SEKSYON 38

Kapahayagan na ipinagtao sa paagi ni Joseph Smith an Propeta, sa Fayette, New York, Enero 2, 1831. HS 1:140-143. An okasyon iyo an sarong kumperensiya kan Simbahan.

*******

1-6, Si Cristo iyo an naglalang kan gabos na mga bagay; 7-8, Siya yaon sa katahawan kan saiyang mga banal, na makakahiling sa dae mahaloy saiya; 9-12, Gabos na laman koraptado na sa atubangan niya; 13-22, Siya igwang reserbadong kadagaan nin promise para sa saiyang mga banal sa panahon asin sa eternidad; 23-27, An mga banal pinagsusugo na magkasararo asin mag-arako sa lambang saro bilang magturugang; 28-29, Mga Giyera pinaghula; 30-33, An mga banal pagtataw-anan nin kapangyarihan gikan sa itaas asin maglalakbay sa pag-iriba nin gabos na mga nasyon; 34-42, An Simbahan pinagsusugo na pangatamanan an pobre asin nangangaipo, asin paghanapon an mga kayamanan nin eternidad.

*******

Kaya nagsabi an Kagurangnan an saindong Diyos, na si JesuCristo, an Dakulang Ako Iyo, Alpha asin Omega, an kapinunan asin an katapusan, siya iyo an nagmamangno sa mahiwas na kalantaran nin eternidad, asin sa gabos na serapikong mga hukbo nin kalangitan, bago pa man an kinaban pinaglalang.

2 Siya iyo Ako an nakakaaram kan gabos na mga bagay, nin huli ta an gabos na mga bagay yaon na sa atubangan kan sakuyang mga mata;

3 Ako iyo man sana siya na nagtaram, asin an kinaban pinaghimo, asin an gabos na mga bagay nag-abot sa paagi ko.

4 Ako iyo man sana siya na nagkua kan Sion ni Enoch palaog sa sakuyang sadireng daghan; asin katotohanan, Ako nagsasabi, magin siring na kadakul an nagtutubod sa sakuyang pangaran, nin huli ta Ako iyo an Cristo, asin sa sakuyang pangaran, Ako nagngangayo-ngayo sa atubangan kan Ama para sa saindo.

5 Pero hilnga, an katadaan kan mga mararaot sakuyang pinagbuhian sa mga kadena nin kadikloman sagkod sa paghuhukom kan dakulang aldaw na mag-aabot sa katapusan kan kinaban;

6 Asin sa arog kaini na Ako magkakausa na an mga mararaot ipagkukulong, na sinda habong magdangog kan sakuyang boses kundi pinagpatagas an saindang mga puso, asin an pagsakit, pagsakit, pagsakit, iyo an saindang kaparaan.

7 Pero hilnga, katotohanan, katotohanan, ako nagsasabi sa saindo na an sakuyang mga mata nakamaan sa saindo. Ako yaon sa saindong katahawan asin kamo dae nakakahiling sako;

8 Pero an aldaw sa dae mahaloy maabot na kamo makakahiling sako, asin makakaaram na Ako iyo; nin huli ta an belo nin kadikloman sa dae mahaloy magigisi, asin siya na dae puripikado dae makakatagal sa kaaldawan na yan.

9 Kumbaya, bugkusi an saindong panimpit asin magin preparado. Hilnga, an kahadean pagsadire nindo, asin an kalaban dae kayang makadaog saindo.

10 Katotohanan Ako nagsasabi sa saindo, kamo malinigon, pero bako gabos; asin mayo pang iba na ako marahayon na mag-oogma;

11 Nin huli ta an gabos na laman koraptado na sa atubangan ko; asin an mga kapangyarihan nin kadikloman iyo an naglalakop sa kinaban, sa pag-iriba nin mga kaarakian kan mga tawo, sa presensiya kan gabos na mga hukbo nin kalangitan---

12 Na iyo an nagkakausa na an katagnungan iyo an maghahade, asin an bilog na eternidad makukulugan, asin an mga anghel naghaharalat sa dakulang kasugoan na mag-ani sa ibaba nin kinaban, tanganing tiriponon an mga awot na tanganing sinda puwedeng pagsuloon; asin, hilnga, an kaiwal nagka-iribahan na.

13 Asin ngonyan Ako mapahiling sa saindo nin sarong misteryo, sarong bagay na pinagtatago sa sikretong mga taguan, tanganing darahon na mangyari an saindong destruksiyon habang malipas an panahon, asin kamo dae nakakaaram kaini.

14 Pero ngonyan Ako magtataram kaini saindo, asin kamo pinagbebendisyunan, bako nin huli sa saindong kadaendatahan, ni sa saindong mga puso na daeng pagtubod; nin huli ta sa katotohanan an iba saindo nagkasala sa atubangan ko, pero Ako magigin maheherakon sa saindong mga kaluyahan.

15 Kun kaya, magin kamong mga makusog magpoon ngonyan; dae matakot, nin huli ta an kahadean pagsadire nindo.

16 Asin para sa saindong kaligtasan Ako matao sa saindo nin sarong kasugoan, nin huli ta Ako nakadangog kan saindong mga pangadyeon, asin an pobre nagrereklamo sa atubangan ko, asin an mayaman na sakuyang pinaghimo, asin an gabos na laman pagsadire ko, asinAko mayong pinagpapalaen na mga persona.

17 Asin Ako an naghimo sa kinaban na mayamanon, asin hilnga ini iyo an sakuyang tungtungan, kumbaya, giraray Ako magtitindog sa ibabaw kaini.

18 Asin Ako nangangaputan asin nagmakusog na magtao saindo nin kadakulon na mga kayamanan, magin sarong kadagaan nin promisa, sarong kadagaan na nagbubulos nin gatas asin tangguli, na kun saen dae magkakaigwa nin sumpa sa panahon na an Kagurangnan mag-abot;

19 Asin Ako magtatao kaini saindo bilang kadagaan nin saindong kamanahan, kun saindong paghahanapon sa bilog nindong mga puso.

20 Asin ini iyo an sakuyang tipan saindo, saindong masasadire ini bilang kadagaan nin saindong kamanahan, asin para sa kamanahan kan saindong kaarakian na daeng kasagkoran, habang an kinaban magtitindog, asin saindong pagsasadirehon ini giraray sa eternidad, na dae na maglilipas pa.

21 Pero, katotohanan Ako nagsasabi sa saindo na sa panahon kamo dae magkakaigwa nin hade ni tagapagpamahala, nin huli ta Ako an magigin nindong hade asin magbabantay saindo.

22 Kumbaya, dangoga an sakuyang boses asin magsunod sako, asin kamo magigin sarong libreng katawohan, asin kamo mayo na ibang leyes kundi an sakuyang leyes sa panahon na Ako mag-abot, nin huli ta Ako an saindong tagapagtao nin ley, asin ano baya an makakapagpugol kan sakuyang kamot?

23 Pero, katotohanan Ako nagsasabi sa saindo, magtukdo an saro sa iba iyon sa opisina na kun saen Ako iyo an nagngaran saindo;

24 Asin tugutan na an lambang tawo pakusugon an saiyang tugang na siring saiya, asin gumibo nin birtud asin kabanalan sa atubangan ko.

25 Asin giraray Ako nagsasabi sa saindo, tugutan na an lambang tawo pakusugon an saiyang tugang na siring saiya.

26 Nin huli ta anong tawo baya sa pag-iriba nindo na igwang doseng mga akeng lalake, asin dae namimili sa kiisay sainda, asin sinda nagsisirbe saiya na masinunod-sunod, asin siya nagsabi sa saro: Magbado ka nin mga roba asin magtukaw digde; asin sa iba: Magbado ka nin mga rapnot asin magtukaw duman--- asin pinaghiling an saiyang mga akeng lalake asin naghapot Ako ba husto?

27 Hilnga, ini Ako nagtao sa saindo bilang sarong parabola, asin ini iyong gayo Ako. Ako nagsasabi sa saindo, kamo magkasararo; asin kun kamo bakong magkasararo kamo bakong sako.

28 Asin giraray, Ako nagsasabi sa saindo na an kalaban yaon sa sikretong taguan na nagmamawot kan saindong mga buhay.

29 Kamo makakadangog nin mga giyera sa harayoon na mga bansa, asinkamo magsasabi na magkakaigwa nin giyera sa dae mahaloy sa harayong mga bansa, pero kamo dae nakakaaram kan mga puso nin mga tawo sa sadire nindong kadagaan.

30 Ako nagtataram saindo kaining mga bagay nin huli sa saindong mga pangadyeon; kumbaya, pagyamanon an kadunungan sa laog kan saindong mga daghan, na baka baya an karaotan nin mga tawo maghahayag kaining mga bagay sa saindo sa paagi kan sainda man sanang karaotan, sa sarong manera na magsasabi sa saindong mga talenga na igwang sarong boses na mas makusog pa kesa idtong makapagpayugyog nin daga; pero kun kamo preparado kamo dae matatakot.

31 Asin na kamo puwedeng maka-eskapo sa kapangyarihan kan kalaban, asin magkatiripon-tipon sa sakuya na sarong matatanos na mga katawohan, na mayong digta asin kakundian---

32 Kumbaya, nin huli kaining kausa Ako nagtao sa saindo nin kasugoan na kamo dapat na magpaduman sa Ohio; asin duman Ako magtatao sa saindo kan sakuyang ley; asin duman kamo pagbabasbasan nin kapangyarihan na gikan sa kaitaasan;

33 Asin gikan duman, an siisay man na Ako an maggugusto magpapasiring sa pag-iriba kan gabos na mga nasyon, asin ini pagsasabihon sainda na kun ano an saindang gigibohon; nin huli ta Ako igwa nin sarong dakulaon na gibong nakalatag na naghahalat, nin huli ta an Israel ipagliligtas, asin Ako an mangengenotan sainda saen man na Ako an naggugusto, asin mayong kapangyarihan na makakapagpugol kan sakuyang kamot.

34 Asin ngonyan, Ako matao sa simbahan sa mga parteng ini nin sarong kasugoan, na igwang mga tawo sa pag-iriba ninda na pagngangaranan, asin sinda pagngangaranan sa paagi nin boses kan simbahan;

35 Asin sinda magmamangno sa pobre asin nangangaipo, asin magpamahala para sa saindang kahinggianan na sinda dae magsasakit; asin ipapadara sinda pasiring duman sa lugar na Ako an magsusugo sainda;

36 Asin ini iyo an magigin nindang trabaho, na magpapamahala sa mga palakaw kan pagsasadire kaining simbahan.

37 Asin sinda na igwang mga omahan na dae maipagpabakal, tugutan sinda na pagbayaan o pag-arkilahon na sa paghuna ninda nakakarahay.

38 Mangnoha baya an an gabos na an mga bagay preserbado; asin sa panahon na an mga tawo pinagbabasbasan nin kapangyarihan gikan sa itaas asin ipinagpapadara, gabos na ining mga bagay pagtitiripon-tiponon sa sarayan kaining simbahan.

39 Asin kun kamo naghahanap nin mga kayamanan na ini na iyo an kagustuhan kan Ama na ipagtatao sa saindo, kamo magigin pinakamayaman kan gabos na mga katawohan, nin huli ta kamo magkakaigwa nin mga kayamanan kan eternidad; asin ini kinakaipong marhay na an mga kayamanan kan kinaban pagsadire ko na maitao saindo; pero magmaan baya sa kapaabaw-abawan, na baka kamo magin arog kan mga Nephita sa luma.

40 Asin giraray, Ako nagsasabi sa saindo, Ako matao sa saindo nin sarong kasugoan, na an lambang tawo pareho sa elder, padi, paratukdo, asin man an miyembro magpaduman sa saiyang kusog, na igwang trabaho kan saiyang mga kamot, na mag-andam asin maghimo nin mga bagay na Ako an nagsugo.

41 Asin tugutan na an saindong pagbabalangibog iyo an magin boses nin patanid, an lambang tawo sa saiyang kataid, sa katalingkasan asin sa kahuyoan.

42 Asin maghale paluwas gikan sa pag-iriba nin mga mararaot. Iligtas an saindong mga sadire. Magin kamong malinig na nagkakapot kan mga kaaganan nin Kagurangnan. Arog kaini. Amen.

SEKSYON 37

Kapahayagan na ipinagtao ki Joseph Smith an Propeta asin Sidney Rigdon, harani sa Fayette, New York, Disyembre 1830. HS 1:139. Nakapalaog kaini iyo an ipinagtaong enot na kasugoan mapanungod sa sarong pagtitiripon-tipon sa dispensasyong ini.

*******

1-4, An mga banal pinag-apudan na magtiripon-tipon sa Ohio.

*******

Hilnga, Ako nagsasabi sa saimo na ini bakong kapakinabangan sakuya na ika dapat na magsalin nguna sagkod na ika makaduman sa Ohio, asin ini nin huli sa kaiwal asin para sa karahayan mo.

2 Asin giraray, Ako nagsasabi sa saimo na ika dae mahale sagkod na ika nakapagbalangibog na kan sakuyang ebanghelyo sa parting idto, asin nakapagpakusog kan simbahan maski saen man ini mananagboan, asin mas lalo na sa Colesville; nin huli ta, hilnga, sinda nagpapangadye sa sakuya na may sobrang pagtubod.

3 Asin giraray, sarong kasugoan Ako matao sa simbahan, na ini kapakinabangan sa sakuya na sinda dapat na magkatiripon-tipon na magkasararo sas Ohio, hanggan sa panahon na an sakuyang surugoon na si Oliver Cowdery makapagbalik na sa sainda.

4 Hilnga, uya an kadunungan, asin tugutan na an lambang tawo makapagpili para sa saiyang sadire sagkod na Ako mag-abot. Arog kaini. Amen.

SEKSYON 36

Kapahayagan na ipinagtao sa paagi ni Joseph Smith an Propeta para ki Edward Partridge, harani sa Fayette, New York, Disyembre 1830. HS 1:131. Hilingon an pamayuhan kan Seksyon 35. An Propeta nagsabi na si Edward Partridge “iyo an sarong modelo nin kabanalan, asin saro sa mga dakulang tawo nin Kagurangnan.”

*******

1-3, An Kagurangnan nagpatong kan saiyang kamot ki Edward Partridge sa paagi kan kamot ni Sidney Rigdon; 4-8, An lambang tawo na nagresibe kan ebanghelyo asin kan pagkasaserdote pangangapudan na maglakbay asin magbalangibog.

*******

Kay nagsabi an Kagurangnang Diyos, an Solong Makapangyarihan nin Israel: Hilnga, Ako nagsasabi sa saimo, sakuyang surugoon na si Edward, na ika pinagbendisyunan, asin an saimong mga kasalan pinagpatawad na saimo, asin ika pinagpangapudan na magbalangibog kan sakuyang ebanghelyo na siring sa boses nin sarong tambuli;

2 Asin Ako magpapatong kan sakuyang kamot sa saimo sa paagi kan kamot nin sakuyang surugoon na si Sidney Rigdon, asin saimong mareresibe an sakuyang Espiritu, an Espiritu Santo, na iyo an Tagapaglinga, na iyo an magtutukdo saimo kan matuninongon na mga bagay nin kahadean;

3 Asin saimo ining ipagdedeklara na igwang sarong dakulang boses, na magsasabi: Hosanna, pagbendisyunan lugod an pangaran kan pinakahalangkaw na Diyos.

4 Asin ngonyan ining pangapudan asin kasugoan Ako nagtao sa saimo na mapanungod sa gabos na mga tawo---

5 Na habang kadakul an magdudulok sa atubangan kan sakuyang mga surugoon na si Sidney Rigdon asin Joseph Smith, Jun., na magkukugos kaining pangapudan asin kasugoan, pag-oordinaran asin ipagpapadara na magbabalangibog kan daeng katapusan na ebanghelyo sa pag-iriba nin mga nasyon---

6 Magkukurahaw nin pagsosolsol, na magsasabi: Iligtas nindo an saindong mga sadire gikan kaining mayong padumanan na henerasyon, asin magluwas gikan sa kalayo, na nag-aangot magin sa kabadoan na nadidigtaan nin laman.

7 Asin ining kasugoan ipagtatao sa mga elder kan sakuyang simbahan, na an lambang tawo na magkukugos kaini na igwang solong boot nin puso mapupuwedeng pag-ordihan asin ipagpapadara, magin siring na Ako nakapagtaram na.

8 Ako si JesuCristo, an Ake nin Diyos; kumbaya, bugkusan an saindong mga habayan asin Ako tulos-tulos na maabot sa sakuyang templo. Arog kaini. Amen.

SEKSYON 35

Kapahayagan na ipinagtao ki Joseph Smith an Propeta asin Sidney Rigdon, harani sa Fayette, New York, Disyembre 1830. HS 1:128-131. Sa panahon na ini an Propeta enganyado haros aro-aldaw sa paghihimo nin sarong salin kan Bibliya. An pagsalin nagpoon pa nin amay kan Hunyo 1830, asin pareho si Oliver Cowdery asin John Whitmer nagsirbe bilang mga parasurat. Magpoon na sinda pinagpangapudan sa ibang gibohon, si Sidney Rigdon pinagpangapudan sa paagi nin banal na pagngaran na magsirbe bilang sarong parasurat kan Propeta sa gibong ini (bersikulo 20). Bilang sarong kapinunan sa saiyang rekord kaining kapahayagan an Propeta nagsurat: “Kan Disyembre si Sidney Rigdon nag-abot (haleng Ohio) tanganing maghapot sa Kagurangnan, asin kaiba niya si Edward Partridge... Sa halipot na panahon pagkatapos mag-abot ining duwang katugangan, kaya nagtaram an Kagurangnan.

*******

1-2, Paano an mga tawo magin mga ake nin Diyos; 3-7, Si Sidney Rigdon pinagpangapudan na magbunyag asin magputong kan Banal na Espiritu; 8-12, An mga senyal asin milagro magigibo sa paagi kan pagtubod; 13-16, An mga surugoon nin Kagurangnan iyo an magsasarigsig kan mga nasyon sa paagi nin kapangyarihan kan Espiritu; 17-19, si Joseph Smith iyo an nagkakapot nin mga susi kan mga misteryo; 20-21, An mga pinili mag-aantabay sa aldaw kan pag-abot nin Kagurangnan; 22-27, an Israel maliligtas.

*******

DANGOGA an boses nin Kagurangnan an saindong Diyos, an Alpha asin Omega, an kapinunan asin an katapusan, na an saiyang kurso sarong daeng katapusan na pag-inog, kapareho ngonyan siring kasuodma, asin sa daeng kasagkoran.

2 Ako si JesuCristo, an Ake nin Diyos, na iyo an pinagpako sa krus para sa mga kasalan nin kinaban, magin arog sa kadakul na naniniwala sa sakuyang pangaran, na tanganing magin mga ake nin Diyos, na magin kasaro sakuya siring na Ako saro sa Ama, siring na an Ama kasaro sa sakuya, na tanganing kami magigin saro.

3 Hilnga, katotohanan, katotohanan, Ako nagsasabi sa sakuyang surugoon na si Sidney, Ako naghiling sa saimo asin sa saimong mga gibo. Ako nakadangog sa saimong mga pangadyeon, asin nag-andam saimo para sa sarong dakulaon na gibohon.

4 Ika paladan, nin huli ta ika maggigibo nin mga dakulang mga bagay. Hilnga ika pinagpapadara, na arog ki John, tanganing andamon an dalan sa atubangan ko, asin ika nanggad nakakaaram pa kaini.

5 Ika nagbunyag sa paagi nin tubig pasiring sa pagsosolsol, pero sinda dae nagresibe kan Banal na Espiritu;

6 Pero ngonyan Ako matao sa saimo nin sarong kasugoan, na ika magbubunyag sa paagi nin tubig, asin sinda maresibe nin Banal na Espiritu sa paagi nin pagpapatong nin mga kamot, siring kan mga apostol nin suanoy.

7 Asin ini mangyayaring maglipas na magkakaigwa nin sarong dakulaon na gibo sa kadagaan, magin sa pag-iriba kan mga Hentil, nin huli ta an saindang mga kalokohan asin an saindang mga abominasyon ipagpapahiling sa mga mata kan bilog na mga katawohan.

8 Nin huli ta Ako an Diyos, asin an sakuyang mga takyag dae pinagpahalipot; asin Ako magpapahiling nin mga milagro, mga senyal, asin mga kangalasan, sa sainda gabos na naniniwala sa sakuyang pangaran.

9 Asin an siisay man na maghahagad kaini sa sakuyang pangaran na may pagtubod, sinda makakapagpalayas nin mga diyablo; sinda makapagpapaomay nin may mga helang; sinda makakapagkausa na an mga bulag makakaresibe kan saindang paghiling, asin an bungog makakadangog, asin an pula makakapagtaram, asin an pilay makakapaglakaw.

10 Asin an panahon hidalion na mag-aabot an darakulang mga bagay na ipagpapahiling sa mga kaarakian nin mga tawo;

11 Pero kun mayong pagtubod mayong ibang bagay na ipagpapahiling kundi kalipungawan sa Babilonya, na kapareho sa saiya na naghimo sa gabos na mga nasyon na mag-inom nin arak sa kapahamakan kan saiyang kalaswaan.

12 Asin mayong iba na naggigibo nin marhay laen lang sainda na andam na magresibe kan kabilugan kan sakuyang ebanghelyo, na sakuyang pinagpadara sa henerasyon na ini.

13 Kumbaya, Ako nag-apud sa mga maluluyang bagay kan kinaban, sinda na mga mayong inadalan asin pinaghaboan, tanganing ibasura an mga nasyon sa paagi nin kapangyarihan kan sakuyang Espiritu.

14 Asin an saindang mga takyag magigin sakuyang takyag asin Ako an saindang panangga asin an saindang sinturon; asin an magbubugkos kan saindang panimpit, asin sinda maisog na makikilaban para sakuya, asin an saindang mga kaiwal magigin yaon sa irarom kan saindang mga bitis; asin Ako magtutugot na maghuhulog an espada para sa saindang kapakanan, asin sa paagi kan kalayo nin sakuyang kasupganan Ako an magbabantay sainda.

15 Asin an pobre asin mahuyo an boot magkakaigwa nin pagkakataon na an ebanghelyo maipagbalangibog sa sainda, asin sinda maghahalat sa panahon kan sakuyang pag-abot, nin huli ta ini haranihon nang gayo---

16 Asin sinda makakanuod sa parabola kan kahoy na igos, nin huli ta maski ngonyan an tag-init harani na.

17 Asin Ako nagpadara na nin kabilugan kan sakuyang ebanghelyo sa paagi kan kamot nin sakuyang surugoon an si Joseph; asin sa kaluyahan Ako nagbendisyon saiya;

18 Asin Ako an nagtao sa saiya nin mga susi kan misteryosong mga bagay na pinagselyuhan, maski na an mga bagay na gikan pa kaidtong pundasyon nin kinaban, asin sa mga bagay na maabot pa sana sa panahon na ini sagkod sa panahon kan sakuyang pag-abot, kun siya nagsusunod sakuya, asin kun dae, may iba Akong itatanom na karibay niya.

19 Kumbaya, magbantay ka saiya na tanganing an saiyang pagtubod dae magluya, asin ini ipagtatao sa paagi kan Tagapaglinga, an Banal na Espiritu, na nakakaaram kan gabos na mga bagay.

20 Asin sarong kasugoan Ako matao sa saimo--- na ika magsusurat pa saiya; asin an mga kasuratan ipagtatao, magin siring na sinda minagikan sa sakuyang sadireng daghan, sa ikaliligtas kan sakuyang sadireng pinili;

21 Nin huli ta saindang madadangog an sakuyang boses, asin makakahiling sakuya, asin dae mangaturog asin maghahalat sa aldaw kan sakuyang pag-abot; nin huli ta sinda paglilinigan, magin siring sakuya kalinig.

22 Asin ngonyan Ako nagsasabi sa saimo, mag-erok na kaiba niya, asin siya maglalakbay na kaibahan mo; dae mo siya pagpabayaan, asin seguradong an mga bagay na ini nanggad mauutob.

23 Asin habang ika dae pa nagsusurat, hilnga, ini ipagtatao sa saiya na magpropesiya; asin ika magbabalangibog kan sakuyang ebanghelyo asin mangangapudan sa banal na mga propeta tanganing patotohanan an saiyang mga tataramon, habang an mga ini ipagtatao saiya.

24 Magsunod ka sa gabos na mga kasugoan asin mga tipan kun saen ika nabubugkusan; asin Ako an magkakausa sa mga langit na magyuyogyog para sa saindong karahayan, asin si Satanas mangungubog-kubog asin an Sion mag-oogma sa ibabaw kan mga buro-bukid asin magtatalubo;

25 Asin an Israel ililigtas sa sakuyang sadireng tinakdang panahon; asin sa paagi kan mga susi na sakuyang pinagtao sinda paggagabayan, asin mayo nang makakapagparibong sa gabos.

26 Ipag-itaas an saindong mga puso asin magin maogma, an saindong katubusan naghaharani nang gayo.

27 Dae matakot, sadit na pangon, an kahadean pagsasadirihon nindo sagkod na Ako mag-abot. Hilnga, Ako maabot na hidali. Arog kaini. Amen.

SEKSYON 34

Kapahayagan na ipinagtao sa paagi ni Joseph Smith an Propeta para ki Orson Pratt, sa Fayette, New York, Nobyembre 4, 1830. HS 1:127-128. Si Brother Pratt desi-nuwebe pa sana sa panahon na idto. Siya pinagbag-o asin pinagbunyagan kan siya enot na nakadanog sa pagbabalangibog kan pinagbalik-liwat na ebanghelyo kan saiyang matuang tugang, si Parley P. Pratt, anom na semana bago pa man idto. Ining kapahayagan naresibe sa harong ni Peter Whitmer, Sen.

*******

1-4, An pano nin pagtubod magigin mga akeng lalake nin Diyos sa paagi kan pagbabayad-sala; 5-9, An pagbabalangibog kan ebanghelyo mag-aandam kan dalan para sa Ikaduwang Pag-abot; 10-12, An propesiya minaabot sa paagi nin kapangyarihan kan Banal na Espiritu.

*******

Ake kong Orson, maghinanyog ka asin magdangog asin hilnga na Ako, an Kagurangnang Diyos, magsasabi sa saimo, na iyo ngani si JesuCristo an saimong Paratubos;

2 An ilaw asin an buhay kan kinaban, sarong liwanag na magsisirang sa kadikloman asin an kadikloman dae nakakasabot kaini;

3 Na iyo an nagmomoot sa kinaban na saiyang pinagtao an saiyang sadireng buhay, na tanganing habang kadakul an maniniwala mapupuwedeng magin mga akeng lalake nin Diyos. Kumbaya ika sakuyang ake na lalake;

4 Asin paladan ka nin huli ta ika naniniwala;

5 Asin mas paladan ka nin huli ta ika pinagpapangapudan ko na magbabalangibog kan sakuyang ebanghelyo---

6 Na magpapalangkaw kan saimong boses na siring sa tunog nin sarong tambuli, parehong halawigon asin makusugon, asin magkukurahaw nin pagsosolsol sa mga tiko asin balinsot na henerasyon, tanganing andamon an dalan nin Kagurangnan para sa saiyang ikaduwang pag-abot.

7 Nin huli ta hilnga, katotohanan, katotohanan, Ako nagsasabi sa saimo, an panahon haranihon na tanganing Ako mag-aabot sa ibabaw nin sarong panginoron na may kapangyarihan asin dakulang kamurawayan.

8 Asin ini magigin sarong dakulang aldaw sa panahon kan sakuyang pag-abot, nin huli ta an gabos na mga nasyon mangungubog-kubog.

9 Pero bago pa man an aldaw na yan mag-abot, an saldang magdidiklom, asin an bulan magigin kulay dugo; asin an mga bitoon magsasayuma sa pagsirang, asin an iba magkakahurulog, asin dakulang kapahamakan an naghahalat sa mararaot.

10 Kumbaya, ipaglangkaw an saimong boses asin dae magpalipas, nin huli ta an Kagurangnang Diyos nakapagtaram na; kun kaya magpropesiya ka, asin ini ipagtatao sa paagi nin kapangyarihan kan Banal na Espiritu.

11 Asin kun ika pano nin pagtubod, hilnga, Ako kaiba mo sagkod na Ako mag-abot---

12 Asin katotohanan, katotohanan, Ako nagsasabi saimo, Ako maabot nin hidali. Ako an saimong Kagurangnan asin an saimong Paratubos. Arog kaini. Amen.

SEKSYON 33

Kapahayagan na ipinagtao sa paagi ni Joseph Smith an Propeta para kina Ezra Thayre asin Northrop Sweet, sa Fayette, New York, Oktubre 1830. HS 1:126-127. Sa pagrekord kaining kapahayagan an Propeta nag-uyon na “an Kagurangnan tunay na andam na magtatao nin instruksiyon basta sa maigot na paghahanap na igwang pagtubod.”

********

1-4, an mga trabahador pinagpangapudan tanganing magdedeklara kan ebanghelyo sa ika-onseng oras; 5-6, An Simbahan estabilisado na asin an mga pinili pagtitiripon-tiponon; 7-10, Magsolsol, nin huli ta an kahadean nin langit yaon na sa harani; 11-15, An Simbahan pinagtugdok sa ibabaw nin gapong ebanghelyo; 16-18, Mag-andam sa pag-abot nin kaglalakeng-agom.

********

HILNGA, Ako nagsasabi sa saindo, sakuyang mga surugoon na Ezra asin Northrop, buksan nindo an saindong mga talenga asin magdangog sa boses nin Kagurangnan an saindong Diyos, an saiyang tataramon buhay asin makapangyarihan, mataromon kesa sarong espada na may duwang tarom, para sa pagkakabarangaan nin mga kaso-kasoan asin hutok nin tul-ang, kalag asin espiritu; asin iyo an nakakabasa nin mga kaisipan asin itensiyon kan puso.

2 Nin huli ta katotohanan, katotohanan, Ako nagsasabi sa saindo na kamo pinagpapangapudan tanganing ipag-itaas an saindong mga boses na siring sa tunog nin sarong tambuli, tanganing magdedeklara kan sakuyang ebanghelyo para sa sarong tiko asin balinsot na henerasyon.

3 Nin huli ta hilnga, an bukid mapution na para sa pag-aani; asin uya na an ika-onseng oras, asin an pinakahuring panahon na Ako mag-aapud nin mga trabahador para sa sakuyang ubasan.

4 Asin an sakuyang ubasan nagin koraptado na sa lambang kurit; asin mayo ni saro an naggigibo nin karahayan laen lang sa nagkakapira; asin sinda nagkakasarala sa kadakul na mga pagkakataon nin huli sa mga palsong pagkasaserdote, gabos nagkaigwa nin mga koraptong kaisipan.

5 Asin katotohanan, katotohanan, Ako nagsasabi sa saindo, na ini an simbahan na sakuyang pinag-establisa asin pinagpangapudan na magluluwas gikan sa kaparangan.

6 Asin sa siring Ako an magtitipon-tipon kan sakuyang mga pinili gikan sa apat na rona kan kinaban, maski magin arog kadakul na naniniwala sakuya, asin nagdadangog sa sakuyang boses.

7 Iyo, katotohanan, katotohanan, Ako nagsasabi sa saindo, na an bukid mapution na sa pag-aani; kun kaya, maggapas kan saindong mga asyab, asin mag-ani sa bilog nindong kakayahan, isip asin kusog.

8 Bukasan an saindong mga nguso asin sinda mapapano, asin ika magigin siring ki Nephi kan luma, na naglalakbay gikan sa Jerusalem pasiring sa kaparangan.

9 Iyo, bukasi an saindong mga nguso asin dae magpalaen; asin kamo pagkakargahan nin mga bulto sa saindong mga likod, nin huli ta sa kagabatan, Ako kaiba nindo.

10 Iyo, bukasi an saindong mga nguso asin sinda pagpapanoon, na nagsasabi: Magsorolsol kamo, magsorolsol kamo, asin andamon nindo an dalan nin Kagurangnan, asin giboha an saiyang mga dalan na matanos; nin huli ta an kahadean nin langit haranihon na;

11 Iyo, magsorolsol asin magpabunyag kamo, an lambang saro saindo, para sa kapatawaran kan saindong mga kasalan; iyo, magpabunyag sa paagi nin tubig, asin pagkasunod an bunyag nin kalayo asin kan Banal na Espiritu.

12 Hilnga, katotohanan, katotohanan, Ako nagsasabi sa saindo, iyo ini an sakuyang ebanghelyo; asin giromdomon na sinda dapat may pagtubod sakuya o sinda baya dae maliligtas;

13 Asin sa ibabaw kaining gapo Ako magtutugdok nin sakuyang simbahan; iyo, sa ibabaw kaining gapo kamo pinagtutugdok, asin kun kamo magpapadagos, an mga pintuan nin impiyerno dae makakatagal laban saindo.

14 Asin kamo makakagiromdom sa mga pansimbahang artikulo asin mga tipan na pagsusunodon an mga ini.

15 Asin an siisay sainda na igwang pagtubod saindong pagkukumpirmahon sa laog kan sakuyang simbahan, sa paagi nin pagpapatong nin mga kamot, asin Ako an magtatao nin regalo kan Banal na Espiritu sa sainda.

16 Asin an Libro ni Mormon asin an banal na mga kasuratan sinda ipagtatao ko para sa saindong instruksiyon; asin an kapangyarihan kan sakuyang Espiritu iyo an magpapahidali sa gabos na mga bagay.

17 Kumbaya, magkaigwa kamo nin pagtubod, magpangadye pirme, gibohon na an saindong mga lampara apamado asin nag-iilaw, asin an lana may reserba ka, na tanganing ika magin andam sa pag-abot kan kaglalakeng-agom---

18 Nin huli ta hilnga, katotohanan, katotohanan, Ako nagsasabi sa saindo, na Ako maabot nin hidali. Arog kaini. Amen.

SEKSYON 32

Kapahayagan na ipinagtao sa paagi ni Joseph Smith an Propeta para kina Parley P. Pratt asin Ziba Peterson, Oktubre 1830. HS 1:1-118-120. Dakulaong interes asin mga pagmamawot an nagkamaratean kan mga elders manunungod sa mga Lamanita, na an saindang pinaghayag na mga bendisyon an Simbahan an nakakaaram, sarong kahagadan an pinaghimo na tanganing an Kagurangnan magpapahayag kan saiyang kagustuhan manungod sa siisay na mga elders an dapat na ipagpadara sa panahon na idto sa mga tribu kan Indian sa may parteng sulnopan. An kapahayagan na ini an kasunod.

*******

1-3, Si Parley P. Pratt asin Ziba Peterson pinagpangapudan na magbabalangibog sa mga Lamanita asin mag-iba kamo kina Oliver Cowdery asin Peter Whitmer, Jun.; 4-5, Sinda magpapangadye para sa pagkasabot sa mga kasuratan.

*******

Asin ngonyan manunungod sa sakuyang surugoon na si Parley P. Prat, hilnga, Ako an magsasabi sa saiya na habang Ako nabubuhay Ako magsusugo na siya magdedeklara kan sakuyang ebanghelyo asin makanuod sa sakuya, asin magin mahuyo asin magpakumbaba sa puso.

2 Asin idto na sakuyang mga surugoon, na sinda Oliver Cowdery asin Peter Whitmer, Jun., pasiring sa kaparangan sa pag-iriba nin mga Lamanita.

3 Asin sinda Ziba Peterson man magduduman na kaiba ninda; asin Ako sa sakuyang sadire magduduman kaiba ninda asin magin yaon sa saindang katahawan; asin Ako an saindang Tagapagpatahaw sa Ama, asin mayong makakatagal laban sainda.

4 Asin sinda magtatao nin paghihinanyog sa mga bagay na nasusurat, asin dae ka magsasagin-sagin sa iba pang kapahayagan; asin sinda magpapangadye pirme na tanganing Ako an magbubukas kan mga ini para sa saindang pagkakasabot.

5 Asin sinda magtatao nin paghihinanyog kaining mga tataramon asin dae magbabasang-basang, asin Ako an magbebendisyon sainda. Amen.

SEKSYON 31

Kapahayagan na ipinagtao sa paagi ni Joseph Smith an Propeta para ki Thomas B. Marsh, Septyembre 1830. HS 1:115-117. An okasyon tulos nagsunod sa sarong kumperensiya kan Simbahan. Hilngon an pamayuhan kan Seksyon 30. Thomas B. Marsh pinagbunyagan sa amay nin bulan, asin pinag-ordinahan bilang elder nin Simbahan bago pa man ining kapahayagan ipinagtao.

*******

1-6, Thomas B. Marsh, pinagpangapudan na magbalangibog kan ebanghelyo asin pinagpaseguro kan saiyang karahayan para sa kapakanan kan saiyang pamilya; 7-13, Siya pinaghulitan na magin mapagpasensiya, na mangangadye pirme, asin magsunod sa Tagalinga.

*******

Thomas, sakuyang akeng lalake, paladan ka nin huli sa saimong pagtubod sa sakuyang gibo.

2 Hilnga, ika nagkaigwa nin kadakulon na mga kasakitan nin huli sa saimong pamilya; daeng pagkukulang, Ako magbebendisyon saimo asin sa saimong pamilya, iyo, sa saimong mga saradit na kaarakian; asin an aldaw mag-aabot na sinda maniniwala asin makakaaram sa katotoohan asin makikisumaro na makaiba mo sa sakuyang simbahan.

3 Ipag-itaas mo an saimong puso asin mag-ogma, nin huli ta an oras kan saimong pagmisyon nag-abot na; asin an saimong dila pagbubuhian na, asin ika magdedeklara nin marahayon na mga bareta nin dakulang kaogmahan sa henerasyon na ini.

4 Ika magdedeklara sa mga bagay na pinagpahayag sa sakuyang surugoon, si Joseph Smith, Jun., Ika magpopoon na magbabalangibog magpoon ngonyan na panahon padagos, iyo, tanganing mag-ani sa omahan na namumuti nang gayo na tanganing pagsusuloon.

5 Kun kaya, mag-ani ka kan saimong asyab sa bilog mong kalag, asin an saimong mga kasalan ipagpapatawad na saimo, asin ika magbubuhat nin mga binulto sa saimong likod, ni an trabahador maninigo sa saiyang paghiro. Kun saen baya, an saimong pamilya mamumuhay.

6 Hilnga, katotohanan Ako nagsasabi sa saimo, maghale ka sa pag-iriba ninda sa kadikit sanang panahon, asin magdedeklara ka kan sakuyang tataramon, asin Ako mag-aandam nin sarong lugar para sainda;

7 Iyo, Ako an magbubukas kan mga puso nin katawohan, asin sinda magreresibe saimo. Asin Ako an mag-eestablisa nin sarong simbahan sa paagi kan saimong kamot;

8 Asin ika an magpapakusog sainda asin prepararon sinda laban sa panahon kun soarin sinda pagtitiripon-tiponon.

9 Magin mapagpasensiyoso ka sa mga kasakitan, dae ka magpasugot laban sainda na manunugot. Pamahalaan mo an saimong harong sa kahuyoan, asin manindugan ka.

10 Hilnga, Ako nagsasabi sa saimo na ika magigin sarong parabulong kan simbahan, pero bako sa kinaban, nin huli ta sinda dae na magreresibe saimo.

11 Magpaduman ka sa dalan na kun saen Ako an naggugusto, asin ini ipagtatao ko sa saimo sa paagi nin Tagalinga na kun ano an saimong gigibohon asin kun saen ika magpapaduman.

12 Magpangadye pirme, na baka baga ika makalaog sa tentasyon asin mawaraan lugod kan saimong gantimpala.

13 Magin pano ka sa pagtubod sagkod sa katapusan, asin uya, Ako yaon sa kaiba mo. Ining mga tataramon bakong gikan sa sarong tawo sana or mga tawo, kund gikan sakuya, na iyo si JesuCristo, an saimong Paratubos, sa paagi nin kagustuhan nin Ama. Amen.

SEKSYON 30

Kapahayagan na ipinagtao sa paagi ni Joseph Smith an Propeta para kina David Whitmer, Peter Whitmer, Jun., and John Whitmer, sa Fayette, New York, Septyembre 1830, pagkatapos kan tulong aldaw na kumperensiya sa Fayette, pero bag-o pa man na an mga elder kan Simbahan nag-orolian. HS 1:115-116. An orihinal kaining materyal pinagpublikar bilang tulong mga kapahayagan; pinagsaro ini bilang sarong Seksyon kan Propeta sa 1835 edisyon kan Doktrina asin mga Tipan.

*******

1-4, David Whitmer pinagpakulan nin huli ta deae nakapagsirbe nin maigot; 5-8, Peter Whitmer, Jun., iyo an makaiba ni Oliver Cowdery sa pagmisyon pasiring sa mga Lamanita; 9-11, John Whitmer pinagpangapudan na magbalangibog kan ebanghelyo.

*******

Hilnga, Ako nagsasabi sa saimo, David, na ika natakot sa tawo asin dae nagsarig sakuya para sa kusog na kinakaipuhan mo.

2 Pero an saimong isip yaon sa mga bagay kan kinaban na mas sobra pa sa mga bagay na para sakuya, an saimong Kaglalang, asin sa ministeryo kun saen ika pinagpangapudan; asin ika dae nanggad nagdadangog sa sakuyang Espiritu, asin sa sainda na nagtatabang sa saimo, kund nagdagka ninda na bako kong pinagsugo.

3 Kumbaya, ika nawalat na naghahapot ngyonyan sa saimong sadire, asin nariribongan sa mga bagay na saimong naresibe.

4 Asin an saimong harong magigin yaon sa laog kan harong nin saimong ama, sagkod na Ako magtatao sa saimo nin dagdag na mga kasugoan. Asin ika mag-aatendir sa ministeryo sa laog nin simbahan, asin sa atubangan nin kinaban, asin mga rehiyon na nakapalibot. Amen.

5 Hilnga, Ako nagsasabi sa saimo, Peter, na ika maglalakbay na kaiba an saimong tugang na lalake na si Oliver; nin huli ta an panahon nag-abot na ini kapakinabangan para sakuya na ika magbubukas kan saimong nguso na magdedeklara kan sakuyang ebanghelyo; kun kaya, dae ka matatakot, kundi magtao nin paghinanyog sa mga tataramon asin paghulit kan saimong tugang na lalake, na saiyang ipagtatao saimo.

6 Asin magsakit ka man sa gabos na saiyang mga kasakitan, magin padagos na ipag-itaas an saimong puso sa sakuya sa pangadyeon asin pagtubod, para saiya asin sa saimong kaligtasan; nin huli ta Ako nagtao sa saiya nin kapangyarihan na ipagtugdok an sakuyang simbahan sa pag-iriba nin mga Lamanita;

7 Asin mayo Akong iba na pinagngaranan na magin saiyang katabang na mangingibabaw saiya sa simbahan, mapanungod kan mga bagay nin simbahan, laen lang sa saimong tugang na lalake, na si Joseph Smith, Jun.

8 Kumbaya, maghinanyog ka kaining mga bagay asin magin maigot sa pagsunod sa sakuyang mga kasugoan, asin ika pagbebendisyunan para sa eternal na buhay. Amen.

9 Hilnga, Ako nagsasabi sa saimo, surugoon kong John, na ika magpoon na sa panahon na ini na padagos na magproklama kan sakuyang ebanghelyo, siring sa boses nin sarong tambuli.

10 Asin an saimong gigibohon iyo an magpaduman sa saimong tugang na lalake na si Philip Burrough, asin duman sa rehiyon na nakapalibot, iyo, na kun saen man na ika puwedeng pagdadangogon, sagkod na Ako magsusugo saimo na maglakbay poon duman.

11 Asin an saimong bilog na gibohon iyo an para sa Sion, sa bilog mong kalag, magpoon ngonyan; iyo, ika magbubukas kan saimong nguso para sa sakuyang kausa, na mayong pagkatakot sa kun ano an magigibo nin tawo, nin huli ta Ako kaiba mo. Amen.