SEKSYON 19

Kapahayagan na ipinagtao sa paagi ni Joseph Smith,sa Manchester, New York, Marso 1830. HS 1:72-74. Sa saiyang kasaysayan an Propeta nagpahayag kaini bilang “an kasugoan nin Diyos asin bakong sa tawo, ki Martin Harris, pinagtao niya na iyo an Eternal.”

*******

1-3, Si Cristo igwa nin bilog na kapangyarihan; 4-5, an gabos na mga tawo kaipuhan na magsosolsol o magsakit; 6-12, an daeng katapusan na kapadusahan iyo an padusa nin Diyos; 13-20, Si Cristo nagsakit para sa gabos, na tanganing sinda mapupuwedeng dae magsapo kun sinda magsosolsol; 21-28, Magbalangibog kan ebanghelyo nin pagsosolsol; 29-41, Madeklara nin maogmahon na mga bareta.

*******

Ako an Alpha asin an Omega, an Cristo na Kagurangnan; iyo, Ako iyo Siya, an kapinunan asin an katapusan, an Paratubos kan kinaban.
2 Ako, matapos na maggibo asin mautob an kagustuhan niya para sa sakuya, magin iyo ngani an Ama, mapanungod sakuya
–-- matapos na naggibo ko ini na tanganing maipamugtak an gabos na mga bagay sa kapamahalaan ko---
3 Pinapangaputan an bilog na kapangyarihan, magin sa pagkadestroso ni Satanas asin an saiyang mga gibo sa katapusan kan kinaban, asin an huring dakulaon na kaaldawan nin paghuhuko, na Ako an magpapaagi sa mga nag-eerok kaini, paghuhukuman an lambang tawo uyon sa saiyang mga gibo asin an mga marahayon na kaggibohan na saiyang naggibo.
4 Asin segurado na sa lambang tawo kaipuhan na magsolsol o magsakit, nin huli ta Ako, sarong Diyos, iyo an daeng katapusan.
5 Kun baya, Ako dae nagbabag-o nin mga paghuhukom na sakuyang pinagpapasar, kundi an mga kakundian magpapadagos, an paghihibi, an pagtatangis asin an pagrag-ot nin mga ngipon, iyo, para sa sainda na mananagboan sa may walang parte kan kamot ko.
6 Daeng pagkukulang, dae nasusurat na dae na magkakaigwa nin katapusan ining pagdusa, kundi ini nasusurat na daeng katapusan na pagdusa.
7 Giraray, ini nasusurat na daeng kasagkoran na pagkahamak; kun baya, ini mas pang pinagsasambit kesa sa ibang mga kasuratan; na tanganing ini baya mapupuwedeng matrabaho sa mga puso kan mga kaarakian nin mga tawo, an gabos pinagsarong gayo para sa sakuyang kamurawayan sa pangaran.
8 Kun baya, Ako magpapaliwanag sa saimo kan misteryong ini, nin huli ta ini maninigo sa saimo na makaaram na siring kan sakuyang mga apostoles.
9 Ako nagtataram sa saimo na pinili sa bagay na ini, magin solo, na tanganing ika makalaog pasiring sa sakuyang kapahingaloan.
10 Nin huli ta, hilnga, an misteryo nin kabanalan, grabeng gayo kadakula ini! Nin huli ta, hilnga, Ako daeng katapusan, asin an kapadusahan na ipinagtatao gikan sa sakuyang kamot iyo an daeng katapusan na kapadusahan, nin huli ta Daeng Katapusan iyo an sakuyang pangaran. Kun baya---
11 Daeng kasagkorang kapadusahan iyo an kapadusahan nin Diyos.
12 Daeng katapusang kapadusahan iyo an kapadusahan nin Diyos.
13 Kun baya, Ako nagsusugo saimo na magsolsol, asin magsunod sa mga kasugoan na saimong naresibe sa paagi kan kamot kan sakuyang surugoon na si Joseph Smith, Jun., sa sakuyang pangaran;
14 Asin ini sa paagi kan sakuyang bilog na kusog na kapangyarihan na saimong naresibe sinda;
15 Kun kaya Ako nagsusugo saimo na magsolsol--- Magsolsol, ta baka Ako an magpakol saimo sa paagi kan pamakol kan sakuyang nguso, asin sa paagi kan sakuyang isog, asin sa paagi kan sakuyang kaanggutan, asin an saimong mga kasakitan magin manganaon--- kun gurano kagrabe dae mo maaaraman, kun gurano kapulido dae mo maaaraman, iyo, kun gurano mo makakayanan dae mo maaaraman.
16 Nin huli ta hilnga, Ako, Diyos, nagsapo man kaining mga bagay para sa gabos, na tanganing sinda dae na magsasakit pa kun sinda magsolsol;
17 Pero kun sinda dae nanggad magsosolsol sinda kaipuhan na magsakit na siring ko man;
18 Na an kasakitan nagkausa sakuya, magin an Diyos, an pinakahalangkaw sa gabos, na mangubog-kubog nin huli sa kulog, asin magdugo sa lambang labot kan kublit, asin magsakit pareho sa hawak asin espiritu--- asin nagmawot na tanganing Ako dae mapupuwedeng mag-inom sa kopa nin kapitan, asin panluyahan---
19 Daeng pagkukulang, an kamurawayan mapasa-Ama, asin ako nag-inom asin pinagtapos an sakuyang mga preparasyon para sa mga kaarakian nin mga tawo.
20 Kun baya, Ako nagsusugo saimo giraray na magsolsol, na bako Ako an maghimo na magpakumbaba ka sa paagi kan sakuyang bilog na kapangyarihan; asin na tanganing ika magkumpisal kan saimong mga kasalan, na baka ika magsapo kaining mga kapadusahan na sakuya nang pinagsabi, na kun saen an pinakasadit, iyo, magin sa pinakasadit na grado saimong mananamitan sa oras na sakuya nang paghaleon an sakuyang Espiritu.
21 Asin Ako nagsusugo saimo na mayo kang ipagbabalangibog kundi an pagsosolsol, asin dae mo ipagpapahiling an mga bagay na ini sa kinaban sagkod na ini kadunungan sa sakuya.
22 Nin huli ta sinda dae pa makayanan sa ngonyan an karne, kundi gatas nguna an saindang puwedeng pagreresibihon; kun baya, sinda kaipong dae pa dapat na makaaram kaining mga bagay, ta baka baga sinda magkakaparara.
23 Makanuod ka sakuya, asin maghinanyog sa sakuyang mga tataramon; maglakaw ka sa kahuyoan kan sakuyang Espiritu, asin ika magkakaigwa nin katuninongan sa sakuya.
24 Ako si JesuCristo; Ako nag-abot sa kagustuhan kan Ama, asin Ako naggigibo kan saiyang kagustuhan.
25 Asin giraray, Ako nagsusugo sa saimo na dae mo na pag-ibugan an agom kan saimong kapwa; ni pagmawoton na hamakon an buhay kan saimong kapwa.
26 Asin giraray, Ako nagsusugo saimo na dae mo ipagkait an pagsadire mo, kundi iparte mo ining libre para sa pagpapa-imprinta kan Libro ni Mormon, na naglalaman nin katotoohan asin tataramon nin Diyos---
27 Na iyo ngani an sakuyang tataramon sa mga Hentil, na sa dae mahahaloy mapapaduman sa mga Hudiyo, na sa sainda ang mga Lamanita iyo an sarong katadaan, na sinda mapupuwedeng maniwala sa ebanghelyo, asin dae na maghahanap pa nin sarong Mesiyas na mag-abot pa na iyo na ngani si nag-abot na.
28 Asin giraray, Ako nagsusugo sa saimo na magpapangadye ka sa boses siring man naggigikan sa saimong puso; iyo, sa atubangan nin kinaban siring man sa sikreto, sa atubangan nin publiko siring man sa pribado.
29 Asin ikaw magdedeklara nin maogmahon na bareta, iyo, asin ipagpupublikar mo ini sa ibabaw nin mga bukid, asin sa lambang halangkawon na lugar, asin sa pag-iriba nin lambang katawohan naika pinagtutugutan na makipag-olay.
30 Asin saimong gigibohon ini sa bilog na kapakumbabaan, magtiwala sakuya, dae mangantiyaw laban sa mga parakantiyaw.
31 Asin an mga doktrina dae mo pagtutukaron, kund ika magdedeklara sana nin pagsosolsol asin pagtubod sa Paratubos, asin kapatawaran nin mga kasalan sa paagi nin pagbubunyag, asin sa paagi nin kalayo, iyo, magin sa Banal na Espiritu.
32 Hilnga, iyo ini an sarong halangkaw asin an huring kasugoan na sakuyang ipagtatao sa saimo mapanungod sa bagay na ini; nin huli ta ini magigin maninigo para sa aro-aldaw mong paglalakaw, magin sagkod sa katapusan kan saimong buhay.
33 Asin an pagtios saimong mareresibe kun saimong ipagbalewala ining mga pagpapagiromdom, iyo, magin sagkod sa ikapagpahamak kan saimong sadire asin pagsadire.
34 Ipanao mo an sarong parte kan saimong pagsadire, iyo, magin sarong parte kan saimong mga kadagaan, asin an gabos laen lang idtong ipagsusuporta sa saimong pamilya.
35 Bayadan mo an utang na saimong pinagkontrata sa para-imprinta. Buhian mo an sadire mo gikan sa pagkasakop.
36 Bayaan mo an saimong harong asin pinag-eerokan, laen lang kun ika nagmamawot pa na maghiling sa saimong pamilya;
37 Asin magtaram kang libre sa kagabsan; iyo, magbalangibog, magpagiromdom, ideklara an katotoohan, magin ini sa sarong dakulaon na boses, na igwang tunog nin kaogmahan, na nagkukurahaw--- Hosanna, hosanna, pagbendisyunan man lugod an pangaran nin Kagurangnang Diyos!
38 Magpangadye kang pirme, asin Ako an magpapabulos kan sakuyang Espiritu sa saimo, asin dakulaong gayo an saimong biyaya--- iyo, magin sobra pa sa kun ika nagkamit kuta na nin mga kayamanan sa kinaban asin kalapaan na katumbas kaini.
39 Hilnga, pinagbasa mo daw ini na mayo kang pag-oomaw asin pagpapalangkaw sa saimong puso para magin maogmahon?
40 O makakapagdalagan ka daw nin halawigon siring sa sarong bulag na giya?
41 O ikaw daw magin sarong mapagpakumbaba asin mahuyoon, asin gumibo sa sadire na may kadunungan sa atubangan ko? Iyo, magdulok ka sakuya na iyo an saimong Paraligtas. Amen.

SEKSYON 18

Kapahayagan ki Joseph Smith an Propeta, Oliver Cowdery, asin David Whitmer, na ipinagtao sa Fayette, New York, Hunyo 1829. HS 1:60-64. Kan an Aaronikong Pagkasaserdote ipinaggawad, ang paggawad man kan Melchizedek na Pagkasaserdote ipinagpromisa. Hilingon ang Pamayuhan kan Seksyon 13. Bilang kasimbagan sa pagngangayo-ngayo para sa kaaraman kan bagay na ini, an Kagurangnan an nagtao kaining kapahayagan.

*******

1-5, An mga eskritura nagpapahiling kun paano patitindugon an simbahan; 6-8, An kinaban naghihinog na sa kadaendatahan; 9-16, an kahalagahan nin mga kalag dakulaon; 17-25, Tanganing makaguno nin kaligtasan, an mga tawo kaipong gayo na darahon sa saindang mga sadire an pangaran ni Cristo; 26-36, An pangapudan asin misyon kan Dose ipinagpahayag; 37-39, Oliver Cowdery asin David Whitmer iyo an maghahanap kan Dose; 40-47, Tanganing makaguno nin kaligtasan, an mga tawo kaipuhang magsosolsol, magpabunyag, asin magsunod sa mga kasugoan.

*******

Ngonyan, hilnga, nin huli kan bagay na ika, an sakuyang surugoon na si Oliver Cowdery, nagmamawot na makaaram sa sako, Ako magtatao sa saimong kaining mga tataramon:
2 Hilnga, Ako nagmanipesto sa saimo, sa paagi kan sakuyang Espiritu sa kadakul na mga paagi, na an mga bagay na saimong pinagsusurat totoo; kun baya ika nakakaaram na sinda totoo.
3 Asin kun ika nakakaaram na sinda totoo, hilnga, Ako magtatao sa saimo nin sarong kasugoan, na ika magsandig sa mga bagay na nasusurat na;
4 Nin huli ta sa sainda iyo na an gabos na mga bagay na naisurat na manunungod sa pundasyon kan sakuyang simbahah, kan sakuyang ebanghelyo, asin kan sakuyang gapo.
5 Kun baya, kun saimong itutugdok an sakuyang simbahan, sa ibabaw kan pundasyon nin sakuyang ebanghelyo asin nin sakuyang gapo, an mga pintuan nin impiyerno dae nanggad makakatagal kontra saimo.
6 Hilnga, an kinaban naghihinog na sa kadaendatahan; asin ini kinakaipuhang gayo na an mga kaarakian nin mga tawo mahikayat pasiring sa pagsosolsol, pareho an mga Hentil asin man an harong nin Israel.
7 Kun baya, habang ikang gayo pinagbunyagan sa paagi kan mga kamot kan sakuyang surugoon na si Joseph Smith, Jun., na uyon sa bagay na sakuyang pinagsusugo saiya, saiyang pinag-utob na an bagay na Ako an nagsusugo saiya.
8 Asin ngonyan, dae ka magngangalas na Ako an nag-apud saiya, para sa sakuyang sadireng katuyuhan, na an katuyuhan na ini minagikan mismo sa sakuya; kun baya, kun siya magigin maurop sa pagsusunod kan sakuyang kasugoan siya pagbebendisyunan nin daeng kasagkoran na buhay; asin an saiyang pangaran iyo si Joseph.
9 Asin ngonyan, Oliver Cowdery, Ako nagtataram sa saimo, asin man ki David Whitmer, sa paagi nin kasugoan; nin huli ta hilnga, Ako nagsusugo sa gabos na mga tawo kun saen man sinda na magsolsol, asin Ako nagtataram sa saimo, na siring man ki Paul na sakuyang apostol, nin huli ta ika pinapangapudan man sa kaparehong pangapudan saen siya pinag-apudan.
10 Giromdoma na an halaga nin mga kalag dakulaon sa paghiling nin Diyos;
11 Nin huli ta, hilnga, an Kagurangnan na saimong Paratubos nagsakit nin kagadanan sa laman; kun baya siya nagsakit nin kulog kan gabos na mga tawo, na tanganing an gabos na mga tawo makapaggibong magsolsol asin magdulok sa saiya.
12 Asin siya nagbuhat giraray gikan sa gadan, na tanganing saiyang madadara an gabos na mga tawo sa saiya, sa mga kondisyon na magsosolsol.
13 Asin gurano daw kadakula an saiyang kaogmahan sa kalag na nagsosolsol!
14 Kun baya, ika pinag-aapudan na magbalangibog nin pagsosolsol kaining mga katawohan.
15 Asin kun ini nanggad mangyayari na ika dapat na maggigibo sa bilog mong mga aldaw na nagbabalangibog nin pagsosolsol kaining mga katawohan, asin magdara, na magliligtas nin sarong kalag para sa sakuya, gurano daw kadakula an magigin kaogmahan mo na kaiba niya sa kahadean kan sakuyang Ama!
16 Asin ngonyan, kun an saimong kaogmahan magigin dakulaon sa sarong kalag na saimong pinagdara sa sakuya sa laog nin kahadean kan sakuyang Ama, gurano daw kadakula an magigin kaogmahan mo kun ika makapagdara nin kadakulon na mga kalag sa sakuya!
17 Hilnga, ika igwa na nin sakuyang ebanghelyo sa atubangan mo, asin kan sakuyang gapo, asin kan sakuyang kaligtasan.
18 Maghagad ka sa Ama sa sakuyang pangaran, sa pagtubod naniniwala sa saimong mareresibe, asin makakaiba mo an Banal na Espiritu, na iyo an nagpapatunay kan gabos na mga bagay na kapakipakinabang sa mga kaarakian nin mga tawo.
19 Asin kun ika mayo nin pagtubod, paglaom, asin pagkamoot, ika mayong maginibohan.
20 Dae ka makipag-iwal sa ibang simbahan, laen lang kun ini iyo an simbahan kan diyablo.
21 Daraha sa sadire mo an pangaran ni Cristo, asin sabihon mo an katotohanan na malumanay.
22 Asin habang kadakulon an nagsolsol asin nagkaburunyagan sa sakuyang pangaran, na JesuCristo, asin nagpakatatag sagkod sa katapusan, sinda maliligtas.
23 Hilnga, JesuCristo iyo an pangaran na pinagtao gikan sa Ama, asin mayo nin ibang pangaran na pinagtao na kun saen an tawo puwedeng maligtas.
24 Kun baya, an gabos na mga tawo kaipuhang darahon sa saindang mga sadire an pangaran na pinagtao gikan sa Ama, nin huli ta sa pangarang iyan snda nanggad pag-aapudon sa huring aldaw;
25 Kun baya, kun sinda dae nakakaaram sa pangaran na kun saen sinda pinapangapudan, sinda dae magkakaigwa nin lugar sa kahadean kan sakuyang Ama.
26 Asin ngonyan, hilnga, igwa nin iba man na pinagpangapudan tanganing ideklara an sakuyang ebanghelyo, para sa Hentil asin Hudiyo;
27 Iyo, magin an Dose; asin an Dose iyo an magigin sakuyang mga desipulos, asin sinda magdadara sa sadire ninda kan sakuyang pangaran; asin an Dose iyo sinda na nagmamawot na darahon sa sadire ninda an sakuyang pangaran na may bilog na katuyuhan nin puso.
28 Asin kun sinda magmawot na darahon sa saindang mga sadire an sakuyang pangaran na may bilog na katuyuhan nin puso, sinda pinag-aapudan man na magpaduman pasiring sa bilog na kinaban tanganing magbalangibog kan sakuyang ebanghelyo sa lambang nilalang.
29 Asin sinda iyo sinda na pinag-ordinahan ko na magbunyag sa sakuyang pangaran, uyon sa mga bagay na nasusurat na;
30 Asin ika igwa na kan bagay na nakasurat na sa atubangan mo; kun baya, ika kaipong gumibo kaini na uyon sa mga tataramon na nasusurat na.
31 Asin ngonyan Ako nagtataram sa saimo, an Dose---Hilnga, an sakuyang grasya abunda para saimo; ikaw kaipuhan na maglakaw nin matanos sa atubangan ko asin dae magkasala.
32 Asin, hilnga, ika siring sinda na pinag-ordinahan ko na tanganing mag-ordina man nin mga padi asin mga paratukdo, tanganing ideklara ninda an sakuyang ebanghelyo, uyon sa kapangyarihan kan Banal na Espiritu na yaon saimo, asin uyon sa pangangapudan asin mga regalo nin Diyos sa mga tawo;
33 Asin Ako, si JesuCristo, an saimong Kagurangnan asin an saimong Diyos, nakapagtaram na kaini.
34 Ining mga tataramon bako nin mga tawo ni nin tawo, kundi gikan mismo sakuya; kun baya, ika magpapatotoo na sinda gikan sakuya asin bakong sa tawo;
35 Nin huli ta ini iyo an sakuyang boses na nagtataram sainda sa saimo; nin huli ta sinda pinagtao sa paagi kan sakuyang Espiritu pasiring sa saimo, asin sa paagi kan sakuyang kapangyarihan ika makakapagbasa sainda an saro hanggan sa iba; asin laen lang na ini sa paagi kan sakuyang kapangyarihan ika dae nanggad magkakaigwa sainda;
36 Kun baya, ika makakapagpatotoo na saimong nadangog an sakuyang boses, asin nakakaaram kan sakuyang mga tataramon.
37 Asin ngonyan, hilnga, Ako magtatao sa saimo, Oliver Cowdery, asin man ki David Whitmer, na saindong hahanapon an Dose, na igwang mga pagmamawot sa mga bagay na sakuya nang naisabi;
38 Asin sa paagi kan saindang mga pagmamawot asin kan saindang mga naginibohan saindong magkakabiristo sinda.
39 Asin kun saindong nanagboan na sinda saindong ipagpapahiling ining mga bagay sa sainda.
40 Asin kamo magluluhod asin magsasamba sa Ama sa sakuyang pangaran.
41 Asin kamo kaipuhanan na magbabalangibog sa mundo, na magsasabi: Kamo kaipuhan na magsosolsol asin magpabunyag, sa pangaran ni JesuCristo;
42 Nin huli ta an gabos na mga lalake kaipuhan na magsosolsol asin magpabunyag, asin bako sanang mga lalake, kundi pati man an mga babae, asin mga kaarakian na nakaabot na sa mga edad nin kamangnohan.
43 Asin ngonyan, pagkatapos na saindong maresibe ini, kamo kaipuhanan na magsunod sa sakuyang mga kasugoan sa gabos na mga bagay;
44 Asin sa paagi kan saindong mga kamot Ako maggigibo nin sarong makangangalason na gibo sa pag-iriba kan mga kaarakian nin mga tawo, sa ikapagkuklat sa kadakul nindang mga kasalan, na tanganing sinda mapupuwedeng magsosolsol, asin na tanganing sinda puwedeng makaduman sa kahadean kan sakuyang Ama.
45 Kun baya, an mga bendisyon na Ako an nagtatao sa saindo iyo an halangkaw sa gabos na mga bagay.
46 Asin pagkatapos na saindong maresibe ini, kun kamo dae magsusunod sa sakuyang mga kasugoan kamo dae makakaligtas pasiring sa kahadean kan sakuyang Ama.
47 Hilnga, Ako, si JesuCristo, an saindong Kagurangnan asin an saindong Diyos, asin an saindong Paratubos, sa paagi kan kapangyarihan nin sakuyang Espiritu, makakapagtaram kaini. Amen.

SEKSYON 17

Kapahayagan na ipinagtao sa paagi ni Joseph Smith an Propeta para ki Oliver Cowdery, David Whitmer, asin Martin Harris, sa Fayette, New Yotk, Hunyo 1829, bago pa man an saindang paghiling sa mga naukitan na mga lamina na naglalaman sa rekord kan Libro ni Mormon. HS 1:52-57. Si Joseph asin an saiyang parasurat, si Oliver Cowdery, nakaaram gikan sa pagsasalin kan mga lamina kan Libro ni Mormon na tulong espesyal na testigo an papangaranan. Hilngon sa Ether 5:2-4; sa 2 Nephi 11:3 asin 27: 12. Si Oliver Cowdery, David Whitmer, asin Martin Harris pinagtatag sa paagi kan saindang inspiradong mga pagmamawot na magin iyo an tulong espesyal na mga testigo. An Propeta naghapot sa Kagurangnan, asin an kapahayagan na ini ipinagtao bilang kasimbagan, sa paagi kan Urim asin Thummim.

*******

1-4, Sa paagi nin Pagtubod an tulong testigo mahihiling an mga lamina asin iba pang sagradong mga bagay; 5-9, si Cristo nagpatotoo sa kabanalan kan Libro ni Mormon.

*******

Hilnga, Ako nagsasabi sa saindo, na tanganing kamo kaipuhanan na magsandig sa sakuyang mga tataramon, na kun saindong gigibohon na may bilog na katuyuhan nin puso, kamo makakapaghiling kan mga lamina, asin man kan baluti, kan espada ni Laban, kan Urim asin Thummim, na ipinagtao sa tugang na lalake ni Jared sa ibabaw nin bukid, kan panahon na siya nakipag-olay sa Kagurangnan nin lalawgon sa lalawgon, asin an milagrosong mga direktor na ipinagtao ki Lehi habang yaon sa kaparangan, sa may kasagkudan kan Pulang Dagat.
2 Asin ini sa paagi kan saindong pagtubod na kamo makakamit nin sarong paghiling sainda, magin sa paagi kaidtong pagtubod na nagkaigwa an mga suanoy na mga propeta.
3 Asin pagkatapos na kamo nagkamit na nin pagtubod, asin nakapaghiling na sainda kan saindong mga mata, kamo magpapatotoo sainda, sa paagi nin kapangyarihan nin Diyos;
4 Asin ini saindong gigibohon na tanganing an sakuyang surugoon na si Joseph Smith, Jun., mapupuwedeng dae madestroso, na tanganing Ako mapupuwedeng maidara paluwas an sakuyang matanos na mga katuyuhan pasiring sa mga kaarakian nin mga sa gibong ini.
5 Asin kamo magpapatotoo na saindong nagkahiriling sinda, na magin an sakuyang surugoon na si Joseph Smith, Jun., nakapaghiling sainda; nin huli ta ini sa paagi kan sakuyang kapangyarihan na siya nakapaghiling sainda, asin ini nin huli ta siya igwa nin pagtubod.
6 Asin siya an nagsalin kan libro, magin idtong parte na Ako an nagsugo saiya, asin bilang an saindong Kagurangnan asin an saindong Diyos na nabubuhay ini nanggad totoo.
7 Kun baya, kamo nakapagresibe nin kaparehong kapangyarihan, asin kaparehong pagtubod, asin kaparehong regalo na arog saiya;
8 Asin kan kamo maggigibo kaining mga kasugoan ko, mas Ako an nagtatao saindo, an mga pintuan nin impiyerno dae nanggad makakatagal kontra saindo, nin huli ta an sakuyang grasya abunda para saindo, asin kamo ipagpapaitaas sa huring aldaw.
9 Asin Ako, si JesuCristo, an saindong Kagurangnan asin an saindong Diyos, nagtaram kan mga ini sa saindo, na tanganing Ako mapupuwedeng magdara paluwas kan sakuyang matatanos na mga katuyuhan pasiring sa mga kaarakian nin mga tawo. Amen.

SEKSYON 16

Kapahayagan na ipinagtao sa paagi ni Joseph Smith an Propeta ki Peter Whitmer, Jun., sa Fayette, New York, Hunyo 1829. HS 1:51; hilingan man an pamayuhan kan Seksyon 14. Peter Whitmer, Jun., sa bandang huri nagin saro sa Walong Testigo sa Libro ni Mormon.

*******

1-2, An takyag nin Kagurangnan nangingibabaw sa bilog na kinaban; 3-6, An pagbabalangibog kan ebanghelyo asin an pagligtas nin mga kalag iyo an bagay na pinakahalangkaw sa halaga.

*******

Maghinanyog ka, sakuyang surugoon na si Peter, asin magdangog sa mga tataramon ni JesuCristo, an saimong Kagurangnan asin an saimong Paratubos.
2 Nin huli ta hilnga, Ako ako nagtataram sa saimo na igwang katadungan asin igwang kapangyarihan, nin huli ta an sakuyang takyag yaon na nangingibabaw sa bilog na kinaban.
3 Asin Ako an magsasabi saimo kan bagay na mayo pang tawo an nakakaaram laen sakuya asin ika nanggad sana---
4 Nin huli ta sa kadakul na beses ika nagmamawot sakuya na maaaraman an bagay na iyo an mas pinakamahalaga sa saimo.
5 Hilnga, paladan ka para sa bagay na ini, asin para sa pagtataram mo kan sakuyang mga tataramon na Ako an nagtao sa saimo na uyon sa sakuyang mga kasugoan.
6 Asin ngonyan, hilnga, Ako an nagsasabi sa saimo, na an bagay na mas pinakahalangkaw sa saimo iyo an pagdedeklara nin pagsosolsol sa mga katawohang ini, tanganing ika makapagdara nin mga kalag sa sakuya, na tanganing ika makapagpahingalo na kaiba ninda sa kahadean kan sakuyang Ama. Amen.

SEKSYON 15

Kapahayagan na ipinagtao sa paagi ni Joseph Smith as Propeta para ki John Whitmer, sa Fayette, New Yotk, Hunyo 1829. HS 1:50; hilinga man ang pamayuhan kan Seksyon 14. An mensahe sarong madayupoton asin magianon sa boot, na sa bagay na ini an Kagurangnan nagsasabi kan bagay na aram sana ni John Whitmer asin kan sadire niya. Si John Whitmer sa bandang huri nagin saro sa Walong Testigo kan Libro ni Mormon.

*******

1-2, An takyag nin Kagurangnan nangingibabaw sa bilog na kinaban; 3-6, An pagbabalangibog kan ebanghelyo asin an pagligtas nin mga kalag iyo an bagay na pinakahalangkaw an halaga.

*******

Maghinanyog ka, sakuyang surugoon na si John, asin magdangog sa mga tataramon ni JesuCristo, an saimong Kagurangnan asin an saimong Paratubos.
2 Nin huli ta hilnga, Ako nagsasabi sa saimo na may katadungan asin may kapangyarihan, nin huli ta an sakuyang takyag yaon sa kabilugan nin kinaban.
3 Asin Ako magsasambit saimo kan bagay na mayong tawo an nakakaaram kaini laen lang saimo asin ika nanggad sana---
4 Nin huli ta kadakul na beses na ika nagmamawot sa sakuya tanganing aramon an bagay na magigin mas pinakamahalaga sa saimo.
5 Hilnga, paladan ka para sa bagay na ini, asin para sa pagtataram mo kan sakuyang mga tataramon na Ako an nagtao saimo na uyon sa sakuyang mga kasugoan.
6 Asin ngonyan, hilnga, Ako nagsasabi sa saimo, na an bagay na magigin mas pinakamahalaga sa saimo iyo an pagdedeklara nin pagsosolsol sa mga katawohang ini, na tanganing ika nanggad puwede makapagdara nin mga kalag sa sakuya, na tanganing ika puwedeng makapagpahingalo kaiba ninda sa kahadean kan sakuyang Ama. Amen.

SEKSYON 14

Kapahayagan na pinagtao sa paagi ni Joseph Smith an Propeta para ki David Whitmer, sa Fayette, New York, Hunyo 1829. HS 1:48-50. An pamilya Whitmer nagin dakula an pagka-interesado sa pagsasalin kan Libro ni Mormon. An Propeta nag-establisa kan saiyang residensiya sa harong ni Peter Whitmer, Sen., na kun saen siya naki-erok hanggan an trabaho nin pagsalin pinagdarang makumpleto asin an copyright kan mapa-abuton na libro nakua na. Tulo sa mga akeng lalake kan Whitmer, an lambang saro nakapagresibe nin kanya-kanyang testimonya mapanungod sa pagkatunay kan trabaho, nagin maigoton mapanungod sa bagay kan saindang indibidwal na katungdan. Ining kapahayagan asin an duwa na nagsurunod (Seksyon 15 asin 16) pinagtao sa pagsimbag sa kahaputan sa paagi nin Urim and Thummim. Si David Whitmer sa bandang huri nagin saro sa Tulong Testigo sa Libro ni Mormon.

*******

1-6, Mga trabahador sa ubasan makakaguno nin kaligtasan; 7-8, eternal na buhay iyo an pinakadakulang regalo nin Diyos; 9-11, si Cristo iyo an naglalang kan mga langit asin kan kinaban.

*******

Sarong dakula asin makangangalas na trabaho an madalion nang magluluwas sa mga kaarakian nin mga tawo.
2 Hilnga, Ako an Diyos; magtatao ka nin paghihinanyog sa sakuyang tataramon, na madalion asin pano ning kapangyarihan, mas mataromon pa kesa sa sarong doble-tarom na espada, na tanganing ikapagbarangang gayo nin mga kasu-kasoan asin hutok; kun kaya magtao nin paghihinanyog sa sakuyang tataramon.
3 Hilnga, an omahan mapution na para sa pag-ani; kun kaya, an siisay man an nagmamawot na makapag-ani tugutan siyang makapagsanggot kan saiyang asyab sa bilog niyang kakayahan, asin mag-ani habang an aldaw naghahaloy pa, na tanganing siya mapagpayaman para sa saiyang kalag nin daeng katapusan na kaligtasan sa kahadean nin Diyos.
4 Iyo, an siisay man na magsasanggot kan saiyang asyab asin mag-ani, siya iyo man an pinag-apudan nin Diyos.
5 Kun kaya, kun ika maghahagad sa sakuya ika makakaresibe; kun ika magtutoktok ini pagbubuksan sa saimo.
6 Maghanap na madara paluwas asin maestablisa an sakuyang Sion. Magsunod sa sakuyang mga kasugoan sa gabos na mga bagay.
7 Asin, kun ika magsusunod sa sakuyang mga kasugoan asin magpakatatag sagkod sa katapusan ika magkakaigwa nin eternal na buhay, na iyo an regalo na pinagkahalangkaw sa gabos na mga regalo nin Diyos.
8 Asin ini mangyayaring maglipas, na kun ika maghahagad sa Ama sa sakuyang pangaran, sa pagtubod naniniwala, ika makakaresibe nin Banal na Espiritu, na iyo an nagtatao nin panambitan, na tanganing ika puwedeng magtitindog bilang sarong testigo kan mga bagay na iyo an pareho mong madadangog asin mahihiling, asin man na tanganing ika puwedeng makapagdeklara nin pagsosolsol sa henerasyong ini.
9 Hilnga, Ako si JesuCristo, an Akeng Lalake kan buhay na Diyos, na iyo an naglalang kan mga langit asin kinaban, sarong liwanag na dae nanggad maitago sa kadikloman;
10 Kun baya, ako kaipong magdadara paluwas kan kabilugan nin sakuyang ebanghelyo na maggigikan sa mga Hentil pasiring sa harong nin Israel.
11 Asin hilnga, ika iyo si David, asin ika pinag-apud sa pagtabang; na sa bagay na ini kun ika maggigibo, asin pano nin pagtubod, ika pagbebendisyunan pareho sa espirituwalidad asin temporalidad, asin dakulaon na gayo an saimong magigin kabayadan. Amen.

SEKSYON 13

Ordinasyon ni Joseph Smith asin Oliver Cowdery sa Aaronikong Pagkasaserdote sa pangpang nin Susquehana River, harani sa Harmony, Pennsylvania, Mayo 15, 1829. HS 1:39-42. An ordinasyon ginibo sa paagi kan mga kamot nin sarong anghel, na nagpabisto kan sadire niya bilang John, kapareho sa pinag-apud na John the Baptist na yaon sa Bagong Tipan. An anghel nagpahayag na siya naggigibo sa irarom kan direksiyon ni Peter, James, asin John, an suanoy na mga apostoles, na nagkakapot kan mga susi nin mas halangkaw na pagkasaserdote, na pinag-apud na Pagkasaserdoteng Melchizedek. Sarong promisa an pinagtao ki Joseph asin Oliver na sa tamang panahon an Pagkasaserdoteng Melchizedek ipagpuputong sa sainda. Hilnga man sa Seksyon 27:7, 8, 12.

*******

Mga susi asin kapangyarihan kan Aaronikong Pagkasaserdote pinagtugdas.

*******

Sa mga payo nindo mga kapwa ko surugoon, sa pangaran nin Mesiyas, Ako nagpuputong kan Pagkasaserdote ni Aaron, na nagkakapot kan mga susi kan pagmiministeryo kan mga anghel, asin kan ebanghelyo nin pagsosolsol, asin kan pagbubunyag sa paagi nin paglubog para sa kapatawaran nin mga kasalan; asin ini dae nanggad pagkukuahon giraray gikan sa kinaban, hanggan an mga akeng lalake ni Levi maggibong magdulot giraray nin dulot para sa Kagurangnan sa pagkamatanos.

SEKSYON 12

Kapahayagan na ipinagtao sa paagi ki Joseph Smith an Propeta para ki Joseph Knight, Sen., sa Harmony, Pennsylvania, Mayo 1829. HS 1:47-48. Joseph Knight naniwala sa mga deklarasyon ni Joseph Smith mapanungod sa saiyang pagkapot kan mga lamina kan Libro ni Mormon asin an gibo nin pagsalin na yaon sa progreso, asin kadakul na beses na nagtao nin materyal na tabang ki Joseph Smith asin sa saiyang eskriba, na iyo an nakapaghimo sainda na magpadagos sa pagsasalin. Asin sa kahagadan ni Joseph Knight an Propeta naghapot sa Kagurangnan asin nakaresibe nin kapahayagan.

*******

1-6, Mga trabahador nin ubasan magguguno nin kaligtasan; 7-9, Gabos na nagmamawot asin kwalipikado puwede magtabang sa trabaho nin Kagurangnan.

*******

Sarong dakula asin makangangalas na trabaho an madalion nang mag-abot sa pag-iriba nin mga kaarakian nin mga tawo.
2 Hilnga, Ako an Diyos; magtao kamo nin paghinanyog sa sakuyang tataramon, na mas matarom kesa sarong doble-tarom na espada, sa pagkakabaranga kan mga kasu-kasoan asin hutok; kun kaya, magtao kamo nin paghinanyog sa sakuyang tataramon.
3 Hilnga, an omahan mapution na para sa pag-ani; kun kaya, an siisay man na nagmamawot na mag-ani tugutan siyang magsanggot kan saiyang asyab sa bilog niyang kakayahan, asin mag-ani habang an aldaw dae pa natatapos, na tanganing siya puwedeng pagpayamanon para sa saiyang kalag an eternal na kaligtasan sa kahadean nin Diyos.
4 Iyo, an siisay man na nagsanggot kan saiyang asyab asin mag-ani, iyo man sana siya an pinag-apudan nin Diyos.
5 Kun kaya, kun ika maghahagad sa sakuya ika makakaresibe; kun ika magtutoktok ini pagbubuksan sa saimo.
6 Ngonyan, habang ika naghahagad, hilnga, Ako nagsasabi sa saimo, magsunod ka sa sakuyang mga kasugoan, asin maghanap sa pagdara paluwas asin sa pag-establisa kan kausa nin Sion.
7 Hilnga, Ako nagtataram sa saimo, asin sa gabos sainda na igwang mga pagmamawot na darahon paluwas asin ipag-establisa ining trabaho;
8 Asin mayo ni saro an makakatabang sa trabahong ini laen lang na siya nagpapakumbaba asin pano nin pagkamoot, na igwang pagtubod, paglaom, asin karidad, magin temperado sa gabos na mga bagay, sa anuman na ipinagkakatiwala sa saiyang pangangataman.
9 Hilnga, Ako an liwanag asin an buhay nin kinaban, na nagtataram kaining mga tataramon, kun kaya magtao kamo nin paghihinanyog na may bilog mong kakayahan, asin pagkasunod ika pinag-apudan. Amen.