SEKSYON 127

Sarong surat na gikan ki Joseph Smith an Propeta para sa mga Banal sa Huring Aldaw sa Nauvoo, Illinois, na naglalaman nin mga direksiyon sa pagbubunyag para sa mga gadan; petsado sa Nauvoo, Septiyembre 1, 1842. HS 5:142-144.
*******
1-4, Si Joseph Smith nagpamuraway sa persekusyon asin tribulasyon; 5-12, Mga rekord kaipuhan na pagsarayon manungod sa mga pagbubunyag para sa mga gadan.
*******
Nin huling gayo na siring sa an Kagurangnan nagpahayag sa sakuya na an sakuyang mga kaiwal, pareho sa Missouri asin sa estadong ini, giraray yaon sa pagdadakop sakuya; asin habang sinda naglalamag sakuya na mayong kausa, asin mayo nin kadikit na anino o kolor nin hustisya o tama sa saindang lado na magpupursige kan saindang prosekusyon laban sakuya; asin habang an saindang mga pagsasagin-sagin gabos nakatugmad sa kapalsohan kan pinaka-itom na pantina, ako nakapag-isip kaini na kapakinabangan asin kadunungan sa sakuya na maghale sa lugar para sa kadikit na panahon, para sa sakuyang sadireng kaligtasan asin sa kaligtasan kaining mga katawohan. Ako magsasabi sa gabos saindo na ako igwa nin bisnis, na ako nagwalat kan sakuyang mga mangnuhon sa mga ahente asin mga klerigo na iyo an makikipagtransaksiyon sa gabos na bisnis nin hidali asin tamang manera, asin paghihilingon na an gabos kong kautangan mababayadan sa tamang panahon, sa paagi nin pagtatao nin propriyedad, o iba man, kun an kaso kinakaipuhanan, o siring na an mga sirkumstansiya iyo an minatugot kaini. Kunsoarin na ako nakaaram na an bagyo bilog nang tapos, saka na ako mabalik saindo giraray.
2 Asin siring sa mga kahaditan na kun saen ako pinapangapudan na pag-aagihan, sinda baya sadit sanang bagay para sako, siring baga sa inggit asin kaanggutan nin tawo na iyo na kaidto pa an sakuyang pirmeng pinagtatamasa sa gabos na mga aldaw nin sakuyang buhay; asin sa anong kausa ini baya misteryoso, laen lang na ako pinag-ordinahan gikan pa kaidtong pundasyon kan kinaban para sa ibang marahayon na tapos, o maraot, siring sa saindong puwedeng ipag-apod kaini. Maghukom kamo para sa saindong mga sadire. An Diyos nakakaaram kan gabos na ining mga bagay, kumbaya ini magigin marahay o maraot. Pero daeng pagkukulang, hararom na tubig iyo an sakuyang pirmeng pinaglalanguyan. Ini gabos nagigin ikaduwang natura para sa sako; asin ako nakamate, arog ki Paul, na magpamuraway sa tribulasyon; nin huli ta sagkod ngonyan na aldaw an Diyos nin sakuyang mga ama pinagligtas ako paharayo sainda gabos asin nagliligtas sakuya magpoon pa kaidto; nin huli ta hilnga, asin uya, ako an matrayumpo sa gabos kong mga kaiwal, nin huli ta an Kagurangnang Diyos an nagtaram kaini.
3 Tuguti baya na an gabos na mga banal magka-orogma, asin magigin maogmahon na gayo; nin huli ta an Diyos nin Israel iyo an saindang Diyos, asin siya magbabalos nin sarong hustong kabayadan nin pabuya sa mga payo kan gabos nindang paradaog-daog.
4 Asin giraray, katotohanan kaya nagsabi an Kagurangnan: Tuguti na an trabaho nin sakuyang templo, asin an gabos na mga trabaho na Ako an nagngaran para saindo, na magin padagos-dagos asin dae pag-uuntukon; asin tuguti na an saindong kaigotan, asin an saindong katiyagaan, asin pasensiya, asin an saindong mga pinagtatrabaho pagdoblehon pang gayo, asin kamo dae mawawaraan nin saindong pabuya, nagsabi an Kagurangnan nin mga Hukbo. Asin kun sinda magpapasakit saindo, sainda man bagang pinagpasakitan an mga propeta asin matatanos na mga tawo na iyo an nagka-erenot pa saindo. Nin huli ta an gabos na ini igwa nin sarong pabuya sa langit.
5 Asin giraray, Ako matao saindo nin sarong tataramon na may relasyon sa pagbubunyag para sa saindong mga gadan.
6 Katotohanan, kaya nagsabi an Kagurangnan sa saindo manunungod sa saindong mga gadan. Kunsoarin na an siisay saindo na pagbubunyagan para sa saindong mga gadan, tuguti na magkaigwa nin sarong tagapagrekord, asin tuguti siya na iyo an magigin testigo kan saindong mga pagbubunyag; tuguti siyang makapagdangog sa saiyang talenga, na tangani baya siya makapagpatotoo sa katotoohan, nagsabi an Kagurangnan.
7 Na sa gabos nindong pagtatala ini pinagtatala sa langit; an anuman na saindong pinagbubugkos sa daga, pinagbubugkos sa langit; an anuman na saindong pinagbubuhian sa daga, pinagbubuhian sa langit;
8 Nin huli ta Ako magpopoon na ipagbalik an kadakol na mga bagay sa kinaban, an mapanungod sa pagkasaserdote, nagsabi an Kagurangnan nin mga Hukbo.
9 Asin giraray, tuguti na an gabos na mga rekord magin yaon sa husay, na tanganing sinda mapuwedeng maipagkaag sa mga arkiya nin sakuyang banal na templo, ipagtatago para sa paggigiromdom gikan sa henerasyon sagkod sa henerasyon na maabot, nagsabi an Kagurangnan nin mga Hukbo.
10 Ako magsasabi sa gabos na mga banal, na ako nagmamawot, na may dakulaon na gayong pagmamawot, na ipagsasabi ninda sa atubangan an tema nin pagbubunyag para sa mga gadan, sa masunod na Sabbath. Pero habang ini luwas pa sa sakuyang kapangyarihan na paggibohon, ako magsusurat nguna nin tataramon nin Kagurangnan sa pana-panahon, manunungod sa temang ini, asin ipagpapadara ini sa sainda sa paagi nin koreo, asin sa iba pang mga bagay.
11 Ako ngonyan magseserado na kan sakuyang surat sa presente, nin huli ta may pangangaipo nin kadakol na oras; nin huli ta an kaiwal alertado na, asin siring sa sinabi nin Paraligtas, an prinsipe kaining kinaban nagrarani na, pero siya mayong makukua sakuya.
12 Hilnga, an sakuyang pangadyeon sa Diyos na kamo gabos maliligtas. Asin ako mapahinunod kan sakuyang sadire na saindong surugoon sa Kagurangnan, propeta asin tagakita kan Simbahan ni Jesukristo nin Mga Banal sa Huring-Aldaw. JOSEPH SMITH.