SEKSYON 47

Kapahayagan na ipinagtao sa paagi ni Joseph Smith an Propeta, sa Kirtland, Ohio, Marso 8, 1831. HS 1:166. Bago pa an panahon na ini si Oliver Cowdery nagtrabaho bilang Pansimbahang Tagapag-historya asin Tagapagtala. Si John Whitmer dae naghagad na pagngaranan bilang Tagapag-historya, kundi, pinagpangapudan na magsirbe sa arog kaining kapasidad, siya nakapagsabi na siya magsusunod sa kagustuhan nin Kagurangnan sa bagay na ini. Siya nakapagsirbe na man bilang sarong sekretaryo sa Propeta sa pagtatala nin kadakul na mga kapahayagan na naresibe sa Fayette, New York, na lugar.
*******
1-4, Si John Whitmer iyo an pinagngaranan na tagapagsaray kan historya kan Simbahan asin magsusurat para sa Propeta.
*******
HILNGA, ini sarong kapakinabangan sakuya na an sakuyang surugoon na si John dapat magsusurat asin magsasaray nin sarong regular na historya, asin magtatabang saimo, Joseph an sakuyang surugoon, sa pagsusurat kan gabos na mga bagay na ipagtatao sa saimo, sagkod na siya pagpangapudan sa ibang mga gibohon.
2 Giraray, katotohanan Ako nagsasabi sa saimo na siya man puwedeng magpaabot kan saiyang boses sa mga miting, kun soarin baga ini kinakaipuhan.
3 Asin giraray, Ako nagsasabi sa saimo na ini pinagngangaranan sa saiya na magsasaray padagos kan pansimbahang rekord asin historya; nin huli ta si Oliver Cowdery Ako magngangaran na magpasiring sa ibang opisina.
4 Kumbaya, ini pinagtatao saiya, habang maigot siyang nagin pano nin pagtubod, sa paagi nin Tagapaglinga, na magsusurat kaining mga bagay. Arog kaini. Amen.

SEKSYON 46

Kapahayagan na pinagtao sa paagi ni Joseph Smith an Propeta para sa Simbahan, sa Kirtland, Ohio, Marso 8, 1831. HS 1:163-165. Sa amay na ining panahon kan Simbahan, dae pa nakapaggibo nin sarong pinakamodelong paagi kun paano ikokondukta an pansimbahang mga serbisyo. Pero an kustombre nin pagtanggap kan mga miyembro sana asin para sa mga maiigot na mga imbestigador sa mga miting kan sakramento asin iba pang asembliya kan Simbahan nagin yaon sa pangkagabsang kamugtakan. Ining kapahayagan nagsasaysay kan boot nin Kagurangnan mapanungod sa pagpapamahala asin sa pagkokondukta nin mga miting.
*******
1-2, An mga elders iyo an magkokondukta kan mga miting sa giya kan Banal na Espiritu; 3-6, an mga parahanap nin katotoohan dae dapat pagpaluwason sa mga pansakramentong serbisyo; 7-12, Maghapot sa Diyos asin hagadon an mga regalo kan Espiritu; 13-26, Sarong kabilangan kan iba kaining mga regalo; 27-33, an mga lider kan simbahan pinag-taohan nin kapangyarihan na makapagmangno nin mga regalo kan Espiritu.
*******
MAGHINANYOG, O kamong mga katawohan kan sakuyang simbahan; nin huli ta katotohanan Ako nagsasabi sa saindo na ining mga bagay ipinagtaram sa saindo para sa saindong kapakinabangan asin pagkakanuod.
2 Pero bako lamang kaining mga bagay na nagkasururat na, ini pirmeng ipinagtatao sa mga elders kan sakuyang simbahan magpoon pa sa kapinunan, asin magin sagkod pa man, na magkondukta nin gabos na mga miting na sainda pinagtugon asin pinaggigiyahan sa paagi kan Banal na Espiritu.
3 Daeng pagkukulang na kamo pinagsusugo na dae magsikwal sa kiisay man paluwas gikan sa saindong mga pampublikong miting, na pinaggigibo sa atubangan nin kinaban.
4 Kamo man pinagsusugo na dae magsikwal sa kiisay man na kaayon sa simbahan paluwas sa saindong mga pansakramentong miting; daeng pagkukulang, kun siisay an nakapaglapas, dae siya pagtugutan na makiparte Hanggan na siya naghimong makipag-olian.
5 Asin giraray Ako nagsasabi sa saindo, kamo dae magsisikwal sa kiisay man paluwas sa saindong mga pansakramentong miting na maigot na naghahanap kan kahadean--- Ako nagtataram kaini mapanungod sainda na bakong yaon sa simbahan.
6 Asin giraray Ako nagsasabi sa saindo, mapanungod sa saindong mga pankompirmasyong miting, na kun igwa man na bakong kaayon sa simbahan, na maigot na naghahanap kan kahadean, kamo dae magsisikwal sainda paluwas.
7 Pero kamo pinagsusugo sa gabos na mga bagay na maghapot sa Diyos, na nagtatao nin haluwagon; asin idto na an Espiritu nagpatotoo sa saindo na sa arog kaini Ako nagmawot na kamo dapat na gumibo sa bilog na kabanalan nin puso, maglalakaw nin matanos sa atubangan ko, pinagkokonsidera an tapos kan saindong kaligtasan, naggigibo nin gabos na mga bagay na igwang pangadyeon asin pasasalamat, na tanganing kamo dae nanggad maaakay kan mga mararaot na espiritu, o mga doktrina kan mga diyablo, o mga kasugoan nin mga tawo; nin huli ta an iba naggigikan sa mga tawo, asin an iba man sa mga diyablo.
8 Kumbaya, mag-ingat na baka baya kamo madaya; asin tangani baya kamo dae puwedeng madaya maghanap kamo nin maigot kan pinakamarahay na mga regalo, na pirmeng naggigiromdom kun ta daw ta sinda pinagtatao;
9 Nin huli ta katotohanan Ako nagsasabi sa saindo, sinda pinagtatao para sa benepisyo ninda na nagmomoot sakuya asin nagsusunod sa gabos kong mga kasugoan, asin saiya na naghahanap na gayong gumibo; na tangani an gabos puwedeng mabenepisyaran na naghahanap o naghahagad sa sakuya, na naghagad asin bako nin sarong senyal na tanganing saindang mapupuwedeng magamit sa saindang mga kalaswaan.
10 Asin giraray, katotohanan Ako nagsasabi sa saindo, Ako nagmawot na saindo pirmeng paggigiromdomon, asin pirmeng ipintal sa saindong mga isipan kun ano baya idtong mga regalo, na pinagtao na sa simbahan.
11 Nin huli ta bakong gabos igwa nin lambang regaling pinagtatao sa sainda; nin huli ta igwa nin kadakul na mga regalo, asin sa lambang tawo pinagtatao an sarong regalo sa paagi kan Espiritu nin Diyos.
12 Sa iba pinagtatao an saro, asin sa iba pinagtatao an iba man, na tanganing an gabos mapupuwedeng makapagpakinabang kaiyan.
13 Sa iba ini pinagtatao sa paagi kan Banal na Espiritu na makaaram na si JesuCristo iyo an Ake nin Diyos, asin ta siya pinagpako sa krus para sa mga kasalan kan kinaban.
14 Sa iba man ini pinagtatao tanganing maniniwala sa saindang mga tataramon, na tanganing sinda man mapupuwedeng magkaigwa nin eternal na buhay kun sinda padagos na pano nin pagtubod.
15 Asin giraray, sa iba ini pinagtatao sa paagi nin Banal na Espiritu na makakaaram sa pagkakaiba kan administrasyon habang ini mapupuwedeng makapagpapaogma sa kapreho man sanang Kagurangnan, na uyon sa pagmamawot nin Kagurangnan, na pinapatugmad an saiyang mga pagkaherak na uyon sa mga kamugtakan kan mga kaarakian nin mga tawo.
16 Asin giraray, ini pinagtatao sa paagi kan Banal na Espiritu sa iba na makakaaram sa manlaen-laen na mga operasyon, na kun baya sinda sa Diyos, na an mga manipestasyon kan Espiritu mapupuwedeng ipagtatao sa lambang tawo na makapagpakinabang kan mga ini.
17 Asin giraray, katotohanan Ako nagsasabi sa saindo, sa iba pinagtatao, sa paagi kan Espiritu nin Diyos, an tataramon nin kadunungan.
18 Sa iba man pinagtatao an tataramon nin kaaraman, na tanganing an gabos mapupuwedeng matukdoan na magin madunong asin magkaigwa nin kaaraman.
19 Asin giraray, sa iba ini pinagtatao na magkaigwa nin pagtubod tanganing maomayan;
20 Asin sa iba man ini pinagtatao na magkaigwa nin pagtubod na makapagpaomay.
21 Asin giraray, sa iba pinagtatao na makapaghihimo nin mga milagro;
22 Asin sa iba man ini pinagtatao na makapagpropesiya;
23 Asin sa iba man an makapagmangno nin mga espiritu.
24 Asin giraray, ini pinagtatao sa iba na makapagtaram nin mga dila;
25 Asin sa iba man pinagtatao an interpretasyon kan mga dila,
26 Asin an gabos na ining mga regalo naggigikan sa Diyos, para sa benepisyo kan mga kaarakian nin Diyos.
27 Asin sa Obispo kan simbahan, asin sa iba man na an Diyos iyo an magngangaran asin pag-oordinahan tanganing magbabantay kan simbahan asin magin mga elders para sa simbahan, tanganing himoon na ini ipagtatao sa sainda tanganing makapagmangno kan gabos na idtong mga regalo na baka baya magkakaigwa sa arinman na pag-iribahan nindo na nagpopropesiya asin Alagad bako man baya sa Diyos.
28 Asin ini mangyayaring maglipas na siya na naghahapot sa Espiritu makakapagresibe sa Espiritu;
29 Na sa iba baya ini mapupuwedeng ipagtatao na magkakaigwa nin gabos na idtong mga regalo, na tanganing magkakaigwa baya nin sarong pamayo, na tanganing an lambang miyembro mapupuwedeng makapagpakinabang kaiyan.
30 Siya na naghahagad sa Espiritu naghahagad na uyon sa kagustuhan nin Diyos; kun baya ini nangyayari na uyon sa saiyang paghahagad.
31 Asin giraray, Ako nagsasabi sa saindo, an gabos na mga bagay kaipuhan na gibohon sa pangaran ni Cristo, an anuman na saindong ginigibo sa Espiritu;
32 Asin kamo kaipuhan na magtatao nin pasasalamat sa Diyos sa Espiritu para sa anuman na bendisyon na kamo pinagbebendisyunan na.
33 Asin kamo kaipuhan na maghihimo sa birtud asin kabanalan na dagos-dagos sa atubangan ko. Arog kaini. Amen.

SEKSYON 45

Kapahayagan na ipinagtao sa paagi ni Joseph Smith an Propeta para sa Simbahan, sa Kirtland, Ohio, Marso 7, 1831. HS 1: 158-163. Bilang pangenot na tataramon kan saiyang record nin kapahayagan, an Propeta nagsabi sa “sa edad na ini kan Simbahan kadakul na mga palsong report asin mga kalokohang estorya na pinagpublisa asin pinagpakalat, tanganing pugulon an katawohan na mag-imbestigar kan gibo o magkugos sa pagtubod; pero sa kaogmahan kan mga banal… Ako nagresibe kan minasunod.”
*******
1-5, Si Cristo iyo an satuyang Tagapagpatahaw sa Ama; 6-10, An ebanghelyo iyo an sarong mensahero tanganing andamon an dalan sa atubangan nin Kagurangnan; 11-15, Si Enoch asin an saiyang mga katugangan pinagresibe nin Kagurangnan para sa saiya; 16-23, Si Cristo nagpahayag kan mga senyales kan saiyang pag-abot na siring kan pinagtao sa Bukid nin mga Olibo; 24-38, An ebanghelyo ibabalik-liwat, an mga panahon kan mga Hentil mauutob, asin sarong mangirhat na pagsakit magkakalat sa kadagaan; 39-47, Mga senyales, mga kangangalasan, asin an pagkabuhay-liwat iyo an kasabay sa Ikaduwang Pag-abot; 48-53, Si Cristo magtitindog sa Bukid nin mga Olibo, asin an mga Hudiyo mahihiling an mga lugad sa saiyang mga kamot asin bitis; 54-59, An Kagurangnan maghahade sa Milenyo; 60-62, An Propeta pinag-instruksiyunan na magpoon sa pagsalin kan Bagong Tipan, na sa paging ini an mga importanteng impormasyon mangyayaring maipagpabantog; 63-75, An mga banal pinagsurugo na magtiripon-tipon asin itugdok an Bag-ong Jerusalem, na kung saen an mga katawohan sa gabos na mga nasyon mag-aarabot.
*******
MAGHINANYOG, O kamong mga katawohan kan sakuyang simbahan, na sa saindo an kahadean pinagtao; maghinanyog kamo asin magtao nin talenga saiya na iyo an naglatag kan pundasyon kan kinaban, na iyo an naggibo kan mga langit asin kan gabos na mga hukbo kaini, asin sa paagi niya gabos na mga bagay pinaggibo na mamumuhay, asin maghihiro, asin igwa nin kahalagahan.
2 Asin giraray Ako nagsasabi, maghinanyog sa sakuyang boses, na baka an kagadanan iyo an mangingibabaw saindo; sa oras kun soarin kamo dae nag-iisip na an tag-init nakaagi na, asin an tag-ani natapos na, asin an saindong mga kalag dae naligtas.
3 Magdangog sa saiya na iyo an Tagapagpatahaw sa Ama, na iyo an nagpapaabot kan saindong mga kausa sa atubangan niya---
4 Na nagsasabi: Ama, hilnga an mga pagsasakit asin kagadanan ninda na mayong mga kasalan, na sainda ika marahayong nag-oogmang gayo; hilnga an dugo kan saimong Ake na pinagpabulos, an dugo niya na saimong pinagtao na tanganing an saimong sadire maipagpapamuraway;
5 Kun saen baya, Ama, iligtas mo ining sakuyang mga katugangan na nagtutubod sa sakuyang pangaran, na tanganing sinda magdudulok sa sakuya asin magkakaigwa nin daeng katapusan na buhay.
6 Maghinanyog, O kamong mga katawohan kan sakuyang simbahan, asin kamong mga elders magdangog na nagkatiripon, asin magdangog sa sakuyang boses habang pinag-apudan ngonyan, asin dae pagpapatagason an saindong mga puso;
7 Nin huli ta katotohanan Ako nagsasabi sa saindo na Ako an Alpha asin Omega, an kapinunan asin an katapusan, an liwanag asin an buhay kan kinaban--- sarong liwanag na nagsisirang sa kadikloman asin an kadikloman dae nakakasabot kaini.
8 Ako nag-abot sa sakuyang pagsadire asin an sakuyang pagsadire dae nagresibe sako; pero sa sainda na kadakul na nagresibe sakuya Ako nagtatao nin kapangyarihan na maggibo nin kadakul na mga Milagros, asin magin mga akeng lalake nin Diyos; asin magin sa sainda na nagtutubod sa sakuyang pangaran Ako nagtatao nin kapangyarihan na makakamit nin eternal na buhay.
9 Asin magin arog kaini Ako nagpadara kan sakuyang daeng katapusan na tipan pasiring sa kinaban, na magin liwanag sa kinaban, asin magin sarong istandard para sa sakuyang mga katawohan, asin para sa mga Hentil na maghahanap kaini, asin magin sarong mensahero sa atubangan kan sakuyang lalawgon tanganing prepararon an dalan sa atubangan ko.
10 Kun saen baya, magdulok kamo kaini, asin kaiba niya na maabot na Ako magrarason arog na kaiba nin mga tawo sa aldaw kan luma, asin Ako magpapahiling sa saindo kan sakuyang makusugon na pagrarason.
11 Kun saen baya, maghinanyog kamo na magka-iribahan asin tugutan nindo na maipahiling sa saindo an sakuyang kadunungan--- an kadunungan niya na saindong pinagsasabi na Diyos ni Enoch, asin kan saiyang mga katugangan,
12 Na sinda pinaglaen gikan sa kinaban, asin pinagresibe pasiring sa sakuya--- sarong siyudad na pinagreserba sagkod na an aldaw nin pagkamatanos mag-aabot--- sarong aldaw na pinaghahanap sa paagi kan gabos na mga banal na mga tawo, asin sinda dae nakanagbo kaini nin huli sa karigsokan asin mga abominasyon;
13 Asin nagkumpisal na sinda mga estranghero asin mga paralakbay kan kinaban;
14 Pero nagkamit nin sarong promise na sainda dapat na managboan ini asin mahiling ini sa saindang laman.
15 Kun saen baya, maghinanyog asin Ako magrarason na kaiba nindo, asin Ako magtataram sa saindo asin magpropesiya, na arog sa mga tawo kaidtong mga aldaw na luma.
16 Asin Ako magpapahiling kaini sa yano siring na Ako nagpahiling kaini sa sakuyang mga desipulos arog na Ako nagtindog sa atubangan ninda sa laman, asin nagtaram sa sainda, na nagsasabi: Arog na kamo naghapot sako manunungod sa mga senyales kan sakuyang pag-abot, sa aldaw kun noarin Ako mag-abot na yaon sa sakuyang kamurawayan sa mga panginuron kan langit, tanganing utubon an mga promise na Ako an naghimo sa saindong mga ama,
17 Nin huli ta siring na kamo naghahanap sa haloy nang pagkawara kan saindong mga espiritu gikan sa saindong mga hawak tanganing magin sarong uripon, Ako magpapahiling sa saindo kun paano an aldaw nin pagtubos mag-aabot, asin man an restorasyon kan nagkaralat na Israel.
18 Asin ngonyan saindong nahiling ining templo na yaon sa Jerusalem, na saindong pinag-apod na harong nin Diyos, asin an saindong mga kaiwal nagsasabi na ini an harong na dae nanggad mapupukan.
19 Alagad, katotohanan Ako nagsasabi sa saindo, na an kalipungawan mag-aabot sa henerasyon na ini siring sa sarong parahabon sa pagkabanggi,
20 Asin ining templo na saindo ngonyan na nahihiling pagpupukanon na tanganing mayong matatadang gapong nakapatong sa lambang saro.
21 Asin ini mangyayaring maglipas, na ining henerasyon kan mga Hudiyo dae maglilipas sagkod na an lambang kalipungawan na Ako an nagsabi saindo manungod sainda mangyayaring maglipas.
22 Kamo nagtataram na kamo nakakaaram na an katapusan kan kinaban maabot; kamo nagtataram man na kamo nakakaaram na an mga langit asin kadagaan maglilipas;
23 Asin kaini kamo nagsasabi nin katotoohan, nin huli ta iyo nanggad ini; pero ining mga bagay na Ako an nagsabi saindo dae maglilipas sagkod na an gabos mauutob.
24 Asin ini Ako nagsasabi saindo manungod sa Jerusalem; asin kun noarin an aldaw na iyan mag-abot, saka pa an sarong katadaan magkakalat sa pag-iriba kan gabos na mga nasyon;
25 Alagad sinda pagtitiripon-tiponon giraray; pero sinda mawawalat sagkod na an mga panahon kan mga Hentil magka-urutob.
26 Asin sa aldaw na iyan magkakadarangog an mga giyera asin mga sabi-sabi kan giyera, asin an bilog na kinaban magkakasiribot, asin an mga puso nin mga tawo an magpapahamak sainda, asin sinda magsasabi na si Cristo naabala sa saiyang pag-abot sagkod na sa katapusan kan kinaban.
27 Asin an pagkamoot kan mga tawo magin malipot, asin an kadaendatahan magdadakul.
28 Asin kun noarin an mga panahon kan mga Hentil mag-abot na, sarong liwanag an magsisirang sa pag-iriba ninda na nakatukaw sa kadikloman, asin ini magigin kabilugan kan sakuyang ebanghelyo;
29 Pero sinda dae magreresibe kaini; nin huli ta sinda dae nag-iisip sa liwanag, asin sinda nagparayo kan saindang mga puso gikan sakuya nin huli kan mga kaisipan nin mga tawo.
30 Asin sa henerasyon na iyan an mga panahon kan Hentil mag-uutob.
31 Asin magkakaigwa nin mga tawo na magtitindog sa henerasyon na iyan, na dae magkakagaradan sagkod na saindang masasaksihan an nagsosobra-sobrang kasakitan; nin huli ta sarong kalipungawan na sakit an magtatabon sa kadagaan.
32 Alagad an sakuyang mga desipulos magtitindog sa banal na mga lugar, asin dae matitingkog; pero sa pag-iriba kan mga mararaot, an mga tawo magpapalangkaw kan saindang mga boses asin susumpaon an Diyos asin magkakagaradan.
33 Asin magkakaigwa man nin mga paglilinog sa manlaen-laen na mga lugar, asin kadakul an mga kalipungawan; pero an mga tawo magpapatagas kan saindang mga puso laban sako, asin sinda magkakarapot nin espada, an saro kontra sa saro, asin sinda maggagaradan sa lambang saro.
34 Asin ngonyan, kun noarin na Ako an Kagurangnan nagsasabi kaining mga tataramon sa sakuyang mga desipulos, sinda nagkaharandal.
35 Asin Ako nagsabi sainda: Dae kamo magharandal, nin huli ta, kun noarin na an mga bagay na ini mangyayaring maglipas, kamo puwedeng makakaaram na an mga promise na pinaghimo sa saindo magkaka-urutob.
36 Asin kun noarin na an liwanag magpopoon na magsisirang, ini mapapasainda na arog sa sarong parabola na sakuyang ipapahiling saindo---
37 Kamo magmasid asin hilnga an mga igos na kahoy, asin kamo makakapaghiling sainda sa paagi kan saindong mga mata, asin kamo makakapagsabi kun noarin na sinda magturubo, asin an saindang mga dahon marulumbod pa, na an tag-init ngonyan nagdadangadang na.
38 Maski arog kaini ini mangyayari sa aldaw na iyan kun noarin na saindang mahihiling ining mga bagay, sa panahon na iyan saindang maaaraman na an oras haranihon na.
39 Asin ini mangyayaring maglipas na siya na natatakot sako mag-aantabay para sa dakulang aldaw na an Kagurangnan mag-abot, magin an mga senyales kan pag-abot kan Ake nin Tawo.
40 Asin sinda makakahiling nin mga senyales asin mga kangangalasan, nin huli ta sainda ipapahiling na magluluwas sa mga kalangitan sa itaas, asin sa kinaban sa ibaba.
41 Asin sinda makakahiling nin dugo, asin kalayo, asin mga singaw kan aso.
42 Asin bago an aldaw nin Kagurangnan mag-aabot, an saldang pagdidiklomon, asin an bulan magriribay na magin dugo, asin an mga bitoon magkakahurulog gikan sa langit.
43 Asin an katadaan pagtitiripon-tiponon sa lugar na ini;
44 Asin pagkatapos sinda maghaharanap-hanap sako, asin, hilnga, Ako mag-aabot; asin sinda makakahiling sako na yaon sa mga panginuron kan langit, nababadoan nin kapangyarihan asin dakulaong kamurawayan; na kairiba an gabos na banal na mga anghel; asin siya na dae magbabantog para sakuya ipagsisikwal.
45 Pero bago an takyag nin Kagurangnan maghahampak sarong anghel an magpapatanog kan saiyang trumpeta, asin an mga banal na nagtururog na mag-aarabot sa pagsabat sako sa panginuron.
46 Kumbaya, kun ika nakapagturog na sa katuninongan paladan ka; nin huli ta sa ngonyan na saindong nahihiling Ako asin nakakaaram na Ako iyo ini, maski pa kamo magdudulok sako asin an saindong mga kalag mabubuhay, asin an saindong pagkatubos magigin sa perpekto na; asin an mga banal mag-aarabot-abot gikan sa apat na rona kan kinaban.
47 Pagkasunod an takyag nin Kagurangnan maghahampak sa mga nasyon.
48 Asin pagkasunod an Kagurangnan magtutungtong kan saiyang bitis sa ibabaw kaining Bukid, asin ini mababanga sa duwa, asin an kinaban, mangungobog-kubog, asin magduduyan-duyan paduman padigde, asin an mga kalangitan man magyuyogyog.
49 Asin an Kagurangnan magtataram sa saiyang boses, an gabos na mga katapusan kan kinaban magmumundo, asin sinda na nagngingirit makakahiling kan saindang kalokohan.
50 Asin an kalamidad magtatabon sa paratuya-tuya, asin an mga parasugot mapapara; asin sinda na nagbabantay para sa kadaendatahan patutumbahon asin igagatong pasiring sa kalayo.
51 Asin pagkasunod an mga Hudiyo maghahanap sako asin magsasabi: Ano ining lugad sa saimong mga kamot asin sa saimong mga bitis?
52 Pagkasunod sinda makakaaram na Ako an Kagurangnan; nin huli ta Ako magsasabi sa sainda: Ining mga lugad iyo an mga lugad na kun saen Ako nalugadan sa harong kan sakuyang mga amigo. Ako iyo siya na pinag-alsa paitaas. Ako si Jesus na pinagpako sa krus, Ako iyo an Ake nin Diyos.
53 Asin pagkasunod sinda maghihiribi nin huli kan saindang mga kadaendatahan; pagkasunod sinda magtatangis nin huli ta saindang pinersige an saindang hade.
54 Asin pagkatapos an mga paganong nasyon pagtutubuson, asin sinda na mayong pagkaaram sa ley magkakaigwang parte sa enot na pagkabuhay-liwat; asin ini makakaya para sainda.
55 Asin si Satanas paggagapuson, na tanganing siya dae na magkakaigwa nin lugar sa mga puso kan mga kaarakian nin mga tawo.
56 Asin sa aldaw na iyan, kun noarin Ako mag-aabot sa sakuyang kamurawayan, an parabola mauutob na sakuyang pinagsasabi na manunungod sa sampulong mga birhen.
57 Nin huli ta sinda na mga madudunong asin nakaresibe nin katotoohan, asin pinagdara an Banal na Espiritu para iyo an saindang giya, asin dae nagpadaya--- katotoohan Ako nagsasabi sa sa saindo, sinda dae nanggad pagpuputulon asin ipagsusubsob pasiring sa kalayo, kundi magdadanay an aldaw.
58 Asin an kinaban ipagtatao sa sainda bilang sarong kamanahan; asin sinda magpapakadakol asin magin makukusog asin an saindang kaarakian magtataralubo na mayong kasalan pasiring sa kaligtasan.
59 Nin huli ta an Kagurangnan magigin yaon sa saindang katahawan, asin an saiyang kamurawayan mapapasainda, asin siya an magigin saindang hade asin an saindang tagapagtao nin ley.
60 Asin ngonyan, hilnga, Ako nagsasabi sa saindo, ini ipagtatao sa saindo na makakaaram sa anuman na manunungod kaining tsapter, sagkod na an Bagong Testamento maisalin na, asin sa laog kaini gabos na ining mga bagay maipagpabantog.
61 Kumbaya Ako matao sa saimo na tanganing ika ngonyan magsalin na kaini, na tanganing ika magigin preparado na para sa mga bagay na mag-aarabot.
62 Nin huli ta Ako nagsasabi sa saimo, na darakulang mga bagay an naghaharalat sa saimo;
63 Ika makakadangog nin mga giyera kan ibang mga kadagaan; pero, hilnga, Ako nagsasabi sa saindo, sinda haranihon, magin yaon kaharanihon sa saindong mga pintuan, asin bakong kadakul na mga taon magpoon ngonyan ika makakadangog nin mga giyera sa saindong sadireng kadagaan.
64 Kumbaya Ako, an Kagurangnan, nagsasabi na mag-asembliya kamo kan saindong mga sadire na magkakatiripon-tipon kamong mga elders kan sakuyang simbahan; kamo magpaduman pasiring sa mga nasyon sa sulnupan, Mangapudan sa mga nag-eerok na magsolsol, asin habang sinda naggigibong nagsosorolsol, magtugdok nin mga simbahan para sa sakuya.
65 Asin may sarong puso asin may sarong kaisipan, pagtiripon-tiponon an saindong mga kayamanan na tanganing kamo puwedeng makapagbakal nin sarong kamanahan na magpoon magigin maipagpangaran sa saindo.
66 Asin ini pag-aapudon na Bagong Jerusalem, sarong kadagaan nin katuninongan, sarong siyudad nin kalingaan, sa lugar nin kaligtasan para sa mga banal kan Pinakahalangkaw na Diyos;
67 Asin an kamurawayan nin Kagurangnan yaon duman, asin an kabagsikan nin Kagurangnan yaon man duman, na tangani baying gayo an mararaot dae makakaabot duman, asin ini pag-aapudon na Sion.
68 Asin ini mangyayaring maglipas sa pag-iriba nin mga mararaot, na an lambang tawo na habong magbitbit kan saiyang espada kontra sa saiyang kataraid kaipuhang gayo na magdulag pasiring sa Sion para sa kaligtasan.
69 Asin magkakaigwa nin pagtitiripon-tipon sa laog kaini na hale sa iba-ibang mga nasyon sa irarom kan langit; asin ini magigin iyo sanang mga katawohan na dae nakikipaggiyera an saro laban sa iba.
70 Asin ini pagsasabi-sabihon sa pag-iriba kan mga mararaot: Tugutan lang na dae kita makaduman sa pakikipaglaban kontra sa Sion, nin huli ta an mga nag-eerok sa Sion mga terrible; kumbaya kita dae makakatagal.
71 Asin ini mangyayaring maglipas na an mga matatanos pagtitiripon-tiponon na naggigikan sa mga pag-iriba kan gabos na mga nasyon, asin magpapaduman sa Sion, na nagkakarantahan nin mga awit nin daeng katapusan na kaogmahan.
72 Asin ngonyan, Ako nagsasabi sa saindo ipagtago nguna ining mga bagay bago maipaglantad sa mundo sagkod na ini kapakinabangan sako, na saimong maggibo ining trabaho sa mga mata kan mga katawohan, asin sa mga mata kan saimong mga kaiwal, na tangani sinda daeng pagkaaram sa saimong mga pagtatrabaho sagkod sa saimong naggibo na an bagay na kun saen Ako an nagsusugo saimo;
73 Na kun soarin saindang maipagpapabantog ini, na ini puwedeng makonsidera kaining mga bagay.
74 Nin huli ta kun soarin an Kagurangnan magpapahiling siya magigin terrible sa sainda, na tangani baya an takot mag-untok na sa sainda, asin sinda magtitindog sa harayo asin mangungubog-kubog.
75 Asin an gabos na mga magkakatarakot nin huli sa kabagsikan nin Kagurangnan, asin sa kapangyarihan kan saiyang kusog. Arog kaini. Amen.

SEKSYON 44

Kapahayagan na ipinagtao ki Joseph Smith an Propeta asin Sidney Rigdon, sa Kirtland, Ohio, sa huring parte kan Pebrero 1831. HS 1:57. Sa kauyunan kan pinaghahagad na pinagtugdas kaini, an Simbahan nagtalaan nin sarong kumperensiya na gigibohon sa amay na parte kan bulan na Hunyong paabuton.
*******
1-3, An mga elders kaipong mag-asembliya sa kumperensiya; 4-6, Sinda kaipuhanang mag-organisa na uyon sa mga leyes nin kadagaan asin sa pagmamangno kan kapobrehan.
*******
HILNGA, kaya nagsabi an Kagurangnan sa saindo na sakuyang mga surugoon, ini kapakinabangan sa sakuya na an mga elders kan sakuyang simbahan dapat na pag-apudon na magkasararo, gikan sa sirangan asin gikan sa sulnupan, asin gikan sa hiraga asin gikan sa timog, sa paagi nin surat o sa ibang paagi.
2 Asin ini mangyayaring maglipas, na habang sinda pano nin pagtubod, asin pinaggigibo an pagtubod sako, Ako an magpapabulos kan sakuyang Espiritu sa sainda sa aldaw na sinda mag-asembliyang gayo kan saindang mga sadire na magkakatiripon.
3 Asin ini mangyayaring maglipas na sinda magraralakbay pasiring sa mga rehiyon na nakapalibot, asin magbabalangibog nin pagsosolsol sa mga katawohan.
4 Asin kadakul an mapagbabag-o, na tangani baya kamo makakapagkamit nin kapangyarihan na pag-organisahon an saindong mga sadire uyon sa mga leyes nin tawo;
5 Na tangani baya na an saindong mga kaiwal dae nanggad magkakaigwa nin kapangyarihan na pangibabawan kamo; na tangani baya kamo maipreserba sa gabos na mga bagay; na tangani baya kamo makapaggibong makasunod sa sakuyang mga leyes; na an lambang gapos maghuhulpos na kun saen an kaiwal naghihingohang madestroso an sakuyang mga katawohan.
6 Hilnga, Ako nagsasabi sa saindo, na kamo magbibisita sa kapobrehan asin mga nangangaipo asin magpapamahala sa saindang kahinggianan, na tangani baya na sinda mapapangalagaan sagkod na an gabos na mga bagay puwedeng maggibo na uyon sa sakuyang ley na saindo nang pinagresibe. Amen.

SEKSYON 43

Kapahayagan na ipinagtao sa paagi ni Joseph Smith an Propeta, sa Kirtland, Ohio, kan Pebrero 1831. HS 1:154-156. Sa panahon na ini an ibang mga miyembro kan Simbahan nadedestorbo kan ibang tawo na naggigibo nin mga palsong pag-ako bilang mga tagapagpahayag. An Propeta naghapot sa Kagurangnan asin nagresibe kaining komunikasyon na ipinagpanungod sa mga elders kan Simbahan. An enot na parte nagpapanungod sa mga bagay na pansimbahang kalakawan; asin an huring parte naglalaman nin sarong patanid na an mga elders magbabalangibog sa mga nasyon kan kinaban.
*******
1-7, Mga kapahayagan asin mga kasugoan maggigikan sana sa sarong pinagngaranan; 8-14, an mga banal pinagpapabanal sa paagi nin paghimo sa bilog na kabanalan sa atubangan nin Kagurangnan; 15-22, an mga Elders pinagpadara sa pagkurahaw nin pagsosolsol asin prepararon an mga tawo para sa dakulang kaaldawan nin Kagurangnan; 23-28, An Kagurangnan nag-aapod nin mga tawo sa paagi kan saiyang boses asin sa paagi kan mga puwersa nin panahon; 29-35, an Milenyo asin an paggapos ki Satanas mangyayari.
*******
O MAGHINANYOG, kamong mga elders kan sakuyang simbahan, asin magtao nin talenga sa mga tataramon na Ako an magtataram sa saindo.
2 Nin huli ta hilnga, katotohanan, katotohanan, Ako an nagsasabi sa saindo, na kamo nagresibe nin sarong kasugoan bilang sarong ley kan sakuyang simbahan, sa paagi niya na sakuyang pinagngaranan pasiring saindo na magresibe nin mga kasugoan asin mga kapahayagan gikan sa sakuyang kamot.
3 Asin ini kamo makakaaram na may kaseguruhan--- na mayong ibang pinagngaranan sa saindo na magreresibe nin mga kasugoan asin mga kapahayagan sagkod na siya pagkuahon na, kun siya magsusunod sakuya.
4 Pero katotohanan, katotohanan, Ako nagsasabi sa saindo, na mayong iba na pagngangaranan para sa regaling ini laen lang na ini yaon sa paagi niya; nin huli ta kun ini pagkuahon gikan saiya siya dae magkakaigwa nin kapangyarihan lane lang na magngaran nin iba na saiyang karibay.
5 Asin ini magigin sarong ley sa saindo, na kamo dae magreresibe nin mga katukdoan sa iba na mag-aabot sa atubangan nindo bilang mga kapahayagan o mga kasugoan;
6 Asin ini Ako matao sa saindo na tanganing kamo dae mapupuwedeng madadaya, na tanganing saindong maaaraman na sinda bakong sakuya.
7 Nin huli ta katotohanan Ako nagsasabi sa saindo, na siya na pinag-ordinahan ko maglalaog sa may trangkahan asin pag-oordinahan arog na Ako an nagsabi saindo kaidto, na magtutukdo kaidtong mga kapahayagan na saindo nang naresibe asin magreresibe sa paagi niya na Ako an nagngaran.
8 Asin ngonyan, Ako magtatao sa saindo nin sarong kasugoan, na sa panahon na kamo mag-asembliyang magka-iribahan kamo magtinurukdoan asin magpakusog kan lambang saro, na tanganing kamo makakaaram kun paano humiro asin magtatao nin direksiyon sa sakuyang simbahan, kun paano humiro sa paagi kan mga puntos kan sakuyang ley asin mga kasugoan, na Ako an nagtao.
9 Asin kaya kamo magigin instruksiyonado sa ley kan sakuyang simbahan asin magin sanktipikado sa paagi kaidto na saindo nang naresibe, asin kamo manggagapos kan saindong sadire na maghiro sa bilog na kabanalan sa atubangan ko---
10 Na habang saindong ginigibo ini, kamurawayan an ipagdadagdag sa kahadean na saindong naresibe. Habang dae nindo ginigibo ini, ini pagbabawion, maski idtong saindo nang naresibe.
11 Purgahon nindo paluwas an kadaendatahan na yaon sa pag-iriba nindo; pagkapabanalon an saindong mga sadire sa atubangan ko;
12 Asin kun kamo nagmamawot nin mga kamurawayan kan kahadean, pagngaranan nindo an sakuyang surugoon na si Joseph Smith, Jun., asin tumindog na kaiba niya sa atubangan ko sa paagi nin pangadyeon sa pagtubod.
13 Asin Giraray, Ako nagsasabi sa saindo, na kun kamo nagmamawot kan mga misteryo kan kahadean, magtao para saiya nin kakanon asin yamit, asin an anuman na bagay na saiyang pinagkakaipuhanan tanganing matapos an gibo kun saen Ako an nagsusugo saiya;
14 Asin kun dae nindo gigibohon ini siya mag-eerok na kaiba ninda na nagresibe saiya, na tanganing Ako makapagreserba para sa sadire ko nin sarong maimbod na katawohan sa atubangan ko.
15 Giraray ako nagsasabi, maghinanyog kamong mga elders kan sakuyang simbahan, na Ako an nagpili: Kamo dae pinagpadara tanganing tukdoan, kundi an magtukdo sa mga kaarakian nin mga tawo kan mga bagay na Ako an nagbugtak sa saindong mga kamot sa paagi nin kapangyarihan kan sakuyang Espiritu;
16 Asin kamo pagtutukdoan gikan sa kaitaasan. Pagkapabanalon an saindong mga sadire asin kamo pagpuputungan nin kapangyarihan, na tanganing kamo puwedeng makapagtao arog sa sakuyang pinagtaram na.
17 Maghinanyog kamo, nin huli ta, hilnga, an dakulang kaaldawan nin Kagurangnan haranihon nang gayo.
18 Nin huli ta an aldaw mag-aabot na an Kagurangnan magtataram na an saiyang boses nagluluwas sa langit; ang mga kalangitan magyuyogyog asin an kinaban mangungubog-kubog, asin an trumpeta nin Diyos magtatanog pareho nin halawigon asin makusugon, asin magsasabi sa mga nagtuturog na mga nasyon: kamong mga banal magbuhat asin mabuhay; kamong mga makasalanon mag-untok asin magturog sagkod na Ako mag-apod giraray.
19 Kumbaya bugkosi an saindong mga panimpit na baka kamo managboan sa pag-iriba kan mga mararaot.
20 Ipaglangkaw an saindong mga boses asin mayong pagpalaenon. Mangapudan sa mga nasyon na magsorolsol, pareho sa mga gurang asin hoben, pareho sa mga nagagapos asin libre, na magsasabi: Prepararon an saindong mga sadire para sa dakulang kaaldawan nin Kagurangnan;
21 Nin huli ta kun Ako, bilang sarong tawo, naggibong palangkawon an sakuyang boses asin mag-apod sa saindo na magsorolsol, asin kamo nag-anggot sako, ano baya an saindong sasabihon sa panahon kan aldaw na mag-aabot kun noarin na an mga daguldol magtataram kan saindang mga boses gikan sa mga puro kan kinaban, magtataram sa mga talenga kan gabos na nabubuhay, na naghahapot--- Magsolsol, asin mag-andam para sa dakulang kaaldawan nin Kagurangnan.
22 Iyo, asin giraray, sa panahon na an mga kidlat magkikilat na gayo gikan sa sirangan pasiring sa sulnupan, asin magtataram na gayo kan saindang mga boses sa gabos na nabubuhay, asin gibohon an mga talenga kan gabos na magtagingting na nakakadangog, naghahapot kaining mga tataramon--- Magsolsol kamo, nin huli ta an dakulang kaaldawan nin Kagurangnan nag-abot na?
23 Asin giraray, an Kagurangnan magtataram kan saiyang boses paluwas gikan sa langit, na nagsasabi: Maghinanyog, O kamong mga nasyon nin kinaban, asin magdangog sa mga tataramon kan Diyos na iyo an naghimo saindo.
24 O, kamong mga nasyon nin kinaban, pirang beses daw Ako na magtitiripon-tipon saindo na magkasararo arog sa sarong guna na pinagtitiripon-tipon an saiyang mga siwo sa irarom kan saiyang pakpak, pero kamo habong gayo!
25 Pirang beses daw Ako nag-aapod sa saindo sa paagi kan nguso kan sakuyang mga surugoon, asin sa paagi kan pagmiministeryo kan mga anghel, asin sa paagi kan sakuyang sadireng boses, asin sa paagi kan boses nin mga daguldol, asin sa paagi kan boses nin mga bagyo, asin paagi kan boses nin mga linog, asin makusog na mga ipo-ipo, asin sa paagi kan boses nin mga taggutom asin mga kapestehan sa lambang klase, asin sa paagi kan makusog na tunog nin sarong trumpeta, asin sa paagi kan boses nin paghuhukom, asin sa paagi kan boses nin pagkaherak sa bilog na lawig nin aldaw, asin sa paagi kan boses nin kamurawayan asin honra asin kan mga kayamanan nin eternal na buhay, asin kuta na makapagligtas saindo na may daeng katapusan na kaligtasan, pero kamo habong gayo!
26 Hilnga, an aldaw nag-abot na, kun soarin na an kopa nin kaanggutan kan sakuyang indignasyon napano na.
27 Hilnga, katotohanan Ako nagsasabi sa saindo, na iyo ini an mga tataramon nin Kagurangnan saindong Diyos.
28 Kumbaga, magtrabaho kamo, magtrabaho kamo sa sakuyang ubasan para sa huring panahon--- nin huli ta an huring panahon nag-aapod sa mga nag-eerok kan kinaban,
29 Nin huli ta sa sakuyang sadireng panahon Ako mag-aabot sa kinaban para sa paghuhukom, asin an sakuyang mga katawohan matutubos asin mamamahala na kaiba ko sa kinaban.
30 Nin huli ta an dakulang Milenyo, na Ako an nakapagtaram sa paagi kan mga nguso nin sakuyang mga surugoon, mag-aabot na gayo.
31 Nin huli ta si Satanas paggagapuson, asin sa panahon na siya pagbubuhian giraray siya maghahade sana sa sarong kadikiton na kapanahunan, asin pagkatapos maabot an katapusan kan kinaban.
32 Asin siya na namumuhay sa pagkamatanos mababag-o sa sarong kisap nin mata, asin an kinaban maglilipas na gayo sa paagi nin kalayo.
33 Asin an mga mararaot mapapaduman pasiring sa daeng kagadanon na kalayo, asin an saindang katapusan mayong tawo na nakakaaram sa kinaban, ni sindang gayo makakaaram, sagkod na sinda maabot sa atubangan ko sa paghuhukom.
34 Maghinanyog kamo kaining mga tataramon. Hilnga Ako si JesuCristo, an Paraligtas kan kinaban. Pagyamanon ining mga bagay sa saindong mga puso, asin pagtugutan na an mga solemnidad kan eternidad maghihingalo sa saindong mga isip.
35 Magin mapagmatuninong. Magsunod sa gabos kong mga kasugoan. Arog kaini. Amen.