SEKSYON 69

Kapahayagan na ipinagtao sa paagi ki Joseph Smith an Propeta, sa Hiram, Ohio, Nobyembre 1831. HS 1:234-235. An katiriponan kan mga kapahayagan na pinag-andam para sa amay na publikasyon pinagpasa kan espesyal na kumperensiya kan Nobyembre 1. Kan Nobyembre 3, an kapahayagan na yaon digde bilang Seksyon 133 pinagdagdag, asin pinag-apud na Appendix. Sa paagi kan aksyon kan kumperensiya, si Oliver Cowdery an pinagngaranan na iyo an magdara kan manuskrito kan pinagtiripon na mga kapahayagan asin mga kasugoan pasiring sa Independence, Missouri, para imprintahon. Siya man an magdadara nin mga kuwarta na pinagtarao para sa pagtutugdok kan Simbahan sa Missouri. Habang an kurso kan pagbibiyahe magsusubol saiya sa pag-agi sa sarong madalang na pinag-eestaran na lugar pasiring sa prontiyera, sarong kaibahan sa pagbibiyahe an kinakaipuhan.
*******
1-2, Si John Whitmer iyo an makakaibahan ni Oliver Cowdery pagpasiring sa Missouri; 3-8, Siya man mababalangibog asin magkokolekta, magrerekord, asin magsusurat kan historikal na data.
*******
MAGHINANYOG sa sakuya, nagsabi an Kagurangnan an saindong Diyos, para sa kapakanan kan sakuyang surugoon na si Oliver Cowdery. Ini bakong kadunungan sakuya na siya dapat na pagkatiwalaan kan mga kasugoan asin mga kuwarta na saiyang pagdadarahon pasiring sa kadagaan nin Sion, laen lang na may saro na makakaibahan niya na magigin totoo asin matapat.
2 Kumbaya, Ako, an Kagurangnan, naggusto na an sakuyang surugoon, si John Whitmer, dapat na mag-iba sa sakuyang surugoon na si Oliver Cowdery.
3 Asin man na siya magpapadagos sa pagsusurat asin paggigibo nin sarong historiya kan gabos na mga importanteng bagay na saiyang naobserbaran asin naaaraman manunungod sa sakuyang simbahan;
4 Asin man na siya magresibe nin paghuhulit asin tabang gikan sa sakyang surugoon na si Oliver Cowdery asin iba pa.
5 Asin man, an sakuyang mga surugon na yaraon sa hararayong mga lugar sa kinaban dapat na magpapadara kan mga panimbagan kan saindang mga pagpapangalaga pasiring sa kadagaan nin Sion;
6 Nin huli ta an kadagaan nin Sion iyo an magigin sarong tukawan asin sarong lugar tanganing magreresibe asin maggigibo an gabos na ining mga bagay.
7 Daeng pagkukulang, tugutan an sakuyang surugoon na si John Whitmer magbibiyahe nin kadakul na beses gikan sa sarong lugar pasiring sa sarong lugar, asin gikan sa sarong simbahan pasiring sa sarong simbahan, na tanganing siya puwedeng yano na makakapagkua nin kadagdagan na kaaraman---
8 Pagbabalangibog asin Pagpapaliwanag, pagsusurat, pagkokopya, pagpipili, asin pagkakaigwa nin gabos na mga bagay na magigin para sa karahayan kan simbahan, asin para sa nagsisirang na mga henerasyon na magtatrabaho sa kadagaan nin Sion, tanganing pagsadirihon ini gikan sa sarong henerasyon pasiring sa sarong henerasyon, na daeng kasagkoran. Amen.