SEKSYON 77

Kapahayagan na ipinagtao ki Joseph Smith an Propeta, sa Hiram, Ohio, Marso 1832. HS 1:253-255. An Propeta nagsurat, “An manunungod sa pagsalin kan mga Eskritura, Ako nagresibe kan minasunod na kapaliwanagan sa kapahayagan nin St. John.”
*******
1-4, An mga hayop igwang mga espiritu asin mag-eerok sa eternal na pilisidad kan immortal na kinaban; 5-7, Ining kinaban may temporal na kalalangan na 7,000 taon; 8-10, Kadakulon na mga anghel an pinagbalik an ebanghelyo asin nagmiministeryo sa kinaban; 11-, An pagselyo kan 144,000; 12-14, Si Cristo maabot sa kapinunan kan ikapitong ribong taon; 15, An duwang mga propeta na paggagadanon sa Jerusalem.
*******
H. Ano baya an dagat nin salamin na pinagsasabi sa John, ikaapat na tsapter, asin ika-anom na bersikulo kan Kapahayagan?
S. Iyo ini an kinaban, sa saiyang sanktipikado, immortal, asin eternal na kamugtakan.
2 H. Ano baya an dapat nyamong maintindihan sa apat na mga hayop, na pinagsasambit sa kaparehong bersikulo?
S. Sinda piguratibong kaisipan, na pinaggamit sa paagi nin Tagapagpahayag, na si John, sa paglaladawan kan langit, an paraiso nin Diyos, an kaogmahan nin tawo, asin kan mga hayop, asin kan mga nagkakamang na mga bagay, asin kan mga gamgam sa hangin; idtong mga espirituwal na nilalang na nakahawig kan bagay na temporal; asin idtong mga temporal na kahawig kan bagay na espirituwal; an espiritu nin tawo na kahawig kan saiyang pagkatawo, na siring man sa espiritu kan hayop, asin kan lambang iba pang nilalang na an Diyos iyo an naglalang.
3 H. An apat kayang hayop limitado sa indibidwal na mga hayop, o sinda minarepresentar kan mga klase o kamugtakan?
S. Sinda limitado sa apat na indibidwal na mga hayop, na ipinagpahiling ki John, tanganing ipagrepresentar an kamurawayan kan mga klase nin mga nilalang sa saindang destinadong kamugtakan o sirkulo kan paglalang, sa pagtamasa kan saindang eternal na pilisidad.
4 H. Ano baya an dapat nyamong maintindihan sa mga mata asin mga pakpak, na igwa an mga hayop?
S. An saindang mata sarong representasyon kan liwanag asin kaaraman, na iyo ngani, sinda panoon nin kaaraman; asin an saindang mga pakpak sarong representasyon nin kapangyarihan, sa paghiro, sa pag-aksyon, asin iba pa.
5 H. Ano baya an dapat nyamong maintindihan kan apat asin beynte-kuwatrong mga elders, na pinagsambit ni John?
S. Satuyang masasabutan na ining mga elders na nahiling ni John, iyo an mga elders na nagin matapat sa trabaho kan ministeryo asin naggadan na; na kabali sa pitong mga simbahan; asin yaon na sa paraiso nin Diyos.
6 H. Ano baya an dapat nyamong maintindihan kan libro na nahiling ni John, na pinagselyuhan sa likod nin pitong mga selyo?
S. Satuyang masasabutan na ini an may laman kan ipinagpahayag na kagustuhan, mga misteryo, asin mga gibo nin Diyos; an mga tagong bagay kan saiyang ekonomiya mapanungod kaining kinaban sa panahon nin pitong ribong taon kaining kadagusan, o kaining temporal na kamugtakan.
7 H. Ano baya an dapat nyamong maintindihan sa pitong selyo na nakapagselyo kaini?
S. Satuyang masasabutan na an enot na selyo naglalaman nin mga bagay kan enot na sanribong taon, asin an ikaduwa man kan ikaduwang ribong taon, asin padagos sagkod sa ikapito.
8 H. Ano baya an dapat nyamong maintindihan sa apat na mga anghel, na pinagsambit sa ikapitong tsapter asin enot na bersikulo nin Kapahayagan?
S. Satuyang masasabutan na sinda an apat na mga anghel na ipinadara gikan sa Diyos, na sainda ipinagtao an kapangyarihan sa ibabaw kan apat na mga parte kan kinaban, tanganing magligtas nin buhay asin tanganing mandestroso; iyo ini sinda na kapot an daeng katapusan na ebanghelyo tanganing pagpangaputan sa lambang nasyon, lahi, dila, asin mga katawohan; na igwang kapangyarihan na isara an mga langit, tanganing selyuhan sa buhay, o ipaghulog pasiring sa mga rehiyon nin kadikloman.
9 H. Ano baya an dapat nyamong maintindihan sa anghel na nagbababa gikan sa sirangan, sa Kapahayagan ikapitong tsapter asin ikaduwang bersikulo?
S. Satuyang masasabutan na an anghel na nagbababa gikan sa sirangan iyo siya na pinagtaw-anan kan selyo nin buhay na Diyos na mangingibabaw sa doseng mga tribu kan Israel; kumbaya, siya magkukurahaw sa apat na mga anghel na igwa kan daeng katapusan na ebanghelyo, na magsasabi: Dae nindo pagpakulgan an kinaban, ni an dagat, ni an mga kakahuyan, sagkod na samuyang mapagselyuhan an mga surugoon kan satuyang Diyos sa saindang mga angog. Asin, kun saindong maresibe ini, ini iyo si Elias, na iyo an mapadigde tanganing tiriponon na magkasararo an mga tribu kan Israel asin ipagbalik an gabos na mga bagay.
10 H. Anong panahon baya na an mga bagay na pinagsambit digde sa tsapter mauutob?
S. Sinda mauutob sa ika-anom na ribong taon, o sa pagbubukas kan ika-anom na selyo.
11 H. Ano baya ang dapat nyamong maintindihan sa pagseselyo kan sanggatos asin kuwarenta asin apat na ribo, na minagikan sa gabos na mga tribu kan Israle--- na dose mil na minagikan sa lambang tribu?
S. Satuyang masasabutan na sinda an pinagselyuhan iyo an mga halangkaw na mga padi, na pinag-ordinahan sa banal na orden nin Diyos, tanganing administraron an daeng katapusan na ebanghelyo; nin huli ta sinda iyo sinda na pinag-ordinahan na minagikan sa lambang nasyon, lahi, dila, asin mga katawohan, kan mga anghel na pinagtaw-anan nin kapangyarihan na mangingibabaw sa gabos na mga nasyon kan kinaban, tanganaing darahon an kadakul pasiring sa simbahan kan Panganay.
12 H. Ano baya an dapat nyamong maintindihan sa pagpapatanog kan mga trumpeta, na pinagsambit sa ikawalong tsapter kan Kapahayagan?
S. Satuyang masasabutan na siring na an Diyos pinaglalang an kinaban sa laog nin anom na aldaw, asin sa ikapitong aldaw saiyang pinagtapos an saiyang trabaho, asin pinabanal ini, asin man pinagporma an tawo kan alpog nin daga, arog kaini, sa kapinunan kan ikapitong ribong taon an Kagurangnan Diyos pakapagpapabanalon an kinaban, asin kumpletuhon an kaligtasan nin tawo, asin paghuhukuman an gabos na mga bagay, asin pagtutubuson an gabos na mga bagay, laen lang idtong dae niya ipinagpamugtak sa irarom kan saiyang kapangyarihan, kunsoarin saiya nang pagseselyuhan an gabos na mga bagay, sagkod sa katapusan kan gabos na mga bagay; asin an pagpapatanog kan mga trumpeta nin pitong mga anghel iyo an pag-aandam asin pagtatapos kaini, kan saiyang trabaho, sa kapinunan kan ikapitong ribong taon--- an pag-aandam kan paagi kun paano bago pa man mag-abot an panahon kan saiyang pag-abot.13 H. Noarin daw an mga bagay na ini mauutob, na ipinagsurat na sa ika-siyam na tsapter nin Kapahayagan?
S. Sinda mauutob pagkatapos na mabuksan an ikapitong selyo, bago mag-abot si Cristo.
14 H. Ano baya an dapat nyamong maintindihan sa sadit na libro na pinagkakan ni John, na pinagsambit sa ika-sampulong tsapter nin Kapahayagan?
S. Satuyang masasabutan na idto sarong misyon, asin sarong ordinansa, para saiya tanganing pagtitiriponon an mga tribu kan Israel; hilnga, iyo ini si Elias, na iyo, siring na ini naisurat na, an kaipuhan na mag-abot asin ipagbalik-liwat an gabos na mga bagay.
15 H. Ano baya ang dapat na maintindihan sa duwang mga testigos, sa ika-onseng tsapter nin Kapahayagan?
S. Sinda iyo an duwang propeta na pagpapadakulaon sa Hudiyong nasyon sa mga huring aldaw, sa panahon kan pagbabalik-liwat, asin tanganing magpropersiya sa mga Hudiyo pagkatapos na sinda pagtitiriponon asin maitugdok an siyudad nin Jerusalem sa kadagaan kan saindang mga ama.

SEKSYON 76

Sarong bisyon na ipinagtao kina Joseph Smith an Propeta asin Sidney Rigdon, sa Hiram, Ohio, Pebrero 16, 1832. HS 1:245-252. Pangenot kan saiyang rekord kaining bisyon an Properta nagsurat: “Sa sakuyang pagbalik gikan sa kumperensiya sa Amherst, Ako nagpoon giraray sa pagsalin kan mga Eskritura. Gikan sa manlaen-laen na kapahayagan na pinagresibe na, ini ipinagpahiling na kadakul pa na mga importanteng puntos na nagpupuntok sa kaligtasan nin tawo an pinaghale sa Bibliya, o nagkawarara bago pa man ini pinagtiripon-tipon. Ini nagluwas na pansadireng-ebidensiya gikan sa kun ano an mga katotoohan an nagkawaralat, na kun an Diyos nagpabuya sa lambang saro na uyon sa kaggibohan na pinaggibo sa hawak, an terminong 'Langit', na ipinagpapanungod para sa eternal na erokan kan mga Banal, na kaipong kinababalihan nin kadakul na mga kahadean na laen sa saro. Uyon kaini, habang pinagsasalin an Ebanghelyo ni John, an sadire ko asin Elder Rigdon nakahiling sa minasunod na bisyon.” Ini pagkatapos na an Propeta na magsalin kan John 5:29 na ining bisyon ipinagtao.
*******
1-4, An Kagurangnan Diyos; 5-10, Mga misteryo nin kahadean ipagpapahayag sa gabos na bilog an pagtubod; 11-17, An gabos maarabot sa pagkabuhay-liwat kan mga husto o bakong husto; 18-24, Mga para-erok nin kadakol na mga kinaban iyo an mga piniriling akeng lalake asin babae para sa Diyos sa paagi kan pagbabayad-sala ni JesuCristo; 25-29, Sarong anghel nin Diyos an nahulog asin nagin diyablo; 30-49, Mga akeng lalake nin perdisyon magsasapo nin eternal na kondenasyon; gabos na iba man makakapagguno nin ibang grado nin kaligtasan; 50-70, An kamurawayan asin pabuya kan eksultadong mga nilalang sa selestiyal na kahadean; 71-80, Sinda na magmamana nin terestriyal na kahadean; 81-113, kamugtakan ninda na yaon sa telestiyal, terestriyal, asin selestiyal na mga kamurawayan; 114-119, Gabos na may bilog na pagtubod puwedeng makakahiling nin bisyon kan mga grado nin kamurawayan.
*******
MAGDANGOG, O kamong mga kalangitan, asin magtao nin talenga, O kinaban, asin mag-ogma kamong mga para-erok diyan, nin huli ta an Kagurangnan Diyos, asin laen saiya dae na magkakaigwa nin Paraligtas,
2 Dakula an saiyang kadunungan, marbeloso an saiyang mga dalan, asin an sagkodan kan saiyang mga nagkaginibohan mayong makakapagtagbo.
3 An saiyang mga katuyuhan dae magpapalya, ni magkakaigwa nin siisay na makakapagpugol kan saiyang kamot.
4Gikan sa eternidad sagkod sa eternidad siya iyo man sana, asin an saiyang mga taon dae nagpapalya.
5 Nin huli kaini kaya nagsabi an Kagurangnan--- Ako, an Kagurangnan, pano nin pagkaherak asin mahuyoon sa sainda na natatakot sakuya, asin maogmahon sa paghonra sainda na nagsisirbe sakuya sa pagkamatanos asin sa katotoohan sagkod sa katapusan.
6 Dakulaon an magin saindang pabuya asin eternal an magin saindang kamurawayan.
7 Asin sainda Ako magpapahayag kan gabos na mga misteryo, iyo, gabos na nakatagong mga misteryo kan sakuyang kahadean gikan pa sa mga aldaw nin suanoy, asin para sa mga panahon pang maarabot, Ako maghihimong maipagpaaram sa sainda an marahay na maimbod kong kagustuhan mapapanungod sa gabos na mga bagay na ipinapanungod sa sakuyang kahadean.
8 Iyo, magin an mga kangangalasan kan eternidad saindang maaaraman, asin an mga bagay na mag-aarabot Ako an magpapahiling sainda, magin an mga bagay kan kadakul na mga henerasyon.
9 Asin an saindang kadunungan magigin mahiwason, asin an saindang pagkasabot minaabot hanggan langit; asin sa atubangan ninda an kadunungan kan matatalino mapapara, asin an pagkasabot kan mga mapaghusga mawawara.
10 Nin huli ta sa paagi kan sakuyang Espiritu Ako an magpapaliwanag sainda asin sa paagi kan sakuyang kapangyarihan Ako an mapaaram sa sainda kan mga sikreto kan sakuyang kagustuhan--- iyo, magin idtong mga bagay na an mata dae pa nakahiling, ni an talenga nakadangog, ni nakapaglaog na sa puso nin tawo.
11 Kami, Joseph Smith, Jun., asin Sidney Rigdon, habang yaon sa Espiritu sa ika-16 na aldaw nin Pebrero, sa taon kan satuyang Kagurangnan mil otso siyentos treynta asin dos---
12 Sa paagi nin kapangyarihan kan Espiritu an samuyang mga mata minuklat asin an samuyang mga pagkasabot pinagliwanag, na tangani bayang magkahiriling asin magka-irintindihan an mga bagay nin Diyos---
13 Magin idtong mga bagay pa kaidtong kapinunan bago pa ining mundo, na pinag-ordinahan kan Ama, sa paagi kan saiyang Bugtong na Piniling Ake, na yaon sa daghan kan Ama, magin kaidto pa sa kapinunan;
14 Na sa sainda kami madara nin patotoo; asin an rekord na samuyang dara iyo an kabilugan kan ebanghelyo ni JesuCristo, na iyo an Ake, na samuyang nahiling asin sa saiya kami nakipag-olay sa langitnon na bisyon.
15 Nin huli ta habang kami naggigibo kan trabaho nin pagsasalin, na an Kagurangnan iyo an nagsugo samuya, kami nakaabot sa ika-beynte nuwebeng bersikulo kan ikalimang tsapter nin John, na ipinagtao sa samuya na minasunod---
16 Sa pagtataram kan pagkabuhay-liwat nin gadan, mapanungod sainda na iyo an makakadangog sa boses kan Aken nin Tawo;
17 Asin mangyayaring mag-abot; sinda na nakapaggibo nin marahay, sa pagkabuhay-liwat kan mga husto; asin sinda na nakapaggibo nin maraot, sa pagkabuha-liwat kan mga bakong husto.
18 Ngonyan iyo ini an nakaagpangalas samuya, nin huli ta ini ipinagtao sa samuya kan Espiritu.
19 Asin habang kami pinaghohorop-horopan ining mga bagay, an Kagurangnan pinagdutdot an mga mata kan samuyang mga pagkakasabot asin ini pinagbuksan, asin an kamurawayan nin Kagurangnan nagliwanag sa palibot.
20 Asin samuyang namasdan an kamurawayan kan Ake, na yaon sa toong kamot kan Ama, asin nagresibe kan saiyang kabilugan;
21 Asin nagkahiriling nin mga banal na anghel, asin sainda na sanktipikado sa atubangan kan saiyang trono, nagsasamba sa Diyos, asin sa Kordero, na nagsamba saiya sagkod sa daeng kasagkoran.
22 Asin ngonyan, pagkatapos nin kadakul na mga testimonya na ipinagtao sa saiya, iyo ini an testimonya, huri sa gabos, na samuyang ipagpapanungod sa saiya: Na Siya Buhay!.
23 Nin huli ta samuyang nahiling siya, na yaon sa toong kamot nin Diyos; asin kami nakadangog nin boses na nagpatotoo na siya iyo an Bugtong na Pinili kan Ama---
24 Na sa paagi niya, asin tabang niya, asin nin huli saiya, an mga kinaban nilalang asin pinaglalang, asin an mga para-erok kan mga ini iyo an mga piniling kaarakiang lalake asin babae sa Diyos.
25 Asin iyo ini an samuya pang nahiling, asin mapatotoo, na sarong anghel nin Diyos na igwang autoridad sa presensiya nin Diyos, na nagrebelde laban sa Bugtong na Piniling Ake na an Ama namomoot asin iyo an yaon dati sa laog kan daghan kan Ama, an pinaghulog pababa gikan sa presensiya nin Diyos asin kan Ake.
26 Asin pinag-apod na perdisyon, nin huli ta an kalangitan nagtangis saiya--- siya iyo si Lucifer, sarong ake nin kinaumagahon.
27 Asin samuyang nahiling, asin uya, siya nahulog! Iyo nahulog, na iyo ngani an ake nin kinaumagahon!
28 Asin habang kami yaon pa sa Espiritu, an Kagurangnan nagsugo samuya na kami dapat na magsurat kan bisyon; nin huli ta samuyang nahiling si Satanas, an suanoy na halas, na iyo ngani an diyablo, na nagrebelde laban sa Diyos, asin nagmawot na agawon an kahadean kan satuyang Diyos asin kan saiyang Cristo---
29 Kumbaya, siya naghimong giyera laban sa mga banal kan Diyos, asin pinagdadakop sinda sa palibot.
30 Asin samuyang nahiling an sarong bisyon kan mga pagsakit ninda na saiyang hinimoan nin giyera asin nagkadaraog, nin huli baya nag-abot an boses nin Kagurangnan sa samuya:
31 Kaya nagsabi an Kagurangnan mapanungod gabos sainda na nakakaaram sa sakuyang kapangyarihan, asin hinimong mga kaparte baya, asin nagtugot kan saindang mga sadire sa paagi nin kapangyarihan kan diyablo na madadaog, asin tanganing ipagsisikwal an katotohanan asin labanan an sakuyang kapangyarihan---
32 Sinda iyo sinda an mga kaarakiang lalake sa perdisyon, na sainda Ako nagsasabi na ini kuta na mas marahay para sainda na dae na sana ipinagpangaki;
33 Nin huli ta sinda iyo an mga sakayan nin karaotan, pinaghusgaran nang magsasapo sa kaanggutan nin Diyos, kairiba nin diyablo asin kan saiyang mga anghel sa eternidad;
34 Mapapanungod sainda na Ako nakapagsabi na mayo nang kapatawaran sa kinaban na ini ni sa kinaban na mag-aarabot---
35 Na pinagsikwal an Banal na Espiritu pagkatapos na maresibe ini, asin pinagsikwal an Bugtong na Piniling Ake nin Diyos, na nagpako saiya sa krus para sa saindang mga sadire asin nagbugtak saiya sa sarong bukas na kasupganan.
36 Iyo ini sinda na iyo an magpapaduman pasiring sa gulpo nin kalayo asin asupre, na kairiba an diyablo asin an saiyang mga anghel---
37 Asin sainda iyo sana ipinanungod an ikaduwang kagadanon na magkakaigwa nin kapangyarihan;
38 Iyo, katotohanan, sinda iyo sana an dae matutubos sa talaang panahon nin Kagurangnan, pagkatapos sa mga pagsakit kan saiyang kaanggutan.
39 Nin huli ta gabos na tada pagbabangunon sa paagi kan pagkabuhay-liwat sa mga gadan, sa paagi kan triyumpo asin kamurawayan kan Kordero, na pinaggadan, na yaon sa daghan kan Ama, bago pa man an mga kinaban pinaglalang.
40 Asin iyo ini an ebanghelyo, an marahayon na bareta, na boses gikan sa mga kalangitan nagpatotoo sa samuya---
41 Na siya nagpadigde sa kinaban, na iyo ngani si Jesus, tanganing ipagpapako sa krus para sa kinaban, asin tanganing pagdarahon an mga kasalan kan kinaban, asin tanganing pakabanalon an kinaban, asin tanganing hugasan ini gikan sa gabos na bakong katanosan;
42 Na sa paagi niya gabos mapupuwedeng maligtas na an Ama iyo an nagpamugtak kan saiyang kapangyarihan asin hinimo sa paagi niya;
43 Na iyo an nagpamuraway sa Ama, asin nagligtas kan gabos na ginibo kan saiyang mga kamot, laen lang sainda na mga kaarakian nin perdisyon na nagsikwal sa Ake pagkatapos na an Ama iyo an nagpahayag saiya.
44 Kumbaya, siya an nagligtas sa gabos laen lang sainda--- Sinda magpapaduman pasiring sa daeng kasagkoran na kapadusahan, na iyo ngani an mayong katapusan an kapadusahan, na iyo an eternal na kapadusahan, tanganing maghade kaiba an diyablo asin an saiyang mga anghel sa eternidad, na kun saen an saindang ulod daeng kagadanan, asin an kalayo mayong kauntukan, na iyo an saindang tormeto---
45 Asin an katapusan kaiyan, ni an lugar kaiyan, ni an saindang tormento, mayong tawo an nakakaaram;
46 Ni ini ipinagpahayag na, bako maski sa arinman, na ini ipagpapahayag sa tawo, laen lang sainda na pinaghimong kaparte kaini;
47 Daeng pagkukulang, Ako, an Kagurangnan, ipinagpahiling ini sa bisyon sa kadaklan, pero sa katanosan ini ipinagsara giraray;
48 Kumbaya, an katapusan, an lakbang, an langkaw, an irarom, asin an kapaitan kaiyan, sinda dae nakakasabot, ni an arinman na tawo laen lang sainda na pinag-ordinahan pasiring kaining kondenasyon.
49 Asin samuyang nadangog an boses, na nagsasabi: Isurat an bisyon, nin huli ta uya, iyo ini an tapos kan bisyon kan mga kasakitan nin mga mayong diyos.
50 Asin giraray kami magpatotoo--- nin huli ta samuyang nahiling asin nadangog, asin iyo ini an testimonya kan ebanghelyo ni Cristo mapanungod sainda na iyo an mabangon sa pagkabuhay-liwat kan mga husto---
51 Sinda iyo sinda na nagresibe kan testimonya ni Jesus, asin naniniwala sa saiyang pangaran asin nabunyagan arog sa manera kan saiyang paglubong, na siring sa paglubog sa tubig sa saiyang pangaran, asin ini uyon sa kasugoan na saiyang pinagtao---
52 Na sa paagi kan pagsunod sa mga kasugoan sinda mapupuwedeng paghuhugasan asin paglilinigan gikan sa gabos nindang kasalan, asin resibihon an Banal na Espiritu sa paagi kan pagpapatong nin mga kamot sa saiya na pinag-ordinahan asin pinagselyuhan pasiring kaining kapangyarihan;
53 Asin siya na nangingibabaw sa paagi nin pagtubod, asin pinagselyuhan sa paagi kan Banal na Espiritu nin promisa, na an Ama iyo an nagpalindong sa gabos sainda na mga husto asin totoo.
54 Sinda iyo sinda na kabali sa simbahan kan Panganay.
55 Sinda iyo sinda na sa mga kamot an Ama iyo an nagtao kan gabos na mga bagay---
56 Sinda iyo sinda na mga kapadian asin mga hade, na nagresibe kan saiyang kabilugan, asin kan saiyang kamurawayan;
57 Asin iyo an mga kapadian kan Pinakahalangkaw, na susog sa orden ni Melchizedek, na susog sa orden ni Enoch, na susog sa orden kan Bugtong na Piniling Ake.
58 Kumbaya, siring na ini nasusurat, sinda mga diyos, na iyo ngani an akeng lalake nin Diyos---
59 Kumbaya, an gabos na mga bagay pagsadire ninda, maski buhay o kagadanon, o mga bagay sa presente, o mga bagay na mag-aarabot, an gabos pagsadire ninda asin sinda yaon ki Cristo, asin si Cristo yaon sa Diyos.
60 Asin saindang pangingibabawan an gabos na mga bagay.
61 Kumbaya, tugutan na mayong tawo an mapamuraway sa tawo, kundi tugutan siyang magpamuraway sa Diyos, na iyo an magpapamugtak kan gabos na kaiwal sa irarom kan saiyang mga bitis.
62 Iyo ini an mag-eerok sa presensiya nin Diyos asin kan saiyang Cristo sagkod sa mayong kasagkoran.
63 Iyo ini sinda na saiyang pagdadarahaon kaiba niya, kunsoarin na siy mag-aabot sa mga panginuron kan langit tanganing maghahade sa kinaban kan saiyang mga katawohan.
64 Iyo ini sinda na magkakaigwa nin parte sa enot na pagkabuhay-liwat.
65 Iyo ini sinda na magbabangon sa pagkabuhay-liwat kan mga husto.
66 Iyo ini sinda na mag-arabot pasiring sa Bukid Sion, asin pasiring sa siyudad kan buhay na Diyos, an langitnon na lugar, an pinakabanal sa gabos.
67 Iyo ini sinda na nag-arabot sa dae mabibilang na kumpanya nin mga anghel, pasiring sa heneral na asembliya asin simbahan ni Enoch, asin kan Panganay.
68 Iyo ini sinda na an mga pangaran pinagsurat na sa langit, kunsaen an Diyos asin si Cristo iyo huwes kan gabos.
69 Iyo ini sinda na mga hustong tawo na pinaghimong perpekto sa paagi ni Jesus an Tagapagtahaw kan bag-ong tipan, na iyo an nag-utob kaining perpektong pagbabayad-sala sa paagi kan pagpapabulos kan saiyang sadireng dugo.
70 Iyo ini sinda na an mga hawal selestiyal, na an kamurawayan siring sa saldang, na siring sa kamurawayan nin Diyos; an pinakahalangkaw sa gabos, na an kamurawayan an saldang sa langit pinagsurat bilang sarong tipikal.
71 Asin giraray, samuyang nahiling an terestriyal na kinaban, asin hilnga asin uya, iyo ini sinda na yaon sa terestriyal, na an kamurawayan naiiba kan bagay na yaon sa simbahan kan Panganay na nagresibe kan kabilugan nin Ama, na siring baya kan bulan na naiiba sa saldang nin langit.
72Hilnga, ini iyo sinda nagkagaradan na mayong ley.
73 Asin man sainda na iyo an mga espiritu nin mga tawo na nakakulong sa prisohan, na an Ake nagbisita, asin nagbalangibog kan ebanghelyo sa sainda, na tanganing sinda paghuhusgaran uyon sa mga tawo sa laman;
74 Sinda dae nagresibe nin testimonya ni Jesus sa laman, kundi pagkagadan nagresibe kaini.
75 Iyo ini sinda na mga honorableng tawo sa kinaban, na pinaghulog sa paagi kan padaya nin mga tawo.
76 Iyo ini sinda na nagresibe kan saiyang kamurawayan, pero bako an saiyang kabilugan.
77 Iyo ini sinda na nagresibe kan presensiya nin Ake, pero bako an kabilugan kan Ama.
78 Kumbaya, sinda an mga hawak terestriyal, asin bakong mga hawak selestiyal, asin naiiba an kamurawayan siring na an bulan naiiba sa aldaw.
79 Iyo ini sinda na bakong maisog an testimonya ki Jesus, kumbaya, sinda dae nakapagkamit nin korona sa kahadean nin satuyang Diyos.
80 Asin ngonyan iyo ini an tapos kan bisyon na samuyang nahiling sa terestriyal, na an Kagurangnan nagsugo samuya na ipagsurat habang kami yaon pa sa Espiritu.
81 Asin giraray, samuyang nahiling an kamurawayan kan telestiyal, na an kamurawayan siring sa kababaan, na arog sa kamurawayan kan mga bitoon na naiiba sa kamurawayan kan bulan sa langit.
82 Ini iyo sinda na dae nagresibe kan ebanghelyo ni Cristo, ni testimonya ni Jesus.
83 Ini iyo sinda na dae nagsisikwal sa Banal na Espiritu.
84 Ini iyo sinda na pinaghulog pababa sa impiyerno.
85 Ini iyo sinda na dae pagtutubuson gikan sa diyablo sagkod sa huring pagkabuhay-liwat, sagkod na an Kagurangnan na iyo ngani si Cristo an Kordero, nakapagtapos na kan saiyang trabaho.
86 Ini iyo sinda na dae nagresibe kan saiyang kabilugan sa eternal na kinaban, kundi kan Banal na Espiritu sa paagi nin ministrasyon kan terestriyal;
87 Asin an terestriyal sa paagi nin ministrasyon kan selestiyal.
88 Asin man an telestiyal nagresibe kaining pagmiministeryo kan mga anghel na pinagtukahan na magministeryo para sainda, o pinagtukawan na magin espiritung tagapagministeryo para sainda; nin huli ta sinda magigin tagapagmana nin kaligtasan.
89 Asin kaya samuyang nahiling, sa langitnon na bisyon, an kamurawayan kan telestiyal, na minalabaw pa sa gabos na pagkakasabot;
90 Asin mayong tao an nakakaaram kaini laen lang saiya na an Diyos iyo an nagpahayag kaini.
91 Asin kaya samuyang nahiling an kamurawayan kan terestriyal na minalabaw pa sa gabos na mga bagay sa kamurawayan kan telestiyal, magin sa kamurawayan, asin sa kapangyarihan, asin sa kusog, asin sa kapamahalaan.
92 Asin kaya samuyang nahiling an kamurawayan kan selestiyal, na minalabaw pa sa gabos nga mga bagay--- kun saen an Diyos, na iyo ngani an Ama, na naghahade sa saiyang trono sagkod sa mayong kasagkoran;
93 Na kaidto pa sa trono an gabos na mga bagay nagduduko sa kapakumbabaan nin paggalang, asin nagtatao saiya nin kamurawayan sagkod sa mayong kasagkoran.
94 Sinda na nag-eerok sa saiyang presensiya iyo an kabali sa simbahan kan Panganay; asin sinda nakakahiling siring na sinda nahihiling, asin nakakaaram siring na sinda naaraman, na nakapagresibe kan saiyang kabilugan asin kan saiyang grasya;
95 Asin saiyang pinaghimong sinda pantay sa kapangyarihan, asin sa kusog, asin sa kapamahalaan.
96 Asin an kamurawayan kan selestiyal saro, siring sa kamurawayan kan saldang na saro.
97 Asin an kamurawayan kan terestriyal saro, siring sa kamurawayan kan bulan na saro.
98 Asin an kamurawayan kan telestiyal saro, siring sa kamurawayan kan mga bitoon na saro; nin huli ta siring sa sarong bitoon na naiiba sa ibang bitoon sa kamurawayan, arog kaini naiiba an saro sa iba sa kamurawayan sa telestiyal na kinaban;
99 Nin huli ta iyo ini sinda na yaon ki Paul, asin ki Apollos, asin ki Cephas.
100 Iyo ini sinda na nagsasabi na sinda yaon sa kaibahan nin saro asin an iba sa iba man--- an iba ki Cristo asin an iba ki John, asin an iba ki Moises, asin an iba ki Elias, asin an iba ki Esaias, asin an iba ki Isaiah, asin an iba ki Enoch;
101 Alagad dae nagresibe kan ebanghelyo, nin testimonya ki Jesus, ni sa mga propeta, ni sa daeng katapusan na tipan.
102 Huri sa gabos, iyo ini gabos sinda na dae pagtitiriponon sa pag-iriba kan mga banal, tanganing ipagpapamugtak pasiring sa simbahan kan Panganay, asin pagresibihon pasiring sa panginuron.
103 Iyo ini sinda na mga putikon, asin mga huklob, asin mga parasambay, asin mga patutot, asin sa kiisay man na namomoot asin naghihimo nin putik.
104 Iyo ini sinda na nagtugot sa kaanggutan nin Diyos sa kinaban.
105 Iyo ini sinda na nagtugot sa balos kan eternal na kalayo.
106 Iyo ini sinda na pinaghulog pasiring sa impiyerno asin nagtugot sa kaanggutan nin Pinakamakusog na Diyos, sagkod sa kabilugan nin mga panahon, kunsoarin na si Cristo magpapamugtak kan gabos na kaiwal sa irarom kan saiyang mga bitis, asin nakapagperpekto na kan saiyang trabaho;
107 Kunsoarin saiyang ililigtas paitaas an kahadean, asin ipagpresenta ini pasiring sa Ama, na mayong dugta, na nagsasabi: Ako nakapaglampas na asin pinagtutungtungan an gilingan nin arak na solo, magin ngani an gilingan sa arak nin kahangutan kan kaanggutan nin Pinakamakusog na Diyos.
108 Diyan pagkatapos siya pagkokoronahan nin korona kan saiyang kamurawayan, tanganing magtutukaw sa trono kan saiyang kapangyarihan tanganing maghahade sagkod sa mayong kasagkoran.
109 Pero hilnga, asin uya, samuyang nahihiling an kamurawayan asin an mga nag-eerok kan telestiyal na kinaban, na sinda siring sa mayong kabilangan na mga bitoon sa langit nin kalangitan, o siring sa buhangin sa baybayon;
110 Asin nadangog an boses nin Kagurangnan na nagsasabi: Ini gabos magduduko sa tuhod, asin an lambang dila magkukumpisal saiya na nakatukaw sa trono sagkod sa mayong kasagkoran;
111 Nin huli ta sinda paghuhusgaran uyon sa saindang mga kaggibohan, asin an lambang tawo magreresibe uyon sa saiyang sadireng kaggibohan, kan saiyang sadireng kapamahalaan, sa mga mansiyon na pinag-andam;
112 Asin sinda magigin mga surugoon kan Pinakahalangkaw; pero kun saen an Diyos asin si Cristo nag-eerok sinda dae makakadulok, sa mga kinaban na mayong katapusan.
113 Iyo ini an tapos kan bisyon na samuyang nahiling, na iyo samuya ipinagsugo na ipagsurat habang kami yaon pa sa Espiritu.
114 Alagad dakula asin marbeloso ang mga gibo nin Kagurangnan, asin an mga misteryo kan saiyang kahadean na saiyang ipinahiling sa samuya, na minalabaw pa sa gabos na pagkasabot sa kamurawayan, asin sa kusog, asin sa kapamahalaan;
115 Na saiyang pinagsugo samuya na dae nyamo ipagsurat habang kami yaon pa sa Espiritu, asin bakong matanos para sa tawo na pagsasambiton;
116 Ni an sarong tawo kapable na himoon sindang maipagpapaaram, nin huli ta sinda mahihiling sana asin maiintindihan sa paagi nin kapangyarihan kan Banal na Espiritu, na an Diyos iyo an nagputong sainda na namomoot saiya, asin pinaglilinigan an saindang sadire sa atubangan niya;
117 Sa sainda siya pinaghahayag ining pribilihiyo na makakapaghiling asin makakapag-aram para sa saindang mga sadire;
118 Na sa paagi nin kapangyarihan asin manipestasyon kan Espiritu, habang yaon sa laman, sinda mapupuwedeng makakapagtagal sa saiyang presensiya sa kinaban nin kamurawayan.
119 Asin sa Diyos asin sa Kordero na mapasainda an kamu, asin honra, asin kapamahalaan sagkod sa mayong kasagkoran. Amen.

SEKSYON 75

Kapahayagan na ipinagtao sa paagi ki Joseph Smith an Propeta, sa Amherst, Ohio, Enero 25, 1832. HS 1: 242-245. An okasyong iyo an sarong kumperensiya na dati nang pinagtalaan. Sa kumperensiyang ini si Joseph Smith pinagsustine asin pinag-ordinahan na Presidente kan Halangkaw na Pagkasaserdote. May nagkapirang elders, na nakapag-engkuwentro nin kadepisilan sa pagdadara kan mga tawo sa pagkasabot kan saindang mensahe, nagmawot na makanuod pang dagdag sa detalye kan saindang mga imedyamenteng trabaho. Ining kapahayagan an nagsunod.
*******
1-5, An mga matapat na elders na nababalangibog nin ebanghelyo makakapagguno nin eternal na buhay; 6-12, Magpangadye sa pagresibe kan Tagapaglinga, na iyo an nagtutukdo sa gabos na mga bagay; 13-22, An mga elders iyo an magtutukaw sa paghuhukom sainda na nagsikwal kan saindang mensahe; 23-26, An mga pamilya kan mga misyonaryo magreresibe nin tabang gikan sa Simbahan.
*******
Katotohanan, katotohanan, Ako nagsasabi saindo, Ako na nagtataram sa paagi kan boses nin sakuyang Espiritu, magin an Alpha asin Omega, an saindong Kagurangnan asin an saindong Diyos---
2 Maghinanyog, O kamo na nagtao kan saindong mga pangaran sa paglakbay tanganing iproklama an sakuyang ebanghelyo, asin sa pagtaralangkay kan sakuyang ubasan.
3 Hilnga, Ako nagsasabi sa saindo na iyo ini an sakuyang kagustuhan na kamo dapat na maglakbay asin dae maghaloy, ni magin hugakon kundi magtrabaho sa saindong kakayahan---
4 Ipaglangkaw an saindong boses na siring sa tunog kan sarong trumpeta, na magpoproklama nin katotoohan uyon sa mga kapahayagan asin kasugoan na Ako an nagtao saindo.
5 Asin kaya, kun kamo matapat kamo pagpapakargahon nin kadakul na mga binulto, asin pagkokoronahan nin honra, asin kamurawayan, asin immortalidad, asin eternal na buhay.
6 Kun kaya, katotohanan Ako nagsasabi sa saindo na sakuyang surugoon na si William E. McLellin, Ako an mabawi sa komisyon na Ako an nagtao sa saiya na magpaduman sa may sirangang mga nasyon;
7 Asin Ako matao sa saiya nin sarong bag-ong komisyon asin sarong bag-ong kasugoan, na Ako, an Kagurangnan, magsisilot saiya para sa mga pagngungurob-ngurob kan saiyang puso;
8 Asin siya nagkasala; daeng pagkukulang, Ako an nagpatawad saiya asin nagsasabi saiya giraray, Magpaduman ka pasiring sa mga katimogang nasyon.
9 Asin tugutan na an sakuyang surugoon na si Luke Johnson na mag-iba saiya, asin ipagproklama an mga bagay na Ako an nagsusugo sainda---
10 Mag-aapod sa pangaran nin Kagurangnan para sa Tagapaglinga, na iyo an magtutukdo sainda kan gabos na mga bagay na kapakinabangan para sainda---
11 Magpapangadye pirme na tanganing sinda dae panluluyahan; asin habang sinda naggigibo kaini, Ako magigin yaon sa sainda sagkod sa katapusan.
12 Hilnga, iyo ini an kagustuhan nin Kagurangnan an saindong Diyos mapapanungod saindo. Arog kaini. Amen.
13 Asin giraray, katotoohan kaya nagsabi an Kagurangnan, tugutan na an sakuyang surugoon na si Orson Hyde asin an sakuyang surugoon na si Samuel H. Smith maghimo kan saindang paglakbay pasiring sa mga sirangang nasyon, asin iproklama an mga bagay na Ako an nagsugo sainda; asin habang sinda magin matapat, uya, Ako magigin yaon sainda sagkod sa katapusan.
14 Asin giraray, katotohanan Ako nagsasabi sa sakuyang surugoon na si Lyman Johnson, asin sa sakuyang surugoon na si Orson Pratt, sinda man maghimo kan saindang paglakbay pasiring sa mga sirangang nasyon; asin hilnga, asin uya, Ako magigin yaon sainda man, sagkod sa katapusan.
15Asin giraray, Ako nagsasabi sa sakuyang surugoon na si Asa Dodds, asin sa sakuyang surugoon na si Calves Wilson, na sinda man maghimo kan saindang paglakbay pasiring sa mga sulnupang nasyon, asin iproklama an sakuyang ebanghelyo, siring na Ako an nagsusugo sainda.
16 Asin siya na matapat mangingibabaw sa gabos na mga bagay, asin ipagpapalangkaw sa huring aldaw.
17 Asin giraray, Ako nagsasabi sa sakuyang surugoon na si Major N. Ashley, asin sa sakuyang surugoon na si Burr Riggs, tugutan sinda na maghimo kan saindang paglakbay pasiring sa katimogang nasyon.
18 Iyo, tugutan sinda gabos na maghimo kan saindang paglakbay, siring na Ako an nagsusugo sainda, na magpaduman sa harong-harong, asin sa baryo-baryo, asin sa siyudad-siyudad.
19 Asin sa arinman na harong na saindong lalaogon, asin sinda magresibe saindo, ipagwalat an saindong bendisyon sa harong na yan.
20 Asin sa arinman na harong na saindong lalaogon, asin sinda habong magresibe saindo, kamo maghale tulos gikan sa harong na yan, asin ipagpag an alpog kan saindong mga bitis bilang sarong testimonya laban sainda.
21 Asin kamo mapapano nin kaogmahan asin pagkaogma; asin maaaraman ini, na sa aldaw nin paghuhukom kamo magigin mga huwes kan harong na yan, asin kondenahon sinda;
22 Asin ini magigin mas pang kapabayaan para sa mga pagano sa aldaw nin paghuhukom, kesa harong na yan; kun kaya, hagkosi an saindong mga habayan asin magin matapat, asin saindong mapangingibabawan an gabos na mga bagay, asin ipagpapalangkaw sagkod sa katapusang aldaw. Arog kaini. Amen.
23 Asin giraray, kaya nagsasabi an Kagurangnan sa saindo, O kamong mga elders kan sakuyang simbahan, na nagtao kan saindong mga pangaran na tangani baya na saindong maaaraman an saiyang kagustuhan mapapanungod saindo---
24 Hilnga, Ako nagsasabi sa saindo, na iyo ini an trabaho kan simbahan na magtabang sa pagsusuporta nin mga pamilya ninda, asin man sa pagsuporta kan pamilya ninda na pinag-apudan asin kaipuhan na ipagpadara pasiring sa mundo tanganing iproklama an ebanghelyo pasiring sa mundo.
25 Kumbaya, Ako, an Kagurangnan, nagtatao sa saindo kaining kasugoan, na kamo magkakaigwa nin mga lugar para sa saindong mga pamilya, habang an saindong mga katugangan nagmamawot na bukasan an saindang mga puso.
26 Asin tugutan sinda gabos na magkakaigwa nin mga lugar para sa saindang mga pamilya, asin an suporta kan simbahan para sainda, dae magpapalya na magpasiring sa mundo, maski pasiring sa sirangan o pasiring sa sulnupan, o pasiring sa hiraga, o pasiring sa timog.
27 Tugutan sindang maghagad asin saindang mareresibe, magtuktok asin ini pagbubukasan sa sainda, asin himoon na maipagpapaaram gikan sa kaitaasan, maski sa paagi kan Tagapaglinga, saen man sinda magpapaduman.
28 Asin giraray, katotohanan Ako nagsasabi sa saindo, na an lambang tawo na obligado sa pagtatao para sa saiyang sadireng pamilya, tugutan siyang magtao; asin siya dae mawawaraan kan saiyang korona; asin tugutan siyang magtrabaho sa simbahan.
29 Tugutan na an lambang tawo magin maigot sa gabos na mga bagay. Asin an hugakon dae magkakaigwa nin lugar sa simbahan, laen lang kun siya magsosolsol asin pakarhayon an saiyang mga dalan.
30 Kumbaya, tugutan na an sakuyang surugoon na si Simeon Carter asin an sakuyang surugoon na si Emer magin kasaro sa ministeryo;
31 Asin man an sakuyang surugoon na si Ezra Thayre asin an sakuyang surugoon na si Thomas B. Marsh;
32 Asin man an sakuyang surugoon na si Hyrum Smith asin an sakuyang surugoon na si Reynolds Cahoon;
33 Asin man an sakuyang surugoon na si Daniel Stanton asin an sakuyang surugoon na si Seymour Brunson;
34 Asin man an sakuyang surugoon na si Sylvester Smith asin an sakuyang surugoon na si Gideon Carter;
35 Asin man an sakuyang surugoon na si Ruggles Eames asin an sakuyang surugoon na si Stephen Burnett;
36 Asin man an sakuyang surugoon na si Milcah B. Welton asin man an sakuyang surugoon na si Eden Smith. Arog kaini. Amen.

SEKSYON 74

Kapahayagan na ipinagtao ki Joseph Smith an Propeta, sa Hiram, Ohio, Enero 1832. HS 1:242. An Propeta nagsurat, “Sa pagkaresibe kan nasambit na tataramon nin Kagurangnan (D&T 73), Ako nagpoon giraray na magsalin kan mga Eskritura, asin nagtrabaho nin maigoton hanggan bago mag-abot an kumperensiya, na magpopoon sa ika-25 kan Enero. Sa peryodong ini Ako man nagresibe kan minasunod, bilang kapaliwanagan kan 1 Korinto 7:14.
*******
1-4, Si Pablo naghulit sa simbahan kan saiyang aldaw na dae na magsunod sa ley ni Moises; 6-7, An saradi na mga kaarakian banal asin pinagpabanal sa paagi kan pagbabayad-sala.
*******
Nin huli ta an mayong pagtubod na agom na lalake pinagpapabanal sa paagi kan agom na babae, asin an mayong pagtubod na agom na babae pinagpapabanal sa paagi kan agom na lalake; ta kun laen bako daw na an saindong mga kaarakian bakong malinigon, kundi ngonyan sinda mga banal.
2 Ngonyan, sa mga aldaw kan mga apostoles an ley kan pagturi pinagsunod sa pag-iriba kan gabos na mga hudiyo na dae nagtutubod sa ebanghelyo ni JesuCristo.
3 Asin ini nangyaring naglipas na nagkaigwa nin sarong dakulang pag-iiriwal-iwal sa pag-iriba nin mga katawohan mapanungod sa ley kan pagturi, nin huli ta an daeng pagtubod na lalakeng agom nagmamawot na an saiyang mga kaarakian dapat na maturi asin magin yaon sa irarom kan ley ni Moises, na an ley iyo an nautob na.
4 Asin ini nangyaring naglipas na an mga kaarakian, sa ley pinagpadakula na yaon sa irarom ni Moises, magtao nin pagdangog sa mga tradisyon kan saindang mga ama asin dae nagtutubod sa ebanghelyo ni Cristo, na kun saen sinda nagin bakong banal.
5 Kumbaya, nin huli kaining kausa an apostol nagsurat para simbahan, pinagtatao sa sainda an sarong kasugoan, bakong sa Kagurangnan, kundi sa saiya, na tanganing an sarong paratubod dae dapat na magin sararo sa bakong paratubod; laen lang na an ley ni Moises dapat na maipagrayo sa pag-iriba ninda.
6 Na tanganing an saindang mga kaarakian mapupuwedeng bakong tinuri; asin tanganing an tradisyon puwede gayud na mipagrayo, na nagsasabi na an saradit na kaarakian bakong pinagpabanal; nin huli ta ini yaon na kaidto pa sa pag-iriba nin mga Hudiyo;
7 Pero an mga saradit na mga kaarakian iyo an pinagpabanal, na sanktipikado sa paagi kan pagbabayad-sala ni JesuCristo; asin iyo ini kun ano an boot sabihon kan mga kasuratan.

SEKSYON 73

Kapahayagan na ipinagtao kina Joseph Smith an Propeta asin Sidney Rigdon, sa Hiram, Ohio, Enero 10, 1832. HS 1:241-242. Magpoon kaidtong amay na parte kan Disyembre, an Propeta asin Sidney nagin enganyado sa pagbabalangibog, asin sa arog kaining paagi kadakul an nagkaginibohan na nagpabawas kan bakong paborableng mga pagmamati nag nag-arabot laban sa Simbahan (hilgon sa Pamayuhan sa Seksyon 71).
*******
1-2, An mga elders magpapadagos sa pagbabalangibog; 3-6, Si Joseph Smith asin Sidney Rigdon magpapadagos sa pagsasalin kan Bibiliya sagkod na ini matapos.
*******
Nin huli ta katotohanan, kaya nagsabi an Kagurangnan, ini kapakinabangan sa sakuya na sinda dapat na magpapadagos na magbabalangibog kan ebanghelyo, asin sa pagpapakusog sa mga simbahan kan mga rehiyon na nakapalibog, hanggan sa pagkumperensiya;
2 Asin pagkasunod, hilnga, ini paghihimoon na maipagpapaaram sa saindo, sa paagi kan boses sa kumperensiya, an saindang nagkapirang mga misyon.
3 Ngonyan, katotohanan Ako nagsasabi sa saindo na sakuyang mga surugoon, Joseph Smith, Jun., asin Sidney Rigdon, nagsabi an Kagurangnan, ini kapakinabangan na magsalin giraray;
4 Asin, habang ini praktikable, na magbabalangibog sa mga rehiyon na nakapalibot hanggan sa pagkumperensiya; asin pagkatapos na ini kapakinabangan na magpapadagos kan gibo nin pagsasalin sagkod na ini matapos.
5 Asin tugutan na ini sarong pangarugan para sa mga elders sagkod sa kadagdagan pang kaaraman, siring na ini naisurat na.
6 Ngonyan Ako dae na nguna makapagtao nin kadagdagan sa panahon na ini. Hagkusa an saindong mga habayan asin magin marigmat. Arog kaini. Amen.

SEKSYON 72

Kapahayagan na ipinagtao sa paagi ki Joseph Smith an Propeta, sa Kirtland, Ohio, Disyembre 4, 1831. HS 1:239-241. Nagkapirang mga elders asin mga miyembro an nag-asembliya tanganing makanuod kan saindang gibohon asin tanganing pagpakusugon sa mga katukdoan kan Simbahan. Ining seksyon iyo an kompilasyon kan duwang mga kapahayagan na naresibe sa kaparehong aldaw. An mga bersikulo 1-8 naghimong maipagpaaram an kapangapudan ni Newel K. Whitney bilang sarong bishop. Siya pagkatapos pinag-apudan asin pinag-ordinahan, pagkatapos sa bersikulo 9-26 pinagresibe na nagtatao nin kadagdagan na impormasyon manungod sa trabaho kan bishop.
*******
1-8, An mga elders magtatao nin talaan kan saindang pagpapangalaga sa bishop; 9-15, An bishop iyo an magbabantay sa kamalig asin mangangalaga sa mga kapobrehan asin nangangaipo; 16-26, An mga bishop io an magsertipiko sa pagiging maninigo kan mga elders.
*******
MAGHINANYOG, asin magdangog sa boses nin Kagurangnan, O kamong nag-asembliya kan saindong mga sadire na magkasararo, na iyo an mga haralangkaw na padi kan sakuyang simbahan, na sa saindo an kahadean asin kapangyarihan ipinagtao.
2 Nin huli ta katotohanan kaya nagsabi an Kagurangnan, ini kapakinabangan sa sakuya na sarong bishop na pagpapangaranan sa saindo, o gikan saindo, para sa simbahan sa parteng kaining ubasan nin Kagurangnan.
3 Asin katotohanan sa bagay na ini kamo nakapaggibo na may kadunungan, nin huli ta ini kinakaipuhan nin Kagurangnan sa kamot kan lambang tagapagpangalaga, na magpahiling nin sarong talaan kan saiyang kapangalagaan, pareho sa panahon asin sa eternidad.
4 Nin huli ta siya na nagin matapat asin madunong sa panahon pinagbibilang na maninigo tanganing magmamana nin mga mansiyon na pinag-andam para saiya kan sakuyang Ama.
5 Katotohanan Ako nagsasabi sa saindo, an mga elders kan simbahan kaining parte kan sakuyang ubasan magpapahiling nin sarong talaan kan saindang kapangalagaan sa bishop, na iyo an pagngangaranan ko kaining parte kan sakuyang ubasan.
6 An mga bagay na kaipuhan na nakarekord, tanganing ipagtatao sa bishop nin Sion.
7 Asin sa trabaho kan biship hihimoon na maipagpapaaram sa paagi kan mga kasugoan na ipinagtao na, asin kan boses sa kumperensiya.
8 Asin ngonyan, katotohanan Ako nagsasabi sa saindo, na an sakuyang surugoon na si Newel K Whitney iyo an tawo na pagngangaranan asin pag-oordinahan sa kapangyarhang ini. Iyo ini an kagustuhan nin Kagurangnan an saindong Diyos, an saindong Paratubos. Arog kaini. Amen.
9 An tataramon nin Kagurangnan, na kadagdagan sa ley na ipinagtao na, na pinaghimong maipagpapaaram an trabaho kan bishop na iyo an pinag-ordinahan para sa simbahan kaining parte kan ubasan, na sa katotohanan iyo ini---
10 Tanganing magbantay sa kamalig nin Kagurangnan; tanganing magreresibe nin mga pundo kan simbahan kaining parte kan ubasan;
11 Tanganing magdara nin sarong talaan kan mga elders arog kaidtong pinagsusugo; asin sa pag-administrar kan saindang pangangaipo, na magbabayad para sa mga bagay na saindang naresibe, habang sinda igwa pang maibabayad;
12 Na sa bagay na ini man mapupuwedeng konsagrahon para sa karahayan kan simbahan, para sa kapobrehan asin nangangaipo.
13 Asin siya na mayong maibabayad, sarong talaan an pagdadarahon asin ipagtatao sa bishop kan Sion, na iyo an magbabayad sa kautangan gikan duman sa bagay na an Kagurangnan an magbubugtak sa saiyang mga kamot.
14 Asin an nagkaginibohan kan matapat na nagtatrabaho sa espirituwal na mga bagay, sa pagpapamahala nin ebanghelyo asin nin mga bagay kan kahadean pasiring sa simbahan, asin pasiring sa kinaban, iyo an maninimbagan sa kautangan paduman sa bishop nin Sion;
15 Kaya ini maggigikan paluwas kan simbahan, nin huli ta uyon sa leyan lambang tawo na nagdudulok sa Sion kaipuhanan na maghahaya nin gabos na bagay sa atubangan kan bishop nin Sion.
16 Asin ngonyan, katotohanan Ako nagsasabi sa saindo, na arog sa lambang elder kaining parte kan ubasan kaipuhanan na magtatao nin sarong talaan kan saiyang kapangalagaan pasiring sa bishop kaining parte nin ubasan---
17 Sarong sertipiko gikan sa huwes o bishop kaining parte kan ubasan, pasiring sa bishop nin Sion, nagpapatotoo sa lambang tawo na akseptable, asin naninimbagan sa gabos na bagay, para sa sarong kamanahan, asin pagreresibihon bilang sarong madunong na tagapagpapangalaga asin bilang sarong matapat na trabahador;
18 Ta kun laen siya bakong akseptado kan bishop nin Sion.
19 Asin ngonyan, katotohanan Ako nagsasabi sa saindo, tugutan an lambang elder na nagtatao nin sarong talaan pasiring sa bishop nin simbahan kaining parte kan ubasan na magin rekomendado kan simbahan o kan mga simbahan, na kun saen siya nagtatrabaho, na tanganing siya mapupuwedeng makapagdulot kan sadire niya asin kan saiyang talaan na aprubado sa gabos na mga bagay.
20 Asin giraray, tugutan an sakuyang mga surugoon na pinagngaranan bilang mga tagapagpangalaga na mangingibabaw sa talagang mga kinakaipo sa sakuyang simbahan na magkaigwa nin pag-ako para sa asistensiya na gikan sa bishop o mga bishop sa gabos na mga bagay---
21 Na an mga kapahayagan mapupuwedeng maipagpublisa, asin magpapaduman pasiring sa mga katapusan kan kinaban; na sinda man makakapagkua nin mga pundo na makakapagtao nin benepisyo sa simbahan sa gabos na mga bagay;
22 Na sinda man puwedeng makakapagdulot kan saindang mga sadire na aprubado sa gabos na mga bagay, asin magin kabilang sa madudunong na mga tagapagpangalaga.
23 Asin ngonyan, hilnga, ini iyo an magigin sarong ehemplo para sa gabos na mga ekstensibong sanga kan sakuyang simbahan, sa anuman na kadagaan, na sinda magin estabilisado. Asin ngonyan Ako maghimo nin tapos kan sakuyang mga pinagsasabi. Amen.
24 Sarong dikit na kadagdagan sa mga leyes kan kahadean, na ginagalang an mga miyembro kan simbahan--- sinda na pinagngaranan sa paagi kan Banal na Espiritu na magpasiring sa Sion, asin sinda na may pribilihiyo na magpaduman sa Sion---
25 Tugutan sinda na magdadara pasiring sa bishop nin sarong sertipiko gikan sa tulong elder kan simbahan, o sarong sertipiko na gikan mismo sa bishop;
26 Kun laen siya na magpapaduman sa kadagaan nin Sion dae ipagbibilang na sarong madunong na tagapagpapangalaga. Ini saro man na ehemplo. Amen.