Kapahayagan na ipinagtao sa paagi ki Joseph Smith an Propeta, sa Far West, Missouri, Abril 26, 1838, na ipinagpapaaram an kagustuhan nin Diyos mapanungod sa pagtutugdok kan lugar asin kan Harong nin Kagurangnan. HS 3:23-25. Ining kapahayagan ipinagpanungod para sa mga pangenot na mga opisyales kan Simbahan.*******
1-4, An Kagurangnan nagngaran kan saiyang simbahan, An Simbahan ni JesuCristo nin mga Banal sa Huring Aldaw; 5-6, An Sion asin an saiyang mga istaka iyo an mga lugar nin depensa asin pailihan para sa mga banal; 7-16, An mga banal pinagsusugo na magtugdok nin sarong Harong nin Kagurangnan sa Far West; 17-19, Si Joseph Smith an nagkakapot nin mga susi nin kahadean kan Diyos sa kinaban.*******
KATOTOHANAN kaya nagsabi an Kagurangnan sa saimo, sakuyang surugoon na si Joseph Smith Jun., asin man sa sakuyang surugoon na si Sidney Rigdon, asin man sa sakuyang surugoon na si Hyrum Smith, asin an saimong mga tagapayo na iyo asin pagngangaranan sa ngonyan dagos;
2 Asin man sa saimo, sakuyang surugoon na si Edward Partridge, asin an saiyang mga tagapayo;
3 Asin man sa sakuyang matatapat na mga surugoon na yaon sa halangkaw na konseho kan sakuyang simbahan sa Sion, nin huli ta iyo ini an ipag-aapod, asin sa gabos na mga elder asin katawohan kan sakuyang Simbahan ni JesuCristo nin mga Banal sa Huring Aldaw, na nagkalat sa luwas nin bilog na mundo;
4 Nin huli ta iyo ini an sakuyang simbahan na pag-aapudon sa mga huring aldaw, na iyo ngani An Simbahan ni JesuCristo nin mga Banal sa Huring Aldaw.
5 Katotohanan Ako nagsasabi sa saindo gabos: Magtindog asin magsirang kamo, na tanganing an saindong liwanag puwede magin sarong estandarte para sa mga nasyon;
6 Asin na tanganing an pagtitiripon-tipon na magkasararo sa kadagaan nin Sion, asin sa saiyang mga istaka, na mapuwedeng magin sarong depensa, asin para sarong pailihan gikan sa bagyo asin gikan sa kaanggutan kunsoarin na ini ipagpapabulos paluwas na mayong halo sa bilog na kinaban.
7 Tuguti na an siyudad, Far West, magin sarong banal asin konsagradong kadagaan para sa sakuya; asin ini pag-aapudon na pinakabanal, nin huli ta an daga na kun saen ika nakatindog na sarong banal.
8 Kun kaya, Ako nagsusugo sa saindo na magtugdok nin sarong harong para sa sakuya, para sa pagtitiripon-tipon na magkakasararo an sakuyang mga banal, na tanganing sinda puwedeng magsamba sa sakuya.
9 Asin tuguti na magkaigwa nin sarong kapinunan ining trabaho, asin saroang pundasyon, asin sarong pagpapangandam na trabaho, para kaining minasunod na tag-init;
10 Asin tuguti na an kapinunan lugod mahimong sa ikaapat na aldaw nin Hulyong masunod; asin magpoon sa panahon na ini asin sa maarabot tuguti na an sakuyang mga katawohan magtatrabaho nin maigoton tanganing pagtugdukon an sarong harong para sa sakuyang pangaran;
11 Asin sa laog nin sarong taon magpoon ngunyan na aldaw tuguti sinda na magpoon sa paglatag nin pundasyon kan sakuyang harong.
12 Kaya tuguti sinda magpoon sa panahon nay an magtrabaho nin maigot sagkod na ini matapos, magpoon sa panulok na gapo kaini hanggan sa pinaka-itaas kaini, sagkod na mayo na nin anuman an matatada na bakong tapos.
13 Katotohanan Ako nagsasabi sa saindo, tuguti na dae na an sakuyang surugoon na si Joseph Smith, ni an sakuyang surugoon na si Sidney, ni an sakuyang surugoon na si Hyrum, magkakautang pa para lang sa pagtutugdok kan sarong harong para sa sakuyang pangaran;
14 Kundi tuguti na an sarong harong maitugdok para sa sakuyang pangaran na uyon sa desinyo na Ako an magpapahiling sa sainda.
15 Asin kun an sakuyang mga katawohan magtutugdok kaini na bakong uyon sa desinyo na Ako an nagpahiling sa saindong panguluhan, Ako dae mag-aako kaini sa saindang mga kamot.
16 Pero kun an sakuyang mga katawohan ginibong pinagtugdok ini na uyon sa desinyo na Ako an nagpahiling sa saindang panguluhan, na iyo ngani sa sakuyang surugoon na si Joseph asin an saiyang mga konsehal, kaya Ako mag-aako kaini sa mga kamot kan sakuyang mga katawohan.
17Asin giraray, katotohanan Ako nagsasabi sa saindo, ini an sakuyang kamawotan na an siyudad nin Far West dapat na ipagtugdok nin hidali sa paagi nin pagtititiripon-tipon kan sakuyang mga banal;
18 Asin man na tanganing an ibang mga lugar dapat na pagngangaranan para sa mga istaka nin mga rehiyon sa palibot, siring na sinda ipinagpamanipesto para sa sakuyang surugoon na si Joseph, magpoon sa kada panahon.
19 Nin huli ta hilnga, Ako magigin kaiba niya, asin Ako an magpapabanal saiya sa atubangan nin mga katawohan; nin huli ta sa saiya Ako an nagtao kan mga susi kaining kahadean asin ministeryo. Arog kaini. Amen.
