SEKSYON 57

Kapahayagan na ipinagtao sa paagi ki Joseph Smith an Propeta, sa Sion, Jackson Country, Missouri, Hulyo 20, 1831. HS 1:189-190. Sa pag-utob sa kasugoan nin Kagurangnan (Seksyon 52), an mga elders naglakbay gikan sa Kirtland pasiring sa Missouri na may manlaen-laen na mga eksperiyensiya asin kairibang korontrahan. Sa paghohorop-horop sa kamugtakan kan mga Lamanita asin sa kakulangan kan sibilisasyon, kapinuhan, asin relihiyon sa pag-iribahan nin mga katawohan sa pangkagabsan, an Propeta nagkurahaw sa maimbodon na pangadyeon: “Noarin an Sion itutugdok sa saiyang kamurawayan, asin saen patitindogon an saiyang Templo, na kun saen an gabos na mga nasyon makakatiripon-tipon sa mga huring aldaw?”Pagkasunod siya nagresibe kaining kapahayagan.
*******
1-3, Independence, Missouri, iyo an lugar para sa Siyudad nin Sion asin kan templo; 4-7, An mga banal kaipuhan na magbarakal nin mga kadagaan asin magresibe nin mga kamanahan sa lugar na idto; 8-16, Si Sidney Gilbert mag-establisa nin sarong tindahan, W.W. Phelps iyo an magigin para-imprinta, asin si Oliver Cowdery iyo an pararebisa kan mga materyal para sa publikasyon.
*******
MAGHINANYOG, O kamong mga elders kan sakuyang simbahan, nagsabi an Kagurangnan saindong Diyos, na iyo an nagtiripon kan saindong mga sadire na magkasararo, na uyon sa sakuyang mga kasugoan, sa kadagaan na ini, na iyo an kadagaan nin Missouri, na iyo an kadagaan na Ako an nagngaran asin nagkonsagra para sa pagkakasararo kan mga banal.
2 Kumbaya, iyo ini an daga nin promisa, asin an lugar para sa siyudad nin Sion.
3 Asin kaya nagsabi an Kagurangnan saindong Diyos, kun kamo magreresibe nin kadunungan uya an kadunungan. Hilnga, an lugar na ngonyan pinag-apud na Independence iyo an sentrong lugar; asin sarong lugar para sa templo nakalatag sa may sulnupang parte, sa sarong lote na bakong harayo gikan sa pagharongon kan korte.
4 Kumbaya, ini kadunungan na an kadagaan pagbabakalon kan mga banal, asin man an lambang lote na nakalatag sa may sulnupang parte, magin sagkod sa linya na direktang nakaguhit sa katahawan kan Hudiyo asin Hentil;
5 Asin man an lambang lote na nagsasagkod sa mga kaparangan, habang an sakuyang mga desipulos may kakayahan na magbakal nin mga kadagaan. Hilnga, uya an kadunungan, na tanganing saindang masadire ini bilang sarong daeng katapusan na kamanahan.
6 Asin tugutan an sakuyang surugoon na si Signey Gilbert na magtindog sa opisina na kun saen Ako an nagngaran saiya, na magreresibe nin mga kuwarta, na magin ahente para sa simbahan, sa pagbabakal nin mga kadagaan sa bilog na rehiyon na nakapalibot, habang ini maggigibo sa katanosan, asin habang an kadunungan iyo an magdidirekta.
7 Asin tugutan an sakuyang surugoon na si Edward Partridge na magtindog sa opisina na kun saen Ako an nagngaran saiya, asin magbabaranga-banga sa mga banal kan saindang mga kamanahan, magin siring sa Ako an nagsugo; asin man sa sainda na siya an nagngaran sa pagtabang saiya.
8 Asin giraray, katotohanan Ako nagsasabi sa saindo, tugutan na an sakuyang surugoon na si Sidney Gilbert na itanom an saiyang sadire sa lugar na ini, asin mag-establisa nin sarong tindahan, na siya puwedeng makapagtinda nin mga paninda na mayong panlilinlang, na tanganing siya puwedeng makapagkua nin kuwarta sa pagbabakal nin mga kadagaan para sa karahayan kan mga banal, asin tanganing siya mapupuwedeng makapagkua nin anuman na mga bagay na an mga desipulos kaipuhan sa pagtatanom ninda sa saindang kamanahan.
9 Asin man tugutan na an sakuyang surugoon na si Sidney Gilbert na makapagkua nin sarong lisensiya---hilnga uya an kadunungan, asin an siisay man na puwedeng makapagbasa tugutan siyang makasabot---na tanganing siya puwedeng makapagpadara nin mga paninda para sa mga katawohan, magin sa kiisay man na siya magusto bilang mga klerigong empleyado sa saiyang serbisyo;
10 Asin kaya magtao para sa sakuyang mga banal, na tanganing an sakuyang ebanghelyo mapupuwedeng maipagbalangibog sa sainda na yaon nakaturukaw sa kadikloman asin sa rehiyon asin sa anino nin kagadanan.
11 Asin giraray, katotohanan Ako nagsasabi sa saindo, tugutan an sakuyang surugoon na si William W. Phelps na maitanom sa lugar na ini, asin maipag-establisa bilang sarong para-imprinta para sa simbahan.
12 Asin baya, kun an mundo magreresibe kan saiyang mga sinurat---hilnga uya an kadunungan---tugutan siyang makapagkua nin anuman na saiyang makukua sa katanosan, para sa karahayan kan mga banal.
13 Asin tugutan an sakuyang surugoon na si Oliver Cowdery na magtabang saiya, magin siring sa Ako an nagsugo, asin sa anuman na lugar na Ako an magngangaran sa saiya, sa pagkokopya asin sa pagkokorek, asin pagpipili, na tanganing an gabos na mga bagay mapupuwedeng magin tama sa atubangan ko, siring na ini mapapatunayan kan Espiritu sa paagi niya.
14 Asin kaya tugutan sinda na Ako nakapagtaram na maitanom sa kadagaan nin Sion, siring sa hidaling makakayanan, kaiba an saindang mga pamilya, sa paggibo kaidtong mga bagay na magin siring sa Ako an nakapagtaram.
15 Asin ngonyan mapanungod sa pagtitiripon-tipon---tugutan an obispo asin an ahente na maghimo nin mga preparasyon para sa mga pamilya na pinagsugo na magpasiring sa kadagaan na ini, sa lalong madalion na panahon, asin itanom sinda sa saindang kamanahan.
16 Asin sa katadaang pareho kan mga elders asin mga miyembro an mga kadagdagang direksiyon ipagtatao na sana magpoon ngonyan. Arog kaini. Amen.