SEKSYON 41

Kapahayagan na ipinagtao ki Joseph Smith an Propeta para sa Simbahan, sa Kirtland, Ohi, Pebrero 4, 1831. HS 1: 146-147. An Sanga kan Simbahan sa Kirtland sa panahon na ini mabilison na nagdadagdag nin bilang. Bilang Pangenot na tataramon sa kapahayagan na ini an Propeta nagsurat: “An mga miyembro naghihingohang gibohon an kagustuhan nin Diyos, sa abot kan saindang kaaraman kaini, alagad may nagkapirang mga balisngag na paniniwala asin palsong mga espiritu na nakapagkanap sa pag-iriba ninda…[asin] an Kagurangnan nagtao sa Simbahan kan minasunod.”

*******

1-3, An mga elder an magpapamahala sa Simbahan sa paagi kan espiritu nin kapahayagan; 4-6, An tunay na mga desipulos magreresibe asin magsusunod kan ley nin Kagurangnan; 7-12, Si Edward Partridge pinagngaranan bilang sarong Obispo kan Simbahan.

*******

MAGHINANYOG asin magdangog, O kamo na sakuyang mga katawohan, nagsabi an Kagurangnan asin an saindong Diyos, Kamo na Ako maogmahon na magbabasbas nin pinakahalangkaw sa gabos na mga bendisyon, kamo na nagdadangog sakuya; asin kamo na dae nagdadangog sakuya Ako an magsusumpa, kamo na nagpapahayag kan sakuyang pangaran, na igwang pinakamagabaton kan gabos na mga pagsusumpa.

2 Maghinanyog, O kamong mga elder kan sakuyang simbahan na Ako an nag-apod, hilnga Ako an nagtao sa saindo nin sarong kasugoan, na kamo mag-asembliya kan saindong mga sadire na magkatiripon-tipon tanganing mag-uruyon sa sakuyang tataramon;

3 Asin sa paagi nin pangadyeon kan saindong pagtubod kamo magreresibe kan sakuyang ley, na tanganing kamo mapupuwedeng makaaram kun paanohon an pagpapamahala kan sakuyang simbahan asin pag-aakoon an gabos na mga bagay na tama sa atubangan ko.

4 Asin Ako an magigin nindong tagapagpamahala sa panahon na Ako mag-abot; asin hilnga, Ako maabot nin hidalion, asin kamo maghihingoha na an sakuyang ley pinagsusunod.

5 Siya na nagresibe kan sakuyang ley asin ginigibo ini, iyo man sana an sakuyang desipulo; asin siya na nagsasabi na saiyang naresibe ini asin dae pinaggigibo ini, iyo man sana an bako kong desipulo, asin pagpapaluwason gikan sa pag-iriba nindo;

6 Nin huli ta ini bakong kapakinabangan na an mga bagay na pagsadire kan mga kaarakian nin kahadean dapat ipagtao sa sainda na bakong maninigo, o sa mga ayam, o an mga perlas na ipagpapatimasan sa atubangan kan mga orig.

7 Asin giraray, ini kapakinabangan na an sakuyang surugoon na si Joseph Smith, Jun., dapat magkaigwa nin harong na ipagtugdok, kun saen siya mag-eerok asin magsasalin.

8 Asin giraray, ini kapakinabangan na an sakuyang surugoon na si Sidney Rigdon dapat na mamumuhay sa paghuhuna niyang marahayon, habang siya nagsusunod kan sakuyang mga kasugoan.

9 Asin giraray, Ako nag-apod kan sakuyang surugoon na si Edward Partridge; asin Ako nagtatao nin sarong kasugoan, na siya dapat na pagngaranan sa paagi nin boses kan simbahan, asin pag-ordinahan na sarong Obispo kan Simbahan, na ipagwalat niya an saiyang negosyo asin gastuson an bilog niyang panahon sa mga trabaho kan simbahan;

10 Na pagpapamahalaan an gabos na mga bagay bilang ini ipinagkakatiwala sa saiya uyon sa sakuyang mga ley sa aldaw na Ako an magtatao sa sainda.

11 Asin ini nin huli sa saiyang puso na sarong maimbod sa atubangan ko, nin huli ta siya arog ki Nathanael kan luma, na saiya mayo nin digta.

12 An mga tataramon na ini ipinagtatao sa saindo, asin sinda maimbod sa atubangan ko; kumbaya, magbantay kun paano pangangatamanan sinda, nin huli ta sinda paninimbagan kan saindong mga kalag sa aldaw nin paghuhukom. Arog kaini. Amen.

SEKSYON 40

Kapahayagan na ipinagtao ki Joseph Smith an Propeta asin Sidney Rigdon, sa Fayette, New York, Enero 1831. HS 1:145. Su sinundan kan record kaining kapahayagan, an Propeta nagsurat: “Habang si James Covill nagsisikwal sa tataramon nin Kagurangnan, asin nagbalik sa dati niyang mga prinsipyo asin katawohan, an Kagurangnan nagtao sa sakuya asin Sidney Rigdon kan minasunod na kapahayagan.”

*******
1-3, Katakutan sa persekusyon asin mga kasibutan nin kinaban nagkausa nin pagsisikwal kan ebanghelyo.

*******

HILNGA, katotohanan Ako nagsasabi sa saindo, na an puso kan sakuyang surugoon na si James Covill kaidto tama sa atubangan ko, nin huli ta siya nakipagtipan sa sakuya na saiyang pagsusunudon an sakuyang tataramon.

2 Asin saiyang pinagresibe an tataramon na may kaogmahan, pero sa dalan nin katanosan si Satanas nagtentar saiya; asin an katakutan sa persekusyon asin mga kasibutan nin kinaban nagkausa saiya na magsikwal sa tataramon.

3 Kumbaya siya nagbalga sa sakuyang tipan, asin ini nasa sakuya na sana an paggibo saiya nin sa paghuhuna kong nakakarahay. Amen.

SEKSYON 39

Kapayahagan na ipinagtao sa paagi ni Joseph Smith an Propeta para ki James Covill, sa Fayette, New York, Enero 5, 1831. HS 1:143-145. Si James Covill, na sarong ministro kan Baptist sa laog nin kuwarenta anyos, nakipagtipan sa Kagurangnan na siya masunod sa anuman na kasugoan na an Kagurangnan iyo an matao saiya sa paagi ni Joseph an Propeta.

*******

1-4, An mga banal igwang kapangyarihan na magin mga akeng lalake nin Diyos; 5-6, An pagresibe kan ebanghelyo iyo an pagresibe ki Cristo; 7-14, Si James Covill pinagsugo na magpabunyag asin magtrabaho sa ubasan nin Kagurangnan; 15-21, An mga surugoon nin Kagurangnan iyo an magbabalangibog kan ebanghelyo bayo pa an ikaduwang pag-abot; 22-24, Sinda na nagresibe kan ebanghelyo pagtitiriponon sa panahon asin sa eternidad.

*******

MAGHINANYOG asin magdangog sa boses niya na naggikan sa gabos na eternidad pasiring sa gabos na eternidad, an Dakula na Akong Iyo, na iyo ngani si JesuCristo ---

2 An liwanag asin an buhay kan kinaban; sarong liwanag na nagsisirang sa kadikloman asin an kadikloman dae nakakasabot kaini;

3 Kapareho saiya na nag-abot sa katahawan nin panahon sa sakuyang pagsadire, asin an sakuyang pagsadire dae nagresibe sakuya;

4 Pero para sa kadakul na nagresibe sako, Ako nagtatao nin kapangyarihan na magin sakuyang mga akeng lalake; asin magin Ako magtatao sa kadakul pang iba na magreresibe sakuya, nin kapangyarihan na magin sakuyang mga akeng lalake.

5 Asin katotohanan, katotohanan, Ako nagsasabi sa saindo, siya na nagresibe kan sakuyang ebanghelyo nagreresibe sako; asin siya na dae nagreresibe kan sakuyang ebanghelyo dae nagreresibe sako.

6 Asin iyo ini an sakuyang ebanghelyo--- pagsosolsol asin pagpapabunyag sa paagi nin tubig, asin masunod an pagbubunyag nin kalayo asin Banal na Espiritu, magin an Tagapaglinga, na nagpapahayag kan gabos na bagay, asin nagtutukdo nin matuninongon na mga bagay kan kahadean.

7 Asin ngonyan, hilnga, Ako nagsasabi sa saimo, sakuyang surugoon na James, Ako naghihiling sa saimong mga trabaho asin Ako nakakabisto saimo.

8 Asin katotohanan Ako nagsasabi sa saimo, an saimong puso yaon ngonyan sa tama sa atubangan ko sa panahon na ini, asin, hilnga, Ako nagbabasbas nin darakulang mga bendisyon sa saimong payo;

9 Daeng pagkukulang, ika nakakapagmansay nin dakulang kamondoan, nin huli tai ka nagsikwal sakuya sa kadakul na beses nin huli sa kapaabaw-abawan asin mga kasibutan kan kinaban.

10 Pero, hilnga, an mga aldaw kan saimong katubusan nag-abot na, kun ika maghihinanyog sa sakuyang boses, na nagsasabi sa saimo: Magbuhat ka asin magpabunyag, asin hugasan an saimong mga kasalan, na nag-aapod sa sakuyang pangaran, asin saimong mareresibe an sakuyang Espiritu, asin sarong bendisyon na grabe kadakula siring sa dae mo pa nagkaararaman.

11 Asin kun saimong gigibohon ini, Ako an nag-andam saimo para sa sarong dakulaon na gibo. Ika magbabalangibog nin kabilugan kan sakuyang ebanghelyo, na Ako an nagpadara sa mga huring aldaw na ini, an tipan na Ako an nagpadara tanganing bawion an sakuyang mga katawohan, na kabali sa harong nin Israel.

12 Asin ini mangyayaring maglipas na an kapangyarihan magtugdon sa saimo; ika magkakaigwa nin dakulang pagtubod, asin Ako kaiba mo asin maglalakaw sa atubangan kan saimong lalawgon.

13 Ika pinagpapangapudan na magtrabaho sa sakuyang ubasan, asin magtugdok kan sakuyang simbahan, asin ipaglalantad paluwas an Sion, na tangani baya ini puwedeng mag-oogma sa ibabaw nin mga bulod, asin magtalubo.

14 Hilnga, katotohanan, katotohanan, Ako nagsasabi sa saimo, ika dae pinagpapangapudan na magpaduman pasiring sa mga bansa sa sirangan, pero ika pinagpapangapudan na magpaduman sa Ohio.

15 Asin habang an sakuyang mga katawohan nag-aasembliya kan saindang mga sadire sa Ohio, Ako nagsaray sa taguan nin sarong bendisyon na siring sa dae pa naaaraman sa pag-iriba kan mga kaarakian nin mga tawo, asin ini pagpapabuluson sa ibabaw kan saindang mga payo. Asin magpoon ngonyan an mga tawo magpapaduman sa gabos na mga nasyon.

16 Hilnga, katotohanan, katotohanan, Ako nagsasabi sa saimo, na an mga katawohan sa Ohio nag-aapod sa sakuya sa grabeng pagtubod, nag-iisip na Ako mamumugol kan sakuyang kamot sa paghukom sa mga nasyon, pero Ako dae makakapagsikwal kan sakuyang tataramon.

17 Kumbaya maghaya kamo kan saindong mga kusog asin mag-apod nin matapaton na mga trabahador para sa sakuyang ubasan, na tanganing ini mapungusan sa huring pagkakataon.

18 Asin habang sinda naggigibong magsosolsol asin magresibe nin kabilugan kan sakuyang ebanghelyo, asin nagin sanktipikado, Ako magpupugol kan sakuyang kamot sa paghuhukom.

19 Kumbaya, maglakaw kamo, magkurahaw sa makusog na boses, na nagsasabi: An kahadean nin langit haranihon na; Magkuruhaw: Hosanna! Bendisyunan lugod an pangaran kan Pinakahalangkaw na Diyos.

20 Maglakaw kamo na magbubunyag nin tubig, na pagprepararon an dalan sa atubangan kan sakuyang lalawgon para sa panahon kan sakuyang pag-abot;

21 Nin huli ta an panahon haranihon na; an aldaw o an oras na mayo nin tawong nakakaaram; pero ini seguradong maabot.

22 Asin siya na nagresibe kaining mga bagay nagresibe sakuya; asin sinda pagtitiripon-tiponon sa sakuya sa panahon asin sa eternidad.

23 Asin giraray, ini mangyayaring maglipas na habang kadakul kamo na pinagbubunyagan nin tubig, kamo magpapatong kan saindong mga kamot, asin sinda magreresibe kan regalo nin Banal na Espiritu, asin magbabantay kan mga senyales kan sakuyang pag-abot, asin makakabisto sako.

24 Hilnga, Ako maabot nin hidali. Arog kaini. Amen.