SEKSYON 50

Kapahayagan na ipinagtao sa paagi ni Joseph Smith an Propeta, sa Kirtland, Ohio, Mayo 1831. HS 1:170-173. An Propeta nagsabi na an iba sa mga elders dae nakakasabot sa mga manipestasyon kan iba-ibang mga espiritu na nagkaralat sa kinaban, asin na ining Kapahayagan ipinagtao sa pagsimbag sa saiyang espesyal na kahaputan sa bagay na ini. An pinag-aapod na espirituwal na kabaghaan nagin ordinaryo na sa pag-iriba nin mga miyembro, na an iba sainda nag-aako na nakakapagresibe nin mga bisyon asin mga Kapahayagan.
*******
1-5, Kadakul na mga palsong espiritu an nagkaralat sa kinaban; 6-9, Herak man sa mga hipokrito asin sainda na pinaghale gikan sa simbahan; 10-14, an mga Elders dapat na magbalangibog kan ebanghelyo sa paagi kan Espiritu; 15-22, Pareho na an tagapagbalangibog asin mga paradangog kaipuhan na pagpaliwanagan sa paagi kan Espiritu; 23-25, Idtong mga bagay na dae nakakapagpatalubo an bako sa Diyos; 26-28, An mga pano nin pagtubod iyo an tagapagkapot kan gabos na mga bagay; 29-36, Mga pangadyeon kan mga pinaglinigan pinagsimbag; 37-46, Si Cristo iyo an Marahayon na Pastor asin an Gapo nin Israel.
*******
MAGHINANYOG, O kamong mga elders kan sakuyang simbahan, asin magtao nin pagdangog sa boses kan buhay na Diyos; asin atendiran an mga tataramon nin kadunungan na ipagtatao sa saindo, na uyon sa saindong pinaghahagad asin pinagka-uruyunan na pinanungdan an simbahan, asin sa mga espiritu na nagkakaralat sa kinaban.
2 Hilnga, katotohanan Ako nagsasabi sa saindo, na igwa nin kadakul na mga espiritu na mga palsong espiritu, na nagkakaralat sa kinaban, na pinagdadaya an mundo.
3 Asin man si Satanas naghihingoha na madaya kamo, na tanganing kamo mapupuwedeng pangibabawan niya.
4. Hilnga, Ako an Kagurangnan, nagbabantay sa saindo, asin nakapaghihiling nin mga abominasyon sa simbahan na nagbabalangibog kan sakuyang pangaran.
5 Pero paladin sinda na pano nin pagtubod asin matatagon, maski sa pagkabuhay o sa kagadanon, nin huli ta sinda magmamana nin eternal na buhay.
6 Pero Herak man sa sainda na mga paradaya asin mga hipokrito, nin huli ta, sabi nin Kagurangnan, Ako an magdadara sainda pasiring sa kahukuman.
7 Hilnga, katotohanan Ako nagsasabi sa saindo, igwa nin mga hipokrito sa pag-iriba nindo, na nakapagdaya na sa iba, na nakapagtao na sa kalaban nin kapangyarihan; alagad an bagay na ini pagbabawion;
8 Pero an mga hipokrito magkakabiristo asin pagsisikwalon, arinman sa buhay o sa kagadanan, na siring na Ako an may kagustuhan; asin Herak man sainda na pinagsisikwal gikan sa sakuyang simbahan, nin huli ta siring man sana sindang pinagdaog kan mundo.
9 Kumbaya, tugutan na an lambang tawo mag-ingat na baka siya gumibo kan bagay na bako man sa katotoohan asin katanosan sa atubangan ko.
10 Asin ngonyan madya, sabi ni Kagurangnan, sa paagi nin Espiritu, paduman sa mga elders kan saiyang simbahan, asin tugutan na kita magrason na nagkatiripon na tanganing kita magkaka-irintindihan;
11 Tugutan na kita magrasonan na siring sa sarong tawo na nakipagrasonan sa saro na kairiba sa pag-aratubangan.
12 Ngonyan, kun an sarong tawo magrarason siya masasabutan kan tawo, nin huli ta siya nagrarason bilang sarong tawo; arog man kaini Ako, an Kagurangnan, magrarason kaiba nindo na tanganing kamo makakasabot.
13 Kumbaya, Ako an Kagurangnan naghahapot saindo kaining kahaputan--- sa anong bagay baya kamo pinag-ordinahan?
14 Tanganing magbalangibog kan sakuyang ebanghelyo sa paagi kan Espiritu, na iyo an Tagapaglinga na ipinagpadara tanganing magtukdo nin katotoohan.
15 Asin pagkatapos nagresibe kamo nin mga espiritu na dae nindo naiintindihan, asin naresibe nindo na siring sa naggigikan sa Diyos; asin sa arog kaini kamo daw napanindugan?
16 Hilnga kamo an makakasimbag kaining kahaputan sa sadire nindo; daeng pagkukulang, Ako magigin pano nin pagkaherak sa saindo; siya na maluya sa pag-iriba nindo magpoon ngonyan paghihimoon na magin makusog.
17 Katotohanan Ako nagsasabi sa saindo, siya na pinag-ordinahan ko asin ipinagpadara tanganing magbabalangibog nin tataramon nin katotoohan sa paagi nin Tagapaglinga, sa Espiritu nin katotoohan, ginigibo daw na siya nagbabalangibog kaini sa paagi nin Espiritu nin katotoohan o sa ibang paagi?
18 Asin kun ini nangyari sa ibang paagi nin bakong sa Diyos.
19 Asin giraray, siya na nagresibe kan tataramon nin katotoohan, ginibo daw na siya nagresibe kaini sa paagi kan Espiritu nin katotoohan o sa ibang paagi?
20 Kun ini nangyari sa ibang paagi ini bakong sa Diyos.
21 Kun kaya, tadaw baya na kamo dae makakasabot asin makakaaram, na siya na nagresibe nin tataramon sa paagi kan Espiritu nin katotoohan nagreresibe kaini na siring sa ini pinagbalangibog sa paagi kan Espiritu nin katotoohan?
22 Kumbaya, siya na nagbabalangibog asin siya na nagreresibe, nagkakasabutan sa lambang saro, asin Pareho na napakusog asin mag-oogmang magka-ibahan.
23 Asin ta idtong dae nakakapagpakusog bakong sa Diyos, asin ini kadikloman.
24 Asin ta idtong sa Diyos iyo an liwanag; asin siya na nagreresibe nin liwanag, asin nagpapadagos na yaon sa Diyos, nagreresibe pa nin dagdag na liwanag; asin an liwanag na yan nagtatalubong gayo na mas maliwanagon asin mas maliwanagon pa sagkod sa pinakaperpektong aldaw.
25 Asin giraray, katotohanan Ako nagsasabi sa saindo, asin Ako nagsasabi kaini na tangani baya kamo puwedeng makakaaram sa katotoohan, na tangani baya kamo puwedeng manlamagan nin kadikloman gikan sa pag-iriba nindo.
26 Siya na pinag-ordinahan nin Diyos asin ipinagpadara, kapareho man sanang pinagngaranan na magin mas pinakahalangkaw, maski na ngani siya iyo an pinakasadit asin an surugoon kan gabos.
27 Kumbaya, siya iyo an tagapagkapot kan gabos na mga bagay; nin huli ta an gabos na mga bagay pinagkakatiwala sa saiya, kapareho idtong yaon sa langit asin sa ibabaw nin kinaban, an buhay asin an liwanag, an Espiritu asin an kapangyarihan, na ipinagpadara sa paagi nin kagustuhan kan Ama sa paagi ni JesuCristo, an saiyang Ake.
28 Pero mayong tawo na tagapagkapot kan gabos na mga bagay laen lang na siya pinaglinigan asin pinaghugasan gikan sa gabos na kasalan.
29 Asin kun kamo pinaglinigan asin pinaghugasan na gikan sa gabos na kasalan, kamo maghahagad nin anuman na saindong ginugusto sa pangaran ni Jesus asin ini mangyayaring magigibo.
30 Pero aramon baya ini, ini ipagtatao saindo kun ano an saindong pinaghahagad, asin siring na kamo pinagngaranan na magin pamayo, an mga espiritu mangyayaring maipagkakatiwala man saindo.
31 Kumbaya, ini mangyayaring maglipas, na kun kamo nakahiling nin sarong espiritu na nagpapamate na tanganing kamo dae makapagsabot, asin kamo dae nakaresibe kan espiritung yan, kamo maghahapot sa Ama sa pangaran ni Jesus; asin kun siya dae nagtao sa saindo kan espiritung yan, kaya kamo puwedeng makaaram na ini bakong sa Diyos.
32 Asin ini ipagtatao sa saindo, kapangyarihan na mangibabaw sa espiritung yan; asin kamo magpoproklama laban sa espiritung yan na igwa nin sarong makusugon na boses na ini bakong sa Diyos---
33 Bakong sa pakantiyaw na akusasyon, na tanganing kamo dae madaog, ni sa paagi nin paghahambog o sa pagpapaogma, na baka baya kamo magkakadarakop sana.
34 Siya na nagresibe gikan sa Diyos, tugutan siya na manimbagan kaini sa Diyos; asin tugutan siyang mag-oogma na siya pinagbilang na yaon sa Diyos na maninigo sa pagresibe.
35 Asin sa paagi nin pagtao nin pagdangog asin naggigibo kaining mga bagay na saindong pinagresibe, asin ini poon ngonyan saindong pagreresibihon--- asin an kahadean ipinagtao saindo kan Ama, asin an kapangyarihan na mangingibabaw sa gabos na mga bagay na bakong ordinado niya---
36 Asin hilnga, katotohanan Ako nagsasabi sa saindo, paladin kamo na ngonyan na nagdadangog kaining mga tataramon ko na naggigikan sa nguso kan sakuyang surugoon, nin huli ta an saindong mga kasalan pinagpatawad na saindo.
37 Tugutan an sakuyang surugoon na si Joseph Wakefield, na saiya ako marahayong maogma, asin sa sakuyang surugoon na si Parley P. Pratt na maduruman pasiring sa mga simbahan asin pagpakusugon sinda sa paagi nin mga tataramon na panggiya;
38 Asin man an sakuyang surugoon na si John Corrill, o sa kadakul pa kan sakuyang mga surugoon na pinag-ordinahan sa opisinang ini, asin tugutan sindang magtrabaho sa ubasan; asin tugutan na mayong tawo an mag-abala sainda sa paggigibo kan bagay na Ako an nagpagibo sa sainda---
39 Kumbaya, sa bagay na ini an sakuyang surugoon na si Edward Partridge bakong yaon sa katadungan; daeng pagkukulang na tugutan siyang makapagsolsol asin siya patatawadon.
40 Hilnga, kamo mga saradit na kaarakian asin kamo dae pa makakayang magkarga nin gabos na mga bagay ngonyan; kamo dapat na magtalubo sa grasya asin sa kaaraman nin katotoohan.
41 Dae matakot, mga sadit na kaarakian, nin huli ta kamo sakuya, asin Ako an nakadaog kan kinaban, asin kamo yaon sa pag-iriba ninda na an sakuyang Ama an nagtao sakuya;
42 Asin mayo sainda na an sakuyang Ama an nagtao sakuya an magkakawarara.
43 Asin an Ama asin Ako saro. Ako yaon sa Ama asin an Ama yaon sako; asin habang kamo nagreresibe sako, kamo yaon sako asin Ako yaon saindo.
44 Kumbaya, Ako yaon sa saindong katahawan, asin Ako an marahayon na pastor, asin an gapo nin Israel. Siya na nakatugdok sa gapong ini dae nanggad mahuhulog.
45 Asin an aldaw maabot na kamo makakadangog kan sakuyang boses asin makakahiling sako, asin makakabisto na Ako iyo ini.
46 Magbantay, baya, na kamo magigin andam. Arog kaini. Amen.

SEKSYON 49

Kapahayagan na ipinagtao sa paagi ni Joseph Smith an Propeta para ki Signey Rigdon, Parley P. Pratt, asin Leman Copley, sa Kirtland, Ohio, Marso 1831. HS 1:167-169. (An ibang historikong pinaggikanan nagtao nin petsa kaining kapayahayan bilang Mayo 1831). Leman Copley pinagkugos an ebanghelyo, pero namumugol pa sa ibang mga katukdoan kan Shakers (Pinagkasararong Sosyedad kan mga Paratubod sa Ikaduwang Pagpapahiling ni Cristo) na kun saen siya dating kaayon. An ibang paniniwala kan Shakers na an ikaduwang pag-abot ni Cristo nangyari na asin siya nagpahiling sa pagkatawo nin sarong babae, si Ann Lee; pagbubunyag sa paagi nin tubig dae pinagkokonsiderang mahalaga; an pagkakakan nin karneng orig espisipikong pinagbabawal na gayo, asin kadakul an dae nagkakakan nin anuman na karne; asin an solong pamumuhay pinagkonsiderang halangkawon kesa sa may-agom. Bilang kapangenotan kaining Kapahayagan, an Propeta nagsurat, “Na tanganing magkakaigwa nin mas perpektong pagkakasabot sa tema, ako naghapot sa Kagurangnan, asin nagresibe kan minasunod.” An Kapahayagan pinagkibrang-kaso an iba sa mga panuntunang mga konsepto kan grupo nin Shakers. An nasambit na katugangan nagtao nin sarong kopya nin Kapahayagan sa komunidad kan Shakers (harani sa Cleveland, Ohio) asin pinagbasa ini sainda sa kabilugan kaini, alagad ini pinagsikwal.
*******
1-7, An aldaw asin oras kan pag-abot ni Cristo matatadang dae maaaraman sagkod na siya mag-abot na; 8-14, An mga tawo dapat na magsolsol, maniwala sa ebanghelyo, asin magsunod sa mga ordinansa tanganing makagana nin kaligtasan; 15-16, An pag-agom pinag-ordina nin Diyos; 17-21, an pagkakakan nin karne aprubado; 22-28, an Sion magbubuswang asin an mga Lamanita magbubuswang bilang rosas bago an Ikaduwang Pag-abot.
*******
MAGHINANYOG sa sakuyang tataramon, sakuyang surugoon na Sidney, asin Parley, asin Leman; nin huli ta hilnga, katotohanan Ako nagsasabi sa saindo, na Ako nagtao sa saindo nin sarong kasugoan na kamo magpaduman asin magbalangibog kan sakuyang ebanghelyo na saindong naresibe na, magin arog na kamo nagresibe kaini, paduman sa mga Shakers.
2 Hilnga, ako nagsasabi sa saindo, na sinda nagmamawot na makaaram sa katotoohang parte, pero bako gabos, nin huli ta sinda bakong tama sa atubangan ko asin kinakaipuhanan na magsolsol.
3 Kumbaya, Ako an nagpapadara saindo, sakuyang mga surugoon na Sidney asin Parley, tanganing magbabalangibog kan ebanghelyo sa sainda.
4 Asin an sakuyang surugoon na si Leman pag-oordinahan sa trabahong ini, na siya mapupuwedeng maipagrasonan kaiba ninda, bakong uyon sa bagay na siya nakapagresibe hale sainda, kundi uyon sa bagay na ipagtutukdo saiya sa paagi nindo na sakuyang mga surugoon; asin sa paagi kan paggigibo kaini Ako magbebendisyon saiya, ta kun bako siya dae mag-aasenso.
5 Kun kaya nagsabi an Kagurangnan; nin huli ta Ako an Diyos, asin nagpadara kan sakuyang Solong Kinamumutan na Ake pasiring sa kinaban para sa pagtubos kan kinaban, asin nagdekrito na siya na nagresibe saiya maliligtas, asin siya na dae nagresibe saiya pagkokondenaron---
6 Asin sinda nakapaggibo sa Ake nin Tawo arog kan saindang pinaglista; asin siya nangaputan kan saiyang kapangyarihan sa may toong kamot kan saiyang kamurawayan, asin ngonyan naghahade sa mga kalangitan, asin maghahade sagkod na siya magbababa sa kinaban tanganing ipagbugtak an gabos na mga kaiwal sa irarom kan saiyang mg bitis, na kunsoarin na panahon haranihon nang gayo---
7 Ako, an Kagurangnang Diyos, nakapagtaram na kaini; pero an oras asin an aldaw mayong tawo na nakakaaram, ni an mga anghel sa langit, ni sinda makakaaram sagkod na siya mag-abot.
8 Kumbaya, Ako nagugusto na an gabos na mga tawo dapat na magsosolsol, nin huli ta an gabos yaon sa irarom nin kasalan, laen lang sainda na Ako nagreserba para sa sakuya, mga banal na tawo na kamo dae nakakabisto.
9 Kumbaya, Ako nagsasabi sa saindo na Ako nagpadara sa saindo kan sakuyang daeng katapusan na tipan, magin idto na gikan pa sa kapinunan.
10 Asin idtong sakuyang pinagpromisa Ako nakapag-utob na, asin an mga nasyon nin kinaban magduduko kaini; asin, kun bako sa saindang mga sadire, sinda magbabaraba, nin huli ta sinda na ngonyan pinagpapamurawayanan kan saindang sadire man sana pagpapahigdaon sa kababaan nin kapangyarihan.
11 Kumbaya, Ako nagtatao sa saindo nin sarong kasugoan na kamo magpaduman sa pag-iriba kaining mga katawohan, asin magsabi sa sainda, na siring sa sakuyang lumang apostol, na an pangaran Peter;
12 Maniwala sa pangaran nin Kagurangnan na si Jesus, na yaon kaidto sa kinaban, asin mag-aabot, an kapinunan asin an katapusan;
13 Magsolsol asin magpabunyag sa pangaran ni JesuCristo, na uyon sa banal na kasugoan, para sa kapatawaran nin mga kasalan;
14 Asin an siisay man na naggibo kaini makakaresibe nin pabuya kan Banal na Espiritu, sa paagi nin pagpapatong nin mga kamot kan mga elders kan simbahan.
15 Asin giraray, katotohanan Ako nagsasabi sa saindo, na an siisay man na magbabawal sa pag-agom iyo an bakong ordinado nin Diyos, nin huli ta an pag-agom iyo an pinag-ordina nin Diyos para sa tawo.
16 Kumbaya, ini uyon sa ley na siya dapat igwa nin sarong agom, asin sindang duwa magigin sarong laman, asin an gabos na tanganin baya an kinaban puwedeng manimbagan sa katapusan kaining pagkalalang;
17 Asin na ini baya mapupuwedeng mapano na igawang sukol nin tawo, uyon sa saiyang pagkakalalang bago pa an kinaban pinaghimo.
18 Asin an siisay man na nagbabawal na maglikay sa karne, na an tawo dae dapat na magkakakan kaini, ini dae pinag-ordina nin Diyos;
19 Nin huli ta, hilnga, an mga hayop kan kadagaan asin mga gamgam sa kahanginan, asin idtong nagluluwas sa daga, ini pinag-ordina para magamit nin tawo para sa pagkakan asin para sa pagyamit, asin na tangani na siya puwedeng magkakaigwa nin abunda.
20 Pero ini dae pinagtao na tangani an sarong tawo dapat na mangaputan na mas labaw pa sa iba, kumbaya an kinaban yaon sa pagkakasala.
21 Asin herak man sa tawo na nagpapabulos nin dugo o saindang pinagbasang-basang an laman asin sa mayong kamanungdanan.
22 Asin giraray, katotohanan Ako nagsasabi sa saindo, na an Ake nin Tawo dae maabot sa pagkatawo nin sarong babae, ni arog sa sarong tawo na nagbibiyahe sa kinaban.
23 Kumbaya, dae magpadaya, kundi magpadagos sa pagpapanindugan, magtangad sa mga kalangitan na pagyuyugyugon, asin sa kinaban na mangungubog-kubog asin nagsasayasay na siring sa sarong burat na tawo, asin an mga lambak pagpapaitaason, asin an mga kabukidan hihimoon na pagpapaibabaon, asin an mga bako-bakong mga lugar pagpapatagon--- asin an gabos na ini iyo sa panahon na an anghel magpapatanog na kan saiyang trumpeta.
24 Pero bago pa man an dakulang aldaw nin Kagurangnan mag-abot, si Jacob mag-uusbong sa kaparangan, asin an mga Lamanita mamumurak na siring sa rosa.
25 An Sion mag-uusbong sa ibabaw nin mga burokid-bukid asin mag-oorogma sa ibabaw nin mga kabukidan, asin pagtitiriponon na magkasararo duman sa lugar na Ako an nagtukdo.
26 Hilnga, Ako nagsasabi sa saindo, maglakaw kamo siring na Ako an nagsugo saindo; magsolsol kan gabos nindong mga kasalan; maghagad asin kamo pagtataw-anan; magtuktok asin ini pagbubuksan sa saindo.
27 Hilnga, Ako maglalakaw sa enotan nindo asin yaon sa saindong hurihan; asin Ako magigin yaon sa saindong katahawan, asin kamo dae nanggad mapagbasang-basang.
28 Hilnga, Ako si JesuCristo, asin Ako maabot nin hidali. Arog kaini. Amen

SEKSYON 48

Kapahayagan na ipinagtao sa paagi ni Joseph Smith an Propeta, sa Kirtland, Ohio, Marso 1831. HS 1:166-167. An propeta naghapot sa Kagurangnan manungod sa terno kan paagi sa pagbabakal nin mga kadagaan para pag-eerokan kan mga banal. Iyo ini an importanteng bagay na nahihiling mapanungod sa paglilipat kan mga miyembro kan Simbahan hale sa sirangan kan Estados Unidos, sa pagsunod sa kasugoan nin Kagurangnan na sinda dapat na mag-asembliya sa Ohio. Hilingon sa 37:1-3; 45:64.
*******
1-3, An mga banal sa Ohio dapat na maghiras kan saindang mga kadagaan sa saindang mga katugangan; 4-6, An mga banal magbarakal nin mga kadagaan, magtugdok nin sarong siyudad, asin magsunod sa mga pagsadol kan saindang mga pangenot na mga opisyales.
*******
Ini kinakaipuhan na kamo dapat na magtener sa presenteng panahon sa saindong mga lugar na pig-eestaran, habang ini marahayon pang gayo sa saindong mga sirkumstansiya.
2 Asin habang kamo igwang kadagaan, kamo makikipaghirasan sa katugangan na gikan pa sa sirangan;
3 Asin habang kamo mayong kadagaan, tugutan sindang magbarakal sa presenteng panahon duman sa mga rehiyon na nakapalibot, na sa paghuna ninda marahay, nin huli ta ini kinakaipuhang gayo na sinda magkaigwa nin mga lugar para sa presenteng panahon.
4 Ini kinakaipuhang gayo na kamo magtipon nin gabos na kuwarta habang may kaya pa, asin na kamo makakakua nin gabos na saindong makakaya sa katanosan na sa tamang panahon na kamo may kakayahan nang gayo makakapagbakal na nin kadagaan bilang sarong kamanahan, magin sarong siyudad.
5 An lugar dae pa nguna pinagpapahayag; kundi pagkatapos na an saindong mga katugangan na maggigikan pa sa may sirangan magkakaigwa nin mga tawo na pagngangaranan, asin sa sainda ini ipagtatao na makakaaram kan lugar, o sa sainda ini ipagpapahayag.
6 Asin sinda pagngangaranan na magbakal nin mga kadagaan, asin maghihimo na mapagpoonan an paglatag kan pundasyon nin siyudad; asin pagkasunod kamo magpopoon na magkakatiripon-tipon na kairiba an saindong mga pamilya, lambang tawo na uyon sa saiyang pamilya, uyon sa saiyang mga sirkumstansiya, asin siring na pinagngaran sa saiya kan panguluhan asin kan Obispo kan simbahan, uyon sa mga leyes asin mga kasugoan na saindong naresibe na, asin an iba na saindo pang mareresibe poon ngonyan. Arog kaini. Amen.