang legal na karapatan sa opisinang ini, na magkakapot sa mga susi kaining pagkasaserdote, laen lang na siya sarong literal na kaggikanan ni Aaron.
17 Pero bilang Halangkaw na pade kan Pagkasaserdoteng Melchizedek igwa nin awtoridad na mag-opisina sa gabos na hababaon na mga opisina, siya mapuwedeng mag-opisina sa opisina nin bishop sa panahon na mayong literal na kaggikan ki Aaron an mananagboan, kaya lang siya pinag-apudan asin pinagpalaen asin ordinado sa kapangyarihang ini sa paagi kan mga kamot nin Panguluhan kan Pagkasaserdoteng Melchizedek.
18 An kapangyarihan asin awtoridad kan Halangkaw, o an Pagkasaserdoteng Melchizedek, iyo an nagkakapot nin mga susi kan gabos na espirituwal na mga bendisyon kan simbahan---
19 Na magkaigwa nin pribilihiyo na magresibe kan mga misteryo nin kahadean kan langit, magtugot sa mga langit na buksan para sainda, mag-erok sa heneral na asembliya asin simbahan kan Panganay, asin magdanas sa pakisumaro asin presensiya nin Diyos an Ama, asin ni Jesus na tagapagpatahaw kan bag-ong tipan.
20 An kapangyarihan asin awtoridad kan hababaon, o an Aaronikong Pagkasaserdote, iyo an nagkakapot nin mga susi sa pagministeryo nin mga anghel, asin sa pagpapamahala kan panluwas na mga ordinansa, sa letra kan ebanghelyo, sa pagbubunyag nin pagsusolsol para sa kapatawaran nin mga kasalan, na kauyon sa mga tipan asin mga kasugoan.
21 Kun kinakaipuhan igwa nin mga presidente, o pangenot na mga opisyales na minatalubo gikan sa, o pinagtalaga sa, o gikan sa pag-iriba ninda na ordinado para sa iba-ibang mga opisina kaining duwang pagkasaserdote.
22 Sa Melchizedek na Pagkasaserdote, tulong Pangenot na Halangkaw na mga Pade, pinili sa kagabsan, pinagtalaga asin ordinado sa opisinang ini, asin pinagpakusog sa paagi nin kumpiyansa, pagtubod, asin pangadyeon kan simbahan, iyo an minabilog kan korum nin Panguluhan kan Simbahan.
23 An doseng parabiyaheng mga konsehal, iyo an pinag-apod na magin Doseng Apostoles, o espesyal na mga saksi sa pangaran ni Cristo sa bilog na mundo--- kaya naiiba sa ibang mga opisyales kan simbahan sa mga katalagahan kan saindang kapangapudan.
24 Asin sinda an minabilog nin sarong korum, kapantay sa awtoridad asin kapangyarihan sa tulong mga presidente na dati nang pinagsambit.
25 An Sitenta pinag-apod man sa pababalangibog nin ebanghelyo, asin magin mga espesyal na saksi para sa mga Hentil asin sa bilog na mundo--- kaya naiiba sa ibang mga opisyales nin simbahan sa mga katalagahan nin saindang kapangapudan.
26 Asin sinda minabilog nin sarong korum, kapantay sa awtoridad na igwa an Doseng espesyal na mga saksi o Apostoles na pinagngaranan.
27 Asin an lambang desisyon na pinaghimo sa paagi kan maski sa arinman kaining mga korum kaipuhan na magin pinagkasararoang boses ninda; na iyo ini, an lambang miyembro sa kada korum kaipuhan na mag-uyon sa mga desisyon, na tanganing mahimo na an saindang mga desisyon magkaigwa nin kaparehong kapangyarihan o kakusgan kan saro sa pag-iriba kan iba---
28 An mayoriya minabilog nin sarong korum kunsoarin an mga sirkumstansiya kun dae maipagtugot nin mga pangyayari an iba pa---
29 Laen lang kun ini iyo an kaso, an saindang mga desisyon mayong karapatan sa kaparehong bendisyon na yaon sa mga desisyon nin korum kan tulong presidente kaidtong suanoy, na pinag-ordinahan sa orden na Melchizedek, asin matatanos asin banal na mga tawo.
30 An mga desisyon kaining mga korum, o maski arin sainda, dapat na paghimoon sa bilog na katanosan, sa kabanalan, asin kapakumbabaan nin puso, sa kahuyoan asin halawig na pagkamatinios, asin sa pagtubod, asin sa kabootan, asin sa kaaraman, kahinahunan, pasensiya, pagkamaka-diyos, magturugang na pagkamaherakon asin pagkamatinabangon;
31 Nin huli ta an promise iyo ini, kun an mga bagay na ini nanananggana sa sainda sinda dae magigin bakong mabinunga sa kaaraman nin Kagurangnan.
32 Asin enkaso na an anuman na desisyon kaining mga korum pinaghimo na bakong sa katanosan, ini mapuwedeng darahon sa atubangan nin heneral na asembliya kan nagkapira pang mga korum, na iyo an minabilog kan espirituwal na mga awtoridad kan simbahan; ta kun bako dae magkakaigwa nin apila gikan sa saindang desisyon.
33 An Dose iyo an sarong Nagbibiyaheng Namumunong Halangkaw na Konseho, na mapamahala sa pangaran nin Kagurangnan, na yaon sa irarom kan direksiyon nin Panguluhan kan Simbahan, na kauyon sa institusyon nin langit; tanganing ipagtugdok an simbahan, asin pagpangalagaan an bilog na mga gibohon kaini sa gabos na mga nasyon, enot sa mga Hentil asin panduwa sa mga Hudiyo.
34 An Sitenta iyo an magigibo sa pangaran nin Kagurangnan, na yaon sa irarom kan direksiyon nin Dose o an nagbibiyaheng Halangkaw na konseho, sa pagtutugdok kan simbahan asin sa pagpapangalaga kan gabos na mga gibohon kaini sa gabos na mga nasyon, enot sa mga Hentil asin an sunod sa mga Hudiyo;
35 An Dose bilang ipinagpadara, nagkakapot nin mga susi, tanganing bukasan an pintuan sa paagi nin proklamasyon kan ebanghelyo ni JesuCristo, asin enot sa mga Hentil asin an sunod sa mga Hudiyo.
36 An minatindog na Halangkaw na mga konseho, na yaon sa mga istaka nin Sion, minabilog na sarong korum kapantay an awtoridad sa mga gibohon kan simbahan, sa gabos nindang mga desisyon, sa korum nin panguluhan, o sa nagbibiyaheng Halangkaw na konseho.
37 An Halangkaw na konseho nin Sion minabilog nin sarong korum na kapantay an awtoridad sa mga gibohon kan simbahan, sa gabos nindang mga desisyon, sa mga konseho kan Dose na yaon sa mga istaka nin Sion.
38 Ini iyo an katungkulan kan nagbibiyaheng Halangkaw na konseho tanganing pangapudan an Sitenta, kunsoaring sinda nangangaipo nin tabang, tanganing panoan an nagkapirang mga kapangapudan para sa pagbabalangibog asin pagpapamahala sa ebanghelyo, embes na an iba pa.
39 Ini iyo an katungkulan kan Dose, sa gabos na mga darakulang mga sanga kan simbahan, tanganing mag-ordina kan mga ebanghelikong mga ministro, bilang sinda magigin designado sa sainda sa paagi nin Kapahayagan---
40 An orden kaining pagkasaserdote pinagkumpirma na magigin maipagpamana gikan sa ama pasiring sa akeng lalake, asin tunay na kapangaputan nin mga literal na kapag-arakian kan mga piniling banhi, na saiya an mga promisang pinaghimo.
41 Ining orden pinagbilog sa mga aldaw ni Adan, asin pinagpamana sa paagi nin lihera sa minasunod na manera:
42 Gikan ki Adan pasiring ki Seth, na pinag-ordinahan ni Adan na yaon sa edad na saisyenta asin siyam na taon, asin pinagbendisyunan niya tulong taon an nakaagi kan saiyang (Adan) kagadanan, asin nagresibe kan promise nin Diyos sa paagi kan saiyang ama, na an saiyang kamakoapoan iyo an magigin mga pinili nin Kagurangnan, asin na sinda an magigin preserbado hanggan sa katapusan nin kinaban;
43 Nin huli ta siya (Seth) sarong perpektong tawo, asin an saiyang kawangisan iyo man na gayo an kawangisan kan saiyang ama, na tangani baya na siya garong kaparehong gayo kan saiyang ama sa gabos na mga bagay, asin puwede siyang mabisto na laen saiya sa paagi sana kan saiyang edad.
44 Si Enos pinag-ordinahan sa edad na sanggatos asin treynta asin apat na taon asin apat na bulan, sa paagi nin kamot ni Adan.
45 An Diyos pinagpangapudan si Cainan na yaon sa kaparangan sa ika-kuwarentang taon kan saiyang edad; asin saiyang naka-atubang si Adan na nagbibiyahe pasiring sa lugar na Shedolamak. Siya otsenta asin pitong taon an edad kan siya magresibe kan saiyang ordinasyon.
46 Si Mahalaleel may kuwatro siyentos asin nobenta asin anom na taon asin pitong aldaw an edad kan siya pinag-ordinahan sa paagi nin kamot ni Adan, na iyo man an nagbendisyon saiya.
47 Si Jared may dos siyentos na taon an edad kan siya pinag-ordinahan sa irarom kan kamot ni Adan, na iyo man an nagbendisyon saiya.
48 Si Enoch may beynte singkong taon an edad kan siya pinag-ordinahan sa irarom kan kamot ni Adan; asin siya saisyenta asin lima asin si Adan nagbendisyon saiya.
49 Asin saiyang nahiling an Kagurangnan, asin siya naglakaw kaiba niya, asin dagos na kaatubangan niya; asin siya naglakaw kaiba an Diyos sa laog nin tres siyentos asin saisyenta asin limang taon, na naghihimo saiyang kuwatro siyentos asin treyntang taon an edad kunsoaring siya pinagbag-o an kamugtakan.
50 si Methuselah may sanggatos an edad kan siya pinag-ordinahan sa irarom nin kamot ni Adan.
51 Si Lamech may treynta asin duwang taon an edad kan siya pinag-ordinahan sa irarom nin kamot ni Seth.
52 Si Noah may sampulong taon an edad kan siya pinag-ordinahan sa irarom nin kamot ni Methuselah.
53 Tulong taon an nakaagi bago an kagadanan nin Adan, saiyang pinag-apudan si Seth, Enos, Cainan, Mahalaleel, Jared, Enoch, asin Methuselah, na gabos mga haralangkaw na pade, kaiba an katadaan kan saiyang kamakoapoan na mga matatanos, sa bukid na Adam-Ondi-Ahman, asin duman pinagputong sa sainda an saiyang huring bendisyon.
54 Asin an Kagurangnan nagpahiling sa sainda, asin sinda nagburuhat asin pinagbendisyunan si Adan, asin pinag-apod siyang Michael, an prinsipe, an arkanghel.
55 Asin an Kagurangnan nagpamahala nin paglinga ki Adan, asin nagsabi sa saiya: Ako an nagpamugtak saimo na magin yaon sa pamayuhan; sarong kadaklan nin mga nasyon an maggikan saimo, asin ika sarong prinsipe na mangingibabaw sainda sagkod pa man.
56 Asin si Adan nagtindog sa katahawan kan kongregasyon; asin, maski na ngani siya pinaggurang na nin edad, may kapanoan kan Banal na Espiritu, naghula nin anuman na mangyayari kan saiyang kamakoapoan sagkod sa pinakahuring henerasyon.
57 Ining mga bagay gabos nakasurat sa libro ni Enoch, asin iyo an magigin ipagpapatotoo sa tamang panahon.
58 Ini iyo an katungkulan man kan Dose, na mag-ordina asin magpamugtak sa tama an gabos na mga ibang opisyales kan simbahan, na kauyon sa Kapahayagan na nagsasabi:
59 Sa simbahan ni Cristo na yaon sa kadagaan nin Sion, sa kadagdagan sa mga pansimbahang batas na naggagalang sa pansimbahang gibohon---
60 Katotohanan, Ako nagsasabi sa saindo, nagsabi an Kagurangnan nin mga Hukbo, dapat na magkakaigwa nin tagapagpamahalang mga elder tanganing magpamahala sainda na yaon sa irarom kan opisina nin sarong elder;
61 Asin man an mga pade tanganing magpamahala sainda na yaon sa irarom kan opisina nin sarong pade;
62 Asin man mga paratukdo tanganing magpamahala sainda na yaon sa irarom kan opisina nin sarong paratukdo, sa kaparehong manera, asin man sa mga diyakuno---
63 Kumbaya, gikan sa diyakuno hanggan sa paratukdo, asin gikan sa paratukdo hanggan sa pade, asin gikan sa pade hanggan sa elder, kaniya-kaniya siring sa pagkatalaga sainda, uyon sa mga tipan asin mga kasugoan kan simbahan.
64 Kasunod an pag-abot sa Halangkaw na Pagkasaserdote, na iyo an pinakadakula sa gabos.
65 Kumbaya, ini kinakaipuhang gayo na magin an saro na pinagtalaga sa Halangkaw na Pagkasaserdote na magpamahala sa pagkasaserdote, asin siya pag-apudon na magin Presidente kan Halangkaw na Pagkasaserdote kan Simbahan;
66 O, sa ibang tataramon, an Tagapagpamahalang Halangkaw na Pade na mangingibabaw sa Halangkaw na Pagkasaserdote kan Simbahan;
67 Gikan kaini iyo an pagpapamahala kan mga ordinansa asin mga bendisyon sa laog nin simbahan, sa paagi nin pagpapatong kan mga kamot.
68 Kumbaya, an opisina nin sarong bishop bakong kapantay kaini; nin huli ta an opisina kan sarong bishop iyo an pagpapamahala nin gabos na mga temporal na mga bagay;
69 Daeng pagkukulang na an sarong bishop kinakaipuhan na pagpipilion gikan sa Halangkaw na Pagkasaserdote, laen lang kun siya sarong literal na kapag-arakian ni Aaron;
70 Nin huli ta laen lang kun siya sarong literal na kapag-arakian ni Aaron siya dae makakapagkapot nin mga susi kan pagkasaserdoteng ini.
71 Daeng pagkukulang, an sarong Halangkaw na pade, iyo ini, na yaon sa orden nin Melchizedek, mapuwedeng ipagpalaen sa pagministeryo kan temporal na mga bagay, na igwang sarong kaaraman sainda sa paagi kan Espiritu nin katotoohan;
72 Asin man an magin sarong hukom nin Israel, na gibohon an mga bisnis kan simbahan, na magtutukaw sa paghuhukom sa mga paralapas na uyon sa testimonya habang ini ipinagbuboyboy sa atubangan niya uyon sa mga batas, sa paagi nin tabang kan saiyang mga tagapayo, na saiyang pinili o pagpipilion sa pag-iriba nin mga elder kan simbahan.
73 Iyo ini an katungkulan nin sarong bishop na bakong literal na kapag-arakian ni Aaron, pero pinag-ordinahan sa Halangkaw na Pagkasaserdote na uyon sa orden nin Melchizedek.
74 Kaya siya magigin sarong hukom, magin sarong kumon na hukom sa pag-iriba kan mga namamanwaan nin Sion, o sa laog nin istaka nin Sion, o sa ibang sangay kan simbahan na kun saen siya ipagpapalaen sa ministeryong ini, sagkod na an mga kasagkodan nin Sion mapadakula asin ini magigin kinakaipuhanan na magkakaigwa nin ibang mga bishop o mga hukom sa Sion o saen man.
75 Asin habang nagkakaigwa nin ibang bishop na pinagtatalaga sinda magigibo sa laog na kaparehong opisina.
76 Pero an sarong tunay na kamakoapoan ni Aaron an igwang legal na karapatan sa panguluhan kaining pagkasaserdote, sa mga susi kaining ministeryo, tanganing humiro sa laog kan opisina nin bishop na independente, na mayong mga tagapagpayo, laen lang sa kaso na kun saen an Pangulo kan Halangkaw na Pagkasaserdote, na kaayon sa orden nin Melchizedek, pinagsubok, tanganing magtukaw bilang sarong huwes nin Israel.
77Asin an desisyon kan arinman kaining mga konseho, na nakakauyon sa kasugoan na nagsasabi:
78 Giraray, katotohanan, Ako nagsasabi sa saindo, an pinaka-importanteng bisnis kan simbahan, asin an pinakamasakit na mga kaso kan simbahan, habang ini mayo pang kapusugan sa desisyon kan bishop o mga huwes, ini dapat na ipagtatao asin ipagpapadara pasiring sa konseho kan simbahan, sa atubangan nin Panguluhan kan Halangkaw na Pagkasaserdote.
79 Asin an Panguluhan kan konseho nin Halangkaw na Pagkasaserdote magkakaigwa nin kapangyarihan na mag-aapod nin ibang Halangkaw na mga pade, iyo ngani an dose, tanganing magtabang bilang mga tagapagpayo; asin kaya an Panguluhan nin Halangkaw na Pagkasaserdote asin an mga tagapagpayo kaini magkakaigwa nin kapangyarihan na magdesisyon.
80 Asin pagkatapos kaining desisyon ini dae na magigiromdoman sa atubangan nin Kagurangnan; nin huli ta iyo ini an pinakahalangkaw na konseho kan simbahan nin Diyos, asin an sarong tapos nang desisyon sa mga kontrobersiya kan espirituwal na mga bagay.
81 Mayo nin siisay man na tawo na kaayon sa simbahan na ipagpapalaen sa konsehong ini kan simbahan.
82 Asin habang an Pangulo kan Halangkaw na Pagkasaserdote nakapaglapas, siya pagpapagiromdomon sa atubangan nin kumon na konseho kan simbahan, na pagtatabangan kan doseng mga tagapagpayo kan Halangkaw na Pagkasaserdote;
83 Asin an saindang desisyon kan saiyang payo iyo an magigin katapusan kan kontrobersiyang mapanunungod sa saiya.
84 Kaya, mayong ipagpapalaen gikan sa hustisya asin mga batas nin Diyos, na tanganing an gabos na mga bagay mapuwedeng maggibo sa kahustuhan asin kabanalan sa atubangan niya, na uyon sa katotoohan asin katanosan.
85 Asin giraray, katotohanan Ako nagsasabi sa saindo, an katungkulan nin sarong presidente na yaon sa opisina nin diyakuno iyo an magpapamahala sa doseng mga diyakuno, tanganing magtukaw na konseho kaiba ninda, asin tanganing tukdoan sinda kan saindang katungkulan, magpapakusog sa lambang saro, siring na ini pinagtao uyon sa mga tipan.
86 Asin man an katungkulan kan presidente na yaon sa opisina kan mga paratukdo iyo an magpapamahala sa beynte kuwatrong mga paratukdo, asin magtutukaw na konseho kaiba ninda, pagtutukdoan sinda nin mga katungkulan kan saindang opisina, siring sa pinagtao sa mga tipan.
87 Asin man an katungkulan kan presidente sa Pagkasaserdoteng Aaron iyo an magpapamahala sa kuwarenta asin walong mga pade, asin magtukaw na konseho kaiba ninda, pagtukdoan sinda nin mga katungkulan kan saindang mga opisina, na siring sa pinagtao sa mga tipan---
88 Ining presidente iyo an magigin sarong bishop; nin huli ta iyo ini an saro sa mga katungkulan kaining pagkasaserdote.
89 Giraray, an katungkulan kan presidente sa opisina nin mga elders iyo an magpapamahala sa nobenta asin anom na mga elders, asin magtutukaw na konseho kaiban ninda, asin pagtukdoan sinda na uyon sa mga tipan.
90 Ining panguluhan iyo an pinagpalaeng saro gikan saining Sitenta, asin pinagdesinyo para sainda na dae nagbibiyahe pasiring sa bilog na mundo.
91 Asin giraray, an katungkulan kan Presidente kan opisina nin Halangkaw na Pagkasaserdote iyo an magpapamahala sa bilog na simbahan, asin na magin kaagid ki Moises---
92 Hilnga, uyan an kadunungan; iyo, an magin sarong tagakita, sarong tagapagpamahayag, sarong tagapagsalin, asin sarong propeta, na igwa nin gabos na mga regalo nin Diyos na saiyang ipinagputong sa pamayo kan simbahan.
93 Asin ini uyon sa pangitain na nagpapahiling sa orden kan Sitenta, na sinda dapat na magkakaigwa nin pitong presidente na magpapamahala sainda, pinagpili gikan sa bilang kan Sitenta;
94 Asin an ikapitong presidente kaining mga presidente iyo an magpapamahala sa anom;
95 Asin ining pitong presidente an magpipili kan ibang Sitenta laen pa sa enot na Sitenta kun saen sinda kabilang, asin iyo an magpapamahala sa sainda;
96 Asin man an ibang Sitenta, hanggan sa an pito multiplikaron sa Sitenta, kun an trabaho sa ubasan nagpapangaipo kaini.
97 Asin ining Sitenta iyo an magigin nagbibiyaheng mga ministro, pasiring sa mga Hentil enot asin man sa mga Hudiyo.
98 Na kun saen baya an ibang mga opisyales kan simbahan, na kabilang pero bakong kaayon sa Dose, ni sa Sitenta, bakong yaon sa irarom nin responsibilidad na magbiyahe pasiring sa gabos na mga nasyon, kundi magbibiyahe sana kun an saindang sirkumstansiya magtutugot, maski na ngani sinda puwedeng magkakapot bilang Halangkaw asin responsableng mga opisina sa simbahan.
99 Kumbaya, ngonyan tugutan na an lambang tawo makanuod kan saindang katungkulan, asin magtrabaho sa opisina kun saen siya pinagngaranan, sa bilog na kaigotan.
100 Siya na sarong hugakon dae ipagbibilang na maninigong magtindog, asin siya na dae nakanuod kan saiyang katungkulan asin magpapahiling kan saiyang sadire na bakong aprubado dae ipagbibilang na maninigong magtindog. Arog kaini. Amen.
