SEKSYON 103

Kapahayagan na ipinagtao sa paagi ki Joseph Smith an Propeta, sa Kirtland, Ohio, Pebrero 24, 1834. HS 2:36-39. Ining kapahayagan naresibe pagkatapos na mag-abot sa Kirtland, Ohio, sinda Parley P. Pratt asin Lyman Wight, na naggikan pa sa Missouri tanganing makipaghulit sa Propeta manunungod sa kahinggianan asin restorasyon kan mga banal sa saindang mga kadagaan sa Jackson County.
*******
1-4, Tadaw ta an Kagurangnan nagtugot na an mga banal sa Jackson County pagpepersigiron; 5-10, An mga banal magdadanay kun sinda magsusunod sa mga kasugoan; 11-20, An pagtubos kan Sion maabot sa paagi nin kapangyarihan, asin an Kagurangnan mangengenot sa atubangan nin mga katawohan; 21-28, An mga banal magtitiripon sa Sion, asin an naghaya kan saindang mga buhay mananagboan ninda giraray; 29-40, Kadakul na mga katugangan pinagpangapudan na pag-organisaron an Kampo nin Sion asin magpaduman sa Sion; sinda pinagpromisahan nin kapangganahan kun sinda matapat.
*******
KATOTOHANAN Ako nagsasabi sa saindo, sakuyang mga amigo, hilnga, Ako magtatao saindo nin sarong kapahayagan asin kasugoan, na tanganing kamo puwedeng makaaram kun paano gumibo sa pagtrabaho kan saindong mga katungkulan mapanungod sa kaligtasan asin katubusan kan saindong mga katugangan, na nagkawaratak-watak sa kadagaan nin Sion;
2 Na pinagpaharale asin pinaghampak sa paagi nin mga kamot kan sakuyang mga kaiwal, na para sainda Ako magpapabulos paluwas kan sakuyang kaanggutan na mayong sukol sa sakuyang sadireng panahon.
3 Nin huli ta Ako an nagtugot sainda kan mga ini ngonyan, na tanganing baya saindang puwede mapanoan an sukol kan saindang kadaendatahan, na tangani baya an saindang kopa puwedeng mapano;
4 Asin baya sinda na nag-apod kan saindang mga sadire sa sakuyang pangaran mapuwedeng pagpapakulon sa kadikit na panahon na may lanit asin makuniot na kapadusahan, nin huli ta sinda dae naghinanyog gabos sa mga kaisipan asin mga kasugoan na Ako an nagtao sainda.
5 Kundi katotohanan Ako nagsasabi sa saindo, na Ako nakapagdekrito nin sarong dekrito na an sakuyang mga katawohan makapagreyalisar, habang saindang pinaghihinanyog gikan sa oras na ini sa hulit na Ako, an Kagurangnan na saindang Diyos, an magtatao sa sainda.
6 Hilnga sinda, nin huli ta Ako an nagdekrito kaini, magpoon na magdadanay laban sa sakuyang mga kaiwal magpoon sa oras na ini.
7 Asin sa paagi nin paghihinanyog na obserbaran an gabos na mga tataramon na ako, an Kagurangnan na saindong Diyos, an magtataram sa sainda, na sinda dae mag-uuntok na magdadanay sagkod na an mga kahadean nin kinaban ipinagpamugtak na sa irarom nin sakuyang mga bitis, asin an kinaban ipinagkatiwala na sa mga banal, tanganing pangaputan ini sagkod sa daeng kasagkoran.
8 Pero habang sinda habong magsusunod sa sakuyang mga kasugoan, asin dae maghinanyog na obserbaran an gabos na sakuyang mga tataramon, an mga kahadean nin kinaban magdadanay laban sainda.
9 Nin huli ta sinda pinagbugtak na magigin sarong liwanag sa kinaban, asin magigin mga paraligtas nin mga tawo;
10 Asin habang sinda bako an mga paraligtas nin mga tawo, sinda siring sa asin na nawaraan na nin asked, asin kaya nagin mayong kamugtakan kundi ipag-apon asin pagtitimak-timakan kan mga bitis nin mga tawo.
11 Pero katotohanan Ako nagsasabi sa saindo, ako nagdekrito na an saindong mga katugangan na nagkawaratak-watak magbabalik pasiring sa mga kadagaan nin saindang mga kamanahan, asin magtitindog sa mga basurahang lugar nin Sion.
12 Nin huli ta pagkatapos nin grabeng tribulasyon, siring na Ako nakapagsabi na sa saindo sa sarong dating kasugoan, minaabot an pagbebendisyon.
13 ilnga, iyo ini an mga bendisyon na ako an nagpromisa pagkatapos kan saindong mga tribulasyon, asin kan tribulasyon nin saindong mga katugangan--- an saindong katubusan, asin an katubusan kan saindong mga katugangan, ngani an saindong restorasyon sa kadagaan nin Sion, tanganing pag-eestablisaron, bako nang pagparadaog-daogon.
14 Daeng pagkukulang, kun saindang pagbasangon an saindang mga kamanahan sinda pagdadaog-daogon; nin huli ta Ako dae magpapatawad kun saindang pagbabasangon an saindang mga kamanahan.
15 Hilnga, Ako nagsasabi sa saindo, an pagtubos kan Sion kaipong mangyari sa paagi nin kapangyarihan;
16 Kun kaya, Ako magpapatalubo gikan sa sakuyang mga katawohan nin sarong tawo, na iyo an magpapamayo sainda na siring baya ki Moises na nagpamayo sa mga kaarakian nin Israel.
17 Nin huli ta kamo mga kaarakian nin Israel, asin gikan sa pisog ni Abrahan, asin kamo kinakaipuhan na pagpapamayuhan paluwas sa kauripnan sa paagi nin kapangyarihan, asin may sarong nakabukang takyag.
18 Asin siring na an saindong mga pinagpamayuhan kan enot, magin arog man lugod an pagtutubos nin Sion an pangyayari.
19 Kun kaya, dae pagtugutan na panluyahan an saindong mga puso, nin huli ta Ako nagsasabi sa saindo siring na Ako nagsabi sa saindong mga ama: An sakuyang anghel an magpapaitaas sa atubangan nindo, pero bako an sakuyang presensiya.
20 Kundi Ako nagsasabi sa saindo: An sakuyang mga anghel an magpapaitaas sa atubangan nindo, asin man an sakuyang presensiya, asin mapapanahon na kamo magsasadire nin mauswagon na kadagaan.
21 Katotohanan, katotohanan Ako nagsasabi sa saindo, na an sakuyang surugoon na si Joseph Smith, Jun., iyo an tawo na saiya Ako naghambing kan surugoon na saiya an Kagurangnan kan ubasan nagtaram sa parabola na Ako an nagtao sa saindo.
22 Kun kaya tugutan an sakuyang surugoon na si Joseph Smith, Jun., magsasabi sa kakusugan nin sakuyang harong, an sakuyang mga hoben na tawo asin an yaon sa katahawan an edad--- Pagtiriponon an saindong mga sadire na magkasararo sa kadagaan nin Sion, sa kadagaan na Ako an nagbakal nin kuwarta na pinagkonsagra para sa sakuya.
23 Asin tugutan an gabos na mga simbahan na magpadara nin mga madudunong na mga tawo na kaiba an saindang mga kuwarta, asin magbarakal nin mga kadagaan siring na Ako an nagsugo sainda.
24 Asin habang an sakuyang mga kaiwal minaabot laban sa saindo tanganing paharaleon kamo sa sakuyang mauswagon na kadagaan, na Ako an nagkonsagra na magin kadagaan nin Sion, maski na gikan sa saindong mga sadireng kadagaan sa arog kaining mga testimonya, na saindong pinagdara sa atubangan ko laban sainda, saindong pagsusumpaon sinda;
25 Asin an siisay na saindong pinagsumpa, Ako an magsusumpa, asin kamo an magbabalos para sakuya sa sakuyang mga kaiwal.
26 Asin an sakuyang presensiya mapapasaindo sa pagbabalos para sakuya sa sakuyang mga kaiwal, sagkod sa ikatulo asin ikaapat na henerasyon ninda na naoongis sako.
27 Tugutan na mayong tawo na matakot na ipaghaya an saiyang buhay para sa sakuyang kapakanan, nin huli ta an siisay na maghahaya kan saiyang buhay para sa sakuyang kapakanan makakanagbo kaini giraray.
28 Asin an siisay na bakong tugot na ipaghaya an saiyang buhay para sa sakuyang kapakanan bako kong desipulo.
29 Ini iyo an sakuyang kagustuhan na an sakuyang surugoon na si Sidney Rigdon magpapaabot kan saiyang boses sa mga kongregasyon sa may sirangang mga bansa, sa pag-aandam nin mga simbahan na magsunod sa mga kasugoan na Ako an nagtao sa sainda mapapanungod sa restorasyon asin katubusan nin Sion.
30 Ini iyo an sakuyang kagustuhan na an sakuyang surugoon na si Parley P. Pratt asin an sakuyang surugoon na si Lyman Wight dae dapat na magbalik pasiring sa kadagaan nin saindang mga katugangan, sagkod na sinda makapagkua nin mga kaibahan sa pagpaduman sa kadagaan nin Sion, sa paagi nin manampulo, o mga beynte, o mga singkuwenta, o sanggatos, sagkod na sinda nakaabot na sa numero na may gatos kan kusog nin sakuyang harong.
31 Hilnga ini iyo an sakuyang kagustuhan; maghagad asin kamo pagtataw-anan; pero an mga tawo dae pirmeng naggigibo kan sakuyang kagustuhan.
32 Kun kaya, kun kamo dae makakatipon nin limang gatos, maghanap nin maigot na tangani baya kamo makakatipon nin tulong gatos.
33 Asin kun kamo dae makakapagtipon nin tulong gatos, maghanap nin maigot na tangani baya kamo puwedeng makapagtipon nin sanggatos.
34 Pero katotohanan Ako nagsasabi sa saindo, sarong kasugoan Ako magtatao sa saindo, na kamo dae magpapaduman sa kadagaan nin Sion sagkod na kamo dae pa nakapagtipon nin sanggatos na kusog nin sakuyang harong, na makakaiba nindo pagpasiring sa kadagaan nin Sion.
35 Kun kaya, siring na Ako an nagsabi sa saindo, maghagad asin kamo makakaresibe; magpangadye nin maimbod na tangani baya an sakuyang surugoon na si Joseph Smith, Jun., makapag-iba sa saindo, asin magpangenot sa katahawan nin sakuyang mga katawohan, asin organisaron an sakuyang kahadean sa konsagradong kadagaan, asin pag-establisaron sa kaarakian nin Sion sa mga batas asin mga kasugoan na pinagtao na sin ipagtatao pa sana saindo.
36 An gabos na kapangganahan asin kamurawayan pinagdarang mangyari sa saindo sa paagi kan saindong kaigotan, katapatan, asin mga pangadyeon nin pagtubod.
37 Tugutan an sakuyang surugoon na si Parley P. Pratt magbiyahe kaiba an sakuyang surugoon na si Joseph Smith, Jun.
38 Tugutan an sakuyang surugoon na si Lyman Wight magbiyahe kaiba an sakuyang surugoon na si Sidney Rigdon.
39 Tugutan an sakuyang surugoon na si Hyrum Smith magbiyahe kaiba an sakuyang surugoon na si Frederick G. Williams.
40 Tugutan an sakuyang surugoon na si Orson Hyde magbiyahe kaiba an sakuyang surugoon na si Orson Pratt, na baya kinakaipuhan an sakuyang surugoon na si Joseph Smith, Jun., maghahulit sa sainda, na mangyaring mautob ining mga kasugoan na ako an nagtao sa saindo, asin ipagtada an iba sa sakuyang mga kamot. Arog kaini. Amen.

SEKSYON 102

An katitikan nin organisasyon kan enot na halangkaw na konseho nin Simbahan, sa Kirtland, Ohio, Pebrero 17, 1834. HS 2:28-31. An orihinal na katitikan pinagtala sa paagi ninda Elders Oliver Cowdery asin Orson Hyde. Duwang aldaw an nakalipas, an katitikan pinagkorehiran kan Propeta, pinagbasa sa halangkaw na konseho, asin akseptado kan konseho. Mga bersikulo 30-32, na igwang kagginibohan sa Konseho nin Doseng Apostoles, pinagdagdag ni Propetang Joseph Smith kan 1835 kunsoarin na pinag-andam niya ining seksyon para sa publikasyon sa Doktrina asin mga Tipan.

*******
1-8, Sarong halangkaw na konseho an pinagtalaga tanganing iyo an maghuhusay kan mga importanteng problema na nangyayari sa laog kan Simbahan; 9-18, An mga prosedyur pinagtao para sa pagdangog nin mga kaso; 19-23, An presidente kan konseho iyo an magtatao nin desisyon; 24-34, an prosedyur kan pag-apila ipinaghayag.
*******
Ngonyan na aldaw sarong heneral na konseho kan beynte kuwatrong halangkaw na mga pade pinag-asembliya sa harong ni Joseph Smith, Jun., sa paagi nin kapahayagan, asin pinagpadagos tanganing ma-organisa an halangkaw na konseho kan Simbahan ni Cristo, na kinabalihan nin doseng halangkaw na mga pade, asin saro o tulong mga presidente kun hinahagad nin pagkakataon.
2 An halangkaw na konseho pinagtalaga sa paagi nin kapahayagan para sa katuyuhan na iyo an maghuhusay kan mga importanteng problema na puwedeng mangyayari sa laog kan simbahan, na dae puwedeng mahusay kan simbahan o kan konseho nin bishop para sa karahayan kan mga partidos.
3 Si Joseph Smith, Jun., Sidney Rigdon asin Frederick G. Williams iyo an mga pinagbistong mga presidente sa paagi kan boses nin konseho; asin si Joseph Smith, Sen., John Smith, Joseph Coe, John Johnson, Martin Harris, John S. Carter, Jared Carter, Oliver Cowdery, Samuel H. Smith, Orson Hyde, Sylvester Smith, asin Luke Johnson, an mga halangkaw na pade, iyo an mga napii na tumindog bilang konseho para sa simbahan, sa paagi kan nagkasararong boses nin konseho.
4 An mga pinagngaranang mga konsehal tulos pinaghapot kun saindang pinag-akseptar an saindang mga kinatalagahan, aisn kun sinda baya matrabaho sa laog kaining opisina na uyon sa batas nin langit, sa siring kaini sinda gabos nagsimbag na saindang pinag-ako an saindang kinatalagahan, asin magpapano sa saindang mga opisina uyon sa grasya nin Diyos na pinagkaloob sa sainda.
5 An numero na kumponido an konseho, na iyo an nagboto sa pangaran asin para sa simbahan sa pagtatalaga kan mga pinagngaranan na mga konsehal nag-abot nin kuwarenta asin tulo, na iyo an kinasunod: siyam na halangkaw na mga pade; desisiyete na mga elders, apat na mga padi, asin treseng mga miyembro.
6 An pinagbotohan: Na an halangkaw na konseho mayong kapangyarihan na gumibo kun bakong pito sa pinagngaranan na mga konsehal, o an saindang regular na pinagtalagang mga karibay na yaon an presensiya.
7 Ining pito magkakaigwa nin kapangyarihan na magtalaga nin ibang halangkaw na mga pade, na iyo an saindang pinagkonsiderang maninigo asin capable na magtrabaho bilang karibay kun mayo baya ang presensiya kan mga konsehal.
8 An pinagbotohan: Na kun sakali magkaigwa nin anuman na bakante na puwedeng mangyari sa paagi nin kagadanan, pagkahale sa opisina nin huli sa kalapasan, o pagkahale gikan sa kasakupan nin pamamahala kan simbahan, nin siisay man kan pinagngaranan na mga konsehal, ini pagpapanoan sa paagi kan nominasyon kan presidente o mga presidente, asin pangyarihon sa paagi kan boses nin sarong heneral na konseho kan halangkaw na mga pade, na pinagtiripon para kaining katuyuhan, na gumibo sa pangaran kan simbahan.
9 An presidente kan simbahan, na iyo man an presidente kan konseho, ipagtatalaga sa paagi nin kapahayagan, asin pagbibistohon an saiyang administrasyon sa paagi kan boses nin simbahan.
10 Asin ini uyon sa dignidad kan saiyang opisina na siya dapat na magpangenot sa konseho kan simbahan; asin ini iyo an saiyang pribilihiyo na siya tatabangan kan duwa pang ibang mga presidente, na pinagtalaga na siring sa manera na siya sa saiyang sadire pinagtalaga.
11 Asin engkaso na mayo an saro o an kairiba sainda na pinagtalaga na iyo an magtarabang saiya, siya may kapangyarihan na magpangenot sa konseho na mayong katabang; asin engkaso na siya mismo an mayo, an ibang mga presidente may kapangyarihan na magpangenot na karibay niya, pareho o arinman sainda.
12 Kun noarin na sarong halangkaw na konseho kan Simbahan ni Cristo na regular na pinag-organisa, na uyon sa pinagpaliwanag na desinyo, ini magigin iyo an katungkulan kan doseng konsehal na magburunutan sa paagi nin numero, asin masunod an aramon kun siisay sa dose an magtataram na enot, magpopoon sa numero uno asin pasurunod-sunod na numero hanggan dose.
13 Kun noarin na ining konseho magkatiripon tanganing gumibo sa anuman na kaso, an doseng konsehal magkokonsidera kun baga ini sarong depisel o bako; kun ini bako, duwa sana kan mga konsehal an magtataram manungod kaini, na uyon sa pormang pinagsurat na.
14 Pero kun ini napag-isipan na depisel, apat an ipagtatalaga; asin kun mas depisel, anom; pero sa anuman na kaso mangyari na dae magsobra sa anom an maitalaga na magtataram.
15 An akusado, sa gabos na mga kaso, igwa nin karapatan sa kabanga kan mga konsehal, tanganing makalikay sa insulto o inhustisya.
16 Asin an mga konsehal na pinagtalaga na magtataram sa atubangan nin konseho iyo an magpresenta kan kaso, pagkatapos na an ebidensiya pinag-eksamin, na yaon sa tunay na liwanag sa atubangan nin konseho; asin an lambang tawo magtataram na uyon sa kapusugan asin hustisya,
17 Sindang mga konsehal na nakabunot nin padis na mga numero, na siring sa 2, 4, 6, 8, 10, asin 12, iyo ini an mga indibidwal na magtitindog para sa akusado, asin an maglilikay sa insulto asin inhustisya.
18 Sa gabos na mga kaso an nag-akusar asin an akusado magkakaigwa nin sarong pribilihiyo na magtataram para sa saindang mga sadire sa atubangan kan konseho, pagkatapos na an mga ebidensiya nagkadarangog na asin an mga konsehal na pinagtalagang magtaram para sa kaso nakapagtapos na kan saindang mga sasabihon.
19 Pagkatapos na an mga ebidensiya nagkadarangog na, an mga konsehal, nag-akusar asin akusado nakapagtaram na, an presidente magtatao na nin sarong desisyon uyon sa pagkasabot na kun saen siya igwa sa kaso, asin ipagpangapod sa doseng konsehal na papusugon ini sa paagi kan saindang mga pagburutohan.
20 Pero kun sakali na an natatadang mga konsehal, na dae pa nakapagtaram, o sa kiisay na saro sainda, pagkatapos na makapagdangog sa mga ebidensiya asin mga kapaliwanagan na mayong pinagdapigan, nakapagdiskubre pa nin sarong sala sa desisyon kan presidente, sinda mapuwedeng maipagmanipesto ini, asin an kaso magkakaigwa nin sarong pagdangog otro.
21 Asin kun, pagkatapos na sarong maingat na pagdangog otro, anuman na kadagdagan na paliwanag na ikapahiling sa kaso, an desisyon mapuwedeng pagbag-uhon tulos-tulos.
22 Pero engkaso na mayong kadagdagan na paliwanag an ipagtatao, an enot na desisyon iyo an magtitindog, an mayoriya kan konseho an may kapangyarihan sa pagdeterminar kaini.
23 Engkaso may kadepesilan uyon sa pagrespeto kan doktrina o prinsipyo, kun dae nagkaigwa nin sarong awad-awad na kasuratan tanganing mahimo an kaso na klarado sa mga isip kan konseho, an presidente puwedeng maghapot asin maaraman an isip nin Kagurangnan sa paagi nin kapahayagan.
24 An mga halangkaw na pade, kapag yaon sa ibang bansa, igwa nin kapangyarihan na mag-apod asin mag-organisa nin sarong konseho na arog sa manera kan mga naenot, tanganing maghusay nin mga problema, kunsoarin na an mga partidos o arinman sainda maghahagad kaini.
25 Asin an nasambit na konseho kan mga halangkaw na pade, magkakaigwa nin kapangyarihan na magtalaga nin saro kan saindang sadireng numero na iyo an magpangenot kan konsehong yan pansamantala.
26 Ini magigin iyo an katungkulan kan nasambit na konseho na magpadara, tulos-tulos, nin sarong kopya kan saindang mga paglilitis, na msarong bilog na tataramon kan testimonya na kasabay kan saindang desisyon, pasiring sa halangkaw na konseho sa tukawan kan Enot na Panguluhan nin Simbahan.
27 Kun mangyari na an partidos o arinman sainda nagin dae kuntento sa desisyon kan nasambit na konseho, sinda mapuwedeng mag-apila sa halanghaw na konseho sa tukawan kan Enot na Panguluhan nin Simbahan, asin magkaigwa nin pagdangog otro, na sa kasong ini paggigibohon na duman, na uyon sa naenot nang desinyong nasurat, na siring sa mayo pang desisyon an pinaghimo.
28 Ining konseho kan halangkaw na mga pade, sa ibang bansa pag-aapudon sana para sa pinakadepisel na mga kaso sa mga pansimbahang mga bagay; asin mayo nin kumon o ordinaryong kaso na ini magin manigo para sa pag-apod kan konsehong ini.
29 An nagbibiyahe o an napamugtak na mga halangkaw na pade sa ibang bansa igwa nin kapangyarihan na magsabi kun ini kinakaipuhan na mag-apod nin arog kaining konseho o dae.
30 Igwa nin pagkakaiba sa tahaw kan halangkaw na konseho o an nagbibiyaheng halangkaw na mga pade na yaon sa ibang bansa, asin an nagbibiyaheng halangkaw na konseho na binibilog kan doseng apostoles, sa saindang mga desisyon.
31 Gikan sa desisyon kan naenot magkakaigwa pa nin sarong pag-apila; pero kun gikan an desisyon kan huri mayo na.
32 An huri puwede sanang pag-apudon tanganing paghaputon kan heneral na mga awtoridad kan simbahan engkaso nin kalapasan.
33 Pinagresolba: Na an presidente o mga presidente kan tukawan kan Enot na Panguluhan kan Simbahan magkakaigwa nin kapangyarihan tanganing determinaron kun arin kaining kaso, na pinag-apila, an hustong manigo para sa pagdangog otro, pagkatapos pag-adalan an apila asin an mga ebidensiya asin mga tataramon na kasabay kaini.
34 An doseng mga konsehal magpapadagos na magburunutan o magborotohan, tanganing aramon kun siisay an dapat na magtaram enot, asin an mga minasunod iyo an nagin resulta: 1, Oliver Cowdery; 2, Joseph Coe; 3, Samuel H. Smith; 4, Luke Johnson; 8, Orson Hyde; 9, Jared Carter; 10, Joseph Smith, Sen.; 11, John Smith; 12, Martin Harris.

Pagkatapos nin pagpangadye an kumperensiya natapos na.


OLIVER COWDERY
ORSON HYDE
Mga Klerk

SEKSYON 101

Kapahayagan na ipinagtao ki Joseph Smith an Propeta, sa Kirtland, Ohio, Disyembre 16, 1833. HS 1:458-464. Sa panahon na ini an mga banal na nagkatiripon sa Missouri nagsasapo nin dakulang persekusyon. An mga mandarambong an nagtulak sainda gikan sa saindang mga eestaran sa Jackson County, asin an iba sainda naghingoha na maka-establisa kan saindang mga sadire sa Van Buren County, pero an persekusyon nagsusunod sa sainda. An pinakadakulang grupo kan mga banal sa panahon na idto yaon sa Clay County, Missouri. Mga panakot nin kagadanan laban sa mga indibidwal kan Simbahan iyo an kadakul. An mga katawohan nagkawaraan nin panharong na mga gamit, bado, alaga na hayop, asin iba pang personal na propriyedad, asin kadakul kan saindang mga pananom an nadestroso.
*******
1-8, An mga banal pinagpakulan asin pinagpasakitan nin huli kan saindang mga kalapasan; 9-15, An indignasyon nin Kagurangnan maglalamuyo sa mga nasyon, pero an saiyang mga katawohan pagtitiriponon asin paglilingaon; 16-21, An Sion asin an saiyang mga istaka pag-eestablisaron; 22-31, An natura nin buhay sa panahon nin Milenyo pinagtugdas; 32-42, An mga banal pagbebendisyunan asin pagbibiyayaan sa panahon na iyan; 43-62, An parabola kan matanos na tawo asin an mga kahoy nin olibo minapahayag kan mga kasakitan asin mapangyaring katubusan kan Sion; 63-78, An mga banal dapat na magpadagos kan saindang pagtitiripon na magkasararo; 76-80, An Kagurangnan pinag-establisa an Konstitusyon kan Estados Unidos; 81-101, An mga banal maghahagad tabang para sa kabayadan kan mga kasakitan, na uyon sa parabola kan babae asin bakong hustong hukom.
*******
KATOTOHANAN Ako nagsasabi sa saindo, mapanungod kan saindong mga katugangan na pinagpasakitan, asin pinagpersiger, asin pinagpaluwas gikan sa kadagaan nin saindang kamanahan---
2 Ako, an Kagurangnan, nagtugot sa kasakitan na mag-abot sa sainda, kun saen sinda pinagpasakitan, na konsekuwensiya kan saindang mga kalapasan;
3 Alagad Ako an magsasadire sainda, asin sinda mapapasakuya sa aldaw na iyan kunsoarin Ako maabot sa paghimo kan sakuyang mga alahas.
4 Kun kaya, sinda kaipuhan na pagpapakulon asin pagsusubukan, na siring ki Abraham, na pinagsugo na ipagdulot an saiyang bugtong na akeng lalake.
5 Nin huli ta gabos sinda na dae makakatagal sa pagpapakol, kundi magsisikwal sako, dae puwedeng pakakabanalon.
6 Hilnga, Ako nagsasabi sa saindo, nagkaigwa nin mga pagsalungatan, asin mga pag-iiriwal-iwal, asin pag-iiringgitan, asin mga pag-aaranggutan, asin mahalay asin kaaraman na mga pagmamawot sa pag-iriba ninda; kun kaya sa paagi kaining mga bagay saindang pinag-atian an saindang mga kamanahan.
7 Sinda maluya sa paghinanyog sa boses nin Kagurangnan na saindang Diyos; kun kaya, an Kagurangnan na saindang Diyos maluya sa paghihinanyog kan saindang mga pangadyeon, sa pagsimbag sainda sa aldaw kan saindang pagsasakit.
8 Sa aldaw kan saindang katuninongan sinda pasiparang pinagpahalagahan an sakuyang paghulit; pero, sa aldaw kan saindang pagsasakit, sa pangangaipo saka ninda namamangnohan Ako.
9 Katotohanan Ako nagsasabi sa saindo, maski na ngani kan saindang mga kasalan, an sakuyang daghan napapano nin pagkaherak sa sainda. Dae ko basta sinda pagpapabayaan; asin sa aldaw nin kaanggutan Ako maggigiromdom nin pagkaherak.
10 Ako nanunumpa, asin an dekrito pinagtao na sa paagi nin sarong kasugoan na Ako an nagtao sa saindo, na Ako magtutugot na maghulog an espada nin sakuyang kapung-utan para sa sakuyang mga katawohan; asin na Ako nakapagsabi na, ini maabot na mangyayari.
11 An sakuyang kapung-utan haranihon nang magbubulos na mayong kasukulan laban sa gabos na mga nasyon; asin ini Ako magigibo kunsoarin an kopa nin saindang kadaendatahan pano na.
12 Asin sa aldaw na iyan gabos na managboan na yaon sa laog nin torreng bantayan, o sa ibang tataramon, sa bilog na sakuyang Israel, maliligtas.
13 Asin sinda na nagkawaratak-watak, pagtitiriponon.
14 Asin gabos sinda na nagmumundo, paglilingaon.
15 Asin gabos sinda na pinagtao an saindang mga buhay nin huli kan sakuyang pangaran, pagkokoronahan.
16 Kun kaya, tugutan na an saindong mga puso paglingaon mapanungod sa Sion; nin huli ta an gabos na laman yaon sa sakuyang mga kamot; magin matuninong asin makaaram na Ako an Diyos.
17 An Sion dae paghahaleon sa saiyang kinamumugtakan, maski na ngani na an saiyang mga kaarakian nagkawaratak-watak.
18 Sinda na nagkatarada, asin mga dalisay an puso, mabaralik, asin magdudurulok sa saindang mga kamanahan, sinda asin an saindang mga kaarakian, na may mga kanta nin daeng katapusan na kaogmahan, tanganing magtutugdok sa mga basurahang lugar nin Sion---
19 Asin an gabos kaining mga bagay na tangani baya an mga propeta mapuwedeng magkaka-urutob.
20 Asin, hilnga, mayong ibang lugar na pinagngaranan kundi idto sanang Ako an nagngaran; ni magkakaigwa pa nin ibang lugar na pagngangaranan kundi idto sana baya na Ako an nagngaran, para sa gibo kan pagtitiripon-tipon kan sakuyang mga banal---
21 Sagkod na an aldaw mag-abot kunsoarin managboan na mayo nang kadagdagan na kuwarta para sainda; asin pagkasunod Ako magkakaigwa nin ibng mga lugar na Ako an nagngaran para sainda, asin sinda pag-aapudon na mga istaka, para sa mga kurtina o kusog nin Sion.
22 Hilnga, ini iyo an sakuyang kagustuhan, na gabos sinda na nag-aapod sa sakuyang pangaran, asin nagsasamba sakuya uyon sa sakuyang daeng kasagkorang ebanghelyo, dapat na magtiripon na magkasararo, asin maninindugan sa banal na mga lugar;
23 Asin mag-andam para sa Kapahayagan na iyo an maabot, kunsoarin na an belo kan tahob nin sakuyang templo, sa sakuyang tabernakulo, na nagtatago kan daga, paghahaleon, asin an gabos na laman magkakasararong makakahiling sakuya.
24 Asin an lambang malapaon na bagay, pareho kan tawo, o kan mga hayop nin lantad, o kan mga gamgam nin mga langit, o kan mga isda nin dagat, na nag-eerok sa bilog na lalawgon nin kinaban, pagkokonsumuhon;
25 Asin man idtong yaon na elemento magtutunaw sa grabeng init; asin an gabos na mga bagay magigin bag-o, na an sakuyang kaaraman asin kamurawayan mag-eerok sa bilog na kinaban.
26 Asin sa aldaw na iyan an anggot nin tawo, asin an anggot nin mga hayop, iyo, an anggot kan gabos na laman, magwawara gikan sa atubangan nin sakuyang lalawgon.
27 Asin sa aldaw na iyan an anuman baya na an siisay na maghahagad, ini ipagtatao sa saiya.
28 Asin sa aldaw na iyan si Satanas dae magkakaigwa nin kapangyarihan na magtentar sa kiisay na tawo.
29 Asin dae magkakaigwa nin kamondoan nin huli ta dae magkakaigwa nin kagadanan.
30 Sa aldaw na iyan an bag-ong mundag na ake dae magagadan sagkod na siya maggurang; asin an saiyang buhay magigin siring sa edad nin sarong kahoy;
31 Asin kunsoarin na isya magadan siya dae magtuturog, ini magsasabi sa kinaban, kundi magbabag-o sa pagkihat nin sarong mata, asin ipag-iitaas, asin an saiyang kapahingaloan magigin mamurawayon.
32 Iyo, katotohanan Ako nagsasabi sa saindo, sa aldaw na iyan kunsoarin an Kagurangnan mag-aabot, siya magpapahayag kan gabos na mga bagay---
33 Mga bagay na nakaagi na, asin mga nakatagong bagay na mayong tawo an nakakaaram, mga bagay kan kinaban, na kun saen baya ini pinaghimo, asin an katuyuhan asin an katapusan kaini---
34 Mga bagay na mas presyoso, mga bagay na yaon sa itaas, asin mga bagay na yaon sa ibaba, mga bagay na yaon sa kinaban, asin sa ibabaw nin kinaban, asin sa langit,
35 Asin gabos sinda na nagsapo nin persekusyon nin huli kan sakuyang pangaran, asin nagpakatatag sa pagtubod, maski na sinda pinagpangapudan na ipaghaya an saindang mga buhay para sakuya baya sinda makikibahagi kan bilog kong kamurawayan.
36 Kumbaya, dae matakot maski sagkod sa kagadanan; nin huli ta sa kinaban na ini an saindong kaogmahan bakong pano, kundi sa sakuya an saindong kaogmahan pano.
37 Kun kaya, dae pag-ingatan an hawak, ni an buhay kan hawak; kundi pag-iingatan an kalag, asin para sa buhay nin kalag.
38 Asin hanapon an lalawgon nin Kagurangnan pirme, na sa pagpasensiya saindong masasadire an saindong mga kalag, asin kamo magkakaigwa nin eternal na buhay.
39 Kunsoarin na an mga tawo pinagpangapudan para sa sakuyang daeng katapusan na ebanghelyo, asin makipagtipan nin sarong daeng katapusan na tipan, sinda ibinibilang siring sa asin kan kinaban na nalalasahan nin mga tawo;
40 Sinda pinagpangapudan na magin panlasa nin mga tawo; kun kaya, kun yang asin ngani kan kinaban nawaraan na nin askad; hilnga, nin kaya nagigin mayong marahay na kamanungdanan kaya mapuwedeng ipag-apon na sana asin pagtitimak-timakan kan mga bitis nin mga tawo.
41 Hilnga, uya an sarong kadunungan mapanungod sa mga kaarakian nin Sion, maski na ngani kadakul, pero bakong gabos; sinda nanagboan na mga paralapas, kun kaya sinda kinakaipuhan na pagpapakulon---
42 Siya na nagpapalangkaw kan saiyang sadire ipagpapaibaba, asin siya na nagpapaibaba kan saiyang sadire ipagpapalangkaw.
43 Asin ngonyan, Ako magpapahiling sa saindo nin sarong parabola, na tangani baya saindong maaaraman an sakuyang kagustuhan mapanungod sa pagtubos nin Sion.
44 May sarong kagalaang-galang na tawo na igwang sarong pedasong kadagaan, na piniling gayo; asin siya nagsabi sa saiyang mga surugoon: Magpahumali kamo pasiring sa sakuyang ubasan, duman sa pinakamarahay na parte kaining pedaso nin kadagaan, asin magtanom nin doseng kahoy na olibo;
45 Asin magbugtak nin mga parabantay sa palibot ninda, asin magtugdok nin sarong toree, na tangani baya an saro mapuwedeng makapaghiling sa kadagaan sa palibot kaini, na magin sarong parabantay sa ibabaw nin torre, na tanganing an sakuyang mga kahoy na olibo dae pagtutumbahon kunsoarin na an mga kaiwal mag-arabot sa pagkaraw asin magkurua sinda nin prutas kan sakuyang umahan.
46 Ngonyan, an mga surugoon kan kagalang-galang na tawo nagpaduman asin pinaggiribo an siring na an saindang kagurangnan iyo an ipinagsugo sainda, asin nagtanom nin mga kahoy na olibo, asin nagtugdok nin kudal sa palibot, aisn nagpamugtak nin mga parabantay, asin nagpoon na magtugdok nin sarong torre.
47 Asi habang sainda pa sanang ipinapamugtak an pundasyon kaini, sinda nagpoon na magsasabi sa saindang mga sadire: Asin ano baya an pangangaipuhan na igwa an satuyang kagurangnan sa torreng ini?
48 Asin nagkonsultahan nin haloy na panahon, nagsasabi sa pag-iriba ninda: Ano baya an pangangaipo igwa an satuyang kagurangnan kaining torre, di ba nahihiling niya ngonyan na sarong panahon nin katuninongan?
49 Bako daw marahay na ining kuwarta puwedeng maitao na sana sa mga pararibay? Nin huli ta daeng man bagang pangangaipo sa mga bagay na ini.
50 Asin habang sinda yaon sa manlaen-laen na kaisipan sa lambang saro sinda nagin mga hugakon na gayo, asin sinda dae naghihinanyog sa mga kasugoan kan saindang kagurangnan.
51 Asin an mga kaiwal nag-abot sa paagi nin banggi, asin pinagraot an mga kudal; asin an mga surugoon nin kagalang-galang na tawo napukaw asin nagkatarakot, asin nagdurulag; asin an mga kaiwal pinagdestroso an saindang mga pinagtrabaho, asin pinagturumba an mga kahoy nin olibo.
52 Ngonyan, hilnga, an kagalang-galang na tawo, an kagurangnan kan umahan, pinag-arapudan an mga surugoon, asin nagsabi sa sainda: Tadaw! Ano baya an kausa kaining dakulaon na karaotan?
53 Ginibo ba nindo an mga bagay siring na Ako an nagsugo saindo, asin--- pagkatapos na kamo nakapagtanom sa umahan, asin nagtugdok nin kudal sa palibot, asin magpamugtak nin mga parabantay sa mga ini--- nagtugdok man kamo nin torre, asin nagpamugtak nin sarong parabantay sa itaas nin torre, asin magbantay para sa sakuyang umahan, asin dae mangiturog, na baka baya an mga kaiwal mag-arabot saindo?
54 Asin hilnga, an parabantay na yaon sa itaas nin torre nahihiling kuta na an mga kaiwal habang sinda yaon pa sa harayo; asin pagkasunod kamo kuta na nakapaghimong makapag-andam asin makapagpugol sa mga kaiwal na pagpararaoton an mga kudal kaini, asin nailigtas kuta na an sakuyang umahan gikan sa mga kamot kan paradestroso.
55 Asin an kagurangnan kan umahan nagsabi sa saro kan saiyang mga surugoon: Magduman ka asin pagtiriponon mo na magkasararo an tada kan sakuyang mga surugoon, asin darahon an bilog na kusog kan sakuyang harong, na iyo an sakuyang paralaban, an sakuyang hoben na mga tawo, asin sinda na yaon sa katahawan na an mga edad sa pag-iriba kan bilog kong mga surugoon, na iyo an mga kusog kan sakuyang harong, laen lang sainda na ako an nagpiling ipagpawalat;
56 Asin magpaduman kamo diretso pasiring sa kadagaan na sakuyang umahan, asin tubuson an sakuyang umahan; nin huli ta ini pagsadire ko; Ako an nagbakal kaini nin kuwarta.
57 Kun kaya, magpaduman kamo diretso sa sakuyang kadagaan; raoton an mga kudal kan sakuyang mga kaiwal; patumbahon an saindang torre, asin pagwatak-watakon an saindang mga parabantay.
58 Asin habang sinda nagkatiripon na magkasararo laban saindo, ipagbabalos ako sa sakuyang mga kaiwal, na sa dae mahaloy ako maabot sa katadaan kan sakuyang harong asin pagsadirehon an kadagaan.
59 Asin an surugoon nagsabi sa saiyang kagurangnan: Noarin tabi papangyarihon an mga bagay na ini?
60 Asin siya nagsabi sa saiyang surugoon: Kunsoarin ako an may kagustuhan; magduman na kamo diretso, asin giboha an gabos na anuman na mga bagay na ako an nagsugo saindo;
61 Asin iyo ini an magin sakuyang selyo asin bendisyon sa saimo--- sarong matapat asin madunong na katabang sa katahawan nin sakuyang harong, sarong tagapagpamahala nin sakuyang kahadean.
62 Asin an saiyang surugoon nagpaduman diretso, asin ginibo an gabos na anuman na mga bagay na an saiyang kagurangnan an nagsugo saiya; asin pagkatapos nin kadakul na mga aldaw an gabos na mga bagay nagka-urutob.
63 Giraray, katotohanan Ako nagsasabi sa saindo, Ako magpapahiling sa saimo nin kadunungan na yaon sakuya mapanungod sa gabos na mga simbahan, habang sinda nagmamawot na paggigiyahan sa sarong tama asin matanos na dalan para sa saindang kaligtasan---
64 Na tangani baya an trabaho na pagtitiriponon na magkakasararo kan sakuyang mga banal maipagpapadagos, na Ako mapuwedeng maipagtugdok para sainda an sakuyang pangaran pasiring sa mga banal na lugar; nin huli ta an panahon nin pag-aani nag-abot na, asin an sakuyang tataramon kaipuhanan na mautob.
65 Kun kaya, Ako kaipong pagtitiriponon na magkakasararo an sakuyang mga katawohan, na uyon sa parabola kan trigo asin mga maroyparoy, na an trigo mapuwedeng maisaray kan mga paratipon na magkakaigwa nin eternal na buhay, asin pagkokoronahan nin selestiyal na kamurawayan, kunsoarin baya na Ako maabot sa kahadean kan sakuyang Ama tanganing magpanao nin pabuya sa lambang tawo uyon sa saiyang magiginibohan;
66 Habang an mga maroyparoy pagbubugkuson na magin mga bandol, asin an saindang mga gapos pinaghimong makukusog, na tanganing sinda pagsusuloon nin dae nagpaparong na kalayo.
67 Kun kaya, sarong kasugoan Ako matao sa gabos na mga simbahan, na sinda magpapadagos sa pagtitiripon na magkasararo pasiring sa mga lugar na Ako an nagngaran.
68 Daeng pagkukulang, siring na Ako nakapagsabi na sa saindo nin sarong dati nang kasugoan, dae pagtutugutan na an saindong pagtitiripon gibohon na hidale, ni sa paagi nin paglupad; kundi tugutan na an gabos na mga bagay maggibong mai-andam na gayo sa atubangan nindo.
69 Asin na tangani baya na an gabos na mga bagay maggibong mai-andam sa atubangan nindo, obserbaran baya an kasugoan na Ako an nagtao mapanungod kaining mga bagay---
70 Na nagsasabi, o nagtutukdo, na barakalon an gabos na mga kadagaan nin kuwarta, na mapuwedeng magbakal nin kuwarta, sa rehiyon na nakapalibot sa kadagaan na Ako an nagngaran na magin kadagaan nin Sion, para sa kapinunan kan pagtitiripon nin sakuyang mga banal;
71 Gabos na kadagaan na mapuwedeng pagbarakalon sa Jackson County, asin an mga rona na nakapalibot, asin iwalat an tada sa sakuyang kamot.
72 Ngonyan, katotohanan Ako nagsasabi sa saindo, tugutan na an gabos na mga simbahan magtitiripon na magkasararo an bilog nindong mga kuwarta; tugutan na an mga bagay na ini mangyari sa saindang panahon, kundi bako sa paghidali; asin obserbaran na mangyari na an gabos na mga bagay mai-andam sa atubangan nindo.
73 Asin tugutan na an kagalang-galang na mga tawo pagngaranan, maski na an madudunong na mga tawo, asin ipagpadara sinda tanganaing barakalon ining mga kadagaan.
74 Asin an mga simbahan na yaon sa sirangang mga nasyon, kunsoarin sinda pinagtugdok, kun sinda maghihinanyog kaining paghuhulit sinda mapuwedeng mambakal nin mga kadagaan asin pagtitiripon na magkakasararo para sainda; asin sa arog kaining paagi sinda mapuwedeng mag-establisa kan Sion.
75 Nagkaigwa na ngani ngonyan nin awad-awad nang nasasaray, iyo, magin an sarong abunda, tanganing tubuson an Sion, asin establisaron an saiyang napabayaang mga lugar, na dae na pagbabayaanan, na iyo an mga simbahan, na nag-aapod kan saindang mga sadire sa sakuyang pangaran, nagmamawot na makapaghihinanyog kan sakuyang boses.
76 Asin giraray Ako nagsasabi sa saindo, sinda na pinagwarak kan saindang mga kaiwal, ini an sakuyang kagustuhan na sinda dapat na magpapadagos sa paghagad para sa kabayadan, asin katubusan, sa paagi kan mga kamot ninda na pinagpamugtak bilang mga tagapagpamahala asin may awtoridad na mangingibabaw saindo---
77 Uyon sa mga batas asin konstitusyon kan mga katawohan, na Ako an nagtugot na maestablisa, asin dapat na imantine para sa mga karapatan asin proteksiyon kan bilog na laman, na uyon sa husto asin banal na mga prinsipyo;
78 Na an lambang tawo puwedeng gumibo sa doktrina asin prinsipyo mapapanungod sa paabuton, uyon sa moral na pagpipili nin tama na Ako an nagtao sa saiya, na tanganing an lambang tawo magigin may panimbagan para sa saiyang sadireng mga kasalan sa aldaw nin paghuhukom.
79 Kun kaya, ini bakong tama na an siisay na tawo dapat na magin yaon sa kauripnan an saro kan iba.
80 Asin nin huli kaining katuyuhan kaya Ako an nag-establisa kan Konstitusyon kaining kadagaan, sa paagi nin mga kamot kan madudunong na mga tawo na Ako an nagpangalaga para kaining katuyuhan, asin pagtutubuson an kadagaan sa paagi nin pagpapabulos nin dugo.
81 Ngonyan, para sa ano baya Ako makapaghambing kan mga kaarakian nin Sion? Ako maghahambing sainda sa parabola kan babae asin sa bakong hustong huwes, nin huli ta an mga tawo kaipo na pirmeng magpapangadye asin dae mapagal, na nagsasabi---
82 Igwa nin sarong huwes sa siyudad na dae natatakot sa Diyos, ni nagpapahalaga sa tawo.
83 Asin igwa nin sarong balo sa siyudad na iyan, asin siya nagdulok saiya, na nagsasabi: Ipagbalos mo po Ako sa sakuyang mga kaiwal.
84 Asin siya habo pa sa dikit na panahon, pero dae naghaloy siya nagsabi sa saiyang sadire: Maski na Ako dae natatakot sa Diyos, ni nagpapahalaga sa tawo, alagad nin huli ta ining balo nangungulibat sakuya na Ako an magbabalos para saiya, ta baka baya na an saiyang padagos na pagbabalik-balik saiyang pagpapagalon Ako.
85 Kaya Ako an maghahambing sa mga kaarakian nin Sion.
86 Tugutan sinda na magpapakimaherak sa mga pamitisan kan huwes;
87 Asin kun siya habong magdangog sainda, tugutan sinda na magpapakimaherak sa pamitisan kan gobernador;
88 Asin kun an gobernador habong magdangog sainda, tugutan sinda na magpapakimaherak sa pamitisan kan presidente;
89 Asin kun an presidente habong magdangog sainda, diyan na an Kagurangnan magtitindog asin magluluwas gikan sa saiyang tinataguang lugar, asin sa saiyang kapung-utan rurunuton an nasyon;
90 Asin sa saiyang mainiton na daeng pagkaogma, asin sa saiyang matindihon na kaanggutan, sa saiyang panahon, pagtatapason sinda na mga maririgsok, mga bakong matapat, asin mga bakong husto na mga tagapagpamahala, asin pinagngaranan ninda an saindang porsiyon sa pag-iriba nin mga hipokrito, asin sa mga mayong pagtubod;
91 Maski na ngani sa luwas nin kadikloman, na kun saen yaon an pagtatangis asin pananaghoy, asin pagrag-ot nin mga ngipon.
92 Kaya Magpangadye kamo, na tangani na an saindang mga talenga mabuksan kan saindong mga kinurahaw, na tangani baya Ako magigin maheherakon sa sainda, na tangani baya ining mga bagay dae mangyayari sa sainda.
93 Ano an sakuyang pinagsasabi sa saindo kinakaipong mangyayari, na tanganing an gabos na mga tawo mayong maikadahilan;
94 Na an mga madudunong na tawo asin mga tagapagpamahala mapuwedeng makadangog asin makaaram kan mga bagay na dae ninda pinagkonsidera;
95 Na Ako mapupuwedeng maipagpadagos na pagdadarahon na mangyari an sakuyang gibo, na sakuyang makangangalas na gibo, asin paggigibohon an sakuyang trabaho, an sakuyang makangangalas na trabaho, na tanganing an mga tawo puwedeng mamansayan an katahawan nin katanosan asin karigsokan, nagsabi an saindong Diyos.
96 Asin giraray, Ako nagsasabi sa saindo, ini kontraryo sa sakuyang kasugoan asin sa sakuyang kagustuhan na an sakuyang surugoon na si Sidney Gilbert magpapabakal kan sakuyang kamalig, na Ako an nagngaran para sa sakuyang mga katawohan, pasiring sa mga kamot kan sakuyang mga kaiwal.
97 Dae pagtugutan na an bagay na Ako an nagngaran puwedeng pag-atian kan sakuyang mga kaiwal, sa paagi kan pag-uyon ninda na pinag-apod an saindang mga sadire sa sakuyang pangaran;
98 Nin huli ta ini sarong mas makurion asin magabaton na kasalan laban sakuya, asin laban sa sakuyang mga katawohan, bilang konsekuwensiya kaidtong mga bagay na Ako an nagdekrito asin sa dae mahaloy maghahampak sa mga nasyon.
99 Kun kaya, ini an sakuyang kagustuhan na an sakuyang mga katawohan maninigong mag-ako, asin mangaputang mag-ako kan bagay na Ako an nagngaran para sainda, maski na sinda dae pa ngani pagtugutan na mag-eerok diyan.
100 Daeng pagkukulang, Ako dae nagsasabi na sinda dae mag-eerok diyan; nin huli ta habang sinda magbubunga nin prutas asin magtatrabahong maninigo para sa sakuyang kahadean sinda mag-eerok diyan.
101 Sinda magtutugdok, asin an iba dae magmamana kaini; sinda magtatanom nin mga ubasan, asin sinda magkakakan nin mga prutas ninda. Arog kaini. Amen.