AN MGA DEKLARASYON KAN SIMBAHAN

OPISYAL NA DEKLARASYON-1

Sa Kiisay Ini Puwedeng Maipanungod:

An pamprensang mga dispatsa na ipinagpadara para sa pulitikal na mga katuyuhan, gikan sa Salt Lake City, na mahiwas na ipinagpublisa, pasiring sa epekto na an Utah Commission, sa saindang dae pa sana nahaloy na report para sa Sekretaryo kan Panlaog, naghayag na an kadakol na pag-aagom padagos pa man na pinaggigibo asin may kuwarenta o mas pa kaining mga pag-aaragoman pinagkokontrata sa Utah magpoon pa kan nakaaging Hunyo o sa peryodo kan nakaaging taon, pati man sa mga pampublikong diskurso kan mga lideres nin Simbahan ipinagtutukdo, pinag-aagyat asin pinaghuhurot an padagos na pagpraktis kan poligamya---

Kun kaya, Ako, bilang Presidente kan An Simbahan ni Jesukristo nin Mga Banal sa Huring-aldaw, ngonyan minagibo, sa pinakasolemning manera, madeklara na ining mga akusasyon palso. Kami dae na nagtutukdo nin poligamya o an kadakol na pag-aagom, ni minatao nin permiso sa kiisay na persona tanganing maglaog sa kaugalian na ini, asin ako minapahimutik na mayong kuwarenta o anuman na ibang bilang nin kadakol na pag-aagom na pinaggibo sa laog kan peryodo an pinaggigibo sa laog kan samuyang mga templo o sa iba man na lugar sa Teritoryo.

Sarong kaso an pinagreport, na kun saen an mga partido naghayag na an kasal pinaghimo sa laog kan Harong nin Pamanang Regalo, sa Salt Lake City, kan tagsibol nin 1889, pero ako daeng pagkakaaram kun siirisay an naggibo kan seremonya; anuman an naginibohan sa bagay na ini nangyari na mayo sa sakuyang kaaraman. Bilang kosekwensiya kaining ipinagpahayag sa Harong nin Pamanang Regalo, sa paagi kan sakuyang instruksiyon, pinagaba nin daeng paghaloy.

Habang nangyayari na an mga batas pinagpasar na kan Kongreso na nagbabawal sa kadakol na pag-aagom, na an mga batas na ini ipinagpahayag na konstitusyunal kan korte nin huring sandigan, Ako, ngonyan minadeklara kan sakuyang intensiyon na magpasa-irarom kaining mga batas, asin gamiton an sakuyang impluwensiya sa mga miyembro kan Simbahan na kun saen ako an namamayo na sinda magsunod man kaini.

Mayo sa sakuyang mga katukdoan sa Simbahan o sa sainda na sakuyang mga kairibahan, sa laog kan peryodong nasambit, na mapuwedeng matanos na maipagkahulugan na nag-aagyat o naghuhurot nin poligamya; asin kunsoarin na siisay na Elder kan Simbahan an naggamit kan lengguwahe na minaluwas na nagpapahayag nin anuman kaining katukdoan, siya tulos na pinagsaway. Asin ngonyan ako publikong minadeklara na an sakuyang hulit sa Mga Banal sa Huring-aldaw iyo na maglikay gikan sa pakikipagkontrata nin anuman na kasal na ipinagpangalad kan batas nin kadagaan.

WILFORD WOODRUFF
Presidente kan An Simbahan ni Jesukristo nin Mga Banal sa Huring-aldaw

Si Presidente Lorenzo Snow nagpahayag kan mga minasunod:

“Ako mina-agyat na, bilang pagbisto ki Wilford Woodruff na Presidente kan An Simbahan ni Jesukristo nin Mga Banal sa Huring-aldaw, iyo an solong tawo sana sa kinaban sa presenteng panahon na nagkakapot nin mga susi kan mga pagseselyong ordinansa, samuya siyang pinagkokonsiderang bilog na may awtoridad sa birtud kan saiyang posisyon na magtao nin Manipesto na pinagbasa sa satuyang pagdangog, na pinagpetsahan nin Septyembre 24, 1890, asin ta bilang sarong Simbahan na yaon sa Heneral an Kumperensiya na nag-asembliya, kami mina-akseptar kan saiyang deklarasyon mapanungod sa kadakol na mga pag-aagom bilang awtoritatibo asin may kakusganan.”

An boto sa pagsustine kan nasambit sa ibabaw na kaagyatan uyon na pinagkasararoan.

Salt Lake City, Utah, Oktubre 6, 1890.


MGA SALIK GIKAN SA TOLONG MGA PAGTATARAM NI PRESIDENTE WILDFORD WOODRUFF MAPANUNGOD SA MANIPESTO

An Kagurangnan dae nanggad magtutugot sako o sa kiisay na ibang tawo na magtitindog bilang Presidente kaining Simbahan na magpangenot saindo sa kawarakan. Ini mayo sa laog kan programa. Ini mayo sa kaisipan nin Diyos. Kun ako may isip na gibohon ini, an Kagurangnan an magpapahale sako paluwas sa sakuyang kinamugtakan, asin ta Saiya iyo ini san gigibohon sa arin man na ibang tawo na may kaisipan na magpangenot sa mga kaarakian nin mga tawo sa kawarakan gikan sa mga orakulo nin Diyos asin gikan sa saindang katungkulan. (Saisenta asin uno na Kabangaan-taon na Heneral na Kumperensiya kan Simbahan, Lunes, Oktubre 6, 1890, Salt Lake City, Utah. Pinagreport sa Deseret Evening News, Oktubore 11, 1890, p. 2)

Ini mayong halaga kun siisay baya an mabubuhay asin siisay an magagadan, o siisay an pinag-apudan na magpamayo kaining Simbahan, sainda dapat na pagpamayuhan ini sa paagi kan inspirasyon nin Makakamhan na Diyos. Kun dae ninda paggigibohon sa arog kaining paagi, dae ninda maggigibo nanggad an gabos na ini...

Ako nagkaigwa nin nagkapirang mga huring kapahayagan, asin mga grate ka-importante an mga ini para sakuya, asin ako magsasabi saindo kun ano an pinagsabi nin Kagurangnan sako. Tuguti na darahon ko an saindong mga kaisipan sa pinagterminong an manipesto...

An Kagurangnan nagsabi sako na hapoton an Mga Banal sa Huring-aldaw nin sarong kahaputan, asin Siya nagsabi man sako na kun sinda magdadangog sa kun ano an sakong pagsabihon sainda asin simbagon an kahaputan na ipaghaya sainda, sa paagi kan Espiritu asin kapangyarihan nin Diyos, sinda magsisimbag nin parareho, asin sinda magtutubod nin parareho sa pagpahalaga kaining mga bagay.

An kahaputan iyo ini: Arin baya an mas madunong na kurso para sa Mga Banal sa Huring-aldaw na paggigibohon--- an pagpadagos sa kaisipan na pag-uugalion an kadakol na pag-aagom, na may batas an nasyon laban kaini asin yaon sa pagkokontra kan saisenta milyones na mga katawohan, asin sa halaga nin kumpiskasyon asin pagkawara kan gabos na mga Templo, asin sa pagpapauntok kan gabos na mga ordinansa sa laog kaini, pareho para sa mga buhay asin mga gadan, asin an pagkakulong kan Enot na Panguluhan asin Dose asin mga pamayo kan mga pamilya nin Simbahan, asin an kumpiskasyon kan personal na propriyedad nin mga katawohan (na gabos baya sa saindang mga sadire dapat na mag-uuntok na sa kaugalian); o, pagkatapos na gibohon asin tugutan kun ano an igwa kita sa paagi kan satuyang pagpapadagos kaining prinsipyo na pagpauntok sa kaugalian asin magpasa-irarom sa batas, asin sa paagi kan paggigibo na pagpabayaan an mga Propeta, Apostoles asin mga ama sa harong, na tangani baya sinda makapagtukdo sa mga katawohan asin atendiran an saindang mga katungkulan sa Simbahan, asin man pabayaan an mga Templo na yaon sa mga kamot nin mga banal, na tangani baya saindang ma-atendiran an mga ordinansa kan Ebanghelyo, pareho para sa mga buhay asin mga gadan?

An Kagurangnan ipinagpahiling sako sa paagi nin bisyon asin kapahayagan an eksakto na kun ano baya an mangyayari kun kita dae nag-untok kaining kaugalian. Kun kita dae nag-untok kaini, kamo kuta na dae makakapaggamit... arinman na mga tawo sa laog kaining templo sa Logan; nin huli ta an gabos na mga ordinansa pagpapauntokon sa kabilogan kan kadagaan nin Sion. Kalilibongan iyo an maghahade sa bilog nin Israel, asin kadakulon na mga kalalakehan an paghihimoon na mga prisonero. An kapahamakan na ini kuta na maabot sa bilog na Simbahan, asin kita kuta na mapipiritan na dapat pagpapauntokon an kaugalian. Ngonyan, an kahaputan iyo ini, kumbaya ini pagpapauntukon sa arog kaining manera, o sa paagi na an Kagurangnan iyo an nagmanipesto sa satuya, asin pabayaan ta na an satuyang mga Propeta asin mga Apostoles asin mga ama na libreng mga tawo, asin an mga templo yaon sa mga kamot nin mga katawohan, na tangani baya na an mga gadan mapuwedeng magkaturubos. Sarong dakulaon nang bilang an yaon sa sa laog kan kulungang harong sa espiritung kinaban kaining mga katawohan, asin an mga gibong ini magpapadagos o mag-untok? Iyo ini an kahaputan na sakuyang ipinaglatag sa atubangan nin Mga Banal sa Huring-aldaw. Kamo an maghusga para sa sadire nindo. Ako gusto na pagsimbagon nindo ini para sa saindong mga sadire. Ako dae magsisimbag kaini; pero ako nagsasabi sa saindo kaini na iyo ini an eksaktong kondisyon satuya bilang sarong katawohan na paglalaogan kun dae baya kita nagpili sa kursong ini na yaon kita.

Ako nakahiling na eksakto na kun ano baya an maabot na mangyayari kun mayo talagang bagay na pinaggibo. Ako nagkaigwa na kaining espiritu sa sako sa laog nin halawig na panahon. Pero ako gustong magsagi kaini: Ako kuta na nagtugot na an gabos na mga templo magkawarara sa satuyang mga kamot; ako kuta na nagpasiring na sa laog kan prisohan mismo, asin nagtugot na an lambang ibang tawo maglaog man duman, ta kun bako sana an Diyos nin kalangitan an nagsugo sako na gibohon an bagay na dapat kong gibohon; asin kunsoaring na an oras nag-abot na Ako pinagsurong gibohon idto, ini nagin bilog na malinawon sako. Ako nagdulok sa atubangan nin Kagurangnan, asin ako nagsurat kun ano an pinagsabi sako nin Kagurangnan na ipagsurat...

Ako magwalat kaini sa saindo, para kamo mag-isip asin magkonsidera. An Kagurangnan kaiba niyato sa trabaho. (Cache Stake Conference, Logan, Utah, Sunday, Nobyembre 1, 1891. Pinagreport sa Deseret Weekly, Nobyembre 14, 1891.)

Ngonyan ako magsasabi sa saindo na kun ano an ipinagmanipesto sako asin kun ano an pinaghimo kan Ake nin Diyos sa bagay na ini... An gabos na ining mga bagay kuta na pinagtugutan na mangyaring mag-abot, habang an Diyos na Makakamhan nabubuhay, ta kun bako sana sa manipestong idto na ipinagtao. Kun kaya, an Ake nin Diyos nakamate na ipagpaabot an bagay na ini sa Simbahan asin sa mundo para sa mga katuyuhan kan saiyang sadireng kaisipan. An Kagurangnan nagdekreto sa pag-establisa kan Sion. Siya nagdekreto na tapuson ining templo. Siya nagdekreto na an kaligtasan kan mga buhay asin mga gadan dapat ipagtao sa mga bukid-bukid kan mga kabukidan. Asin an Makakamhan na Diyos nagdekreto na an Diyablo dae dapat na makapag-olang kaini. Kun saindong masabutan ini, iyo iyan an susi kaini. (Gikan sa diskurso sa ika-anom na sesyon sa pagdudulot kan Salt Lake Temple, Abril 1893. Surat-lapida kan Pagdudulot na Serbisyo, Mga Arkiba, Simbahang Historikong Departamento, Salt Lake City, Utah.)

OPISYAL NA DEKLARASYON-2

Sa Kiisay Ini Puwedeng Maipanungod:

Kan Septyembre 30, 1978, sa ika-148 Kabangaang-taon an Heneral na Kumperensiya kan An Simbahan ni Jesukristo nin Mga Banal sa Huring-Aldaw, an mga minasunod pinagpresentar ni Presidente N. Eldon Tanner, Enot na Tagapayo sa Enot na Panguluhan kan Simbahan:

Kan amay sa Hunyo kaining taon, an Enot na Panguluhan nagpahayag na may sarong kapahayagan an naresibe ni Presidente Spencer W. Kimball na magtatao nin pagkasaserdote asin mga biyaya kan templo sa gabos na mga maninigong lalake na miyembro kan Simbahan. Si Presidente Kimball naghagad na ako an magpaabot sa kumperensiya na pagkatapos na saiyang maresibe ining kapahayagan, na nag-abot saiya pagkatapos nin halawigon na meditasyon asin pangadyeon sa laog kan sagradong mga kuwarto kan banal na templo, saiyang pinagpresentar ini sa saiyang mga tagapayo, na nag-akseptar kaini asin nag-aprubar kaini. Ini sunod na pinagpresentar sa Korum kan Doseng Apostoles, na nagkasararong pag-aprubaran ini, asin kasunod na pinagpresentar sa gabos na ibang Heneral na mga Awtoridad, na iyo man an nag-aprubar kaini na nagkasararo.

Si Presidente Kimball naghagad na ako ngonyan an magbasa kaining surat:

Hunyo 8, 1978
Sa Gabos na Heneral asin local na pagkasaserdoteng mga opisyales kan An Simbahan ni Jesukristo nin Mga Banal sa Huring-aldaw sa bilog na mundo:

Namomotan kong mga Katugangan:

Habang satuyang nasasaksihan an paglawig kan trabaho nin Kagurangnan sa bilog na kinaban, kita nagpapasalamat na an mga katawohan nin kadakol na mga nasyon nagsimbag sa mensahe kan pinagbalik-liwat na ebanghelyo, asin nag-ayon sa Simbahan na padagos na nagdadagdag an mga bilang. Ini, bilang balik, an nakapagtaong inspirasyon satuya na may sarong pagmamawot na ipagtao sa lambang maninigong miyembro kan Simbahan an gabos na mga pribilihiyo asin mga biyaya na an ebanghelyo an naghahaya.

Bilang muklat sa mga promisang pinaghimo kan mga propeta asin presidente kan Simbahan na nagka-erenot satuya sa panahong nakalipas na, yaon sa eternal na plano nin Diyos, an gabos niyatong mga katugangan na maninigo puwedeng magresibe kan pagkasaserdote, asin magsasaksi sa bilog na katapatan ninda na kun saen an pagkasaserdote ipinagpangalad pa, kami nagpangako nin halawig asin maigot na naghangad kaini, an satuyang matapat na mga katugangan, naggagastos nin kadakol na mga oras sa laog kan Upper Room kan Templo na naghahagad sa Kagurangnan para sa banal na paggiya.

Siya nakadangog kan satuyang mga pangadyeon, asin sa paagi nin kapahayagan nagkumpirma na an haloy nang pinagpromisang aldaw nag-abot na kunsoarin na an lambang matapat, maninigong lalake sa laog kan Simbahan puwedeng magresibe kan banal na pagkasaserdote, na igwang kapangyarihan na ipag-ehersisyo ining banal na awtoridad, asin pagtamasaon kan saiyang mga namomotang pamilya an lambang biyaya na nagbubulos gikan kaini, kaiba na an mga biyaya kan templo. Uyon pa kaini, an gabos na maninigong lalake na mga miyembro kan Simbahan mapuwedeng pag-ordinahan nin pagkasaserdote na dae pinaghihiling an rasa o kolor. Mga lideres nin pagkasaserdote pinag-instruksiyunan na sunudon an palisiya na maingat na pagkaolayon an gabos na mga kandidato para sa ordinasyon sa arinman sa Aaroniko o sa Melchizedekong Pagkasaserdote tanganing maipaseguro na sinda manigo sa estabilisadong mga estandarte para sa pagkamanigo.

Kami minadeklara na may kalinawan nin isip na an Kagurangnan ngonyan naghimong maipagpaaram an saiyang kagustuhan para sa biyaya kan gabos niyang mga kaarakian sa bilong na kinaban na maghihinanyog kan boses nin saiyang awtorisadong mga surugoon, asin prepararon an saindang mga sadire na magresibe nin lambang biyaya kan ebanghelyo.

Makatotohanan na para saindo,

SPENCER W. KIMBALL
N. ELDON TANNER
MARION G. ROMNEY
An Enot na Panguluhan


Pinagbibisto si Spencer W. Kimball bilang an propeta, tagakita, asin tagapagpahayag, asin presidente kan An Simbahan ni Jesukristo nin Mga Banal sa Huring-aldaw, ini pinagtutulod na kita bilang sarong konstituwenteng asembliya mina-akseptar kaining kapahayagan bilang tataramon asin kagustuhan nin Kagurangnan. Gabos na pabor tabi mag-uyon sa paagi kan pag-itaas kan saiyang toong kamot. An siisay na makontra sa paagi nin kaparehong senyal.

An boto sa pagsustine kan nasambit na kaagyatan yaon sa nagkasararong pag-uyon.’

Salt Lake City, Utah, Septyembre 30, 1978.

SEKSYON 138

Sarong bisyon, ipinagtao ki Presidente Joseph F. Smith sa Salt Lake City, Utah, kan Oktubre 3, 1918. Sa saiyang pambungad na pagtaram sa ika-89 Kabangaang Taon kan Heneral na Kumperensiya nin Simbahan, kan Oktubre 4, 1918, si Presidente Smith nagdeklara na siya nagresibe nin nagkapirang banal na komunikasyon kan mga nakaaging bulan. An saro sainda, mapanungod sa pagbisita nin Tagapagligtas sa mga espiritu kan mga gadan habang an saiyang hawak yaon sa laog nin lubungan, na saiyang naresibe kan nakaaging aldaw. Ini pinagsurat tulos kasunod nin pagserado kan kumperensiya; kan Oktubre 31, 1918, ini pinagsumite sa mga tagapayo kan Enot na Panguluhan, sa Konseho kan Kose, asin sa Patriarka, asin ini pinagkasararoan na akseptaron sa paagi ninda.

*******

1-10, Si Presidente Joseph F. Smith naghohorop-horop sa mga surat ni Pedo asin kan satuyang Kagurangnan sa pagbisita sa kinaban kan mga espiritu; 11-24, Saiyang nahiling an matatanos na gadan na nag-asembliya sa paraiso asin an pagministeryo ni Kristo sa pag-iriba ninda; 25-37, Paano na an pagbabalangibog kan ebanghelyo pinag-organisa sa pag-iriba kan mga espiritu; 38-52, Si Presidente Smith nahiling si Adan, Eba, asin kadakol na mga banal na propeta sa kinaban kan mga espiritu na pinagkonsidera an saindang estado sa pagka-espiritu bago pa man an saindang pagkabuhay-liwat bilang saro na kagapusan; 53-60, An mga matatanos na gadan sa aldaw na ini pinagpadagos an saindang mga trabaho sa kinaban kan mga espiritu.

*******

Kan petsa 3 nin Oktubre, sa taon na desinuwebeng gatos asin desi-otso, ako nakatukaw sa sakuyang kuwarto na naghohorop-horop sa mga kasuratan;
2 Asin inatid-atid an dakulaon na pagbabayad-salang sakripisyo na pinaghimo kan Ake nin Diyos, para sa katubusan kan mundo;
3 Asin an dakula asin makangalason na pagkamoot na hinimong maipagpahiling kan Ama asin kan Ake na iyo an pag-abot kan Paratubos sa mundo;
4 Na sa paagi kan saiyang pagbabayad-sala, asin sa paagi kan pagsunod sa mga prinsipyo kan ebanghelyo, an sankatawohan puwedeng maliligtas.
5 Habang ako yaon sa arog kaining kamugtakan, an sakuyang isip nagbuwelta sa mga isinurat ni apostol Pedro, para sa mga primitibong mga banal na nagkawaratak-watak sa luwas sa bilog na Pontus, Galatia, Cappadocia, asin ibang parte kan Asia, na kun saen an ebanghelyo ipinagbalangibog pagkatapos na ipinagpako sa krus an Kagurangnan.
6 Ako nagbukas nin Bibliya asin nagbasa sa ikatolo asin ikaapat na mga tsapter kan enot na surat ni Pedro, asin habang ako nagbabasa ako grabeng gayo napahanga na mas sobra kesa kaidto pa, sa mga minasunod na mga babasahon:
7 “Nin huli ta si Kristo man minsan nagsakit para sa mga kasalan, an husto para sa bakong husto, na tangani na siya puwedeng magdara satuya pasiring sa Diyos, ipinaghaya na magadan sa laman, pero pinagbuhay sa paagi kan Espiritu;
8 “Na sa paaging ini man siya nagpasiring asin nagbalangibog sa mga espiritu na yaon sa prisohan;
9 Na kan panahon sinda dae nagsusunod, na kunsoarin minsan na an halawig na pagtios nin Diyos naghalat sa mga aldaw ni Noah, habang an arko kaidto pinag-aandam pa sana, na kun saen kadikiton, na iyo baya, an walong kalag an nailigtas sa tubig.” (1 Pedro 3:18-20.)
10 Nin huli ta para sa kaining kausa baya an ebanghelyo pinagbalangibog man sainda na garadan na, tanganing sinda puwedeng paghuhukuman na uyon sa mga tawo sa laman, pero mabubuhay na uyon sa Diyos sa espiritu. (1 Pedro 4:6)
11 Habang ako naghohoropo-horop kaining mga bagay na isinurat, an mga mata kan sakuyang pagkasabot pinagbuksan, asin an Espiritu nin Kagurangnan nagtugdon sa sakuya, asin ako nakahiling kan mga hukbo nin mga gadan, parehong saradit asin darakula.
12 Asin nagkaigwa nin pagtiripon na magkasararo sa sarong lugar nin sarong dae nabibilang na kumpanya kan mga espiritu nin mga matatanos, na nagin matapat sa saindang mga testimonya ki Jesus habang sinda kaidto nabubuhay pa sa mortalidad;
13 Asin sinda nagdulot nin sakripisyo na kabaing sa dakulag sakripisyo kan Ake nin Diyos, asin nagsapo nin tribulasyon para sa pangaran kan saindang Paratubos.
14 Gabos ini naghale na sa mortal na buhay, matatag sa paglaom kan sarong mamurawayon na pagkabuhay-liwat sa paagi kan grasya nin Diyos an Ama asin kan saiyang Bugtong na Piniling Ake, na si Jesukristo.
15 Ako nakahiling na sinda napano nin kaogmahan asin kagalakan, asin nagrurukyaw na nagkasararo nin huli ta an aldaw kan saindang kaligtasan yaon na.
16 Sinda nag-asembliya na naghahalat sa adbento kan Ake nin Diyos pasiring sa kinaban nin espiritu, tanganing ideklara an saindang katubusan gikan sa mga gapos nin kagadanan.
17 An saindang natuturog na alpog ipagbabalik-liwat na magi ining perpekto sa hitsura, tul-ang sa saiyang tul-ang, asin an mga litid asin an laman na para sainda, an espiritu asin an kahawakan magigin sararo na dae na nanggad mababanga, na tangani na sinda puwedeng makaresibe sa kabilogan nin kaogmahan.
18 Habang ining mahiwas na sankatawohan naghahalat asin nag-oorolay-olay, nagrurukyaw sa oras kan saindang kaligtasan gikan sa mga kadena nin kagadanan, an Ake nin Diyos nagpahiling, nagdedeklara nin libertad sa mga nagkadarakop na nagin matapat kaidto.
19 Asin duman siya nagbalangibog sa sainda kan daeng katapusan na ebanghelyo, kan doktrina nin pagkabuhay-liwat asin an katubusan kan sankatawohan gikan sa pagkahulog, asin gikan sa indibidwal na mga kasalan pero sa mga kondisyones na nagsosolsol.
20 Pero sa mga maririgsok siya dae nagpaduman, asin sa pag-iriba kan mga bakong makadiyos asin dae nagsosolsol na pinag-atian an saindang mga sadire habang yaon sa laman, an saiyang boses dae ipinagpalangkaw.
21 Ni sainda na nagrerebelde na nagsikwal kan saindang mga testimonya asin mga patanid kan suanoy na mga propeta na nakahiling kan saiyang presensiya, nin baya makahiling sa saiyang lalawgon.
22 Na kun saen an mga ini, kadikloman an naghahade, pero sa pag-iriba kan matatanos igwa nin katuninongan;
23 Asin an mga banal nagrurukyaw kan saindang katubusan, asin nagluluhod sa tuhod asin binisto an Ake nin Diyos bilang iyo an saindang Paratubos asin Paraligtas gikan sa kagadanan asin sa mga kadena nin impiyerno.
24 An saindang panhitsurahon nagsisirang, asin an katingkadan na gikan sa presensiya nin Kagurangnan nagtugdon sa sainda, asin sinda nagkaranta nin mga pag-oomaw sa saiyang banal na pangaran.
25 Ako nagngalas, nin huli ta ako nakakasabot na an Paraligtas naggastos nin haros tolong taon kan saiyang ministeryo sa pag-iriba nin mga Hudiyo asin sainda na yaon sa harong nin Israel, naghihingohang maitukdo sainda an daeng katapusan na ebanghelyo asin pinangapudan sinda pasiring sa pagsosolsol;
26 Asin baya, maski na ngani kan saiyang makakamhan na mga gibo, asin mga milagro, asin proklamasyon nin katotoohan, na may dakulang kapangyarihan asin awtoridad, nagkaigwa sana nin kadikiton na naghihinanyog kan saiyang boses, asin nagrurukyaw kan saiyang presensiya, asin nagresibe nin kaligtasan sa saiyang mga kamot.
27 Pero an saiyang ministeryo sa pag-iriba ninda na nagkagaradan na limitado sa halipoton na panahon na nakasingit sa tahaw kan pagkapako sa krus asin kan saiyang pagkabuhay-liwat;
28 Asin ako nagngalas sa mga tataramon ni Pedro--- na kun saen siya nagsabi na an Ake nin Diyos nagbalangibog sa mga espiritu sa prisohan, na kan panahon dae nagsusunod, kunsoarin na minsan an halawig na pagtios nin Diyos sa paghahalat sa mga aldaw ni Noah--- asin paano ini magigin possible para saiya na magbabalangibog sa sainda na mga espiritu asin gibohon an kinakaipong gibohon sa pag-iriba ninda sa grabe kahalipot na panahon.
29 Asin habang ako nagngalas, an sakuyang mga mata pinagbuksan, asin an sakuyang pagkasabot naglinaw, asin ako nag-isip na an Kagurangnan dae nagpaduman kan saiyang persona sa pag-iriba kan mga maririgsok asin dae nagsusurunod na nagsisikwal sa katotoohan, tanganing tukdoan sinda;
30 Pero hilnga, gikan sa pag-iriba kan mga matatanos, siya nag-organisa kan saiyang mga puwersa asin nagngaran nin mga mensahero, na nababadoan nin kapangyarihan asin awtoridad, asin pinagkomisyon sinda na magpadagos asin darahon an liwang kan ebanghelyo pasiring sainda na yaraon sa kadikloman, magin hanggan sa gabos na mga espiritu nin mga tawo; asin kaya an ebanghelyo pinagbalangibog sa mga gadan.
31 Asin an mga piniling mga mensahero nagpadagos sa pagdeklara kan akseptableng aldaw nin Kagurangnan asin iproklama an libertad kan mga nagkadarakop na ginagapos, magin sagkod sa gabos na magsosolsol kan saindang mga kasalan asin resibihon an ebanghelyo.
32 Kaya an ebanghelyo pinagbalangibog sa sainda na nagkagaradan na yaon sa saindang mga kasalan, na mayong kaaraman sa katotoohan, o yaon sa pagbalga, na pinagsisikwal an mga propeta.
33 An mga ini pinagtukdoan nin pagtubod sa Diyos, pagsosolsol gikan sa mga kasalan, bikaryosong pagbubunyag para sa kapatawaran nin mga kasalan, an regalo kan Espiritu Santo sa paagi nin pagpapatong nin mga kamot,
34 Asin kan gabos na ibang mga prinsipyo kan ebanghelyo na kinakaipuhanan para sainda na makaaram na tanganing maikwalipikar an saindang mga sadire na tangani baya na sinda mapuwedeng paghuhukuman na uyon sa mga tawo na yaon sa laman, pero buhay na uyon sa Diyos sa espiritu.
35 Asin kaya ini pinaghimong maipagpaaram sa pag-iriba nin mga gadan na, parehong saradit asin darakula, sa mga bakong matatanos siring man sa mga matapat, na an katubusan yaon sa paagi nin sakripisyo kan Ake nin Diyos sa ibabaw nin krus.
36 Kaya ini pinaghimong maipagpaaram na an satuyang Paratubos naggastos kan saiyang panahon na maglakaw sa kinaban kan mga espiritu, nagtutukdo asin nag-aandam kan mga matapat na mga espiritu nin mga propeta na nagpatotoo saiya sa laman;
37 Na tangani saindang madadara an mensahe nin katubusan sa gabos na nagkagaradan na, sa sainda na siya dae personal na makapagduman, nin huli kan saindang rebelyon asin kalapasan, na tangani na sinda sa paagi kan pamamahala kan saiyang mga surugoon mapupuwede man na makadangog kan saiyang mga tataramon.
38 Sa pag-iriba ninda na darakula asin makakamhan na nag-asembliya kaining halawig na kongregasyon nin mga matatanos iyo si Amang Adan, an Suanoy nin mga Aldaw asin ama nin gabos.
39 Asin an satuyang mamurawayon na Inang Eba, kairiba an kadakulon nindang matapat na mga akeng babaye na namuhay sa paagi nin mga kapanahunan asin nagsamba sa tunay asin buhay na Diyos.
40 Si Abel, an enot na martir, yaon duman, asin an saiyang tugang na lalakeng si Seth, saro sa mga makakamhan, na iyong gayo an kabaing kan imahe nin saiyang ama na si Adan.
41 Si Noah, na nagtao kan patanid sa baha; si Shem, an bantay na halangkaw na pade; si Abraham, an ama kan mga matatapat; si Isaac, Jacob, asin Moises, an bantog na tagapagtao nin batas sa Israel;
42 Asin Isaiah, na nagdeklara sa paagi nin propesiya na an Paratubos pinaglahidan tanganing bugkoson an mga nakulugan nin puso, tanganing iproklama an libertad para sa mga nagkadarakop, asin an pagbubukas kan prisohan sa sainda na nagkakurulong, yaon man duman.
43 Sa kadagdagan pa, si Ezekiel, na pinagpahilingan kan bisyon nin dakulaon sa bukid-bukid kan mga marang tul-ang, na pagbabadoan nin laman, tanganing magburuhat giraray sa pagkabuhay-liwat nin mga gadan, mabubuhay na mga kalag;
44 Si Daniel, na nakahiling asin naghayag nin pagka-establisar kan kahadean nin Diyos sa mga Huring-aldaw, na dae na nanggad pagdedestrosohon ni ipagtao sa ibang mga katawohan;
45 Si Elias, na kaiba ni Moises sa Bukid nin Transpigurasyon;
46 Asin si Malakias, an propeta na nagpatotoo sa pag-abot ni Elijah---na saiya man si Moroni nagtaram ki Propetang Joseph Smith, nagdedeklara na siya maabot bago pa man magpopoon an dakula asin makangirhat na aldaw nin Kagurangnan---yaon man duman.
47 Si Propetang Elijah iyo an matanos sa mga puso nin mga kaarakian kan mga promisa na pinaghimo sa saindang mga ama.
48 Nagpapahayag kan dakulang trabaho na paggigibohon sa laog kan mga templo nin Kagurangnan sa dispensasyon kan kabilogan nin mga panahon, para sa katubusan nin mga gadan, asin an pagseselyo kan mga kaarakian sa saindang mga magurang, na baka baya na an bilog na kinaban paghahampakon nin sarong sumpa asin dagos na masayang sa saiyang pag-abot.
49 Gabos ini asin kadakol pang iba, maski an mga propeta n nag-eerok sa pag-iriba kan mga Nephi asin nagpatotoo sa pag-abot kan Ake nin Diyos, nakapag-ibahan sa halawig na asembliya asin naghahalat para sa saindang kaligtasan,
50 Nin huli ta an mga gadan naghahalat sa halawigon nin kawaraan kan saindang mga espiritu gikan sa saindang mga kahawakan bilang sarong kagapusan.
51 An mga ini an pinagtukdo nin Kagurangnan, asin nagtao sainda nin kapangyarihan na magluwas, pagkatapos kan saiyang pagkabuhay-liwat gikan sa mga gadan, tanganing maglaog sa kahadean nin saiyang Ama, duman pagkokoronahan nin immortalidad asin eternal na buhay.
52 Asin ipagpadagos poon duman an saindang trabaho siring sa ipinagpromisa nin Kagurangnan, asin magin mga kaparte kan bilog na mga biyaya na itinago bilang resrba para sainda na nagmomoot saiya.
53 An Propetang Joseph Smith, asin an saiyang ama, Hyrum Smith, Brigham Young, John Taylor, Wilford Woodruff, asin ibang pinili na mga espiritu na pinagpreserba tanganing magluwas sa kabilogan nin mga panahon tanganing makipagparte sa paglalatag kan mga pundasyon kan dakulaon na trabaho sa huring-aldaw.
54 Kaibahan an pagtutugdok kan mga templo asin an paggibo kan mga ordinansa kaini para sa katubusan kan mga gadan, yaon man sa kinaban nin espiritu.
55 Ako nag-obserba na sinda yaon man sa pag-iriba nin mga noble asin bantog na mga saro na pinili sa kapinunan pa na magigin mga tagapagpamahala kan Simbahan nin Diyos.
56 Maski na ngani bago pa sinda iminundag, sinda, kaiba an kadakol pang iba, nagresibe kan saindang mga enot na leksyon sa kinaban kan mga espiritu asin pinag-andam na magluwas sa tinakdang panahon nin Kagurangnan tanganing magtrabaho sa saiyang ubasan para sa kaligtasan kan mga kalag nin mga tawo.
57 Ako nakahiling na an mga matapat na elders kaining dispensasyon, kunsoaring na sinda nagtalikod na gikan sa mortal na buhay, magpapadagos kan saindang mga pagtatrabaho nin pagbabalangibog kan ebanghelyo nin pagsosolsol asin katubusan, sa paagi kan sakripisyo nin Bugtong na Pinilng Ake nin Diyos, sa pag-iriba ninda na yaon sa kadikloman asin yaon sa irarom nin kauripnan nin kasalan sa dakulang kinaban kan mga espiritu nin mga gadan.
58 An mga gadan na nagsosolsol pagtutubuson, sa paagi nin pagsusunod sa mga ordinansa sa harong nin Israel.
59 Asin pagkatapos na sinda makapagbayad sa penalidad kan saindang mga kalapasan, asin pinaghuhugasan na malinigon, magreresibe nin sarong regalo na uyon kan saindang mga gibo, nin huli ta sinda mga tagapagmana nin kaligtasan.
60 Kaya iyo ini an bisyon kan katubusan nin mga gadan na ipinagpahayag sako, asin ako nagpatotoo, asin ako nakaaram na ining rekord totoo, sa paagi kan biyaya nin satuyang Kagurangnan asin Tagapagligtas, na si Jesukristo, arog kaini. Amen.

SEKSYON 137

Sarong Bisyon na ipinagtao ki Joseph Smith an Propeta, sa laog kan templo sa Kirtland, Ohio, Enero 21, 1836. HS 2:380-381. An okasyon iyo an administrasyon kan mga ordinansa kan regalong pamana habang an mga ini dagos na ipinagpahayag.

*******
1-6, An Propeta nahiling an saiyang tugang na si Alvin na yaon sa selestiyal na kahadean; 7-9, An doktrina nin kaligtasan para sa mga gadan ipinagpahayag; 10, Gabos na mga kaarakian ligtas sa selestiyal na kahadean.

*******

An mga kalangitan pinagbukasan sa samuya, asin ako nakahiling sa selestiyal na kahadean nin Diyos, asin an kamurawayan kaini; baya yaon sa laog nin hawak o luwas dae ako makapagtaram.
2 Ako nakahiling nin mapusngawon na gayon kan pintuan na sa paagi kaini an mga tagapagmana kan kahadean na ini maglalaog, na siring baga sa nag-iikot-ikot na mga laad nin kalayo;
3 Dangan an naglalaad na trono nin Diyos, na kun saen nakatukaw an Ama asin an Ake.
4 Ako nakahiling sa magagayon na tinampo sa kahadean na iyan, na igwa nin hitsura kan pinaglatagan nin bulawan.
5 Ako nakahiling ki Amang Adan asin Abraham; asin an sakuyang ama asin an sakuyang ina; asin an sakuyang tugang na si Alvin, na haloy na kaidtong nagturog;
6 Asin nagngalas kun paano baya na siya nagkamit nin kamanahan sa kahadean na ini, nahiling ko baya na siya nagtalikod sa buhay na ini bago pa man an Kagurangnan ipinagbugtak an saiyang kamot tanganing tiriponon an Israel sa ikaduwang pagkakataton, asin dae man baya nabunyagan para sa kapatawaran nin mga kasalan.
7 Kaya nag-abot an boses nin Kagurangnan sa sako, na nagsasabi: An gabos na nagkagaradan na mayong kaaraman kaining ebanghelyo, na makakapagresibe kuta na kaini kun sinda pinagtugutan na mamuhay, magigin mga tagapagmana kan selestiyal na kahadean nin Diyos;
8 Dangan an gabos na magkakagaradan magpoon ngonyan na mayong kaaraman kaini, na makapagresibe kuta na kaini sa bilog nindang mga puso, magigin mga tagapagmana kaining kahadean;
9 Nin huli ta Ako, an Kagurangnan, maghuhukom sa gabos na mga tawo uyon sa saindang mga gibo, uyon sa kamawotan kan saindang mga puso.
10 Asin ako man nakahiling na an gabos na mga kaarakian na nagkagaradan bago pa mag-abot sa mga taon nin kamangnohan ligtas sa laog kan selestiyal na kahadean nin langit.

SEKSYON 136

An tataramon asin kagustuhan nin Kagurangnan ipinagtao sa paagi ki Presidente Brigham Young sa Winter Quarters sa Kampo nin Israel, Omaha Nation, West Bank kan Missouri River, harani sa Council Bluffs, Iowa. Journal History kan Simbahan, Enero 14, 1847.

*******

1-16, Paano an Kampo nin Israel pag-oorganisaron para sa pasulnupang pagbibiyahe; 17-27, An mga banal pinagsugo tanganing ipamuhay an bilang na mga ebanghelyong estandarte; 28-33, An mga banal dapat na magkaranta, magsarayaw, magpangadye, asin makanood nin kadunungan; 34-42, An mga Propeta ginagaradan na sinda mapupuwedeng paggalangan asin man maririgsok pagkokondenaron.

*******

AN Tataramon asin Kagustuhan nin Kagurangnan mapanungod sa Kampo nin Israel sa saindang mga pagbibiyahe pasiring sa Sulnupan;
2 Tuguti na an gabos na mga katawohan kan An Simbahan ni Jesukristo nin mga Banal sa Huring-aldaw, asin sinda na magbibiyahe kaiba ninda, pag-oorganisaron na magin mga kumpanya, na igwang sarong tipan asin promisa na pagsusunudon an gabos na mga kasugoan asin panuntunan nin Kagurangnan satuyang Diyos.
3 Tuguti an mga kumpanya pag-oorganisaron na may mga kapitan kan ginatos, mga kapitan nin maningkuwenta, asin mga kapitan nin mga manampulo, na igwa nin sarong presidente asin duwa na saiyang mga tagapayo sa saindang pamayuhan, na yaon sa irarom kan direksiyon kan Doseng Apostoles.
4 Asin iyo ini an satuyang magigin tipan --- na kita maglalakaw sa gabos na mga ordinansa nin Kagurangnan.
5 Tuguti na an lambang kumpanya magkakaigwa sa saindang mga sadire nin gabos na pag-iribang grupo, mga kareta, mga balon, kabadoan, asin iba pang kaipuhanan para sa pagbiyahe, na saindang madadara.
6 Kunsoarin na an mga kumpanya nagin organisado na tuguti sinda na Magharale sa saindang mga sadireng kakayahan, tanganing mapreparar sinda na magkakawaralat.
7 Tuguti na an lambang kumpanya, na kaiba an saindang mga kapitan asin mga presidente, magdesisyon kun gurano kadakol an makahale sa masunod na tagsibol; dangan magpili nin sarong awad-awad na bilang nin makakusog asin ekspertong mga tawo, na magkakapot nin pag-iribang grupo, mga banhi, asin mga pan-omang kagamitan, tanganing magbiyahe bilang mga tagapangenot tanganing mag-andam para sa pagtanom nin tagsibol na mga pananom.
8 Tuguti na an lambang kumpanya magdara nin pantay na kabilangan, uyon sa kahirasan kan saindang rugaring, sa pagdadara kan pobre, mga balo, an mga mayong ama, asin an mga pamilya ninda na nagbarale sa armada, na an mga paghibion kan mga balo asin mga mayong ama dae makaabot sa mga talenga nin Kagurangnan laban sa saiyang mga katawohan.
9 Tuguti an lambang kumpanya mag-andam nin mga harong, asin kaogmahan para sa pagtanom nin mga pisog, para sainda na magkakawaralat sa panahon na ini; asin iyo ini an kagustuhan nin Kagurangnan mapanungod kan saiyang mga katawohan.
10 Tuguti na an lambang tawo gamiton an gabos niyang impluwensiya asin propriyedad tanganing haleon ining mga katawohan pasiring sa lugar na kun saen an Kagurangnan maglalaog nin sarong istake nin Sion.
11 Asin kun saindong gigibohon ini na may sarong tunay na puso, na yaon sa bilog na kapanoan nin pagtubod, kamo pagbebendisyunan; kamo pagbebendisyunan kaiba an saindong mga pangon, asin sa saindong mga kabakahan, asin sa saindong mga omahan, asin sa saindong mga pagharongon, asin sa saindong mga pamilya.
12 Tuguti na an sakuyang mga surugoon na sinda Ezra T. Benzon asin Erastus Snow mag-organisa nin sarong kumpanyan.
13 Asin tuguti an sakuyang mga surugoon na sinda Orson Pratt asin Wilford Woodruff mag-organisa nin sarong kumpanya.
14 Siring man, tuguti na an sakuyang mga surugoon na sinda Amasa Lyman asin George a. Smith mag-organisa nin sarong kumpanya.
15 Asin magngaran nin mga presidente, asin mga kapaitan kan mga ginatos, asin kan mga maningkuwenta, asin kan manampulo/
16 Asin tuguti na an sakuyang mga surugoon na pinagngaranan na maghale asin magtukdo kaini, an sakuyang kagustuhan, para sa mga banal, na tangani sinda mapuwedeng handa sa pagpasiring sa sarong kadagaan nin katuninongan.
17 Magpaduman kamo sa saindong dalan asin gibohon siring na Ako an nagsabi saindo, asin dae kamo Matakot sa saindong mga kaiwal; nin huli ta sinda dae magkakaigwa nin kapangyarihan na pa-untukon an sakuyang trabaho.
18 An Sion pagtutubuson sa sakuyang sadireng panahon na pinagtakda.
19 Asin kun arin man na tawo na naghahanap tanganing ipagpalangkaw an saiyang sadire, asin dae naghahanap kan sakuyang paghulit, siya dae magkakaigwa nin kapangyarihan, asin an saiyang mga kalokohan paghihimoon na maipagpahiling.
20 Maghanap kamo; asin sunodon an gabos nindong mga ipinangako sa lambang saro; asin dae mo pag-agawon an bagay na pagsadire kan saindong tugang an lalake.
21 Ilikay an saindong sadire gikan sa maraot na tanganing madara an pangaran nin Kagurangnan sa daeng kamugtakan, nin huli ta Ako an Kagurangnan saindong Diyos, na iyo ngani an Diyos kan saindong mga ama, an Diyos ni Abraham asin ni Isaac asin ni Jacob.
22 Ako iyo Siya na nagpangenot sa mga kaarakian nin Israel paluwas sa kadagaan nin Ehipto; asin an sakuyang takyag nakahunat para sa mga huring aldaw, tanganing iligtas an sakuyang mga katawohan nin Israel.
23 Mag-untok kamo sa pakipag-iwal sa lambang saro; mag-untok kamo sa pagtaram nin maraot sa lambang saro.
24 Mag-untok kamo sa pagparaburat; asin tuguti na an saindong mga tataramon makakapagpakusog sa lambang saro.
25 Kun kamo nakapagsubli sa saindong mga kataid, saindong ipagbalik an bagay na saindong pinagsubli; asin kun kamo dae makapagbayad magduman kamo diretso asin sabihin an saindong kataid, na baka baya siya magkokondenar saindo.
26 Kun kamo makanagbo kan bagay na nawara kan saindong kataid, kamo dapat na maigot sa paghahanap sagkod na saindong maibalik ini saiya giraray.
27 Kamo dapat na magigin maigot sa pag-ingat kan bagay na igwa kamo, na tangani baya kamo puwede magin sarong madunong na tagapagpangalaga; nin huli ta ini an libreng regalo nin Kagurangnan saindong Diyos, asin kamo an saiyang tagapagpangalaga.
28 Asin kun kamo maogmahon, omawa an Kagurangnan nin pag-aawit, may kanta, may pagsarayaw, asin may sarong pangadyeon nin pag-omaw asin pagpapasalamat.
29 Asin kun kamo pano nin kamondoan, mangapudan sa Kagurangnan saindong Diyos, na may paghahagad asin an saindong mga kalag magigin pano nin kaogmahan.
30 Dae kamo Matakot sa saindong mga kaiwal, nin huli ta sinda yaon sa sakuyang mga kamot asin Ako maggigibo kan sakuyang ikinakaogma sa sainda.
31 An sakuyang mga katawohan kaipuhan na pagsubukan sa gabos na mga bagay na tangani baya sinda magigin preparado na magresibe nin kamurawayan na igwa Ako para sainda, na iyo ngani an kamurawayan nin Sion; asin siya na dae nagkaramit nin kapakulan dae maninigo sa sakuyang kahadean.
32 Tuguti siya na sarong ignorante makanood nin kadunungan sa paagi nin pagpapakumbaba kan saiyang sadire asin mangapudan sa Kagurangnan saiyang Diyos, na tangani na an saiyang mga mata puwedeng mabuksan na tanganing siya makapaghiling, asin an saiyang mga talenga mabuksan na tanganing siya puwedeng makadangog;
33 Nin huli ta an sakuyang Espiritu ipinagpadara sa mundo tanganing pagpaliwanagan an mapagpakumbaba asin nagsosolsol, asin an kondenasyon kan mga bakong maka-diyos.
34 An saindong mga katugangan nagsikwal saindo asin sa saindong testimonya, maski ngani na an nasyon na nagpaharale saindo paluwas;
35 Asin ngonyan minaabot an aldaw kan saindong kalamidad, magin an mga aldaw nin kamondoan, na siring sa sarong babaye na pinagdara sa pagsakit; asin an saindang kamondoan magigin dakulaon laen lang kun sinda hidaling magsosolsol, iyo, sa grabe nanggad na kahidalian.
36 Nin huli ta saindang pinaggaradan an mga propeta, asin sinda ipinagpadara sainda; asin sinda nakapagpabulos nin inosenteng dugo, na nagtatangis gikan sa daga laban sainda.
37 Kun kaya, dae kamo magngalas sa mga bagay na ini, nin huli ta kamo bako pang puro; dae pa nindo kayang darahon an sakuyang kamurawayan; pero saindong mahihiling ini kun kamo matapat sa pagsusunod kan gabos na sakuyang mga tataramon na Ako an nagtao saindo, gikan pa sa mga aldaw ni Adan hanggan ki Abraham, gikan ki Abraham hanggan ki Moises, gikan ki Moises hanggan ki Jesus asin kan saiyang mga apostoles, asin gikan ki Jesus asin kan saiyang mga apostoles hanggan ki Joseph Smith, na Ako an nag-apod sa paagi kan sakuyang mga anghel, an sakuyang tagapagministeryong mga surugoon, asin sa paagi kan sakuyang sadireng boses gikan sa mga kalangitan, tanganing darahon paluwas an sakuyang gibo;
38 Na an pundasyon siya an naglatag, asin nagin matapat; asin Ako an nagkua saiya para sakuya.
39 Kadakol an nagngalas nin huli kan saiyang pagkagadan; pero ini kinakaipong gayo na saiya dapat na pagseselyuhan an saiyang testimonya kan saiyang dugo, na tangani siya puwedeng paggalangan asin an maririgsok puwedeng pagkokondenaron.
40 Bako daw na Ako an nagligtas saimo gikan sa saindong mga kaiwal, na tangani sanang Ako makapagwalat nin sarong saksi kan sakuyang pangaran?
41 Ngonyan, kun kaya, Hinanyoga, O kamong mga katawohan kan sakuyang simbahan; asin kamong mga elders magdangog na nagkatiripon; saindo nang naresibe an sakuyang kahadean.
42 Magin maigot sa pagsunod kan gabos na sakuyang mga kasugoan, na baka an mga paghuhukom mag-abot sa saindo, asin an saindong pagtubod an maghulog saindo, asin an saindong mga kaiwal magtrayumpong mangingibabaw saindo. Kaya mayo na nguna sa presente. Amen asin Amen.

SEKSYON 135

An pagkakamartir ni Joseph Smith asin kan saiyang tugang na lalake, si Hyrum Smith an Patriarka, sa Carthage, Illinois, Hunyo 27, 1844. HS 6:629-631. An dokumentong ini pinagsurat ni Elder John Taylor kan Konseho nin Dose, na nagin saksi kan mga pangyayari.

*******

1-2, Si Joseph asin Hyrum nagin martir sa kulungan nin Carthage; 3, An kahalangkawan nin posisyon kan Propeta pinagkukurahaw; 4-7, An saindang inosenteng dugo minapatotoo nin katotoohan asin kabanalan kan gibo.

*******

Tanganing pagselyuhan an testimonya kan librong ini asin kan Libro ni Mormon, kami minabalangibog kan pagkamartir ni Joseph Smith an Propeta, asin Hyrum Smith an Patriarka. Sinda pinagbadil sa kulungan nin Carthage, kan ika-27 nin Hunyo 1844, mga alas singko nin hapon, kan mga armadong paradurumog---pinturado nin itom---na may bilang na 150 hanggan 200 na persona. Si Hyrum an enot na nabadil asin kalmadong natumba, na nagkukurahaw: Ako sarong gadan na tawo! Si Joseph naglukso sa may bintana, asin pinagbadil sa pag-akma, na nagkukurahaw: O Kagurangnan sakong Diyos! Sinda parehong pinagbadil pagkatapos sinda nagadan, sa sarong brutal na manera, asin pareho tinamaan nin apat na bala.
2 Si John Taylor asin Willard Richards, duwa kan Dose, iyo sana an mga personang yaon sa kuwarto kan panahon na idto; an enot nalugadan sa marakwang manera nin apat na bala, pero naomayan na; an huri, sa paagi nin pag-ingat nin Diyos, nakapag-eskapo, na mayo maski sarong labot sa saiyang roba.
3 Si Joseph Smith, an Propeta asin Tagakita nin Kagurangnan, nakapaggibo nin mas kadakol, laen lang ki Jesus sana, para sa kaligtasan nin mga tawo sa mundong ini, kesa sa ibang tawo na nabuhay na digde. Sa dikit na kabtang na beynteng taon, siya nakapagdara paluwas kan Libro ni Mormon, na saiyang translado sa paagi kan regalo asin kapangyarihan nin Diyos, asin an nagin pinaggikanan sa pagpupublisa kaini sa duwang mga kontinente; naipagpadara an kabilogan kan daeng katapusan na ebanghelyo, na nakapalaman kaini, pasiring sa apat na rona kan kinaban; nakapagpadara paluwas nin mga kapahayagan asin mga kasugoan na minakomposo kaining libro kan Doktrina asin mga Tipan, asin kadakol pang na ibang madunong na mga dokumento asin mga instruksiyon para sa benepisyo kan mga kaarakian nin mga tawo; pinagtiripon an kadakol na rinibong mga Banal sa Huring-aldaw, nagpundar nin sarong dakulang siyudad, asin nagwalat nin sarong kabantogan asin pangaran na dae magagadan. Siya namuhay na marahayon, asin siya nagadan na marahayon sa mga mata nin Diyos asin kan saiyang mga katawohan; asin arog sa kadaklan kan pinaglahidan nin Kagurangnan sa suanoy na mga panahon, pinagselyuhan an saiyang misyon asin mga naginibohan kan saiyang sadireng dugo; asin siring man an saiyang tugang na lalakeng si Hyrum. Sa buhay sinda dae napagsuhay, asin sa kagadanan sinda dae naseparado!
4 Kan si Joseph nagpaduman sa Carthage tanganing ipaghaya an saiyang sadire sa pinagsagin-sagin na pangaipuhanan nin batas, duwa o tolong aldaw bago pa an saiyang asasinasyon, siya nagsabi: “Ako magpaduman na siring sa sarong kordero na pasiringon sa bonoan; pero ako kalmado na siring sa sarong kinaumagahon kan tag-init; ako igwa nin konsensiya na mayong kakundian sa atubangan nin Diyos, asin sa mga tawo. AKO MAGAGADAN NA INOSENTE, ASIN INI PAGSASABIHON SAKO---SIYA PINAGGADAN SA MAYONG KALABAN-LABAN.” ---Sa kaparehong kinaumagahon, pagkatapos na si Hyrum naghimong andam na sa pagpaduman--- na ini pinagsabi na pasiringon sa bonoan? Iyo, nin huli ta ini nanggad--- Siya nagbasa kan minasunod na paragrap, harani sa tapos kan ika-doseng tsapter kan Ether, sa Libro ni Mormon, asin pinagbuklat an pahina kaini:
5 Asin ini nangyaring naglipas na ako nagpangadye sa Kagurangnan na siya magtatao sa mga Hentil nin grasya, na tangani baya sinda magkaigwa nin karidad. Asin ini nangyaring naglipas na an Kagurangnan nagsabi sa sako: Kun sinda mayong karidad ini mayong halaga sa sakuya, ika nagin matapat; kumbaya an saimong nahiling an saimong kaluyahan, ika paghihimoong makusugon, maski na ngani, magtutukaw sa lugar na Ako an nag-andam sa mga mansiyon kan sakuyang Ama. Asin ngonyan Ako… mapaaram na sa mga Hentil; iyo, asin man sa sakuyang mga katugangan na Ako namomoot, sagkod na kami magkahirilingan sa atubangan kan tukawang paghuhukom ni Kristo, na kun saen an gabos na mga tawo makakaaram na an sakuyang mga bado dae nadidigtaan kan saindong dugo. An mga parapatotoo garadan na, asin an saindang testamento yaon na sa pagdanay.
6 Si Hyrum Smith kaidto kuwarenta asin apat na taon an edad kan Pebrero, 1844, asin si Joseph Smith kaidto treynta asin walo kan Disyembre 1843; asin magpoon ngonyan dagos an saindang mga pangaran na pagkaklasipikaron na pag-iriba kan mga martir sa relihiyon; asin an parabasa sa lambang nasyon pagpapagiromdomon na an Libro ni Mormon, asin ining libro, kan Doktrina asin mga Tipan kan simbahahn, nagkahalaga nin pinakamarahayon na dugo kan ika-19 siglo tanganing pagdarahon sainda paluwas para sa kaligtasan kan sarong nagrurunot na mundo; asin na kun an kalayo nakakaputol nin sarong berdeng kahoy para sa kamurawayan nin Diyos, gurano kasayon ini na magsusulo kan marang mga kahoy tanganing puripikaron an ubasan nin korapsiyon. Sinda nagkaburuhay para sa kamurawayan; sinda nagkagaradan para sa kamurawayan; asin an kamurawayan iyo an saindang eternal na pabuya. Gikan sa pana-panahon an saindang mga pangaran makakaabot sa posteridad siring sa alahas para sa pinagpabanal.
7 Sinda inosente kan anuman na krimen, siring na sinda pirme nang pinagprubaran kaidto pa, asin nagkakurulong sana sa kulungan sa paagi kan pakipagsabawatan kan mga traydor asin maririgsok na mga tawo; asin an saindang inosenteng dugo na yaon sa salog kan kulungan nin Carthage iyo an sarong madoonon na selyo na pinagpirma sa “Mormonismo”na dae nanggad maisisikwal sa arin man na korte kan kinaban,asin an saindang inosenteng dugo na yaon sa baluti kan Estado nin Illinois, kaiba an napasong pagtubod kan Estado na ipinagpangako kan gobernador, iyo an sarong patotoo sa katotoohan kan daeng katapusan na ebanghelyo na an gabos sa mundo dae makakapagpahale; asin an saindang inosenteng dugo yaon sa bandera kan libertad, asin yaon sa magna carta kan Estabod Unidos, iyo an sarong tagapagbalangibog para sa relihiyon ni Jesukristo, na iyo an magdudutdot sa mga puso kan mga honestong tawo na yaon sa pag-iriba kan gabos na mga nasyon; asin an saindang inosenteng dugo, kairiba kan inosenteng dugo kan gabos na mga martir na yaon sa irarom kan altar na nahimo ni Juan, na nagkukurahaw sa Kagurangnan nin mga Hukbo sagkod na siya nakapagbalos na kan dugo sa ibabaw nin kinaban. Amen.

SEKSYON 134

Sarong deklarasyon nin paniniwala mapanungod sa mga gobyerno asin mga batas sa pankagabsan, pinag-adaptar sa paagi nin handoyog sa pagboto sa sarong heneral na asembliya kan Simbahan na ginibo sa Kirtland, Ohio, Agosto 17, 1835. HS 2:247-249. An okasyon iyo an sarong miting kan mga lideres nin Simbahan, na pinagdarang magkasararo tanganing konsideraron an pinaghayang laman kan enot na edisyon kan Doktrina asin mga Tipan. Sa panahon na idto ining deklarasyon pinagtaw-anan kaining minasunod na preyambulo: Na an satuyang paniniwala mapanungod sa pankinaban na mga panggogobyerno asin mga batas sa pankagabsan puwedeng dae mamis-interpretar ni dae masasabutan, samuyang naisip na marahayon na ini ipagpaliwanag sa pagserado kaining bolyum an opinion mapapanungod kan bagay na ini.”

*******

1-4, An mga gobyerno dapat ipagpreserbar an katalingkasan nin konsensiya asin pagsamba; 5-8, Gabos na mga tawo mangaputan kan saindang mga gobyerno, asin respetohon asin galangan an batas; 9-10, An mga relihiyosong mga sosyedad dapat dae mag-ehersisyo kan sibil na kapangyarihan; 11-12, An mga tawo maninindugan sa pagbabantay kan saindang mga sadire asin kan saindang mga rugaring.

*******

KAMI minatubod na an mga gobyerno pinagtugdas nin Diyos para sa benepisyo kan tawo; asin ta saiyang pinapangaputan na an mga tawo maninimbagan para sa saindang gibo na may relasyon kaini, pareho sa paghihimo nin mga batas asin sa pagpapamahala kan mga ini, para sa karahayan asin kaligtasan kan sosyedad.
2 Kami minatubod na mayong gobyerno na makapagdanay sa katuninongan, laen lang na an mga batas na ini pinagpormada asin pinapangaputan bilang makapagpaseguro sa lambang indibidwal sa libreng pag-ehersisyo kan konsensiya, an karapatan asin kontrol nin rugaring, asin sa proteksyon nin buhay.
3 Kami minatubod na an gabos na mga gobyerno minakaipo nin mga sibil na opisyales asin mga mahistrado tanganing ipagpapasunod an mga batas kaini; asin an mga ini iyo an magpapamahala kan batas sa kapantayan asin hustisya na magin iyo an paghangadon asin pagpatibayon sa paagi kan boses nin mga tawo kun ini sarong republika, o kagustuhan nin mga namamanwaan.
4 Kami minatubod na an relihiyon pinagtugdas nin Diyos; asin na an mga tawo minauyon sa saiya, asin sa saiya sana, para sa pag-ehersisyo kaini, laen lang kun an saindang relihiyosong mga opinion mapasabong sainda na balgahon an mga karapatan asin katalingkasan kan iba; pero kami dae minatubod na an batas nin tawo igwa nin karapatan na makiaram sa pagpapasunod nin mga patakaran nin pagsasamba tanganing bugkoson an mga konsensiya nin mga tawo, ni magdikta nin mga porma para sa publiko o pribadong debosyon; na an sibil na mahistrado dapat na magpauntok kan krimen, pero bakong kontrolon an konsensiya; dapat na magpadusa nin kasalan, pero bakong magpugol sa katalingkasan nin kalag.
5 Kami minatubod na an gabos na mga tawo binurugkos na pagsustiniron asin panindugan an kanya-kanyanjg mga gobyerno na kun saen sinda nag-eerok, habang protektado an saindang kunob asin daeng karibay na mga karapatan sa paagi kan mga batas kaining mga gobyerno; asin na an sedisyon asin rebelyon bakong manigo sa lambang namamanwaan na baya protektado, asin dapat dagos na pagpadusahan; asin na an gabos na mga gobyerno igwa nin karapatan na magpasar kan arog kaining batas na yaon sa sadire nindang mga paghuhukom na mas marahayong kalkulado sa pagpaseguro kan publikong interes; sa siring na panahon, kaya lang, mangangaputang sagrado an katalingkasan nin konsensiya.
6 Kami minatubod na an lambang tawo dapat na paggalangon sa saiyang estasyon, mga tagapagpamahala asin mga mahistrado baya, na ipinagpamugtak para sa proteksyon kan inosente asin an kapadusahan kan may sala; asin ta sa mga batas an gabos na mga tawo mapahiling nin respeto asin kagalangan, siring na kun mayo sinda an katuninongan asin harmoniya pagtatabunan nin anarkiya asin panakot; an mga batas nin tawo bilang pinagtugdas para sa langkabang katuyuhan nin pagpapasunod kan satuyang mga interes bilang mga indibidwal asin mga nasyon, sa tahaw kan tawo sa tawo; asin an mga banal na batas na ipinagtao nin langit, nagpapasunod nin mga patakaran sa espirituwal na mga bagay, para sa pagtubod asin pagsamba, na parehong paninimbagan nin tawo sa saiyang Kaglalang.
7 Kami minatubod na an mga tagapagpamahala, estados, asin mga gobyerno igwa nin karapatan, asin kaipuhan na magpasar nin mga batas para sa proteksyon kan gabos na mga namamanwaan para sa talingkas na pag-ehersisyo kan saindang relihiyosong paniniwala; pero kami dae minatubod na sinda igwa nin karapatan sa hustisya na pagkaitan an mga namamanwaan kaining pribilihiyo, o pagpangenotan sinda kan saindang mga opinyon, habang may kamangnohan asin paggalang na ipinagpahiling sa mga batas asin an arog kaining mga relihiyosong opinyon dae minapahalaga kan sedisyon ni kan pakikipagsabwatan.
8 Kami minatubod na an pagkomiter nin krimen dapat na pagpapadusahan uyon sa natura nin kabalgahan; na an paggadan, pagtalikod sa banwaan, pananalakat, panhabon, asin an pagbalga kan heneral na katuninongan, sa gabos na mga bagay, dapat na pagpapadusahan uyon sa saindang kriminalidad arin kan saindang tendensiya sa maraot na pag-iribahan nin mga tawo, sa paagi kan mga batas kan gobyernong iyan na kun saen an kabalgahan pinagkomiter; asin para sa publikong katuninongan asin trangkilidad na an gabos na mga tawo dapat na mangenot na gamiton an saindang abilidad sa pagdadara kan mga parabalga laban sa marahayon na mga batas pasiring sa kapadusahan.
9 Kami dae minatubod na ini husto na maipagsalak an relihiyosong impluwensiya sa sibil na panggogobyerno, na kun saen an sarong relihiyosong sosyedad pinagpapangalagaan asin an iba pinagpapangenotan ining mga espirituwal na mga pribilihiyo, asin an indibidwal na mga karapatan kan saindang mga miyembro, bilang mga namamanwaan, na ipagkait.
10 Kami minatubod na an gabos na mga relihiyosong sosyedad igwa nin sarong karapatan na maghusay sa saindang mga miyembro para sa dae tamang pag-uugali; na uyon sa mga patakaran asin regulasyon kan mga sosyedad na iyan; kaya lang dapat na an mga paghuhusay magigin para sa pakikipaghalo-bilo asin marahayong katindogan; pero kami dae minatubod na an arinman na relihiyosong sosyedad igwa nin awtoridad na pagsusubukan an mga tawo sa karapatan nin propriyedad o buhay, na pag-agawon gikan sainda an mga bagay kaining mundo, o ipagpamugtak sinda sa kadelikaduhan nin arinman sa buhay o kahawakan, o sa pagpataw nin anuman na pisikal na kapadusahan sa sainda. Sinda puwede sanang ipag-ekskomunikado ninda gikan sa saindang sosyedad, asin paghaleon gikan sainda an pagkikipaghalo-bilo.
11 Kami minatubod na an mga tawo dapat na mag-apela sa sibil na batas para sa kapatawadan kan gabos na mga kasalaan asin mga nakulganan, na kun saen personal na pag-abuso an naginiboha o an karapatan sa propriyedad o pagkatawo an nabalga na kun saen ining mga batas nag-eksister sa pagprotekta kan mga ini; pero kami minatubod na an gabos na mga tawo hustipikado sa pagdedepensa kan saindang mga sadire, kan saindang mga amigo, asin propriyedad, asin gobyerno, gikan sa iligal na mga pag-atake asin pakiaram kan gabos na mga persona sa panahon na kinakaipuhanan, na kun saen an tulos na pag-apela dae mahihimo sa mga batas, asin an kahinggianan makamit.
12 Kami minatubod na ini husto na ipagbalangibog an ebanghelyo sa mga nasyon sa kinaban, asin patanidan an matatanos na iligtas an saindang mga sadire gikan sa korapsyon nin mundo; pero kami dae minatubod na ini tama na makiaram sa mga uripon ni ipagbalangibog an ebanghelyo, ni pagbunyagan sinda kontraryo sa kagustuhan asin kamawotan kan saindang mga amo, ni makiaram o impluwensiyahan sinda nin kadikit na tanganing magkausa sainda na dae magin kontento kan saindang mga sitwasyon sa buhay na ini, kun saen puwedeng maipagpahamak kan mga buhay nin mga tawo; sa arog kaining pakikiaram kami minatubod na iligal asin bakong husto, asin madelikado sa katuninongan kan lambang gobyerno na pagtutugutan na an mga tawo pagkakaputan sa kauripnan.

SEKSYON 133

Kapahayagan na ipinagtao sa paagi ki Joseph Smith an Propeta, sa Hiram, Ohio, Nobyembre 3, 1831. HS 1:229-234. Prenterang pahina kaining kapahayagan an Propeta nagsurat: “Sa panahon na ini igwa nin kadakol na mga bagay na an mga Elders nagmawot na makaaram na may relasyon sa pagbabalangibog kan Ebanghelyo sa mga para-erok kan kinaban, asin an mapanungod sa pagtitiripon-tipon; asin tanganing maglalakaw sa paagi kan tunay na liwanag, asin magin instruksiyonado gikan sa kaitaasan, kan ika-3 nin Nobyembre 1831, Ako naghapot sa Kagurangnan asin nagresibe kan minasunod na importanteng kapahayagan.” Ining seksyon enot na piangdagdag sa libro kan Doktrina asin mga Tipan bilang sarong apendikto asin kasunod na pinagtaw-anan nin sarong numerong seksyon.
*******
1-6, An mga banal pinagsugo na mag-andam para sa Ikaduwang Pag-abot; 7-16, Gabos na mga tawo pinagsusugo na magdulag gikan sa Babilonya, magdulok sa Sion, asin maghanda para sa dakulang aldaw nin Kagurangnan; 17-35, Siya magtitindog sa Bukid Sion, an mga kontinente magigin sarong kadagaan, asin an mga nagkawararang mga tribu kan Israel magbabaralik; 36-40, An ebanghelyo pinagbalik-liwat sa paagi ki Joseph Smith tanganing ipagbalangibog sa bilog na mundo; 41-51, An Kagurangnan maabot pababa sa pagbalos sa mga maririgsok; 52-56, Ini magigin taon kan saiyang pinagturubos; 57-74, An ebanghelyo ipagpapadara tanganing iligtas an mga banal asin para sa kapahamakan kan mga maririgsok.
*******
MAGHINANYOG, O kamong mga katawohan kan sakuyang simbahan, nagsabi an Kagurangnan na saindong Diyos, asin dangoga an tataramon nin Kagurangnan mapanungod saindo---
2 An Kagurangnan tulos na maabot nin hidali sa saiyang templo; an Kagurangnan na magbababa sa mundo na igwa nin sarong sumpa sa paghukom; iyo, sa gabos na mga nasyon na nakakalingaw na sa Diyos, asin sa gabos na daeng diyos sa pag-iriba nindo.
3 Nin huli ta siya maghihimong ipaglantad an saiyang banal na takyag sa mga mata kan gabos na mga nasyon, asin an gabos na mga katapusan kan kinaban makakahiling sa kaligtasan nin saindang Diyos.
4 Kumbaga, mag-andam kamo, mag-andam kamo, O sakuyang mga katawohan; pakabanalon an saindong mga sadire; magtiripon kamo na magkasararo, O kamong mga katawohan kan sakuyang simbahan, na yaon sa kadagaan nin Sion, gabos kamo na dae pinagsugo magpawalat.
5 Magharale kamo paluwas gikan sa Babilonya. Magin kamo malinigon na nagdadara kan mga sakayan nin Kagurangnan.
6 Mangapudan kan saindong solemneng asembliya, asin mag-erestoryahan pirme sa lambang saro. Asin Tuguti na an lambang tawo mag-apod sa pangaran nin Kagurangnan.
7 Iyo, katotohanan Ako nagsasabi sa saindo giraray, an panahon nag-abot na kunsoaring na an boses nin Kagurangnan yaon sa saindo: Magharale kamo paluwas gikan sa Babilonya; magkatiripon kamo gikan sa pag-iriba nin mga nasyon, gikan sa apat na mga paros, gikan sa sarong poro nin langit hanggan sa balyong poro.
8 Ipagpadarang gayo an mga elder kan sakuyang simbahan pasiring sa mga nasyon na yaon sa hararayo; pasiring sa mga isla nin kadagatan; ipagpadara pasiring sa ibang kadagaan; mangapudan sa gabos na mga nasyon, enot sa mga Hentil, asin kasunod sa mga Hudiyo.
9 Asin hilnga, asin uya, ini iyo an saindong ikukurahaw, asin an boses nin Kagurangnan para sa gabos na mga katawohan: Magharale kamo pasiring sa kadagaan nin Sion, na tanganing an mga kasagkoran nin sakuyang mga katawohan puwedeng maipagpapadakula, asin na an saiyang mga istaka puwedeng mapagpapakusog, asin na an Sion puwedeng maipagpadara pasiring sa mga rehiyon na nakapalibot.
10 Iyo, Tuguti na an kinurahaw makaabot sa pag-iriba nin gabos na mga katawohan: Magmata kamo asin magbuhat asin maglakaw sa pagsabat kan nobyo; hilnga asin uya, an Nobyo nag-abot na; maglakaw kamo paluwas sa pagsabat saiya. Prepararon an saindong mga sadire para sa dakulang aldaw nin Kagurangnan.
11 Magbantay kamo, baya, nin huli ta kamo dae nakakaaram kan aldaw ni an oras.
12 Tuguti sinda, baya, na yaon sa pag-iriba kan mga Hentil na magdulag pasiring sa Sion.
13 Asin tuguti sinda na yaon sa Judah na magdulag pasiring sa Jerusalem, paduman sa mga bukid kan harong nin Kagurangnan.
14 Maglakaw kamo paluwas gikan sa pag-iriba nin mga nasyon, magin gikan sa Babilonya, gikan sa katahawan nin karigsokan, na iyo an espirituwal na Babilonya.
15 Pero katotohanan, kaya nagsabi an Kagurangnan, tuguti na an saindong pagbiyahe bakong hidali, kundi tuguti na an gabos na mga bagay maipag-andam sa atubangan nindo; asin siya na mabiyahe, tuguti siya na dae maglingon sa likod ta baka baya magkaigwa nin hidaling kapahamakan na mag-abot sa saiya.
16 Maghinanyog asin magdangog, O kamong mga para-erok kan kinaban. Hinanyoga, kamo na mga elder kan sakuyang simbahan na magkatiripon, asin dangoga an boses nin Kagurangnan; nin huli ta siya nag-aapod sa gabos na mga tawo, asin siya nagsusugo sa gabos na mga tawo saen mang rona na magsolsol.
17 Nin huli ta hilnga, an Kagurangnang Diyos ipinagpadara an mga anghel na nagkukurahaw sa katahawan nin langit, na nagsasabi: Prepararon nindo an dalan nin Kagurangnan, asin himoon na an saiyang agihan matanos, nin huli ta an oras kan saiyang pag-abot haranihon na---
18 Kunsoarin na an Kordero magtitindog sa Bukid Sion, asin kaiba niya an sanggatos asin kuwarenta may apat na ribo, na dara an pangaran kan saiyang Ama na nakasurat sa saindang mga angog.
19 Kumbaga, mag-andam kamo para sa pag-abot kan Nobyo; maglakaw kamo, maglakaw kamo paluwas sa pagsabat saiya.
20 Nin huli ta hilnga, siya magtitindog sa ibabaw kan bukid nin Olivet, asin sa ibabaw kan dakulang kadagatan, maski sa dakulang kairaroman, asin sa mga isla nin kadagatan, asin sa kadagaan nin Sion.
21 Asin siya magpapaluwas kan saiyang boses hale sa Sion, asin siya magtataram gikan sa Jerusalem, asin an saiyang boses madadangog sa pag-iriba nin gabos na mga katawohan;
22 Asin ini magigin sarong boses siring sa boses nin kadakol na mga katubigan, asin siring sa boses nin sarong makusugon na daguldol, na makakapagtumpag nin mga kabukidan, asin an mga buro-bukid dae mananagboan.
23 Siya magsusugo sa dakulang kantil, asin ini pababalikon pasiring sa hiragang mga nasyon, asin an mga isla magigin sarong kadagaan;
24 Asin an kadagaan nin Jerusalem asin an kadagaan nin Sion ipagbabalik sa saindang sadireng lugar, asin an kinaban magigin siring sa dati nin mga aldaw bago pa nini pinagbabaranga-banga.
25 Asin an Kagurangnan, na iyo ngani an Paraligtas, magtitindog sa katahawan kan saiyang mga katawohan, asin maghahade sa gabos na mga laman.
26 Asin sinda na yaon sa mga hiragang nasyon maabot sa paggiromdom sa atubangan nin Kagurangnan; asin an saindang mga propeta magdadangog kan saiyang boses, asin dae na mag-uuntok kan saindang mga sadire; asin sinda maghahampak nin mga gapo, asin an yelo mag-aagos pababa sa saindang presensiya.
27 Asin sarong halawigon na tinampo an pagpapaluwason sa katahawan nin dakulang kantil.
28 An saindang mga kaiwal magigin sarong kalantadan sa sainda,
29 Asin sa mga marang disyerto magkakaigwa nin mga lanaw nin buhay na katubigan; asin an marathon na daga dae nang gayo magigin sarong mapahaong kadagaan.
30 Asin sinda magdadara paluwas kan saindang dakulon na mga kayamanan para sa mga kaarakian ni Ephraim, an sakuyang mga surugoon.
31 Asin an mga kasagkoran kan daeng katapusan na bukid-bukid magtatanyog sa saindang presensiya.
32 Asin duman sinda magpapaibaba asin pagkokoronahan nin kamurawayan, magin yaon sa Sion, sa paagi kan mga kamot nin mga surugoon nin Kagurangnan, na iyo ngani an kaarakian ni Ephraim.
33 Asin sinda pagpapanoon kan mga awit nin daeng katapusan na kaogmahan.
34 Hilnga, iyo ini an bendisyon kan daeng katapusan na Diyos sa mga tribu nin Israel, asin an mayamanon na bendisyon sa payo ni Ephraim asin kan saiyang kairibahan,
35 Asin sinda man na yaon sa tribu ni Judah, pagkatapos kan saindang kasakitan, pagpapakabanalon sa kabanalan sa atubangan nin Kagurangnan, na mag-eerok sa saiyang presensiya aldaw asin banggi, sa daeng kasagkoran.
36 Asin ngonyan, katotohanan nagsabi an Kagurangnan, na an mga bagay na ini puwedeng maipagpaaram sa pag-iriba nindo, O para-erok kan kinaban, Ako nagpadara nin sakuyang mga anghel na naglulupad sa katahawan nin langit, na dara an daeng katapusan na ebanghelyo, na nakapagpahiling na sa iba asin nakapagkomiter kaini sa tawo, na magpapahiling sa kadakolon na nag-eerok sa kinaban.
37 Asin ining ebanghelyo ipagbabalangibog pasiring sa lambang nasyon, asin lahi, asin dila, asin mga katawohan.
38 Asin an mga surugoon nin Diyos magraralakaw, na nagsasabi na may sarong makusugon na boses: Matakot kamo sa Diyos asin magtao nin kamurawayan sa saiya, nin huli ta an oras kan saiyang paghuhukom nag-abot na;
39 Asin magsamba kamo saiya na naghimo nin langit, asin kinaban, asin nin dagat, asin kan mga ukabod nin mga katubigan---
40 Mangapudan kamo sa pangaran nin Kagurangnan aldaw asin banggi, na magsasabi: O na saimong gigision an mga kalangitan, na tangani baya ika magbababa, na an mga kabukidan puwedeng magbubulos pababa sa saimong presensiya.
41 Asin ini paninimbagan sa saindang mga payo; nin huli ta an presensiya nin Kagurangnan magigin siring sa nakakatunaw na kalayo na nag-aagabaab, asin siring sa kalayo na minakausa sa mga tubig na magkukulo.
42 O Kagurangnan, ika magbababa tanganing himoon na an saimong pangaran maipagpaaram sa saimong mga kaiwal, asin an gabos na mga nasyon mangungubog-kubog sa saimong presensiya---
43 Kunsoarin na ika maggigibo nin mga teribleng bagay, mga bagay na dae ninda baya pinaghahanap;
44 Iyo, kunsoarin na ika magbababang gayo, asin an mga kabukidan magbubulos pababa sa saimong presensiya, saimong pagsasabaton siya na nagrurukyaw asin nagtatrabaho nin katanosan, na nakapaggiromdom saimo sa saimong mga dalan.
45 Nin huli ta magpoon pa sa kapinunan kan mundo bako daw na an mga tawo nakapagdangog ni nakapag-isip sa paagi nin talenga, ni an arinman na mata nakapaghiling, O Diyos, laen pa saimo, gurano kadakulan an mga bagay na saimong pinag-andam para saiya na naghahalat sa saimo.
46 Asin ini pagsasabihon: Siisay baya ini na nagbababa gikan sa Diyos nin langit na igwang pinagtinaan na mga kabadoan; iyo, gikan sa mga rehiyon na dae pa nababantog, nababadoan kan saiyang mamurawayon na hitsura, nagbibiyahe sa kadakolan kan saiyang kusog?
47Asin siya magsasabi: Ako iyo Siya na nagtataram sa katanosan, Makapangyarihan sa pagligtas.
48 Asin an Kagurangnan magigin pula sa saiyang hitsura, asin an saiyang mga bado siring baga sa na nagtutuntong sa talyasi nin arak.
49 Asin grabe kadakulan an magigin kamurawayan kan saiyang presensiya na tanganing an saldang magtatago kan saiyang lalawgon sa kasupganan, asin an bulan magpupugol kan saiyang liwanag, asin an mga bitoon magkakahurulog sa saindang kinamumugtakan.
50 Asin an saiyang boses magkakadarangog: Ako nagtitimak-timak sa runotan nin ubas nin solo, asin an nagdara nin paghuhukom sa gabos na mga katawohan; asin mayong nag-iiba sako;
51 Asin Ako an nakurumos sainda sa sakuyang matinding anggot, asin Ako an nagtimak-timak sa sainda sa sakuyang kaanggutan, asin an saindang dugo Ako an nagwigwig sa sakuyang bado, asin an nagdugta sa gabos kong kabadoan; nin huli ta ini iyo an aldaw nin pagbabalos na yaon sa sakuyang puso
52 Asin ngonyan an taon kan sakuyang tinubos nag-abot na; asin saindang pagsasambiton an mamumut-on na kabootan kan saindang Kagurangnan, asin kan gabos na saiyang ipinaghaya sa sainda na uyon sa saiyang karahayan, asin uyon sa saiyang mamumut-on na kabootan, sa daeng kasagkoran.
53 Sa gabos na saindang mga kasakitan siya nagsakit. Asin an anghel kan saiyang presensiya an nagligtas sainda; asin sa saiyang pagkamoot, asin sa saiyang herak, siya an nagtubos sainda, asin an nagkugos sainda, asin an nagdara sainda sa gabos na aldaw nin suanoy;
54 Iyo, asin si Enoch man, asin sinda na kaiba niya; an mga propeta na nagka-erenot saiya; asin si Noah man, asin sinda na nagka-erenot saiya; asin si Moises man, asin sinda na nagka-erenot saiya;
55 Asin gikan ki Moises hanggan ki Elijah, asin gikan ki Elijah hanggan ki John, na kaiba ni Kristo sa saiyang pagkabuhay-liwat, asin an mga banal na apostoles, kaiba ki Abraham, Isaac, asin Jacob, magigin yaon sa presensiya kan Kordero.
56 Asin an mga lubungan nin mga banal magkakaburukasan; asin sinda magruruluwas asin magtitindog sa toong kamot nin Kordero, kunsoarin na siya magtitindog sa Bukid Sion, asin sa banal na siyudad, an Bagong Jerusalem; asin sinda magkakanta kan awit nin Kordero, aldaw asin banggi sa daeng kasagkoran.
57 Asin nin huli kaining kausa, na tanganing an mga tawo magigin mga kaparte kan mga kamurawayan na ipagpapahayag, an Kagurangnan nagpadara sa kabilugan kan saiyang ebanghelyo, kan saiyang daeng katapusan na tipan, nagpapaliwanag sa kalinawan asin simplisidad---
58 Tanganing andamon an maluluya para sa kaidtong mga bagay na maarabot sa kinaban, asin para sa kasibutan nin Kagurangnan sa aldaw kunsoarin na an maluluya magpaparibong sa mga madudunong, asin an saraditon magigin sarong makusog na nasyon, asin an duwa an magbubugtak kan saindang manampulong ribo na magdurulag.
59 Asin sa paagi kan maluluyang mga bagay kan kinaban an Kagurangnan an magbabasura kan mga nasyon sa paagi nin kapangyarihan kan saiyang Espiritu.
60 Asin nin huli kaining kausa ining mga kasugoan ipinagtao; sinda pinagsugo na ipagtago sa mundo sa aldaw na sinda ipagtao, pero ngonyan ipagbubuyagyag pasiring sa gabos na laman---
61 Asin ini uyon sa kaisipan asin kabootan nin Kagurangnan, na iyo an nagpapamahala kan gabos na laman.
62 Asin sa sainda na nagsosolsol asin nagpapakabanal kan saindang sadire sa atubangan nin Kagurangnan pagtataw-anan nin eternal na buhay.
63 Asin sa sainda na dae naghihinanyog sa boses nin Kagurangnan mauutob kan bagay na ipinagsurat kan propetang si Moises, na sinda pagsusuhayon gikan sa pag-iriba nin mga katawohan.
64 Asin man idtong mga bagay na pinagsurat sa paagi kan propetang si Malakias: Nin huli ta, hilnga, an aldaw maabot na mag-aagabaab siring sa sarong horno, asin an gabos na mapang-abaw-abaw, iyo, asin an gabos na naggigibo nin karigsokan, magigin panggatong; asin an aldaw maabot na magsusulo sa sainda, nagsabi an Kagurangnan nin mga hukbo, na ini mayong ipagtatada na ugat ni sanga.
65 Kumbaya, iyo ini an ipagsisimbag nin Kagurangnan sa sainda:
66 Sa aldaw na iyan kunsoarin na Ako maabot sa sakuyang sadire, mayong tawo sa pag-iriba nindo na maresibe sako, asin kamo pagpapahaleon paluwas.
67 Kunsoarin na Ako nag-apod giraray mayo saindo an nagsimbag; alagad an sakuyang takyag dae pinagpahalipot na tanganing Ako dae makapagtubos, ni an sakuyang kapangyarihan sa pagligtas.
68 Hilnga, sa sakuyang pagsadol Ako an nagpamara kan dagat. Ako naghimo kan mga salog na sarong kaparangan; an saindong mga isda nagkaralapa, asin nagkagaradan nin huli sa kapahaan.
69 Ako an nagbado kan mga kalangitan nin kaitoman, asin hinimo na an sakong bado iyo an saindang pantahob.
70 Asin kaini kamo magkakaigwa sa sakuyang kamot--- kamo maghihigda sa kamondoan.
71 Hilnga, asin uya, mayong magliligtas sa saindo; nin huli ta kamo dae nagsunod sa sakuyang boses kunsoarin na Ako an nangapudan saindo gikan sa mga kalangitan; kamo dae nagtuturubod sa sakuyang mga surugoon asin kunsoarin na sinda ipinagpadara sa saindo kamo habong magresibe sainda.
72 Kumbaya, sinda na nagselyo kan patotoo asin nagbugkos kan batas, asin kamo ipinagpatunod pasiring sa kadikloman.
73 An mga ini ipagtutunod paharayo pasiring sa luwas nin kadikloman, na kun saen igwa nin pagtatangis, asin pananaghoy, asin pagrarag-ot nin mga ngipon.
74 Hilnga an Kagurangnan na saindong Diyos nakapagtaram kaini. Amen.