SEKSYON 5

Kapahayagan na itinao sa paagi ni Joseph Smith an Propeta, sa Harmony, Pennsylvania, Marso 1829, sa kahagadan ni Martin Harris. HS 1:28-31.

*******

1-10, An henerasyon na ini makakaresibe kan tataramon nin Kagurangnan sa paagi ni Joseph Smith; 11-18, Tulong testigos an magpapatotoo sa Libro ni Mormon; 19-20, An tataramon nin Kagurangnan patutunayan na arog kan mga nakaaging panahon; 21-35, si Martin Harris puwedeng magsosolsol asin magin saro sa mga testigos.

*******

Hilnga, Ako an nagsasabi sa saimo, na habang an sakuyang surugoon na si Martin Harris nagmamawot nin patotoo sa sakuyang kamot, na tanganing ika, an sakuyang surugoon Joseph Smith, Jun., an may kapot kan mga Lamina na kun baya ika nagpapatotoo asin pinapatotohanan na saimong naresibe gikan sako;
2 Asin ngonian, hilnga, iyo ini an saimong sasabihon sa saiya--- siya na nagtataram saimo, nagsabi saimo: Ako, an Kagurangnang Diyos, asin nagtao kaining mga bagay sa saimo, an sakuyang surugoon na si Joseph Smith, Jun., asin nagsugo saimo na ika dapat na tumindog bilang sarong testigo kaining mga bagay;
3 Asin Ako nagkausa na ika dapat na maglaog sa sarong tipan sakuya, na dae mo dapat na ipagpahiling sa sainda laen lang duman sa mga tawong idto na pinagsambit na sakuyang pinagsugo saimo; asin ika mayong kapangyarihan na mangingibabaw sainda laen lang na Ako ipagtugot ini sa saimo.
4 Asin ika igwa nin sarong regalo na magsalin kan mga lamina; asin iyo ini an pinaka-enot na regalo na sakuyang pinagtao sa saimo; asin Ako nagsusugo na dae ka dapat na mag-ako nin ibang regalo hanggan sa an sakuyang katuyuhan mautob na sa bagay na ini; nin huli ta mayo akong ipagtatao na ibang regalo sagkod na ini matapos na.
5 Katotohanan, Ako nagsasabi sa saimo, na kapaitan an mag-aabot sa mga namamanwaan kan kinaban kun sinda dae maghihinanyog sa sakuyang mga tataramon;
6 Nin huli ta magpoon ngonian ika pinag-ordinahan asin maglalakaw asin magtataram kan sakuyang mga tataramon sa mga kaarakian nin mga tawo.
7 Hilnga, kun sinda dae magtutubod kan sakuyang mga tataramon, sinda dae magtutubod sa saimo, sakuyang surugoon na si Joseph, kun ini posible na saimong ipagpahiling sa sainda an gabos na ining mga bagay na sakuyang pinagpaako sa saimo.
8 Oh, ining mayong paniniwala asin tiso an liog na henerasyon--- an sakuyang kaanggutan nakahaya laban sainda.
9 Hilnga, katotohanan ako nagsasabi sa saimo, Ako an nagreserba kaidtong mga bagay na sakuyang ipinagkatiwala sa saimo, sakuyang surugoon na si Joseph, para sa sarong madunong na katuyuhan para sakuya, asin ini paghimoon na maipagpabantog sa paabuton na mga henerasyon;
10 Alagad ining henerasyon magkakaigwa kan sakuyang tataramon sa paagi mo;
11 Asin sa kadagdagan kan saimong testimonya, iyo an testimonya kan tulo kan sakuyang mga surugoon, na sakuyang pag-aapudon asin pag-oordinahan, sa sainda sakuyang ipagpapahiling ining mga bagay, asin sinda magraralakaw na dara an sakuyang mga tataramon na ipinagtao sa paagi mo.
12 Iyo, saindang magkakaararaman na may kaseguruhan na an mga bagay na ini nanggad tunay, nin huli ta gikan sa langit Ako magdedeklara kaini sa sainda.
13 Ako magtatao sainda nin kapangyarihan na saindang mahihiling asin mamamansayan ining mga bagay bilang iyo nanggad sana;
14 Asin mayo nang iba pa na Ako magtatao kaining kapangyarihan, na magreresibe kaining parehong testimonya sa pag-iriba kaining henerasyon, ini iyo an kapinunan kan pagsirang paitaas asin an pagluluwas kan sakuyang simbahan gikan sa kaparangan--- matingkadon na arog kan bulan, asin madahumon na arog kan saldang, asin terible na arog kan armada na may mga bandera.
15 Asin an testimonya kan tulong testigo na ako an magpapadara kan sakuyang tataramon.
16 Asin hilnga, an siisay man na magtutubod kan sakuyang mga tataramon, sainda ako magbibisita na igwang manipestasyon kan sakuyang Espiritu; asin sinda ipagpapangaki para sakuya, magin sa paagi kan tubig asin kan Espiritu---
17 Asin ika kaipong maghahalat sa kadikit na panahon, nin huli ta ika dae pa na-ordinahan---
18 Asin an saindang testimonya magdadanay man para sa kondenasyon kaining henerasyon kun saindang pagpapatagason an saindang mga puso laban kan mga ini;
19 Nin huli ta sarong makakapungaw na sumpa an mag-aabot sa pag-iriba kan mga namamanwaan nin kinaban, asin magpapadagos na pagpapabuluson sa pana-panahon, kun sinda dae magsosolsol, hanggan na an kinaban mawaraan nin laman, asin an mga namamanwaan nagkaka-urubos na asin dagos nang nadestroso sa paagi nin liwanag kan sakuyang pag-abot.
20 Hilnga, Ako nagsasabi saimo kaining mga bagay, maski ngani na sakuya man na sinabi sa mga katawohan an manunungod sa destruksiyon kan Jerusalem; asin an sakuyang tataramon mapapatunayan sa panahon na ini arog na ini napatunayan na kaidto.
21 Asin ngonian Ako nagsusugo saimo, sakuyang surugoon na si Joseph, magsolsol asin maglakaw ka na mas may katanusan sa atubangan ko, asin dae ka na magpadara sa panghihikayat nin mga tawo;
22 Asin na ika magin pusog na magsusunod sa mga kasugoan na kun saen Ako an nagsusugo saimo; asin kun saimong gigibohon ini, hilnga Ako magtatao sa saimo nin eternal na buhay, maski na ikaw paggagadanon.
23 Asin ngonian, giraray, Ako nagtataram sa saimo, sakuyang surugoon na si Joseph, mapanungod sa tawo na nagmamawot na magtestigo---
24 Hilnga, Ako nagsasabi sa saiya, siya nagpalangkaw kan saiyang sadire asin bakong kawad na nagpakumbaba kan saiyang sadire sa atubangan ko; pero kun siya magduduko sa atubangan ko, asin magpapakumbaba kan sadire sa maigot na pagpapangadye asin pagtutubod, sa kaimbodan kan saiyang puso, kun kaya Ako magtutugot sa saiya na mahihiling an mga bagay na saiyang pinagmamawot na mahihiling.
25 Asin kaya siya magsasabi sa mga katawohan kaining henerasyon: Hilnga, Ako nakahiling kan bagay na an Kagurangnan iyo an nagpahiling ki Joseph Smith, Jun., asin Ako nakakaaram na may kaseguruhan na an mga ini totoo, nin huli ta sakuyang nahihiling sinda, nin huli ta sinda ipinagpahiling sa sakuya sa paagi nin kapangyarihan nin Diyos asin bako nin tawo.
26 Asin Ako an Kagurangnan nagsusugo saiya, an sakuyang surugoon na si Martin Harris, na siya dae na magsasabi sa sainda mapanungod kaining mga bagay, laen lang na siya magsasabi: Ako nakakahiling sainda, asin sinda ipinagpahiling sa sakuya sa paagi nin kapangyarihan nin Diyos; asin iyo ini an mga tataramon na saiyang pagsasabihon.
27 Alagad kun siya magsisikwal kaini siya nagbabalga sa tipan na saiyang pinagtipanan kaidto sa sakuya, asin hilnga, siya pinagkokondena.
28 Asin ngonian, laen lang na siya magpapakumbaba kan saiyang sadire asin aminon sa sakuya an mga bagay na saiyang nagkaginibohan, na sala, asin makikipagtipan sakuya na saiyang pagsusunudon an sakuyang mga kasugoan, asin maghihimong magtubod sa sakuya, hilnga, Ako nagsasabi sa saiya, siya dae makakapaghiling, nin huli ta Ako dae magtutugot sa saiya na makapaghiling kan mga bagay na sakuyang pinagtaram na.
29 Asin kun iyo ini an kaso, Ako nagsusugo saimo, sakuyang surugoon na si Joseph, na saimong sasabihon sa saiya, na siya maggigibo nin ano pa man, ni abalahon niya pa ako otro sa bagay na ini.
30 Asin kun iyo ini an kaso, hilnga, Ako nagsasabi sa saimo Joseph, kapag ikaw nakapagsalin na nin nagkapirang mga pahina ika magpupundo nguna sa kadikit na panahon, magin sagkod na Ako magsusugo saimo giraray; kaya ika puwede nang magsalin giraray.
31 Asin laen lang na saimong gigibohon ini, hilnga, ika mayo nang regalo asin sakuyang kukuahon an mga bagay na Ako an nagkatiwala sa saimo.
32 Asin ngonian, nin huli ta sakuyang nahihiling an naka-abang na naghahalat na destrosohon ka, iyo, sakuyang nahihiling na kun an sakuyang surugoon na si Martin Harris dae nanggad magpapakumbaba kan saiyang sadire asin makaresibe nin sarong patotoo gikan sa sakuyang kamot, na tanganing siya mahuhulog pasiring sa pagbabalga.
33 Asin igwa nin kadakul na naka-abang na naghahalat na destrosohon ka gikan sa lalawgon kaining kinaban; asin nin huli sa kausang ini, na tanganing an saimong mga aldaw puwede pang mapalawig, Ako nagtatao sa saimo kaining mga kasugoan.
34 Iyo, nin huli sa kausang ini Ako nagsasabi: Magpundo ka, asin magtindog nin tuninong hanggan sa Ako magsugo saimo, asin Ako maghahaya nin mga paagi kun saen ika mapupuwedeng makapaggibo nin bagay na sakuyang pinagsusugo saimo.
35 Asin kun ika nagin pano nin pagtubod sa sakuyang mga kasugoan, ika ipagpapa-itaas sa huring aldaw. Amen.

SEKSYON 4

Kapahayagan na pinagtao sa paagi ni Joseph Smith an Propeta sa saiyang ama, Joseph Smith, Sen., sa Harmony, Pennsylvania, Pebrero 1829. HS 1:28

*******

1-4, an balyenteng serbisyo an nagliligtas sa mga ministro nin Kagurangnan; 5-6, an Makadiyos na mga katangian iyo an magkuwalipika sainda para sa pagmiministeryo; 7, an mga bagay nin Diyos iyo an dapat na paghahanapon.

*******

Ngonian hilnga, sarong makangalason na gibo iyo an haranihon nang mangyayari sa mga kaarakian nin mga tawo.
2 Kun kaya, O ika na maghangad na magserbisyo sa Diyos, hingohaon na ika magsiserbe saiya, sa bilog mong puso, kakayahan, isip asin kusog, na tanganing ika puwedeng magtitindog na mayong lamat nin kabasulan sa atubangan nin Diyos sa huring aldaw.
3 Kun kaya, kun ika igwang mga pagmamawot na magsirbe sa Diyos ika pinapangapudan sa pagtrabaho;
4 Nin huli ta hilnga an bukid mapution na sa pag-ani; asin uya, siya na maggagapas kan saiyang pang-asyab sa bilog niyang kakayahan, siya man sana an nagsasaray na tanganing siya dae mapapara, alagad nagdadara nin kaligtasan sa saiyang kalag.
5 Asin an pagtubod, paglaom, pakipagkapwa asin pagkamoot, na igwang mata na tutok sa kamurawayan nin Diyos, nagkuwalipika saiya para sa trabaho.
6 Giromdoma baya an pagtubod, pagkamarangal, kaaraman, kahuyoan nin boot, pagpapasensiya, kabootan na pangtugang, pagkamaka-diyos, pakipagkapwa, kapakumbabaan, katiyagaan.
7 Maghagad, asin ika makakaresibe; magtuktok asin ini pagbubuksan sa saimo. Amen.

SEKSYON 3

Kahayagan na itinao ki Joseph Smith an Propeta, sa Harmony, Pennsylvania, Hulyo 1828, may relasyon sa pagkawara kan 116 na pahina kan manuskripto na translado gikan sa enot na parte kan Libro ni Mormon, na pinag-apud na “Libro ni Lehi.” An Propeta nagduwa-duwang magtugot na an mga pahina ipasa gikan sa saiyang pangangataman pasiring ki Martin Harris, na nakapagsirbe sa sarong kadikiton na panahon bilang eskriba sa pagsalin kan Libro ni Mormon. An kapahayagan ipinagtao sa paagi kan Urim asin Thummim. HS 1:21-23. Hilnga man an Seksyon 10.

*******

1-4, An kurso nin Kagurangnan sarong eternal na pag-inog; 5-15, si Joseph Smith kaipuhan na gayong magsolsol o mawawara an regalo sa pagsalin; 16-20, an Libro ni Mormon pinagluwas tanganing ipagliligtas an banhi ni Lehi.

*******

An mga trabaho, asin mga desinyo, asin mga katuyuhan nin Diyos dae mabibigo, ni an mga ini mangyayari na mayong kamugtakan.
2 Nin huli ta an Diyos dae naglalakaw sa baluktot na mga dalan, ni magbaling sa toong parte ni sa wala, ni minabago gikan sa bagay na saiya nang pinagsabi, kun kaya an saiyang mga data tanos, asin an saiyang kurso sarong eternal na pag-inog.
3 Giromdoma baya, giromdoma na bako an mga gibo nin Diyos an nabibigo, kundi an gibo nin mga tawo;
4 Nin huli ta maski na ngani an sarong tawo nagkaigwa nin kadakul na mga kapahayagan, asin nagkaigwa nin kapangyarihan, na gibohon an kadakulon na mga dakulaon na mga trabaho, alagad kun siya naghahambog kan saiyang sadireng kagustuhan asin karnal na mga pagmamawot, siya mahuhulog asin magsasapo kan pagbalos nin sarong hustong Diyos sa saiya.
5 Hilnga, ika pinagkatiwalaan kaining mga bagay, pero gurano ka-estrikto an saimong mga kasugoan; asin giromdoma man an mga promisa na pinaghimo para saimo, kun ikaw dae nagbalga sainda.
6 Asin hilnga, nagkapirang beses mo na baya pinagbabalga an mga kasugoan asin mga leyes nin Diyos, asin nagsunod sa mga pahihikayat nin mga tawo.
7 Nin huli ta, hilnga, ika dae dapat na magkaigwa nin takot sa tawo sa sobra pa sa Diyos. Maski na ngani an mga tawo pinagbabalewala an mga pagtukdo nin Diyos, asin kinaka-ongisan an saiyang mga tataramon.
8 Alabad ika dapat na nagin tapat; asin siya kuta na pinaghaya an saiyang takyag asin nagsuporta saimo laban sa gabos na mangirhat na pantusok nin kalaban; asin siya kuta na kaiba mo sa kada oras nin kaguluhan.
9 Hilnga, ika si Joseph, asin ikaw pinagpili na nganing gibohon an trabaho nin Kagurangnan, pero nin huli kan pagbabalga, kun ika mayong pagkakamangno ika mahuhulog.
10 Pero giromdoma baya, an Diyos maheherakon; kun kaya, magsolsol kan bagay na saimong nagkaginibohan na kontraryo sa kasugoan na sakuyang pinagtao saimo, asin ika pinili pa, asin pinag-apud pa giraray na magtrabaho;
11 Laen lang na saimong gibohon ini ika ipagpapatunod asin magin arog sa ibang mga tawo, asin ta mayo nang regalo.
12 Asin sa panahon na saimong ipagpatunod an bagay na an Diyos iyo an nagtao saimo nin paghiling asin kapangyarihan na magsalin, saimong ipinagpatunod an bagay na sagrado pasiring sa mga kamot nin sarong marigsok na tawo,
13 Na iyo an nagbalewala kan mga pagtukdo nin Diyos, asin nagbalga kan pinakasagradong mga promisa na pinaghimo sa atubangan nin Diyos, asin nagdepende sa saiyang sadireng paghukom asin naghambog kan saiyang sadireng kadunungan.
14 Asin ta iyo ini an rason na ika nawaraan kan saimong pribilihiyo sa laog nin sarong panahon---
15 Nin huli ta ika nagpabaya sa pagtukdo kan saimong direktor na pagturungtungan poon pa sa kapinunan.
16 Daeng pagkukulang, an sakuyang trabaho magdadanay, nin huli ta maski na ngani na an kaaraman nin sarong Tagapagligtas mag-abot sa mundo, sa paagi kan testimonya nin mga Hudiyo, iyo man an siring na kaaraman nin sarong Tagapagligtas an mapapaduman sa sakuyang mga katawohan---
17 Asin sa mga Nephita, asin mga Jacobita, asin mga Josephita, asin mga Zoramita, sa paagi kan mga testimonya kan saindong mga ama---
18 Asin an mga testimonyang ini mag-aabot sa kaaraman kan mga Lamanita, asin mga Lemuelita, asin mga Ishmaelita, na nagdidikit na sana sa daeng paniwala nin huli sa kadaendatahan kan saindang mga ama, na an Kagurangnan iyo an nagtugot na destrosohon an saindang mga katugangan na mga Nephita, nin huli kan saindang mga kadaendatahan asin kan saindang mga abominasyon.
19 Asin nin huli kaining gayong katuyuhan kun kaya an mga laminang ini pinagpreserba, na naglalaman kaining mga rekord--- na tanganing an mga promisa nin Kagurangnan mapuwedeng mautob, na saiyang pinaghimo sa saiyang mga katawohan;
20 Asin ta an mga Lamanita puwedeng makaabot sa kaaraman kan saindong mga ama, asin tanganing sinda mapuwedeng makaaram sa mga promisa nin Kagurangnan, asin tanganing sinda makapaniwala sa ebanghelyo asin magsarig sa mga merito nin JesuCristo, asin magin mamurawayon sa paagi kan pagtubod sa saiyang pangaran, asin sa paagi kan saindang pagsosolsol sinda mapupuwedeng maliligtas. Amen.

SEKSYON 2

Sarong wakrat gikan sa mga tataramon kan anghel na si Moroni ki Joseph Smith an Propeta, habang yaon sa harong kana ama kan Propeta sa Manchester, New York, sa banggi kan Septembre 21, 1823. HS 1: 1:12. Is Moroni iyo an huri sa halabang linya nin mga historiyano na naghimo kan record na iyo ngonian yaon sa atubangan nin kinaban bilang an Libro ni Mormon. Ikumpara sa Malakias 4: 5-6; asin man Seksyon 27:9; 110: 13-16; asin 128:18.

*******

1, Si Elijah iyo an mapahayag kan pagkasaserdote; 2-3, An mga promisa kan mga ama iyo an pagtatanumon sa mga puso kan mga kaarakian.

*******

Hilnga, Ako an magpapahayag sa saimo kan pagkasaserdote, sa paagi kan kamot ni Elijah an propeta, bago pa man magdadangadang an dakulaon asin makangorongirhat na aldaw nin Kagurangnan.
2 Asin saiyang ipagtatanom sa mga puso nin mga kaarakian an mga promisa na ginibo sa mga ama, asin an mga puso kan mga kaarakian magbabalik sa saindang mga ama.
3 Kun ini dae mangyari, an bilog na kinaban mangirhaton na masasayang sa saiyang pag-abot.