SEKSYON 71

Kapahayagan na ipinagtao ki Joseph Smith an Propeta asin Sidney Rigdon, sa Hiram, Ohio, Disyembre 1, 1831. HS 1:238-239. An Propeta nagpadagos sa pagsalin kan Bibliya na kaiba si Sidney Rigdon bilang saiyang parasurat sagkod na ining kapahayagan naresibe, sa panahon man sanang ini pinagtemporaryong pinasaray nguna tanganing makapagtabang sainda na utubon nguna an instruksiyon na itinao sainda digde. An mga katugangan magbibiyahe tanganing ipagbabalangibog na mahahali an bakong maninigong mga pagmamate na nagdadanay laban sa Simbahan bilang sarong resulta kan publikasyon nin mga artikulo kan ibang diyaryo ni Ezra Booth, na nag-apostasiya.
*******
1-4, Si Joseph Smith asin Sidney Rigdon ipinagpadara tanganing ipagproklama an ebanghelyo; 5-11, An mga kaiwal kan mga banal pagriribongon.
*******
HILNGA, kaya nagsabi an Kagurangnan sa saindo na sakuyang mga surugoon na si Joseph Smith, Jun., asin Sidney Rigdon, na an panahon nag-abot nang gayo na ini kinakaipuhanan asin kapakinabangan sa sakuya na kamo dapat nang magbukas kan saindong mga nguso sa pagproklama kan sakuyang ebanghelyo, kan mga bagay nin kahadean, ipagpapaliwanag an mga misteryo kaini gikan pa sa mga eskritura, na uyon sa porsiyon kan Espiritu asin kapangyarihan na ipagtatao sa saindo, na Ako an may kagustuhan.
2 Katotohanan Ako nagsasabi sa saindo, ipagproklama sa mundo sa mga rehiyon na nakapalibot, asin sa simbahan man, para sa espasyon nin sarong kapanahunan, magin sagkod na ini paghihimoon na maipagpaaram sa saindo.
3 Katotohanan iyo ini an sarong misyon para sa sarong kapanahunan, na Ako an nagtao sa sando.
4 Kumbaya, magtrabaho kamo sa sakuyang ubasan. Apudon an mga nag-eerok sa kinaban, asin magpatotoo, asin ipaghanda an dalan para sa mga kasugoan asin mga kapahayagan na mag-aarabot.
5 Ngonyan, hilnga iyo ini an kadunungan; an siisay man an nakakapagbasa, tugutan siyang makakapagsabot asin makakapagresibe man;
6 Nin huli ta sa saiya na nagreresibe kaini pagtataw-anan pa nin mas abunda, maski ngani kapangyarihan pa.
7 Kumbaya, pagriribongon an saindong mga kaiwal; pangapudan sinda na makipaghilingan saindo pareho sa atubangan nin publiko asin sa pribado; asin habang kamo matapat an saindang kasupganan paghihimoon na maipagmanipesto.
8 Kumbaya, tugutan sindang magdadara paluwas kan saindang makusog na mga rason laban sa Kagurangnan.
9 Katotohanan, kaya nagsabi an Kagurangnan sa saindo--- mayong armas na pagpopormahon laban saindo na magdadanay;
10 Asin kun igwang tawo na mag-alsa kan saindang boses laban saindo, siya pagriribongon sa sakuyang pinagtalaan na panahon.
11 Kumbaya, magsunod kamo sa sakuyang mga kasugoan; sinda totoo asin tapat. Arog kaini. Amen.