SEKSYON 55

Kapahayagan na ipinagtao sa paagi ni Joseph Smith an Propeta para ki William W. Phelps, sa Kirtland, Ohio, Hunyo 1831. HS 1:184-186. Si William W. Phelps, sarong para-imprenta, asin an saiyang pamilya minaabot pa sana sa Kirtland, asin an Propeta naghapot sa Kagurangnan nin impormasyon manunungod saiya.
*******
1-3, Si W.W. Phelps pinag-apod asin pinagpili tanganing pagbubunyagan; pag-oordinahan bilang sarong elder, asin magbabalangibog kan ebanghelyo; 4, Siya man magsusurat nin mga libro para sa mga kaarakian na yaon sa mga eskuwelahan kan simbahan; 5-6, Siya maglalakbay pasiring sa Missouri, na iyo an magigin lugar kan saiyang mga pagtatrabaho.
******
HILNGA, kaya nagsabi an Kagurangnan sa saimo sakuyang surugoon William, iyo, an Kagurangnan kan bilog na kinaban, ika pinag-apudan asin pinili; asin pagkatapos na ika pinagbunyagan sa paagi nin tubig, na kun saimong ginibo na may matang nakaputitok sa sakuyang kamurawayan, ika magkakaigwa nin sarong kapatawaran kan saimong mga kasalan asin sarong kaakuan kan Banal na Espiritu sa paagi kan pagpapatong nin mga kamot;
2 Asin pagkasunod ika pag-oordinahan sa paagi kan kamot kan sakuyang surugoon na si Joseph Smith, Jun., na magin sarong elder kaining simbahan, na magbabalangibog nin pagsosolsol asin kapatawaran nin mga kasalan sa paagi nin pagpapabunyag sa pangaran ni JesuCristo, an Ake kan buhay na Diyos.
3 Asin sa kiisay man na ika magpapatong kan saimong mga kamot, kun sinda nagsosolsol sa atubangan ko, ika magkakaigwa nin kapangyarihan na magtao nin Banal na Espiritu.
4 Asin giraray, ika pag-oordinahan na magtatabang sa sakuyang surugoon na si Oliver Cowdery na gibohon an trabaho nin pag-iimprinta, asin sa pagpipili asin pagsusurat nin mga libro para sa mga eskuwelahan kaining simbahan, na tanganing an saradit na kaarakian man puwedeng makaresibe nin instruksiyon sa atubangan ko siring na ini madahumon sa sakuya.
5 Asin giraray, katotohanan Ako nagsasabi sa saimo, nin huli kaining kausa ika gumibo kan saimong paglalakbay kaiba kan sakuyang mga surugoon na sinda Joseph Smith, Jun., asin Sidney Rigdon, na tanganing ika puwedeng maitanom sa kadagaan kan saimong kamanahan tanganing gibohon ining trabaho.
6 Asin giraray, tugutan an sakuyang surugoon na si Joseph Coe na gibohon man an saiyang paglalakbay kaiba ninda. An katadaan ipagpapaaram na sana pagkatapos ngonyan, siring na Ako an nagboot. Amen.