SEKSYON 132

Kapahayagan na ipinagtao ki Joseph Smith an Propeta, sa Nauvoo, Illinois, pinagrekord kan Hulyo 12, 1843, na minapanungod sa bago asin daeng katapusan na tipan, minabale sa eternidad kan tipan nin pag-agom, siring man sa kadakol na mga agom. HS 5:501-507. Maski na ngani na an kapahayagan pinagrekord kan 1843, ini pinapatunayan gikan sa mga historikong mga rekord na an mga doktrina asin mga prinsipyo na imbuwelto kaining kapahayagan napag-araman na kan propeta magpoon pa kan 1831.
*******
1-6, An Eksultasyon maguguno sa paagi kan bago asin daeng katapusan na tipan; 7-14, An mga termino asin mga kondisyones kaining tipan pinagtugdas; 15-20, Selestiyal na pag-agom asin an kapadagusan kan yunit nin pamilya makakagibo sa mga tawo na magigin mga diyos; 21-25, An tanos asin makitid na dalan na pasiring sa eternal na mga buhay; 26-27, Batas na ipinagtao mapanunungod sa kaulugan kontra sa Espiritu Santo; 28-39, Mga promisa kan eternal na kadagdagan asin eksultasyon pinaghimo sa mga propeta asin mga banal sa gabos na mga kapanahunan; 40-47, Si Joseph Smith pinagtaw-anan nin kapangyarihan sa pagbugkos asin pagselyo sa kinaban asin sa langit; 48-50, An Kagurangnan pinagselyo sa saiya an saiyang eksultasyon; 51-57, Si Emma Smith pinaghulitan na magin matapat asin totoo; 58-66, An mga batas na minapamahala sa kadakulan nin mga agom ipinagtugdas.
*******
KATOTOHANAN, kaya nagsabi an Kagurangnan sa saimo na sakuyang surugoon na Joseph Smith, na habang ika naghahapot sa sakuyang kamot na makaaram asin makasabot na kun saen Ako, an Kagurangnan, pinagpanindugan an sakuyang mga surugoon na sinda Abraham, Isaac, asin Jacob, siring man sinda Moises, David, asin Solomon, an sakuyang mga surugoon, na minatukar sa prinsipyo asin doktrina kan saindang pagkakaigwa nin kadakol na mga agom asin kabit---
2 Hilnga, asin uya, Ako an saimong Kagurangnan na saimong Diyos, asin magsisimbag saimo na minatukar kaining bagay.
3 Kun kaya, preparara an saimong puso sa pagresibe asin sa pagsunod sa mga instruksiyon na Ako an magtatao sa saimo; nin huli ta sa gabos ninda na igwa kaining batas na ipinagpahayag sainda kaipuhanan na magsunod kaini.
4 Nin huli ta hilnga, Ako mapahayag sa saimo nin sarong bago asin daeng katapusan na tipan; asin kun ika dae magsusunod kaining tipan, kaya ika pagkokondenaron; nin huli ta mayong makakasikwal kaining tipan asin pagtutugutan na makalaog sa sakuyang kamurawayan.
5 Nin huli ta an gabos na magkakaigwa nin sarong bendisyon sa sakuyang mga kamot magsusunod sa batas na ipinagtalaga para sa bendisyon na iyan, asin mga kondisyones kaini, siring na ini ipinagtugdas bago pa an pundasyon kaining mundo.
6 Asin siring na minapanungod sa bago asin daeng katapusan na tipan, ini ipinagtugdas para sa kabilugan kan sakuyang kamurawayan; asin siya na nakapagresibe nin sarong kabilugan kaini kaipuhanan asin magsusunod sa batas, o baya siya pagkokondenaron, nagsabi an Kagurangnang Diyos.
7 Asin katotohanan Ako nagsasabi sa saimo, na an mga kondisyones kaining batas iyo an mga ini: Gabos na mga tipan, kontrata, kasunduan, obligasyon, panunumpa, pangako, kaggibohan, koneksyon, asosasyon, o pinaglalaoman, na dae pinaghimo asin pinaglaog asin pinagselyuhan sa paagi kan Espiritu Santo nin promisa, sa saiya na iyo an pinaglahidan, pareho para sa panahon asin para sa gabos na eternidad, asin sa mas banal na gayo, sa paagi nin kapahayagan asin kasugoan sa paagi nin pananahaw kan sakuyang pinaglahidan, na Ako iyo an nagngaran sa kinaban tanganing magkapot kaining kapangyarihan (asin Ako an nagngaran sa sakuyang surugoon na si Joseph na magkapot kaining kapangyarihan sa mga huring aldaw, asin mayo ining kapangyarihan asin mga susi kaining pagkasaserdote na ipinagputong), magigin mayong kamanungdanan, birtud, o puwersa sa asin pagkatapos nin pagkabuhay-liwat gikan sa mga gadan; nin huli ta an gabos na mga kontrata na dae pinaghimo sa bagay na ini igwa nin katapusan kunsoaring na an mga tawo gadan na.
8 Hilnga, an sakuyang harong iyo an harong na igwang kahusayan, nagsabi an Kagurangnang Diyos, asin bakong harong nin kalibongan.
9 Magtatanggap daw ako nin sarong dulot, nagsabi an Kagurangnan, na dae pinaghimo sa sakuyang pangaran?
10 O baya magtatanggap daw Ako sa saindong mga kamot nin mga bagay na Ako bako an nagngaran?
11 Asin Ako daw magngangaran sa saindo, nagsabi an Kagurangnan, laen lang kun ini sa paagi nin batas, maski na ngani na siring na Ako asin an sakuyang Ama an nag-ordina sa saindo, bago pa nagin iyo an kinaban?
12 Ako an Kagurangnan na saindong Diyos; asin Ako an nagtao sa saindo kaining kasugoan--- na mayong tawo an makakadulok sa Ama kundi sa paagi ko o sa paagi kan sakuyang tataramon, na iyo an sakuyang batas, nagsabi an Kagurangnan.
13 Asin an lambang bagay na yaon sa mundo, kumbaya ini pinag-ordina nin mga tawo, sa paagi nin mga trono, o mga prinsipalidad, o mga kapangyarihan, o mga bagay nin pangaran, sa anuman na sinda nagin iyo, na bakong sa paagi ko o sa paagi nin sakuyang tataramon, nagsabi an Kagurangnan, ipag-aapon paibaba, asin dae matatada matapos na an mga tawo gadan na, ni sa o pagkatapos nin pagkabuhay-liwat, nagsabi an Kagurangnan na saindong Diyos.
14 Nin huli ta an anuman na mga bagay yaon yan sa paagi ko; asin an anuman na mga bagay na bakong sa paagi ko paglalanyugon asin pagdedestrosohon.
15 Kun kaya, kun an sarong lalake magpakasal siya sa sarong babaye na yaon sa mundo, asin siya nagpakasal sa babaye na bakong sa paagi ko o sa sakuyang tataramon, asin siya nakipagtipan sa babaye habang siya yaon sa mundo asin an babaye kaiba niya, an saindang tipan asin kasal bakong may puwersa kunsoaring na sinda garadan na, asin kunsoaring na sinda nasa luwas na nin mundo; kun kaya, sinda dae nabugkusan sa paagi nin anuman na batas kunsoaring na sinda yaon na sa luwas nin mundo.
16 Kun kaya, kunsoarin na sinda yaon sa luwas nin mundo sinda maski arin dae kinasal ni pinagtao sa kasal; kundi pinagtakdang mga anghel nin langit, na an mga anghel na ini iyo an nagmiministrong mga surugoon, tanganing magministro para sainda na mga maninigo para sa mas pa, asin sarong nagsosobra, asin sarong eternal na halaga nin kamurawayan.
17 Nin huli ta ini an mga anghel na dae nagsunod sa sakuyang batas; kun kaya, sinda dae makakapagpadakula, kundi matatadang separado asin solo, mayong eksultasyon, yaon sa saindang ligtas na kondisyon, sa gabos na eternidad; asin magpoon kaiyan bakong mga diyos, kundi iyo an mga anghel nin Diyos sagkod pa man.
18 Asin giraray, katotohanan Ako nagsasabi sa saindo, kun an sarong lalake magpakasal sa sarong babaye, asin naghimo nin sarong tipan sa babaye para sa panahon asin para sa gabos na eternidad, kun an tipan bakong sa paagi ko o sa paagi nin sakuyang tataramon, na iyo an sakuyang batas, asin ini dae pinagselyo sa paagi kan Espiritu Santo nin promisa, na sa paagi niya na Ako an naglahid asin nagngaran sa kapangyarihan na ini, kaya ini bakong balido ni may puwersa kunsoarin na sinda nasa luwas nin mundo, nin huli ta sinda dae pinagsaro sa paagi ko, nagsabi an Kagurangnan, ni sa paagi nin sakuyang tataramon; kunsoarin na sinda yaon sa luwas kan mundo ini dae mareresibe duman, nin huli ta an mga anghel asin an mga diyos iyo an pinagtalaga duman, na sa paagi ninda sinda dae makakaagi; kun kaya, sinda dae makapagmana nin sakuyang kamurawayan; nin huli ta an sakuyang harong iyo an harong nin kahusayan, nagsabi an Kagurangnang Diyos.
19 Asin giraray, katotohanan Ako nagsasabi sa saindo, kun an sarong lalake magpakasal sa sarong babaye sa paagi nin sakuyang tataramon, na iyo an sakuyang batas, asin sa paagi kan bago asin daeng katapusan na tipan, asin ini pinagselyo sa sainda sa paagi kan Banal na Espiritu nin promisa, sa paagi niya na pinaglahidan, na sa saiya Ako an nagngaran kaining kapangyarihan asin kan mga susi kaining pagkasaserdote; asin ini ipagsasabi sa sainda--- Kamo mabubuhay sa enot na pagkabuhay-liwat; asin kun ini mangyari na pagkatapos kan enot na pagkabuhay-liwat, sa masunod na pagkabuhay-liwat; asin magmamana nin mga trono, mga kahadean, mga prinsipalidad, asin mga kapangyarihan, mga kasakupan, gabos na kalangkawan asin mga kairaroman--- dangan ini ipagsusurat sa Libro nin Buhay kan Kordero, na siya dae maggigibo nin panggagadan na kun saen makapagpabulos kan inosenteng dugo, asin kun kamo mahinunod sa sakuyang tipan, asin dae nakapaggadan na kun saen nakapagpabulos nin inosenteng dugo, ini paggigibohon sa sainda sa gabos na mga bagay na anuman na an sakuyang surugoon an magpamugtak sa sainda, sa laog nin panahon, asin sa paagi kan gabos na eternidad; asin magigin yaon sa kabilugan na puwersa kunsoarin na sinda yaon na sa luwas kan mundo; asin sinda mag-aagi sa mga anghel, asin mga diyos, na ipinagpamugtak duman, para sa saindang eksultasyon asin kamurawayan sa gabos na mga bagay, siring na ini ipinagselyo na sa saindang mga payo, na an kamurawayan magigin sarong kabilugan asin sarong kapadagusan kan mga banhi sagkod sa daeng kasagkoran.
20 Dangan sinda magigin mga diyos, nin huli ta sinda mayo nang katapusan; kun kaya sinda magigin gikan sa daeng katapusan hanggan sa daeng katapusan, nin huli ta sinda padagos-dagos; dangan sinda magigin halangkaw sa gabos, nin huli ta an gabos magigin kasakupan sa sainda. Dangan sinda magigin mga diyos, nin huli ta sinda magkakaigwa nin bilog na kapangyarihan, asin an mga anghel magigin kasakupan sa sainda.
21 Katotohanan, katotohanan, Ako nagsasabi sa saindo, laen lang na kamo magsunod sa sakuyang batas kamo dae makakamit sa kamurawayang ini.
22 Nin huli ta matanos an pintuan, asin hayakpit an dalan na minadara pasiring sa eksultasyon asin kapadagusan nin mga buhay, asin kadikiton sana an nakanagbo kaini, nin huli ta kamo dae nagresibe sako sa kinaban ni kamo nakakabisto sako.
23 Pero kun kamo maresibe sako sa kinaban, dangan kamo makakabisto sako, asin makakaresibe kan saindong eksultasyon; na kun saen Ako, kamo magigin yaon man.
24 Iyo ini an eternal na mga buhay---makakabisto sa solong madunong asin tunay na Diyos, asin ki Jesukristo, na saiyang ipinagpadara. Ako iyo Siya. Kaya resibiha nindo an sakuyang batas.
25 Halakwason an pintuan, asin mahiwas an dalan na magdadara pasiring sa mga kagadanan; asin kadakol sinda na nagpasiriring palaog duman, nin huli ta sinda dae nagresibe sako, ni gibohon nindang magsunod sa sakuyang batas.
26 Katotohanan, katotohanan, Ako nagsasabi sa saindo, kun an sarong lalake magpakasal sa sarong babaye na uyon sa sakuyang tataramon, asin sinda pinagselyo sa paagi kan Banal na Espiritu nin promisa, na uyon sa sakuyang pinagtalaga, asin an lalake o babaye makakakomiter nin anuman na kasalan o kalapasan sa bago asin daeng katapusan na tipan na anuman, asin gabos na manera nin mga kaulugan, asin kun sinda dae nakakomiter nin paggadan na kun saen sinda nakapagpabulos nin inosenteng dugo, alagad sinda magbubuhat sa enot na pagkabuhay-liwat, asin maglalaog pasiring sa saindang eksultasyon; pero sinda pagdedestrosohon sa laman, asin ipaghahaya pasiring sa mga pagpapasakit ni Satanas hanggan sa aldaw nin pagtutubos, nagsabi an Kagurangnang Diyos.
27 An kaulogan laban sa Espiritu Santo, na dae pagpapatawadon sa mundo ni luwas sa mundo, iyo na kamo nakapagkomiter nin paggadan na kun saen kamo nakapagpabulos nin inosenteng dugo, asin nag-uyon sa sakuyang kagadanan, pagkatapos na kamo nagresibe sa sakuyang bago asin daeng katapusan na tipan, nagsabi an Kagurangnang Diyos; asin siya na dae nagsusunod kaining batas makakalaog na daeng duda sa sakuyang kamurawayan, pero pagkokondenaron, nagsabi an Kagurangnan.
28 Ako an Kagurangnan na saindong Diyos asin magtatao sa saindo kan batas nin sakuyang Banal na Pagkasaserdote, siring na pinag-ordina sa paagi ko asin kan sakuyang Ama bago pa an kinaban nagin iyo.
29 Si Abraham nagresibe kan gabos na mga bagay, an anuman na saiyang naresibe, sa paagi nin kapahayagan asin kasugoan, sa paagi nin sakuyang tataramon, nagsabi an Kagurangnan, asin nakapaglaog pasiring sa saiyang eksultasyon asin nagtukaw sa saiyang trono.
30 Si Abraham nagresibe nin mga promisa mapanungod kan saiyang banhi, asin kan bunga nin saiyang habayan---na kun saeng habayan kamo naggikan, arog baya, nin sakuyang surugoon na si Joseph---na magpapadagos habang sinda yaon pa sa kinaban; asin siring na nangangaputan ki Abraham asin sa saiyang banhi, sa luwas nin mundo sinda dapat na padagos-dagos; pareho sa laog nin mundo asin luwas nin mundo dapat sinda padagos-dagos siring sa daeng kabilangan na mga bitoon; o, kun kamo magbibilang nin baybay na yaon sa baybayon kamo dae makakabilang sainda.
31 An promisang ini an iyo man sa saindo, nin huli ta kamo yaon ki Abraham, asin an promisa pinaghimo ki Abraham; asin sa paagi kaining batas iyo an kapadagusan kan mga gibo nin sakuyang Ama, na kun saen Siya nakapagpamuraway kan saiyang sadire.
32 Kaya, maglakaw kamo, asin gibohon an mga gibo ni Abraham; maglaog kamo sa sakuyang batas asin kamo maliligtas.
33 Pero kun kamo dae maglaog sa sakuyang batas, kamo dae makakaresibe sa promisa nin sakuyang Ama, na saiyang pinaghimo ki Abraham.
34 An Diyos nagsugo ki Abraham, asin si Sarah nagtao ki Hagar para agomon ni Abraham. Asin tadaw baya ta ginibo niya ini? Nin huli ta iyo ini an batas; asin gikan ki Hagar nagrambong an kadakol na mga katawohan. Ini, kaya, an nakapag-utob, sa pag-iriba nin ibang mga bagay, kan mga promisa.
35 Si Abraham daw, kaya, yaon sa irarom nin kondenasyon? Katotohanan Ako nagsasabi sa saindo, Dae; nin huli ta Ako, an Kagurangnan, an nagsugo kaini.
36 Si Abraham pinagsugo na ipagdulot an saiyang akeng lalake na si Isaac; daeng pagkukulang, ini pinagsurat: Dae ka manggadan. Si Abraham, baya, dae nagsayuma, asin ini ipinagbilang sa saiya na katanosan.
37 Si Abraham nagresibe nin mga kabit, asin sinda nagdara saiya nin mga kaarakian; asin ini ipinagbilang sa saiya na katanosan, nin huli ta sinda ipinagtao sa saiya, asin siya nagsunod sa sakuyang batas; siring na si Isaac man asin si Jacob naggibo nin mayong ibang mga bagay kundi idto na sainda ipinagsugo; asin nin huli ta sinda naggibo nin mayong ibang bagay kundi idto na sainda ipinagsugo, sinda nakapaglaog pasiring sa saindang eksultasyon, na uyon sa mga promisa, asin nagtukaw sa mga trono, asin bako na mga anghel kundi mga diyos.
38 Si David man nagresibe nin kadakol na mga agom asin mga kabit, asin man si Solomon asin Moises na sakuyang mga surugoon, siring man sa kadakol na iba pa na sakuyang mga surugoon, magpoon pa sa kapinunan nin paglalang hanggan sa panahon ngunyan; asin mayo sindang naggibong kasalan lane lang idtong mga bagay na saindang naresibe na bakong gikan sako.
39 An mga agom asin mga kabit ni David ipinagtao sa saiya gikan sako, sa paagi kan kamot ni Nathan, sakuyang surugoon, asin iba pa sa mga propeta na nagkapot kan mga susi kaining kapangyarihan; asin mayo kaining mga bagay na siya naggibo nin kasalan laban sako laen lang sa kaso ni Uriah asin kan saiyang agom; asin, kaya siya nahulog gikan sa saiyang eksultasyon, asin nagresibe kan saiyang hiras; asin siya dae makakamana sainda sa luwas kan kinaban, nin huli ta Ako an nagtao sainda sa iba, nagsabi an Kagurangnan.
40 Ako an Kagurangnan saindong Diyos, asin Ako an nagtao sa saindo, kan sakuyang surugoon na si Joseph, nin sarong katalagahan, asin ta ipagbalik-liwat an gabos na mga bagay. Maghagad kan anuman na saimong ginugusto, asin ini ipagtatao sa saimo na uyon sa sakuyang tataramon.
41 Asin siring na kamo naghahapot mapanungod sa adulteryo, katotohanan, katotohanan, Ako nagsasabi sa saindo, kun an sarong lalake nagresibe nin sarong agom sa bago asin daeng katapusan na tipan, asin kun an babaye may kaiba na ibang lalake, asin Ako dae naglahid sa saiya sa paagi kan banal na paglalahid, an babaye nakapaggibo nin adulteryo asin dapat na pagdedestrosohon.
42 Kuna an babaye bakong yaon sa bago asin daeng katapusan na tipan, asin siya kaiba nin ibang lalake, siya nakapaggibo nin adulteryo.
43 Asin kun an saiyang agom na lalake kaiba nin ibang babaye, asin siya yaon sa irarom nin sarong kapangakuan, siya nakapagsala kan saiyang kapangakuan asin nakapaggibo nin adulteryo.
44 Asin kun an babaye dae nakapaggibo nin adulteryo, kun siya inosente asin dae nakapagsala kan saiyang kapangakuan, asin siya nakakaaram kaini, asin Ako an nagpahayag kaini saimo, sakuyang surugoon Joseph, dangan ika magkakaigwa nin kapangyarihan, sa paagi nin kapangyarihan kan sakuyang Banal na Pagkasaserdote, na kuahon an babaye asin ipagtao an babaye saiya na dae nakapaggibo nin adulteryo kundi nagin matapat; nin huli ta siya paghihimoon na tapagpamahala nin kadakol.
45 Nin huli ta Ako an nagtiwala sa saimo kan mga susi asin kapangyarihan kan pagkasaserdote, na kun saen Ako an magbabalik-liwat kan gabos na mga bagay, asin hihimoon na maipagpahayag sa saimo an gabos na mga bagay sa tamang panahon.
46 Asin katotohanan, katotohanan Ako nagsasabi sa saimo, na an anuman na saimong ipagselyo sa kinaban pagseselyuhan sa langit; asin an anuman na saimong pagbubugkuson sa kinaban, sa sakuyang pangaran asin sa paagi nin sakuyang tataramon, nagsabi an Kagurangnan, ini magigin daeng kasagkoran na kabugkusan sa mga langit; asin an sa kiisay man na mga kasalanan na saimong pagpatawadon sa kinaban pagpapatawadon sa daeng kasagkoran sa mga langit; asin an sa kiisay na mga kasalan na saimong pinagpadanay sa kinaban pinagpapadanay sa langit.
47 Asin giraray, katotohanan Ako nagsasabi, an siisay man na saimong pagbebendisyunan Ako an magbebendisyon, asin an siisay man na saimong pagsusumpaon Ako an magsusumpa, nagsabi an Kagurangnan; nin huli ta Ako, an Kagurangnan, an saimong Diyos.
48 Asin giraray, katotohanan Ako nagsasabi sa saimo, sakuyang surugoon Joseph, na an anuman na saimong pinagtao sa kinaban, asin sa kiisay man na ika an nagtao para kiisay sa kinaban, sa paagi nin sakuyang pangaran asin uyon kan sakuyang batas, ini pagbibisitahon kaiba an mga bendisyon asin bakong mga sumpa, asin sa sakuyang kapangyarihan, nagsabi an Kagurangnan, asin dae magkakaigwa nin kondenasyon sa kinaban asin sa langit.
49 Nin huli ta Ako an Kagurangnan na saimong Diyos, asin makakaiba maski hanggan sa katapusan nin mundo, asin sa kabilugan nin gabos na eternidad; nin huli ta sa katotohanan Ako an nagselyo sa saimo kan saimong eksultasyon, asin nag-andam nin sarong trono para saimo sa kahadean nin sakuyang Ama, kaiba si Abraham na saindong Ama.
50 Hilnga, Ako nakapaghiling kan saimong mga sakripisyo, asin magpapatawad kan gabos mong mga kasalan; Ako nakapaghiling kan saimong sakripisyo sa pagsunod kan bagay na Ako an nagtaram saimo. Kaya, lakaw, asin Ako an mahimo nin dalan para sa saimong pag-eskapo, siring na Ako nagtanggap sa dulot ni Abraham sa saiyang akeng lalake na si Isaac.
51 Katotohanan, Ako nagsasabi sa saimo: Sarong kasugoan Ako matao sa sakuyang katabang, si Emma Smith, na saimong agom, na ako an nagtao sa saimo, na siya magdanay sa sadire niya asin dae makilabot sa bagay na Ako an nagsugo saimo na ipagdulot sa saiya; nin huli ta Ako na an naggibo kaini, nagsabi an Kagurangnan, tanganing ipagprobar sa saindo gabos, siring na ini ginibo ko ki Abraham, asin na Ako puwedeng maghagad nin dulot gikan sa saimong kamot, sa paagi nin tipan asin sakripisyo.
52 Asin Tuguti an sakuyang katabang, si Emma Smith, magresibe kan gabos na idtong bagay na ipinagtao sa sakuyang surugoon na si Joseph, asin ta sinda birtuso asin puro sa atubangan ko; asin sinda na bakong puro, asin nagsabi na sinda mga puro, pagdedestrosohon, nagsabi an Kagurangnang Diyos.
53 Nin huli ta Ako an Kagurangnan saindong Diyos, asin kamo magsusunod sa sakuyang boses; asin Ako matao sa sakuyang surugoon na si Joseph na siya paghihimoon na tagapagpamahala sa kadakol na mga bagay; nin huli ta siya nagin matapat sa kadikit na mga bagay, asin magpoon ngunyan Ako an magpapakusog saiya.
54 Asin Ako masugo sa sakuyang katabang, si Emma Smith, na magsunod asin makisaro sa sakuyang surugoon na si Joseph, asin sa mayo nang iba. Pero kun siya dae magsusunod kaining kasugoan siya pagdedestrosohon, nagsabi an Kagurangnan; nin huli ta Ako an Kagurangnan saindong Diyos, asin an magdedestroso saiya kun siya dae magsunod sa sakuyang batas.
55 Pero kun siya dae masunod kaining kasugoan, dangan pa an sakuyang surugoon na si Joseph maggibo kan gabos na mga bagay para saiya, maski siring na siya an nagsabi; asin Ako an magbebendisyon saiya asin magpadakol saiya asin matao sa saiya nin ginatos na doble sa kinaban na ini, nin mga ama asin mga ina, mga tugang na lalake asin babaye, mga harong asin kadagaan, mga agom na babaye asin kaarakian, asin mga korona nin eternal na mga bagay sa mga eternal na kinaban.
56 Asin giraray, katotohanan Ako nagsasabi, Tuguti na an sakuyang katabang magpatawad sa sakuyang surugoon na si Joseph kan saiyang mga kalapasan; asin dangan pa siya pagpatawadon kan saiyang mga kalapasan, na kun saen siya makapaglapas laban sakuya; asin Ako, an Kagurangnan saindong Diyos, an magbebendisyon saiya, asin magpadakol saiya, asin himoon an saiyang puso na magin maogmahon.
57 Asin giraray, Ako nagsasabi, Tuguti na an sakuyang surugoon na si Joseph na dae paghaleon an saiyang mga rugaring sa luwas kan saiyang mga kamot, ta baka baya may sarong kaiwal na mag-abot asin destrosohon siya; nin huli ta si Satanas nagmamawot na mandestroso; nin huli ta Ako an Kagurangnan saindong Diyos, asin siya an sakuyang surugoon; asin hilnga, asin uya, Ako kaiba niya, siring na Ako ki Abraham, saindong ama, maski na pasiring sa saiyang eksultasyon asin kamurawayan.
58 Ngonyan, siring na minatukar sa batas nin pagkasaserdote, igwa nin kadakol na mga bagay na minapanungod kaini.
59 Katotohanan, kun an sarong lalake pagpangapudan kan sakuyang Ama, siring ki Aaron, sa paagi nin sakuyang sadireng boses, asin sa paagi kan boses niya na nagpadara sako, asin Ako an nagpamana saiya kan mga susi nin kapangyarihan kan saiyang pagkasaserdote, kun siya maggigibo nin anuman na bagay sa sakuyang pangaran, asin uyon sa sakuyang batas asin sa paagi kan sakuyang tataramon, siya dae makakagibo nin kasalan, asin Ako an maninindugan saiya.
60 Tuguti na mayong saro, baya, magbugtak sa sakuyang surugoon na si Joseph; nin huli ta Ako an maninindugan saiya; nin huli ta siya an maggigibo kan sakripisyo na Ako an naghagad sa saiyang mga kamot para sa saiyang mga kalapasan, nagsabi an Kagurangnan saindong Diyos.
61 Asin giraray, siring na mapanungod sa batas nin pagkasaserdote---kun an siisay na lalake na mag-agom nin sarong birhen, asin nagmawot na mag-agom nin iba pa, asin an enot nagtao kan saiyang pagtugot, asin kun an lalake nag-agom nin ikaduwa, asin sinda mga birhen, asin nakapagpangako sa mayong ibang lalake, dangan pa siya napanindugan; siya dae nakapagkomiter nin adulteryo nin huli ta sinda ipinagtao sa lalake; nin huli ta an lalake dae nakakagibo nin adulteryo sa bagay na pagsasadire niya asin mayo nang iba pa.
62 Asin kun an lalake magkaigwa nin sampulong mga birhen na ipinagtao saiya sa paagi kaining batas, siya dae nakapaggibo nin adulteryo, nin huli ta sinda pagsasadire niya, asin sinda ipinagtao sa saiya; kun kaya siya pinagpanindugan.
63 Pero kun an saro o maski arin sa sampulong mga birhen, pagkatapos na siya inagom, nakiiba sa ibang lalake, an babaye nakapaggibo nin adulteryo, asin pagdedestrosohon; nin huli ta sinda ipinagtao sa lalake, tanganing magpakadakol asin magpakadagdag sa kinaban, na uyon sa sakuyang kasugoan, asin sa pag-utob kan promisa na ipinagtao kan sakuyang Ama bago pa an pundasyon kan mundo, asin para sa saindang eksultasyon sa eternal na mga kinaban, na saindang pagdadarahon an mga kalag nin mga tawo; nin huli ta uya an gibo kan sakuyang Am pinagpapadagos, na tanganing Siya maipagpamuraway.
64 Asin giraray, katotohanan, katotohanan, Ako nagsasabi sa saindo, kun an siisay na lalake magkaigwa nin sarong agom, na kapot an mga susi kaining kapangyarihan, asin siya nagtutukdo sa babaye kan batas nin sakuyang pagkasaserdote, siring na minapanungod kaining mga bagay, dangan siya naniniwala asin nagpangalaga sa saiya, o baya an babaye pagdedestrosohon, nagsabi an Kagurangnan saindong Diyos, nin huli ta Ako an mandestroso sa babaye; nin huli ta Ako an mapadakula kan sakuyang pangaran sa gabos ninda na nagresibe asin nagsunod sa sakuyang batas.
65 Kun kaya, ini magigin tanos sako, kun an babaye dae maresibe kaining batas, para saiya na magresibe kan gabos na mga anuman na mga bagay na Ako, an Kagurangnan na saiyang Diyos, an magtatao sa saiya, nin huli ta an babaye dae nagtubod asin nagpangalaga sa saiya uyon sa sakuyang tataramon; asin dangan baya an babaye nagin iyo an paralapas; asin an lalake magin laen gikan sa batas ni Sarah, na nagpangalaga ki Abraham uyon sa batas kunsoarin na Ako an nagsugo ki Abraham na kuahon si Hagar na agom.
66 Asin ngonyan, siring na minapanungod sa batas na ini, katotohanan, katotohanan, Ako nagsasabi sa saimo, Ako magpapahayag pa nin iba pa sa saimo, pagkatapos ngonyan; kun kaya, Tuguti na tama na nguna ini para sa presente. Hilnga, Ako an Alpha asin Omega. Amen.

SEKSYON 131

An mga instruksyon ni Joseph Smith an Propeta, na ipinagtao sa Ramus, Illinois, Mayo 16 and 17, 1843. HS 5:392-393.
*******
1-4, An Selestiyal na pag-aagom esensyal sa eksultasyon sa pinakahalangkaw na langit; 5-6, Paano na an mga tawo pinagselyuhan paitaas pasiring sa eternal na buhay; 7-8, An gabos na espiritu sarong bagay.
*******
Sa selestiyal na kamurawayan igwa nin tolong kalangitan o mga grado;
2 Asin tanganing makaguno sa pinakahalangkaw, an sarong tawo dapat na maglaog kaining orden kan pagkasaserdote [Nangangahulugan kan bago asin daeng katapusan na tipan nin pag-aagom];
3 Asin kun bako, siya dae makakaguno kaini.
4 Siya puwedeng makapaglaog sa iba, pero iyo na ini an tapos kan saiyang kahadean; siya dae na makakapagdagdag.
5 (Mayo 17, 1743) Sa mas seguradong tataramon nin propesiya nangangahulugan na an sarong tawo na nakakaaram na siya pinagselyuhan pasiring sa eternal na buhay, sa paagi nin Kapahayagan asin espiritu nin propesiya, sa paagi nin kapangyarihan kan Banal na Pagkasaserdote.
6 Ini imposible sa sarong tawo na magigin ligtas sa ignoransya.
7 Mayo idtong pinagsasabing immateryal na bagay. Gabos na espiritu sarong bagay, pero ini mas pino asin puro, asin mamansayan sana sa paagi nin mga purong mga mata;
8 Kita dae makakahiling kaini; pero kunsoaring na an satuyang mga kahawakan pinaglinigan na satuyang mahihiling na ini gabos mga bagay.

SEKSYON 130

Mga bagay nin instruksyon na ipinagtao ni Joseph Smith an Propeta, sa Ramus, Illinois, Abril 2, 1843. HS 5:323-325.
*******
1-3, An Ama asin an Ake puwedeng personal na makapagpahiling sa mga tawo; 4-7, an anghel nag-eerok sa sarong selestiyal na kinamugtakan; 8-9, An selestiyal na kinaban magigin sarong mapangyaring Urim asin Thummim; 10-11, Sarong maputing gapo an ipinagtatao sa gabos ninda na naglalaog sa selestiyal na mundo; 12-17, An panahon kan Ikaduwang Pag-abot ipinagrirong sa Propeta; 18-19, An intelehensiya na naguno sa buhay na ini minabuhat kaiba nyato sa pagkabuhay-liwat; 20-21, Gabos na mga bendisyon minaabot sa paagi kan pagsunod sa batas; 22-23, An Ama asin an Ake igwa nin mga kahawakan nin laman asin mga tul-ang.
*******
Kunsoarin na an Tagapagligtas magpapahiling satuyang mahihiling siya siring na siya iyo talaga. Satuyang mahihiling na siya sarong lalake arog kan satuyang mga sadire.
2 Asin an kaparehong sosyalidad na nag-eksister satuya digde nag-eeksister sa pag-iriba nyato duman, ini sana igwa nin kaibahan nin eternal na kamurawayan, na an kamurawayan dae nyato ngunyan pinagtatamasa.
3 Juan 14:23 ---An pagpapahiling kan Ama asin kan Ake, sa bersikulong yan, iyo an sarong personal na pagpapahiling; asin an ideya na an Ama asin an Ake nag-eerok sa puso nin tawo iyo an lumang sektaryan huna-huna, asin ini palso.
4 An kasimbagan sa kahaputan--- Bako daw na an kamugtakan kan panahon nin Diyos, panahon nin mga anghel, panahon nin mga propeta, asin panahon nin tawo, nauuyon sa planeta na kun saen sinda naka-estar?
5 Ako masimbag, Iyo tabi. Pero dae nagkaigwa nin mga anghel na nagmiministeryo sa kinaban na ini kundi sinda na yaon digde o pinagtalaga kaini.
6 An mga anghel dae nag-eestar sa sarong planeta na arog kaining kinaban;
7 Pero sinda nag-eestar sa presensiya nin Diyos, sa sarong globong kaarog sa sarong dagat na salamin asin kalayo, kun saen an gabos na mga bagay para sa saindang kamurawayan namanipesto, an nakaagi, presente, asin an paabuton, asin dagos na yaon sa atubangan nin Kagurangnan.
8 An lugar na kun saen an Diyos naka-estar iyo an sarong pinakamakapangyarihan na Urim asin Thummim.
9 Ining kinaban, sa sanktipikado asin immortal na estado, paghihimoon na kaarog sa kristal asin magigin sarong Urim asin Thummim para sa mga para-erok na nag-eerok diyan, na kun saen an gabos na mga bagay na minapanungod sa sarong maluyang kahadean, o gabos na mga kahadean nin sarong hababaon na orden, maipagmamanipesto sa sainda na nag-eerok kaini; asin ining kinaban pagsasadirehon ni Kristo.
10 Dangan an puting gapo na pinagsambit sa Kapahayagan 2:17, magigin sarong Urim asin Thummim para sa lambang indibidwal na nagresibe nin saro, na kun saen an mga bagay na manunungod sa sarong harohalangkaw na orden nin mga kahadean paghihimoon na maipagpaaram;
11 Asin sarong maputing gapo an ipagtatao sa lambang saro sainda na nag-abot sa selestiyal na kahadean, na sa ibabaw may sarong bagong pangaran na nakasurat, na mayong tawo an nakakaaram laen lang siya na nakaresibe kaini. An bagong pangaran iyo an pansusing tataramon.
12 Ako mapropesiya, sa pangaran nin Kagurangnang Diyos, na an pagpopoon kan mga kadepisilan na magkakausa nin sobrang pagpapabulos nin dugo bago pa man an pag-abot kan Ake nin Tawo mangyayari sa South Carolina.
13 Ini puwede gayod maglangkaba sa paagi kan sa ekslabong kahaputan. Iyo ini an sarong boses na pinadeklara sakuya, habang ako nagpapangadye nin maigoton manunungod sa tema, Disyembre 25, 1832.
14 Ako kaidto nagpapangadye nin grabe kaigot tanganing makaaram sa panahon kan pag-abot kan Ake nin Tawo, kunsoaring ako nakapagdangog nin sarong boses na nag-otro kan minasunod:
15 Joseph, ake ko, kun ika mabubuhay hanggan ika otsenta asin limang taon an edad, saimong mahihiling an lalawgon kan Ake nin Tawo; kaya Tuguti ini na tama sana, asin dae mo na Ako pagpaparahaputon sa bagay na ini.
16 Ako pinagbayaan kaya, na dae nakakapagdesisyon kun baya ining pag-abot minapaniring sa kapinunan kan milenyum o sa iba pang dating pagpapahiling, o baya ako dapat na magadan asin Dangan mahihiling ko an saiyang lalawgon.
17 Ako naniniwala sa pag-abot kan Ake nin Tawo dae na maghahaloy kesa sa panahon na iyan.
18 Anuman an prinsipyo nin intelehensiya na satuyang makamit sa buhay na ini, ini magbubuhat kaiba nyato sa pagkabuhay-liwat.
19 Asin kun an sarong persona makakaguno nin kadagdagan pang kaaraman asin intelehensiya sa buhay na ini sa paagi kan saiyang kaigotan asin pagsunod kesa iba, siya magkakaigwa nin grabeng bentahe sa mundo na maabot.
20 Igwa nin sarong batas, na dae nang kabagohan na pinagdekrito na sa langit bago pa man an pundasyon kaining mundo, na kun saen an gabos na mga bendisyon predikado---
21 Asin kunsoaring na satuyang makamit an anuman na bendisyon gikan sa Diyos, ini iyo sa paagi nin pagsunod sa batas na iyan na kun saen ini predikado.
22 An Ama igwang kahawakan nin laman asin tul-ang siring sa nahihiling nin sa tawo; an Ake man; pero an Espiritu Santo mayong kahawakan nin laman asin tul-ang, kundi sarong personaheng Espiritu. Ta kun bako, an Espiritu Santo dae makakapag-erok sa satuya.
23 An sarong tawo puwedeng maresibe an Espiritu Santo, asin ini puwedeng maghilig sa saiya asin dae minatagal sa saiya.

SEKSYON 129

Mga instruksyon na ipinagtao ni Joseph Smith an Propeta, sa Nauvoo, Illinois, Pebrero 9, 1843, pinaghihimong maipagpaaram an tolong darakulang mga susi na kun saen an tamang natura kan pagministeryo nin mga anghel asin mga espiritu puwedeng mapag-araman. HS 5:267.
*******
1-3, Igwa nin mga parehong pinagbuhay-liwat asin mga espiritung mga kahawakan sa langit; 4-9, Mga susi ipinagtao na kun saen an mga mensahero gikan sa balyo kan belo puwedeng mapag-araman.
*******
Igwa nin duwang nilalang sa langit, na iyo ngani an pinag-aapod na: Mga anghel, na iyo an pinagbuhay-liwat na mga personahe, na igwang mga kalamnan asin mga tulang---
2 Sa enot, si Jesus nagsabi: Kapoti Ako asin hilnga, nin huli ta an sarong espiritu mayong mga laman asin mga tul-ang, siring na saindong nahiling na igwa.
3 Ikaduwa: an mga espiritu nin mga hustong tawo pinaghimong perpekto, sinda na bakong pinagbuhay-liwat, pero nagmana nin kaparehong kamurawayan.
4 Kunsoarin na an sarong mensahero gikan sa Diyos, ipagdulot mo an saimong kamot asin hagada na makipagkamotan sa saimo.
5 Kun siya sarong anghel siya maggigibo kaini, asin saimong mamatean an saiyang kamot.
6 Kun siya sarong espiritu nin sarong hustong tawo na pinaghimong perpekto siya maabot sa saiyang kamurawayan; nin huli ta sa arog sana kaining paagi na siya makakapagpahiling---
7 Hagada saiya na makipagkamotan saimo, pero siya dae makakahiro, nin huli ta ini kontraryo sa orden nin langit para sa sarong hustong tawo na makapagdaya; pero siya magpapaabot giraray kan saiyang mensahe.
8 Kun ini iyo an sarong diyablo bilang sarong anghel nin liwanag, kunsoaring na ika maghagad saiya na makipagkamotan siya magdudulot saimo kan saiyang kamot, asin ika dae makakamate nin anuman; kaya saimo tulos siyang mabisto.
9 Iyo ini an tolong darakulang mga susi na kun saen kamo puwedeng makaaram kun baya an anuman na administrasyon naggigikan sa Diyos.

SEKSYON 128

Sarong surat gikan ki Joseph Smith an Propeta para sa An Simbahan ni Jesukristo nin Mga Banal sa Huring-aldaw, na naglalaman nin kadagdagan na direksyon sa pagbubunyag para sa mga gadan; petsado sa Nauvoo, Illinois, Septyembre 6, 1842. HS 5:148-153.
*******
1-5, An lokal asin heneral na tagapagrekord kinakaipuhan na magpatotoo sa pangyayari nin mga pagbubunyag para sa mga gadan; 6-9, An saindang mga rekord may kabugkusan asin pinagrekord sa kinaban asin sa langit; 10-14, An tubadong bunyagan iyo an kaagid kan lubungan; 15-17, Si Elijah an nagbalik sa kapangyarihan na may relasyon sa pagbubunyag para sa mga gadan; 18-21, An gabos na mga susi, mga kapangyarihan, asin mga awtoridad kan mga nakaaging dispensasyon ipinagbalik; 22-25, Maogmahon asin mamurawayon na mga bareta aklamado para sa mga buhay asin mga gadan.
*******
Siring sa ako nagsabi saindo sa sakuyang surat bago ako naghale sa sakuyang lugar, na ako magsusurat sa saindo sa pana-panahon asin magtao saindo nin impormasyon na may relasyon sa kadakol na mga tema, ako ngonyan minabalik sa tema kan pagbubunyag para sa mga gadan, siring na an temang ini iyo baya an nag-okupa kan sakuyang isip, asin nagdoon ini sa sakuyang mga pagmate nin makusugon magpoon pa na ako pinaglalamag kan sakuyang mga kaiwal.
2 Ako nagsurat nin kadikiton na tataramon nin kapahayagan para saindo manunungod sa sarong tagapagrekord. Ako baya nagkaigwa nin kadikiton na kadagdagan na pananaw sa may relasyon sa bagay na ini, na ako ngonyan nagpapatotoo. Na ini baya iyo, ini pinagdeklara na sa sakuya na dating surat na dapat nag magkaigwa nin sarong tagapagrekord, na iyo an dapat na magigin testigo, asin man na mapagdangog kan saiyang mga talenga, na tangani kaya siya mapuwedeng makahimo nin sarong rekord na itatao sa atubangan nin Kagurangnan.
3 Ngonyan, sa relasyon kan bagay na ini, ini magigin masakiton na maray para sa arong tagapagrekord na magin presente sa gabos na mga panahon, asin gigibohon an gabos na bisnis. Tanganing likayan an arog na ining kadepisilan, magkaigwa dapat na tigsarong tagapagrekord na pagpangaranan sa lambang ward nin siyudad, na pinagkwalipikadong gayo para sa pagsurat nin tumpak na mga minutos; asin tugutan siya na magin partikular na gayo asin tumpak sa pagsusurat kan kabilugan na mga kapaagihan, magpapatotoo kan saiyang rekord na saiyang nahiling kan sadire niyang mga mata, asin nadangog kan saiyang mga talenga, magtatao nin petsa, asin mga pangaran, asin iba pa, asin an historiya nin kabilugan na transaksyon; magpapangaran man kan iba pang tolo na mga indibidwal na yaon, kun igwa pang iba na presente, na sa anuman na panahon maapudan na makapagpatotoo nin pareho, tangani na sa nguso nin duwa o tolong testigos an lambang tataramon puwedeng maestablisa.
4 Dangan, tuguti na magkaigwa nin sarong heneral na tagapagrekorsd, na saiya ining ibang mga rekord mapuwedeng ipagtao, na pag-aatendiran na may mga sertipikayt sa ibabaw kan saindang sadireng mga pirma, na nagpapatotoo na an rekord na saindang pinaghimo totoo. Dangan, an heneral na pansimbahang tagapagrekord puwedeng mag-entra kan rekord sa heneral na pansimbahang libro, na may mga sertipikayt asin gabos na yaraon na mga testigos na igwa nin saindang sadireng pinagsasabi na sinda sa katotohanan naniniwala na an nasa ibabaw na mga pinagsasabi asin mga rekords nanggad na totoo, gikan sa saiyang kaaraman kan heneral na karakter sin kapagngaranan sa mga tawo nin simbahan. Asin kunsoarin na ini naggibo na sa heneral na pansimbahang libro, an rekord magigin husto siring sa banal, asin maninimbagan sa ordinansa na ini pareho siring na kun siya nakapaghiling kan saiyang mga mata, asin nakapagdangog kan saiyang mga talenga, asin naghimo nin sarong parehong rekord sa heneral na pansimbahang libro.
5 Ika puwedeng nakapag-isip kaining kahusahan nin mga bagay na magigin partikular na gayo; pero tuguti na sakuyang sabihon saimo na ini iyo sana an pagsimbag sa kagustuhan nin Diyos, sa paagi nin pagkomporme sa ordinansa asin preparasyon na pinag-ordina nin Kagurangnan asin pinag-andam bago pa man an pundasyon kan mundo, para sa kaligtasan nin mga gadan na nagkagaradan na mayong kaaraman sa ebanghelyo.
6 Asin sa pagpadagos, ako mahagad saimo na giromdomon si Juan an Tagapagpahayag na pinag-isipan na gayo ining tema na may relasyon sa mga gadan, kunsoaring na siya nagdeklara, siring na saimong mananagboan na nakarekord sa Kapahayagan 20:12--- Asin ako nakahiling sa mga gadan, sadit asin darakula, nagtitindog sa atubangan nin Diyos; asin an mga libro pinagbukasan; asin an saro pang libro an pinagbukasan, na iyo ngani an libro nin buhay; asin an mga gadan pinaghusgaran gikan sa mga bagay na nakasurat sa mga libro, uyon sa saindang mga gibo.
7 Saimong madidiskubre sa kotasyon na an mga libro pinagbukasan; asin saro pang libro an pinagbukasan, na iyo ngani an libro nin buhay; pero an mga gadan pinaghusgaran gikan sa mga bagay na nakasurat sa mga libro, na uyon sa saindang mga gibo; sa kasayudan, an mga librong pinagsambit iyong gayo an mga libro na naglalaman kan rekord nin saindang mga gibo, asin minapanungod sa mga rekord na pinagsaray sa kinaban. Asin an libro na iyo ngani an libro nin buhay iyo an rekord na nakasaray sa langit; an prinsipyo minatugmang eksakto sa doktrina na ipinagsugo saimo sa kapahayagan na laman kan surat na ako an nagsurat sa saimo bago an sakong paghale sa sakuyang lugar---na sa gabos nindong mga pinagrerekord ini pinagrerekord sa langit.
8 Ngonyan, an natura kaining ordinansa konsistido sa kapangyarihan nin pagkasaserdote, sa paagi nin kapahayagan ni Jesukristo, na kun saen ini pinagtugutan na kun anoman an saindong pinagbubugkos sa kinaban pinagbubugkusan man sa lanagit, asin an anuman na saindong pinagbubuhian sa kinaban, pinagbubuhian sa langit. O, sa ibang tataramon, na hilingon sa ibang pananaw an translasyon, an anuman na pinagrerekord sa kinaban, pinagrerekord sa langit, asin an anuman na dae mo pinagrerekord sa kinaban dae pinagrerekord sa langit; nin huli ta gikan sa mga libro iyo na an saindong mga gadan paghuhusgaran, na uyon sa saindang mga nagkaginiribohan, kun baya sinda sa saindang mga sadire nakapag-atendir sa mga ordinansa na saindong sadireng propia persona, o sa paagi kan saindang sadireng mga ahente, uyon sa ordinansa na an Diyos an nag-andam para sa saindang kaligtasan bago pa an pundasyong nin mundo, na uyon sa mga rekord na sinda an nagsasaray manunungod sa saindang mga gadan.
9Ini sa paghuna kan iba magigin saro na gayong mapangahas na doktina na satuyang pinag-oorolayan--- sarong kapangyarihan na magrekord o magbugkos sa kinaban asin magbugkos sa lanagit. Daeng pagkukulang, sa gabos na panahon nin mundo; kunsoarin na an Kagurangnan nakapagtao nin sarong dispensasyon nin pagkasaserdote sa kiisay na lalake sa paagi nin aktuwal na kapahayagan, o sa kiisay na pag-iriba nin mga kalalakehan, ining kapangyarihan pirme nang ipinagtatao. Kaya, an anuman na idtong mga kalalakehan pinaggibo sa awtoridad, sa pangaran nin Kagurangnan, asin ini pinaggibo sa totoo asin sa bilog na pagtubod, asin nagsasaray nin sarong tultol asin makatubod na rekord kaini, ini magigin sarong batas sa kinaban asin sa langit, asin dae puwedeng maisamayong kamugtakan, uyon sa mga dektrito nin makusog na Jehovah. Ini sarong matapat na kasabiha. Siisay an makapagdangog kaini?
10 Asin giraray, para sa pahandigan, Mateo 16:18, 19: Asin Ako nagsasabi man sa saimo, na ika si Pedro, asin sa ibabaw kaining gapo Ako magtutugdok nin sakuyang simbahan; asin an mga pintuan nin impiyerno dae makakapagtagal laban kaini. Asin Ako magtatao sa saimo kan mga susi nin kahadean nin langit: asin an anuman na saimong pagbubugkoson sa kinaban, pagbubugkuson sa langit; asin an anuman na saimong pagbubuhian sa kinaban, pagbubuhian sa langit.
11 Ngonyan an dakula asin grandeng sekreto sa kabilugan nin mga bagay, asin an summon bonum kan bilog na tema na nakalatag sa atubangan niyato, minakonsiste sa pagkakamit nin mga kapangyarihan kan Banal na Pagkasaserdote. Para saiya na ining mga susi ipinagtao dae magkakaigwa nin kadepisilan sa pagkakamit nin kaaraman nin mga pangyayari na may relasyon sa kaligtasan nin mga kaarakian nin mga tawo, parehong gayo para sa mga gadan siring man para sa mga buhay.
12 Uya baya an kamurawayan asin honra, asin immortalidad asin eternal na buhay--- An ordinansa nin pagbubunyag sa paagi nin tubig, an paglulubog sa irarom na tanganing manimbagan na kaagid sa mga gadan, na an sarong prinsipyo puwedeng kauyon sa iba pa; an paglulubog sa tubig asin sa paghawas paluwas sa tubig iyo an kaagid sa pagkabuhay-liwat nin mga gadan sa pagluwas gikan sa saindang mga kinalubungan; kaya, ining ordinansa pinagtugdas sa pagporma nin sarong pakipagrelasyon sa ordinansa nin pagbubunyag para sa mga gadan, na yaon sa kaagidan nin mga gadan.
13 Sa kasunodan, an tubado nin pagbubunyag pinagmuntar bilang sarong kaagidan nin lubungan, asin pinagsugo na magigin yaon sa sarong lugar sa irarom na kun saen an mga buhay pirmeng ma-asembliya, tanganing ipagpahiling sa luwas an buhay asin mga gadan, asin tanganing an gabos na mga bagay magkaigwa nin saindang kaagid, asin na sinda puwedeng kauyon an saro sa iba--- an bagay na pankinabanon magigin komporme nin bagay na yaon sa langit, siring na si Pablo an nagdeklara, 1 Korinto 15: 46, 47, asin 48:
14 Paano baya ta an bakong enot iyo an espirituwal, kundi an bagay na natural; asin sa pagkatapos iyo an bagay na espirituwal. An enot na lalake iyo an yaon sa kinaban, alpog; an ikaduwang lalake iyo an Kagurangnan gikan sa langit. Siring na ini alpog, iyo man sinda na mga alpog; asin siring na ini makalangit, iyo man sinda na makalangit. Asin siring na an mga rekord sa kinaban na may relasyon sa saindong mga gadan, na tunay pinaghimo, iyo man an mga rekord sa langit. Ini, kun kaya, iyo an pagseselyo asin pagbubugkos na kapangyarihan, asin, sa sarong pakahulugan nin tataramon, an mga susi nin kahadean, na minakonsiste sa susi nin kaaraman.
15 Asin ngonyan, sakuyang minamahal na kinamutan na mga katugangan, tuguti ako na makaseguro saindo na ining mga prinsipyo na may relasyon sa mga gadan asin mga buhay na dae mapuwedeng magigin magian na ipagpasipara, siring na minapanungod sa satuyang kaligtasan. Nin huli ta an saindang kaligtasan iyo an kinakaipuhanan asin esensyal sa satuyang kaligtasan, siring na si Pablo nagsasabi manunungod sa mga ama--- na sinda na mayo kita dae magigin himoon na perpekto--- ni kita baya na mayo an satuyang mga gadan magigin himoon na perpekto.
16 Asin ngonyan, ini may relasyon sa pagbubunyag para sa mga gadan, ako magtatao saindo nin iba pang kotasyon ni Pablo, 1 Korinto 15:29: Kun iba ano baya an saindang gigibohon na mga pinagbunyagan para sa mga gadan, kun an mga gadan dae na makapagbuhat nanggad? Tadaw baya sinda lugod pinagbunyagan para sa mga gadan?
17 Asin giraray, sa koneksyon kaining kahaputan ako magtatao saindo nin sarong kotasyon gikan sa saro sa mga propeta, siisay baya na an saiyang mata nakaputitok sa restorasyon kan pagkasaserdote, an mga kamurawayan na maipagpapahayag sa huring mga aldaw, asin sa espesyal na manera ini iyo an pinakamamurawayon kan gabos na mg tema na minagikan sa daeng katapusan na ebanghelyo, na iyo, an pagbubunyag para sa mga gadan; nin huli ta si Malakias nagsasabi, sa huring tsapter, bersikulo 5 asin 6: Hilnga Ako magpapadara saindo ki Elijah an propeta bago pa mag-abot an dakula asin makangirhat na aldaw nin Kagurangnan; Asin saiyang ipagbabalik an puso kan mga ama para sa saindang mga ama, na baka baya Ako maabot asin paghahampakon an kinaban nin sarong sumpa.
18 Ako kota na makapagtao nin sarong banayad na translasyon kaini, pero ini awad nang banayad tanganing manigo sa sakuyang katuyuhan siring na ini naihayag na. Ini awad nang maaraman, sa kasong ini, na an kinaban paghahampakon nin sarong sumpa laen lang kun may sarong Tagapagsumpay na anuman o ika na tagapagtahaw kan mga ama asin mga kaarakian, sa nagkapirang tema o iba pa--- asin hilnga ano baya an temang iyan? Ini iyo an pagbubunyag para sa mga gadan. Nin huli ta kita na mayo sinda dae makakahimong magigin perpekto; ni sinda na mayo kita puwedeng makahimong magigin perpekto. Ni sinda makahimo o kita paghihimoon na perpekto na mayo sinda man na nagkagaradan na sa ebanghelyo; nin huli ta ini kinakaipuhan sa pag-aantabay kan dispensasyon sa kabilogan nin mga panahon, na ining dispensasyon iyo na ngonyan an magpopoon sa pag-antabay; na an kabilogan asin kumpleto asin perpektong pagkasararo, asin pagsusumpayon na magkakasararo an mga dispensasyon, asin mga susi, asin mga kapangyarihan, asin mga kamurawayan an dapat na mangyari, asin maipagpahayag gikan sa mga aldaw ni Adan sagkod ngonyan na presenteng panahon. Asin bako sana ini, kundi idtong mga bagay na dae pa naipagpahayag gikan pa sa pundasyon kan mundo, kaya lang pinagtagong gayo gikan sa madunong asin matiyaga, ipagpapahayag sa mga umboy asin nagsusoso kaini, an dispensasyon nin kabilogan kan mga panahon.
19 Ngonyan, ano baya an satuyang nadadangog sa ebanghelyo na satuyang naresibe? Sarong boses nin kaogmahan. Sarong boses nin pagkaherak gikan sa langit; asin sarong boses nin katotoohan nagluwas sa kinaban; maogmahong bareta para sa mga gadan; sarong boses nin kaogmahan para sa mga buhay asin mga gadan; marhay na bareta nin mga kabukidan an mga bitis ninda na nagdara nin mga maogmang bareta nin mga marahayon na bagay, asin na nagtataram sa Sion: Hilnga, an saindong Diyos naghahade! Siring sa mga ambon nin Carmel, iyo man an kaaraman nin Diyos maghihilig sa sainda!
20 Asin giraray, ano baya an satuyang nadangog? Marahayon na mga bareta an gikan sa Cumorah! Si Moroni, an anghel gikan sa langit, nagdedeklara nin kautuban kan mga propeta--- an libro na maipagpapahayag. Sarong boses nin Kagurangnan sa kaparangan nin Fayette, Seneca County, nagdedeklara sa tolong mga testigos na magpatotoo sa libro! An boses ni Miguel sa mga pangpang nin Susquehana, nahuhuknasan an diyablo kan siya nagpahiling bilang sarong anghel nin liwanag! An boses ni Pedro, Santiago, asin Juan sa kaparangan sa tahaw nin Harmony, Susquehana county, asin Colesville, Broome County, sa salog nin Susquehana, nagdedeklara kan saindang mga sadire bilang iyo an nagkakapot kan mga susi nin kahadean, asin kan dispensasyon nin kabilogan kan mga panahon.
21 Asin giraray, an boses nin Diyos sa harong nin gurang na amang Whitmer, sa Fayette, Seneca County, asin sa ibang mga panahon, asin sa iba pang mga lugar sa paagi nin gabos na mga biyahe asin tribulasyon kaining Simbahan ni Jesukristo nin Mga Banal sa Huring-aldaw! Asin an boses ni Miguel, an arkanghel; asn boses ni Gabriel, asin ni Raphael, asin iba pang mga anghel, gikan ki Miguel o Adan pababa sagkod sa presenteng panahon, gabos nagdedeklara kan saindang dispensasyon, kan saindang mga karapatan, kan saindang mga susi, kan saindang honra, kan saindang kadakulaan asin kamurawayan, asin sa kapangyarihan nin saindang pagkasaserdote; na nagtatao linya sa linya, kaisipan sa kaisipan; digde kadikit, asin duman kadikit; na nagtatao satuya nin konsolasyon sa paagi nin kapangaputan kan bagay na paabuton, na nagkukumpirma kan satuyang mga paglaom.
22 Mga katugangan, dae daw kita magpapadagos kaining sarong dakulaon na kausa? Maglakaw kang paabante asin bakong paatras. Kusog boot, mga katugangan; asin dagos, pasiring sa kapangganahan! Tuguti na an saindong mga puso magka-orogma, asin magin maogmahon na gayo. Tuguti na an kinaban maglangkaba sa pagkakanta. Tuguti na an gadan makapagtaram nin mga awit kan eternal na pag-oomaw sa Hadeng Immanuel, na iyo an nag-ordina, bago pa man an mundo nagin iyo, kan bagay na magpagibo satuya na tubuson sinda paluwas sa saindang prisohan; nin huli ta an mga prisonero dapat na magruluwas.
23 Tuguti na an mga kabukidad magkukurahaw nin kaogmahan, asin an gabos kamo na mga burobukid magkurahaw nin makusog; asin gabos kamong kadagatan asin alang na mga kadagaan ipagsabi an mga makangalasan kan saindong Eternal na Hade! Asin kamo mga salog, asin mga batis, asin mga sapa, mag-agos pababa na may kaogmahan. Tuguti an kahoy asin an gabos na mga kakahuyan nin kadagaan mag-oomaw sa Kagurangnan; asin kamo na mga solidong gapo magtangis sa kaogmahan! Asin tuguti an saldang, bulan, asin mga bitoon sa kaogmahan magka-iribahan na magkaranta, asin tuguti na an gabos na mga ake nin Diyos magkururahaw sa kaogmahan! Asin tuguti na an eternal na mga pinaglalang madeklara kan saiyang pangaran sagkod sa daeng kasagkoran. Asin giraray ako nagsasabi, gurano baya kamurawayon an boses na satuyang nadangog gikan sa langit, nagpoproklama sa satuyang mga talenga, kamurawayan, asin kaligtasan, asin honra, asin immortalidad, asin eternal na buhay; mga kahadean, mga prinsipalidad, asin mga kapangyarihan!
24 Hilnga, an dakulaon na aldaw nin Kagurangnan haranihon na; asin siisay an makaabay sa aldaw nin saiyang pag-abot, asin siisay na makakatindog kunsoarin na siya magpapahiling? Nin huli ta siya kaagid nin sarong kalayo nin panubugan, asin kaagid sa sabon nin saraan; asin siya magtutukaw na siring sa panubugan asin katumbugan nin plata, asin saiyang tutumbugon an mga akeng lalake ni Levi, asin purgahon sinda siring sa bulawan asin plata, na tangani baya sinda puwedeng magdulot sa Kagurangnan nin dulot nin katanosan. Tuguti kita, kun kaya, bilang sarong simbahan asin sarong katawohan, asin bilang Mga Banal sa Huring-aldaw, magdudulot sa Kagurangnan nin dulot nin katanosan; asin tuguti kita na magdulok sa saiyang banal na templo, kunsoarin na ini tapos na, sarong libro na naglalaman kan mga rekord nin satuyang mga gadan, na magigin maninigo kan gabos na pagtatanggap.
25 Mga katugangan, ako igwa nin kadakol na mga bagay na pagsasabihon sa saindo sa temang ini; pero magseserado sa ngonyan na presente, asin ipagpapadagos an tema sa ibang panahon. Ako iyo ini, sagkod pa man, an saindong abang surugoon asin daeng pagliliwat na amigo. JOSEPH SMITH.