SEKSYON 53

Kapahayagan na ipinagtao sa paagi ni Joseph Smith an Propeta para ki Algernon Sidney Gilbert, sa Kirtland, Ohio, Hunyo 1831. HS 1:179-180. Sa kahagadan ni Sidney Gilbert, an Propeta naghapot sa Kagurangnan manunungod sa trabaho ni Brader Gilbert asin gigibohon sa laog kan Simbahan.
*******
1-3, An kapangapudan para ki Sidney Gilbert asin kapilian sa laog kan Simbahan iyo na pag-oordinahan bilang sarong elder; 4-7, Siya man magsisirbe bilang sarong ahente kan Obispo.
*******
HILNGA, Ako nagsasabi sa saimo, sakuyang surugoon Sidney Gilbert, na Ako nakadangog sa saimong mga pangadyeon; asin ika nakapag-apod sa sakuya na ini dapat gibohon na maipaaram sa saimo, kan Kagurangnan saimong Diyos, manunungod sa saimong kapangapudan asin kapilian sa laog kan simbahan, na Ako, an Kagurangnan, pinagbangon sa mga huring aldaw na ini.
2 Hilnga, Ako, an Kagurangnan, na ipinako sa krus para sa mga kasalan kan kinaban, nagtatao saimo nin sarong kasugoan na saimong pagtalikudan an kinaban.
3 Darahon mo an sakuyan ordinasyon, magin sarong elder, tanganing magbabalangibog nin pagtubod asin pagsosolsol asin kapatawadan kan mga kasalan, uyon sa sakuyang tataramon asin sa pag-ako kan Banal na Espiritu sa paagi kan pagpapatong nin mga kamot;
4 Asin man magin sarong ahente kaining simbahan sa lugar na ipagsasabi kan Obispo, uyon sa mga kasugoan na ipagtatao magpoon ngonyan.
5 Asin giraray, katotohanan Ako nagsasabi sa saimo, ika gumibo kan saimong paglalakbay kaiba kan sakuyang mga surugoon na sinda Joseph Smith, Jun., asin Signey Rigdon.
6 Hilnga, iyo ini an mga enot na mga ordinansa na saimong mareresibe; asin an katadaan ipagpapaaram na sana sa sarong panahon na maabot, na uyon sa saimong pagtatrabaho sa sakuyang ubasan.
7 Asin giraray, Ako nagmamawot na kamo dapat na makanuod na siya iyo sana an makakaligtas na tawong nagin matatagon sagkod sa katapusan. Arog kaini. Amen.