SEKSYON 122

An tataramon nin Kagurangnan ki Joseph Smith an Propeta, habang siya sarong prisonero sa laog kan kulungan sa Liberty, Missouri, Marso 1839. HS 3:300-301.
*******
1-4, An mga katapusan nin kinaban maghahapot sa pangaran ni Joseph Smith; 5-7, An gabos niyang panganib asin kasakitan magtatao saiya nin eksperiyensiya asin magin para sa saiyang karahayan; 8-9, An Ake nin Tawo nagpakababang gayo sa sainda gabos.
*******
An mga katapusan nin kinaban maghahapot sa saimong pangaran, asin an mga hangal magpapamugtak saimo sa katuyaan, asin an impiyerno mag-aagabaab an kanggutan laban saimo;
2 Habang an tunay an puso, asin an madunong, asin an marangal, asin an mahuyoon, magmamawot nin paghulit, asin awtoridad, asin mga bendisyon pirme gikan sa saimong kamot.
3 Asin an saimong mga katawohan dae magtatalikod kontra saimo sa paagi kan testimonya nin mga traydor.
4 Asin maski na ngani na an saindang impluwensiya magtutulak saimo pasiring sa kaguluhan, asin sa laog nin mga rehas asin pader, ika pagtataw-anan nin parangal; asin baya sa sarong kadikit na panahon asin an saimong boses magigin mas terrible pa sa katahawan kan saimong mga kaiwal kesa sa mabangis na leon, nin huli sa saimong pagkamatanos; asin an saimong Diyos magtitindog na kataid mo sagkod sa daeng kasagkoran.
5 Kun ika baya pagpapangapudan tanganing magdanas nin kasakitan; kun ika yaon sa mga panganib kairiba an mga palsong katugangan; kun ika yaon sa mga panganib kairiba an mga tulisan; kun ika yaon sa mga panganib sa paagi nin daga o nin dagat;
6 Kun ika pinag-akusaran nin gabos na manera nin palsong mga akusasyon; kun an saimong mga kaiwal mangingibabaw saimo; kun sinda mag-agaw saimo sa pag-iriba kan saimong ama asin ina asin katugangang lalake asin babaye; asin kun sa may hinugot na espada an saimong mga kaiwal mag-aagaw saimo gikan sa kugos kan saimong agom, asin kan saimong mga kaarakian, asin an saimong matuang akeng lalake, maski na ngani siya anom na taon pa sana an edad, mangangaputan sa saimong bado, asin magsasabi, ama ko, ama ko, tadaw baya ta dae ka mag-untok kaiba mi? O, ama ko, ano baya an gigibohon kan mga tawo saimo? asin kun pagkatapos siya pagbubugnuton gikan saimo sa paagi nin espada, asin ika kakaladkaron pasiring sa prisohan, asin an saimong mga kaiwal mangunguyapa palibot saimo na siring kan mga lobo para sa dugo nin karnero;
7 Asin kun ika ipagkunkon pasiring sa hararom na kadikloman, o pasiring sa mga kamot nin mga paragadan, asin an sentensiya nin kagadanan ipinagsugo para saimo; kun ika ipagkunkon pasiring sa kairaroman; kun an nagdadaluyong na balod magkasararo laban saimo; kun an makusugon na paros magin iyo an saimong kaiwal; kun an mga kalangitan magtiripon nin kadikloman, asin an gabos na mga elemento mag-iribahan sa pagharang kan dalan; asin halangkaw sa gabos, kun an mismong pinakapanga nin impiyerno hirit na ipaguka nin dakula an nguso para saimo, aram mo, ake ko, na an gabos na ining mga bagay magtatao sa saimo nin karanasan, asin magigin para sa saimong karahayan.
8 An Ake nin Tawo nagpakababang gayo sa sainda gabos. Bako daw na ika mas halangkaw saiya?
9 Kun kaya, manindugan ka sa saimong dalan, asin an pagkasaserdote pirmeng mapasaimo; nin huli ta an saindang gapos nagkaburugkos na, sinda dae makakaagi. An saimong mga aldaw naaaraman na, asin an saimong mga taon dae pagbibilangon nin kulang; kun kaya, dae ka matakot kun ano an maggigibo nin tawo, nin huli ta an Diyos kaiba mo sagkod sa daeng kasagkoran.

SEKSYON 121

Pangadyeon asin propesiya na pinagsurat ni Joseph Smith an Propeta, habang siya sarong prisonero sa laog kan kulungan sa Liberty, Missouri, petsado Marso 20, 1839. HS 3:289-300. An Propeta kaiba an nagkapirang mga pag-iriba binulan nang yaon sa prisohan. An saindang mga petisyon asin apila na natutok sa ma ehekutibong mga opisyal asin husgado nagpalya na magdara sainda nin kahinggianan.
*******
1-6, An Propeta nagngangayo-ngayo sa Kagurangnan para sa mga nagsasakit na mga banal; 7-10, An Kagurangnan nagtaram nin katuninongan sa saiya; 11-17, Pinagsumpa an gabos sinda na nagparatang nin palsong kurahaw nin kalapasan laban sa mga katawohan nin Kagurangnan; 18-25, Sinda dae magkakaigwa nin karapatan sa pagkasaserdote asin pagkokondenahon; 26-32, Mamurawayon na mga kapahayagan ipinagpromisa para sainda na nagpakatatag sa paninindugan; 33-40, Tadaw ta kadakul an pinagpangapudan asin kadikiton sana ang pinagpili; 41-46, An pagkasaserdote dapat na gamiton sana sa katanosan.
*******
O Diyos, haen ka baya? Asin haen an pabelyon na nagtatago kan saimong lugar na pinagtataguan?
2 Gurano kahaloy na an saimong kamot napupugulan, asin an saimong mata, iyo an saimong purong mata, naghihiling gikan sa daeng kasagkoran na mga langit sa mga kamalian nin saimong mga katawohan asin saimong mga surugoon, asin an saimong mga talenga mabulingog kan saindang mga kinurahaw?
3 Iyo, O Kagurangnan, gurano kahaloy na sinda magsasapo kaining mga mararaot asin mayong batas na pagdadaog-daog, bago pa man na an saimong puso magin malumoy para sa sainda, asin an laog kan saimong daghan maantig sa pagkaherak para sa sainda?
4 O Kagurangnang Diyos na Pinakamakapangyarihan, kaggibo nin langit, kinaban, asin mga kadagatan, asin kan gabos na mga bagay na yaon sainda, asin iyo an magkontrol asin kapugulan sa diyablo, asin sa diklom asin sa daeng kamugtakan na kapamahalaan nin Sheol--- ipaghaya an saimong kamot; tuguti na an saimong mata magtadom; tuguti na an saimong estaran madara paitaas; tuguti na an saimong taguang lugar bako nang natatabunan; tuguti na an saimong talenga makapagdangog; tuguti na an saimong puso mapalumoy, asin an saimong daghan maantig sa pagkaherak para samuya.
5 Tuguti na an saimong kaanggutan magdanay laban sa samuyang mga kaiwal; asin sa kabagsikan kan saimong puso, sa paagi kan saimong espada ipagbalos kami kan samuyang kamalian.
6 Giromdoma baya an mga nagsasakit mong mga banal, O samuyang Diyos; asin an saimong mga surugoon magpapamuraway kan saimong pangaran sagkod sa daeng kasagkoran.
7 Ake ko, an katuninongan mapasaimong kalag; an saimong kaiwal asin an saimong mga pagsakit magin iyo alagad sa kadikiton na panahon;
8 Asin pagkasunod, kun saimong matagalan ining gayo, an Diyos an magpapamuraway saimo sa kaitaasan; ika magtatrayumpo na mangingibabaw sa gabos mong mga kaiwal.
9 An saimong mga amigo maggibong manindugan kaiba mo, asin sinda magbubunyi sa saimo giraray na may mainit na mga puso asin mainamigong mga kamot.
10 Ika dae pang gayo siring ki Job; an saimong mga amigo dae nakikipagkontrahan laban saimo, ni pinag-aakusaran ka nin kalapasan, siring na ginibo ninda ki Job.
11 Asin sinda na nag-aakusar saimo nin kalapasan, an saindang paglaom mawawara, asin an saindang mga inaasahan magtutunaw siring sa mapution na yelo na nagtutunaw sa atubangan nin mainitong banaag kan nagsisirang na saldang;
12 Asin man an Diyos pinagpamugtak an saiyang kamot asin pinagselyo an pagbabago nin panahon asin an mga kapanahunan, asin tanganing bulagon an saindang mga isip, na tanganing sinda dae makakasabot kan saiyang marbelosong mga nagkaginibohan; na tanganing saiyang maprubaran sinda man asin darahon sinda sa saindang sadireng kadayaan;
13 Asin nin huli ta an saindang mga puso koraptado, asin an mga bagay na bulanos nindang pagdadarahon sa iba pa, asin pagkamoot na magpapakasakit kan iba, puwedeng mag-abot sa saindang mga sadire sa pinakamatinding pangyayari;
14 Na tanganing sinda man mawaraan gana, asin an saindang paglaom puwedeng mawara;
15 Asin sa dae kadakul na mga taon magpoon ngonyan, na sinda asin an saindang kapag-arakian pagsisighidon gikan sa irarom nin langit, nagsabi an Diyos, na tanganing mayong saro sainda an mawawalat na nakatindog sa may pader.
16 Pinagsusumpa gabos sinda na nag-aalsa nin buol laban sa sakuyang pinaglahidan, nagsabi an Kagurangnan, asin nagkukurahaw na sinda nagkasala kunsoarin na sinda dae nagkasala sa atubangan ko, nagsabi an Kagurangnan, kundi naggibo kan bagay na manigo sa sakuyang mga mata, asin na Ako an nagsugo sainda.
17 Pero sinda na nagkukurahaw nin kalapasan naggibo kaini nin huli ta sinda mga surugoon nin kasalan, asin mga kaarakian nin dae pagsusunod sa sadiri ninda.
18 Asin sinda na nanunumpa nin palso laban sa sakuyang mga surugoon, na tanganing sinda puwedeng madara sainda pasiring sa kauripnan asin kagadanan---
19 Herak man sainda; nin huli ta saindang nakulgan an sakuyang kaarakian sinda pagpuputulon gikan sa mga ordinansa kan sakuyang harong.
20 An saindang basket dae mapapano, an saindang mga harong asin an saindang mga kamalig mawawara, asin sinda an saindang mga sadire kaoongisan ninda na nag-oomaw sainda.
21 Sinda dae magkakaigwa nin karapatan sa pagkasaserdote, ni an saindang kapag-arakian na masunod sainda gikan sa lambang henerasyon sagkod sa henerasyon na maabot.
22 Ini kuta na mas marahayon para sainda na sarong pingas-gapo an pinagbitay sa saindang mga liog, asin sinda magkakaralamos sa kairaroman nin dagat.
23 Herak sa gabos ninda na nagpasakit sa sakuyang mga katawohan, asin nagpahale, asin nanggadan, asin nagpatotoo laban sainda, nagsabi an Kagurangnan nin mga Hukbo; sarong henerasyon kan mga halas an dae makakaligtas sa kasakitan kan impiyerno.
24 Hilnga, an sakuyang mga mata nakakahiling asin nakakaaram kan gabos na saindang mga ginigibo, asin Ako igwa bilang reserba nin sarong hidaling paghuhukom sa panahon na iyan, para sa sainda gabos;
25 Nin huli ta igwa nin sarong panahon an pinagtakda para sa lambang tawo, na uyon sa saiyang mga nagkaginiribohan.
26 An Diyos magtatao sa saindo nin kaaraman sa paagi kan saiyang Banal na Espiritu, iyo, sa paagi kan dae maisasabing regalo kan Espiritu Santo, na dae pa naipahayag sa mundo magpoon pa kaidto sagkod ngunyan;
27 Na an satuyang mga ninuno pinaghahalat na may kahaditang pagmamawot na maipagpapahayag sa mga huring panahon, na sa saindang mga kaisipan pinagtutukdo na sa paagi nin mga anghel, bilang pinagtatagong reserba para sa kabilugan kan saindong kamurawayan;
28 Sarong panahon na maabuton na kun saen mayong maitatago, na kumbaga igwa nin sarong Diyos o kadakul na mga diyos, sinda ipagpapahayag.
29 An gabos na mga trono asin pinagsasakupan, mga prinsipalidad asin kapangyarihan, ipagpapahayag asin ipagpapamugtak sa sainda gabos na maigot na nagpakatatag para sa ebanghelyo ni JesuCristo.
30 Asin man, kun igwang mga kasagkudan na pinagpamugtak sa mga langit o sa mga kadagatan, o sa dagang na kadagaan, o sa saldang, bulan o mga bitoon---
31 Gabos na mga panahon kan saindang mga pag-inog, gabos na pinagtakdang mga aldaw, bulan, asin taon, asin gabos na mga aldaw kan saindang mga aldaw, bulan, asin taon, asin gabos na saindang mga kamurawayan, batas, asin pinagpamugtak na mga panahon; ipagpapahayag sa mga aldaw kan dispensasyon sa kabilugan nin mga panahon---
32 Uyon kaidtong pinag-ordina sa katahawan kan Konseho nin Eternal na Diyos nin gabos na ibang diyos bago pa kaining kinaban kaidto, na dapat na pinagreserba hanggan sa paghihinapos asin katapusan kaini, kunsoarin na an lambang tawo maglalaog pasiring sa saiyang eternal na presensiya asin pasiring sa saiyang immortal na kapahingaloan.
33 Sagkod noarin na mag-aagos an mga tubig na maation? Anong kapangyarihan na magpapadanay sa mga kalangitan? Ngani baying marahay na an tawo na maiunat an saiyang maluyang takyag tanganing papunduhon an salog nin Missouri sa pinagdekritong padumanan, o pabalikon ini paitaas, na siring sa pagpupugol sa Makapangyarihan na magpapabulos paibaba nin kaaraman gikan sa langit pasiring sa mga pamayo kan mga Banal sa mga Huring Aldaw.
34 Hilnga, igwa nin kadakul na pinagpangapudan pero kadikiton sana an pinagpili. Asin tadaw baya tad aw sinda pinili?
35 Nin huli ta an saindang mga puso pinagpamugtak na gayo sa mga bagay kaining kinaban, asin pinaghihingohang makamit an mga honra kan mga tawo, na sinda dae na nakanuod kaining sarong leksiyon---
36 Na an mga karapatan sa pagkasaserdote bakong separadong konektado sa mga kapangyarihan nin langit, asin na an mga kapangyarihan nin langit dae magigin kontrolado na magkakaraputan sana sa pangingibabaw kan mga prinsipyo asin katanosan.
37 Na sinda puwedeng ipagpuputong sa satuya, ini totoo; pero kunsoarin na satuyang pinaggigibo na pagtatahuban an satuyang mga kasalan, o tanganing ipagpangalandakan an satuyang kapaabaw-abawan, an satuyang daeng kamumugtakan na ambisyon, o tanganing paggigibohon an pagkontrol o pananakop o an pamimirit nin mga kalag kan mga kaarakian nin mga tawo, sa anuman na antas na bakong katanosan, hilnga, an mga kalangitan maghahale kan saindang mga sadiri; an Espiritu nin Kagurangnan magtatangis; asin kunsoarin na ini paghahaleon, Amen sa pagkasaserdote o sa awtoridad kan tawong iyan.
38 Hilnga, hayag na siya makaaram, siya pinagwalat sa sadire niya, tanganing maninipa laban sa mga tunok, tanganing persigiron an mga banal, asin tanganing makipaglaban kontra sa Diyos.
39 Satuyang nanunudan sa paagi nin mamundong eksperiyensiya na ini natura asin disposisyon kan haros gabos na mga tawo, na habang sinda nagkakapot nin sarong kadikit na awtoridad, siring sa paghuna ninda, sinda tulos nagpopoon sa paggigibo nin bakong matanos na pananakop.
40 Kaya kadakul an pinagpangapudan, kaya lang dikiton an pinagpili.
41 Mayong kapangyarihan o impluwensiya an makakagibo o dapat na pagmamantiniron sa paagi kan birtud nin pagkasaserdote, kundi sana sa paagi nin maigot na paghihikayat, sa paagi nin pagkamatinios, sa paagi nin kalumhukan asin kahuyoan, asin sa paagi nin dae nagkukupas na pagkamoot;
42 Sa paagi nin pagkamaheherakon, asin tunay na kaaraman, na iyong gayo an nakakapagpadakula sa kalag na mayong hipokrisiya, asin mayong daya---
43 Magsasabi sa tamang pagkakataon na may kataruman, kapag pinagpapaggibo kan Espiritu Santo; asin pagkatapos hayag na magpapahiling nin sasrong mabulanos na pagkamoot sa saiya na saimong pinagsabihan, na baka baya siya magturing saimo na sarong kaiwal;
44 Na tangani baya na saiyang maaaraman na an saimong katapatan mas matibay pa kesa mga gapos nin kagadanan.
45 Tuguti man na an saimong daghan mapapano nin pagkamoot para sa gabos na mga tawo, asin sa pagharongon nin pagtubod, asin tuguti na an kabanalan iyo an magdanay sa saimong kaisipan nin mayong pag-untok; sa arog kaini an saimong tiwala magigin makusugon sa atubangan nin Diyos; asin an doktrina nin pagkasaserdote iyo an magsusunsay kan saimong kalag siring sa mga ambon na gikan sa langit.
46 An Espiritu Santo iyo an magigin pirme mong kaibahan, asin an saimong setro iyo an daeng kupas na setro nin katanosan asin katotoohan; asin an saimong nasasakupan iyo an daeng katapusan na nasasakupan, asin sa mayong pamimirit na paagi ini magdadanay sa saimo sagkod pa man asin mayong katapusan.