SEKSYON 120

Kapahayagan na ipinagtao sa paagi ki Joseph Smith an Propeta, sa Far West, Missouri, Hulyo 8, 1838, hihimoon na maipagpabantog an disposisyon kan mga rugaring na pinagbayad bilang ikapu siring na ini pinagngaranan sa sinundan na kapahayagan, Seksyon 119. HS 3:44.
*******
KATOTOHANAN, kaya nagsabi an Kagurangnan, an panahon iyo ngonyan an mag-abot, na ini ipagdisposo sa paagi nin sarong konseho, na komposo kan Enot na Panguluhan nin sakuyang Simbahan, asin kan Bishop asin kan saiyang konseho, asin sa paagi kan sakuyang halangkaw na konseho; asin sa paagi kan sakuyang sadiring boses para sa sainda, nagsabi an Kagurangnan. Arog kaini. Amen.

SEKSYON 119

Kapahayagan na ipinagtao sa paagi ki Joseph Smith an Propeta, sa Far West, Missouri, Hulyo 8, 1838, kasimbagan sa saiyang pinaghahagad: “O Kagurangnan, ipagpahiling sa saimong mga surugoon kun gurano mo pinaghahagad an mga rugaring kan saimong mga katawohan para sa ikapu.” HS 3:44. An batas nin ikapu, sa pagkasabot ngonyan, dae pa ipinagtao sa Simbahan bago pa ining Kapahayagan. An terminong “ikapu” sa pangadyeon na pinagsambit asin sa mga dating mga Kapahayagan (64:23; 85:3; 97:11) nangangahulugan na bako sanang ikapu, kundi an gabos na udok sa boot na mga pagdudulot, o mga kontribusyon, para sa mga pundo kan Simbahan. An Kagurangnan dating ipinagtao na sa Simbahan an batas nin konsagrasyon asin pangangataman kan rugaring, na kun saen an mga miyembro (lalo na an pangenot na mga elders) naglaog sa paagi nin sarong tipan na daeng kasagkoran. Nin huli sa kapabayaan sa lado nin kadaklan na magsunod kaining tipan, an Kagurangnan pinagbawi ini pansamantala, asin pinagtao bilang karibay an batas nin ikapu sa bilog na Simbahan. An Propeta naghapot sa Kagurangnan kun gurano kan saindang rugaring an saiyang pinaghahagad para sa mga sagradong katuyuhan. An kasimbagan iyo ining kapahayagan.
*******
1-5, An mga banal kinakaipong magbayad kan saindang sobrang rugaring asin kasunod an magtao, bilang ikapu, kan ika-sampulong parte kan saindang interes sa kada taon; 6-7, sa arog kaining kurso ipagbabanal an kadagaan nin Sion.
*******
KATOTOHANAN, kaya nagsabi an Kagurangnan, Ako naghahagad sa gabos nindang sobrang rugaring na ipagbubugtak pasiring sa mga kamot kan bishop nin sakuyang Simbahan sa Sion.
2 Para sa pagpapatugdok kan sakuyang harong, asin para sa paglatag kan pundasyon nin Sion asin para sa pagkasaserdote, asin para sa mga kautangan nin Panguluhan kan sakuyang Simbahan.
3 Asin iyo ini an kapinunan kan ikapu nin sakuyang mga katawohan.
4 Asin pagkatapos kaiyan, sinda na magbabayad nin ikapu magbabayad nin ika-sampulong parte kan gabos nindang interes sa kada taon; asin iyo ini an magigin pagsunudon na batas sa sainda sagkod pa man, para sa sakuyang banal na pagkasaserdote, nagsabi an Kagurangnan.
5 Katotohanan Ako nagsasabi sa saindo, ini mangyayaring maglipas na gabos sinda na magkakatiripon-tipon sa kadagaan nin Sion magbabayad nin ikapu kan saindang sobrang rugaring, asin pagsusunudon ining batas, o sinda dae mananagboan na maninigo na maki-erok sa pag-iriba nindo.
6 Asin Ako nagsasabi sa saindo, kun an sakuyang mga katawohan dae magsusunod kaining batas, na gibohon ining banal, asin sa kaining batas pakakabanalon an kadagaan nin Sion para sa sakuya, na tanganing an sakuyang mga katugunan asin an sakuyang mga paghuhukom mapuwedeng pagsusunudon dagos, na tanganing ini an magin iyo an pinakabanal, hilnga, katotohanan Ako nagsasabi sa saindo, ini dae nanggad magigin kadagaan nin Sion para sa saindo.
7 Asin iyo ini an magigin sarong halimbawa para sa gabos na mga istaka nin Sion. Arog kaini. Amen.

SEKSYON 118

Kapahayagan na ipinagtao sa paagi ki Joseph Smith an Propeta, sa Far West, Missouri, Hulyo 8, 1838, kasimbagan sa mga pinaghahagad: “Ipahiling mo an saimong kagustuhan, O Kagurangnan, an mapanungod sa Dose.” HS 3”46-47.
*******
1-3, An Kagurangnan an magtatao para sa mga pamilya kan Dose; 4-6, An mga bakante sa Dose pinagpanoan.
*******
KATOTOHANAN, kaya nagsabi an Kagurangnan: Tuguti na sarong kumperensiya an gigibohon tulos; tuguti na an Dose maorganisa; asin tuguti na may mga tawo na pagngangaran tanganing iyo an magpano sa lugar ninda na nagkahurulog.
2 Tuguti na an sakuyang surugoon na si Thomas mawalat sa kadikit na panahon sa kadagaan nin Sion, tanganing ipublisa an sakuyang tataramon.
3 Tuguti na an natatada magpadagos sa pagbabalangibog magpoon sa oras na iyan, asin kun sinda maggigibo kaini sa bilog na kababaan nin puso, sa kahuyoan asin kapakumbabaan, asin halawig na pagkamatinios, Ako, an Kagurangnan, magtatao sainda nin sarong promise na Ako magtatao sa saindang mga pamilya; asin sarong mapakinabang na pintuan an pagbubuksan para sainda, magpopoon ngonyan.
4 Asin sa masunod na tagsibol tuguti sinda na magpasiring sa mga darakulang katubigan, asin duman ipagpapahayag an sakuyang ebanghelyo, sa kabilugan kaini, asin magpapatotoo sa sakuyang pangaran.
5 Tuguti sinda na ipagwalat an sakuyang mga banal sa siyudad nin Far West, sa ika-beynte sais na aldaw kan Abril sa sunod, na pagtutugdukan kan sakuyang harong, nagsabi an Kagurangnan.
6 Tuguti an sakuyang surugoon na si John Taylor, asin man an sakuyang surugoon na si John E. Page, asin man an sakuyang surugoon na si Wilford Woodruff, asin man an sakuyang surugoon na si Willard Richards, pagngaranan na iyo an magpano sa mga lugar ninda na nagkahurulog, asin opisyal na pagpaaramon kan saindang kapangapudan.

SEKSYON 117

Kapahayagan na ipinagtao sa paagi ki Joseph Smith an Propeta, sa Far West, Missouri, Hulyo 8, 1838, mapanungod sa oradang katungkulan ni William Marks, Newel K. Whitney, asin Oliver Cowdery. HS 3:45-46.
*******
1-9, An mga surugoon nin Kagurangnan dae dapat na mangaputan sa mga temporal na mga bagay, nin huli ta “Ano baya an rugaring para sa Kagurangnan?”; 10-16, Saindang talikudan an kasaditan nin kalag, asin an saindang mga dulot magigin sagrado para sa Kagurangnan.
*******
KATOTOHANAN kaya nagsabi an Kagurangnan sa sakuyang surugoon na si William Marks, asin man sa sakuyang surugoon na si Newel K. Whitney, tuguti sinda na asikasuhon an saindang bisnis nin hidali asin magbiyahe gikan sa kadagaan nin Kirtland, bago Ako, an Kagurangnan, magpadara giraray kan niyebe sa kinaban.
2 Tuguti sinda na magimata, asin magbuhat, asin magdulok, asin dae magparahaloy, nin huli ta Ako, an Kagurangnan, nagsugo kaini.
3 Kun kaya, kun sinda magparahaloy ini bakong marahayon para sainda.
4 Tuguti sinda na magkapagsolsol kan saindang mga kasalan, asin sa gabos nindang mainakong mga pagmamawot, sa atubangan ko, nagsabi an Kagurangnan; nin huli ta ano man baya an rugaring para sakuya? Nagsabi an Kagurangnan.
5 Tuguti na an mga rugaring sa Kirtland ipagpambayad para sa mga kautangan, nagsabi an Kagurangnan. Tuguti sindang magbayad, nagsabi an Kagurangnan, asin an anuman an natatada, tuguti ining maitada sa saimong mga kamot, nagsabi an Kagurangnan.
6 Nin huli ta bako dawn a sakuya ang mga gamgam sa langit, asin man an mga sira nin kadagatan, asin an mga hayop nin kabukidan? Bako dawn a Ako an naghimo kan kinaban? Bako dawn a Ako an may kapot sa mga kamumugtakan kan gabos na mga armada nin mga nasyon kan kinaban?
7 Kun kaya, bako dawn a Ako an makakagibo kan mga maalipungaw na lugar na magsupnay asin mamurak, asin darahon ini na magin maabunda? Nagsabi an Kagurangnan.
8 Bako dawn a may igong kuwarta sa mga kabukidan kan Adam-Ondi-Ahman, asin sa lantad nin Olaha Shinehah, o sa kadagaan kun saen kaidto si Adan nag-eerok, na saindo dapat na pag-akoon an bagay na dikit, asin pabayaan an mas magabaton na mga bagay?
9 Kun kaya, magpasiring kamo digde sa sa kadagaan nin sakuyang mga katawohan, na iyo ngani an Sion.
10 Tuguti na an sakuyang surugoon na si William Marks na magin matapat sa dikit na mga bagay, asin siya magin saring tagapamahala nin kadakul. Tuguti siya na magpamayo sa katahawan nin sakuyang mga katawohan sa siyudad nin Far West, asin tuguti siya na mabendisyunan nin mga bendisyon kan sakuyang mga katawohan.
11 Tuguti na an sakuyang surugoon na si Newel K. Whitney na magmasupog kan grupong Nicolaitane asin kan gabos nindang mga sikretong abominasyon, asin kan gabos niyang kasaditan nin kalag sa atubangan ko, nagsabi an Kagurangnan, asin magpasiring sa kadagaan nin Adam-Ondi-Ahman, asin magin bishop kan sakuyang mga katawohan, nagsabi an Kagurangnan, bako sana sa pangaran kundi sa gibo, nagsabi an Kagurangnan.
12 Asin giraray, Ako nagsasabi sa saindo, Ako nakagiromdom sa sakuyang surugoon na si Oliver Granger, hilnga, katotohanan Ako nagsasabi sa saiya na an saiyang pangaran magigin yaon sa sagradong pagigiromdomon gikan sa henerasyon hanggan sa henerasyon, sagkod sa daeng kasagkoran, nagsabi an Kagurangnan.
13 Kun kaya, tuguti siya makilaban nin maigoton para sa pagtubos kan Enot na Panguluhan nin sakuyang Simbahan, nagsabi an Kagurangnan; asin kunsoarin siya matumba siya magbubuhat giraray, nin huli ta an saiyang sakripisyo magigin mas sagrado para sa sakuya kesa sa saiyang kita, nagsabi an Kagurangnan.
14 Kun kaya, tuguti siyang magpasiring digde nin hidali, pasiring sa kadagaan nin Sion; asin sa pinagtakdang panahon siya paghihimoon na sarong negosyante para sa sakuyang pangaran, nagsabi an Kagurangnan, para sa benepisyo nin sakuyang mga katawohan.
15 Kun kaya tuguti na mayong tawo an magka-aranggot sa sakuyang surugoon na si Oliver Granger, kundi tuguti na an mga bendisyon kan sakuyang mga katawohan mapasaiya sagkod sa daeng kasagkoran.
16 Asin giraray, katotohanan Ako nagsasabi sa saindo, tuguti na an gabos na sakuyang mga surugoon na yaon sa kadagaan nin Kirtland makagiromdom sa Kagurangnan nindang Diyos, asin sa sakuyang harong man, na pag-ingatan asin preserbaron ining banal, asin sa pagpalayas sa mga pararibay kuwarta sa sakuyang ipinagtakdang panahon, nagsabi an Kagurangnan. Arog kaini. Amen.