SEKSYON 93

Kapahayagan na ipinagtao sa paagi ki Joseph Smith an Propeta, sa Kirtland, Ohio, Mayo 6, 1833. HS 1:343-346.
*******
1-5, Gabos na matapat makakahiling sa Kagurangnan; 6-18, Si John nagpatotoo na an Ake nin Diyos na naglakaw gikan sa grasya sa grasya sagkod na siya nagresibe kan kapanoan nin kamurawayan kan Ama; 19-20, Matapat na mga tawo, na naglalakaw gikan sa grasya sa grasya, makakaresibe man kan saiyang kapanoan; 21-22, Sinda na pinili sa paagi ni Cristo iyo an Simbahan kan Panganay; 23-28, Si Cristo nagresibe nin sarong kapanoan kan bilog na katotoohan, asin an tawo sa paagi nin pagsunod puwedeng gumibo nin kapareho; 29-32, An Tawo sa kapinunan kaiba an Diyos; 33-35, An mga elemento eternal, asin an tawo puwedeng makaresibe nin sarong kapanoan nin kaogmahan sa pagkabuhay-liwat; 36-37, An kamurawayan nin Diyos iyo an katalinuhan; 38-40, An mga kaarakian mga inosente sa atubangan nin Diyos nin huli sa pagtubos ni Cristo; 41-53, An mga namumunong mga katugangan pinagsusugo na ipagpamugtak an saindang pamilya sa kaayusan.
*******
KATOTOHANAN, kaya nagsabi an Kagurangnan: Ini mangyayaring maglilipas na an lambang kalag na binabayaan an saiyang mga kasalan asin magdudulok sa sakuya, asin mag-aapod sa sakuyang pangaran, asin magsusunod sa sakuyang boses, asin magsusunod sa sakuyang mga kasugoan, makakahiling sa sakuyang lalawgon asin makakabisto na Ako ini;
2 Asin na Ako an tunay na liwanag na nagbabanaag sa lambang tawo na nagpapasiring sa kinaban;
3 Asin na Ako yaon sa Ama, asin an Ama yaon sakuya, asin an Ama asin Ako kasaro---
4 An Ama nin huli ta siya an nagtao sakuya kan saiyang kapanoan, asin an Ake nin huli ta Ako kaidto yaon sa kinaban asin hinimo an laman na sakuyang tabernakulo, asin nag-erok sa pag-iriba kan mga ake nin mga tawo.
5 Ako kaidto yaon sa kinaban asin nagresibe sa sakuyang Ama, asin an mga gibo niya malinaw na ipinagpahiling.
6 Asin si John nakahiling asin nagpatotoo sa kapanoan nin sakuyang kamurawayan, asin an kapanoan kan mga record ni John magpoon ngonyan maipagpapahayag na.
7 Asin siya nagpatotoo, na nagsasabi: Ako nakahiling kan saiyang kamurawayan, na siya kaidto sa kapinunan, bago pa an kinaban nagin iyo ini;
8 Kun kaya, sa kapinunan an Tataramon dati, nin huli ta siya iyo an Tataramon, na iyo ngani an mensahero nin kaligtasan---
9 An liwanag asin Paratubos kan kinaban; an Espiritu nin katotoohan, na iyo an nagpasiring sa kinaban, nin huli ta an kinaban pinaghimo sa paagi niya, asin yaon saiya iyo an buhay nin mga tawo asin an liwanag nin mga tawo.
10 Asin an mga kinaban pinaghimo sa paagi niya; an mga tawo pinaghimo sa paagi niya; an gabos na mga bagay pinaghimo sa paagi niya; asin sa paagi niya, asin sana saiya.
11 Asin ako, si John, nagpapatotoo na ako nakahiling kan saiyang kamurawayan, siring sa kamurawayan kan Solong Pinili nin Ama, pano nin grasya asin katotoohan, na iyo ngani an Espiritu nin katotoohan, na nag-abot asin nag-erok sa laman, asin nag-erok sa pag-iriba nyato.
12 Asin ako, si John, nakahiling na siya dae nagresibe nin kapanoan kan enot, kundi nagresibe grasya sa grasya;
13 Asin siya dae nagresibe kan kapanoan sa enot; kundi nagpadagos gikan sa grasya sa grasya, sagkod na siya nagresibe nin sarong kapanoan;
14 Asin kaya siya pinag-apod na Ake nin Diyos, nin huli ta siya dae nagresibe nin kapanoan kan enot.
15 Asin ako, si John, nagpapatotoo, asin uya, an mga langit nabuksan, asin an Banal na Espiritu naghilig sa saiya sa porma nin sarong kalapati, asin nagtugdon sa saiya, asin nagkaigwa nin sarong boses na naggikan sa langit na nagsasabi: Ini an sakuyang namumutan na Ake.
16 Asin ako, si John, nagpapatotoo na siya nagresibe nin sarong kapanoan nin kamurawayan kan Ama;
17 Asin siya nagresibe nin bilog na kapangyarihan, pareho sa langit asin sa kinaban, asin an kamurawayan kan Ama yaon sa saiya, nin huli ta siya nag-eerok sa saiya.
18 Asin ini mangyayaring maglilipas, na kun kamo matapat kamo makakaresibe nin kapanoan sa rekord ni John.
19 Ako nagtao sa saindo kaining mga tataramon na tanganing kamo makakasabot asin makanuod kun paano magsamba, asin makaaram kun ano an saindong pinagsasamba, na kamo magdudulok sa Ama sa sakuyang pangaran, asin sa tinakdang panahon magreresibe kan saiyang kapanoan.
20 Nin huli ta kun kamo magsusunod sa sakuyang mga kasugoan kamo makakaresibe kan saiyang kapanoan, asin maipagpamuraway sa sakuya siring na Ako yaon sa Ama; kun kaya, Ako nagsasabi sa saindo, kamo makakaresibe nin grasya sa grasya.
21 Asin ngonyan, katotohanan Ako nagsasabi sa saindo, Ako sa kapinunan kaiba an Ama, asin Ako an Panganay;
22 Asin an gabos sinda na pinili sa paagi ko mga kaparte nin kaparehong kamurawayan, asin iyo an simbahan kan Panganay.
23 Kamo man sa kapinunan kaiba nin Ama; na iyan iyo an Espiritu, na iyo ngani an Espiritu nin katotoohan;
24 Asin an katotoohan iyo an kaaraman nin mga bagay siring na sinda iyong gayo, asin siring na sinda iyong gayo dati, asin siring na sinda iyong gayo sa maabot;
25 Asin an anuman na sobra o kulang kesa kaini iyo an espiritu kan marigsok na saro na iyo an sarong putikon gikan pa sa kapinunan.
26 An Espiritu nin katotoohan iyo an sa Diyos. Ako an Espiritu nin Katotoohan, asin si John nagpapatotoo sakuya, na nagsasabi: Siya nagresibe nin sarong kapanoan nin katotoohan, iyo, na iyo ngani an bilog na katotoohan;
27 Asin mayong tawo an makakaresibe nin sarong kapanoan laen lang kun siya nagsusunod kan sakuyang mga kasugoan.
28 Siya na nagsusunod kan sakuyang mga kasugoan magreresibe nin katotoohan asin liwanag, sagkod na siya pinagpamuraway na sa katotoohan asin makakasabot na kan gabos na mga bagay.
29 An tawo man sa kapinunan kaiba an Diyos. Katalinuhan, o an liwanag nin katotoohan, dae pinaglalang o pinaghimo, ni ining gayo baya mangyayari.
30 An bilog na katotoohan independente sa kamugtakang iyan na an Diyos iyo an nagpamugtak kaini, na gumibo para sa sadire niya, siring na an bilog na katalinuhan man; ta kun bako mayo nin pagkabuhay.
31 Hilnga, uya an kalayaan nin tawo, asin uya an kondenasyon nin tawo; nin huli ta idto na yaon sa kapinunan iyo an mahinusay na ipagpapahiling sa sainda, asin sinda dae nagresibe nin liwanag.
32 Asin an lambang tawo na an saiyang espiritu dae nagresibe nin liwanag yaon na sa irarom nin kondenasyon.
33 Nin huli ta an tawo espiritu. An mga elemento eternal, asin an espiritu asin elemento, bakong suhay na konektado, makaresibe nin sarong kapanoan nin kaogmahan;
34 Asin kunsoarin pinagsuhay, an tawo dae makakaresibe nin sarong kapanoan nin kaogmahan.
35 An mga elemento iyo an tabernakulo nin Diyos; iyo, an tawo iyo an tabernakulo nin Diyos, iyo ngani an mga templo; asin an arinman na templo an pinag-aatian, an Diyos pagdedestrosohon an templong iyan.
36 An kamurawayan nin Diyos iyo an katalinuhan, o baya, sa ibang mga tataramon, an liwanag asin katotoohan.
37 An liwanag asin katotoohan pinagbabayaan an sarong maraot.
38 An lambang espiritu nin tawo inosente sa kapinunan; asin an Diyos na iyo nakapagtubos sa tawo gikan sa pagkahulog, an tawo nagin giraray, yaon sa saindang pagka-akeng estado, sarong inosente sa atubangan nin Diyos.
39 Asin idtong marigsok na saro minadulok asin pinag-aagaw an liwanag asin katotoohan, sa paagi nin pagsinutil, gikan sa mga kaarakian nin mga tawo, asin nin huli sa tradisyon kan saindang mga ama.
40 Pero Ako an nagsusugo sa saindo na darahon paitaas an saindong mga kaarakian sa liwanag asin katotoohan.
41 Pero katotohanan Ako nagsasabi sa saimo, sakuyang surugoon na Frederick G. Williams, na ika nagpapadagos na yaon sa irarom kaining kondenasyon;
42 Ika dae nakapagtukdo sa saimong mga kaarakian nin liwanag asin katotoohan, na uyon sa mga kasugoan; asin idtong marigsok na saro igwang kapangyarihan, siring ngonyan, na nangingibabaw saimo, asin iyo ini an kausa nin saimong kasakitan.
43 Asin ngonyan sarong kasugoan Ako minatao sa saimo--- kun ika makakaligtas ika an maghuhusay kan saimong sadireng harong, nin huli ta igwa nin kadakul na mga bagay na bakong tama sa laog kan saimong harong.
44 Katotohanan, Ako nagsasabi sa sakuyang surugoon na si Sidney Rigdon, na sa ibang mga bagay siya dae pa nakakapagsunod sa mga kasugoan mapanungod sa saiyang mga kaarakian; kun kaya, enot husayon mo an saimong harong.
45 Katotohanan, Ako nagsasabi sa sakuyang surugoon na si Josepth Smith, Jun., o sa ibang tataramon, Ako mag-aapod saindo na mga amigo, nin huli ta kamo an sakuyang mga amigo, asin kamo magkakaigwa nin sarong kamanahan sa kaiba ko---
46 Ako mag-aapod saindo na mga surugoon nin huli sa kapakanan kan kinaban, asin kamo an saindang mga surugoon nin huli sa kapakanan ko---
47 Asin ngonyan, katotohanan Ako nagsasabi sa ki Joseph Smith, Jun.,--- Ika dae nakapagsunod sa mga kasugoan, asin kaipuhan na magtitindog na pinag-aanggutan sa atubangan nin Kagurangnan;
48 An saimong pamilya kinakaipuhanan na magsosolsol asin pagbayaan an ibang mga bagay, asin magtao nin maigot na paghinanyog sa saimong mga pinagsasabi, o baya ika paghahaleon paluwas sa saindang lugar.
49 Kun ano baya na Ako an nagsasabi sa saro Ako nagsasabi sa gabos; magpangadye pirme ta baka an marigsok na saro magkaigwa nin kapangyarihan saimo, asin iyo an maghahale saimo paluwas sa saimong lugar.
50 an sakuyang surugoon na si Newel K. Whitney man, sarong bishop kan sakuyang simbahan, pinagkaipo na pagpapakulon, asin husayon an saiyang pamilya, asin hilingon na sinda mas maigoton pa asin maalaga sa harong, asin magpangadye pirme, o baya sinda paghahaleon paluwas sa saindang lugar.
51 Ngonyan, Ako nagsasabi sa saindo, sakuyang mga amigo, tugutan an sakuyang surugoon na si Sidney Rigdon magpadagos kan saiyang pagbiyahe, asin himoon na hidali, asin man ipagproklama an akseptadong taon nin Kagurangnan, asin kan ebanghelyo nin kaligtasan, siring na Ako an magtatao saiya nin mga pagtataramon; asin sa paagi kan saindong pangadyeon nin pagtubod nin may pagkasararong pagtugot Ako an magpapakusog saiya.
52 Asin tugutan an sakuyang mga surugoon na si Joseph Smith, Jun., asin Frederick G. Williams, himoon na maghidali man, asin ini ipagtatao sainda ngani uyon sa pangadyeon nin pagtubod; asin habang kamo magsusunod sa sakuyang mga pinagsasabi kamo dae pagriribongan sa kinaban na ini, ni sa kinaban na maabot.
53 Asin, katotohanan Ako nagsasabi sa saindo, na ini an sakuyang kagustuhan na saimong dapat na paghidalion an pagsalin kan sakuyang mga kasuratan, asin magkaigwa nin kaaraman sa historiya, asin kan mga nasyon, asin kan mga kahadean, kan mga batas nin Diyos asin tawo, asin gabos ini para sa kaligtasan kan Sion. Amen.

SEKSYON 92

Kapahayagan na ipinagtao ki Joseph Smith an Propeta, sa Kirtland, Ohio, Marso 15, 1833. HS 1:333. An kapahayagan ipinapanungod para ki Frederick G. Williams, na dae pa nahaloy na pinagnombraran bilang tagapayo sa Enot na Panguluhan.
*******
1-2, Sarong kasugoan na kaakid sa pag-ako kan Orden nin Pagkasararo.
*******
KATOTOHANAN, kaya nagsabi an Kagurangnan, Ako nagtao sa Orden nin Pagkasararo, pinag-oorganisa na kauyon-uyon sa kasugoan sa dati nang pinagtao, sarong kapahayagan asin kasugoan mapanungod sa sakuyang surugoon na si Frederick G. Williams, na saimong pagreresibihon siya palaog sa orden na ini. Kun ano Ako an nagsasabi sa saro Ako man nagsasabi sa gabos.
2 Asin giraray, Ako nagsasabi sa saimo sakuyang surugoon na Frederick G. Williams, ika magigin sarong aktibong miyembro kaining ordern; asin habang ika matapat sa pagsusunod kan gabos na naenot na mga kasugoan ika pagbebendisyunan sagkod pa man. Amen.

SEKSYON 91

Kapahayagan na ipinagtao sa paagi ki Joseph Smith an Propeta, sa Kirtland, Ohio, Marso 9, 1833. HS 1:331-332. An Propeta sa panahon na ini nagsasalin kan Lumang Tipan. Kan makaabot sa porsiyon kan suanoy na mga panurat na pinag-apod na Apokripa, siya naghapot sa Kagurangnan asin naresibe kaining instruksiyon.
*******
1-3, An Apokripa haros pinagsalin na tama pero igwa nin kadakul na interpolasyon sa paagi nin mga kamot kan mga tawo na bako man totoo; 4-6, Ini nakakatabang sainda na malilinawan sa paagi kan Espiritu.
*******
KATOTOHANAN, kaya nagsabi an Kagurangnan sa saindo mapanungod sa Apokripa---Igwa nin kadakulon na mga bagay na nakapalaman kaini na totoo, asin ini haros pinagsalin sa tama;
2 Igwa nin kadakulon na mga bagay na nakapalaman kaini na bakong totoo, na mga interpolasyon sana sa paagi nin mga kamot kan mga tawo.
3 Katotohanan, Ako nagsasabi sa saindo, na ini bakong kinakaipuhanan na an Apokripa dapat na ipagsalin.
4 Kun kaya, an siisay na magbabasa kaini, tugutan siyang makasabot, nin huli ta an Espiritu an nagpapatunay sa katotoohan;
5 Asin an siisay man na naliliwanagan sa paagi nin Espiritu makakapagguno nin kapakinabangan gikan kaini;
6 Asin an siisay man na dae makakaresibe sa paagi kan Espiritu, dae makakapagpakinabang. Kun kaya ini bakong kinakaipuhanan na dapat na ipagsalin pa. Amen.

SEKSYON 90

Kapahayagan ki Joseph Smith an Propeta, na ipinagtao sa Kirtland, Ohio, Marso 8, 1833. HS 1:329-331. Ining kapahayagan iyo an sarong kadagusang talangga sa pag-establisa kan Enot na Panguluhan (hilngon an pamayuhan kan Seksyon 81), asin bilang sarong konsekuwensiya kaini an mga tagapayo na pinagsambit inordinahan kan Marso 8, 1833.
*******
1-5, Mga susi nin kahadean pinagkomiter ki Joseph Smith asin sa paagi niya para sa Simbahan; 6-7, Sidney Rigdon asin Frederick G. Williams magsisirbe sa Enot na Panguluhan; 8-11, An ebanghelyo ipagbabalangibog sa mga nasyon nin Israel, sa mga Hentil, asin sa mga Hudiyo, lambang tawo makakadangog sa saiyang sadireng dila; 12-18, Joseph Smith asin an saiyang mga tagapayo ipagpapamugtak sa kahusayan an Simbahan; 19-37, Kadakul na mga indibidwal pinagpayuhan nin Kagurangnan na maglakaw sa katanosan asin magsirbe sa saiyang kahadean.
*******
KAYA nagsabi an Kagurangnan, katotohanan, katotohanan, Ako nagsasabi sa saimo ake ko, na an saimong mga kasalan pinatawad na saimo, uyon sa saimong pinaghahagad, nin huli ta an saimong mga pangadyeon asin an mga pangadyeon kan saimong mga katugangan nakaabot na sa sakuyang mga talenga.
2 Kun kaya, ika pinagbebendisyunan magpoon ngonyan na iyo an magkakapot kan mga susi nin kahadean na ipinagtao sa saimo; na an kahadean paabuton pa sana para sa huring panahon.
3 Katotohanan Ako nagsasabi sa saimo, an mga susi kaining kahadean dae na nanggad pagkukuahon gikan saimo, habang ika yaon pa sa kinaban, ni sa kinaban na maabot;
4 Daeng pagkukulang, sa paagi mo an mga orakulo ipagtatao sa iba pa, iyo, magin pa sa simbahan.
5 Asin gabos sinda na nakaresibe kan mga orakulo nin Diyos, tugutan sindang mag-ingat kun paanuhon ninda pagkakaputan an mga ini na baka saindang paghuhunaon ini bilang magian na bagay, asin pagdadarahon baya na yaon sa irarom nin kondenasyon, asin balikukuan asin matumba kunsoarin an mga bagyo mag-arabot asin an paros maghuhuyop, asin an mga uran magtutururo, asin maghahampak sa saindang harong.
6 Asin giraray, katotohanan ako nagsasabi sa saindo sakuyang mga katugangan, Sidney Rigdon asin Frederick G. Williams, an saindang mga kasalan pinatawad na sa sainda man, asin sinda pagbibilangon na kapantay saimo sa pagkapot nin mga susi kaining huring kahadean;
7 Bilang man sa paagi kan saimong administrasyon an susi kan eskuwelahan kan mga propeta, na ako an nagsugo na pag-organisaron;
8 Na tangani baya sinda mapupuwedeng magin perpekto sa saindang ministeryo para sa kaligtasan nin Sion; asin kan mga nasyon nin Israel, asin kan mga Hentil, habang kadakul an maniniwala;
9 Na sa paagi kan saimong administrasyon sainda mapuwedeng maresibe an tataramon, asin sa paagi kan saindang administrasyon an tataramon magpapaduman sa mga katapusan kan kinaban, mapasiring sa mga Hentil enot, asin pagkasunod, hilnga, asin uya, sinda makakabaralik pasiring sa mga Hudiyo.
10 Asin pagkasunod maabot an aldaw kunsoarin an takyag nin Kagurangnan ipagpapahayag na may kapangyarihan sa pagkukumbinsi nin mga nasyon, sa paganong mga nasyon, sa harong ni Joseph, sa ebanghelyo kan saindang kaligtasan.
11 Nin huli ta ini mangyayaring maglipas na sa aldaw na iyan, na an lambang tawo makakadangog kan kabilugan nin ebanghelyo sa saiyang sadireng dila, asin sa saiyang sadireng lengguwahe, sa paagi ninda na pinag-ordinahan kaining kapangyarihan, sa paagi kan administrasyon nin Tagapaglinga, na ipinaglindong sa sainda para sa kapahayagan ni JesuCristo.
12 Asin ngonyan, katotohanan Ako magsasabi sa saindo, ako magtatao sa saindo nin sarong kasugoan na kamo magpadagos sa ministeryo asin sa panguluhan.
13 Asin kunsoarin mo matapos an pagsalin sa mga propeta, saimong pagpupun-an tulos an magpamahala kan mga bagay nin simbahan asin nin eskuwelahan;
14 Asin sa pana-panahon, uyon sa ipaghahayag kan Tagapaglinga, magreresibe nin mga paghahayag tanganing bukasan an mga misteryo nin kahadean;
15 Asin ipamugtak sa tama an mga simbahan, asin pag-adalan asin makanuod, asin magin bihasa sa gabos na marahayon na mga libro, asin mga lengguwahe, mga dila, asin mga katawohan.
16 Asin iyo ini an saimong mga gibohon asin misyon sa bilog mong buhay, na magpamayo sa konseho, asin ipagpamugtak sa tama an bilog na mga trabaho kaining simbahan asin kahadean.
17 Dae ka masupog, ni maribongan; kundi mapaggiromdoman sa gabos na saindang kalangkawan nin isip asin kapaabaw-abawan, nin huli ta ini an magdadara nin sarong lit-ag sa saindong mga kalag.
18 Ipagpamugtak sa tama an saindong mga harong; likayan an kahugakan asin kaatian na harayo sa saindo.
19 Ngonyan, katotohanan Ako nagsasabi sa saindo, tugutan na magkaigwa nin sarong lugar, habang ini possible pa, para sa pamilya kan saimong mga tagapayo asin parasurat, na iyo si Frederick G. Williams.
20 Asin tugutan na an sakuyang nag-eedad nang surugoon, na si Joseph Smith, Sen., magpapadagos kaiba an saiyang pamilya sa lugar na kun saen siya ngonyan namumuhay; asin tugutan na ini dae ipagpapabakal sagkod na an nguso nin Kagurangnan iyo an magsasabi.
21 Asin tugutan na an sakuyang tagapayo, na si Sidney Rigdon, magdanay nguna sa lugar na kun saen siya ngonyan nag-eerok sagkod na ang nguso nin Kagurangnan iyo an magsasabi.
22 Asin tugutan na an bishop maghanap nin maigot tanganing magkaigwa nin sarong ahente, asin tugutan siya na magin sarong tawo na may kayamanan na nakatago--- sarong tawo nin Diyos, asin may makusog na pagtubod---
23 Na tangani baya siya mapupuwedeng makayanan na makapagbayad nin lambang kautangan; na tanganing an kamalig nin Kagurangnan dae madara sa pagkaraot sa atubangan kan mga mata nin mga katawohan.
24 Maghanap nin maigot, magpangadye pirme, asin magin matinubudon, asin an gabos na mga bagay mangyayaring bilog para sa saindong karahayan, kun kamo maglalakaw nin matanos asin giromdomon an tipan kun saen baya kamo nakipagtipan sa lambang saro.
25 Tugutan na an saindong mga pamilya magin sadit sana, lalo na sa sakuyang nagkaka-edad nang surugoon na si Joseph Smith, Sen., siring man ipinanungod man sa sainda na dae kaayon sa saindong mga pamilya;
26 Na idtong mg bagay na ipinagtao para saindo, na darahong mangyayari an sakuyang trabaho, na dae paghaleon gikan saindo asin ipagtatao sa sainda na bakong maninigo---
27 Asin mangyari na ika mapugulan sa paghimo kaidtong mga bagay na Ako an nagsugo saimo.
28 Asin giraray, katotohanan Ako nagsasabi sa saindo, ini an sakuyang kagustuhan na an sakuyang surugoong babae na si Vienna Jaques dapat na makaresibe nin kuwarta tanganing saiyang gastuson, asin magpasiring sa kadagaan nin Sion;
29 Asin an tada kan kuwarta mapuwedeng ipagkonsagra sa sakuya, asin siya pagbibiyayaan sa sakuyang sadireng nakatalaan na panahon.
30 Katotohanan Ako nagsasabi sa saindo, na ini tama sa sakuyang mga mata na siya magpasiring sa kadagaan nin Sion, asin magresibe nin kamanahan gikan sa kamot nin bishop;
31 Na tangani baya siya magpahingalo sa katuninongan habang baga siya sarong matapat, asin dae baya mapabayaan sa saiyang mga aldaw magpoon ngonyan.
32 Asin hilnga, katotohanan Ako nagsasabi sa saindo, na saimong ipagsurat ining kasugoan, asin sabihon sa saindong mga katugangan sa Sion, sa mamumut-on na pakikipagbati, na Ako an nag-apod saimo man tanganing magpamahala sa Sion sa sakuyang sadireng nakatalaan na panahon.
33 Kun baya, tugutan sinda na mag-untok sa kahaditan sako mapanungod kaining bagay.
34 Hilnga, Ako nagsasabi sa saindo na an saindong mga katugangan na yaon sa Sion magpoon na sa pagsosolsol, asin an mga anghel nagkaka-orogma sa sainda.
35 Daeng pagkukulang, Ako daeng gayo nag-oogma sa kadakul na mga bagay; asin Ako daeng gayo nag-oogma sa sakuyang surugoon na si William E. McLellin, ni sa sakuyang surugoon na si Sidney Gilbert; asin sa bishop man, asin sa iba na igwang kadakul na bagay na pagsosolsolan pa.
36 Pero katotohanan Ako nagsasabi sa saindo, na Ako, an Kagurangnan, makikibakukilan laban sa Sion, asin makikiolay sa saiyang makukusog na iribahan, asin pagpakulon siya sagkod na siya magsuko asin malinigon sa atubangan ko.
37 Nin huli ta siya dae paghahaleon paluwas sa saiyang lugar. Ako, an Kagurangnan, nakapagtaram na kaini. Amen.

SEKSYON 89

Kapahayagan na ipinagtao sa paagi ki Joseph Smith an Propeta, sa Kirtland, Ohio, Pebrero 27, 1833. HS 1:327-329. Bilang sarong konsekuwensiya sa mga katugangan na dati nang naghihithit nin tabako sa saindang mga miting, an Propeta naggiyahan na paghorop-horopan an mga bagay na ini; kasunod an siya naghapot sa Kagurangnan mapanungod kaini. Ining Kapahayagan, nabantog bilang an Tataramon nin Kadunungan, na iyo an resulta. An enot na tulong bersikulo orihinal na pinagsurat bilang inspiradong introduksiyon asin deskripsiyon kan Propeta.
*******
1-9, An paggamit nin arak, maisog na mga inomon, tabako, asin mainit na mga inomon an mga pinagbawal; 10-17, mga herbo, mga prutas, karne, asin mga pingos pinag-ordina para gamiton nin tawo asin mga hayop; 18-21, Pagsunod sa batas kan ebanghelyo, kaiba na an Tataramon nin Kadunungan, nagdadara nin temporal asin espirituwal na mga bendisyon.
*******
Sarong Tataramon nin Kadunungan, para sa benepisyo kan konseho nin Halangkaw na mga pade, na pinag-asembliya sa Kirtland, asin kan simbahan, asin man nin mga banal nin Sion---
2 Ipagpapadarang pakipagbati; bako sa paagi nin kasugoan o pangaipuhan, kundi bilang Kapahayagan asin tataramon nin kadunungan, na nagpapahiling na gayo nin orden asin kagustuhan nin Diyos sa temporal na kaligtasan kan gabos na mga banal sa mga huring aldaw---
3 Ipinagtao bilang sarong prinsipyo na igwang kapangakoan, pinagsayod para sa kapasidad kan maluluya asin kan pinakamaluluya nin gabos na mga banal, na iyo ngani o pag-aapudon na mga banal.
4 Hilnga, katotohanan, kaya nagsabi an Kagurangnan sa sainda: Sa konsekuwensiya nin mga mararaot asin mga desinyo na yaon asin mananagboan sa mga puso kan komplotan nin mga tawo sa mga huring aldaw, Ako nagpapatanid na saindo, asin pangenot na nagpapatanid na saindo, sa paagi nin pagtatao sa saindo kaining tataramon nin kadunungan sa paagi nin kapahayagan---
5 Na habang gayo na an siisay na tawo nag-iinom nin arak o maisog na inomon sa pag-iriba nindo, hilnga ini bakong marahayon, ni maninigo sa paghiling kan saindong Ama, kundi sana sa pagtitiripon-tipon kan saindong mga sadire na magkakasararo sa pagdudulot kan saindong mga sakramento sa atubangan niya.
6 Asin, hilnga, ini dapat na arak, iyo, purong arak nin ubas kan ubasan, na saindong pinaghimo mismo.
7 Asin, giraray, an maisog na mga inomon bako para sa tulak, kundi para sa paghuhugas kan saindong mga hawak.
8 Asin giraray, an tabako bako para sa hawak, ni para sa tulak, asin ini bakong marahayon para sa tawo, kundi ini bilang herbo para sa mga lugad asin gabos na may kamateang mga baka, na paggagamiton na igwang paghuhukom asin kakayanan.
9 Asin giraray, mainit na mga inomon bako para sa hawak o tulak.
10 Asin giraray, katotohanan Ako nagsasabi sa saindo, gabos na marahayong mga herbo na an Diyos an nag-ordina para sa konstitusyon, natura, asin paggamit nin tawo---
11 Lambang herbo sa panahon kaining gayo, asin lambang prutas sa panahon kaining gayo; gabos kaini paggagamiton na igwang pag-iingat asin pagpapasalamat.
12 Iyo, an karne man kan mga hayop asin kan mga gamgam nin langit, Ako, an Kagurangnan, an nag-ordina para sa paggamit nin tawo na igwang pagpapasalamat; daeng pagkukulang sinda paggagamiton paminsan-minsan lang;
13 Asin ini nakakaogma sa sakuya na sinda dae nguna dapat na paggamiton, kundi sa panahon sana nin taglipot, o malipoton, o taggutom.
14 Gabos na pingos pinag-ordina para sa paggamit nin tawo asin kan mga hayop, na magin kaantabay nin buhay, bako sana para sa tawo kundi para sa mga hayop nin umahan, asin kan mga gamgam nin langit, asin kan gabos na layas na mga hayop na nagdadalagan o nagakakama sa daga;
15 Asin iyo an mga ini na an Diyos an naghimo para sa paggamit nin tawo sana sa mga panahon nin taggutom asin sa sobrang kagutuman.
16 Gabos na pingos marahay para sa kakanon nin tawo; asin man an prutas nin ubasan; idtong nagbubunga nin prutas, maski baya sa daga o itaas nin daga---
17 Daeng pagkukulang, an trigo para sa tawo, asin an mais para sa baka, asin an mga pinigpig para sa kabayo, asin an riya para sa mga gamgam asin para sa urig, asin para sa gabos na mga hayop kan umahan, asin an dagami para sa gabos na napapakinabangan na mga hayop, asin para sa katamtaman na mga pag-inom, siring man an ibang pingos.
18 Asin an gabos na mga banal na nakagiromdom na magsunod asin gibohon ining mga pinagsasabi, naglalakaw sa pagsunod sa mga kasugoan, makakaresibe nin kusog sa saindang mga pusod asin hutok sa saindang mga tul-ang;
19 Asin makakanagbo nin kadunungan asin kadakulon na mga kayamanan nin kaaraman, magin nin mga tagong kayamanan;
20 Asin makakadalagan asin dae mapapagal, asin maglalakaw asin dae manluluya.
21 Asin Ako, an Kagurangnan, matao sa sainda nin sarong promise, na an nagdedestrosong anghel paglalamapasan sinda, bilang kaarakian nin Israel, asin dae paggagadanon sinda. Amen.

SEKSYON 88

Kapahayagan na ipinagtao sa paagi ki Joseph Smith an Propeta sa Kirtland, Ohio, Disyembre 27, 1832.  HS 1:302-312.  Ini pinagdesignaran kan Propeta bilang “dahon nin Olibo…pinagpigtas gikan sa Kahoy nin Paraiso, an mensahe nin katuninongan gikan sa Kagurangnan para satuya.”  Ini ipinagpahiling gikan sa historikong mga record na an mga parte kaining kapahayagan naresibe kan Disyembre 27 asin 28, 1832, asin Enero 3, 1833.

*******

1-5, Mga matapat na mga banal nagresibe kaining Tagapaglinga na iyo an promise nin eternal na buhay; 6-13, An gabos na mga bagay kontrolado asin pinapamahalaan sa paagi kan liwanag ni Cristo; 14-16, An pagkabuhay-liwat minaabot sa paagi kan pagtubos; 17-31, An pagsunod sa selestiyal, terestriyal, o telestiyal na ley nag-aandam sa mga tawo para kaining respektibong mga kahadean asin kamurawayan; 32-35, Sinda na nagpapadagos sa kasalan matatadang maation sa giraray; 36-41, An gabos na kahadean pinagpapamahalaan sa paagi nin ley; 42-45, An Diyos nagtao nin sarong leys a gabos na mga bagay; 46-50, An tawo makakasabot siring sa Diyos; 51-61, An parabola nin sarong tawo na ipinagpadara an saiyang mga surugoon pasiring sa umahan asin pinagbisita sinda duman; 62-73, Magdulok harani sa Kagurangnan, asin saindong mahihiling an saiyang lalawgon; 74-80, Pakabanalon an saindong mga sadire asin magtinurotukdoan an lambang saro kan doktrina nin kahadean;  81-85, An lambang tawo na pinagpatanidan dapat na magpatanid man kan saiyang kataid; 86-94, Mga senyales, mga yugto kan mga element, asin mga anghel nag-aandam kan dalan para sa pag-abot nin Kagurangnan; 95-102, Mga pan-anghel na mga trumpeta pinag-apudan an mga gadan sa saindang pasurunod-sunod; 103-116, Mga pan-anghel an trumpeta nagproklama kan restorasyon nin ebanghelyo, an pagkarumpag kan Babilonya, asin an giyera kan dakulang Diyos; 117-126, Maghanap nin kaaraman, establisaron an harong nin Diyos [sarong templo], asin badoan an saindong mga sadire na may hagkos nin karidad; 127-141, An orden kan eskuwelahan nin mga propeta pinagpamugtak, kabali na ordinansa nin paghuhugas kan mga bitis.

*******

KATOTOHANAN, kaya nagsabi an Kagurangnan sa saindo na pinag-asembliya an saindong mga sadire na magkasararo tanganing magresibe kan saiyang kagustuhan mapanungod saindo:

2 Hilnga, ini magayagaya sa saindong Kagurangnan, asin an mga anghel nag-oogma sa saindo; an limos kan saindong mga pangadyeon nakaabot na sa mga talenga nin Kagurangnan nin Sabaoth, asin pinagrekord sa libro nin mga pangaran kan mga pinabanal, ngani sainda na yaon sa selestiyal na kinaban.

3 Kumbaga, Ako ngonyan magpapadara sa saindo nin saro pang Tagapaglinga, ngani sa saindo na sakuyang mga amigo, na tangani ini mag-eerok sa saindong mga puso, baya iyo an Banal na Espiritu nin promisa; na an ibang Tagapaglinga iyo an kapareho kan Ako nagpromisa sa sakuyang mga desipulos, siring na ini nakarekord sa testimonya ni John.

4 Ining Tagapaglinga iyo an promise na Ako an nagtao sa saindo nin eternal na buhay, na iyo baya ang kamurawayan nin selestiyal na kahadean;

5 Na an kamurawayang ini yaon sa simbahan kan Panganay, na yaon sa Diyos, an pinakabanal sa gabos, sa paagi ki JesuCristo na saiyang Ake---

6 Siya na nagsakat sa itaas, siring man na siya nagbaba sa kababaan kan gabos na mga bagay, ta siya an nakakasabot kan gabos na mga bagay, na tanganing siya puwedeng yaon sa gabos asin sa paagi kan gabos na mga bagay, na iyo ngani an liwanag nin katotoohan;

7 Na an katotoohang ini nagsisirang.  Iyo ini an liwanag ni Cristo.  Siring man na Siya yaon sa saldang, asin an ilaw nin saldang, asin iyo an kapangyarihan kaini sa paagi na ini pinaghimo.

8 Siring man na Siya yaon sa bulan, asin iyo an ilaw nin bulan, asin iyo an kapangyarihan kaini sa paagi na ini pinaghimo;

9 Siring man sa liwanag kan mga bitoon, asin an kapangyarihan kaini sa paagi na sinda pinaghimo;

10 Asin an kinaban man, asin an kapangyarihan kaini, na iyo ngani an kinaban na kun saen ika nagtitindog.

11 Asin an liwanag na nagsisirang, na nagtatao saindo nin liwanag, iyo na sa paagi niya na nagpapaliwanag kan saindong mga mata, na iyo man sanang liwanag na nagpapahidali kan saindong mga pagkakasabot;

12 Na an liwanag nagpapadagos magluwas gikan sa presensiya kan Diyos na tanganing magpapano sa kahiwasan kan espasyo---

13 An liwanag na yaon sa gabos na mga bagay, na nagtatao nin buhay sa gabos na mga bagay, na yaon sa ley na kun saen an gabos na mga bagay pinapamahalaan, ngani baya an kapangyarihan nin Diyos na nagtutukaw sa saiyang trono, na yaon sa laog nin daghan kan eternidad, na yaon sa katahawan kan gabos na mga bagay.

14 Ngonyan, katotohanan Ako nagsasabi sa saindo,  na sa paagi nin pagtutubos na pinaghimo para saindo pinagdarang maglipas an pagkabuhay-liwat gikan sa kagadanan.

15 Asin an espiritu asin an hawak iyo an kalag nin tawo.

16 Asin an pagkabuhay-liwat gikan sa kagadanan iyo an pagtutubos nin kalag.

17 Asin an pagtutubos nin kalag iyo sa paagi niya na nagpapahidali sa gabos na mga bagay; na sa laog kan saiyang daghan ini pinagdekrito na an pobre asin an mga mahuyo kan kinaban magmamana kaini.

18 Kun kaya, ini kinakaipuhang gayo na pakabanalon gikan sa gabos na bakong katanosan, na ini mapuwedeng prepararon para sa selestiyal na kamurawayan;

19 Nin huli ta pagkatapos ini nagpano kan sukol kaining paglalang, ini dapat na pagkokoronahan nin kamurawayan, nganing baya kaiba an presensiya nin Diyos an Ama;

20 Na tanganing an mga hawak na yaon sa selestiyal na kahadean mapuwedeng pangaputan ini sagkod sa daeng katapusan; nin huli ta, para sa katuyuhang ini pinaghimo ini asin pinaglalang, asin para sa katuyuhang ini sinda pinabanal.

21 Asin sinda na dae pinabanal sa paagi kan ley na Ako an nagtao sa saindo, nganing iyo baya an ley ni Cristo, kaipong magmamana nin ibang kahadean, nganing iyo baya an sarong terestriyal na kahadean, o iyang sarong telestiyal na kahadean.

22 Nin huli ta siya na dae makapagsunod sa ley kan sarong selestiyal na kahadean dae makakapamuhay sa selestiyal na kamurawayan.

23 Asin siya na dae makapagsunod sa ley kan sarong terestriyal na kahadean dae makakapamuhay sa sarong terestriyal na kamurawayan.

24 Asin siya na dae makapagsunod sa ley kan sarong telestiyal na kahadean dae makakapamuhay sa sarong telestiyal na kamurawayan; kun kaya siya dae maninigo para sa sarong kahadean nin kamurawayan.  Kun kaya siya dapat na mamumuhay sa sarong kahadean na bakong sarong kahadean nin kamurawayan.

25 Asin giraray, katotohanan Ako nagsasabi sa saindo, an kinaban nagsusunod sa ley kan sarong selestiyal na kahadean, nin huli ta ini nagpapano nin sukol kan saiyang paglalang, asin dae naglalapas sa ley---

26 Kumbaya, ini kaipong pakabanalon; iyo, maski na ngani na ini magagadan, ini pagpapakusugon giraray, asin magsusunod sa kapangyarihan na kun saen ini pinagpapakusog, asin an matatanos an magmamana kaini.

27 Nin huli ta maski na ngani na sinda magagadan, sinda man magbubuhat giraray, sa sarong espirituwal na hawak.

28 Sinda na sarong selestiyal na espiritu magreresibe nin kaparehong hawak na sarong natural na hawak; ngani baya kamo magreresibe kan saindong mga hawak, asin an saindong kamurawayan magigin iyo an kamurawayan na kun saen an saindong mga hawak pinagpapakusog.

29 Kamo na pinagpakusog sa paagi nin sarong porsiyon kan selestiyal na kamurawayan magreresibe man kaiyan, magin iyo an sarong kabilugan.

30 Asin sinda na pinagpakusog sa paagi nin sarong porsiyon kan terestriyal na kamurawayan magreresibe man kaiyan, magin iyo an sarong kabilugan.

31 Asin man sinda na pinagpakusog sa paagi nin sarong porsiyon kan telestiyal na kamurawayan magreresibe man kaiyan, magin iyo an sarong kabilugan.

32 Asin sinda na nagkatarada pagpapakusugon man; daeng pagkukulang, sinda magbabaralik giraray sa saindang sadireng lugar, tanganing tamasaon an bagay na saindang minamawot na maresibe, nin huli ta sinda nagmamawot na habong pagtamasaon an bagay na sainda kuta nang pagresibihon.

33 Nin huli ta ano baya an kapakinabangan nin sarong tawo kun an sarong regalo an pinagputong sa saiya, asin siya dae naresibe an regalo? Hilnga, siya dae nag-oogma sa bagay na ipinagtao sa saiya, ni nag-oogma siya na iyo an paratao kan regalo.

34 Asin giraray, katotohanan Ako nagsasabi sa saindo, an bagay na pinagpamahalaan sa paagi nin ley pinagpreserba man kan ley asin pinagperpekto asin pinagpabanal sa paagi kaiyan.

35 An bagay na pinagbalgar an ley, asin dae nagsusunod sa paagi kan ley, kundi naghahanap na magin sarong ley sa sadire niya, asin naggusto na magsunod sa kasalan, asin sa kagabsan namumuhay sa kasalan, dae puwedeng pakabanalon nin ley, ni sa paagi nin pagkaherak, hustisya, ni paghuhukom.  Kun kaya, sinda matatadang maati man giraray.

36 An gabos na mga kahadean igwang sarong ley na pinagtao;

37 Asin igwa nin kadakulon na mga kahadean; nin huli ta mayong espasyo na kun saen ini mayong kahadean; asin mayong kahadean na kun saen mayong espasyo, maski arin sa sarong makusugon o sarong maluyahon na kahadean.

38 Asin sa lambang kahadean ipinagtao an sarong ley; asin sa lambang ley igwa nin mga kasagkoran man asin mga kondisyon.

39 An gabos na nilalang na dae nagsusunod kaining mga kondisyon bakong hustipikado.

40 Nin huli ta an katalinuhan nangangaputan sa katalinuhan; kadunungan nagreresibe nin kadunungan; katotoohan nagkukugos sa katotoohan; birtud nagmomoot sa birtud; liwanag nangangaputan sa liwanag; pagkaherak may pagka-imbod sa pagkaherak asin nag-aako sa sadire niya; hustisya nagpapadagos sa kurso niya asin nag-aako sa sadire niya; an kahukuman minaagi sa atubang niya na nagtutukaw sa trono asin nagpapamahala asin naggigibo kan gabos na mga bagay.

41 Siya nakakasabot sa gabos na mga bagay, asin an gabos na mga bagay yaon sa atubangan niya, asin an gabos na mga bagay nakapalibot sa saiya; asin siya halangkaw sa gabos na mga bagay, asin yaon sa gabos na mga bagay, asin minalagbas sa gabos na mga bagay, asin nakapalibot sa gabos na mga bagay; asin an gabos na bagay sa paagi niya, asin yaon saiya, iyo baya an Diyos, sagkod sa daeng kasagkoran.

42 Asin giraray, katotohanan Ako nagsasabi sa saindo, siya nakapagtao nin sarong ley para sa gabos na mga bagay, na kun saen sinda naghihimo sa saindang sadireng panahon asin kan saindang mga kapanahunan;

43 Asin an saindang mga kurso pinagtakda na, ngani baya an mga kurso nin mga kalangitan asin kinaban, na nakakasabot sa kinaban asin gabos na mga planeta.

44 Asin sinda nagtatao nin liwanag sa pag-iriba ninda sa saindang sadireng mga panahon asin sa saindang sadireng kapanahunan, sa saindan mga minuto, sa saindang mga oras, sa saindang mga aldaw, sa saindang mga semana, sa saindang mga bulan, sa saindang mga taon--- gabos na mga ini sarong taon para sa Diyos, pero bakong sa tawo.

45 An kinaban nag-iikot sa sadire niyang mga pakpak, asin an saldang nagtatao kan saiyang liwanag sa paagi nin aldaw, asin an bulan nagtatao kan saiyang liwanag sa paagi nin banggi, asin an mga bitoon man nagtatao kan saindang liwanag, habang sinda nag-iikot sa sadire nindang mga pakpak sa saindang kamurawayan, na yaon sa katahawan kan kapangyarihan nin Diyos.

46 Sa anong bagay Ako maghahambing kaining mga kahadean, na tanganing kamo makaka-intende?

47 Hilnga, an gabos na mga ini mga kahadean, asin an arinman na tawo na nakapaghiling kan mga ini o sa pinakasadit kan mga ini nakahiling na sa Diyos na naghihiro sa saiyang kadakulaan asin kapangyarihan.

48 Ako nagsasabi sa saindo, siya nakahiling na sa saiya; daeng pagkukulang, siya na nag-abot sa saiyang pagsadire dae nasabutan.

49 An liwanag na nagbabanaag sa kadikloman, asin an kadikloman dae kaiyan nakakasabot; daeng pagkukulang, an aldaw mag-aabot na kunsoarin kamo makakasabot maski ngani sa Diyos, bilang pinagpakusog niya asin sa paagi niya.

50 Pagkatapos kamo makakaaram na kamo nakahiling na sakuya, na Ako ini, na Ako an tunay na liwanag na yaon sa saindo, asin ta kamo yaon sakuya; ta kun bako kamo dae makakatagal.

51 Hilnga, Ako maghahambing kaining mga kahadean sa sarong tawo na igwang umahan, asin saiyang ipinadara an saiyang mga surugoon pasiring sa umahan tanganing magkalot sa umahan.

52 Asin siya nagsabi sa pinaka-enot:  Magduman ka asin magtrabaho sa umahan, asin sa pinaka-enot na oras Ako magdudulok sa saimo, asin saimong mamamansayan an kaogmahan kan sakuyang panlalawgon.

53 Asin siya nagsabi sa ikaduwa:  Magduman ka man sa umahan, asin sa ikaduwang oras Ako mabisita saimo na igwang kaogmahan sa sakuyang panlalawgon.

54 Asin man sa ikatulo, na nagsasabi: Ako mabisita saimo;

55 Asin sa ikaapat, asin sa masurunod hanggan sa ikadose,

56 Asin an amo kan umahan nagduman sa pinaka-enot sa pinaka-enot na oras, asin naghaloy kaiba niya sa bilog na oras na iyan, asin siya pinaghimong maogma sa liwanag kan panlalawgon kan saiyang amo.

57 Asin pagkatapos na siya maghale gikan sa pinaka-enot na tanganing siya mapuwedeng makabisita sa ikaduwa man, asin sa ikatulo, asin sa ikaapat, asin sa masurunod hanggan sa ikadose.

58 Asin kaya sinda gabos nakapagresibe kan liwanag nin panlalawgon kan saindang amo, lambang tawo sa saiyang oras, asin sa saiyang panahon, asin sa saiyang kapanahunan---

59 Nagpoon sa pinaka-enot, asin sa masurunod sagkod sa pinakahuri, asin gikan sa pinakahuri hanggan sa pinaka-enot, asin gikan sa pinaka-enot hanggan sa pinakahuri;

60 Lambang tawo sa saiyang sadireng orden, sagkod na an saiyang oras nagtapos na, ngani baya uyon sa saiyang amo na nagsugo saiya, na tanganing an saiyang amo magpamuraway saiya, asin siya sa saiyang amo, na tanganing sinda gabos mapuwedeng maipagpamuraway.

61 Kun kaya, para sa parabolang ini Ako maghahambing kan gabos na ining mga kahadean, asin an mga nag-eerok kaini--- lambang kahadean sa sadireng oras, asin sa sadireng panahon, asin sa sadireng kapanahunan, ngani baya uyon sa dekrito na an Diyos iyo an naghimo.

62 Asin giraray, katotohanan Ako nagsasabi sa saindo, sakuyang mga amigo, Ako mawalat kaining mga pinagsasabi sa saindo tanganing paghorop-horopan sa saindong mga puso, kaiba kaining kasugoan na Ako an nagtao sa saindo, na kamo mangapudan sa sakuya asin Ako magdudulok paharani sa saindo; maghanap sako nin maigoton asin kamo makakanagbo sakuya; maghagad, asin kamo makakaresibe; magtuktok, asin ini pagbubuksan sa saindo.

64 An anuman na saindong paghahagadon sa Ama sa sakuyang pangaran ini ipagtatao sa saindo, na ini kapakinabangan para saindo;

65 Asin kun kamo maghahagad nin anuman na bagay na bakong kapakinabangan para saindo, ini magdadara pasiring sa saindong kondenasyon.

66 Hilnga, an bagay na saindong nadadangog iyo an siring sa boses niya na nagkukurahaw sa kaparangan--- sa kaparangan, nin huli ta kamo dae makakahiling saiya--- an sakuyang boses, nin huli ta an sakuyang boses iyo an Espiritu; an sakuyang Espiritu iyo an katotoohan; an katotoohan nag-eerok asin mayong katapusan; asin kun ini yaon sa saindo ini minatalubo.

67 Asin kun an saindong mata nakaputitok sa sakuyang kamurawayan, an saindong bilog na mga hawak pagpapanoon nin liwanag, asin dae magkakaigwa nin kadikloman sa saindo; asin an hawak na iyan na napapano nin liwanag makakasabot sa gabos na mga bagay.

68 Kun kaya, pakabanalon an saindong mga sadire na tanganing an saindong mga isip magigin tutok sa Diyos, asin an mga aldaw mag-aabot na kamo makakahiling sa saiya; nin huli ta saiyang pagbubuksan an saiyang lalawgon sa saindo; asin ini magigin yaon sa saiyang sadireng panahon, asin sa saiyang sadireng kapaagihan, asin uyon sa saiyang sadireng kagustuhan.

69 Giromdoma baya an dakula asin huring promise na Ako an naghimo para sa saindo; ipagsikwal paharayo an saindong maraw-ay na mga kaisipan asin an saindong sobrahon na halakhak na magharayo sa saindo.

70 Mag-untok kamo, mag-untok kamo sa lugar na ini, asin magpaapod nin sarong solemning asembliya, ngani baya para sa sainda na iyo an pinaka-enot na mga trabahador kaining huring kahadean.

71 Asin tugutan sinda na saindang pinagpatanidan sa saindang pagbibiyahe na mag-apud sa Kagurangnan, asin paghohorop-horopan an patanid sa saindang mga puso na saindang pinagresibe, para sa dikit na kapanahunan.

72 Hilnga, asin uya, Ako an mangangalaga kan saindong mga pangon, asin mangangataman nin mga elders asin magpadara sa sainda.

73 Hilnga, Ako magpapahidali kan sakuyang gibo sa sadireng panahon.

74 Asin Ako matao sa saindo, na iyo an sakuyang pinaka-enot na mga trabahador kaining huring kahadean, sarong kasugoan na kamo mag-asembliya kan saindong mga sadire na magkasararo, asin i-organisa an saindong mga sadire, asin prepararon an saindong mga sadire, asin pabanalon an saindong mga sadire; iyo, linigan an saindong mga puso, asin hugasan an saindong mga kamot asin an saindong mga bitis sa atubangan ko, na tanganing Ako an maghimo saindong malinigon;

75 Na tanganing Ako mapuwedeng magsaksi sa saindong Ama, asin an saindong Diyos, asin sakuyang Diyos, na kamo malinig gikan sa dugo kaining marigsok na henerasyon; na tanganing Ako an puwedeng mag-utob kaining promise, na Ako an naghimo sa sainda kunsoarin baya Ako an maggugusto.

76 Ini pa, Ako matao sa saindo nin sarong kasugoan na kamo magpapadagos sa pagpapangadye asin pag-aayuno magpoon ngonyan na panahon.

77 Asin Ako matao sa saindo nin sarong kasugoan na kamo magtinurotukdoan sa lambang saro kan doktrina nin kahadean.

78 Magtukdo kamo nin maigot asin an sakuyang grasya iyo an magbabansay saindo, na tanganing kamo mapupuwedeng instruksiyonadong gayo na perpekto sa teoriya, sa prinsipyo, sa doktrina, sa ley kan ebanghelyo, sa gabos na mga bagay na mapanungod sa kahadean nin Diyos, na kapakinabangan para saindo na makasabot;

79 Kan mga bagay na pareho sa langit aisn sa kinaban, asin sa irarom nin kinaban; mga bagay na kaidto pa, mga bagay na yaon ngonyan, mga bagay na halipoton nang maglilipas; mga bagay na yaon sa harong, mga bagay na yaon sa harayo; an mga giyera asin an mga kabungawan nin mga nasyon, asin an mga kahukuman na yaon sa kadagaan; asin sarong kaaraman man kan mga nasyon asin kan mga kahadean---

80 Na tanganing kamo puwedeng magin preparado sa gabos na mga bagay kunsoarin Ako magpapadara saindo giraray tanganing magpabanaag sa kapangapudan kun saen Ako an nag-apod saindo, asin sa misyon na Ako an nagsugo saindo.

81 Hilnga, Ako an nagpadara saindo paluwas tanganing magpatotoo asin magpatanid sa mga katawohan, asin ini mangyayari na an lambang tawo na pinagpatanidan na magpatanid man sa saiyang kataraid.

82 Kun kaya, sinda mayong maipagpalusot, asin an saindang mga kasalan yaon sa ibabaw kan saindang mga payo.

83 Siya na naghahanap sakuya asin amay makakanagbo sakuya, asin dae pababayaan.

84 Kun kaya, magpawalat kamo, asin magtrabaho nin maigot, na tanganing kamo mapupuwedeng magin perpekto sa saindong ministeryo na magpasiring duman sa pag-iriba nin mga Hentil para sa huring pagkakataon, habang kadakul na an nguso nin Kagurangnan an magngangaran, tanganing pagbugkuson an ley asin pagselyuhan an testimonya, asin pag-andamon an mga banal para sa oras nin paghuhukom na iyo an maabot;

85 Na tanganing an saindang mga kalag mapupuwedeng maka-eskapo sa kaanggutan nin Diyos, an kalipungawan kan abominasyon na naghahalat sa marigsok na parehong yaon sa kinaban na ini asin sa kinaban na maabot.  Katotohanan, Ako nagsasabi sa saindo, tugutan sinda na bako pang mga enot na mga elders na magpadagos sa ubasan sagkod na an nguso nin Kagurangnan iyo an mag-aapod sa sainda, nin huli ta an saindang mga panahon dae pa nag-abot; an saindang mga bado bako pang malinigon gikan sa dugo kaining henerasyon.

86 Magsunod kamo sa libertad na kun saen kamo pinaghimong libre; dae kamo magpagapos kan saindong mga sadire sa kasalan, kundi tugutan nindo na an saindong mga kamot magin malinig, sagkod na an Kagurangnan mag-abot.

87 Nin huli ta bakong kadakul na mga aldaw magpoon ngonyan asin an kinaban magkukubog-kubog asin magduduyan paduman asin padigde na siring sa sarong burat na tawo, asin an saldang magtatago kan saiyang lalawgon, asin magsasayuma na magtao nin liwanag; asin an bulan magkakarigos nin dugo; asin an mga bitoon magigin angguton na gayo, asin maghuhulog kan saindang mga sadire pababa siring sa sarong naghuhulog gikan sa sarong higerang kahoy.

88 Asin pagkatapos kan saindong testimonya mag-aabot an kaanggutan asin indignasyon sa mga katawohan.

89 Nin huli ta pagkatapos kan saindong testimonya mag-aabot an testimonya kan mga linog, na magkakausa nin mga pag-uungol sa katahawan niya, asin an mga tawo magkakahurulog sa ibaba asin dae na makakatindog.

90 Asin man mag-aabot an testimonya kan boses nin mga pagdadaguldol, asin kan boses nin mga pagkikilat, asin kan boses nin mga pagbabagyo, asin kan boses nin mga paglungao sa dagat na minalabaw kan saindang mga sadire na lampas kan saindang mga kakayanan.

91 Asin an gabos na mga bagay magigin yaon sa kahurasaan; asin may kasegurohan, na an mga puso nin mga tawo mapasipara sainda; nin huli ta an pagkatakot mag-aabot sa gabos na mga katawohan.

92 Asin an mga anghel maglalayaw-layaw sa katahawan nin langit, magkukurahaw na may sarong makusugon na boses, pinagpapatanog an trumpeta nin Diyos, na nagsasabi: Mag-andam kamo, mag-andam kamo, O mga nag-eerok sa kinaban; nin huli ta an paghuhukom nin satuyang Diyos nag-abot na.  Hilnga, asin uya, an Nobyo nag-abot na; lakaw kamo sa pagsabat saiya.

93 Asin tulos magkakaigwa nin pagpapahiling nin sarong dakulaong senyal sa langit, asin an gabos na mga katawohan sararong makakahiling kaini.

94 Asin may ibang anghel an magpapatanog kan saiyang trumpeta; na nagsasabi:  Yang dakulaon na simbahan, an ina nin mga abominasyon, na naghimo sa gabos na mga nasyon na mag-inom nin arak kan kaanggutan nin saiyang pornikasyon, na nagpersiger kan mga banal nin Diyos, na nagpabulos kan saindang dugo--- an babaye na nagtutukaw sa ibabaw nin kadakul na mga katubigan, asin sa ibabaw kan mga isla nin kadagatan--- hilnga, siya iyo an maroyparoy nin kinaban; siya nabubugkusan na mga bandol; an saiyang mga gapos pinaghimong makusog, na mayong tawo an makakahubad sainda; kun kaya, siya handa na para suloon.  Asin an anghel magpapatanog kan saiyang trumpeta na parehong palawig asin makusugon, asin an gabos na mga nasyon makakadangog kaini.

95 Asin magkakaigwa nin pagtuninong sa langit sa laog nin kabangang oras; asin tulos pagkatapos an kurtina nin langit pagbubuksan, siring sa sarong eskrulyo na pinagbubuksan pagkatapos na ini pinagrolyo, asin an lalawgon nin Kagurangnan ipaghayag;

96 Asin an mga banal na yaraon sa kinaban, na mga buhay, pagpapahidalion asin ipag-aangat sa pagsabat saiya.

97 Asin sinda na nakapagturog sa saindang mga lubungan magruruluwas, nin huli ta an saindang mga lubungan pinagbuksan, asin sinda man ipag-aangat sa pagsabat saiya sa katahawan kan harigi nin langit---

98 Sinda yaon ki Cristo, an enot na mga prutas, sinda na magbabaraba na kaiba niyang enot, asin sinda na yaraon sa kinaban asin yaon sa saindang mga lubungan na nagka-erenot na maiangat sa pagsabat saiya; asin gabos ini mangyayari sa paagi kan boses nin pinakakak na trumpeta kan anghel nin Diyos.

99 Asin pagkatapos kaini saro pang anghel an magpapatanog, na iyo ngani an ikaduwang trumpeta; asin magsunod an pagtutubos ninda na yaraon ki Cristo sa saiyang pag-abot; na nakapagresibe kan saindang parte sa laog kaidtong prisohan na pinag-andam para sainda, na tangani na saindang mapupuwedeng maresibe an ebanghelyo, asin paghuhukuman uyon sa mga tawo na yaon sa laman.

100 Asin giraray, saro pang trumpeta an magtatanog, na iyo an ikatulong trumpeta; asin magsunod an pag-abot kan mga espiritu nin mga tawo na tanganing paghuhukuman, asin managboan na yaon sa irarom nin kondenasyon;

101 Asin iyo ini an katadaan kan mga gadan; asin sinda dae mabubuhay giraray hanggan an sanribong taon nagtapos na, ni dae giraray, hanggan sa katapusan kan kinaban.

102 Asin saro pang trumpeta an magtatanog, na iyo an ikaapat na trumpeta, na magsasabi:  Igwang mananagboan sa pag-iriba ninda na magpapawalat hanggan sa dakula asin huring aldaw, ngani iyo an katapusan, na matatadang maation pa.

103 Asin saro pang trumpeta an magtatanog, na iyo an ikalimang trumpeta, na iyo ngani an ikalimang anghel na iyo an komitido sa daeng kasagkorang ebanghelyo--- na naglalayaw-layaw sa katahawan nin langit, pasiring sa gabos na mga nasyon, lahi, dila, asin mga katawohan;

104 Asin iyo ini an magigin patanog kan saiyang trumpeta, na magsasabi sa gabos na mga katawohan, pareho sa langit asin sa kinaban, asin idtong yaon sa irarom nin kinaban--- nin huli ta an lambang talenga makakapagdangog kaini, asin an lambang tuhod magluluhod, asin an lambang dila magkukumpisal, habang sinda nagdadangog sa patanog kan trumpeta, na nagsasabi: Matakot sa Diyos, asin magtao nin pamuraway saiya na nakatukaw sa trono, sagkod pa man; nin huli ta an oras kan saiyang paghuhukom nag-abot na.

105 Asin giraray, saro pang anghel an magpapatanog kan saiyang trumpeta, na iyo an ika-anom na anghel, na magsasabi:  An babaye nagbagsak na siya na iyo an naghimo sa gabos na mga nasyon na mag-inom kan arak nin kapahamakan kan saiyang pagkiki-apid; siya nagbagsak na, nagbagsak na!

106 Asin giraray, saroa pang anghel an magpapatanog kan saiyang trumpeta, na iyo an ikapitong anghel, na magsasabi:  Ini tapos na; ini tapos na! An Kordero nin Diyos an nagdaog asin nagtimak-timak sa pisakan nin arak na solo, ngani an pisangan nin arak kan kabagsikan nin kaanggutan kan Makapangyarihang Diyos.

107 Asin magsunod an pagkokorona nin mga anghel nin kamurawayan kan saiyang kapangyarihan, asin an mga banal mapapano kan saiyang kamurawayan, asin maresibe kan saindang kamanahan asin paghihimoon na kapantay na kaiba niya.

108 Asin magsunod an enot na anghel na magpapatanog giraray kan saiyang trumpeta sa mga talenga kan gabos na mga nabubuhay, asin magpapahayag kan mga sikretong gibo nin mga tawo, asin an mga makapangyarihang gibo nin Diyos sa enot na sanribong taon.

109 Asin magsunod an ikaduwang anghel na magpapatanog kan saiyang trumpeta, asin magpapahayag kan mga sikretong gibo nin mga tawo, asin an mga isip asin intensiyon kan saindang mga puso, asin an mga makapangyarihang gibo nin Diyos sa ikaduwang sanribong taon---

110 Asin padagos, sagkod sa ikapitong anghel na magpapatanog kan saiyang trumpeta; asin siya magtitindog sa ibabaw nin daga asin dagat, asin manunumpa sa pangaran niya na nagtutukaw sa trono, na dae na maglalawig pa an panahon; asin si Satanas paggagapuson, iyo yan an suanoy na halas, na iyo an pinag-apod na diyablo, asin dae pagbubuhian sa laog nin sanribong taon.

111 Asin magsunod na siya pagbubuhian sa kadikit na panahon, na saiyang magkatiripon na magkasararo an saiyang mga soldados.

112 Asin si Michael, an ikapitong anghel, na iyo ngani an arkanghel, magtitiripon na magkasararo an saiyang mga soldados, na iyo ngani an mga pangon nin langit.

113 Asin an diyablo pagtitiriponon na magkasararo an saiyang mga soldados; ngani an mga pangon nin impiyerno, asin mag-aatake sa pakikigiyera laban kina Michael asin kan saiyang mga soldados.

114 Asin magsunod an pag-abot an pakigiyera kan dakulaong Diyos; asin an diyablo asin an saiyang mga soldados ipaghuhulog pasiring sa saindang sadireng lugar, na tanganing sinda dae na magkakaigwa pa nin kapangyarihan na mangingibabaw sa mga banal.

115 Nin huli ta si Michael an makikipaglaban sa saindang mga labanan, asin an makakadaog saiya na naghahangad kan trono niya na nakatukaw sa trono, ngani an Kordero.

116 Iyo ini an kamurawayan nin Diyos, asin an pinabanal; asin sinda dae na makakahiling nin kagadanan.

117 Kun kaya, katotohanan Ako nagsasabi sa saindo, sakuyang mga amigo, apuda an saindong solemning asembliya, siring na Ako an nagsusugo saindo.

118 Asin siring na an gabos mayong pagtubod, maghanap kamo nin maigot asin magtinurutukdoan sa lambang saro nin mga tataramon nin kadunungan; iyo, maghanap kamo gikan sa marahayon na mga libro nin mga tataramon nin kadunungan; maghanap nin pagkakanuod, ngani sa paagi nin pag-aadal asin man sa paagi nin pagtubod.

119 Organisaron an saindong mga sadire; prepararon an lambang kinakaipuhan na bagay; asin establisaron an sarong harong, ngani sarong harong nin pagpapangadye, sarong harong nin pag-aayuno, sarong harong nin pagtubod, sarong harong nin pagkanuod, sarong harong nin kamurawayan, sarong harong nin kaayusan, sarong harong nin Diyos;

120 Na tanganing an saindong mga pag-abot mapupuwedeng yaon sa pangaran nin Kagurangnan; na tanganing an saindong mga paghale mapupuwedeng yaon sa pangaran nin Kagurangnan; na tanganing an gabos na saindong mga pakipagbati mapupuwedeng yaon sa pangaran nin Kagurangnan, na igwang pinagpaitaas na mga kamot na ipinagpanungod sa Pinakahalangkaw.

121 Kun kaya, maglikay kamo gikan sa gabos nindong magi-anon na mga pagtataram, gikan sa gabos na paghahalakhak, gikan sa gabos nindong malalaswang mga kamawotan, gikan sa gabos nindong kapaabaw-abawan asin kaliputan nin isip, asin gikan sa gabos nindong maririgsok na mga kaggibohan.

122 Magngaran sa pag-iriba nindo nin sarong paratukdo, asin dae pagtugutan na an gabos magin tagapagtaram nin sabay; kundi tugutan an saro makapagtaram nin buwelo asin tugutan an gabos na maghinanyog sa saiyang mga pagtataram, na kunsoarin na an gabos nakapagtaram na, an gabos mapupuwedeng mapakusog kan gabos, asin na lambang tawo magkakaigwa nin pantay na pribilihiyo.

123 Masdan na kamo mamoot sa lambang saro; mag-untok sa pagigin maaraon; makanuod na makipagbahagi an saro sa iba siring sa pinaghahagad kan ebanghelyo.

124 Mag-untok na magin  hugakon; mag-untok na magin maation; mag-untok sa pagmangno nin sala an saro sa iba; mag-untok na magturog nin halawig kesa kina kaipuhan; maghigda sa saimong higdaan nin amay, na tanganing an saindong mga hawak asin mga isip mapupuwedeng magin makusugon.

125 Asin labaw sa gabos na mga bagay, badoan an saindong mga sadire nin bugkos nin karidad, siring na igwa nin sarong lindong, na iyo ngani an bugkos nin pagkaperpekto asin katuninongan.

126 Magpangadye pirme, na tanganing kamo dae mapagal, sagkod na Ako mag-abot.  Hilnga, asin uya, Ako maabot nin hidale, asin resibihon kamo sa sakuyang sadire. Amen.

127 Asin giraray, an kaayusan nin harong na pinag-andaw para sa panguluhan kan eskuwelahan nin mga propeta, pinag-establisa para sa saindong instruksiyon sa gabos na mga bagay na kapakinabangan para sainda, ngani para sa gabos na mga opisyales kan simbahan, o sa ibang mga tataramon, sinda na pinagpangapudan sa ministeryo nin simbahan, magpoon sa mga haralangkaw na mga padi, ngani pababa sagkod sa mga diyakono---

128 Asin iyo ini an magin husay sa harong nin panguluhan kan eskuwelahan:  Siya na iyo an pinagngaranan na magin pangulo, o paratukdo, mananagboan na nakatindog sa saiyang lugar, sa harong na kun saen ini ipinag-andam na para saiya.

129 Kun kaya, siya magigin enot na harong nin Diyos, na lugar na an kongregasyon yaon sa harong na mapupuwedeng makapagdangog kan saiyang mga tataramon na may pag-iingat asin kalinawan, bako sa makusugon na pagtaram.

130 Asin kunsoarin siya maglaog sa harong nin Diyos, nin huli ta siya dapat an enot sa laog kan harong hilnga, ini magayunon, na siya mapupuwedeng magin sarong ehemplo---

131 Tugutan siya na magdulot kan saiyang sadire sa pangadyeon na nakaluhod sa atubangan nin Diyos, sa simbolo o kagiromdoman nin daeng katapusan na tipan.

132 Asin kunsoaring na kadakul an magdudulok pagkatapos niya, tugutan an paratukdo na magtindog, aisn igwang naka-itaas na mga kamot pasiring sa langit, iyo, ngani diretsong gayo, pinagsaluduhan an siayang tugang o katugangan na igwa kaining mga tataramon:

133 Bako daw na ika sarong tugang na lalake o katugangan? Ako minasaludo saindo sa pangaran nin Kagurangnan JesuCristo, sa simbolo o kagiromdoman nin daeng katapusan na tipan, na kun saen sa tipan Ako nagresibe saindo sa pakikipagsalamuha, sa sarong determinasyon na pinagtakda, dae mahihiro, asin daeng pagbabag-o, na magigin saindong amigo asin tugang sa paagi kan grasya nin Diyos na yaon sa mga bugkos nin pagkamoot, na maglakaw na yaon sa gabos na mga kasugoan nin Diyos na kulang sa kabasulan, yaon sa pagpapasalamat, sagkod pa man. Amen.

134 Asin siya na nanagboan na bakong maninigo kaining pagsasaludo dae magkakaigwa nin lugar sa pag-iriba nindo; nin huli ta kamo dae magtutugot na an sakuyang harong pag-aatian niya.

135 Asin siya na magdudulok palaog asin matapat sa atubangan ko, asin sarong tugang na lalake, o kun sinda baya mga katugangan, sinda magsasaludo sa presidente o paratukdo na igawnag naka-itaas na mga kamot panungod sa langit, na kaini an kaparehong pangadyeon asin tipan, o sa paagi kan pagsabing Amen, bilang simbolo kini.

136 Hilnga, katotohanan, Ako nagsasabi sa saindo, iyo ini an sarong ehemplo sa saindo para sa sarong pagsasaludo sa lambang saro sa iba sa laog kan harong nin Diyos, sa laog kan eskuwelahan nin mga propeta.

137 Asin kamo pinagpangapudan na gibohon ini sa paagi nin pangadyeon asin pasasalamat, siring na an Espiritu magtatao nin mga tataramon sa gabos nindong gigibohon sa laog kan harong nin Kagurangnan, sa laog kan eskuwelahan nin mga propeta, na tanganing ini magin sarong sanktuwaryo, sarong tabernakulo kan Banal na Espiritu para sa saindong edipikasyon.

138 Asin kamo dae magreresibe nin siisay man sa pag-iriba nindo na maglaog sa eskuwelahang ini laen lang kun siya malinig gikan sa dugo kaining henerasyon;

139 Asin siya pagreresibihon sa paagi kan ordinansa nin paghuhugas nin mga bitis, nin huli kaini kaya an ordinansa nin paghuhugas nin mga bitis pinagtugdas.

140 Asin giraray, an ordinansa nin paghuhugas nin mga bitis, pang-administrasyon kan presidente, o pamayong elder kan simbahan.

141 Ini pagpopon-an nin pangadyeon; asin pagkatapos an pagkakan nin tinapy asin pag-inom nin arak, siya maghagkos kan saiyang sadire uyon sa desinyo na ipinagtao sa ika-treseng tsapter nin John na nagpapatotoo mapanungod sakuya, Amen.